శ్రీ దక్షిణామూర్తి కవచం (త్రైలోక్యసంమోహనం)
గంగాధరం శశిధరం ఉమాకాంతం జగత్ప్రభుం |
దధతం జ్ఞానముద్రాం చ దక్షిణామూర్తిమాశ్రయే || 1 ||
ఆగతం మునిశార్దూలం నారదం జ్ఞానదం సదా |
దృష్ట్వా రాజా మహాబాహుః సూర్యవంశసముద్భవః |
హరిశ్చంద్రాభిధో నత్వా ప్రోవాచేదం శుచిస్మితః || 2 ||
హరిశ్చంద్ర ఉవాచ |
దేవర్షే శ్రోతుమిచ్ఛామి కవచం మంత్రవిగ్రహం |
దక్షిణామూర్తిదేవస్య వద మే నారద ప్రభో || 3 ||
నారద ఉవాచ |
శృణు రాజన్ ప్రవక్ష్యామి సర్వసంపత్ప్రదాయకం |
దక్షిణామూర్తిదేవస్య కవచం మంగళాలయం || 4 ||
యస్య శ్రవణమాత్రేణ చాష్టసిద్ధిర్భవిష్యతి |
రాజ్యసిద్ధిర్మంత్రసిద్ధిర్విద్యాసిద్ధిర్మహేశ్వర || 5 ||
భవత్యచిరకాలేన దక్షిణామూర్తివర్మతః |
పురా వైకుంఠనిలయం భగవంతం మురాంతకం || 6 ||
చతుర్బాహుమనాద్యంతం అచ్యుతం పీతవాససం |
శంఖచక్రగదాపద్మధారిణం వనమాలినం || 7 ||
సృష్టిస్థిత్యుపసంహారహేతుభూతం సనాతనం |
సర్వమంత్రమయం దేవం శైవాగమపరాయణం || 8 ||
శైవదీక్షాపరం నిత్యం శైవతత్త్వపరాయణం |
దక్షిణామూర్తి దేవస్య మంత్రోపాసనతత్పరం |
కమలా ప్రణతా భూత్వా పప్రచ్ఛ వినయాన్వితం || 9 ||
శ్రీమహాలక్ష్మీరువాచ |
నారాయణ జగన్నాథ సర్వమంగళదాయక |
దక్షిణామూర్తి దేవస్య కవచం వద మే ప్రభో || 10 ||
శ్రీనారాయణ ఉవాచ |
శృణు దేవి ప్రవక్ష్యామి కవచం పరమాద్భుతం |
అత్యంతగోపితం దేవి సర్వతంత్రేషుసిద్ధిదం || 11 ||
దక్షిణామూర్తిదేవస్య సర్వజ్ఞానోదయస్య చ |
త్రైలోక్యసంమోహనాఖ్యం బ్రహ్మమంత్రౌఘవిగ్రహం || 12 ||
సర్వపాపప్రశమనం భూతోచ్చాటనకారకం |
జయప్రదం భూపతీనాం సర్వసిద్ధిప్రదాయకం || 13 ||
లక్ష్మీవిద్యాప్రదం భద్రే సుఖసాధనముత్తమం |
కవచస్యాస్య దేవేశి ఋషిర్బ్రహ్మా ప్రకీర్తితః || 14 ||
గాయత్రీచ్ఛంద ఆదిష్ట దేవతా దక్షిణాభిదః |
విష్టపత్రయసంమోహజననాయాష్టసిద్ధిషు |
న్యాసో మూలేన వై కార్యస్తతో మంత్రార్ణకం చరేత్ || 15 ||
అస్య శ్రీదక్షిణామూర్తి త్రైలోక్యసంమోహన కవచ మహామంత్రస్య బ్రహ్మా ఋషిః గాయత్రీ ఛందః త్రైలోక్యసంమోహననామక శ్రీదక్షిణామూర్తిర్దేవతా హ్రీం బీజం నమః శక్తిః ఓం కీలకం మమ త్రైలోక్యసంమోహన సకలసాంరాజ్యదాయక శ్రీదక్షిణామూర్తి ప్రసాదసిద్ధ్యర్థే జపే వినియోగః ||
న్యాసః –
ఓం నమో భగవతే దక్షిణామూర్తయే – అంగుష్ఠాభ్యాం నమః |
తుభ్యం – తర్జనీభ్యాం నమః |
జగద్వశ్యకరాయ చ – మధ్యమాభ్యాం నమః |
త్రైలోక్యసంమోహనాయ – అనామికాభ్యాం నమః |
నమః – కనిష్ఠికాభ్యాం నమః |
సద్గతిదాయినే – కరతలకరపృష్ఠాభ్యాం నమః |
ఏవం హృదయాదిన్యాసః ||
అక్షరన్యాసః –
ఓం దం – శిరసి | ఓం క్షిం – దక్షిణనేత్రే | ఓం ణాం – వామనేత్రే | ఓం మూం – దక్షిణకర్ణే | ఓం ర్తం – వామకర్ణే | ఓం యేం – దక్షిణనాసికాయాం | ఓం తుం – వామనాసికాయాం | ఓం భ్యం – దక్షిణగండే | ఓం జం – వామగండే | ఓం గం – ఊర్ధ్వదంతపంక్తౌ | ఓం ద్వం – అధోదంతపక్తౌ | ఓం శ్యం – ఊర్ధ్వోష్ఠే | ఓం కం – అధరోష్ఠే | ఓం రాం – కంఠే | ఓం యం – హృది | ఓం చం – దక్షబాహౌ | ఓం త్రైం – వామబాహౌ | ఓం లోం – కుక్షౌ | ఓం క్యం – పృష్ఠే | ఓం నం – నాభౌ | ఓం మోం – జఠరే | ఓం హం – లింగే | ఓం నాం – మూలాధారే | ఓం యం – దక్షజానౌ | ఓం నం – వామజానౌ | ఓం మోం – దక్షోరౌ | ఓం సం – వామోరౌ | ఓం ద్గం – జంఘయోః | ఓం తిం – దక్షిణపార్ష్ణౌ | ఓం దాం – వామపార్ష్ణౌ | ఓం యిం – దక్షపాదే | ఓం నేం – వామపాదే |
ధ్యానం –
ధ్యాయేన్నిత్యం నిరీహం నిరుపమమకళం జ్యోతిరానందకందం
సచ్చిద్బ్రహ్మామృతాఖ్యం నిరతిశయసుఖం నిర్గుణం నిర్వికారం |
విశ్వాత్మాకారమేకం విదళితకలుషం దుస్తరాజ్ఞానధర్మా
నిర్ముక్తాత్మస్వరూపం శివమనిశమహం పూర్ణబోధైకరూపం ||
ఏవం ధ్యాత్వా రమాదేవి పంచపూజాం సమాచరేత్ ||
మనుః –
ఓం దక్షిణామూర్తయే తుభ్యం జగద్వశ్యకరాయ చ |
త్రైలోక్యసంమోహనాయ నమః సద్గతిదాయినే || 1 ||
ఏవం ద్వాత్రింశద్వర్ణాఖ్యం మంత్రం సంయగ్జపేత్ ప్రియే |
తతస్తు ప్రపఠేద్దేవి కవచం మంత్రవిగ్రహం || 2 ||
కవచం –
ఓం | ప్రణవో మే శిరః పాతు తారకో బ్రహ్మసంజ్ఞికః |
ఓం దక్షిణామూర్తయే తు తథా తుభ్యం తతః పరం || 3 ||
జగద్వశ్యకరాయ త్రైలోక్యసంమోహనాయ చ |
నమస్తథా సద్గతీతి దాయినే చ పదం తతః || 4 ||
ద్వాత్రింశద్వర్ణకం మంత్రం ముఖం వృత్తం సదాఽవతు |
ఓం నమో భగవతేతి దక్షిణామూర్తయేతి చ || 5 ||
మహ్యం మేధాం తథా ప్రజ్ఞాం ప్రయచ్ఛేతి పదం తతః |
స్వాహాపదాన్వితం మంత్రం చతుర్వింశార్ణకం సదా || 6 ||
దక్షిణం నేత్రకం పాతు సర్వసంపత్ప్రదాయకం |
ఓం ఐం నమః క్లీం శివాయ సౌః పదేన సమన్వితం || 7 ||
నవార్ణం పాతు సతతం వామనేత్రం సుఖప్రదం |
ప్రణవేన సమాయుక్తం మాయయా చ సమన్వితం || 8 ||
దక్షిణామూర్తయే తుభ్యం వటమూలనివాసినే |
ధ్యానైకనిరతాంగాయ నమో రుద్రాయ శంభవే || 9 ||
మాయాతారాన్వితం మంత్రం షట్త్రింశద్వర్ణసంయుతం |
మమ నేత్రద్వయం పాతు సర్వసౌభాగ్యదాయకం || 10 ||
ఓం నమో భగవతే చైవ దక్షిణామూర్తయేతి చ |
హంసః సోఽహం తథా మహ్యం మేధాం ప్రజ్ఞాం తతః పరం || 11 ||
ప్రయచ్ఛ స్వాహా చ తథా చాష్టావింశార్ణకో మనుః |
మమ కర్ణద్వయం పాతు సదా రాజ్యఫలప్రదః || 12 ||
ప్రణవేన సమాయుక్తో మాయయా చ సమన్వితః |
వాగ్భవేన సమాయుక్తో ఐం హ్రీమితి సమన్వితః || 13 ||
విద్యారాశిస్రవన్మేషు స్ఫురదూర్మిగణోల్బణః |
ఉమాసార్ధశరీరాయ నమస్తే పరమాత్మనే || 14 ||
సప్తత్రింశార్ణకః పాతు మనుర్నాసాద్వయం మమ |
ప్రణవేన సమాయుక్తః మాయాబీజసమన్వితః || 15 ||
అజ్ఞానేంధనదీప్తాయ జ్ఞానాగ్నిజ్వలదీప్తయే |
ఆనందాజ్యహవిఃప్రీత సద్జ్ఞానం చ ప్రయచ్ఛ మే || 16 ||
ద్వాత్రింశద్వర్ణసంయుక్తో లకుటాఖ్యమహేశితుః |
మనుః ఫాలనేత్రయుగ్మం పాయాన్మమ సుఖప్రదః || 17 ||
ఓం హ్రీం హ్రాం బీజయుతం చ సర్వమంగళదాయకం |
దక్షిణామూర్తయే తుభ్యం వటమూలనివాసినే || 18 ||
ధ్యానైకనిరతాంగాయ నమో రుద్రాయ శంభవే |
ఓం హ్రాం హ్రీం ఓమితి చ తథా వటమూలాఖ్యకం శుభం || 19 ||
కంఠం పాయాన్మమ సదా అష్టత్రింశాక్షరాభిధః |
ప్రణవేన సమాయుక్తో వాగ్భవేన సమన్వితః || 20 ||
మాయాబీజసమాయుక్తః సౌః కారేణ సమన్వితః |
మనుర్మమోదరం పాతు సదా వాగీశ్వరాభిదః || 21 ||
పార్శ్వయోరుభయోస్తారం మాయాబీజాన్వితం సదా |
పాయాదేకార్ణకం మంత్రం నాభిం మమ మహేశితుః || 22 ||
వాగీశ్వరాయేతి పదం విద్మహేతి పదం తతః |
విద్యావాసాయేతి పదం ధీమహీతి పదం తతః || 23 ||
తన్నో దక్షిణామూర్తిశ్చ ప్రచోదయాత్తతః పరం |
గాయత్రీ దక్షిణామూర్తేః పాతు పాదద్వయం మమ || 24 ||
ఓం నమో భగవతేతి శిరః పాయాత్సదా మమ |
హ్రాం దక్షిణామూర్తయేతి నమో ముఖం సదాఽవతు || 25 ||
హ్రీం దక్షిణామూర్తయేతి నమోఽవ్యాద్దక్షిణాదికం |
హ్రూం దక్షిణామూర్తయేతి నమో నేత్రం తు వామకం || 26 ||
హ్రైం దక్షిణామూర్తయేతి నమోఽవ్యాన్నేత్రయుగ్మకం |
హ్రౌం దక్షిణామూర్తయేతి నమో దక్షిణకర్ణకం || 27 ||
హ్రః దక్షిణామూర్తయేతి నమోఽవ్యాద్వామకర్ణకం |
ద్రాం దక్షిణామూర్తయేతి నమోఽవ్యాద్గండయుగ్మకం || 28 ||
ద్రీం దక్షిణామూర్తయేతి నమోఽవ్యాద్దక్షనాసికాం |
ద్రూం దక్షిణామూర్తయేతి నమోఽవ్యాద్వామనాసికాం || 29 ||
ద్రైం దక్షిణామూర్తయేతి నమః ఫాలం సదా మమ |
ద్రౌం దక్షిణామూర్తయేతి నమః శ్రోత్రద్వయేఽవతు || 30 ||
ద్రః దక్షిణామూర్తయేతి సమస్త్వం సద్వయం మమ |
క్లాం దక్షిణామూర్తయేతి నమో బాహుద్వయేఽవతు || 31 ||
క్లీం దక్షిణామూర్తయేతి నమః శోత్రద్వయేఽవతు |
క్లూం దక్షిణామూర్తయేతి నమో నాభిం సదాఽవతు || 32 ||
క్లైం దక్షిణామూర్తయేతి జానుయుగ్మం సదాఽవతు |
క్లౌం దక్షిణామూర్తయేతి నమః పాదద్వయం మమ || 33 ||
పాదద్వయం దక్షిణాస్యః పాతు మే జగతాం ప్రభుః |
గుల్ఫద్వయం జగన్నాథం పాతు మే పార్వతీపతిః || 34 ||
ఊరుద్వయం మహాదేవో జానుయుగ్మం జగత్ప్రభుః |
గుహ్యదేశం మధుధ్వంసీ నాభిం పాతు పురాంతకః || 35 ||
కుక్షిం పాతు జగద్రూపీ స్తనయుగ్మం త్రిలోచనః |
కరద్వయం శూలపాణిః స్కంధౌ పాతు శివాప్రియః || 36 ||
శ్రీకంఠః పాతు మే కంఠం ముఖం పద్మాసనోఽవతు |
నేత్రయుగ్మం త్రినేత్రోఽవ్యాన్నాసాం పాతు సదాశివః || 37 ||
వేదస్తుతో మే శ్రవణే ఫాలం పాతు మహాబలః |
శిరో మే భగవాన్ పాతు కేశాన్ సర్వేశ్వేరోఽవతు || 38 ||
ప్రాచ్యాం రక్షతు లోకేశస్త్వాగ్నేయ్యాం పాతు శంకరః |
దక్షిణస్యాం జగన్నాథో నైరృత్యాం పార్వతీపతిః || 39 ||
ప్రతీచ్యాం త్రిపురధ్వంసీ వాయవ్యాం పాతు సర్వగః |
ఉత్తరస్యాం దిశి సదా కుబేరస్య సఖా మమ || 40 ||
ఐశాన్యామీశ్వరః పాతు సర్వతః పాతు సర్వగః |
శిఖాం జటాధరః పాతు శిరో గంగాధరోఽవతు || 41 ||
ఫాలం పాయాత్ త్రినేత్రో మే భృవౌ పాయాజ్జగన్మయః |
త్ర్యక్షో నేత్రద్వయం పాతు శ్రుతీ శ్రుతిశిఖామయః || 42 ||
సురశ్రేష్ఠో ముఖం పాతు నాసాం పాతు శివాపతిః |
జిహ్వాం మే దక్షిణామూర్తిః హనూ పాతు మహాబలః || 43 ||
పాతు కంఠం జగద్గర్భః స్కంధౌ పరమరూపధృత్ |
కరౌ పాతు మహాప్రాజ్ఞో భక్తసంరక్షణే రతః || 44 ||
ఈశానో హృదయం పాతు మధ్యం సూక్ష్మస్వరూపధృత్ |
మహాత్మా పాతు మే నాభిం కటిం పాతు హరిప్రియః || 45 ||
పాతు గుహ్యం మహాదేవో మేఢ్రం పాతు సురేశ్వరః |
ఊరుద్వయం దక్షిణాస్యో జానుయుగ్మం సుజానుభృత్ || 46 ||
పాతు జంఘే మమ హరః పాదౌ పాతు సదాశివః |
మమ పాత్వఖిలం దేహం సర్వదైవతపూజితః || 47 ||
వస్తిం రక్షతు గౌరీశః పాయు రక్షతు మంగళః |
కైలాసనిలయః పాతు గృహం మే భూతభావనః || 48 ||
అష్టమూర్తిః సదా పాతు భక్తాన్ భృత్యాన్ సదాశివః |
లక్ష్మీప్రదః శ్రియం పాతు ఆసీనం పాతు సర్వగః || 49 ||
పాయాత్పురారిర్ఘోరేభ్యః భయేభ్యః పాతు మాం హరః |
ఉదయే పాతు భగవాన్ ప్రథమే ప్రహరే హరః || 50 ||
యామే ద్వితీయే గిరిశః ఆవర్తే దక్షిణాముఖః |
యామే తృతీయే భూతేశశ్చంద్రమౌళిశ్చతుర్థకే || 51 ||
నిశాదౌ జగతాం నాథస్త్వర్ధరాత్రే శివోఽవతు |
నిశా తృతీయయామే మాం పాతు గంగాధరో హరః || 52 ||
ప్రభాతాయాం దయాసింధుః పాయాన్మాం పార్వతీపతిః |
సుప్తం మాం పాతు జటిలః విసుప్తం ఫణిభూషణః || 53 ||
శ్రీకంఠః పాతు మాం మార్గే గ్రామేత్వన్యత్ర శూలభృత్ |
కిరాతః పాతు గహనే శైలే శైలసుతాపతిః || 54 ||
వీధ్యాం పాతు మహాబాహుః పినాకీ పాతు మాం రణే |
జలే పశుపతిః పాతు స్థలే పాతు స్థలాధిపః || 55 ||
పుర్యాం పురాధిపః పాతు దుర్గే దుర్గామనోహరః |
పాయాద్వృక్షసమీపే మాం నక్షత్రాధిపభూషణః || 56 ||
ప్రాసాదే భిత్తిదేశే వా నిర్ఘాతే వా శనౌ తథా |
సర్వకాలే సర్వదేశే పాతు మాం దక్షిణాముఖః || 57 ||
పూర్వదేశోపద్రవేభ్యః పాతు మాం పార్వతీప్రియః |
ఆగ్నేయీభ్యః తథా రుద్రో యాంయేభ్యః పాతు మృత్యుహా || 58 ||
నైరృతేభ్యః పాతు హరః పశ్చిమేభ్యో రమార్చితః |
వాయవ్యేభ్యో దేవదేవః కౌబేరేభ్యో నిధిప్రియః || 59 ||
ఐశానేభ్యో రుద్రమూర్తిః పాతు మామూర్ధ్వతః ప్రభుః |
అధస్తేభ్యో భూతనాథః పాతు మామాదిపూరుషః || 60 ||
ఇతి కవచం బాలే సర్వమంత్రౌఘవిగ్రహం |
త్రైలోక్యసంమోహనాఖ్యాం దక్షిణామూర్తిశర్మణః || 61 ||
ప్రాతఃకాలే పఠేద్యస్తు సోఽభీష్టఫలమాప్నుయాత్ |
పూజాకాలే పఠేద్యస్తు కవచం సాధకోత్తమః || 62 ||
కీర్తిం శ్రియం చ మేధాం చ ప్రజ్ఞాం ప్రాప్నోతి మానవః |
శ్రీదక్షిణామూర్తిమంత్రమయం దేవి మయోదితం || 63 ||
గురుమభ్యర్చ్య విధివత్కవచం ప్రపఠేత్తతః |
ద్విః సకృద్వా యథా న్యాయం సోఽపి పుణ్యవతాం నరః || 64 ||
దేవమభ్యర్చ్య విధివత్పురశ్చర్యాం సమాచరేత్ |
అష్టోత్తరశతం జప్త్వా దశాంశం హోమమాచరేత్ || 65 ||
తతస్తు సిద్ధకవచీ సర్వకార్యాణి సాధయేత్ |
మంత్రసిద్ధిర్భవేత్తస్య పురశ్చర్యాం వినా తతః || 66 ||
గద్యపద్యమయీ వాణీ తస్య వక్త్రే ప్రవర్తతే |
వక్త్రే తస్య వసేద్వాణీ కమలా నిశ్చలా గృహే || 67 ||
పుష్పాంజల్యష్టకం దత్వా మూలేనైవ పఠేత్తతః |
అపి వర్షసహస్రాణి పూజాయాః ఫలమాప్నుయాత్ || 68 ||
విలిఖ్య భూర్జపత్రే వా స్వర్ణే వా ధారయేద్యది |
కంఠే వా దక్షిణే బాహౌ స కుర్యాత్ స్వవశం జగత్ || 69 ||
త్రైలోక్యం క్షోభయత్యేవ త్రైలోక్యవిజయీ భవేత్ |
తద్గాత్రం ప్రాప్య శస్త్రాణి బ్రహ్మాస్త్రాదీని యాని చ || 70 ||
కౌసుమానీవ మాల్యాని సుగంధాని భవంతి హి |
స్వధాంనోత్సృజ్య భవనే లక్ష్మీర్వాణీ ముఖే వసేత్ || 71 ||
ఇదం కవచమజ్ఞాత్వా యో జపేన్మంత్రనాయకం |
శతలక్షం ప్రజప్తోఽపి న మంత్రః సిద్ధిదాయకః || 72 ||
స శస్త్రఘాతమాప్నోతి సోఽచిరాన్మృత్యుమాప్నుయాత్ |
తస్మాత్ సర్వప్రయత్నేన కవచం ప్రపఠేత్ సుధీః || 73 ||
నారద ఉవాచ |
ఏవముక్త్వా రమానాథో మంత్రం లక్ష్ంయై దదౌ హరిః |
తతో దదౌ జగన్నాథః కవచం మంత్రవిగ్రహం || 74 ||
తతో జజాప కమలా సర్వసంపత్ సమృద్ధయే |
తస్మాద్రాజేంద్ర కవచం గృహాణ ప్రదదామి తే || 75 ||
తస్య స్మరణమాత్రేణ జగద్వశ్యం భవిష్యతి |
ఇత్యుక్త్వా నారదఋషిః హరిశ్చంద్రం నరేశ్వరం |
తతో యయౌ స్వైరగతిః కైలాసం ప్రతి నారదః || 76 ||
ఇతి శ్రీదక్షిణామూర్తిసంహితాయాముత్తరభాగే స్తోత్రఖండే లక్ష్మీనారాయణ సంవాదే శ్రీ దక్షిణామూర్తి త్రైలోక్యసంమోహన కవచం నామ చతుశ్చత్వారింశోఽధ్యాయః ||
.png){kind=avatar}
.png){kind=avatar}
.png){kind=avatar}
