Sacred Stotras & Deities

శ్రీ రాఘవేంద్ర స్తోత్రం

శ్రీపూర్ణబోధగురుతీర్థపయోబ్ధిపారా
కామారిమాక్షవిషమాక్షశిరః స్పృశంతీ |
పూర్వోత్తరామితతరంగచరత్సుహంసా
దేవాళిసేవితపరాంఘ్రిపయోజలగ్నా || 1 ||
జీవేశభేదగుణపూర్తిజగత్సుసత్త్వ
నీచోచ్చభావముఖనక్రగణైః సమేతా |
దుర్వాద్యజాపతిగిళైః గురురాఘవేంద్ర
వాగ్దేవతాసరిదముం విమలీ కరోతు || 2 ||
శ్రీరాఘవేంద్రః సకలప్రదాతా
స్వపాదకంజద్వయభక్తిమద్భ్యః |
అఘాద్రిసంభేదనదృష్టివజ్రః
క్షమాసురేంద్రోఽవతు మాం సదాఽయం || 3 ||
శ్రీరాఘవేంద్రో హరిపాదకంజ-
నిషేవణాల్లబ్ధసమస్తసంపత్ |
దేవస్వభావో దివిజద్రుమోఽయం
ఇష్టప్రదో మే సతతం స భూయాత్ || 4 ||
భవ్యస్వరూపో భవదుఃఖతూల-
సంఘాగ్నిచర్యః సుఖధైర్యశాలీ |
సమస్తదుష్టగ్రహనిగ్రహేశో
దురత్యయోపప్లవసింధుసేతుః || 5 ||
నిరస్తదోషో నిరవద్యవేషః
ప్రత్యర్థిమూకత్త్వనిదానభాషః |
విద్వత్పరిజ్ఞేయమహావిశేషో
వాగ్వైఖరీనిర్జితభవ్యశేషః || 6 ||
సంతానసంపత్పరిశుద్ధభక్తి-
విజ్ఞానవాగ్దేహసుపాటవాదీన్ |
దత్త్వా శరీరోత్థసమస్తదోషాన్
హత్త్వా స నోఽవ్యాద్గురురాఘవేంద్రః || 7 ||
యత్పాదోదకసంచయః సురనదీముఖ్యాపగాసాదితా-
సంఖ్యాఽనుత్తమపుణ్యసంఘవిలసత్ప్రఖ్యాతపుణ్యావహః |
దుస్తాపత్రయనాశనో భువి మహా వంధ్యాసుపుత్రప్రదో
వ్యంగస్వంగసమృద్ధిదో గ్రహమహాపాపాపహస్తం శ్రయే || 8 ||
యత్పాదకంజరజసా పరిభూషితాంగా
యత్పాదపద్మమధుపాయితమానసా యే |
యత్పాదపద్మపరికీర్తనజీర్ణవాచ
స్తద్దర్శనం దురితకాననదావభూతం || 9 ||
సర్వతంత్రస్వతంత్రోఽసౌ శ్రీమధ్వమతవర్ధనః |
విజయీంద్రకరాబ్జోత్థసుధీంద్రవరపుత్రకః |
శ్రీరాఘవేంద్రో యతిరాట్ గురుర్మే స్యాద్భయాపహః |
జ్ఞానభక్తిసుపుత్రాయుః యశః శ్రీః పుణ్యవర్ధనః || 10 ||
ప్రతివాదిజయస్వాంతభేదచిహ్నాదరో గురుః |
సర్వవిద్యాప్రవీణోఽన్యో రాఘవేంద్రాన్నవిద్యతే || 11 ||
అపరోక్షీకృతశ్రీశః సముపేక్షితభావజః |
అపేక్షితప్రదాతాఽన్యో రాఘవేంద్రాన్నవిద్యతే || 12 ||
దయాదాక్షిణ్యవైరాగ్యవాక్పాటవముఖాంకితః |
శాపానుగ్రహశక్తోఽన్యో రాఘవేంద్రాన్నవిద్యతే || 13 ||
అజ్ఞానవిస్మృతిభ్రాంతిసంశయాఽపస్మృతిక్షయాః |
తంద్రాకంపవచఃకౌణ్ఠ్యముఖా యే చేంద్రియోద్భవాః |
దోషాస్తే నాశమాయాంతి రాఘవేంద్ర ప్రసాదతః || 14 ||
ఓం శ్రీరాఘవేంద్రాయ నమః ఇత్యఽష్టాక్షరమంత్రతః |
జపితాద్భావితాన్నిత్యం ఇష్టార్థాః స్యుర్నసంశయః || 15 ||
హంతు నః కాయజాన్దోషానాత్మాత్మీయసముద్భవాన్ |
సర్వానపి పుమర్థాంశ్చ దదాతు గురురాత్మవిత్ || 16 ||
ఇతి కాలత్రయే నిత్యం ప్రార్థనాం యః కరోతి సః |
ఇహాముత్రాప్తసర్వేష్టో మోదతే నాత్ర సంశయః || 17 ||
అగంయమహిమా లోకే రాఘవేంద్రో మహాయశాః |
శ్రీమధ్వమతదుగ్ధాబ్ధిచంద్రోఽవతు సదాఽనఘః || 18 ||
సర్వయాత్రాఫలావాప్త్యై యథాశక్తిప్రదక్షిణం |
కరోమి తవ సిద్ధస్య బృందావనగతం జలం |
శిరసా ధారయాంయద్య సర్వతీర్థఫలాప్తయే || 19 ||
సర్వాభీష్టార్థసిద్ధ్యర్థం నమస్కారం కరోంయహం |
తవ సంకీర్తనం వేదశాస్త్రార్థజ్ఞానసిద్ధయే || 20 ||
సంసారేఽక్షయసాగరే ప్రకృతితోఽగాధే సదా దుస్తరే |
సర్వావద్యజలగ్రహైరనుపమైః కామాదిభంగాకులే |
నానావిభ్రమదుర్భ్రమేఽమితభయస్తోమాదిఫేనోత్కటే |
దుఃఖోత్కృష్టవిషే సముద్ధర గురో మా మగ్నరూపం సదా || 21 ||
రాఘవేంద్ర గురు స్తోత్రం యః పఠేద్భక్తిపూర్వకం |
తస్య కుష్ఠాదిరోగాణాం నివృత్తిస్త్వరయా భవేత్ || 22 ||
అంధోఽపి దివ్యదృష్టిః స్యాదేడమూకోఽపి వాక్పతిః |
పూర్ణాయుః పూర్ణసంపత్తిః స్తోత్రస్యాఽస్య జపాద్భవేత్ || 23 ||
యః పిబేజ్జలమేతేన స్తోత్రేణైవాభిమంత్రితం |
తస్య కుక్షిగతా దోషాః సర్వే నశ్యంతి తత్ క్షణాత్ || 24 ||
యద్వృందావనమాసాద్య పంగుః ఖంజోఽపి వా జనః |
స్తోత్రేణానేన యః కుర్యాత్ప్రదక్షిణనమస్కృతి |
స జంఘాలో భవేదేవ గురురాజప్రసాదతః || 25 ||
సోమసూర్యోపరాగే చ పుష్యార్కాదిసమాగమే |
యోఽనుత్తమమిదం స్తోత్రమష్టోత్తరశతం జపేత్ |
భూతప్రేతపిశాచాదిపీడా తస్య న జాయతే || 26 ||
ఏతత్స్తోత్రం సముచ్చార్య గురోర్వృందావనాంతికే |
దీపసంయోజనాజ్ఞానం పుత్రలాభో భవేద్ధ్రువం || 27 ||
పరవాదిజయో దివ్యజ్ఞానభక్త్యాదివర్ధనం |
సర్వాభీష్టప్రవృద్ధిస్స్యాన్నాత్ర కార్యా విచారణా || 28 ||
రాజచోరమహావ్యాఘ్రసర్పనక్రాదిపీడనం |
న జాయతేఽస్య స్తోత్రస్య ప్రభావాన్నాత్ర సంశయః || 29 ||
యో భక్త్యా గురురాఘవేంద్రచరణద్వంద్వం స్మరన్ యః పఠేత్ |
స్తోత్రం దివ్యమిదం సదా న హి భవేత్తస్యాసుఖం కించన |
కిం త్విష్టార్థసమృద్ధిరేవ కమలానాథప్రసాదోదయాత్ |
కీర్తిర్దిగ్విదితా విభూతిరతులా సాక్షీ హయాస్యోఽత్ర హి || 30 ||
ఇతి శ్రీ రాఘవేంద్రార్య గురురాజప్రసాదతః |
కృతం స్తోత్రమిదం పుణ్యం శ్రీమద్భిర్హ్యప్పణాభిదైః || 31 ||
పూజ్యాయ రాఘవేంద్రాయ సత్యధర్మరతాయ చ |
భజతాం కల్పవృక్షాయ నమతాం కామధేనవే || 32 ||
ఆపాదమౌళిపర్యంతం గురుణామాకృతిం స్మరేత్ |
తేన విఘ్నః ప్రణశ్యంతి సిద్ధ్యంతి చ మనోరథాః || 33 ||
దుర్వాదిధ్వాంతరవయే వైష్ణవేందీవరేందవే |
శ్రీరాఘవేంద్ర గురవే నమోఽత్యంత దయాళవే || 34 ||
మూకోఽపి యత్ప్రసాదేన ముకుందశయనాయ తే |
రాజరాజాయతే రిక్తో రాఘవేంద్రం తమాశ్రయే ||
ఇతి శ్రీ అప్పణ్ణాచార్యవిరచితం శ్రీరాఘవేంద్ర స్తోత్రం సంపూర్ణం ||

ముక్తకమంగళం

శ్రీశైలేశదయాపాత్రం ధీభక్త్యాదిగుణార్ణవం |
యతీంద్రప్రవణం వందే రంయజామాతరం మునిం ||
లక్ష్మీచరణలాక్షాంకసాక్షీ శ్రీవత్సవక్షసే |
క్షేమం‍కరాయ సర్వేషాం శ్రీరంగేశాయ మంగళం || 1 ||
శ్రియఃకాంతాయ కల్యాణనిధయే నిధయేఽర్థినాం |
శ్రీవేంకటనివాసాయ శ్రీనివాసాయ మంగళం || 2 ||
అస్తు శ్రీస్తనకస్తూరీవాసనావాసితోరసే |
శ్రీహస్తిగిరినాథాయ దేవరాజాయ మంగళం || 3 ||
కమలాకుచకస్తూరీకర్దమాంకితవక్షసే |
యాదవాద్రినివాసాయ సంపత్పుత్రాయ మంగళం || 4 ||
శ్రీనగర్యాం మహాపుర్యాం తాంరపర్ణ్యుత్తరే తటే |
శ్రీతింత్రిణీమూలధాంనే శఠకోపాయ మంగళం || 5 ||
శ్రీమత్యై విష్ణుచిత్తార్యమనోనందనహేతవే |
నందనందనసుందర్యై గోదాయై నిత్యమంగళం || 6 ||
శ్రీమన్మహాభూతపురే శ్రీమత్కేశవయజ్వనః |
కాంతిమత్యాం ప్రసూతాయ యతిరాజాయ మంగలం || 7 ||
మంగళాశాసనపరైః మదాచర్యపురోగమైః |
సర్వైశ్చ పూర్వైరాచార్యైః సత్కృతాయాస్తు మంగళం || 8 ||
పిత్రే బ్రహ్మోపదేష్ట్రే మే గురవే దైవతాయ చ |
ప్రాప్యాయ ప్రాపకాయాఽస్తు వేంకటేశాయ మంగళం || 9 ||
శ్రీమతే రంయజామాతృ మునీంద్రాయ మహాత్మనే |
శ్రీరంగవాసినే భూయాత్ మంగళం నిత్యమంగళం || 10 ||

శ్రీ రంగ గద్యం

చిదచిత్పరతత్త్వానాం తత్త్వాయాథార్థ్యవేదినే |
రామానుజాయ మునయే నమో మమ గరీయసే ||
స్వాధీనత్రివిధచేతనాఽచేతన స్వరూపస్థితి ప్రవృత్తిభేదం, క్లేశకర్మాద్యశేషదోషాసంస్పృష్టం, స్వాభావికానవధికాతిశయ జ్ఞానబలైశ్వర్య వీర్యశక్తితేజస్సౌశీల్య వాత్సల్య మార్దవార్జవ సౌహార్ద సాంయ కారుణ్య మాధుర్య గాంభీర్య ఔదార్య చాతుర్య స్థైర్య ధైర్య శౌర్య పరాక్రమ సత్యకామ సత్యసఙ్కల్ప కృతిత్వ కృతజ్ఞతాద్యసంఖ్యేయ కల్యాణగుణ గణౌఘ మహార్ణవం, పరబ్రహ్మభూతం, పురుషోత్తమం, శ్రీరఙ్గశాయినం, అస్మత్స్వామినం, ప్రబుద్ధనిత్యనియాంయ నిత్యదాస్యైకరసాత్మస్వభావోఽహం, తదేకానుభవః తదేకప్రియః, పరిపూర్ణం భగవన్తం విశదతమానుభవేన నిరన్తరమనుభూయ, తదనుభవజనితానవధికాతిశయ ప్రీతికారితాశేషావస్థోచిత అశేషశేషతైకరతిరూప నిత్యకిఙ్కరో భవాని |
స్వాత్మనిత్య నియాంయ నిత్యదాస్యైకరసాత్మ స్వభావానుసన్ధానపూర్వక భగవదనవధికాతిశయ స్వాంయాద్యఖిల గుణగణానుభవ జనితానవధికాతిశయ ప్రీతికారితాశేషావస్థోచితాశేష శేషతైకరతిరూప నిత్యకైఙ్కర్య ప్రాప్త్యుపాయభూతభక్తి తదుపాయ సంయగ్ జ్ఞానతదుపాయ సమీచీనక్రియా తదనుగుణసాత్త్వికతాఽఽస్తిక్యాది సమస్తాత్మగుణవిహీనః, దురుత్తరానన్త తద్విపర్యయ జ్ఞానక్రియానుగుణానాది పాపవాసనా మహార్ణవాన్తర్నిమగ్నః, తిలతైలవద్దారువహ్నివద్దుర్వివేచ త్రిగుణ క్షణక్షరణ స్వభావాచేతన ప్రకృతివ్యాప్తిరూప దురత్యయ భగవన్మాయా తిరోహిత స్వప్రకాశః, అనాద్యవిద్యాసఞ్చితానన్తాశక్య విస్రంసన కర్మపాశ ప్రగ్రథితః, అనాగతానన్తకాల సమీక్షయాఽప్యదృష్టసన్తారోపాయః, నిఖిలజన్తుజాతశరణ్య, శ్రీమన్నారాయణ, తవ చరణారవిన్దయుగళం శరణమహం ప్రపద్యే ||
ఏవమవస్థితస్యాప్యర్థిత్వమాత్రేణ, పరమకారుణికో భగవాన్, స్వానుభవ ప్రీత్యోపనీతైకాన్తికాత్యన్తిక నిత్యకైఙ్కర్యైకరతిరూప నిత్యదాస్యం దాస్యతీతి విశ్వాసపూర్వకం భగవన్తం నిత్యకిఙ్కరతాం ప్రార్థయే ||
తవానుభూతిసంభూతప్రీతికారిత దాసతాం |
దేహి మే కృపయా నాథ న జానే గతిమన్యథా ||
సర్వావస్థోచితాశేష శేషతైకరతిస్తవ |
భవేయం పుణ్డరీకాక్ష త్వమేవైవం కురుష్వ మాం ||
ఏవంభూత తత్త్వ యాథాత్ంయవబోధ తదిచ్ఛారహితస్యాపి, ఏతదుచ్చారణమాత్రావలంబనేన, ఉచ్యమానార్థ పరమార్థనిష్ఠం మే మనస్త్వమేవాద్యైవ కారయ ||
అపార కరుణాంబుధే, అనాలోచిత విశేషాశేష లోకశరణ్య, ప్రణతార్తిహర, ఆశ్రితవాత్సల్యైక మహోదధే, అనవరతవిదిత నిఖిలభూతజాత యాథాత్ంయ, సత్యకామ, సత్యసఙ్కల్ప, ఆపత్సఖ, కాకుత్స్థ, శ్రీమన్, నారాయణ, పురుషోత్తమ, శ్రీరఙ్గనాథ, మమ నాథ, నమోఽస్తు తే ||
ఇతి శ్రీభగవద్రామానుజ విరచితం శ్రీ రఙ్గ గద్యం |

 శ్రీ రాఘవేంద్ర అష్టకం

జయ తుంగాతటవసతే వర మంత్రాలయమూర్తే |
కురు కరుణాం మయి భీతే పరిమళతతకీర్తే ||
తవ పాదార్చనసక్తే తవ నామామృత మత్తే
దిశదివ్యాం దృశమూర్తే తవ సంతత భక్తే ||
కృత గీతాసువివృత్తే కవిజన సంస్తుతవృత్తే |
కురు వసతిం మమ చిత్తే పరివృత భక్తార్తే ||
యోగీంద్రార్చితపాదే యోగిజనార్పితమోదే |
తింమణ్ణాన్వయచంద్రే రమతాం మమ హృదయం ||
తప్తసుకాంచనసదృశే దండకమండలహస్తే |
జపమాలావరభూషే రమతాం మమ హృదయం ||
శ్రీరామార్పితచిత్తే కాషాయాంబరయుక్తే |
శ్రీతులసీమణిమాలే రమతాం మమ హృదయం ||
మధ్వమునీడితతత్త్వం వ్యాఖ్యాంతం పరివారే |
ఈడేహం సతతం మే సంకట పరిహారం ||
వైణికవంశోత్తంసం వరవిద్వన్మణిమాన్యం |
వరదానే కల్పతరుం వందే గురురాజం ||
సుశమీంద్రార్యకుమారై-ర్విద్యేంద్రైర్గురుభక్త్యా |
రచితా శ్రీగురుగాథా సజ్జన మోదకరీ ||
ఇతి శ్రీ సువిద్యేంద్రతీర్థ విరచిత శ్రీ రాఘవేంద్ర అష్టకం ||

శ్రీ రంగనాథాష్టకం

ఆనందరూపే నిజబోధరూపే
బ్రహ్మస్వరూపే శ్రుతిమూర్తిరూపే |
శశాంకరూపే రమణీయరూపే
శ్రీరంగరూపే రమతాం మనో మే || 1 ||
కావేరితీరే కరుణావిలోలే
మందారమూలే ధృతచారుకేలే |
దైత్యాంతకాలేఽఖిలలోకలీలే
శ్రీరంగలీలే రమతాం మనో మే || 2 ||
లక్ష్మీనివాసే జగతాం నివాసే
హృత్పద్మవాసే రవిబింబవాసే |
కృపానివాసే గుణబృందవాసే
శ్రీరంగవాసే రమతాం మనో మే || 3 ||
బ్రహ్మాదివంద్యే జగదేకవంద్యే
ముకుందవంద్యే సురనాథవంద్యే |
వ్యాసాదివంద్యే సనకాదివంద్యే
శ్రీరంగవంద్యే రమతాం మనో మే || 4 ||
బ్రహ్మాధిరాజే గరుడాధిరాజే
వైకుంఠరాజే సురరాజరాజే |
త్రైలోక్యరాజేఽఖిలలోకరాజే
శ్రీరంగరాజే రమతాం మనో మే || 5 ||
అమోఘముద్రే పరిపూర్ణనిద్రే
శ్రీయోగనిద్రే ససముద్రనిద్రే |
శ్రితైకభద్రే జగదేకనిద్రే
శ్రీరంగభద్రే రమతాం మనో మే || 6 ||
సచిత్రశాయీ భుజగేంద్రశాయీ
నందాంకశాయీ కమలాంకశాయీ |
క్షీరాబ్ధిశాయీ వటపత్రశాయీ
శ్రీరంగశాయీ రమతాం మనో మే || 7 ||
ఇదం హి రంగం త్యజతామిహాంగం
పునర్న చాంగం యది చాంగమేతి |
పాణౌ రథాంగం చరణేఽంబు గాంగం
యానే విహంగం శయనే భుజంగం || 8 ||
రంగనాథాష్టకం పుణ్యం ప్రాతరుత్థాయ యః పఠేత్ |
సర్వాన్కామానవాప్నోతి రంగిసాయుజ్యమాప్నుయాత్ || 9 ||

శ్రీ రాఘవేంద్ర కవచం

కవచం శ్రీ రాఘవేంద్రస్య యతీంద్రస్య మహాత్మనః |
వక్ష్యామి గురువర్యస్య వాంఛితార్థప్రదాయకం || 1 ||
ఋషిరస్యాప్పణాచార్యః ఛందోఽనుష్టుప్ ప్రకీర్తితం |
దేవతా శ్రీరాఘవేంద్ర గురురిష్టార్థసిద్ధయే || 2 ||
అష్టోత్తరశతం జప్యం భక్తియుక్తేన చేతసా |
ఉద్యత్ప్రద్యోతనద్యోత ధర్మకూర్మాసనే స్థితం || 3 ||
ఖద్యోఖద్యోతనద్యోత ధర్మకూర్మాసనే స్థితం |
ధృతకాషాయవసనం తులసీహారవక్షసం || 4 ||
దోర్దండవిలసద్దండ కమండలవిరాజితం |
అభయజ్ఞానముద్రాఽక్షమాలాలోలకరాంబుజం || 5 ||
యోగీంద్రవంద్యపాదాబ్జం రాఘవేంద్ర గురుం భజే |
శిరో రక్షతు మే నిత్యం రాఘవేంద్రోఽఖిలేష్టదః || 6 ||
పాపాద్రిపాటనే వజ్రః కేశాన్ రక్షతు మే సదా |
క్షమాసురగణాధీశో ముఖం రక్షతు మే గురుః || 7 ||
హరిసేవాలబ్ధసర్వసంపత్ఫాలం మమావతు |
దేవస్వభావోఽవతు మే దృశౌ తత్త్వప్రదర్శకః || 8 ||
ఇష్టప్రదానే కల్పద్రుః శ్రోత్రే శ్రుత్యర్థబోధకః |
భవ్యస్వరూపో మే నాసాం జిహ్వాం మేఽవతు భవ్యకృత్ || 9 ||
ఆస్యం రక్షతు మే దుఃఖతూలసంఘాగ్నిచర్యకః |
సుఖధైర్యాదిసుగుణో భ్రువౌ మమ సదాఽవతు || 10 ||
ఓష్ఠౌ రక్షతు మే సర్వగ్రహనిగ్రహశక్తిమాన్ |
ఉపప్లవోదధేస్సేతుర్దంతాన్ రక్షతు మే సదా || 11 ||
నిరస్తదోషో మే పాతు కపోలౌ సర్వపాలకః |
నిరవద్యమహావేషః కంఠం మేఽవతు సర్వదా || 12 ||
కర్ణమూలే తు ప్రత్యర్థిమూకత్వాకరవాఙ్మమ |
పరవాదిజయే పాతు హస్తౌ సత్తత్త్వవాదకృత్ || 13 || [*బహువది*] కరౌ రక్షతు మే విద్వత్పరిజ్ఞేయవిశేషవాన్ |
వాగ్వైఖరీభవ్యశేషజయీ వక్షస్థలం మమ || 14 ||
సతీసంతానసంపత్తిభక్తిజ్ఞానాదివృద్ధికృత్ |
స్తనౌ రక్షతు మే నిత్యం శరీరావద్యహానికృత్ || 15 ||
పుణ్యవర్ధనపాదాబ్జాభిషేకజలసంచయః |
నాభిం రక్షతు మే పార్శ్వౌ ద్యునదీతుల్యసద్గుణః || 16 ||
పృష్ఠం రక్షతు మే నిత్యం తాపత్రయవినాశకృత్ |
కటిం మే రక్షతు సదా వంద్యా సత్పుత్రదాయకః || 17 ||
జఘనం మేఽవతు సదా వ్యంగస్వంగసమృద్ధికృత్ |
గుహ్యం రక్షతు మే పాపగ్రహారిష్టవినాశకృత్ || 18 ||
భక్తాఘవిధ్వంసకరనిజమూర్తిప్రదర్శకః |
మూర్తిమాన్పాతు మే రోమం రాఘవేంద్రో జగద్గురుః || 19 ||
సర్వతంత్రస్వతంత్రోఽసౌ జానునీ మే సదాఽవతు |
జంఘే రక్షతు మే నిత్యం శ్రీమధ్వమతవర్ధనః || 20 ||
విజయీంద్రకరాబ్జోత్థసుధీంద్రవరపుత్రకః |
గుల్ఫౌ శ్రీరాఘవేంద్రో మే యతిరాట్ సర్వదాఽవతు || | 21 ||
పాదౌ రక్షతు మే సర్వభయహారీ కృపానిధిః |
జ్ఞానభక్తిసుపుత్రాయుర్యశః శ్రీపుణ్యవర్ధనః || 22 ||
కరపాదాంగులీః సర్వా మమావతు జగద్గురుః |
ప్రతివాదిజయస్వాంతభేదచిహ్నాదరో గురుః || 23 ||
నఖానవతు మే సర్వాన్ సర్వశాస్త్రవిశారదః |
అపరోక్షీకృతశ్రీశః ప్రాచ్యాం దిశి సదాఽవతు || 24 ||
స దక్షిణే చాఽవతు మాం సముపేక్షితభావజః |
అపేక్షితప్రదాతా చ ప్రతీచ్యామవతు ప్రభుః || 25 ||
దయాదాక్షిణ్యవైరాగ్యవాక్పాటవముఖాంకితః |
సదోదీచ్యామవతు మాం శాపానుగ్రహశక్తిమాన్ || 26 ||
నిఖిలేంద్రియదోషఘ్నో మహానుగ్రహకృద్గురుః |
అధశ్చోర్ధ్వం చాఽవతు మామష్టాక్షరమనూదితం || 27 ||
ఆత్మాత్మీయాఘరాశిఘ్నో మాం రక్షతు విదిక్షు చ |
చతుర్ణాం చ పుమర్థానాం దాతా ప్రాతః సదాఽవతు || 28 ||
సంగ్రామేఽవతు మాం నిత్యం తత్త్వవిత్సర్వసౌఖ్యకృత్ |
మధ్యాహ్నేఽగంయమహిమా మాం రక్షతు మహాయశాః || 29 ||
మృతపోతప్రాణదాతా సాయాహ్నే మాం సదాఽవతు |
వేదిస్థపురుషోజ్జీవీ నిశీథే పాతు మాం గురుః || 30 ||
వహ్నిస్థమాలికోద్ధర్తా వహ్నితాపాత్సదాఽవతు |
సమగ్రటీకావ్యాఖ్యాతా గురుర్మే విషయేఽవతు || 31 ||
కాంతారేఽవతు మాం నిత్యం భాట్ట సంగ్రహకృద్గురుః | [*భాష్య*] సుధాపరిమళోద్ధర్తా స్వచ్ఛందస్తు సదాఽవతు || 32 ||
రాజచోరవిషవ్యాధియాదోవన్యమృగాదిభిః |
అపస్మారాపహర్తా నః శాస్త్రవిత్సర్వదాఽవతు || 33 ||
గతౌ సర్వత్ర మాం పాతూపనిషదర్థకృద్గురుః |
ఋగ్వ్యాఖ్యానకృదాచార్యః స్థితౌ రక్షతు మాం సదా || 34 || [*చాగ్వష్యానకృదాచార్యః*] మంత్రాలయనివాసీ మాం జాగ్రత్కాలే సదాఽవతు |
న్యాయముక్తావలీకర్తా స్వప్నే రక్షతు మాం సదా || 35 ||
మాం పాతు చంద్రికావ్యాఖ్యాకర్తా సుప్తౌ హి తత్త్వకృత్ |
సుతంత్రదీపికాకర్తా ముక్తౌ రక్షతు మాం గురుః || 36 ||
గీతార్థసంగ్రహకరః సదా రక్షతు మాం గురుః |
శ్రీమధ్వమతదుగ్ధాబ్ధిచంద్రోఽవతు సదాఽనఘః || 37 ||
ఇతి శ్రీరాఘవేంద్రస్య కవచం పాపనాశనం |
సర్వవ్యాధిహరం సద్యః పావనం పుణ్యవర్ధనం || 38 ||
య ఇదం పఠతే నిత్యం నియమేన సమాహితః |
అదృష్టిః పూర్ణదృష్టిః స్యాదేడమూకోఽపి వాక్పతిః || 39 ||
పూర్ణాయుః పూర్ణసంపత్తిభక్తిజ్ఞానాభివృద్ధికృత్ |
పీత్వా వారి నరో యేన కవచేనాభిమంత్రితం || 40 ||
జహాతి కుక్షిగాన్ రోగాన్ గురువర్యప్రసాదతః |
ప్రదక్షిణనమస్కారాన్ గురోర్వృందావనస్య యః || 41 ||
కరోతి పరయా భక్త్యా తదేతత్కవచం పఠన్ |
పంగుః కూణిశ్చ పౌగండః పూర్ణాంగో జాయతే ధ్రువం || 42 ||
శేషాశ్చ కుష్ఠపూర్వాశ్చ నశ్యంత్యామయరాశయః |
అష్టాక్షరేణ మంత్రేణ స్తోత్రేణ కవచేన చ || 43 ||
వృందావనే సన్నిహితమభిషిచ్య యథావిధి |
యంత్రే మంత్రాక్షరాణ్యష్టౌ విలిఖ్యాత్ర ప్రతిష్ఠితం || 44 ||
షోడశైరుపచారైశ్చ సంపూజ్య త్రిజగద్గురుం |
అష్టోత్తరశతాఖ్యాభిరర్చయేత్కుసుమాదిభిః || 45 ||
ఫలైశ్చ వివిధైరేవ గురోరర్చాం ప్రకుర్వతః |
నామశ్రవణమాత్రేణ గురువర్యప్రసాదతః || 46 ||
భూతప్రేతపిశాచాద్యాః విద్రవంతి దిశో దశ |
పఠేదేతత్త్రికం నిత్యం గురోర్వృందావనాంతికే || 47 ||
దీపం సంయోజ్య విద్యావాన్ సభాసు విజయీ భవేత్ |
రాజచోరమహావ్యాఘ్రసర్పనక్రాదిపీడనాత్ || 48 ||
కవచస్య ప్రభావేణ భయం తస్య న జాయతే |
సోమసూర్యోపరాగాదికాలే వృందావనాంతికే || 49 ||
కవచాదిత్రికం పుణ్యమప్పణాచార్యదర్శితం |
జపేద్యః స ధనం పుత్రాన్ భార్యాం చ సుమనోరమాం || 50 ||
జ్ఞానం భక్తిం చ వైరాగ్యం భుక్తిం ముక్తిం చ శాశ్వతీం |
సంప్రాప్య మోదతే నిత్యం గురువర్యప్రసాదతః || 51 ||
ఇతి శ్రీమదప్పణాచార్యవిరచితం శ్రీరాఘవేంద్రకవచం సంపూర్ణం |

శ్రీ రాఘవేంద్ర మంగళాష్టకం

శ్రీమద్రామపాదారవిందమధుపః శ్రీమధ్వవంశాధిపః
సచ్చిష్యోడుగణోడుపః శ్రితజగద్గీర్వాణసత్పాదపః |
అత్యర్థం మనసా కృతాచ్యుతజపః పాపాంధకారాతపః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 1 ||
కర్మందీంద్రసుధీంద్రసద్గురుకరాంభోజోద్భవః సంతతం
ప్రాజ్యధ్యానవశీకృతాఖిలజగద్వాస్తవ్యలక్ష్మీధవః |
సచ్ఛాస్త్రాది విదూషకాఖిలమృషావాదీభకంఠీరవః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 2 ||
సాలంకారకకావ్యనాటకకలాకాణాదపాతంజల-
త్రయ్యర్థస్మృతిజైమినీయకవితాసంకీతపారంగతః |
విప్రక్షత్రవిడంఘ్రిజాతముఖరానేకప్రజాసేవితః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 3 ||
రంగోత్తుంగతరంగమంగలకర శ్రీతుంగభద్రాతట-
ప్రత్యక్స్థద్విజపుంగవాలయ లసన్మంత్రాలయాఖ్యే పురే |
నవ్యేంద్రోపలనీలభవ్యకరసద్వృందావనాంతర్గతః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 4 ||
విద్వద్రాజశిరఃకిరీటఖచితానర్ఘ్యోరురత్నప్రభా
రాగాఘౌఘహపాదుకాద్వయచరః పద్మాక్షమాలాధరః |
భాస్వద్దణ్టకమండలూజ్జ్వలకరో రక్తాంబరాడంబరః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 5 ||
యద్వృందావనసత్ప్రదక్షిణనమస్కారాభిషేకస్తుతి-
ధ్యానారాధనమృద్విలేపనముఖానేకోపచారాన్ సదా |
కారం కారమభిప్రయాంతి చతురో లోకాః పుమర్థాన్ సదా
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 6 ||
వేదవ్యాసమునీశమధ్వయతిరాట్ టీకార్యవాక్యామృతం
జ్ఞాత్వాఽద్వైతమతం హలాహలసమం త్యక్త్వా సమాఖ్యాప్తయే |
సంఖ్యావత్సుఖదాం దశోపనిషదాం వ్యాఖ్యాం సమాఖ్యన్ముదా
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 7 ||
శ్రీమద్వైష్ణవలోకజాలకగురుః శ్రీమత్పరివ్రాడ్గురుః
శాస్త్రే దేవగురుః శ్రితామరతరుః ప్రత్యూహగోత్రస్వరుః |
చేతోఽతీతశిరుస్తథా జితవరుస్సత్సౌఖ్యసంపత్కరుః
శ్రీమత్సద్గురురాఘవేంద్రయతిరాట్ కుర్యాద్ధ్రువం మంగళం || 8 ||
యస్సంధ్యాస్వనిశం గురోర్యతిపతేః సన్మంగలస్యాష్టకం
సద్యః పాపహరం స్వసేవి విదుషాం భక్త్యైతదాభాషితం |
భక్త్యా వక్తి సుసంపదం శుభపదం దీర్ఘాయురారోగ్యకం
కీర్తిం పుత్రకలత్రబాంధవసుహృన్మూర్తిః ప్రయాతి ధ్రువం ||
ఇతి శ్రీమదప్పణాచార్యకృతం రాఘవేంద్రమంగళాష్టకం సంపూర్ణం |

శ్రీ రంగనాథాష్టకం 2

పద్మాదిరాజే గరుడాదిరాజే విరించిరాజే సురరాజరాజే |
త్రైలోక్యరాజేఽఖిలరాజరాజే శ్రీరంగరాజే నమతా నమామి || 1 ||
శ్రీచిత్తశాయీ భుజంగేంద్రశాయీ నాదార్కశాయీ ఫణిభోగశాయీ |
అంభోధిశాయీ వటపత్రశాయీ శ్రీరంగరాజే నమతా నమామి || 2 ||
లక్ష్మీనివాసే జగతాంనివాసే హృత్పద్మవాసే రవిబింబవాసే |
శేషాద్రివాసేఽఖిలలోకవాసే శ్రీరంగవాసే నమతా నమామి || 3 ||
నీలాంబువర్ణే భుజపూర్ణకర్ణే కర్ణాంతనేత్రే కమలాకళత్రే |
శ్రీవల్లిరంగేజితమల్లరంగే శ్రీరంగరంగే నమతా నమామి || 4 ||
బ్రహ్మాదివంద్యే జగదేకవంద్యే రంగే ముకుందే ముదితారవిందే |
గోవిందదేవాఖిల దేవదేవే శ్రీరంగదేవే నమతా నమామి || 5 ||
అనంతరూపే నిజబోధరూపే భక్తిస్వరూపే శ్రుతిమూర్తిరూపే |
శ్రీకాంతిరూపే రమణీయరూపే శ్రీరంగరూపే నమతా నమామి || 6 ||
కర్మప్రమాదే నరకప్రమాదే భక్తిప్రమాదే జగతాధిగాధే |
అనాథనాథే జగదేకనాథే శ్రీరంగనాథే నమతా నమామి || 7 ||
అమోఘనిద్రే జగదేకనిద్రే విదేహ్యనిద్రే విషయాసముద్రే |
శ్రీయోగనిద్రే సుఖయోగనిద్రే శ్రీరంగనిద్రే నమతా నామామి || 8 ||
రంగాష్టకమిదం పుణ్యం ప్రాతఃకాలే పఠేన్నరః |
కోటిజన్మకృతం పాపం తత్ క్షణేన వినశ్యతి || 9 ||

శ్రీ రాఘవేంద్ర అష్టోత్తరశతనామావళిః

ఓం స్వవాగ్దేవతా సరిద్భక్తవిమలీకర్త్రే నమః |
ఓం శ్రీరాఘవేంద్రాయ నమః |
ఓం సకలప్రదాత్రే నమః |
ఓం క్షమా సురేంద్రాయ నమః |
ఓం స్వపాదభక్తపాపాద్రిభేదనదృష్టివజ్రాయ నమః |
ఓం హరిపాదపద్మనిషేవణాల్లబ్ధసర్వసంపదే నమః |
ఓం దేవస్వభావాయ నమః |
ఓం దివిజద్రుమాయ నమః | [ఇష్టప్రదాత్రే] ఓం భవ్యస్వరూపాయ నమః | 9
ఓం సుఖధైర్యశాలినే నమః |
ఓం దుష్టగ్రహనిగ్రహకర్త్రే నమః |
ఓం దుస్తీర్ణోపప్లవసింధుసేతవే నమః |
ఓం విద్వత్పరిజ్ఞేయమహావిశేషాయ నమః |
ఓం సంతానప్రదాయకాయ నమః |
ఓం తాపత్రయవినాశకాయ నమః |
ఓం చక్షుప్రదాయకాయ నమః |
ఓం హరిచరణసరోజరజోభూషితాయ నమః |
ఓం దురితకాననదావభూతాయ నమః | 18
ఓం సర్వతంత్రస్వతంత్రాయ నమః |
ఓం శ్రీమధ్వమతవర్ధనాయ నమః |
ఓం సతతసన్నిహితాశేషదేవతాసముదాయాయ నమః |
ఓం శ్రీసుధీంద్రవరపుత్రకాయ నమః |
ఓం శ్రీవైష్ణవసిద్ధాంతప్రతిష్ఠాపకాయ నమః |
ఓం యతికులతిలకాయ నమః |
ఓం జ్ఞానభక్త్యాయురారోగ్య సుపుత్రాదివర్ధనాయ నమః |
ఓం ప్రతివాదిమాతంగ కంఠీరవాయ నమః |
ఓం సర్వవిద్యాప్రవీణాయ నమః | 27
ఓం దయాదాక్షిణ్యవైరాగ్యశాలినే నమః |
ఓం రామపాదాంబుజాసక్తాయ నమః |
ఓం రామదాసపదాసక్తాయ నమః |
ఓం రామకథాసక్తాయ నమః |
ఓం దుర్వాదిద్వాంతరవయే నమః |
ఓం వైష్ణవేందీవరేందవే నమః |
ఓం శాపానుగ్రహశక్తాయ నమః |
ఓం అగంయమహింనే నమః |
ఓం మహాయశసే నమః | 36
ఓం శ్రీమధ్వమతదుగ్దాబ్ధిచంద్రమసే నమః |
ఓం పదవాక్యప్రమాణపారావార పారంగతాయ నమః |
ఓం యోగీంద్రగురవే నమః |
ఓం మంత్రాలయనిలయాయ నమః |
ఓం పరమహంస పరివ్రాజకాచార్యాయ నమః |
ఓం సమగ్రటీకావ్యాఖ్యాకర్త్రే నమః |
ఓం చంద్రికాప్రకాశకారిణే నమః |
ఓం సత్యాదిరాజగురవే నమః |
ఓం భక్తవత్సలాయ నమః | 45
ఓం ప్రత్యక్షఫలదాయ నమః |
ఓం జ్ఞానప్రదాయ నమః |
ఓం సర్వపూజ్యాయ నమః |
ఓం తర్కతాండవవ్యాఖ్యాకర్త్రే నమః |
ఓం కృష్ణోపాసకాయ నమః |
ఓం కృష్ణద్వైపాయనసుహృదే నమః |
ఓం ఆర్యానువర్తినే నమః |
ఓం నిరస్తదోషాయ నమః |
ఓం నిరవద్యవేషాయ నమః | 54
ఓం ప్రత్యర్ధిమూకత్వనిదానభాషాయ నమః |
ఓం యమనియమాసన ప్రాణాయామ ప్రత్యాహార ధ్యానధారణ సమాధ్యష్టాంగయోగానుష్టాన నిష్టాయ నమః | [నియమాయ] ఓం సాంగాంనాయకుశలాయ నమః |
ఓం జ్ఞానమూర్తయే నమః |
ఓం తపోమూర్తయే నమః |
ఓం జపప్రఖ్యాతాయ నమః |
ఓం దుష్టశిక్షకాయ నమః |
ఓం శిష్టరక్షకాయ నమః |
ఓం టీకాప్రత్యక్షరార్థప్రకాశకాయ నమః | 63
ఓం శైవపాషండధ్వాంత భాస్కరాయ నమః |
ఓం రామానుజమతమర్దకాయ నమః |
ఓం విష్ణుభక్తాగ్రేసరాయ నమః |
ఓం సదోపాసితహనుమతే నమః |
ఓం పంచభేదప్రత్యక్షస్థాపకాయ నమః |
ఓం అద్వైతమూలనికృంతనాయ నమః |
ఓం కుష్ఠాదిరోగనాశకాయ నమః |
ఓం అగ్రసంపత్ప్రదాత్రే నమః |
ఓం బ్రాహ్మణప్రియాయ నమః | 72
ఓం వాసుదేవచలప్రతిమాయ నమః |
ఓం కోవిదేశాయ నమః |
ఓం బృందావనరూపిణే నమః |
ఓం బృందావనాంతర్గతాయ నమః |
ఓం చతురూపాశ్రయాయ నమః |
ఓం నిరీశ్వరమత నివర్తకాయ నమః |
ఓం సంప్రదాయప్రవర్తకాయ నమః |
ఓం జయరాజముఖ్యాభిప్రాయవేత్రే నమః |
ఓం భాష్యటీకాద్యవిరుద్ధగ్రంథకర్త్రే నమః | 81
ఓం సదాస్వస్థానక్షేమచింతకాయ నమః |
ఓం కాషాయచేలభూషితాయ నమః |
ఓం దండకమండలుమండితాయ నమః |
ఓం చక్రరూపహరినివాసాయ నమః |
ఓం లసదూర్ధ్వపుండ్రాయ నమః |
ఓం గాత్రధృత విష్ణుధరాయ నమః |
ఓం సర్వసజ్జనవందితాయ నమః |
ఓం మాయికర్మందిమతమర్దకాయ నమః |
ఓం వాదావల్యర్థవాదినే నమః | 90
ఓం సాంశజీవాయ నమః |
ఓం మాధ్యమికమతవనకుఠారాయ నమః |
ఓం ప్రతిపదం ప్రత్యక్షరం భాష్యటీకార్థ (స్వారస్య) గ్రాహిణే నమః |
ఓం అమానుషనిగ్రహాయ నమః |
ఓం కందర్పవైరిణే నమః |
ఓం వైరాగ్యనిధయే నమః |
ఓం భాట్టసంగ్రహకర్త్రే నమః |
ఓం దూరీకృతారిషడ్వర్గాయ నమః |
ఓం భ్రాంతిలేశవిధురాయ నమః | 99
ఓం సర్వపండితసంమతాయ నమః |
ఓం అనంతబృందావననిలయాయ నమః |
ఓం స్వప్నభావ్యర్థవక్త్రే నమః |
ఓం యథార్థవచనాయ నమః |
ఓం సర్వగుణసమృద్ధాయ నమః |
ఓం అనాద్యవిచ్ఛిన్న గురుపరంపరోపదేశ లబ్ధమంత్రజప్త్రే నమః |
ఓం ధృతసర్వద్రుతాయ నమః |
ఓం రాజాధిరాజాయ నమః |
ఓం గురుసార్వభౌమాయ నమః | 108
ఓం శ్రీమూలరామార్చక శ్రీరాఘవేంద్ర యతీంద్రాయ నమః |
ఇతి శ్రీ రాఘవేంద్ర అష్టోత్తరశతనామావళీ |

శ్రీ వరదరాజ స్తోత్రం

శ్రీమద్వరదరాజేంద్రః శ్రీవత్సాంకః శుభప్రదః |
తుండీరమండలోల్లాసీ తాపత్రయనివారకః || 1 ||
సత్యవ్రతక్షేత్రవాసీ సత్యసజ్జనపోషకః |
సర్గస్థిత్యుపసంహారకారీ సుగుణవారిధిః || 2 ||
హరిర్హస్తిగిరీశానో హృతప్రణవదుష్కృతః |
తత్త్వరూపత్వష్టృకృత కాంచీపురవరాశ్రితః || 3 ||
బ్రహ్మారబ్ధాశ్వమేధాఖ్యమహామఖసుపూజితః |
వేదవేద్యో వేగవతీవేగభీతాత్మభూస్తుతః || 4 ||
విశ్వసేతుర్వేగవతీసేతుర్విశ్వాధికోఽనఘః |
యథోక్తకారినామాఢ్యో యజ్ఞభృద్యజ్ఞరక్షకః || 5 ||
బ్రహ్మకుండోత్పన్నదివ్యపుణ్యకోటివిమానగః |
వాణీపత్యర్పితహయవపాసురభిలాధరః || 6 ||
వరదాభయహస్తాబ్జో వనమాలావిరాజితః |
శంఖచక్రలసత్పాణిశ్శరణాగతరక్షకః || 7 ||
ఇమం స్తవం తు పాపఘ్నం పురుషార్థప్రదాయకం |
పఠతాం శృణ్వతాం భక్త్యా సర్వసిద్ధిర్భవేద్ధ్రువం || 8 ||
ఇతి శ్రీనారదపురాణే వరదరాజస్తోత్రం |

శ్రీ వైకుంఠ గద్యం

యామునార్యసుధాంభోధిమవగాహ్య యథామతి |
ఆదాయ భక్తియోగాఖ్యం రత్నం సన్దర్శయాంయహం ||
స్వాధీన త్రివిధచేతనాచేతనస్వరూపస్థితి ప్రవృత్తిభేదం, క్లేశ కర్మాద్యశేషదోషాసంస్పృష్టం, స్వాభావికానవధికాతిశయ జ్ఞానబలైశ్వర్యవీర్యశక్తితేజః ప్రభృత్యసఙ్ఖ్యేయ కల్యాణగుణగణౌఘ మహార్ణవం, పరమపురుషం, భగవన్తం, నారాయణం, స్వామిత్వేన సుహృత్వేన గురుత్వేన చ పరిగృహ్య ఐకాన్తికాత్యన్తిక తత్పాదాంబుజద్వయ పరిచర్యైకమనోరథః, తత్ప్రాప్తయే చ తత్పాదాంబుజద్వయ ప్రపత్తేరన్యన్న మే కల్పకోటిసహస్రేణాపి సాధనమస్తీతి మన్వానః, తస్యైవ భగవతో నారాయణస్య అఖిలసత్త్వదయైకసాగరస్య అనాలోచిత గుణగుణాఖణ్డ జనానుకూలామర్యాద శీలవతః, స్వాభావికానవధికాతిశయ గుణవత్తయా దేవతిర్యఙ్మనుష్యాద్యఖిలజన హృదయానన్దనస్య ఆశ్రితవాత్సల్యైకజలధేః భక్తజనసంశ్లేషైకభోగస్య నిత్యజ్ఞానక్రియైశ్వర్యాది భోగసామగ్రీసమృద్ధస్య, మహావిభూతేః, శ్రీమచ్చరణారవిన్దయుగళం అనన్యాత్మసఞ్జీవనేన తద్గతసర్వభావేన శరణమనువ్రజేత్ | తతశ్చ ప్రత్యహమాత్మోజ్జీవనాయైవమనుస్మరేత్ | చతుర్దశభువనాత్మకం అణ్డం, దశగుణితోత్తరం చ ఆవరణసప్తకం, సమస్తం కార్యకారణ(జాత)మతీత్య, వర్తమానే పరమవ్యోమశబ్దాభిధేయే, బ్రహ్మాదీనాం వాఙ్మనసాఽగోచరే, శ్రీమతి వైకుణ్ఠే దివ్యలోకే, సనకవిధిశివాదిభిరపి అచిన్త్యస్వభావైశ్వర్యైః, నిత్యసిద్ధైరనన్తైర్భగవదానుకూల్యైక భోగైర్దివ్యపురుషైః మహాత్మభిః ఆపూరితే, తేషామపి ఇయత్పరిమాణం, ఇయదైశ్వర్యం, ఈదృశస్వభావమితి పరిచ్ఛేత్తుమయోగ్యే, దివ్యావరణశతసహస్రావృతే, దివ్యకల్పకతరూపశోభితే, దివ్యోద్యాన శతసహస్రకోటిభిరావృతే, అతిప్రమాణే దివ్యాయతనే, కస్మింశ్చిద్విచిత్ర దివ్యరత్నమయ దివ్యాస్థానమణ్డపే, దివ్యరత్నస్తంభ శతసహస్రకోటిభిరుపశోభితే,
దివ్యనానారత్నకృతస్థల విచిత్రితే, దివ్యాలఙ్కారాలఙ్కృతే, పరితః పతితైః పతమానైః పాదపస్థైశ్చ నానాగన్ధవర్ణైర్దివ్యపుష్పైః శోభమానైర్దివ్యపుష్పోపవనైరుపశోభితే, సఙ్కీర్ణపారిజాతాది కల్పద్రుమోపశోభితైః, అసఙ్కీర్ణైశ్చ కైశ్చిదన్తస్స్థపుష్పరత్నాదినిర్మిత దివ్యలీలామణ్డప శతసహస్రోపశోభితైః, సర్వదాఽనుభూయమానైరప్యపూర్వవదాశ్చర్యమావహద్భిః క్రీడాశైల శతసహస్రైరలఙ్కృతైః, కైశ్చిన్నారాయణదివ్యలీలాఽసాధారణైః, కైశ్చిత్పద్మవనాలయా దివ్యలీలాఽసాధారణైః, సాధారణైశ్చ కైశ్చిత్ శుకశారికామయూరకోకిలాదిభిః కోమలకూజితైరాకులైః, దివ్యోద్యాన శతసహస్రైరావృతే, మణిముక్తాప్రవాల కృతసోపానైః, దివ్యామలామృతరసోదకైః, దివ్యాణ్డజవరైః, అతిరమణీయదర్శనైః అతిమనోహరమధురస్వరైః ఆకులైః, అన్తస్థ ముక్తామయ దివ్యక్రీడాస్థానోపశోభితైః దివ్యసౌగన్ధికవాపీశతసహస్రైః, దివ్యరాజహంసావళీవిరాజితైరావృతే, నిరస్తాతిశయానన్దైకరసతయా చానన్త్యాచ్చ ప్రవిష్టానున్మాదయద్భిః క్రీడోద్దేశైర్విరాజితే, తత్ర తత్ర కృత దివ్యపుష్పపర్యఙ్కోపశోభితే, నానాపుష్పాసవాస్వాద మత్తభృఙ్గావలీభిః ఉద్గీయమాన దివ్యగాన్ధర్వేణాపూరితే, చన్దనాగరుకర్పూర దివ్యపుష్పావగాహి మన్దానిలాసేవ్యమానే, మధ్యే పుష్పసఞ్చయ విచిత్రితే, మహతి దివ్యయోగపర్యఙ్కే అనన్తభోగిని, శ్రీమద్వైకుణ్ఠైశ్వర్యాది దివ్యలోకం ఆత్మకాన్త్యా విశ్వమాప్యాయయన్త్యా శేష శేషాశనాది సర్వపరిజనం భగవతస్తత్తదవస్థోచిత పరిచర్యాయాం ఆజ్ఞాపయన్త్యా, శీలరూపగుణ విలాసాదిభిః ఆత్మానురూపయా శ్రియా సహాసీనం, ప్రత్యగ్రోన్మీలిత సరసిజసదృశ నయనయుగళం, స్వచ్ఛనీలజీమూతసఙ్కాశం, అత్యుజ్జ్వలపీతవాససం, స్వయా ప్రభయాఽతినిర్మలయా అతిశీతలయా అతికోమలయా స్వచ్ఛమాణిక్యాభయా కృత్స్నం జగద్భాసయన్తం,
అచిన్త్యదివ్యాద్భుత నిత్యయౌవన స్వభావలావణ్యమయామృతసాగరం, అతిసౌకుమార్యాది ఈషత్ ప్రస్విన్నవదాలక్ష్యమాణ లలాటఫలక దివ్యాలకావలీవిరాజితం, ప్రబుద్ధముగ్ధాంబుజ చారులోచనం, సవిభ్రమభ్రూలతం, ఉజ్జ్వలాధరం, శుచిస్మితం, కోమలగణ్డం, ఉన్నసం, ఉదగ్రపీనాంస విలంబికుణ్డలాలకావలీ బన్ధుర కంబుకన్ధరం, ప్రియావతం‍సోత్పల కర్ణభూషణశ్లథాలకాబన్ధ విమర్దశంసిభిః చతుర్భిరాజానువిలంబిభిర్భుజైర్విరాజితం, అతికోమల దివ్యరేఖాలఙ్కృతాతాంరకరతలం, దివ్యాఙ్గుళీయకవిరాజితం, అతికోమల దివ్యనఖావళీవిరాజితం, అతిరక్తాఙ్గులీభిరలఙ్కృతం, తత్క్షణోన్మీలిత పుణ్డరీక సదృశచరణయుగళం, అతిమనోహర కిరీటమకుట చూడావతంస మకరకుణ్డల గ్రైవేయక హార కేయూర కటక శ్రీవత్స కౌస్తుభ ముక్తాదామోదరబన్ధన పీతాంబర కాఞ్చీగుణ నూపురాదిభిరత్యన్త సుఖస్పర్శైః దివ్యగన్ధైర్భూషణైర్భూషితం, శ్రీమత్యా వైజయన్త్యా వనమాలయా విరాజితం, శఙ్ఖచక్రగదాఽసి శార్ఙ్గాది దివ్యాయుధైః సేవ్యమానం, స్వసఙ్కల్పమాత్రావక్లుప్త జగజ్జన్మస్థితిధ్వంసాదికే శ్రీమతి విష్వక్సేనే న్యస్త సమస్తాత్మైశ్వర్యం, వైనతేయాదిభిః స్వభావతో నిరస్త సమస్త సాంసారిక స్వభావైః భగవత్పరిచర్యాకరణ యోగ్యైర్భగవత్పరిచర్యైకభోగై-ర్నిత్యసిద్ధైరనన్తైః యథా యోగం సేవ్యమానం, ఆత్మభోగేన అననుసంహితపరాదికాల దివ్యామల కోమలావలోకనేన విశ్వమాహ్లాదయన్తం, ఈషదున్మీలిత ముఖాంబుజోదరవినిర్గతేన దివ్యాననారవిన్ద శోభాజననేన దివ్యగాంభీర్యౌదార్య సౌన్దర్య మాధుర్యాద్యనవధిక గుణగణవిభూషితేన, అతిమనోహర దివ్యభావగర్భేణ దివ్యలీలాఽఽలాపామృతేన అఖిలజన హృదయాన్తరాణ్యాపూరయన్తం భగవన్తం నారాయణం ధ్యానయోగేన దృష్ట్వా, తతో భగవతో నిత్యస్వాంయమాత్మనో నిత్యదాస్యం చ యథావస్థితమనుసన్ధాయ, కదాఽహం భగవన్తం నారాయణం, మమ కులనాథం, మమ కులదైవతం, మమ కులధనం, మమ భోగ్యం, మమ మాతరం, మమ పితరం, మమ సర్వం సాక్షాత్కరవాణి చక్షుషా |
కదాఽహం భగవత్పాదాంబుజద్వయం శిరసా సఙ్గ్రహీష్యామి | కదాఽహం భగవత్పాదాంబుజద్వయ పరిచర్యాఽఽశయా నిరస్తసమస్తేతర భోగాశః, అపగత సమస్త సాంసారికస్వభావః తత్పాదాంబుజద్వయం ప్రవేక్ష్యామి | కదాఽహం భగవత్పాదాంబుజద్వయ పరిచర్యాకరణయోగ్య-స్తదేకభోగస్తత్పాదౌ పరిచరిష్యామి | కదా మాం భగవాన్ స్వకీయయా అతిశీతలయా దృశా అవలోక్య, స్నిగ్ధగంభీరమధురయా గిరా పరిచర్యాయాం ఆజ్ఞాపయిష్యతి, ఇతి భగవత్పరిచర్యాయామాశాం వర్ధయిత్వా తయైవాఽశయా తత్ప్రసాదోపబృంహితయా భగవన్తముపేత్య, దూరాదేవ భగవన్తం శేషభోగే శ్రియా సహాసీనం వైనతేయాదిభిః సేవ్యమానం, సమస్తపరివారాయ శ్రీమతే నారాయణాయ నమః, ఇతి ప్రణంయ ఉత్థాయోత్థాయ పునః పునః ప్రణంయ అత్యన్త సాధ్వసవినయావనతో భూత్వా, భగవత్పారిషదగణనాయకైర్ద్వారపాలైః కృపయా స్నేహగర్భయా దృశాఽవలోకితః సంయగభివన్దితైస్తైస్తైరేవానుమతో భగవన్తముపేత్య, శ్రీమతా మూలమన్త్రేణ మామైకాన్తికాత్యన్తిక పరిచర్యాకరణాయ పరిగృహ్ణీష్వ ఇతి యాచమానః ప్రణంయాత్మానం భగవతే నివేదయేత్ |
తతో భగవతా స్వయమేవాత్మసఞ్జీవనేన అమర్యాదశీలవతా అతిప్రేమాన్వితేన అవలోకనేనావలోక్య సర్వదేశ సర్వకాల సర్వావస్థోచితాత్యన్తశేషభావాయ స్వీకృతోఽనుజ్ఞాతశ్చ అత్యన్తసాధ్వసవినయావనతః కిఙ్కుర్వాణః కృతాఞ్జలిపుటో భగవన్తముపాసీత | తతశ్చానుభూయమాన భావవిశేషః నిరతిశయప్రీత్యాఽన్యత్కిఞ్చిత్కర్తుం ద్రష్టుం స్మర్తుమశక్తః పునరపి శేషభావమేవ యాచమానో భగవన్తమేవావిచ్ఛిన్నస్రోతోరూపేణావలోకనేన అవలోకయన్నాసీత | తతో భగవతా స్వయమేవాత్మసఞ్జీవనేనావలోకనేనావలోక్య సస్మితమాహూయ సమస్తక్లేశాపహం నిరతిశయసుఖావహమాత్మీయం, శ్రీమత్పాదారవిన్దయుగళం శిరసి కృతం ధ్యాత్వా, అమృతసాగరాన్తర్నిమగ్నసర్వావయవః సుఖమాసీత |
లక్ష్మీపతేర్యతిపతేశ్చ దయైకధాంనోః
యోఽసౌ పురా సమజనిష్ట జగద్ధితార్థం |
ప్రాప్యం ప్రకాశయతు నః పరమం రహస్యం
సంవాద ఏష శరణాగతి మన్త్రసారః ||
ఇతి శ్రీభగవద్రామానుజవిరచితే శ్రీవైకుణ్ఠగద్యం |

శరణాగతి గద్యం

యో నిత్యమచ్యుతపదాంబుజయుగ్మరుక్మ
వ్యామోహతస్తదితరాణి తృణాయ మేనే |
అస్మద్గురోర్భగవతోఽస్య దయైకసింధోః
రామానుజస్య చరణౌ శరణం ప్రపద్యే ||
వందే వేదాంతకర్పూరచామీకర కరండకం |
రామానుజార్యమార్యాణాం చూడామణిమహర్నిశం ||
ఓం || భగవన్నారాయణాభిమతానురూప స్వరూపరూప గుణవిభవైశ్వర్య శీలాద్యనవధికాతిశయ అసంఖ్యేయ కల్యాణగుణగణాం పద్మవనాలయాం భగవతీం శ్రియం దేవీం నిత్యానపాయినీం నిరవద్యాం దేవదేవదివ్యమహిషీం అఖిలజగన్మాతరం అస్మన్మాతరం అశరణ్యశరణ్యాం అనన్యశరణః శరణమహం ప్రపద్యే ||
పారమార్థిక భగవచ్చరణారవింద యుగళైకాంతికాత్యంతిక పరభక్తి పరజ్ఞాన పరమభక్తికృత పరిపూర్ణానవరత నిత్యవిశదతమానన్య ప్రయోజనానవధికాతిశయ ప్రియ భగవదనుభవజనితానవధికాతిశయ ప్రీతికారితాశేషావస్థోచిత అశేషశేషతైకరతిరూప నిత్యకైంకర్యప్రాప్త్యపేక్షయా పారమార్థికీ భగవచ్చరణారవింద శరణాగతిః యథావస్థితా అవిరతాఽస్తు మే ||
అస్తు తే | తయైవ సర్వం సంపత్స్యతే ||
అఖిలహేయప్రత్యనీక కల్యాణైకతాన, స్వేతర సమస్తవస్తువిలక్షణానంత జ్ఞానానందైకస్వరూప, స్వాభిమతానురూపైకరూపాచింత్య దివ్యాద్భుత నిత్యనిరవద్య నిరతిశయౌజ్జ్వల్య సౌందర్య సౌగంధ్య సౌకుమార్య లావణ్య యౌవనాద్యనంతగుణనిధి దివ్యరూప, స్వాభావికానవధికాతిశయ జ్ఞాన బలైశ్వర్య వీర్య శక్తి తేజస్సౌశీల్య వాత్సల్య మార్దవార్జవ సౌహార్ద సాంయ కారుణ్య మాధుర్య గాంభీర్యౌదార్య చాతుర్య స్థైర్య ధైర్య శౌర్య పరాక్రమ సత్యకామ సత్యసంకల్ప కృతిత్వ కృతజ్ఞతాద్యసంఖ్యేయ కల్యాణగుణగణౌఘ మహార్ణవ,
స్వోచిత వివిధ విచిత్రానంతాశ్చర్య నిత్య నిరవద్య నిరతిశయ సుగంధ నిరతిశయ సుఖస్పర్శ నిరతిశయౌజ్జ్వల్య కిరీట మకుట చూడావతంస మకరకుండల గ్రైవేయక హార కేయూర కటక శ్రీవత్స కౌస్తుభ ముక్తాదామోదరబంధన పీతాంబర కాంచీగుణ నూపురాద్యపరిమిత దివ్యభూషణ, స్వానురూపాచింత్యశక్తి శంఖచక్రగదాఽసి శార్ఙ్గాద్యసంఖ్యేయ
నిత్యనిరవద్య నిరతిశయ కల్యాణదివ్యాయుధ,
స్వాభిమత నిత్యనిరవద్యానురూప స్వరూపరూపగుణ విభవైశ్వర్య శీలాద్యనవధికాతిశయాసంఖ్యేయ కల్యాణగుణగణశ్రీవల్లభ, ఏవంభూత భూమినీళానాయక, స్వచ్ఛందానువర్తి స్వరూపస్థితి ప్రవృత్తిభేదాశేష శేషతైకరతిరూప
నిత్యనిరవద్యనిరతిశయ జ్ఞాన క్రియైశ్వర్యాద్యనంత కల్యాణగుణగణ శేష శేషాశన
గరుడప్రముఖ నానావిధానంత పరిజన పరిచారికా పరిచరిత చరణయుగళ, పరమయోగి వాఙ్మనసాఽపరిచ్ఛేద్య స్వరూప స్వభావ స్వాభిమత వివిధవిచిత్రానంతభోగ్య భోగోపకరణ భోగస్థాన సమృద్ధానంతాశ్చర్యానంత మహావిభవానంత పరిమాణ నిత్య నిరవద్య నిరతిశయ శ్రీవైకుంఠనాథ, స్వసంకల్పానువిధాయి స్వరూపస్థితి ప్రవృత్తి స్వశేషతైకస్వభావ ప్రకృతి పురుష కాలాత్మక వివిధ విచిత్రానంత భోగ్య భోక్తృవర్గ భోగోపకరణ భోగస్థానరూప
నిఖిలజగదుదయ విభవ లయలీల, సత్యకామ, సత్యసంకల్ప, పరబ్రహ్మభూత, పురుషోత్తమ,మహావిభూతే,
శ్రీమన్ నారాయణ, వైకుంఠనాథ, అపార కారుణ్య సౌశీల్య వాత్సల్యౌదార్యైశ్వర్య సౌందర్య మహోదధే, అనాలోచితవిశేషాశేషలోక శరణ్య, ప్రణతార్తిహర, ఆశ్రిత వాత్సల్యైకజలధే, అనవరతవిదిత నిఖిలభూతజాతయాథాత్ంయ, అశేషచరాచరభూత నిఖిలనియమన నిరత, అశేషచిదచిద్వస్తు శేషిభూత, నిఖిలజగదాధార, అఖిలజగత్స్వామిన్, అస్మత్స్వామిన్, సత్యకామ,
సత్యసంకల్ప, సకలేతరవిలక్షణ, అర్థికల్పక, ఆపత్సఖ, శ్రీమన్, నారాయణ, అశరణ్యశరణ్య, అనన్యశరణస్త్వత్పాదారవింద యుగళం శరణమహం ప్రపద్యే ||
పితరం మాతరం దారాన్ పుత్రాన్ బంధూన్ సఖీన్ గురూన్ |
రత్నాని ధనధాన్యాని క్షేత్రాణి చ గృహాణి చ || 1
సర్వధర్మాంశ్చ సంత్యజ్య సర్వకామాంశ్చ సాక్షరాన్ |
లోకవిక్రాంతచరణౌ శరణం తేఽవ్రజం విభో || 2
త్వమేవ మాతా చ పితా త్వమేవ
త్వమేవ బంధుశ్చ గురుస్త్వమేవ |
త్వమేవ విద్యా ద్రవిణం త్వమేవ
త్వమేవ సర్వం మమ దేవదేవ || 3
పితాఽసి లోకస్య చరాచరస్య
త్వమస్య పూజ్యశ్చ గురుర్గరీయాన్ |
న త్వత్సమోఽస్త్యభ్యధికః కుతోఽన్యో
లోకత్రయేఽప్యప్రతిమప్రభావ || 4
తస్మాత్ప్రణంయ ప్రణిధాయ కాయం
ప్రసాదయే త్వామహమీశమీడ్యం |
పితేవ పుత్రస్య సఖేవ సఖ్యుః
ప్రియః ప్రియాయార్హసి దేవ సోఢుం ||
మనోవాక్కాయైరనాదికాల ప్రవృత్తానంతాకృత్యకరణ కృత్యాకరణ భగవదపచార భాగవతాపచారాసహ్యాపచారరూప నానావిధానంతాపచారాన్ ఆరబ్ధకార్యాన్ అనారబ్ధకార్యాన్ కృతాన్ క్రియమాణాన్ కరిష్యమాణాంశ్చ సర్వానశేషతః క్షమస్వ |
అనాదికాలప్రవృత్తవిపరీత జ్ఞానమాత్మవిషయం కృత్స్న జగద్విషయం చ విపరీతవృత్తం చాశేషవిషయమద్యాపి వర్తమానం వర్తిష్యమాణం చ సర్వం క్షమస్వ |
మదీయానాదికర్మ ప్రవాహప్రవృత్తాం భగవత్స్వరూప తిరోధానకరీం విపరీతజ్ఞానజననీం స్వవిషయాయాశ్చ భోగ్యబుద్ధేర్జననీం దేహేంద్రియత్వేన భోగ్యత్వేన సూక్ష్మరూపేణ చావస్థితాం దైవీం గుణమయీం మాయాం దాసభూతం శరణాగతోఽస్మి తవాస్మి దాసః ఇతి వక్తారం మాం తారయ |
తేషాం జ్ఞానీ నిత్యయుక్తః ఏకభక్తిర్విశిష్యతే |
ప్రియో హి జ్ఞానినోఽత్యర్థమహం స చ మమ ప్రియః ||
ఉదారాః సర్వ ఏవైతే జ్ఞానీ త్వాత్మైవ మే మతం |
ఆస్థితః స హి యుక్తాత్మా మామేవానుత్తమాం గతిం ||
బహూనాం జన్మనామన్తే జ్ఞానవాన్మాం ప్రపద్యతే |
వాసుదేవః సర్వమితి స మహాత్మా సుదుర్లభః ||
ఇతి శ్లోకత్రయోదితజ్ఞానినం మాం కురుష్వ |
పురుషః స పరః పార్థ భక్త్యా లభ్యస్త్వనన్యయా |
భక్త్యా త్వనన్యయా శక్యః మద్భక్తిం లభతే పరాం |
ఇతి స్థానత్రయోదిత పరభక్తియుక్తం మాం కురుష్వ |
పరభక్తి పరజ్ఞాన పరమభక్త్యేకస్వభావం మాం కురుష్వ |
పరభక్తి పరజ్ఞాన పరమభక్తికృత పరిపూర్ణానవరత నిత్యవిశదతమానన్య ప్రయోజనానవధికాతిశయ ప్రియ భగవదనుభవోఽహం తథావిధ భగవదనుభవ జనితానవధికాతిశయ ప్రీతికారితాశేషావస్థోచితాశేష శేషతైకరతిరూప నిత్యకింకరో భవాని |
ఏవంభూత మత్కైంకర్యప్రాప్త్యుపాయతయాఽవక్లుప్తసమస్త వస్తువిహీనోఽపి, అనంత తద్విరోధిపాపాక్రాంతోఽపి, అనంత మదపచారయుక్తోఽపి, అనంత మదీయాపచారయుక్తోఽపి, అనంతాసహ్యాపచార యుక్తోఽపి, ఏతత్కార్యకారణ భూతానాది విపరీతాహంకార విమూఢాత్మ స్వభావోఽపి, ఏతదుభయకార్యకారణభూతానాది విపరీతవాసనా సంబద్ధోఽపి, ఏతదనుగుణ ప్రకృతి విశేషసంబద్ధోఽపి, ఏతన్మూలాధ్యాత్మికాధిభౌతికాధిదైవిక సుఖదుఃఖ తద్ధేతు
తదితరోపేక్షణీయ విషయానుభవ జ్ఞానసంకోచరూప మచ్చరణారవిందయుగళైకాంతికాత్యంతిక పరభక్తి పరజ్ఞాన పరమభక్తి విఘ్నప్రతిహతోఽపి, యేన కేనాపి ప్రకారేణ ద్వయవక్తా త్వం కేవలం మదీయయైవ దయయా నిశ్శేషవినష్ట సహేతుక మచ్చరణారవిందయుగళైకాంతికాత్యంతిక పరభక్తి పరజ్ఞాన పరమభక్తివిఘ్నః మత్ప్రసాదలబ్ధ మచ్చరణారవిందయుగళైకాంతికాత్యంతిక పరభక్తి పరజ్ఞాన పరమభక్తిః మత్ప్రసాదాదేవ సాక్షాత్కృత యథావస్థిత మత్స్వరూపరూపగుణవిభూతి లీలోపకరణవిస్తారః అపరోక్షసిద్ధ మన్నియాంయతా మద్దాస్యైక స్వభావాత్మ స్వరూపః మదేకానుభవః మద్దాస్యైకప్రియః పరిపూర్ణానవరత నిత్యవిశదతమానన్య ప్రయోజనానవధికాతిశయప్రియ మదనుభవస్త్వం తథావిధ మదనుభవ జనితానవధికాతిశయ ప్రీతికారితాశేషావస్థోచితాశేష శేషతైకరతిరూప నిత్యకింకరో భవ |
ఏవంభూతోఽసి | ఆధ్యాత్మికాధిభౌతికాధిదైవిక దుఃఖవిఘ్నగంధరహితస్త్వం ద్వయమర్థానుసంధానేన సహ సదైవం వక్తా యావచ్ఛరీరపాతమత్రైవ శ్రీరంగే సుఖమాస్వ ||
శరీరపాతసమయే తు కేవలం మదీయయైవ దయయాఽతిప్రబుద్ధః మామేవావలోకయన్ అప్రచ్యుత పూర్వసంస్కారమనోరథః జీర్ణమివ వస్త్రం సుఖేనేమాం ప్రకృతిం స్థూలసూక్ష్మరూపాం విసృజ్య తదానీమేవ మత్ప్రసాదలబ్ధ మచ్చరణారవింద యుగళైకాంతికాత్యంతిక పరభక్తి పరజ్ఞాన పరమభక్తికృత పరిపూర్ణానవరత నిత్యవిశదతమానన్య ప్రయోజనానవధికాతిశయ ప్రియ మదనుభవస్త్వం తథావిధ మదనుభవజనితానవధికాతిశయ ప్రీతికారితాశేషావస్థోచితాశేషశేషతైక రతిరూప నిత్యకింకరో భవిష్యసి | మాతేఽభూదత్ర సంశయః |
అనృతం నోక్తపూర్వం మే న చ వక్ష్యే కదాచన |
రామో ద్విర్నాభిభాషతే |
సకృదేవ ప్రపన్నాయ తవాస్మీతి చ యాచతే |
అభయం సర్వభూతేభ్యో దదాంయేతద్వ్రతం మమ ||
సర్వధర్మాన్ పరిత్యజ్య మామేకం శరణం వ్రజ |
అహం త్వా సర్వపాపేభ్యో మోక్షయిష్యామి మా శుచః ||
ఇతి మయైవ హ్యుక్తం |
అతస్త్వం తవ తత్త్వతో మత్ జ్ఞానదర్శన ప్రాప్తిషు నిస్సంశయః సుఖమాస్వ ||
అంత్యకాలే స్మృతిర్యాతు తవ కైంకర్యకారితా |
తామేనాం భగవన్నద్య క్రియమాణాం కురుష్వ మే ||
ఇతి శ్రీభగవద్రామానుజ విరచితం శరణాగతి గద్యం |