Sacred Stotras & Deities

ప్రాధానిక రహస్యం

అస్య శ్రీసప్తశతీరహస్యత్రయస్య నారాయణ ఋషిః అనుష్టుప్ఛందః శ్రీమహాకాలీ మహాలక్ష్మీ మహాసరస్వత్యో దేవతా యథోక్తఫలావాప్త్యర్థం జపే వినియోగః |
రాజోవాచ |
భగవన్నవతారా మే చండికాయాస్త్వయోదితాః |
ఏతేషాం ప్రకృతిం బ్రహ్మన్ ప్రధానం వక్తుమర్హసి || 1 ||
ఆరాధ్యం యన్మయా దేవ్యాః స్వరూపం యేన చ ద్విజ |
విధినా బ్రూహి సకలం యథావత్ప్రణతస్య మే || 2 ||
ఋషిరువాచ |
ఇదం రహస్యం పరమమనాఖ్యేయం ప్రచక్షతే |
భక్తోఽసీతి న మే కించిత్తవావాచ్యం నరాధిప || 3 ||
సర్వస్యాద్యా మహాలక్ష్మీస్త్రిగుణా పరమేశ్వరీ |
లక్ష్యాలక్ష్యస్వరూపా సా వ్యాప్య కృత్స్నం వ్యవస్థితా || 4 ||
మాతులుంగం గదాం ఖేటం పానపాత్రం చ బిభ్రతీ |
నాగం లింగం చ యోనిం చ బిభ్రతీ నృప మూర్ధని || 5 ||
తప్తకాంచనవర్ణాభా తప్తకాంచనభూషణా |
శూన్యం తదఖిలం స్వేన పూరయామాస తేజసా || 6 ||
శూన్యం తదఖిలం లోకం విలోక్య పరమేశ్వరీ |
బభార రూపమపరం తమసా కేవలేన హి || 7 ||
సా భిన్నాంజనసంకాశా దంష్ట్రాంచితవరాననా |
విశాలలోచనా నారీ బభూవ తనుమధ్యమా || 8 ||
ఖడ్గపాత్రశిరఃఖేటైరలంకృతచతుర్భుజా |
కబంధహారం శిరసా బిభ్రాణా హి శిరఃస్రజం || 9 ||
తాం ప్రోవాచ మహాలక్ష్మీస్తామసీం ప్రమదోత్తమాం |
దదామి తవ నామాని యాని కర్మాణి తాని తే || 10 ||
మహామాయా మహాకాలీ మహామారీ క్షుధా తృషా |
నిద్రా తృష్ణా చైకవీరా కాలరాత్రిర్దురత్యయా || 11 ||
ఇమాని తవ నామాని ప్రతిపాద్యాని కర్మభిః |
ఏభిః కర్మాణి తే జ్ఞాత్వా యోఽధీతే సోఽశ్నుతే సుఖం || 12 ||
తామిత్యుక్త్వా మహాలక్ష్మీః స్వరూపమపరం నృప |
సత్త్వాఖ్యేనాతిశుద్ధేన గుణేనేందుప్రభం దధౌ || 13 ||
అక్షమాలాంకుశధరా వీణాపుస్తకధారిణీ |
సా బభూవ వరా నారీ నామాన్యస్యై చ సా దదౌ || 14 ||
మహావిద్యా మహావాణీ భారతీ వాక్ సరస్వతీ |
ఆర్యా బ్రాహ్మీ కామధేనుర్వేదగర్భా సురేశ్వరీ || 15 ||
అథోవాచ మహాలక్ష్మీర్మహాకాలీం సరస్వతీం |
యువాం జనయతాం దేవ్యౌ మిథునే స్వానురూపతః || 16 ||
ఇత్యుక్త్వా తే మహాలక్ష్మీః ససర్జ మిథునం స్వయం |
హిరణ్యగర్భౌ రుచిరౌ స్త్రీపుంసౌ కమలాసనౌ || 17 ||
బ్రహ్మన్ విధే విరించేతి ధాతరిత్యాహ తం నరం |
శ్రీః పద్మే కమలే లక్ష్మీత్యాహ మాతా స్త్రియం చ తాం || 18 ||
మహాకాలీ భారతీ చ మిథునే సృజతః సహ |
ఏతయోరపి రూపాణి నామాని చ వదామి తే || 19 ||
నీలకంఠం రక్తబాహుం శ్వేతాంగం చంద్రశేఖరం |
జనయామాస పురుషం మహాకాలీం సితాం స్త్రియం || 20 ||
స రుద్రః శంకరః స్థాణుః కపర్దీ చ త్రిలోచనః |
త్రయీ విద్యా కామధేనుః సా స్త్రీ భాషా స్వరాక్షరా || 21 ||
సరస్వతీ స్త్రియం గౌరీం కృష్ణం చ పురుషం నృప |
జనయామాస నామాని తయోరపి వదామి తే || 22 ||
విష్ణుః కృష్ణో హృషీకేశో వాసుదేవో జనార్దనః |
ఉమా గౌరీ సతీ చండీ సుందరీ సుభగా శివా || 23 ||
ఏవం యువతయః సద్యః పురుషత్వం ప్రపేదిరే |
చక్షుష్మంతోఽనుపశ్యంతి నేతరేఽతద్విదో జనాః || 24 ||
బ్రహ్మణే ప్రదదౌ పత్నీం మహాలక్ష్మీర్నృప త్రయీం |
రుద్రాయ గౌరీం వరదాం వాసుదేవాయ చ శ్రియం || 25 ||
స్వరయా సహ సంభూయ విరించోఽండమజీజనత్ |
బిభేద భగవాన్ రుద్రస్తద్గౌర్యా సహ వీర్యవాన్ || 26 ||
అండమధ్యే ప్రధానాది కార్యజాతమభూన్నృప |
మహాభూతాత్మకం సర్వం జగత్ స్థావరజంగమం || 27 ||
పుపోష పాలయామాస తల్లక్ష్ంయా సహ కేశవః |
మహాలక్ష్మీరేవమజా రాజన్ సర్వేశ్వరేశ్వరీ || 28 ||
నిరాకారా చ సాకారా సైవ నానాభిధానభృత్ |
నామాంతరైర్నిరూప్యైషా నాంనా నాన్యేన కేనచిత్ || 29 ||

వైకృతిక రహస్యం

ఋషిరువాచ |
త్రిగుణా తామసీ దేవీ సాత్త్వికీ యా త్రిధోదితా |
సా శర్వా చండికా దుర్గా భద్రా భగవతీర్యతే || 1 ||
యోగనిద్రా హరేరుక్తా మహాకాలీ తమోగుణా |
మధుకైటభనాశార్థం యాం తుష్టావాంబుజాసనః || 2 ||
దశవక్త్రా దశభుజా దశపాదాంజనప్రభా |
విశాలయా రాజమానా త్రింశల్లోచనమాలయా || 3 ||
స్ఫురద్దశనదంష్ట్రా సా భీమరూపాపి భూమిప |
రూపసౌభాగ్యకాంతీనాం సా ప్రతిష్ఠా మహాశ్రియాం || 4 ||
ఖడ్గబాణగదాశూలశంఖచక్రభుశుండిభృత్ |
పరిఘం కార్ముకం శీర్షం నిశ్చోతద్రుధిరం దధౌ || 5 ||
ఏషా సా వైష్ణవీ మాయా మహాకాలీ దురత్యయా |
ఆరాధితా వశీకుర్యాత్ పూజాకర్తుశ్చరాచరం || 6 ||
సర్వదేవశరీరేభ్యో యాఽఽవిర్భూతాఽమితప్రభా |
త్రిగుణా సా మహాలక్ష్మీః సాక్షాన్మహిషమర్దినీ || 7 ||
శ్వేతాననా నీలభుజా సుశ్వేతస్తనమండలా |
రక్తమధ్యా రక్తపాదా నీలజంఘోరురున్మదా || 8 ||
సుచిత్రజఘనా చిత్రమాల్యాంబరవిభూషణా |
చిత్రానులేపనా కాంతిరూపసౌభాగ్యశాలినీ || 9 ||
అష్టాదశభుజా పూజ్యా సా సహస్రభుజా సతీ |
ఆయుధాన్యత్ర వక్ష్యంతే దక్షిణాధఃకరక్రమాత్ || 10 ||
అక్షమాలా చ కమలం బాణోఽసిః కులిశం గదా |
చక్రం త్రిశూలం పరశుః శంఖో ఘంటా చ పాశకః || 11 ||
శక్తిర్దండశ్చర్మ చాపం పానపాత్రం కమండలుః |
అలంకృతభుజామేభిరాయుధైః కమలాసనాం || 12 ||
సర్వదేవమయీమీశాం మహాలక్ష్మీమిమాం నృప |
పూజయేత్ సర్వలోకానాం స దేవానాం ప్రభుర్భవేత్ || 13 ||
గౌరీదేహాత్సముద్భూతా యా సత్త్వైకగుణాశ్రయా |
సాక్షాత్సరస్వతీ ప్రోక్తా శుంభాసురనిబర్హిణీ || 14 ||
దధౌ చాష్టభుజా బాణాన్ముసలం శూలచక్రభృత్ |
శంఖం ఘంటాం లాంగలం చ కార్ముకం వసుధాధిప || 15 ||
ఏషా సంపూజితా భక్త్యా సర్వజ్ఞత్వం ప్రయచ్ఛతి |
నిశుంభమథినీ దేవీ శుంభాసురనిబర్హిణీ || 16 ||
ఇత్యుక్తాని స్వరూపాణి మూర్తీనాం తవ పార్థివ |
ఉపాసనం జగన్మాతుః పృథగాసాం నిశామయ || 17 ||
మహాలక్ష్మీర్యదా పూజ్యా మహాకాలీ సరస్వతీ |
దక్షిణోత్తరయోః పూజ్యే పృష్ఠతో మిథునత్రయం || 18 ||
విరంచిః స్వరయా మధ్యే రుద్రో గౌర్యా చ దక్షిణే |
వామే లక్ష్ంయా హృషీకేశః పురతో దేవతాత్రయం || 19 ||
అష్టాదశభుజా మధ్యే వామే చాస్యా దశాననా |
దక్షిణేఽష్టభుజా లక్ష్మీర్మహతీతి సమర్చయేత్ || 20 ||
అష్టాదశభుజా చైషా యదా పూజ్యా నరాధిప |
దశాననా చాష్టభుజా దక్షిణోత్తరయోస్తదా || 21 ||
కాలమృత్యూ చ సంపూజ్యౌ సర్వారిష్టప్రశాంతయే |
యదా చాష్టభుజా పూజ్యా శుంభాసురనిబర్హిణీ || 22 ||
నవాస్యాః శక్తయః పూజ్యాస్తదా రుద్రవినాయకౌ |
నమో దేవ్యా ఇతి స్తోత్రైర్మహాలక్ష్మీం సమర్చయేత్ || 23 ||
అవతారత్రయార్చాయాం స్తోత్రమంత్రాస్తదాశ్రయాః |
అష్టాదశభుజా చైషా పూజ్యా మహిషమర్దినీ || 24 ||
మహాలక్ష్మీర్మహాకాలీ సైవ ప్రోక్తా సరస్వతీ |
ఈశ్వరీ పుణ్యపాపానాం సర్వలోకమహేశ్వరీ || 25 ||
మహిషాంతకరీ యేన పూజితా స జగత్ప్రభుః |
పూజయేజ్జగతాం ధాత్రీం చండికాం భక్తవత్సలాం || 26 ||
అర్ఘ్యాదిభిరలంకారైర్గంధపుష్పైస్తథాక్షతైః |
ధూపైర్దీపైశ్చ నైవేద్యైర్నానాభక్ష్యసమన్వితైః || 27 ||
రుధిరాక్తేన బలినా మాంసేన సురయా నృప |
ప్రణామాచమనీయేన చందనేన సుగంధినా || 28 ||
సకర్పూరైశ్చ తాంబూలైర్భక్తిభావసమన్వితైః |
వామభాగేఽగ్రతో దేవ్యాశ్ఛిన్నశీర్షం మహాసురం || 29 ||
పూజయేన్మహిషం యేన ప్రాప్తం సాయుజ్యమీశయా |
దక్షిణే పురతః సింహం సమగ్రం ధర్మమీశ్వరం || 30 ||
వాహనం పూజయేద్దేవ్యా ధృతం యేన చరాచరం |
[* కుర్యాచ్చ స్తవనం ధీమాంస్తస్యా ఏకాగ్రమానసః | *] తతః కృతాంజలిర్భూత్వా స్తువీత చరితైరిమైః || 31 ||
ఏకేన వా మధ్యమేన నైకేనేతరయోరిహ |
చరితార్ధం తు న జపేజ్జపంఛిద్రమవాప్నుయాత్ || 32 ||
స్తోత్రమంత్రైః స్తువీతేమాం యది వా జగదంబికాం |
ప్రదక్షిణనమస్కారాన్ కృత్వా మూర్ధ్ని కృతాంజలిః || 33 ||
క్షమాపయేజ్జగద్ధాత్రీం ముహుర్ముహురతంద్రితః |
ప్రతిశ్లోకం చ జుహుయాత్ పాయసం తిలసర్పిషా || 34 ||
జుహుయాత్ స్తోత్రమంత్రైర్వా చండికాయై శుభం హవిః |
నమో నమః పదైర్దేవీం పూజయేత్ సుసమాహితః || 35 ||
ప్రయతః ప్రాంజలిః ప్రహ్వః ప్రాణానారోప్య చాత్మని |
సుచిరం భావయేద్దేవీం చండికాం తన్మయో భవేత్ || 36 ||
ఏవం యః పూజయేద్భక్త్యా ప్రత్యహం పరమేశ్వరీం |
భుక్త్వా భోగాన్ యథాకామం దేవీసాయుజ్యమాప్నుయాత్ || 37 ||
యో న పూజయతే నిత్యం చండికాం భక్తవత్సలాం |
భస్మీకృత్యాస్య పుణ్యాని నిర్దహేత్ పరమేశ్వరీ || 38 ||
తస్మాత్ పూజయ భూపాల సర్వలోకమహేశ్వరీం |
యథోక్తేన విధానేన చండికాం సుఖమాప్స్యసి || 39 ||

మూర్తి రహస్యం

ఋషిరువాచ |
నందా భగవతీ నామ యా భవిష్యతి నందజా |
సా స్తుతా పూజితా భక్త్యా వశీకుర్యాజ్జగత్త్రయం || 1 || [ధ్యాతా] కనకోత్తమకాంతిః సా సుకాంతికనకాంబరా |
దేవీ కనకవర్ణాభా కనకోత్తమభూషణా || 2 ||
కమలాంకుశపాశాబ్జైరలంకృతచతుర్భుజా |
ఇందిరా కమలా లక్ష్మీః సా శ్రీరుక్మాంబుజాసనా || 3 ||
యా రక్తదంతికా నామ దేవీ ప్రోక్తా మయానఘ |
తస్యాః స్వరూపం వక్ష్యామి శృణు సర్వభయాపహం || 4 ||
రక్తాంబరా రక్తవర్ణా రక్తసర్వాంగభూషణా |
రక్తాయుధా రక్తనేత్రా రక్తకేశాతిభీషణా || 5 ||
రక్తతీక్ష్ణనఖా రక్తదశనా రక్తదంతికా |
పతిం నారీవానురక్తా దేవీ భక్తం భజేజ్జనం || 6 ||
వసుధేవ విశాలా సా సుమేరుయుగలస్తనీ |
దీర్ఘౌ లంబావతిస్థూలౌ తావతీవమనోహరౌ || 7 ||
కర్కశావతికాంతౌ తౌ సర్వానందపయోనిధీ |
భక్తాన్ సంపాయయేద్దేవీ సర్వకామదుఘౌ స్తనౌ || 8 ||
ఖడ్గం పాత్రం చ ముసలం లాంగలం చ బిభర్తి సా |
ఆఖ్యాతా రక్తచాముండా దేవీ యోగేశ్వరీతి చ || 9 ||
అనయా వ్యాప్తమఖిలం జగత్ స్థావరజంగమం |
ఇమాం యః పూజయేద్భక్త్యా స వ్యాప్నోతి చరాచరం || 10 ||
అధీతే య ఇమం నిత్యం రక్తదంత్యా వపుః స్తవం |
తం సా పరిచరేద్దేవీ పతిం ప్రియమివాంగనా || 11 ||
శాకంభరీ నీలవర్ణా నీలోత్పలవిలోచనా |
గంభీరనాభిస్త్రివలీవిభూషితతనూదరీ || 12 ||
సుకర్కశసమోత్తుంగవృత్తపీనఘనస్తనీ |
ముష్టిం శిలీముఖాపూర్ణం కమలం కమలాలయా || 13 ||
పుష్పపల్లవమూలాదిఫలాఢ్యం శాకసంచయం |
కాంయానంతరసైర్యుక్తం క్షుత్తృణ్మృత్యుజరాపహం || 14 ||
కార్ముకం చ స్ఫురత్కాంతి బిభ్రతీ పరమేశ్వరీ |
శాకంభరీ శతాక్షీ సా సైవ దుర్గా ప్రకీర్తితా || 15 ||
విశోకా దుష్టదమనీ శమనీ దురితాపదాం |
ఉమా గౌరీ సతీ చండీ కాలికా సా చ పార్వతీ || 16 ||
శాకంభరీం స్తువన్ ధ్యాయన్ జపన్ సంపూజయన్నమన్ |
అక్షయ్యమశ్నుతే శీఘ్రమన్నపానామృతం ఫలం || 17 ||
భీమాపి నీలవర్ణా సా దంష్ట్రాదశనభాసురా |
విశాలలోచనా నారీ వృత్తపీనఘనస్తనీ || 18 ||
చంద్రహాసం చ డమరుం శిరఃపాత్రం చ బిభ్రతీ |
ఏకవీరా కాలరాత్రిః సైవోక్తా కామదా స్తుతా || 19 ||
తేజోమండలదుర్ధర్షా భ్రామరీ చిత్రకాంతిభృత్ |
చిత్రానులేపనా దేవీ చిత్రాభరణభూషితా || 20 ||
చిత్రభ్రమరపాణిః సా మహామారీతి గీయతే |
ఇత్యేతా మూర్తయో దేవ్యా వ్యాఖ్యాతా వసుధాధిప || 21 ||
జగన్మాతుశ్చండికాయాః కీర్తితాః కామధేనవః |
ఇదం రహస్యం పరమం న వాచ్యం కస్యచిత్త్వయా || 22 ||
వ్యాఖ్యానం దివ్యమూర్తీనామభీష్టఫలదాయకం |
తస్మాత్ సర్వప్రయత్నేన దేవీం జప నిరంతరం || 23 ||
సప్తజన్మార్జితైర్ఘోరైర్బ్రహ్మహత్యాసమైరపి |
పాఠమాత్రేణ మంత్రాణాం ముచ్యతే సర్వకిల్బిషైః || 24 ||
దేవ్యా ధ్యానం మయా ఖ్యాతం గుహ్యాద్గుహ్యతరం మహత్ |
తస్మాత్ సర్వప్రయత్నేన సర్వకామఫలప్రదం || 25 ||

శ్రీ దుర్గాష్టాక్షర కవచం

శ్రీ భైరవ ఉవాచ |
అధునా దేవి వక్ష్యేఽహం కవచం మంత్రగర్భకం |
దుర్గాయాః సారసర్వస్వం కవచేశ్వరసంజ్ఞకం || 1 ||
పరమార్థప్రదం నిత్యం మహాపాతకనాశనం |
యోగిప్రియం యోగిగంయం దేవానామపి దుర్లభం || 2 ||
వినా దానేన మంత్రస్య సిద్ధిర్దేవి కలౌ భవేత్ |
ధారణాదస్య దేవేశి శివస్త్రైలోక్యనాయకః || 3 ||
భైరవీ భైరవేశానీ విష్ణుర్నారాయణో బలీ |
బ్రహ్మా పార్వతి లోకేశో విఘ్నధ్వంసీ గజాననః || 4 ||
సేనానీశ్చ మహాసేనో జిష్ణుర్లేఖర్షభః ప్రియే |
సూర్యస్తమోఽపహో లోకే చంద్రోఽమృతవిధిస్తథా || 5 ||
బహునోక్తేన కిం దేవి దుర్గాకవచధారణాత్ |
మర్త్యోఽప్యమరతాం యాతి సాధకో మంత్రసాధకః || 6 ||
కవచస్యాస్య దేవేశి ఋషిః ప్రోక్తో మహేశ్వరః |
ఛందోఽనుష్టుప్ ప్రియే దుర్గా దేవతాఽష్టాక్షరా స్మృతా |
చక్రిబీజం చ బీజం స్యాన్మాయాశక్తిరితీరితా || 7 ||
ఓం మే పాతు శిరో దుర్గా హ్రీం మే పాతు లలాటకం |
దుం నేత్రేఽష్టాక్షరా పాతు చక్రీ పాతు శ్రుతీ మమ || 8 ||
మం ఠం గండౌ చ మే పాతు దేవేశీ రక్తకుండలా |
వాయుర్నాసాం సదా పాతు రక్తబీజనిషూదినీ || 9 ||
లవణం పాతు మే చోష్ఠౌ చాముండా చండఘాతినీ |
భేకీ బీజం సదా పాతు దంతాన్మే రక్తదంతికా || 10 ||
ఓం హ్రీం శ్రీం పాతు మే కంఠం నీలకంఠాంకవాసినీ |
ఓం ఐం క్లీం పాతు మే స్కంధౌ స్కందమాతా మహేశ్వరీ || 11 ||
ఓం సౌః క్లీం మే పాతు బాహూ దేవేశీ బగలాముఖీ |
ఐం శ్రీం హ్రీం పాతు మే హస్తౌ శివాశతనినాదినీ || 12 ||
సౌః ఐం హ్రీం పాతు మే వక్షో దేవతా వింధ్యవాసినీ |
ఓం హ్రీం శ్రీం క్లీం పాతు కుక్షిం మమ మాతంగినీ పరా || 13 ||
ఓం హ్రీం ఐం పాతు మే పార్శ్వే హిమాచలనివాసినీ |
ఓం స్త్రీం హ్రూం ఐం పాతు పృష్ఠం మమ దుర్గతినాశినీ || 14 ||
ఓం క్రీం హ్రుం పాతు మే నాభిం దేవీ నారాయణీ సదా |
ఓం ఐం క్లీం సౌః సదా పాతు కటిం కాత్యాయనీ మమ || 15 ||
ఓం హ్రీం శ్రీం పాతు శిశ్నం మే దేవీ శ్రీబగలాముఖీ |
ఐం సౌః క్లీం సౌః పాతు గుహ్యం గుహ్యకేశ్వరపూజితా || 16 ||
ఓం హ్రీం ఐం శ్రీం హ సౌః పాయాదూరూ మమ మనోన్మనీ |
ఓం జూం సః సౌః జాను పాతు జగదీశ్వరపూజితా || 17 ||
ఓం ఐం క్లీం పాతు మే జంఘే మేరుపర్వతవాసినీ |
ఓం హ్రీం శ్రీం గీం సదా పాతు గుల్ఫౌ మమ గణేశ్వరీ || 18 ||
ఓం హ్రీం దుం పాతు మే పాదౌ పార్వతీ షోడశాక్షరీ |
పూర్వే మాం పాతు బ్రహ్మాణీ వహ్నౌ పాతు చ వైష్ణవీ || 19 ||
దక్షిణే చండికా పాతు నైరృత్యే నారసింహికా |
పశ్చిమే పాతు వారాహీ వాయవ్యే మాపరాజితా || 20 ||
ఉత్తరే పాతు కౌమారీ చైశాన్యాం శాంభవీ తథా |
ఊర్ధ్వం దుర్గా సదా పాతు పాత్వధస్తాచ్ఛివా సదా || 21 ||
ప్రభాతే త్రిపురా పాతు నిశీథే ఛిన్నమస్తకా |
నిశాంతే భైరవీ పాతు సర్వదా భద్రకాళికా || 22 ||
అగ్నేరంబా చ మాం పాతు జలాన్మాం జగదంబికా |
వాయోర్మాం పాతు వాగ్దేవీ వనాద్వనజలోచనా || 23 ||
సింహాత్ సింహాసనా పాతు సర్పాత్ సర్పాంతకాసనా |
రోగాన్మాం రాజమాతంగీ భూతాద్భూతేశవల్లభా || 24 ||
యక్షేభ్యో యక్షిణీ పాతు రక్షోభ్యో రాక్షసాంతకా |
భూతప్రేతపిశాచేభ్యః సుముఖీ పాతు మాం సదా || 25 ||
సర్వత్ర సర్వదా పాతు ఓం హ్రీం దుర్గా నవాక్షరా |
ఇత్యేవం కవచం గుహ్యం దుర్గాసర్వస్వముత్తమం || 26 ||
మంత్రగర్భం మహేశాని కవచేశ్వరసంజ్ఞకం |
విత్తదం పుణ్యదం పుణ్యం వర్మ సిద్ధిప్రదం కలౌ || 27 ||
వర్మ సిద్ధిప్రదం గోప్యం పరాపరరహస్యకం |
శ్రేయస్కరం మనుమయం రోగనాశకరం పరం || 28 ||
మహాపాతకకోటిఘ్నం మానదం చ యశస్కరం |
అశ్వమేధసహస్రస్య ఫలదం పరమార్థదం || 29 ||
అత్యంతగోప్యం దేవేశి కవచం మంత్రసిద్ధిదం |
పఠనాత్సిద్ధిదం లోకే ధారణాన్ముక్తిదం శివే || 30 ||
రవౌ భూర్జే లిఖేద్ధీమాన్ కృత్వా కర్మాహ్నికం ప్రియే |
శ్రీచక్రాంగేఽష్టగంధేన సాధకో మంత్రసిద్ధయే || 31 ||
లిఖిత్వా ధారయేద్బాహౌ గుటికాం పుణ్యవర్ధినీం |
కిం కిం న సాధయేల్లోకే గుటికా వర్మణోఽచిరాత్ || 32 ||
గుటికాం ధారయన్మూర్ధ్ని రాజానం వశమానయేత్ |
ధనార్థీ ధారయేత్కంఠే పుత్రార్థీ కుక్షిమండలే || 33
తామేవ ధారయేన్మూర్ధ్ని లిఖిత్వా భూర్జపత్రకే |
శ్వేతసూత్రేణ సంవేష్ట్య లాక్షయా పరివేష్టయేత్ || 34 ||
సవర్ణేనాథ సంవేష్ట్య ధారయేద్రక్తరజ్జునా |
గుటికా కామదా దేవి దేవనామపి దుర్లభా || 35 ||
కవచస్యాస్య గుటికాం ధృత్వా ముక్తిప్రదాయినీం |
కవచస్యాస్య దేవేశి గుణితుం నైవ శక్యతే || 36 ||
మహిమా వై మహాదేవి జిహ్వాకోటిశతైరపి |
అదాతవ్యమిదం వర్మ మంత్రగర్భం రహస్యకం || 37 ||
అవక్తవ్యం మహాపుణ్యం సర్వసారస్వతప్రదం |
అదీక్షితాయ నో దద్యాత్కుచైలాయ దురాత్మనే || 38 ||
అన్యశిష్యాయ దుష్టాయ నిందకాయ కులార్థినాం |
దీక్షితాయ కులీనాయ గురుభక్తిరతాయ చ || 39 ||
శాంతాయ కులశాంతాయ శాక్తాయ కులవాసినే |
ఇదం వర్మ శివే దద్యాత్కులభాగీ భవేన్నరః || 40 ||
ఇదం రహస్యం పరమం దుర్గాకవచముత్తమం |
గుహ్యం గోప్యతమం గోప్యం గోపనీయం స్వయోనివత్ || 41 ||
ఇతి శ్రీదేవీరహస్యతంత్రే శ్రీ దుర్గా కవచం |

శ్రీ దుర్గాష్టకం

శ్రీ దుర్గాష్టకంలో దేవిని “వాసుదేవ సహోదరి”గా (కృష్ణుని సోదరి – యోగమాయ) మరియు సకల వేద స్వరూపిణిగా అభివర్ణించారు. దుర్గా దేవి కేవలం రాక్షస సంహారిణి మాత్రమే కాదు, యోగులకు సిద్ధినిచ్చే మహామాయ అని ఈ శ్లోకాలు చెబుతాయి. ఈ శ్లోకాలు పఠించడం వల్ల భయ నివారణ, దుర్గాలోక ప్రాప్తి, మానసిక శక్తి లభిస్తాయి.

శ్రీ దుర్గా షోడశోపచార పూజ

(ముందుగా పూర్వాంగం, గణపతి పూజ చేయవలెను. తరువాత ఈ క్రింది పూజావిధానం చేయవలెను.)
పునః సంకల్పం –
పూర్వోక్త ఏవం గుణ విశేషణ విశిష్టాయాం శుభ తిథౌ శ్రీ జగదంబా ప్రసాదేన సర్వాపన్నివృత్యర్థం మనోవాంఛాఫల సిద్ధ్యర్థం, మమ సమస్త వ్యాధినాశనద్వారా క్షిప్రమేవారోగ్యప్రాప్త్యర్థం, గ్రహపీడానివారణార్థం, పిశాచోపద్రవాది సర్వారిష్ట నివారణార్థం క్షేమాయుః సకలైశ్వర్య సిద్ధ్యర్థం శ్రీమహాకాళీ శ్రీమహాలక్ష్మీ శ్రీమహాసరస్వతీ స్వరూపిణీ శ్రీ దుర్గా పరాదేవీ ప్రీత్యర్థం, సంభవద్భిః ద్రవ్యైః సంభవద్భిః ఉపచారైశ్చ సంభవతా నియమేన సంభవితా ప్రాకారేణ శ్రీసూక్త విధానేన యావచ్ఛక్తి ధ్యానావాహనాది షోడశోపచార పూజాం కరిష్యే ||
ప్రాణప్రతిష్ఠా –
ఓం అసు॑నీతే॒ పున॑ర॒స్మాసు॒ చక్షు॒:
పున॑: ప్రా॒ణమి॒హ నో” ధేహి॒ భోగ”ం |
జ్యోక్ప॑శ్యేమ॒ సూర్య॑ము॒చ్చర”న్త॒
మను॑మతే మృ॒డయా” నః స్వ॒స్తి ||
అ॒మృత॒o వై ప్రా॒ణా అ॒మృత॒మాప॑:
ప్రా॒ణానే॒వ య॑థాస్థా॒నముప॑హ్వయతే ||
అస్మిన్ బింబే సాంగాం సాయుధాం సవాహనాం సశక్తిం పతిపుత్రపరివార సమేతం శ్రీమహాకాళీ శ్రీమహాలక్ష్మీ శ్రీమహాసరస్వతీ స్వరూపిణీ శ్రీదుర్గా పరాదేవీ ఆవాహితా భవ స్థాపితా భవ | సుప్రసన్నో భవ వరదా భవ | స్థిరాసనం కురు ప్రసీద ప్రసీద ||
స్వామిని శ్రీజగన్మాతా యావత్పూజావసానకం |
తావత్త్వం ప్రీతిభావేన బింబేఽస్మిన్ సన్నిధిం కురు ||
ధ్యానం –
ఖడ్గం చక్రగదేషు చాపపరిఘాన్ శూలం భుశుండీం శిరః
శంఖం సందధతీం కరైస్త్రినయనాం సర్వాంగభూషావృతాం |
నీలాశ్మద్యుతిమాస్యపాదదశకాం సేవే మహాకాళికాం
యామస్తౌత్ స్వపితే హరౌ కమలజో హంతుం మధుం కైటభం ||
అక్షస్రక్పరశూగదేషుకులిశం పద్మం ధనుః కుండికాం
దండం శక్తిమసిం చ చర్మ జలజం ఘంటాం సురాభాజనం |
శూలం పాశసుదర్శనే చ దధతీం హస్తైః ప్రవాళప్రభాం
సేవే సైరిభమర్దినీమిహ మహాలక్ష్మీం సరోజస్థితాం ||
ఘంటాశూలహలాని శంఖముసలే చక్రం ధనుః సాయకం
హస్తాబ్జైర్దధతీం ఘనాంతవిలసచ్ఛీతాంశుతుల్యప్రభాం ||
గౌరీదేహసముద్భవాం త్రిజగతామాధారభూతాం మహా-
-పూర్వామత్ర సరస్వతీమనుభజే శుంభాదిదైత్యార్దినీం ||
సింహస్థా శశిశేఖరా మరకతప్రఖ్యైశ్చతుర్భిర్భుజైః
శంఖం చక్ర ధనుః శరాంశ్చ దధతీ నేత్రైస్త్రిభిః శోభితా |
ఆముక్తాంగద హార కంకణరణత్కాంచీరణన్నూపురా
దుర్గా దుర్గతిహారిణీ భవతు నో రత్నోల్లసత్కుండలా ||
ఓం శ్రీమహాకాళీ శ్రీమహాలక్ష్మీ శ్రీమహాసరస్వతీ స్వరూపిణీ శ్రీదుర్గా పరాదేవ్యై నమః ధ్యాయామి |
ఆవాహనం –
హిర॑ణ్యవర్ణా॒o హరి॑ణీం సువ॒ర్ణ ర॑జత॒స్ర॑జాం |
చ॒న్ద్రాం హి॒రణ్మ॑యీం ల॒క్ష్మీం జాత॑వేదో మ॒మావ॑హ ||
ఆగచ్ఛ వరదే దేవి దైత్యదర్పవినాశిని |
పూజాం గృహాణ సుముఖి నమస్తే శంకరప్రియే ||
ఓం శ్రీదుర్గాపరాదేవ్యై నమః ఆవాహయామి |
ఆసనం –
తాం మ॒ ఆ వ॑హ॒ జాత॑వేదో ల॒క్ష్మీమన॑పగా॒మినీ”ం |
యస్యా॒o హిర॑ణ్యం వి॒న్దేయ॒o గామశ్వ॒o పురు॑షాన॒హం ||
అనేకరత్నసంయుక్తం నానామణిగణాన్వితం |
ఇదం హేమమయం దివ్యమాసనం ప్రతిగృహ్యతాం ||
ఓం శ్రీదుర్గాపరాదేవ్యై నమః నవరత్నఖచిత సువర్ణసింహాసనం సమర్పయామి |
పాద్యం –
అ॒శ్వ॒పూ॒ర్వాం ర॑థమ॒ధ్యాం హ॒స్తినా॑ద ప్ర॒బోధి॑నీం |
శ్రియ॑o దే॒వీముప॑హ్వయే॒ శ్రీర్మా॑ దే॒వీ జు॑షతాం ||
గంగాదిసర్వతీర్థేభ్య ఆనీతం తోయముత్తమం |
పాద్యార్థం తే ప్రదాస్యామి గృహాణ పరమేశ్వరి ||
ఓం శ్రీదుర్గాపరాదేవ్యై నమః పాదయోః పాద్యం సమర్పయామి |
అర్ఘ్యం –
కా॒o సో”స్మి॒తాం హిర॑ణ్యప్రాకారామా॒ర్ద్రాం జ్వల॑న్తీం తృ॒ప్తాం త॒ర్పయ॑న్తీం |
ప॒ద్మే॒స్థి॒తాం ప॒ద్మవ॑ర్ణా॒o తామి॒హోప॑హ్వయే॒ శ్రియం ||
గంధ పుష్పాక్షతైర్యుక్తమర్ఘ్యం సంపాదితం మయా |
గృహాణ త్వం మహాదేవి ప్రసన్నా భవ సర్వదా ||
ఓం శ్రీదుర్గాపరాదేవ్యై నమః హస్తయోః అర్ఘ్యం సమర్పయామి |
ఆచమనీయం –
చ॒న్ద్రాం ప్ర॑భా॒సాం యశ॑సా॒ జ్వల॑న్తీ॒o శ్రియ॑o లో॒కే దే॒వజు॑ష్టాముదా॒రాం |
తాం ప॒ద్మినీ॑మీ॒o శర॑ణమ॒హం ప్రప॑ద్యేఽల॒క్ష్మీర్మే॑ నశ్యతా॒o త్వాం వృ॑ణే ||
కర్పూరేణ సుగంధేన వాసితం స్వాదు శీతలం |
తోయమాచమనీయార్థం గృహాణ పరమేశ్వరి ||
ఓం శ్రీదుర్గాపరాదేవ్యై నమః ముఖే ఆచమనీయం సమర్పయామి |
మధుపర్కం –
కాపిలం దధి కుందేందుధవళం మధుసంయుతం |
స్వర్ణపాత్రస్థితం దేవి మధుపర్కం గృహాణ భోః ||
ఓం శ్రీదుర్గాపరాదేవ్యై నమః మధుపర్కం సమర్పయామి |
పంచామృత స్నానం –
పయో దధి ఘృతం చైవ శర్కరా మధు సంయుతం |
పంచామృతం మయాఽఽనీతం స్నానార్థం ప్రతిగృహ్యతాం ||
ఓం శ్రీదుర్గాపరాదేవ్యై నమః పంచామృతస్నానం సమర్పయామి |
శుద్ధోదకస్నానం –
ఆ॒ది॒త్యవ॑ర్ణే॒ తప॒సోఽధి॑ జా॒తో వన॒స్పతి॒స్తవ॑ వృ॒క్షోఽథ॑ బి॒ల్వః |
తస్య॒ ఫలా॑ని॒ తప॒సా ను॑దన్తు మా॒ యాన్త॑రా॒యాశ్చ॑ బా॒హ్యా అ॑ల॒క్ష్మీః ||
శుద్ధం యత్సలిలం దివ్యం గంగాజలసమం స్మృతం |
సమర్పితం మయా భక్త్యా స్నానార్థం ప్రతిగృహ్యతాం ||
ఓం శ్రీదుర్గాపరాదేవ్యై నమః శుద్ధోదక స్నానం సమర్పయామి |
స్నానానంతరం శుద్ధాచమనీయం సమర్పయామి |
వస్త్రం –
ఉపై॑తు॒ మాం దే॑వస॒ఖః కీ॒ర్తిశ్చ॒ మణి॑నా స॒హ |
ప్రా॒దు॒ర్భూ॒తోఽస్మి॑ రాష్ట్రే॒ఽస్మి॒న్ కీ॒ర్తిమృద్ధి॑o ద॒దాతు॑ మే ||
అ॒భి వస్త్రా॑ సువస॒నాన్య॑ర్షా॒భి ధే॒నూః సు॒దుఘా॑: పూ॒యమా॑నః |
అ॒భి చ॒న్ద్రా భర్త॑వే నో॒ హిర॑ణ్యా॒భ్యశ్వా॑న్ర॒థినో॑ దేవ సోమ ||
పట్టయుగ్మం మయా దత్తం కంచుకేన సమన్వితం |
పరిధేహి కృపాం కృత్వా మాతర్దుర్గార్తినాశినీ ||
ఓం శ్రీదుర్గాపరాదేవ్యై నమః వస్త్రయుగ్మం సమర్పయామి |
సౌభాగ్యసూత్రం –
క్షు॒త్పి॒పా॒సామ॑లాం జ్యే॒ష్ఠామ॒ల॒క్ష్మీర్నా॑శయా॒ంయహం |
అభూ॑తి॒మస॑మృద్ధి॒o చ॒ స॒ర్వా॒న్ నిర్ణు॑ద మే॒ గృహాత్ ||
సౌభాగ్యసూత్రం వరదే సువర్ణమణిసంయుతం |
కంఠేఽర్పయామి దేవేశి సౌభాగ్యం దేహి మే సదా || [బధ్నామి] ఓం శ్రీదుర్గాపరాదేవ్యై నమః సౌభాగ్యసూత్రం సమర్పయామి |
గంధాది పరిమళద్రవ్యాణి –
గ॒న్ధ॒ద్వా॒రాం దు॑రాధ॒ర్షా॒o ని॒త్యపు॑ష్టాం కరీ॒షిణీ”ం |
ఈ॒శ్వరీగ్॑o సర్వ॑భూతా॒నా॒o తామి॒హోప॑హ్వయే॒ శ్రియం ||
గంధం –
శ్రీఖండం చందనం దివ్యం గంధాఢ్యం సుమనోహరం |
విలేపనం సురశ్రేష్ఠే చందనం ప్రతిగృహ్యతాం ||
ఓం శ్రీదుర్గాపరాదేవ్యై నమః చందనం సమర్పయామి |
హరిద్రాచూర్ణం –
హరిద్రారంజితే దేవి సుఖసౌభాగ్యదాయిని |
తస్మాత్త్వాం పూజయాంయత్ర సుఖం శాంతిం ప్రయచ్ఛ మే ||
ఓం శ్రీదుర్గాపరాదేవ్యై నమః హరిద్రాచూర్ణం సమర్పయామి |
కుంకుమం –
కుంకుమం కామదం దివ్యం కామినీకామసంభవం |
కుంకుమేనార్చితా దేవీ కుంకుమం ప్రతిగృహ్యతాం ||
ఓం శ్రీదుర్గాపరాదేవ్యై నమః కుంకుమం సమర్పయామి |
సిందూరం –
సిందూరమరుణాభాసం జపాకుసుమసన్నిభం |
అర్పితం తే మయా భక్త్యా ప్రసీద పరమేశ్వరి ||
ఓం శ్రీదుర్గాపరాదేవ్యై నమః సిందూరం సమర్పయామి |
కజ్జలం –
చక్షుభ్యాం కజ్జలం రంయం సుభగే శాంతికారకం |
కర్పూరజ్యోతిముత్పన్నం గృహాణ పరమేశ్వరి ||
ఓం శ్రీదుర్గాపరాదేవ్యై నమః కజ్జలం సమర్పయామి |
ఆభరణం –
మన॑స॒: కామ॒మాకూ॑తిం వా॒చః స॒త్యమ॑శీమహి |
ప॒శూ॒నాగ్ం రూ॒పమన్న॑స్య॒ మయి॒ శ్రీః శ్ర॑యతా॒o యశ॑: ||
హార కంకణ కేయూర మేఖలా కుండలాదిభిః |
రత్నాఢ్యం హీరకోపేతం భూషణం ప్రతిగృహ్యతాం ||
ఓం శ్రీదుర్గాపరాదేవ్యై నమః ఆభరణాని సమర్పయామి |
పుష్పమాలా –
క॒ర్దమే॑న ప్ర॑జాభూ॒తా మ॒యి॒ సంభ॑వ క॒ర్దమ |
శ్రియ॑o వా॒సయ॑ మే కు॒లే మా॒తర॑o పద్మ॒మాలి॑నీం ||
మాల్యాదీని సుగంధీని మాలత్యాదీని భక్తితః |
మయాఽఽహృతాని పుష్పాణి పూజార్థం ప్రతిగృహ్యతాం ||
ఓం శ్రీదుర్గాపరాదేవ్యై నమః పుష్పమాలాం సమర్పయామి |
అథాంగ పూజా –
ఓం దుర్గాయై నమః – పాదౌ పూజయామి |
ఓం గిరిజాయై నమః – గుల్ఫౌ పూజయామి |
ఓం అపర్ణాయై నమః – జానూనీ పూజయామి |
ఓం హరప్రియాయై నమః – ఊరూ పూజయామి |
ఓం పార్వత్యై నమః – కటిం పూజయామి |
ఓం ఆర్యాయై నమః – నాభిం పూజయామి |
ఓం జగన్మాత్రే నమః – ఉదరం పూజయామి |
ఓం మంగళాయై నమః – కుక్షిం పూజయామి |
ఓం శివాయై నమః – హృదయం పూజయామి |
ఓం మహేశ్వర్యై నమః – కంఠం పూజయామి |
ఓం విశ్వవంద్యాయై నమః – స్కంధౌ పూజయామి |
ఓం కాళ్యై నమః – బాహూ పూజయామి |
ఓం ఆద్యాయై నమః – హస్తౌ పూజయామి |
ఓం వరదాయై నమః – ముఖం పూజయామి |
ఓం సువాణ్యై నమః – నాసికాం పూజయామి |
ఓం కమలాక్ష్యై నమః – నేత్రే పూజయామి |
ఓం అంబికాయై నమః – శిరః పూజయామి |
ఓం పరాదేవ్యై నమః – సర్వాణ్యంగాని పూజయామి |
ఓం శ్రీదుర్గాపరాదేవ్యై నమః అష్టోత్తరశతనామ పూజాం సమర్పయామి |
ధూపం –
ఆప॑: సృ॒జన్తు॑ స్నిగ్ధా॒ని చి॒క్లీ॒త వ॑స మే॒ గృహే |
ని చ॑ దే॒వీం మా॒తర॒o శ్రియ॑o వా॒సయ॑ మే కు॒లే ||
వనస్పతిరసోద్భూతో గంధాఢ్యో గంధ ఉత్తమః |
ఆఘ్రేయః సర్వదేవానాం ధూపోఽయం ప్రతిగృహ్యతాం ||
ఓం శ్రీదుర్గాపరాదేవ్యై నమః ధూపం ఆఘ్రాపయామి |
దీపం –
ఆ॒ర్ద్రాం పు॒ష్కరి॑ణీం పు॒ష్టిం పి॒ఙ్గ॒లాం ప॑ద్మమా॒లినీం |
చ॒న్ద్రాం హి॒రణ్మ॑యీం ల॒క్ష్మీం జాత॑వేదో మ॒మావ॑హ ||
సాజ్యం త్రివర్తిసంయుక్తం వహ్నినా యోజితం మయా |
దీపం గృహాణ దేవేశి త్రైలోక్యతిమిరాపహం ||
ఓం శ్రీదుర్గాపరాదేవ్యై నమః దీపం దర్శయామి |
ధూప దీపానంతరం శుద్ధాచమనీయం సమర్పయామి |
నైవేద్యం –
ఆ॒ర్ద్రాం య॒: కరి॑ణీం య॒ష్టిం సు॒వర్ణాం హే॑మమా॒లినీం |
సూ॒ర్యాం హి॒రణ్మ॑యీం ల॒క్ష్మీం జాత॑వేదో మ॒మావ॑హ ||
శర్కరాఖండఖాద్యాని దధిక్షీరఘృతాని చ |
ఆహారార్థం భక్ష్యభోజ్యం నైవేద్యం ప్రతిగృహ్యతాం ||
ఓం శ్రీదుర్గాపరాదేవ్యై నమః నైవేద్యం సమర్పయామి |
ఓం భూర్భువ॒స్సువ॑: | తత్స॑వి॒తుర్వరే”ణ్య॒o భర్గో॑ దే॒వస్య॑ ధీమహి |
ధియో॒ యో న॑: ప్రచో॒దయా”త్ ||
సత్యం త్వా ఋతేన పరిషించామి |
(సాయంకాలే – ఋతం త్వా సత్యేన పరిషించామి)
అమృతమస్తు | అ॒మృ॒తో॒ప॒స్తర॑ణమసి |
ఓం ప్రా॒ణాయ॒ స్వాహా” | ఓం అ॒పా॒నాయ॒ స్వాహా” |
ఓం వ్యా॒నాయ॒ స్వాహా” | ఓం ఉ॒దా॒నాయ॒ స్వాహా” |
ఓం స॒మా॒నాయ॒ స్వాహా” |
మధ్యే మధ్యే పానీయం సమర్పయామి |
అ॒మృ॒తా॒పి॒ధా॒నమ॑సి | ఉత్తరాపోశనం సమర్పయామి |
హస్తౌ ప్రక్షాళయామి | పాదౌ ప్రక్షాళయామి |
శుద్ధాచమనీయం సమర్పయామి |
ఋతుఫలం –
ఇదం ఫలం మయా దేవి స్థాపితం పురతస్తవ |
తేన మే సఫలావాప్తిర్భవేజ్జన్మని జన్మని ||
ఓం శ్రీదుర్గాపరాదేవ్యై నమః ఋతుఫలం సమర్పయామి |
తాంబూలం –
తాం మ॒ ఆ వ॑హ॒ జాత॑వేదో ల॒క్ష్మీమన॑పగా॒మినీ”ం |
యస్యా॒o హిర॑ణ్య॒o ప్రభూ॑త॒o గావో॑ దా॒స్యోఽశ్వా”న్వి॒న్దేయ॒o పురు॑షాన॒హం ||
పూగీఫలం మహద్దివ్యం నాగవల్లీదళైర్యుతం |
ఏలాలవంగసంయుక్తం తాంబూలం ప్రతిగృహ్యతాం ||
ఓం శ్రీదుర్గాపరాదేవ్యై నమః తాంబూలం సమర్పయామి |
దక్షిణా –
హిరణ్యగర్భగర్భస్థం హేమబీజం విభావసోః |
అనంతపుణ్యఫలదం అతః శాన్తిం ప్రయచ్ఛ మే |
ఓం శ్రీదుర్గాపరాదేవ్యై నమః దక్షిణాం సమర్పయామి |
నీరాజనం –
స॒ంరాజ॑o చ వి॒రాజ॑o చాభి॒శ్రీర్యా చ॑ నో గృ॒హే |
ల॒క్ష్మీ రా॒ష్ట్రస్య॒ యా ముఖే॒ తయా॑ మా॒ సగ్ం సృ॒జామసి ||
కదలీగర్భసంభూతం కర్పూరం తు ప్రదీపితం |
ఆరార్తికమహం కుర్వే పశ్య మాం వరదా భవ ||
ఓం శ్రీదుర్గాపరాదేవ్యై నమః కర్పూర నీరాజనం సమర్పయామి |
నీరాజనానంతరం శుద్ధాచమనీయం సమర్పయామి | నమస్కరోమి |
మంత్రపుష్పం –
ఓం కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి |
తన్నో॑ దుర్గిః ప్రచో॒దయా”త్ ||
శ్రద్ధయా సిక్తయా భక్త్యా హ్యార్ద్రప్రేంణా సమర్పితః |
మంత్రపుష్పాంజలిశ్చాయం కృపయా ప్రతిగృహ్యతాం ||
ఓం శ్రీదుర్గాపరాదేవ్యై నమః మంత్రపుష్పం సమర్పయామి |
ప్రదక్షిణ –
యాని కాని చ పాపాని జన్మాంతరకృతాని చ |
తాని తాని ప్రణశ్యంతి ప్రదక్షిణ పదే పదే |
పాపోఽహం పాపకర్మాఽహం పాపాత్మా పాపసంభవ |
త్రాహి మాం కృపయా దేవీ శరణాగతవత్సలే |
అన్యథా శరణం నాస్తి త్వమేవ శరణం మమ |
తస్మాత్కారుణ్య భావేన రక్ష రక్ష మహేశ్వరి |
ఓం శ్రీదుర్గాపరాదేవ్యై నమః ఆత్మప్రదక్షిణ నమస్కారాన్ సమర్పయామి |
సాష్టాంగ నమస్కారం –
ఉరసా శిరసా దృష్ట్యా మనసా వచసా తథా |
పద్భ్యాం కరాభ్యాం కర్ణాభ్యాం ప్రణామోఽష్టాంగముచ్యతే ||
ఓం శ్రీదుర్గాపరాదేవ్యై నమః సాష్టాంగనమస్కారాన్ సమర్పయామి |
సర్వోపచారాః –
ఓం శ్రీదుర్గాపరాదేవ్యై నమః ఛత్రం ఆచ్ఛాదయామి |
ఓం శ్రీదుర్గాపరాదేవ్యై నమః చామరైర్వీజయామి |
ఓం శ్రీదుర్గాపరాదేవ్యై నమః నృత్యం దర్శయామి |
ఓం శ్రీదుర్గాపరాదేవ్యై నమః గీతం శ్రావయామి |
ఓం శ్రీదుర్గాపరాదేవ్యై నమః ఆందోళికాన్నారోహయామి |
ఓం శ్రీదుర్గాపరాదేవ్యై నమః అశ్వానారోహయామి |
ఓం శ్రీదుర్గాపరాదేవ్యై నమః గజానారోహయామి |
యద్యద్ద్రవ్యమపూర్వం చ పృథివ్యామతిదుర్లభం |
దేవభూపార్హభోగ్యం చ తద్ద్రవ్యం దేవి గృహ్యతాం ||
ఓం శ్రీదుర్గాపరాదేవ్యై నమః సమస్త రాజ్ఞీయోపచారాన్ దేవ్యోపచారాన్ సమర్పయామి |
యా దేవీ మధుకైటభప్రమథినీ యా మాహిషోన్మూలినీ
యా ధూంరేక్షణచండముండశమనీ యా రక్తబీజాశినీ |
యా శుంభాదినిశుంభదైత్యదమనీ యా సిద్ధలక్ష్మీ పరా
సా చండీ నవకోటిశక్తిసహితా మాం పాతు విశ్వేశ్వరీ || 7 ||
క్షమా ప్రార్థనా –
అపరాధసహస్రాణి క్రియంతేఽహర్నిశం మయా |
దాసోఽయమితి మాం మత్వా క్షమస్వ పరమేశ్వరి ||
ఆవాహనం న జానామి న జానామి విసర్జనం |
పూజాం చైవ న జానామి క్షంయతాం పరమేశ్వరి ||
మంత్రహీనం క్రియాహీనం భక్తిహీనం సురేశ్వరి |
యత్పూజితం మయా దేవి పరిపూర్ణం తదస్తు మే ||
అనయా శ్రీసూక్త విధానేన ధ్యానావాహనాది షోడశోపచార పూజనేన భగవతీ సర్వాత్మికా శ్రీమహాకాళీ శ్రీమహాలక్ష్మీ శ్రీమహాసరస్వతీ స్వరూపిణీ శ్రీదుర్గా పరాదేవీ సుప్రీతా సుప్రసన్నా వరదా భవంతు ||
తీర్థప్రసాద గ్రహణం –
అకాలమృత్యహరణం సర్వవ్యాధినివారణం |
సమస్తపాపక్షయకరం శ్రీదుర్గాపరాదేవీ పాదోదకం పావనం శుభం ||
శ్రీమహాకాళీ శ్రీమహాలక్ష్మీ శ్రీమహాసరస్వతీ స్వరూపిణీ శ్రీదుర్గా పరాదేవ్యై నమః ప్రసాదం శిరసా గృహ్ణామి |

శ్రీ దుర్గాష్టోత్తరశతనామావళిః 2

ఓం దుర్గాయై నమః |
ఓం శివాయై నమః |
ఓం మహాలక్ష్ంయై నమః |
ఓం మహాగౌర్యై నమః |
ఓం చండికాయై నమః |
ఓం సర్వజ్ఞాయై నమః |
ఓం సర్వలోకేశ్యై నమః |
ఓం సర్వకర్మఫలప్రదాయై నమః |
ఓం సర్వతీర్థమయ్యై నమః | 9
ఓం పుణ్యాయై నమః |
ఓం దేవయోనయే నమః |
ఓం అయోనిజాయై నమః |
ఓం భూమిజాయై నమః |
ఓం నిర్గుణాయై నమః |
ఓం ఆధారశక్త్యై నమః |
ఓం అనీశ్వర్యై నమః |
ఓం నిర్గుణాయై నమః |
ఓం నిరహంకారాయై నమః | 18
ఓం సర్వగర్వవిమర్దిన్యై నమః |
ఓం సర్వలోకప్రియాయై నమః |
ఓం వాణ్యై నమః |
ఓం సర్వవిద్యాధిదేవతాయై నమః |
ఓం పార్వత్యై నమః |
ఓం దేవమాత్రే నమః |
ఓం వనీశాయై నమః |
ఓం వింధ్యవాసిన్యై నమః |
ఓం తేజోవత్యై నమః | 27
ఓం మహామాత్రే నమః |
ఓం కోటిసూర్యసమప్రభాయై నమః |
ఓం దేవతాయై నమః |
ఓం వహ్నిరూపాయై నమః |
ఓం సదౌజసే నమః |
ఓం వర్ణరూపిణ్యై నమః |
ఓం గుణాశ్రయాయై నమః |
ఓం గుణమయ్యై నమః |
ఓం గుణత్రయవివర్జితాయై నమః | 36
ఓం కర్మజ్ఞానప్రదాయై నమః |
ఓం కాంతాయై నమః |
ఓం సర్వసంహారకారిణ్యై నమః |
ఓం ధర్మజ్ఞానాయై నమః |
ఓం ధర్మనిష్ఠాయై నమః |
ఓం సర్వకర్మవివర్జితాయై నమః |
ఓం కామాక్ష్యై నమః |
ఓం కామసంహర్త్ర్యై నమః |
ఓం కామక్రోధవివర్జితాయై నమః | 45
ఓం శాంకర్యై నమః |
ఓం శాంభవ్యై నమః |
ఓం శాంతాయై నమః |
ఓం చంద్రసూర్యాగ్నిలోచనాయై నమః |
ఓం సుజయాయై నమః |
ఓం జయభూమిష్ఠాయై నమః |
ఓం జాహ్నవ్యై నమః |
ఓం జనపూజితాయై నమః |
ఓం శాస్త్రాయై నమః | 54
ఓం శాస్త్రమయాయై నమః |
ఓం నిత్యాయై నమః |
ఓం శుభాయై నమః |
ఓం చంద్రార్ధమస్తకాయై నమః |
ఓం భారత్యై నమః |
ఓం భ్రామర్యై నమః |
ఓం కల్పాయై నమః |
ఓం కరాళ్యై నమః |
ఓం కృష్ణపింగళాయై నమః | 63
ఓం బ్రాహ్ంయై నమః |
ఓం నారాయణ్యై నమః |
ఓం రౌద్ర్యై నమః |
ఓం చంద్రామృతపరిశ్రుతాయై నమః |
ఓం జ్యేష్ఠాయై నమః |
ఓం ఇందిరాయై నమః |
ఓం మహామాయాయై నమః |
ఓం జగత్సృష్ట్యాదికారిణ్యై నమః |
ఓం బ్రహ్మాండకోటిసంస్థానాయై నమః | 72
ఓం కామిన్యై నమః |
ఓం కమలాలయాయై నమః |
ఓం కాత్యాయన్యై నమః |
ఓం కలాతీతాయై నమః |
ఓం కాలసంహారకారిణ్యై నమః |
ఓం యోగనిష్ఠాయై నమః |
ఓం యోగిగంయాయై నమః |
ఓం యోగిధ్యేయాయై నమః |
ఓం తపస్విన్యై నమః | 81
ఓం జ్ఞానరూపాయై నమః |
ఓం నిరాకారాయై నమః |
ఓం భక్తాభీష్టఫలప్రదాయై నమః |
ఓం భూతాత్మికాయై నమః |
ఓం భూతమాత్రే నమః |
ఓం భూతేశాయై నమః |
ఓం భూతధారిణ్యై నమః |
ఓం స్వధానారీమధ్యగతాయై నమః |
ఓం షడాధారాదివర్తిన్యై నమః | 90
ఓం మోహదాయై నమః |
ఓం అంశుభవాయై నమః |
ఓం శుభ్రాయై నమః |
ఓం సూక్ష్మాయై నమః |
ఓం మాత్రాయై నమః |
ఓం నిరాలసాయై నమః |
ఓం నింనగాయై నమః |
ఓం నీలసంకాశాయై నమః |
ఓం నిత్యానందాయై నమః | 99
ఓం హరాయై నమః |
ఓం పరాయై నమః |
ఓం సర్వజ్ఞానప్రదాయై నమః |
ఓం అనంతాయై నమః |
ఓం సత్యాయై నమః |
ఓం దుర్లభరూపిణ్యై నమః |
ఓం సరస్వత్యై నమః |
ఓం సర్వగతాయై నమః |
ఓం సర్వాభీష్టప్రదాయిన్యై నమః | 108
ఇతి శ్రీ దుర్గాష్టోత్తరశతనామావళిః |

శ్రీ దుర్గా సప్తశ్లోకీ

శివ ఉవాచ |
దేవీ త్వం భక్తసులభే సర్వకార్యవిధాయిని |
కలౌ హి కార్యసిద్ధ్యర్థముపాయం బ్రూహి యత్నతః ||
దేవ్యువాచ |
శృణు దేవ ప్రవక్ష్యామి కలౌ సర్వేష్టసాధనం |
మయా తవైవ స్నేహేనాప్యంబాస్తుతిః ప్రకాశ్యతే ||
అస్య శ్రీ దుర్గా సప్తశ్లోకీ స్తోత్రమంత్రస్య నారాయణ ఋషిః, అనుష్టుప్ ఛందః, శ్రీ మహాకాళీ మహాలక్ష్మీ మహాసరస్వత్యో దేవతాః, శ్రీ దుర్గా ప్రీత్యర్థం సప్తశ్లోకీ దుర్గాపాఠే వినియోగః |
జ్ఞానినామపి చేతాంసి దేవీ భగవతీ హి సా |
బలాదాకృష్య మోహాయ మహామాయా ప్రయచ్ఛతి || 1 ||
దుర్గే స్మృతా హరసి భీతిమశేషజంతోః
స్వస్థైః స్మృతా మతిమతీవ శుభాం దదాసి |
దారిద్ర్యదుఃఖ భయహారిణి కా త్వదన్యా
సర్వోపకారకరణాయ సదార్ద్ర చిత్తా || 2 ||
సర్వమంగళమాంగళ్యే శివే సర్వార్థసాధికే |
శరణ్యే త్ర్యంబకే గౌరీ నారాయణి నమోఽస్తు తే || 3 ||
శరణాగతదీనార్తపరిత్రాణపరాయణే |
సర్వస్యార్తిహరే దేవి నారాయణి నమోఽస్తు తే || 4 ||
సర్వస్వరూపే సర్వేశే సర్వశక్తిసమన్వితే |
భయేభ్యస్త్రాహి నో దేవి దుర్గే దేవి నమోఽస్తు తే || 5 ||
రోగానశేషానపహంసి తుష్టా-
రుష్టా తు కామాన్ సకలానభీష్టాన్ |
త్వామాశ్రితానాం న విపన్నరాణాం
త్వామాశ్రితా హ్యాశ్రయతాం ప్రయాంతి || 6 ||
సర్వబాధాప్రశమనం త్రైలోక్యస్యాఖిలేశ్వరి |
ఏవమేవ త్వయా కార్యమస్మద్వైరి వినాశనం || 7 ||

శ్రీ దుర్గా స్తోత్రం (పరశురామ కృతం)

పరశురామ ఉవాచ |
శ్రీకృష్ణస్య చ గోలోకే పరిపూర్ణతమస్య చ |
ఆవిర్భూతా విగ్రహతః పురా సృష్ట్యున్ముఖస్య చ || 1 ||
సూర్యకోటిప్రభాయుక్తా వస్త్రాలంకారభూషితా |
వహ్నిశుద్ధాంశుకాధానా సస్మితా సుమనోహరా || 2 ||
నవయౌవనసంపన్నా సిందూరారుణ్యశోభితా |
లలితం కబరీభారం మాలతీమాల్యమండితం || 3 ||
అహోఽనిర్వచనీయా త్వం చారుమూర్తిం చ బిభ్రతీ |
మోక్షప్రదా ముముక్షూణాం మహావిష్ణుర్విధిః స్వయం || 4 ||
ముమోహ క్షణమాత్రేణ దృష్ట్వా త్వాం సర్వమోహినీం |
బాలైః సంభూయ సహసా సస్మితా ధావితా పురా || 5 ||
సద్భిః ఖ్యాతా తేన రాధా మూలప్రకృతిరీశ్వరీ |
కృష్ణస్తాం సహసా భీతో వీర్యాధానం చకార హ || 6 ||
తతో డింభం మహజ్జజ్ఞే తతో జాతో మహావిరాట్ |
యస్యైవ లోమకూపేషు బ్రహ్మాండాన్యఖిలాని చ || 7 ||
రాధారతిక్రమేణైవ తన్నిఃశ్వాసో బభూవ హ |
స నిఃశ్వాసో మహావాయుః స విరాడ్విశ్వధారకః || 8 ||
భయధర్మజలేనైవ పుప్లువే విశ్వగోలకం |
స విరాడ్విశ్వనిలయో జలరాశిర్బభూవ హ || 9 ||
తతస్త్వం పంచధా భూయ పంచమూర్తీశ్చ బిభ్రతీ |
ప్రాణాధిష్ఠాతృమూర్తిర్యా కృష్ణస్య పరమాత్మనః || 10 ||
కృష్ణప్రాణాధికాం రాధాం తాం వదంతి పురావిదః |
వేదాధిష్ఠాతృమూర్తిర్యా వేదాశాస్త్రప్రసూరపి || 11 ||
తాం సావిత్రీం శుద్ధరూపాం ప్రవదంతి మనీషిణః |
ఐశ్వర్యాధిష్ఠాతృమూర్తిః శాంతిస్త్వం శాంతరూపిణీ || 12 ||
లక్ష్మీం వదంతి సంతస్తాం శుద్ధాం సత్త్వస్వరూపిణీం |
రాగాధిష్ఠాతృదేవీ యా శుక్లమూర్తిః సతాం ప్రసూః || 13 ||
సరస్వతీం తాం శాస్త్రజ్ఞాం శాస్త్రజ్ఞాః ప్రవదంత్యహో |
బుద్ధిర్విద్యా సర్వశక్తేర్యా మూర్తిరధిదేవతా || 14 ||
సర్వమంగళదా సంతో వదంతి సర్వమంగళాం |
సర్వమంగళమంగళ్యా సర్వమంగళరూపిణీ || 15 ||
సర్వమంగళబీజస్య శివస్య నిలయేఽధునా |
శివే శివాస్వరూపా త్వం లక్ష్మీర్నారాయణాంతికే || 16 ||
సరస్వతీ చ సావిత్రీ వేదసూర్బ్రహ్మణః ప్రియా |
రాధా రాసేశ్వరస్యైవ పరిపూర్ణతమస్య చ || 17 ||
పరమానందరూపస్య పరమానందరూపిణీ |
త్వత్కలాంశాంశకలయా దేవానామపి యోషితః || 18 ||
త్వం విద్యా యోషితః సర్వాః సర్వేషాం బీజరూపిణీ |
ఛాయా సూర్యస్య చంద్రస్య రోహిణీ సర్వమోహినీ || 19 ||
శచీ శక్రస్య కామస్య కామినీ రతిరీశ్వరీ |
వరుణానీ జలేశస్య వాయోః స్త్రీ ప్రాణవల్లభా || 20 ||
వహ్నేః ప్రియా హి స్వాహా చ కుబేరస్య చ సుందరీ |
యమస్య తు సుశీలా చ నైరృతస్య చ కైటభీ || 21 ||
ఐశానీ స్యాచ్ఛశికలా శతరూపా మనోః ప్రియా |
దేవహూతిః కర్దమస్య వసిష్ఠస్యాప్యరుంధతీ || 22 ||
లోపాముద్రాఽప్యగస్త్యస్య దేవమాతాఽదితిస్తథా |
అహల్యా గౌతమస్యాపి సర్వాధారా వసుంధరా || 23 ||
గంగా చ తులసీ చాపి పృథివ్యాం యాః సరిద్వరా |
ఏతాః సర్వాశ్చ యా హ్యన్యా సర్వాస్త్వత్కలయాంబికే || 24 ||
గృహలక్ష్మీర్గృహే నౄణాం రాజలక్ష్మీశ్చ రాజసు |
తపస్వినాం తపస్యా త్వం గాయత్రీ బ్రాహ్మణస్య చ || 25 ||
సతాం సత్త్వస్వరూపా త్వమసతాం కలహాంకురా |
జ్యోతిరూపా నిర్గుణస్య శక్తిస్త్వం సగుణస్య చ || 26 ||
సూర్యే ప్రభాస్వరూపా త్వం దాహికా చ హుతాశనే |
జలే శైత్యస్వరూపా చ శోభారూపా నిశాకరే || 27 ||
త్వం భూమౌ గంధరూపా చాప్యాకాశే శబ్దరూపిణీ |
క్షుత్పిపాసాదయస్త్వం చ జీవినాం సర్వశక్తయః || 28 ||
సర్వబీజస్వరూపా త్వం సంసారే సారరూపిణీ |
స్మృతిర్మేధా చ బుద్ధిర్వా జ్ఞానశక్తిర్విపశ్చితాం || 29 ||
కృష్ణేన విద్యా యా దత్తా సర్వజ్ఞానప్రసూః శుభా |
శూలినే కృపయా సా త్వం యయా మృత్యుంజయః శివః || 30 ||
సృష్టిపాలనసంహారశక్తయస్త్రివిధాశ్చ యాః |
బ్రహ్మవిష్ణుమహేశానాం సా త్వమేవ నమోఽస్తు తే || 31 ||
మధుకైటభభీత్యా చ త్రస్తో ధాతా ప్రకంపితః |
స్తుత్వా ముక్తశ్చ యాం దేవీం తాం మూర్ధ్నా ప్రణమాంయహం || 32 ||
మధుకైటభయోర్యుద్ధే త్రాతాఽసౌ విష్ణురీశ్వరీం |
బభూవ శక్తిమాన్ స్తుత్వా తాం దుర్గాం ప్రణమాంయహం || 33 ||
త్రిపురస్య మహాయుద్ధే సరథే పతితే శివే |
యాం తుష్టువుః సురాః సర్వే తాం దుర్గాం ప్రణమాంయహం || 34 ||
విష్ణునా వృషరూపేణ స్వయం శంభుః సముత్థితః |
జఘాన త్రిపురం స్తుత్వా తాం దుర్గాం ప్రణమాంయహం || 35 ||
యదాజ్ఞయా వాతి వాతః సూర్యస్తపతి సంతతం |
వర్షతీంద్రో దహత్యగ్నిస్తాం దుర్గాం ప్రణమాంయహం || 36 ||
యదాజ్ఞయా హి కాలశ్చ శశ్వద్భ్రమతి వేగతః |
మృత్యుశ్చరతి జంతూనాం తాం దుర్గాం ప్రణమాంయహం || 37 ||
స్రష్టా సృజతి సృష్టిం చ పాతా పాతి యదాజ్ఞయా |
సంహర్తా సంహరేత్కాలే తాం దుర్గాం ప్రణమాంయహం || 38 ||
జ్యోతిఃస్వరూపో భగవాన్ శ్రీకృష్ణో నిర్గుణః స్వయం |
యయా వినా న శక్తశ్చ సృష్టిం కర్తుం నమామి తాం || 39 ||
రక్ష రక్ష జగన్మాతరపరాధం క్షమస్వ మే |
శిశూనామపరాధేన కుతో మాతా హి కుప్యతి || 40 ||
ఇత్యుక్త్వా పరశురామశ్చ నత్వా తాం చ రురోద హ |
తుష్టా దుర్గా సంభ్రమేణ చాభయం చ వరం దదౌ || 41 ||
అమరో భవ హే పుత్ర వత్స సుస్థిరతాం వ్రజ |
శర్వప్రసాదాత్సర్వత్ర జయోఽస్తు తవ సంతతం || 42 ||
సర్వాంతరాత్మా భగవాంస్తుష్టః స్యాత్సంతతం హరిః |
భక్తిర్భవతు తే కృష్ణే శివదే చ శివే గురౌ || 43 ||
ఇష్టదేవే గురౌ యస్య భక్తిర్భవతి శాశ్వతీ |
తం హంతుం న హి శక్తా వా రుష్టా వా సర్వదేవతాః || 44 ||
శ్రీకృష్ణస్య చ భక్తస్త్వం శిష్యో వై శంకరస్య చ |
గురుపత్నీం స్తౌషి యస్మాత్కస్త్వాం హంతుమిహేశ్వరః || 45 ||
అహో న కృష్ణభక్తానామశుభం విద్యతే క్వచిత్ |
అన్యదేవేషు యే భక్తా న భక్తా వా నిరంకుశాః || 46 ||
చంద్రమా బలవాంస్తుష్టో యేషాం భాగ్యవతాం భృగో |
తేషాం తారాగణా రుష్టాః కిం కుర్వంతి చ దుర్బలాః || 47 ||
యస్మై తుష్టః పాలయతి నరదేవో మహాన్సుఖీ |
తస్య కిం వా కరిష్యంతి రుష్టా భృత్యాశ్చ దుర్బలాః || 48 ||
ఇత్యుక్త్వా పార్వతీ తుష్టా దత్త్వా రామాయ చాశిషం |
జగామాంతఃపురం తూర్ణం హరిశబ్దో బభూవ హ || 49 ||
స్తోత్రం వై కాణ్వశాఖోక్తం పూజాకాలే చ యః పఠేత్ |
యాత్రాకాలే తథాప్రాతర్వాంఛితార్థం లభేద్ధ్రువం || 50 ||
పుత్రార్థీ లభతే పుత్రం కన్యార్థీ కన్యకాం లభేత్ |
విద్యార్థీ లభతే విద్యాం ప్రజార్థీ చాప్నుయాత్ప్రజాః || 51 ||
భ్రష్టరాజ్యో లభేద్రాజ్యం నష్టవిత్తో ధనం లభేత్ |
యస్య రుష్టో గురుర్దేవో రాజా వా బాంధవోఽథవా || 52 ||
తస్య తుష్టశ్చ వరదః స్తోత్రరాజప్రసాదతః |
దస్యుగ్రస్తః ఫణిగ్రస్తః శత్రుగ్రస్తో భయానకః || 53 ||
వ్యాధిగ్రస్తో భవేన్ముక్తః స్తోత్రస్మరణమాత్రతః |
రాజద్వారే శ్మశానే చ కారాగారే చ బంధనే || 54 ||
జలరాశౌ నిమగ్నశ్చ ముక్తస్తత్ స్మృతిమాత్రతః |
స్వామిభేదే పుత్రభేదే మిత్రభేదే చ దారుణే || 55 ||
స్తోత్రస్మరణమాత్రేణ వాంఛితార్థం లభేద్ధ్రువం |
కృత్వా హవిష్యం వర్షం చ స్తోత్రరాజం శృణోతి యా || 56 ||
భక్త్యా దుర్గాం చ సంపూజ్య మహావంధ్యా ప్రసూయతే |
లభతే సా దివ్యపుత్రం జ్ఞానినం చిరజీవినం || 57 ||
అసౌభాగ్యా చ సౌభాగ్యం షణ్మాసశ్రవణాల్లభేత్ |
నవమాసం కాకవంధ్యా మృతవత్సా చ భక్తితః || 58 ||
స్తోత్రరాజం యా శృణోతి సా పుత్రం లభతే ధ్రువం |
కన్యామాతా పుత్రహీనా పంచమాసం శృణోతి యా |
ఘటే సంపూజ్య దుర్గాం చ సా పుత్రం లభతే ధ్రువం || 59 ||
ఇతి శ్రీబ్రహ్మవైవర్తే మహాపురాణే గణపతిఖండే నారదనారాయణసంవాదే పంచచత్వారింశోఽధ్యాయే పరశురామకృత దుర్గా స్తోత్రం 

శ్రీ దుర్గా స్తోత్రం (శ్రీకృష్ణ కృతం)

శ్రీకృష్ణ ఉవాచ |
త్వమేవ సర్వజననీ మూలప్రకృతిరీశ్వరీ |
త్వమేవాద్యా సృష్టివిధౌ స్వేచ్ఛయా త్రిగుణాత్మికా || 1 ||
కార్యార్థే సగుణా త్వం చ వస్తుతో నిర్గుణా స్వయం |
పరబ్రహ్మస్వరూపా త్వం సత్యా నిత్యా సనాతనీ || 2 ||
తేజః స్వరూపా పరమా భక్తానుగ్రవిగ్రహా |
సర్వస్వరూపా సర్వేశా సర్వాధారా పరాత్పరా || 3 ||
సర్వబీజస్వరూపా చ సర్వపూజ్యా నిరాశ్రయా |
సర్వజ్ఞా సర్వతోభద్రా సర్వమంగళమంగళా || 4 ||
సర్వబుద్ధిస్వరూపా చ సర్వశక్తిస్వరూపిణీ |
సర్వజ్ఞానప్రదా దేవీ సర్వజ్ఞా సర్వభావినీ || 5 ||
త్వం స్వాహా దేవదానే చ పితృదానే స్వధా స్వయం |
దక్షిణా సర్వదానే చ సర్వశక్తిస్వరూపిణీ || 6 ||
నిద్రా త్వం చ దయా త్వం చ తృష్ణా త్వం చాత్మనః ప్రియా |
క్షుత్ క్షాంతిః శాంతిరీశా చ కాంతిస్తుష్టిశ్చ శాశ్వతీ || 7 ||
శ్రద్ధా పుష్టిశ్చ తంద్రా చ లజ్జా శోభా దయా తథా |
సతాం సంపత్స్వరూపా శ్రీర్విపత్తిరసతామిహ || 8 ||
ప్రీతిరూపా పుణ్యవతాం పాపినాం కలహాంకురా |
శశ్వత్కర్మమయీ శక్తిః సర్వదా సర్వజీవినాం || 9 ||
దేవేభ్యః స్వపదో దాత్రీ ధాతుర్ధాత్రీ కృపామయీ |
హితాయ సర్వదేవానాం సర్వాసురవినాశినీ || 10 ||
యోగినిద్రా యోగరూపా యోగదాత్రీ చ యోగినాం |
సిద్ధిస్వరూపా సిద్ధానాం సిద్ధిదా సిద్ధయోగినీ || 11 ||
మాహేశ్వరీ చ బ్రహ్మాణీ విష్ణుమాయా చ వైష్ణవీ |
భద్రదా భద్రకాలీ చ సర్వలోకభయంకరీ || 12 ||
గ్రామే గ్రామే గ్రామదేవీ గృహదేవీ గృహే గృహే |
సతాం కీర్తిః ప్రతిష్ఠా చ నిందా త్వమసతాం సదా || 13 ||
మహాయుద్ధే మహామారీ దుష్టసంహారరూపిణీ |
రక్షాస్వరూపా శిష్టానాం మాతేవ హితకారిణీ || 14 ||
వంద్యా పూజ్యా స్తుతా త్వం చ బ్రహ్మాదీనాం చ సర్వదా |
బ్రహ్మణ్యరూపా విప్రాణాం తపస్యా చ తపస్వినాం || 15 ||
విద్యా విద్యావతాం త్వం చ బుద్ధిర్బుద్ధిమతాం సతాం |
మేధా స్మృతిస్వరూపా చ ప్రతిభా ప్రతిభావతాం || 16 ||
రాజ్ఞాం ప్రతాపరూపా చ విశాం వాణిజ్యరూపిణీ |
సృష్టౌ సృష్టిస్వరూపా త్వం రక్షారూపా చ పాలనే || 17 ||
తథాంతే త్వం మహామారీ విశ్వే విశ్వైశ్చ పూజితే |
కాలరాత్రిర్మహారాత్రిర్మోహరాత్రిశ్చ మోహినీ || 18 ||
దురత్యయా మే మాయా త్వం యయా సంమోహితం జగత్ |
యయా ముగ్ధో హి విద్వాంశ్చ మోక్షమార్గం న పశ్యతి || 19 ||
ఇత్యాత్మనా కృతం స్తోత్రం దుర్గాయా దుర్గనాశనం |
పూజాకాలే పఠేద్యో హి సిద్ధిర్భవతి వాంఛితా || 20 ||
ఇతి శ్రీబ్రహ్మవైవర్తే మహాపురాణే ద్వితీయే ప్రకృతిఖండే నారదనారాయణసంవాదే దుర్గోపాఖ్యానే షట్షష్టితమోఽధ్యాయే శ్రీ దుర్గా స్తోత్రం |

శ్రీ కామాక్షీ స్తోత్రం 4 (పరమాచార్య కృతం)

శ్రీ కామాక్షీ మంగళ కీర్తన సకల శుభాలను ప్రసాదించే శ్రీ కామాక్షి అమ్మవారిని స్తుతిస్తూ, జగద్గురు శ్రీ చంద్రశేఖరేంద్ర సరస్వతి స్వామి వారు (పరమాచార్య) రచించిన అద్భుతమైన స్తోత్రం. ఈ స్తోత్రం మంగళకరమైన రూపం, సజ్జనులపై దయ, మరియు భక్తుల బాధలను తొలగించే శక్తి కల అమ్మవారిని కీర్తిస్తూ, అందరికీ కల్యాణమును (శుభమును) ప్రసాదించమని కోరుతుంది. ఈ కీర్తన పారాయణం వల్ల నిత్య శుభాలు కలుగుతాయి.

మంగళచరణే మంగళవదనే మంగళదాయిని కామాక్షి |
గురుగుహజనని కురు కల్యాణం కుంజరిజనని కామాక్షి || 1 ||

శ్రీ కామాక్షీ స్తోత్రం

కల్పానోకహపుష్పజాలవిలసన్నీలాలకాం మాతృకాం
కాంతాం కంజదళేక్షణాం కలిమలప్రధ్వంసినీం కాళికాం |
కాంచీనూపురహారదామసుభగాం కాంచీపురీనాయికాం
కామాక్షీం కరికుంభసన్నిభకుచాం వందే మహేశప్రియాం || 1 ||
కాశాభాం శుకభాసురాం ప్రవిలసత్కోశాతకీ సన్నిభాం
చంద్రార్కానలలోచనాం సురుచిరాలంకారభూషోజ్జ్వలాం |
బ్రహ్మశ్రీపతివాసవాదిమునిభిః సంసేవితాంఘ్రిద్వయాం
కామాక్షీం గజరాజమందగమనాం వందే మహేశప్రియాం || 2 ||
ఐం క్లీం సౌరితి యాం వదంతి మునయస్తత్త్వార్థరూపాం పరాం
వాచామాదిమకారణం హృది సదా ధ్యాయంతి యాం యోగినః |
బాలాం ఫాలవిలోచనాం నవజపావర్ణాం సుషుంనాశ్రితాం
కామాక్షీం కలితావతంససుభగాం వందే మహేశప్రియాం || 3 ||
యత్పాదాంబుజరేణులేశమనిశం లబ్ధ్వా విధత్తే విధి-
-ర్విశ్వం తత్పరిపాతి విష్ణురఖిలం యస్యాః ప్రసాదాచ్చిరం |
రుద్రః సంహరతి క్షణాత్తదఖిలం యన్మాయయా మోహితః
కామాక్షీమతిచిత్రచారుచరితాం వందే మహేశప్రియాం || 4 ||
సూక్ష్మాత్సూక్ష్మతరాం సులక్షితతనుం క్షాంతాక్షరైర్లక్షితాం
వీక్షాశిక్షితరాక్షసాం త్రిభువనక్షేమంకరీమక్షయాం |
సాక్షాల్లక్షణలక్షితాక్షరమయీం దాక్షాయణీం సాక్షిణీం
కామాక్షీం శుభలక్షణైః సులలితాం వందే మహేశప్రియాం || 5 ||
ఓంకారాంగణదీపికాముపనిషత్ప్రాసాదపారావతీం
ఆంనాయాంబుధిచంద్రికామఘతమఃప్రధ్వంసహంసప్రభాం |
కాంచీపట్టణపంజరాంతరశుకీం కారుణ్యకల్లోలినీం
కామాక్షీం శివకామరాజమహిషీం వందే మహేశప్రియాం || 6 ||
హ్రీంకారాత్మకవర్ణమాత్రపఠనాదైంద్రీం శ్రియం తన్వతీం
చిన్మాత్రాం భువనేశ్వరీమనుదినం భిక్షాప్రదానక్షమాం |
విశ్వాఘౌఘనివారిణీం విమలినీం విశ్వంభరాం మాతృకాం
కామాక్షీం పరిపూర్ణచంద్రవదనాం వందే మహేశప్రియాం || 7 ||
వాగ్దేవీతి చ యాం వదంతి మునయః క్షీరాబ్ధికన్యేతి చ
క్షోణీభృత్తనయేతి చ శ్రుతిగిరో యాం ఆమనంతి స్ఫుటం |
ఏకానేకఫలప్రదాం బహువిధాఽఽకారాస్తనూస్తన్వతీం
కామాక్షీం సకలార్తిభంజనపరాం వందే మహేశప్రియాం || 8 ||
మాయామాదిమకారణం త్రిజగతామారాధితాంఘ్రిద్వయాం
ఆనందామృతవారిరాశినిలయాం విద్యాం విపశ్చిద్ధియాం |
మాయామానుషరూపిణీం మణిలసన్మధ్యాం మహామాతృకాం
కామాక్షీం కరిరాజమందగమనాం వందే మహేశప్రియాం || 9 ||
కాంతా కామదుఘా కరీంద్రగమనా కామారివామాంకగా
కల్యాణీ కలితావతారసుభగా కస్తూరికాచర్చితా
కంపాతీరరసాలమూలనిలయా కారుణ్యకల్లోలినీ
కల్యాణాని కరోతు మే భగవతీ కాంచీపురీదేవతా || 10 ||