Sacred Stotras & Deities

Immerse yourself in divine chants, devotional hymns, and sacred verses dedicated to holy deities.

Mooka Pancha Sathi

Sri Rama Charita Manasa

Tripura Bhairavi

TRIPURA SUNDARI DEVI

శ్రీ సుబ్రహ్మణ్య శరణాగతి గద్యం

శ్రీ సుబ్రహ్మణ్య శరణాగతి గద్యం.

Telugu

Read Stotra

శ్రీ సుబ్రహ్మణ్య శరణాగతి గద్యం

ఓం దేవదేవోత్తమ, దేవతాసార్వభౌమ, అఖిలాండకోటిబ్రహ్మాండనాయక, భగవతే మహాపురుషాయ, ఈశాత్మజాయ, గౌరీపుత్రాయ, అనేకకోటితేజోమయరూపాయ, సుబ్రహ్మణ్యాయ, అగ్నివాయుగంగాధరాయ, శరవణభవాయ, కార్తికేయాయ, షణ్ముఖాయ, స్కందాయ, షడక్షరస్వరూపాయ, షట్క్షేత్రవాసాయ, షట్కోణమధ్యనిలయాయ, షడాధారాయ, గురుగుహాయ, కుమారాయ, గురుపరాయ, స్వామినాథాయ, శివగురునాథాయ, మయూరవాహనాయ, శక్తిహస్తాయ, కుక్కుటధ్వజాయ, ద్వాదశభుజాయ, అభయవరదపంకజహస్తాయ, పరిపూర్ణకృపాకటాక్షలహరిప్రవాహాష్టాదశనేత్రాయ, నారదాగస్త్యవ్యాసాదిమునిగణవందితాయ, సకలదేవసేనాసమూహపరివృతాయ, సర్వలోకశరణ్యాయ, శూరపద్మతారకసింహముఖక్రౌంచాసురాదిదమనాయ, భక్తపరిపాలకాయ, సురరాజవందితాయ, దేవసేనామనోహరాయ, నంబిరాజవంద్యాయ, సుందరవల్లీవాంఛితార్థమనమోహనాయ, యోగాయ, యోగాధిపతయే, శాంతాయ, శాంతరూపిణే, శివాయ, శివనందనాయ, షష్ఠిప్రియాయ, సర్వజ్ఞానహృదయాయ, శక్తిహస్తాయ, కుక్కుటధ్వజాయ, మయూరగమనాయ, మణిగణభూషితాయ, ఘుమఘుమమాలాభూషణాయ, చందనవిభూతికుంకుమతిలక రుద్రాక్షభూషితాయ, భక్తతాపనివారకాయ, భక్తాభీష్టప్రదాయ, భక్తానందకరాయ, భక్తాహ్లాదకరాయ, భక్తయోగక్షేమవహనాయ, భక్తమంగళప్రదాయ, భక్తభక్తిప్రదాయ, భక్తభక్తిమగ్నాయ, భక్తచింతామణే, వల్లీదేవసేనా శివశక్తి గణేశ శాస్తా ఆంజనేయ మహావిష్ణు మహాలక్ష్మీ నవవీరసోదరసమేత అతిశయ అపారకరుణామూర్తయే, తవ కమలమృదులచరణారవిందయోః నమో నమః |
శ్రీశ్రీసుబ్రహ్మణ్యస్వామిన్ విజయీ భవ జయ విజయీ భవ |
ఇతి శ్రీసుబ్రహ్మణ్య శరణాగతి గద్యం ||

శ్రీ సుబ్రహ్మణ్య షట్కం

శ్రీ సుబ్రహ్మణ్య షట్కం.

Telugu

Read Stotra

శ్రీ సుబ్రహ్మణ్య షట్కం

శరణాగతమాతురమాధిజితం
కరుణాకర కామద కామహతం |
శరకాననసంభవ చారురుచే
పరిపాలయ తారకమారక మాం || 1 ||
హరసారసముద్భవ హైమవతీ-
-కరపల్లవలాలిత కంరతనో |
మురవైరివిరించిముదంబునిధే
పరిపాలయ తారకమారక మాం || 2 ||
శరదిందుసమానషడాననయా
సరసీరుహచారువిలోచనయా |
నిరుపాధికయా నిజబాలతయా
పరిపాలయ తారకమారక మాం || 3 ||
గిరిజాసుత సాయకభిన్నగిరే
సురసింధుతనూజ సువర్ణరుచే |
శిఖితోకశిఖావలవాహన హే
పరిపాలయ తారకమారక మాం || 4 ||
జయ విప్రజనప్రియ వీర నమో
జయ భక్తజనప్రియ భద్ర నమో |
జయ శాఖ విశాఖ కుమార నమః
పరిపాలయ తారకమారక మాం || 5 ||
పరితో భవ మే పురతో భవ మే
పథి మే భగవన్ భవ రక్ష గతిం |
వితరాశు జయం విజయం పరితః
పరిపాలయ తారకమారక మాం || 6 ||
ఇతి కుక్కుటకేతుమనుస్మరతాం
పఠతామపి షణ్ముఖషట్కమిదం |
భజతామపి నందనమిందుభృతో
న భయం క్వచిదస్తి శరీరభృతాం || 7 ||
గాంగేయం వహ్నిగర్భం శరవణజనితం జ్ఞానశక్తిం కుమారం
బ్రహ్మణ్యం స్కందదేవం గుహమచలభిదం రుద్రతేజస్వరూపం |
సేనాన్యం తారకఘ్నం గజముఖసహజం కార్తికేయం షడాస్యం
సుబ్రహ్మణ్యం మయూరధ్వజరథసహితం దేవదేవం నమామి || 8 ||

శ్రీ నటరాజాష్టకం

శ్రీ నటరాజాష్టకం.

Telugu

Read Stotra

శ్రీ నటరాజాష్టకం

కుంజరచర్మకృతాంబరమంబురుహాసనమాధవగేయగుణం
శంకరమంతకమానహరం స్మరదాహకలోచనమేణధరం |
సాంజలియోగిపతంజలిసన్నుతమిందుకళాధరమబ్జముఖం
మంజులశింజితరంజితకుంచితవామపదం భజ నృత్యపతిం || 1 ||
పింగళతుంగజటావళిభాసురగంగమమంగళనాశకరం
పుంగవవాహముమాంగధరం రిపుభంగకరం సురలోకనతం |
భృంగవినీలగలం గణనాథసుతం భజ మానస పాపహరం
మంగళదం వరరంగపతిం భవసంగహరం ధనరాజసఖం || 2 ||
పాణినిసూత్రవినిర్మితికారణపాణిలసడ్డమరూత్థరవం
మాధవనాదితమర్దలనిర్గతనాదలయోద్ధృతవామపదం |
సర్వజగత్ప్రళయప్రభువహ్నివిరాజితపాణిముమాలసితం
పన్నగభూషణమున్నతసన్నుతమానమ మానస సాంబశివం || 3 ||
చండగుణాన్వితమండలఖండనపండితమిందుకళాకలితం
దండధరాంతకదండకరం వరతాండవమండితహేమసభం |
అండకరాండజవాహసఖం నమ పాండవమధ్యమమోదకరం
కుండలశోభితగండతలం మునివృందనుతం సకలాండధరం || 4 ||
వ్యాఘ్రపదానతముగ్రతరాసురవిగ్రహమర్దిపదాంబురుహం
శక్రముఖామరవర్గమనోహరనృత్యకరం శ్రుతినుత్యగుణం |
వ్యగ్రతరంగితదేవధునీధృతగర్వహరాయతకేశచయం
భార్గవరావణపూజితమీశముమారమణం భజ శూలధరం || 5 ||
ఆసురశక్తివినాశకరం బహుభాసురకాయమనంగరిపుం
భూసురసేవితపాదసరోరుహమీశ్వరమక్షరముక్షధృతం |
భాస్కరశీతకరాక్షమనాతురమాశ్వరవిందపదం భజ తం
నశ్వరసంసృతిమోహవినాశమహస్కరదంతనిపాతకరం || 6 ||
భూతికరం సితభూతిధరం గతనీతిహరం వరగీతినుతం
భక్తియుతోత్తమముక్తికరం సమశక్తియుతం శుభభుక్తికరం |
భద్రకరోత్తమనామయుతం శ్రుతిసామనుతం నమ సోమధరం
స్తుత్యగుణం భజ నిత్యమగాధభవాంబుధితారకనృత్యపతిం || 7 ||
శూలధరం భవజాలహరం నిటిలాగ్నిధరం జటిలం ధవళం
నీలగలోజ్జ్వలమంగళసద్గిరిరాజసుతామృదుపాణితలం |
శైలకులాధిపమౌళినతం ఛలహీనముపైమి కపాలధరం
కాలవిషాశమనంతమిలానుతమద్భుతలాస్యకరం గిరిశం || 8 ||
చిత్తహరాతులనృత్తపతిప్రియవృత్తకృతోత్తమగీతిమిమాం
ప్రాతరుమాపతిసన్నిధిగో యది గాయతి భక్తియుతో మనసి |
సర్వసుఖం భువి తస్య భవత్యమరాధిపదుర్లభమత్యధికం
నాస్తి పునర్జనిరేతి చ ధామ స శాంభవముత్తమమోదకరం || 9 ||

శ్రీ సుబ్రహ్మణ్య షోడశనామ స్తోత్రం

శ్రీ సుబ్రహ్మణ్య షోడశనామ స్తోత్రం.

Telugu

Read Stotra

శ్రీ సుబ్రహ్మణ్య షోడశనామ స్తోత్రం

అస్య శ్రీ సుబ్రహ్మణ్య షోడశనామస్తోత్ర మహామంత్రస్య అగస్త్యో భగవానృషిః అనుష్టుప్ఛందః సుబ్రహ్మణ్యో దేవతా మమేష్ట సిద్ధ్యర్థే జపే వినియోగః |
ధ్యానం |
షడ్వక్త్రం శిఖివాహనం త్రినయనం చిత్రాంబరాలంకృతం
శక్తిం వజ్రమసిం త్రిశూలమభయం ఖేటం ధనుశ్చక్రకం |
పాశం కుక్కుటమంకుశం చ వరదం హస్తైర్దధానం సదా
ధ్యాయేదీప్సితసిద్ధిదం శివసుతం స్కందం సురారాధితం ||
ప్రథమో జ్ఞానశక్త్యాత్మా ద్వితీయః స్కంద ఏవ చ |
అగ్నిగర్భస్తృతీయస్తు బాహులేయశ్చతుర్థకః || 1 ||
గాంగేయః పంచమః ప్రోక్తః షష్ఠః శరవణోద్భవః |
సప్తమః కార్తికేయశ్చ కుమారశ్చాష్టమస్తథా || 2 ||
నవమః షణ్ముఖః ప్రోక్తో దశమస్తారకాంతకః |
ఏకాదశశ్చ సేనానీః గుహో ద్వాదశ ఏవ చ || 3 ||
త్రయోదశో బ్రహ్మచారీ శివతేజశ్చతుర్దశః |
క్రౌంచదారీ పంచదశః షోడశః శిఖివాహనః || 4 ||
షోడశైతాని నామాని యః పఠేద్భక్తిసంయుతః |
బృహస్పతిసమో వాచి బ్రహ్మతేజోయుతో భవేత్ |
యద్యత్ప్రార్థయే మర్త్యస్తత్సర్వం లభతే ధ్రువం || 5 ||
ఇతి శ్రీ సుబ్రహ్మణ్య షోడశనామ స్తోత్రం |

శ్రీ నటేశ స్తవః

శ్రీ నటేశ స్తవః.

Telugu

Read Stotra

శ్రీ నటేశ స్తవః

హ్రీమత్యా శివయా విరాణ్మయమజం హృత్పంకజస్థం సదా
హ్రీణానా శివకీర్తనే హితకరం హేలాహృదా మానినాం |
హోబేరాదిసుగంధవస్తురుచిరం హేమాద్రిబాణాసనం
హ్రీంకారాదికపాదపీఠమమలం హృద్యం నటేశం భజే || 1 ||
శ్రీమజ్జ్ఞానసభాంతరే ప్రవిలసచ్ఛ్రీపంచవర్ణాకృతిం
శ్రీవాణీవినుతాపదాననిచయం శ్రీవల్లభేనార్చితం |
శ్రీవిద్యామనుమోదినం శ్రితజనశ్రీదాయకం శ్రీధరం
శ్రీచక్రాంతరవాసినం శివమహం శ్రీమన్నటేశం భజే || 2 ||
నవ్యాంభోజముఖం నమజ్జననిధిం నారాయణేనార్చితం
నాకౌకోనగరీనటీలసితకం నాగాదినాలంకృతం |
నానారూపకనర్తనాదిచతురం నాలీకజాన్వేషితం
నాదాత్మానమహం నగేంద్రతనయానాథం నటేశం భజే || 3 ||
మధ్యస్థం మధువైరిమార్గితపదం మద్వంశనాథం ప్రభుం
మారాతీతమతీవ మంజువపుషం మందారగౌరప్రభం |
మాయాతీతమశేషమంగళనిధిం మద్భావనాభావితం
మధ్యేవ్యోమసభాగుహాంతమఖిలాకాశం నటేశం భజే || 4 ||
శిష్టైః పూజితపాదుకం శివకరం శీతాంశురేఖాధరం
శిల్పం భక్తజనావనే శిథిలితాఘౌఘం శివాయాః ప్రియం |
శిక్షారక్షణమంబుజాసనశిరః సంహారశీలప్రభుం
శీతాపాంగవిలోచనం శివమహం శ్రీమన్నటేశం భజే || 5 ||
వాణీవల్లభవంద్యవైభవయుతం వందారుచింతామణిం
వాతాశాధిపభూషణం పరకృపావారాన్నిధిం యోగినాం |
వాంఛాపూర్తికరం వలారివినుతం వాహీకృతాంనాయకం
వామంగాత్తవరాంగనం మమ హృదావాసం నటేశం భజే || 6 ||
యక్షాధీశసఖం యమప్రమథనం యామిన్యధీశాసనం
యజ్ఞధ్వంసకరం యతీంద్రవినుతం యజ్ఞక్రియాదీశ్వరం |
యాజ్యం యాజకరూపిణం యమధనైర్యత్నోపలభ్యాంఘ్రికం
వాజీభూతవృషం సదా హృది మమాయత్తం నటేశం భజే || 7 ||
మాయాశ్రీవిలసచ్చిదంబరమహాపంచాక్షరైరంకితాన్
శ్లోకాన్ సప్త పఠంతి యేఽనుదివసం చింతామణీనామకాన్ |
తేషాం భాగ్యమనేకమాయురధికాన్ విద్వద్వరాన్ సత్సుతాన్
సర్వాభీష్టమసౌ దదాతి సహసా శ్రీమత్సభాధీశ్వరః || 8 ||

శ్రీ సుబ్రహ్మణ్య స్తోత్రం

శ్రీ సుబ్రహ్మణ్య స్తోత్రం.

Telugu

Read Stotra

శ్రీ సుబ్రహ్మణ్య స్తోత్రం

ఆదిత్యవిష్ణువిఘ్నేశరుద్రబ్రహ్మమరుద్గణాః |
లోకపాలాః సర్వదేవాః చరాచరమిదం జగత్ || 1 ||
సర్వం త్వమేవ బ్రహ్మైవ అజమక్షరమద్వయం |
అప్రమేయం మహాశాంతం అచలం నిర్వికారకం || 2 ||
నిరాలంబం నిరాభాసం సత్తామాత్రమగోచరం |
ఏవం త్వాం మేధయా బుద్ధ్యా సదా పశ్యంతి సూరయః || 3 ||
ఏవమజ్ఞానగాఢాంధతమోపహతచేతసః |
న పశ్యంతి తథా మూఢాః సదా దుర్గతి హేతవే || 4 ||
విష్ణ్వాదీని స్వరూపాణి లీలాలోకవిడంబనం |
కర్తుముద్యంయ రూపాణి వివిధాని భవంతి చ || 5 ||
తత్తదుక్తాః కథాః సంయక్ నిత్యసద్గతిప్రాప్తయే |
భక్త్యా శ్రుత్వా పఠిత్వా చ దృష్ట్యా సంపూజ్య శ్రద్ధయా || 6 ||
సర్వాన్కామానవాప్నోతి భవదారాధనాత్ఖలు |
మమ పూజామనుగ్రాహ్య సుప్రసీద భవానఘ || 7 ||
చపలం మన్మథవశమమర్యాదమసూయకం |
వంచకం దుఃఖజనకం పాపిష్ఠం పాహి మాం ప్రభో || 8 ||
సుబ్రహ్మణ్యస్తోత్రమిదం యే పఠంతి ద్విజోత్తమాః |
తే సర్వే ముక్తిమాయాంతి సుబ్రహ్మణ్య ప్రసాదతః || 9 ||

శ్రీ నటేశ్వర భుజంగ స్తుతిః

శ్రీ నటేశ్వర భుజంగ స్తుతిః.

Telugu

Read Stotra

శ్రీ నటేశ్వర భుజంగ స్తుతిః

లోకానాహూయ సర్వాన్ డమరుకనినదైర్ఘోరసంసారమగ్నాన్
దత్వాభీతిం దయాళుః ప్రణతభయహరం కుంచితం వామపాదం |
ఉద్ధృత్యేదం విముక్తేరయనమితి కరాద్దర్శయన్ ప్రత్యయార్థం
బిభ్రద్వహ్నిం సభాయాం కలయతి నటనం యః స పాయాన్నటేశః || 1 ||
దిగీశాది వంద్యం గిరీశానచాపం
మురారాతి బాణం పురత్రాసహాసం |
కరీంద్రాది చర్మాంబరం వేదవేద్యం
మహేశం సభేశం భజేఽహం నటేశం || 2 ||
సమస్తైశ్చ భూతైః సదా నంయమాద్యం
సమస్తైకబంధుం మనోదూరమేకం |
అపస్మారనిఘ్నం పరం నిర్వికారం
మహేశం సభేశం భజేఽహం నటేశం || 3 ||
దయాళుం వరేణ్యం రమానాథవంద్యం
మహానందభూతం సదానందనృత్తం |
సభామధ్యవాసం చిదాకాశరూపం
మహేశం సభేశం భజేఽహం నటేశం || 4 ||
సభానాథమాద్యం నిశానాథభూషం
శివావామభాగం పదాంభోజ లాస్యం |
కృపాపాంగవీక్షం హ్యుమాపాంగదృశ్యం
మహేశం సభేశం భజేఽహం నటేశం || 5 ||
దివానాథరాత్రీశవైశ్వానరాక్షం
ప్రజానాథపూజ్యం సదానందనృత్తం |
చిదానందగాత్రం పరానందసౌధం
మహేశం సభేశం భజేఽహం నటేశం || 6 ||
కరేకాహలీకం పదేమౌక్తికాలిం
గళేకాలకూటం తలేసర్వమంత్రం |
ముఖే మందహాసం భుజే నాగరాజం
మహేశం సభేశం భజేఽహం నటేశం || 7 ||
త్వదన్యం శరణ్యం న పశ్యామి శంభో
మదన్యః ప్రపన్నోస్తి కింతేతిదీనః |
మదర్థేహ్యుపేక్షా తవాసీత్కిమర్థం
మహేశం సభేశం భజేఽహం నటేశం || 8 ||
భవత్పాదయుగ్మం కరేణావలంబే
సదా నృత్తకారిన్ సభామధ్యదేశే |
సదా భావయే త్వాం తదా దాస్యసీష్టం
మహేశం సభేశం భజేఽహం నటేశం || 9 ||
భూయః స్వామిన్ జనిర్మే మరణమపి తథా మాస్తు భూయః సురాణాం
సాంరాజ్యం తచ్ఛ తావత్సుఖలవరహితం దుఃఖదం నార్థయే త్వాం |
సంతాపఘ్నం పురారే ధురి చ తవసభా మందిరే సర్వదా త్వ-
-న్నృత్తం పశ్యన్వసేయం ప్రమథగణవరైః సాకమేతద్విధేహి || 10 ||
ఇతి శ్రీ జ్ఞానసంబంధ కృత శ్రీ నటేశ్వర భుజంగ స్తుతిః |

శ్రీ సుబ్రహ్మణ్య హృదయ స్తోత్రం

శ్రీ సుబ్రహ్మణ్య హృదయ స్తోత్రం.

Telugu

Read Stotra

శ్రీ సుబ్రహ్మణ్య హృదయ స్తోత్రం

అస్య శ్రీసుబ్రహ్మణ్యహృదయస్తోత్రమహామంత్రస్య, అగస్త్యో భగవాన్ ఋషిః, అనుష్టుప్ఛందః, శ్రీసుబ్రహ్మణ్యో దేవతా, సౌం బీజం, స్వాహా శక్తిః, శ్రీం కీలకం, శ్రీసుబ్రహ్మణ్య ప్రసాదసిద్ధ్యర్థే జపే వినియోగః ||
కరన్యాసః –
సుబ్రహ్మణ్యాయ అంగుష్ఠాభ్యాం నమః |
షణ్ముఖాయ తర్జనీభ్యాం నమః |
శక్తిధరాయ మధ్యమాభ్యాం నమః |
షట్కోణసంస్థితాయ అనామికాభ్యాం నమః |
సర్వతోముఖాయ కనిష్ఠికాభ్యాం నమః |
తారకాంతకాయ కరతలకరపృష్ఠాభ్యాం నమః ||
హృదయాది న్యాసః –
సుబ్రహ్మణ్యాయ హృదయాయ నమః |
షణ్ముఖాయ శిరసే స్వాహా |
శక్తిధరాయ శిఖాయై వషట్ |
షట్కోణసంస్థితాయ కవచాయ హుం |
సర్వతోముఖాయ నేత్రత్రయాయ వౌషట్ |
తారకాంతకాయ అస్త్రాయ ఫట్ |
భూర్భువస్సువరోమితి దిగ్బంధః ||
ధ్యానం |
షడ్వక్త్రం శిఖివాహనం త్రినయనం చిత్రాంబరాలంకృతం
వజ్రం శక్తిమసిం త్రిశూలమభయం ఖేటం ధనుశ్చక్రకం |
పాశం కుక్కుటమంకుశం చ వరదం దోర్భిర్దధానం సదా
ధ్యాయామీప్సిత సిద్ధిదం శివసుతం శ్రీద్వాదశాక్షం గుహం ||
పీఠికా |
సత్యలోకే సదానందే మునిభిః పరివేష్టితం |
పప్రచ్ఛుర్మునయః సర్వే బ్రహ్మాణం జగతాం గురుం || 1 ||
భగవన్ సర్వలోకేశ సర్వజ్ఞ కమలాసన |
సదానంద జ్ఞానమూర్తే సర్వభూతహితే రత || 2 ||
బహుధా ప్రోక్తమేతస్య గుహస్య చరితం మహత్ |
హృదయం శ్రోతుమిచ్ఛామః తస్యైవ క్రౌంచభేదినః || 3 ||
బ్రహ్మోవాచ |
శృణ్వంతు మునయః సర్వే గుహ్యాద్గుహ్యతరం మహత్ |
సుబ్రహ్మణ్యస్య హృదయం సర్వభూతహితోదయం || 4 ||
సర్వార్థసిద్ధిదం పుణ్యం సర్వకార్యైక సాధనం |
ధర్మార్థకామదం గుహ్యం ధనధాన్యప్రవర్ధనం || 5 ||
రహస్యమేతద్దేవానాం అదేయం యస్య కస్యచిత్ |
సర్వమిత్రకరం గోప్యం తేజోబలసమన్వితం || 6 ||
ప్రవక్ష్యామి హితార్థం వః పరితుష్టేన చేతసా |
హృత్పద్మకర్ణికామధ్యే ధ్యాయేత్సర్వమనోహరం || 7 ||
అథ హృదయం |
సువర్ణమండపం దివ్యం రత్నతోరణరాజితం |
రత్నస్తంభసహస్రైశ్చ శోభితం పరమాద్భుతం || 8 ||
పరమానందనిలయం భాస్వత్సూర్యసమప్రభం |
దేవదానవగంధర్వగరుడైర్యక్షకిన్నరైః | || 9 ||
సేవార్థమాగతైః సిద్ధైః సాధ్యైరధ్యుషితం సదా |
మహాయోగీంద్రసంసేవ్యం మందారతరుమండితం || 10 ||
మణివిద్రుమవేదీభిర్మహతీభిరుదంచితం |
తన్మధ్యేఽనంతరత్న శ్రీచ్ఛటామండలశోభితం || 11 ||
రత్నసింహాసనం దివ్యం రవికోటిసమప్రభం |
సర్వాశ్చర్యమయం పుణ్యం సర్వతః సుపరిష్కృతం || 12 ||
తన్మధ్యేఽష్టదలం పద్మం ఉద్యదర్కప్రభోదయం |
నిగమాగమరోలంబలంబితం చిన్మయోదయం || 13 ||
దివ్యం తేజోమయం దివ్యం దేవతాభిర్నమస్కృతం |
దేదీప్యమానం రుచిభిర్విశాలం సుమనోహరం || 14 ||
తన్మధ్యే సర్వలోకేశం ధ్యాయేత్సర్వాంగసుందరం |
అనంతాదిత్యసంకాశం ఆశ్రితాభీష్టదాయకం || 15 ||
అచింత్యజ్ఞానవిజ్ఞానతేజోబలసమన్వితం |
సర్వాయుధధరం దివ్యం సర్వాశ్చర్యమయం గుహం || 16 ||
మహార్హ రత్నఖచిత షట్కిరీటవిరాజితం |
శశాంకార్ధకలారంయ సముద్యన్మౌళిభూషణం || 17 ||
మదనోజ్జ్వలకోదండమంగళభ్రూవిరాజితం |
విస్తీర్ణారుణపద్మశ్రీ విలసద్ద్వాదశేక్షణం || 18 ||
చారుశ్రీవర్ణసంపూర్ణముఖశోభావిభాసురం |
మణిప్రభాసమగ్రశ్రీస్ఫురన్మకరకుండలం || 19 ||
లసద్దర్పణదర్పాఢ్య గండస్థలవిరాజితం |
దివ్యకాంచనపుష్పశ్రీనాసాపుటవిరాజితం || 20 ||
మందహాసప్రభాజాలమధురాధర శోభితం |
సర్వలక్షణలక్ష్మీభృత్కంబుకంధర సుందరం || 21 ||
మహానర్ఘమహారత్నదివ్యహారవిరాజితం |
సమగ్రనాగకేయూరసన్నద్ధభుజమండలం || 22 ||
రత్నకంకణసంభాస్వత్కరాగ్ర శ్రీమహోజ్జ్వలం |
మహామణికవాటాభవక్షఃస్థలవిరాజితం || 23 ||
అతిగాంభీర్యసంభావ్యనాభీనవసరోరుహం |
రత్నశ్రీకలితాబద్ధలసన్మధ్యప్రదేశకం || 24 ||
స్ఫురత్కనకసంవీతపీతాంబరసమావృతం |
శృంగారరససంపూర్ణ రత్నస్తంభోపమోరుకం || 25 ||
స్వర్ణకాహలరోచిష్ణు జంఘాయుగళమండలం |
రత్నమంజీరసన్నద్ధ రమణీయ పదాంబుజం || 26 ||
భక్తాభీష్టప్రదం దేవం బ్రహ్మవిష్ణ్వాదిసంస్తుతం |
కటాక్షైః కరుణాదక్షైస్తోషయంతం జగత్పతిం || 27 ||
చిదానందజ్ఞానమూర్తిం సర్వలోకప్రియంకరం |
శంకరస్యాత్మజం దేవం ధ్యాయేచ్ఛరవణోద్భవం || 28 ||
అనంతాదిత్యచంద్రాగ్ని తేజః సంపూర్ణవిగ్రహం |
సర్వలోకైకవరదం సర్వవిద్యార్థతత్త్వకం || 29 ||
సర్వేశ్వరం సర్వవిభుం సర్వభూతహితే రతం |
ఏవం ధ్యాత్వా తు హృదయం షణ్ముఖస్య మహాత్మనః || 30 ||
సర్వాన్కామానవాప్నోతి సంయక్ జ్ఞానం చ విందతి |
శుచౌ దేశే సమాసీనః శుద్ధాత్మా చరితాహ్నికః || 31 ||
ప్రాఙ్ముఖో యతచిత్తశ్చ జపేద్ధృదయముత్తమం |
సకృదేవ మనుం జప్త్వా సంప్రాప్నోత్యఖిలం శుభం || 32 ||
ఇదం సర్వాఘహరణం మృత్యుదారిద్ర్యనాశనం |
సర్వసంపత్కరం పుణ్యం సర్వరోగనివారణం || 33 ||
సర్వకామకరం దివ్యం సర్వాభీష్టప్రదాయకం |
ప్రజాకరం రాజ్యకరం భాగ్యదం బహుపుణ్యదం || 34 ||
గుహ్యాద్గుహ్యతరం భూయో దేవానామపి దుర్లభం |
ఇదం తు నాతపస్కాయ నాభక్తాయ కదాచన || 35 ||
న చాశుశ్రూషవే దేయం న మదాంధాయ కర్హిచిత్ |
సచ్ఛిష్యాయ కులీనాయ స్కందభక్తిరతాయ చ || 36 ||
సతామభిమతాయేదం దాతవ్యం ధర్మవర్ధనం |
య ఇదం పరమం పుణ్యం నిత్యం జపతి మానవః |
తస్య శ్రీ భగవాన్ స్కందః ప్రసన్నో భవతి ధ్రువం || 37 ||
ఇతి శ్రీస్కాందపురాణే సుబ్రహ్మణ్యహృదయస్తోత్రం ||

శ్రీ స్కంద దండకం

శ్రీ స్కంద దండకం.

Telugu

Read Stotra

శ్రీ స్కంద దండకం

అయి జయ జయాంభోజినీజానిడింభోదయోద్యత్ కుసుంభోల్లసత్ఫుల్ల దంభోపమర్దప్రవీణ ప్రభాధోరణీపూరితాశావకాశ, వరానందసాంద్రప్రకాశ, సహైవోత్తరంగీభవత్సౌహృదావేశమీశాన పంచాననీ పార్వతీవక్త్రసంచుంబ్యమానాననాంభోజషట్క, ద్విషత్కాయరక్తౌఘరజ్యత్పృషత్క, స్వకీయ ప్రభు ద్వాదశాత్మ ద్రఢీయస్తమప్రేమ ధామాయిత ద్వాదశాంభోజ వృందిష్ఠ బంహిష్ఠ సౌందర్య ధుర్యేక్షణ, సాధుసంరక్షణ, నిజచరణ వందనాసక్త సద్వృంద భూయస్తరానంద దాయిస్ఫురన్మందహాసద్యుతిస్యంద దూరీకృతామందకుంద ప్రసూనప్రభా కందళీసుందరత్వాభిమాన, సమస్తామరస్తోమ సంస్తూయమాన, జగత్యాహితాత్యాహితాదిత్యపత్యాహిత ప్రౌఢ వక్షఃస్థలోద్గచ్ఛదాస్రచ్ఛటా ధూమళ చ్ఛాయ శక్తిస్ఫురత్పాణి పాథోరుహ, భక్తమందార పృథ్వీరుహ, విహితపరిరంభ వల్లీవపుర్వల్లరీ మేళనోల్లాసితోరస్తట శ్రీనిరస్తా చిరజ్యోతిరాశ్లిష్ట సంధ్యాంబుదానోపమాడంబర, తప్తజాంబూనద భ్రాజమానాంబర, పింఛభార ప్రభామండలీ పిండితాఖండలేష్వాసనాఖండరోచిః శిఖండిప్రకాండోపరిద్యోతమాన, పదశ్రీహృత శ్రీగృహవ్రాతమాన, ప్రథితహరిగీతాలయాలంకృతే, కార్తికేయార్తబంధో, దయాపూరసింధో, నమస్తే సమస్తేశ మాం పాహి పాహి ప్రసీద ప్రసీద ||
కారుణ్యాంబునిధే సమస్తసుమనః సంతాపదానోద్యత-
-స్ఫాయద్దర్పభరాసురప్రభుసమూలోన్మూలనైకాయన |
బిభ్రాణః క్షితిభృద్విభేదనచణాం శక్తిం త్వమాగ్నేయ మాం
పాహి శ్రీహరిగీతపత్తనపతే దేహి శ్రియం మే జవాత్ ||

స్కందలహరీ

స్కందలహరీ.

Telugu

Read Stotra

స్కందలహరీ

శ్రియై భూయాః శ్రీమచ్ఛరవణభవ త్వం శివసుతః
ప్రియప్రాప్త్యై భూయాః ప్రతనగజవక్త్రస్య సహజ |
త్వయి ప్రేమోద్రేకాత్ప్రకటవచసా స్తోతుమనసా
మయాఽఽరబ్ధం స్తోతుం తదిదమనుమన్యస్వ భగవన్ || 1 ||
నిరాబాధం రాజచ్ఛరదుదితరాకాహిమకర
ప్రరూఢజ్యోత్స్నాభాస్మితవదనషట్కస్త్రిణయనః |
పురః ప్రాదుర్భూయ స్ఫురతు కరుణాపూర్ణహృదయః
కరోతు స్వాస్థ్యం వై కమలదలబిందూపమహృది || 2 ||
న లోకేఽన్యం దేవం నతజనకృతప్రత్యయవిధిం
విలోకే భీతానాం నిఖిలభయభీతైకశరణం |
కలౌ కాలేఽప్యంతర్హరసి తిమిరం భాస్కర ఇవ
ప్రలుబ్ధానాం భోగేష్వపి నిఖిలభోగాన్వితరసి || 3 ||
శివ స్వామిన్ దేవ శ్రితకలుషనిఃశేషణ గురో
భవధ్వాంతధ్వంసే మిహిరశతకోటిప్రతిభట |
శివప్రాప్త్యై సంయక్ఫలిత సదుపాయప్రకటన
ధ్రువం త్వత్కారుణ్యే కలిరపి కృతీ భూతవిభవః || 4 ||
అశక్తానాం కర్మస్వపి నిఖిలనిఃశ్రేయసకృతౌ
పశుత్వగ్రస్తానాం పతిరసి విపాశత్వకలనే |
ప్రశస్తానాం భూంనాం నిధిరసి నిరోద్ధా నిజశుచా-
-మశక్తానాం కర్తా జగతి ధృతశక్తిః కిల భవాన్ || 5 ||
రుషార్తానాం హర్తా విషయివిషయాణాం ఘటయితా
తృషార్తానాం కాలే పరమమృతవర్షీ ఘన ఇవ |
మృషాజ్ఞానార్తానాం నిఖిలవిచికిత్సాపరిహరో
విషగ్రస్తానాం త్వం సకలభయహర్తా విలససి || 6 ||
రసాధిక్యం భక్తైరధికమధికం వర్ధయ విభో
ప్రసీద త్వం భూయః ప్రకటయ చిదానందలహరీం |
అసారే సంసారే సదసతి న లిప్తం మమ మనః
కుసీదం భూయాన్మే కుశలవతి నిఃశ్రేయసపథే || 7 ||
మహామోహారణ్యే విచరతి మనస్తన్నియమయ-
-న్నహంతాం నిఃశేషీకురు కరుణయా త్వం స్నపయ మాం |
మహీయో మాహాత్ంయం తవ మననమార్గే స్ఫురతు మే
మహస్స్తోమాకారే త్వయి మతిజుషి స్యాత్క్వ ను తమః || 8 ||
వలక్షాభం స్నిగ్ధం వదనకమలేభ్యః ప్రసృమరం
మిలత్కారుణ్యార్ద్రం మృదితభువనార్తి స్మితమిదం |
పులిందాపత్యస్య ప్రకటపులకోద్రేకజనకం
దలద్దైన్యం ఖేదం హరతు సతతం నః సురగురో || 9 ||
అతీతో బ్రహ్మాదీన్ కృతిముఖకృతః కారణపతీన్
క్షితిస్తోయం వహ్నిర్మరుదసి వియత్తత్వమఖిలం |
పతిః కృత్యానాం త్వం పరిణతచిదాత్మేక్షణవతాం
ధృతిస్త్వం ధ్యాతః సన్ దిశసి నిజసాయుజ్యపదవీం || 10 ||
త్వదాత్మా త్వచ్చిత్తస్త్వదనుభవబుద్ధిస్మృతిపథః
త్వయా వ్యాప్తం సర్వం జగదిదమశేషం స్థిరచరం | [త్వదాలోకః] సదా యోగీ సాక్షాద్భజతి తవ సారూప్యమమలం
త్వదాయత్తానాం కిం న హి సులభమష్టౌ చ విభవాః || 11 ||
కతి బ్రహ్మాణో వా కతి కమలనేత్రాః కతి హరాః
కతి బ్రహ్మాండానాం కతి చ శతకోటిష్వధికృతాః |
కృతాజ్ఞాః సంతస్తే వివిధకృతిరక్షాభృతికరాః
అతః సర్వైశ్వర్యం తవ యదపరిచ్ఛేద్యవిభవం || 12 ||
నమస్తే స్కందాయ త్రిదశపరిపాలాయ మహతే
నమః క్రౌంచాభిఖ్యాసురదలనదక్షాయ భవతే |
నమః శూరక్రూరత్రిదశరిపుదండాధ్వరకృతే
నమో భూయో భూయో నతికృదవనే జాగరవతే || 13 ||
శివస్త్వం శక్తిస్త్వం తదుభయతమైక్యం పృథగసి
స్తవే ధ్యానే పూజాజపనియమముఖ్యేష్వభిరతాః |
భువి స్థిత్వా భోగాన్ సుచిరముపభుజ్య ప్రముదితాః
భవంతి స్థానే తత్తదను పునరావృత్తివిముఖాః || 14 || [త్వత్] గురోర్విద్యాం లబ్ధ్వా సకలభయహంత్రీం జపపరాః
పురశ్చర్యాముఖ్యక్రమవిధిజుషో ధ్యాననిపుణాః |
వ్రతస్థైః కామౌఘైరభిలషితవాంఛాం ప్రియభుజ-
-శ్చిరం జీవన్ముక్తా జగతి విజయంతే సుకృతినః || 15 ||
శరజ్జ్యోత్స్నాశుభ్రం స్ఫటికనికురుంబాభరుచిరం
స్ఫురన్ముక్తాహారం ధవళవసనం భావయతి యః |
ప్రరోహత్కారుణ్యామృతబహులధారాభిరభిత-
-శ్చిరం సిక్తాత్మా వై స భవతి చ విచ్ఛిన్ననిగడః || 16 ||
వృథా కర్తుం దుష్టాన్వివిధవిషవేగాన్ శమయితుం
సుధారోచిష్కోటిప్రతిభటరుచిం భావయతి యః |
అధః కర్తుం సాక్షాద్భవతి వినతాసూనుమచిరా-
-ద్విధత్తే సర్పాణాం వివిధవిషదర్పాపహరణం || 17 ||
ప్రవాలాభాపూరే ప్రసరతి మహస్తే జగదిదం
దివం భూమిం కాష్ఠాః సకలమపి సంచింతయతి యః |
ద్రవీకుర్యాచ్చేతస్త్రిదశనివహానామపి సుఖా-
-ద్భువి స్త్రీణాం పుంసాం వశయతి తిరశ్చామపి మనః || 18 ||
నవాంభోదశ్యామం మరకతమణిప్రఖ్యమథవా
భవంతం ధ్యాయేద్యో భవతి నిపుణో మోహనవిధౌ |
దివిష్ఠానాం భూమావపి వివిధదేశేషు వసతాం
నృణాం దేవానాం వా వియతి చరతాం పత్రిఫణినాం || 19 ||
కుమార శ్రీమంస్త్వాం కనకసదృశాభం స్మరతి యః
సమారబ్ధస్తంభే సకలజగతాం వా ప్రభవతి |
సమస్తద్యుఃస్థానాం ప్రబలపృతనానాం సవయసాం
ప్రమత్తవ్యాఘ్రాణాం కిటిహయగజానాం చ సపది || 20 ||
ఛటాత్కారైః సాకం సహకృతమహాధూమపటల-
-స్ఫుటాకారం సాక్షాత్స్మరతి యది మంత్రీ సకృదపి |
హఠాదుచ్చాటాయ ప్రభవతి మృగాణాం స పతతాం
పటుర్విద్వేషే స్యాద్విధిరచిత పాశం విఘటయన్ || 21 ||
స్మరన్ఘోరాకారం తిమిరనికురుంబస్య సదృశం
జపన్మంత్రాన్ మర్త్యః సకలరిపుదర్పక్షపయితా |
స రుద్రేణౌపంయం భజతి పరమాత్మన్ గుహ విభో
వరిష్ఠః సాధూనామపి చ నితరాం త్వద్భజనవాన్ || 22 ||
మహాభూతవ్యాప్తం కలయతి చ యో ధ్యాననిపుణః
స భూతైః సంత్యక్తస్త్రిజగతి చ యోగేన సరసః |
గుహ స్వామిన్నంతర్దహరయతి యస్త్వాం తు కలయన్
జహన్మాయో జీవన్భవతి స విముక్తః పటుమతిః || 23 ||
శివస్వామిన్ గౌరీప్రియసుత మయూరాసన గుహే-
-త్యమూన్యుక్త్వా నామాన్యఖిలదురితౌఘాన్ క్షపయతి |
ఇహాసౌ లోకే తు ప్రబలవిభవః సన్ సువిచరన్
విమానారూఢోఽంతే తవ భజతి లోకం నిరుపమం || 24 ||
తవ శ్రీమన్మూర్తిం కలయితుమనీశోఽహమధునా
భవత్పాదాంభోజం భవభయహరం నౌమి శరణం |
అతః సత్యాద్రీశ ప్రమథగణనాథాత్మజ విభో
గుహ స్వామిన్ దీనే వితను మయి కారుణ్యమనిశం || 25 ||
భవాయానందాబ్ధే శ్రుతినికరమూలార్థమఖిలం
నిగృహ్య వ్యాహర్తుం కమలజమసక్తం తు సహసా |
బ్రువాణస్త్వం స్వామిక్షితిధరపతే దేశికగురో
గుహ స్వామిన్ దీనే మయి వితను కారుణ్యమనిశం || 26 ||
అగస్త్యప్రష్ఠానామమలహృదయాబ్జైకనిలయం
సకృద్వా న ధ్యాతం పదకమలయుగ్మం తవ మయా |
తథాపి శ్రీజంతి స్థలనిలయ దేవేశ వరద
గుహ స్వామిన్ దీనే మయి వితను కారుణ్యమనిశం || 27 ||
రణే హత్వా శక్త్యా సకలదనుజాంస్తారకముఖాన్
హరిబ్రహ్మేంద్రాణామపి సురమునీనాం భువి నృణాం |
ముదం కుర్వాణః శ్రీశివశిఖరినాథ త్వమఖిలాం
గుహ స్వామిన్ దీనే మయి వితను కారుణ్యమనిశం || 28 ||
శరద్రాకాజైవాతృక విమలషడ్వక్త్రవిలస-
-ద్ద్విషడ్బాహో శక్త్యా విదలితమహాక్రౌంచశిఖరిన్ |
హృదావాస శ్రీహల్లకగిరిపతే సర్వవిదుషాం
గుహ స్వామిన్ దీనే మయి వితను కారుణ్యమనిశం || 29 ||
మహాంతం కేకీంద్రం వరద సహసాఽఽరుహ్య దివిష-
-ద్గణానాం సర్వేషామభయద మునీనాం చ భజతాం |
వలారాతేః కన్యారమణ బహుపుణ్యాచలపతే
గుహ స్వామిన్ దీనే మయి వితను కారుణ్యమనిశం || 30 ||
మహద్బ్రహ్మానందం పరశివగురుం సంతతలస-
-త్తటిత్కోటిప్రఖ్యం సకలదురితార్తిఘ్నమమలం |
హరిబ్రహ్మేంద్రామరగణనమస్కార్యచరణం
గుహం శ్రీసంగీతప్రియమహమంతర్హృది భజే || 31 ||

స్కంద వేదపాద స్తవః

స్కంద వేదపాద స్తవః.

Telugu

Read Stotra

స్కంద వేదపాద స్తవః

యో దేవానాం పురో దిత్సురర్థిభ్యో వరమీప్సితం |
అగ్రే స్థితః స విఘ్నేశో మమాంతర్హృదయే స్థితః || 1 ||
మహః పురా వై బుధసైంధవశ్రీ-
-శరాటవీమధ్యగతం హృదంతః |
శ్రీకంఠఫాలేక్షణజాతమీడే
తత్పుష్కరస్యాయతనాద్ధి జాతం || 2 ||
మహో గుహాఖ్యం నిగమాంతపంక్తి
మృగ్యాంఘ్రిపంకేరుహయుగ్మమీడే |
సాంబో వృషస్థః సుతదర్శనోత్కో
యత్పర్యపశ్యత్సరిరస్య మధ్యే || 3 ||
త్వామేవ దేవం శివఫాలనేత్ర-
-మహోవివర్తం పరమాత్మరూపం |
తిష్ఠన్ వ్రజన్ జాగ్రదహం శయానః
ప్రాణేన వాచా మనసా బిభర్మి || 4 ||
నమో భవానీతనుజాయ తేఽస్తు
విజ్ఞాతతత్త్వా మునయః పురాణాః |
యమేవ శంభుం హరిమబ్జయోనిం
యమింద్రమాహుర్వరుణం యమాహుః || 5 ||
కోటీరకోటిస్థమహార్ఘకోటి-
-మణిప్రభాజాలవృతం గుహం త్వాం |
అనన్యచేతాః ప్రణవాబ్జహంసం
వేదాహమేతం పురుషం మహాంతం || 6 ||
స నోఽవతు స్వాలికపంక్తిజీవ-
-గ్రహం గృహీతాయత చంద్రఖండః |
గుహాదసీయంతమిదం స్వరూపం
పరాత్పరం యన్మహతో మహాంతం || 7 ||
స్వర్గాపగామధ్యగపుండరీక-
-దలప్రభాజైత్రవిలోచనస్య |
అక్ష్ణాం సహస్రేణ విలోక్యమానం
న సందృశే తిష్ఠతి రూపమస్య || 8 ||
హేమద్విషత్కుండలమండలాఢ్య-
-గండస్థలీమండితతుండశోభః |
బ్రహ్మ త్వమేవేతి గుహో మునీంద్రైః
హృదా మనీషా మనసాఽభిక్లప్తః || 9 ||
సుపక్వబింబాధరకాంతిరక్త-
-సంధ్యామృగాంకాయితదంతపంక్తిః |
గుహస్య నః పాతు విలోలదృష్టిః
యేనావృతం ఖం చ దివం మహీం చ || 10 ||
కరీంద్రశుండాయితదోఃప్రకాండ
ద్విషట్కకేయూరవిరాజమానం |
గుహం మృడానీభవమప్రమేయం
న చక్షుషా పశ్యతి కశ్చనైనం || 11 ||
స్వకీయదోర్దండగృహీతచండ-
-కోదండ నిర్ముక్త పృషత్కషండైః |
త్రివిష్టపాంధంకరణైరశూన్యాన్
యః సప్తలోకానకృణోద్దిశశ్చ || 12 ||
సౌవర్ణహారాదివిభూషణోజ్జ్వల-
-న్మణిప్రభాలీఢ విశాలవక్షాః |
స్కందః స మాం పాతు జితాబ్జయోనిః
అజాయమానో బహుధా విజాయతే || 13 ||
దేవః స వైహారికవేషధారీ
లీలాకృతాశేషజగద్విమర్దః |
శిఖిధ్వజః పాతు భయంకరేభ్యో
యః సప్తసింధూనదధాత్పృథివ్యాం || 14 ||
షడాననో ద్వాదశబాహుదండః
శ్రుత్యంతగామీ ద్విషడీక్షణాఢ్యః |
భీతాయ మహ్యం గిరిజాతనూజో
హిరణ్యవర్ణస్త్వభయం కృణోతు || 15 ||
యో దానవానీకభయంకరాటవీ
సమూలకోత్పాటనచండవాతః |
షాణ్మాతురః సంహృత సర్వశత్రుః
అథైకరాజో హ్యభవజ్జనానాం || 16 ||
అతీవ బాలః ప్రవయాః కుమారో
వర్ణీ యువా షణ్ముఖ ఏకవక్త్రః |
ఇత్థం మహస్తద్బహుధాఽఽవిరాసీ-
-ద్యదేకమవ్యక్తమనంతరూపం || 17 ||
యదీయమాయావరణాఖ్యశక్తి
తిరోహితాంతః కరణా హి మూఢాః |
న జానతే త్వాం గుహ తం ప్రపద్యే
పరేణ నాకం నిహితం గుహాయాం || 18 ||
గురూపదేశాధిగతేన యోగ-
-మార్గేణ సంప్రాప్య చ యోగినస్త్వాం |
గుహం పరం బ్రహ్మ హృదంబుజస్థం
విభ్రాజదేతద్యతయో విశంతి || 19 ||
యో దేవసేనాపతిరాదరాద్వై
బ్రహ్మాదిభిర్దేవగణైరభిష్టుతః |
తం దేవసేనాన్యమహం ప్రపద్యే
విశ్వం పురాణం తమసః పరస్తాత్ || 20 ||
హృదంబుజాంతర్దహరాగ్రవర్తి
కృశానుమధ్యస్థపరాత్మరూపాత్ |
గుహాత్సుసూక్ష్మాన్మునయః ప్రతీయు-
-రతః పరం నాన్యదణీయసం హి || 21 ||
తపః ప్రసన్నేశబహుప్రదత్త-
-వరప్రమత్తాసురభీతిభాజాం |
సుపర్వణాం స్కంద భవాన్ శరణ్యః
ఇంద్రస్య విష్ణోర్వరుణస్య రాజ్ఞః || 22 ||
స ఏవ దేవో గిరిజాకుమారో
రాజా స మిత్రం స హి నో వరేణ్యః |
భ్రాతా స బంధుః స గురుః స్వసా చ
స ఏవ పుత్రః స పితా చ మాతా || 23 ||
స్వరాజ్యదాత్రే స్వసుతాం వితీర్య
తాం దేవసేనాం సుకుమారగాత్రాం |
ఆరాధయత్యన్వహమాంబికేయం
ఇంద్రో హవిష్మాన్సగణో మరుద్భిః || 24 ||
దేవేన యేనాలఘువిక్రమేణ
హతేషు సర్వేష్వపి దానవేషు |
పురేవ దేవాః స్వపదేఽధిచక్రుః
ఇంద్రశ్చ సంరాడ్వరుణశ్చ రాజా || 25 ||
షాణ్మాతురోఽసౌ జగతాం శరణ్య-
-స్తేజోఽన్నమాపః పవనశ్చ భూత్వా |
సంరక్షణాయైవ జగత్సు దేవో
వివేశ భూతాని చరాచరాణి || 26 ||
కరౌ యువామంజలిమేవ నిత్యం
ఉమాంగజాతాయ విధత్తమస్మై |
ఏష ప్రసన్నః సుకుమారమూర్తి-
-రస్మాసు దేవో ద్రవిణం దధాతు || 27 ||
నిధిః కలానాముదధిర్దయానాం
పతిర్జనానాం సరణిర్మునీనాం |
కదా ప్రసీదేన్మయి పార్వతేయః
పితా విరాజామృషభో రయీణాం || 28 ||
సౌందర్యవల్లీతనుసౌకుమార్య-
-సరోజపుష్పంధయమానసో యః |
చచార కాంతారపథేషు దేవః
స నో దదాతు ద్రవిణం సువీర్యం || 29 ||
ఇతోఽపి సౌందర్యవదస్తు దేహ-
-మితీవ హుత్వా శివఫాలనేత్రే |
జాతస్తతః కిం స కుమార ఏవ
కామస్తదగ్రే సమవర్తతాధి || 30 ||
ముముక్షులోకాః శృణుత ప్రియం వో
భజధ్వమేనం గిరిజాకుమారం |
అస్యైవ దేవస్య పరాత్మతేతి
హృది ప్రతీష్యా కవయో మనీషా || 31 ||
ధేనుర్బహ్వీః కామదోగ్ధ్రీః సువత్సాః
కుండోధ్నీర్గా దేహి నస్త్వం సహస్రం |
భక్తార్తిఘ్నం దేవదేవం షడాస్యం
విద్మాహి త్వా గోపతిం శూరగోనాం || 32 ||
వందామహే బర్హిణవాహనస్థితం
వనీపకాశేషమనీషితప్రదం |
తోష్టూయమానం బహుధా పదే పదే
సంక్రందనేనానిమిషేణ జిష్ణునా || 33 ||
దిగ్భ్యో దశభ్యః పరితః పునః పునః
పరః శతాయాతసిషేవిషావతాం |
అనుగ్రహాయైవ షడాననో హ్యసౌ
ప్రత్యఙ్గ్ముఖస్తిష్ఠతి విశ్వతోముఖః || 34 ||
కూర్మః ఫణీంద్రశ్చ తథా ఫణాభృతో
దిగ్దంతినశ్చైవ కులాచలా అపి |
భూత్వాఽంబికేయః ప్రథితః ప్రతాపవాన్
బ్రహ్మాధ్యతిష్ఠద్భువనాని ధారయన్ || 35 ||
యో వై స్కందః పృష్టః శంభోః సత్యం జ్ఞానం బ్రహ్మాద్వైతం |
ఓంకారార్థం ప్రాహ స్మేత్థం సుబ్రహ్మణ్యోం సుబ్రహ్మణ్యోం || 36 ||
యో జాహ్వవీశరారణ్యహ్రదాంభోజే బభౌ పురా |
తస్మై నమః షణ్ముఖాయ మహాసేనాయ ధీమహి || 37 ||
యద్దక్షిణకరాంభోజమిష్టదం స్వానుజీవినాం |
తేభ్య ఇంద్రాదిసేనానాం సేనానిభ్యశ్చ వో నమః || 38 ||
దేవతానామృషీణాం చ భక్తానామపి యోగినాం |
భూతానామపి వీరాణాం పతీనాం పతయే నమః || 39 ||
నమస్తేఽస్తు మహేశాన భీతేభ్యః శూరపద్మనః |
సునాసీరముఖేభ్యస్త్వం స్వస్తిదా అభయంకరః || 40 ||
కటాక్షవీక్షణాపాస్త నిఖిలవ్యాధిబంధన |
దేవసేనాపతే స్వామిన్ అభి త్వా శూర నూనుమః || 41 ||
అంతశ్చరసి భూతేషు త్వమేకః సూక్ష్మరూపతః |
త్వమేవ నిగమాంతేషు పరమాత్మా వ్యవస్థితః || 42 ||
మహీ ద్యౌరంతరిక్షం చ వాయురాపోఽనలోఽంబరం |
సుబ్రహ్మణ్య జగన్నాథ త్వయి సర్వం ప్రతిష్ఠితం || 43 ||
శైశవే త్వం మహాసేన బందీకృత్య ప్రజాపతిం |
అస్రాక్షీస్తాన్యథాపూర్వం మనుష్యాః పశవశ్చ యే || 44 ||
వేదాంతకందరీవర్తి గుహాశయషడాననే |
త్రిలోకీయం త్వయి విభో నావీవాంతః సమాహితా || 45 ||
కలా ముహూర్తాః కాష్ఠాశ్చ మాసా వర్షా యుగాని చ |
త్వయి వల్లీశ నిహితా నిమేషాస్త్రుటిభిః సహ || 46 ||
రోగకాంతారదావాగ్నే మృత్యుకక్షహుతాశన |
శూరఘ్న త్వత్ప్రతాపేన రేజతీ రోదసీ ఉభే || 47 ||
పరం బ్రహ్మ విచిన్వంతో హృదయాంభోజమధ్యగం |
యోగినో నారదాద్యాస్త్వాం సదా పశ్యంతి సూరయః || 48 ||
హతశూరముఖాశేషదైతేయం త్వాం గుహాస్తువన్ |
అగ్నావిష్ణూ చేంద్రవాయూ సోమో ధాతా బృహస్పతిః || 49 ||
వాచాలయస్యవాచం త్వం సచక్షుః కురుషేఽదృశం |
ఆశ్రితేభ్యో జగన్నాథ శివో నః సుమనా భవ || 50 ||
స ఏవ జగతః కర్తా భర్తా హర్తా జగద్గురుః |
కుమారః సచ్చిదానందః సోఽక్షరః పరమః స్వరాట్ || 51 ||
అసురాన్ శూరపద్మాదీన్ హత్వా శరవణోద్భవః |
దేవాన్ స్వస్వపదే కృత్వా సంరాడేకో విరాజసి || 52 ||
తవ దృష్ట్వా విశ్వరూపం సహర్షభయవేపథు |
త్వామస్తువన్నాదితేయాః బృహస్పతిపురోహితాః || 53 ||
కిన్నరా గరుడా నాగా యక్షాః సాధ్యా మరుద్గణాః |
ఐంద్రీశం త్వామహరహః విశ్వే దేవా ఉపాసతే || 54 ||
విశ్వాసాన్మానుషీణాం చ ప్రజానాం పశుపక్షిణాం |
చరాచరాణాం జగతాం ధ్రువో రాజా విశామయం || 55 ||
అంభోజసంవర్తికాసు రాజహంసా ఇవ ప్రభో |
మదీయహృదయాంభోజే ధ్రువస్తిష్ఠావిచాచలిః || 56 ||
లీలామాత్రకృతాశేషభువనాద్గిరిజాసుతాత్ |
అథర్వ చాథ ఋక్సామ యజుస్తస్మాదజాయత || 57 ||
తిలే తైలమివ ప్రోతం దధ్న్యాజ్యమివ షణ్ముఖే |
మణౌ సూత్రమివ స్యూతం బ్రహ్మ విశ్వమిదం జగత్ || 58 ||
యస్తప్తాదీనృషీన్ శాపాదుద్దధార హరాత్మజః |
మాతుః స్తనసుధాపూరే పుత్రః ప్రముదితోధయన్ || 59 ||
ఇజ్యయా పూజయా స్తుత్యా భక్త్యా చ పరిచర్యయా |
ధ్యానేన తపసా చ త్వాం దేవం మనసి ఈడతే || 60 ||
శ్రుతిస్మృత్యాగమాద్యుక్తకర్మణాం ఫలదాయినే |
స్కందాయ తుభ్యం మఖిభిః శ్రద్ధయా హూయతే హవిః || 61 ||
మూర్ధా ద్యౌరంబరం నాభిరూరూ భూరతలం పదే |
షణ్ముఖస్యేత్యేవమాహుః అంతర్విశ్వమిదం జగత్ || 62 ||
భక్తసంతాపశమన ప్రావృషేణ్యఘనాఘనాత్ |
స్కందాదన్యం మనో మాగాః స దృష్టో మృడయాతి నః || 63 ||
జిహ్వే త్వముచ్చైర్నిస్తంద్రా రాత్రిందివమభిష్టుహి |
దేవసేనం మహాసేనం అదుగ్ధా ఇవ ధేనవః || 64 ||
అకలంకశరచ్చంద్రవిలసత్త్వన్ముఖస్రుతాః |
మందస్మితసుధాధారాస్తా మే కృణ్వంతు భేషజం || 65 ||
దేవానీజిమహే పూర్వం తపశ్చకృమహే పురా |
యద్గుహో దేవతాస్మాకం కవిర్గృహపతిర్యువా || 66 ||
మదీయహృదయాంభోజనిర్యూహమణిమంచకే |
షడానన త్వత్పాదః స్యాదియాన్ ప్రాదేశసంమితః || 67 ||
చిరంతనవచః స్తుత్యః ప్రణవాంబుజషట్పదః |
కరోతు దేవసేనేశః శివా నః ప్రదిశో దిశః || 68 ||
దైతేయవధసన్నద్ధో భవాన్ పవనసారథిః |
ద్విలక్షమర్వతో హైమే రథే యుక్త్వాఽధితిష్ఠతి || 69 ||
గగనోచ్ఛ్రితకోదండకిరీటం శూరమాహవే |
బిభేదిథ త్వం నారాచైః సహస్రేణ శతేన చ || 70 ||
ఐశాల్లలాటనయనాత్ జాతం వహ్నిర్యథాఽరణేః |
ముముక్షవో గుహం బ్రహ్మ విచిన్వంతు మనీషయా || 71 ||
హిరణ్యజ్యోతిషం స్కందం యాచధ్వం భో వనీపకాః |
ఏషోఽర్థినః పూరయతి ప్రజయా చ ధనేన చ || 72 ||
సన్నిధాస్యతి కిం స్వామీ భవనాంబురుహేక్షణః |
తావకం మంజులం రూపం స్మర్యతే న చ దృశ్యతే || 73 ||
యతస్త్వం జగతామేషాం ఆశిషే శిఖివాహన |
తతో దేహి బహూన్వ్రీహీనకృష్టా యే చ కృష్టజాః || 74 ||
ధనధాన్యగృహాన్ పుత్రాన్ దేహి దేవ దయానిధే |
త్వమాశ్రితేష్టద ఇతి కర్ణాభ్యాం భూరి విశ్రుతం || 75 ||
భక్తేభ్యో ముచుకుందాఖ్యప్రముఖేభ్యో యథా గుహ |
ప్రాదాస్తథా దేహి మహ్యమచ్యుతాం బహులాం శ్రియం || 76 ||
భక్తాన్ తత్పుత్రసుహృదః తన్మాతృపితృసోదరాన్ |
పాహి స్కంద పునశ్చాస్య ద్విపదో యే చతుష్పదః || 77 ||
చోరవ్యాఘ్రపిశాచాఖుసర్పకీటాదిబాధకాత్ |
భక్తాన్నిశాసు సంరక్షన్ త్రిషు లోకేషు జాగృహి || 78 ||
దానవేష్వపి దైత్యేషు రాక్షసేష్వప్యరాతిషు |
పిశాచేష్వపి గాంగేయ విక్రమస్వ మహానసి || 79 ||
ఆధిభిర్వ్యాధిభిశ్చైవ పీడితానామహర్నిశం |
దూతానాం వపుషి స్వామిన్నాసువోర్జమిషం చ నః || 80 ||
అతితీవ్రేణ తపసా తప్యమానా అహర్నిశం |
ఉపాసత త్వాం తప్తాద్యాః అథ హైనం పురర్షయః || 81 ||
ధ్యానావాహనపూజేజ్యాపరిచర్యాస్తుతిష్వహం |
అజ్ఞో మే సఫలాం పూజాం కృణుహి బ్రహ్మణస్పతే || 82 ||
అసురాన్ రాక్షసాన్ క్రూరాన్ దేవయజ్ఞవిఘాతకాన్ |
జహి దేవేశ యస్మాత్త్వం రక్షోహామీవచాతనః || 83 ||
దుర్వృత్తేభ్యో ధనం ధత్సే నీచేభ్యోఽపి ధనం బహు |
న దదాసి కుతో మహ్యం ఏతత్పృచ్ఛామి సంప్రతి || 84 ||
ముఖైరేతాన్మహారౌద్రాన్ దూరీకురు జగత్పతే |
మమ స్వమభికాంక్షంతే యే స్తేనా యే చ తస్కరాః || 85 ||
గుహ త్వత్పాదభక్తానాం గేహే జాగ్రత్వహర్దివం |
వీరబాహుముఖా వీర తే నిత్యానుచరాస్తవ || 86 ||
త్రిషడ్విలోచనేష్వేకదృక్కటాక్షేణ లక్షయన్ |
ఆఢ్యం కరోతు మాం స్కందః పర్జన్యో వృష్టిమానివ || 87 ||
భయానకాసురానీకకాందిశీకాః పురా ఖలు |
గుహ త్వాం శరణం ప్రాపుః ఇంద్రేణ సహ దేవతాః || 88 ||
త్వామేవ కీర్తయన్ దేవ ధ్యాయన్ శృణ్వన్ ప్రపూజయన్ |
గుహ త్వత్పాదభక్తోఽహం జీవాని శరదః శతం || 89 ||
కృపాదుగ్ధాబ్ధికల్లోలాయమానాపాంగవీక్షణ |
దేహి మే గుహ బహ్వాయుర్దీర్ఘాయుస్త్వమిహేశిషే || 90 ||
పురారాతీక్షణపయః పారావారసుధాకర |
షడ్వక్త్ర ధేహి కృపయా మయి మేధాం మయి ప్రజాం || 91 ||
భక్తచాతకబృందేష్టవర్షిధారాధర ప్రభో |
అస్మాన్ సంజీవయ స్వామినస్మిన్ లోకే శతం సమాః || 92 ||
భీతా వయం మహాసేన పథి దుర్గే వనే యతః |
చోరవ్యాఘ్రపిశాచేభ్యః తతో నో అభయం కృధి || 93 ||
వ్యాధయః శూలకుష్ఠార్శః ప్రమేహాద్యా యతః సదా |
పీడయంతి పిశాచాద్యాః తతో నో ధేహి భేషజం || 94 ||
త్వదీయపాదకమలధ్యానవర్మితవిగ్రహాన్ |
కుహకా మోహకాః క్షుద్రాః మాఽస్మాన్ప్రాపన్నరాతయః || 95 ||
ధనధాన్యపశుక్షేత్రబలేష్వస్మదపేక్షయా |
దేవసేనాపతేఽస్మాకం అధరే సంతు శత్రవః || 96 ||
అరాతికులనిర్మూలనాలంకర్మీణవిక్రమ |
అకారణేన బహుధా యో నో ద్వేష్టి స రిష్యతు || 97 ||
మంత్రైర్యంత్రైస్తథా తంత్రైరౌషధైరాయుధైరపి |
జిఘాంసతి చ యోఽస్మాన్ స ద్విషన్మే బహు శోచతు || 98 ||
ఆఖండలారీనసురాన్ త్వం తు స్పర్ధావతో యథా |
జహి గాంగేయ తౌ మర్త్యౌ యం చాహం ద్వేష్టి యశ్చ మాం || 99 ||
త్వన్నామకీర్తనపరక్షేమంకరకరాంబుజ |
తమిమం సంహర స్వామిన్ యశ్చ నో ద్వేషతే జనః || 100 ||
దూరేఽంతికే వా యః శత్రుః అస్మాననపరాధినః |
శపత్యేనం జహి స్కంద యశ్చ నః శపతః శపాత్ || 101 ||
చక్షుషా మనసా వాచా మంత్రేణ హవనేన చ |
తత్కృత్యాం నాశయ స్వామిన్ భ్రాతృవ్యస్యాభిదాసతః || 102 ||
మచ్ఛిద్రాన్వేషిణః శత్రోః ధనమాయుః ప్రజాః పశూన్ |
సర్వాన్నాశయ శూరఘ్న మా తస్యోచ్ఛేషి కించన || 103 ||
అవిద్వాంసశ్చ విద్వాంసః స్వప్నే జాగ్రతి వా గుహ |
తేభ్యో మోచయ మాం యద్యదేనాంసి చకృమా వయం || 104 ||
వయమూచిమ యద్దేవ జిహ్వయా దేవహేలనం |
ఏనసో మోచయాగ్నేయ త్వం హి వేత్థ యథాతథం || 105 ||
విత్తార్థం వా తథాఽన్యార్థం విప్రార్థం గోఽర్థమేవ వా |
పునీహ్యస్మాంస్తతః స్కంద యత్కించానృతమూదిమ || 106 ||
తమాగసం క్షమస్వ త్వం స్వకీయాభీష్టలిప్సయా |
సంప్రార్థ్య తుభ్యం వాఽన్యస్మై యద్వాచాఽనృతమూదిమ || 107 ||
సౌందర్యవల్ల్యా సహితం అంబయా దేవసేనయా |
మహాసేనం భజే దేవం సత్యేన తపసా సహ || 108 ||
యో వై పఠేద్గుహస్యైనం వేదాంతస్తవమాదరాత్ |
స్కాందాః కటాక్షాస్తస్యోచ్చైరాయుః కీర్తిం ప్రజాం దదుః || 109 ||
స్కందస్యైనం వేదపాదస్తవం యో
భక్త్యా నిత్యం శ్రావయేద్వా పఠేద్వా |
భూయాసుస్తే తస్య మర్త్యస్య శీఘ్రం
యే యే కామా దుర్లభా మర్త్యలోకే || 110 ||

శ్రీ స్కంద షట్కం

శ్రీ స్కంద షట్కం.

Telugu

Read Stotra

శ్రీ స్కంద షట్కం

షణ్ముఖం పార్వతీపుత్రం క్రౌంచశైలవిమర్దనం |
దేవసేనాపతిం దేవం స్కందం వందే శివాత్మజం || 1 ||
తారకాసురహంతారం మయూరాసనసంస్థితం |
శక్తిపాణిం చ దేవేశం స్కందం వందే శివాత్మజం || 2 ||
విశ్వేశ్వరప్రియం దేవం విశ్వేశ్వరతనూద్భవం |
కాముకం కామదం కాంతం స్కందం వందే శివాత్మజం || 3 ||
కుమారం మునిశార్దూలమానసానందగోచరం |
వల్లీకాంతం జగద్యోనిం స్కందం వందే శివాత్మజం || 4 ||
ప్రళయస్థితికర్తారం ఆదికర్తారమీశ్వరం |
భక్తప్రియం మదోన్మత్తం స్కందం వందే శివాత్మజం || 5 ||
విశాఖం సర్వభూతానాం స్వామినం కృత్తికాసుతం |
సదాబలం జటాధారం స్కందం వందే శివాత్మజం || 6 ||
స్కందషట్కం స్తోత్రమిదం యః పఠేచ్ఛృణుయాన్నరః |
వాంఛితాన్ లభతే సద్యశ్చాంతే స్కందపురం వ్రజేత్ || 7 |