Sacred Stotras & Deities

శ్రీ జ్వాలాముఖీ స్తోత్రం –2

శ్రీ జ్వాలాముఖీ స్తోత్రం –2.

Telugu

శ్రీ జ్వాలాముఖీ స్తోత్రం –2

జాజ్వల్యమానవపుషా దశదిగ్విభాగాన్
సందీపయంత్యభయపద్మగదావరాఢ్యా |
సింహస్థితా శశికళాభరణా త్రినేత్రా
జ్వాలాముఖీ హరతు మోహతమః సదా నః || 1 ||
ఆబ్రహ్మకీటజననీం మహిషీం శివస్య
ముగ్ధస్మితాం ప్రళయకోటిరవిప్రకాశం |
జ్వాలాముఖీం కనకకుండలశోభితాంసాం
వందే పునః పునరపీహ సహస్రకృత్వః || 2 ||
దేదీప్యమానముకుటద్యుతిభిశ్చ దేవై-
-ర్దాసైరివ ద్విగుణితాంఘ్రినఖప్రదీప్తిం |
జ్వాలాముఖీం సకలమంగళమంగళాం తా-
-మంబాం నతోఽస్ంయఖిలదుఃఖవిపత్తిదగ్ధ్రీం || 3 ||
క్షిత్యబ్‍హుతాశపవనాంబరసూర్యచంద్ర-
-యష్ట్రాఖ్యమూర్తిమమలానపి పావయంతీం |
జ్వాలాముఖీం ప్రణతకల్పలతాం శివస్య
సాంరాజ్యశక్తిమతులాం మహతీం నమామి || 4 ||
నౌమీశ్వరీం త్రిజగతోఽభయదానశౌండాం
జ్వాలామహార్యభవజాలహరాం నమామి |
మోహాంధకారహరణే విమలేందుకాంతిం
దేవీం సదా భగవతీం మనసా స్మరామి || 5 ||
దుష్కర్మవాయుభిరితస్తత ఏవ దీప్తైః
పాపజ్వలజ్జ్వలనజాతశిఖాకలాపైః |
దగ్ధం చ జీవయతు మాం పరితో లుఠంతం
దేవీ దయార్ద్రహృదయామృతపూర్ణదృష్ట్యా || 6 ||
జ్వాలాముఖీ జ్వలదనల్పలయాగ్రికోటి-
-రోచిష్మతీ రవిశశిప్రతిభానకర్త్రీ |
భక్తస్య భర్గవపుషా భవభర్జనాయ
భూయాత్ సదాభ్యుదయదానవదాన్యముఖ్యా || 7 ||
త్వం చౌషధీశముకుటాఽహమసాధ్యరోగ-
-స్త్వం చిత్ప్రదీప్తిరహమత్ర భవాంధ్యమగ్నః |
త్వం చాంబ కల్పతరురేవమహం చ భిక్షు-
-ర్జ్వలాముఖి ప్రకురు దేవి యథోచితం మే || 8 ||
యద్ధ్యానకేసరిసమాక్రమణోత్థభీతే-
-ర్మర్మవ్యథాజనకదుఃఖశతాని సద్యః |
గోమాయవంతి పరితో భృశకాందిశీకా-
-నస్మాంశ్చ పాలయతు సైవ భవాబ్ధిదుఃఖాత్ || 9 ||
జ్వాలాముఖి క్షణమపీహ విలంబమంబ
నార్తో హ్యనర్థపతితః సహతే విపన్నః |
హస్తస్థితామృతకమండలువారిణైవ
మాం మూర్ఛితం ఝటితి జీవయ తాపతప్తం || 10 ||
బాహ్యాంధ్యనాశనవిధౌ రవిచంద్రవాహ్ని-
-జ్యోతీంషి దేవి దయాయాఽజనయః పురా త్వం |
ఏతత్తు రూపమఖిలాంతరమోహరాత్రి-
-ధ్వాంతాంతకారి తవ యత్ స్ఫురతాదతోఽంతః || 11 ||
మన్యే త్రిధామనయనే నయనత్రయం తే
భక్తార్తినాశననిమిత్తవిలోకనాయ |
మాతః పరం యదపి దేవి తథాప్యధన్య-
-స్త్వద్దృష్టిపాతరహితోస్ంయహహాహతోఽస్మి || 12 ||
సత్యం బ్రవీమి శృణు చిత్త మదాంధ మూర్ఖ
మా గాః కదాపి విషయాన్విషమాన్విషాక్తాన్ |
ఈశీమపారకరుణాం భవభీతిభేత్రి-
-మంబాం భజస్వ సతతం పరసౌఖ్యదాత్రీం || 13 ||
త్వం మే మహేశి జననీ పరమార్తిహర్త్రీ
త్వం మే పితా హితతమస్త్వమహేతుబంధుః |
త్వం మే భవాబ్ధితరణే దృఢనౌస్త్వమేవ
దుఃఖామయాధిహరణే చతురశ్చ వైద్యః || 14 ||
జ్వాలాం జగజ్జననసంహరణస్థితీనాం
హేతుం గతిం ముషితలజ్జితదుఃఖితానాం |
ఉన్మోచనాం చ భవబంధనదుర్గతీనాం
త్వాం నౌమి నౌమి శరణం శరణాగతానాం || 15 ||
జ్వాలాముఖీస్తవమిమం శృణుయాత్పఠేద్వా
యః శ్రద్ధయా పరమయా బహుభక్తియుక్తః |
భూయాత్స దగ్ధబహుజన్మశతార్జితాఽఘో
-ఽవిజ్ఞోప్యనేకజననాథితరాజ్యభూమిః || 16 ||

శ్రీ దక్షిణకాళికా త్రిశతీ నామావళిః

శ్రీ దక్షిణకాళికా త్రిశతీ నామావళిః.

Telugu

Read Stotra

సౌందర్యవిభ్రమభువో భువనాధిపత్య-
-సంకల్పకల్పతరవస్త్రిపురే జయంతి |
ఏతే కవిత్వకుమదప్రకరావబోధ-
-పూర్ణేందవస్త్వయి జగజ్జనని ప్రణామాః || 1 ||
దేవి స్తుతివ్యతికరే కృతబుద్ధయస్తే
వాచస్పతి ప్రభృతయోఽపి జడీ భవంతి |
తస్మాన్నిసర్గజడిమా కతమోఽహమత్ర
స్తోత్రం తవ త్రిపురతాపనపత్ని కర్తుం || 2 ||
మాతస్తథాపి భవతీం భవతీవ్రతాప-
-విచ్ఛిత్తయే స్తుతిమహార్ణవ కర్ణధారః |
స్తోతుం భవాని స భవచ్చరణారవింద-
-భక్తిగ్రహః కిమపి మాం ముఖరీ కరోతి || 3 ||
సూతే జగంతి భవతీ భవతీ బిభర్తి
జాగర్తి తత్క్షయకృతే భవతీ భవాని |
మోహం భినత్తి భవతీ భవతీ రుణద్ధి
లీలాయితం జయతి చిత్రమిదం భవత్యాః || 4 ||
యస్మిన్మనాగపి నవాంబుజపత్రగౌరీం
గౌరీం ప్రసాదమధురాం దృశమాదధాసి |
తస్మిన్నిరంతరమనంగశరావకీర్ణ-
-సీమంతినీనయనసంతతయః పతంతి || 5 ||
పృథ్వీభుజోఽప్యుదయనప్రభవస్య తస్య
విద్యాధర ప్రణతి చుంబిత పాదపీఠః |
తచ్చక్రవర్తిపదవీప్రణయః స ఏషః
త్వత్పాదపంకజరజః కణజః ప్రసాదః || 6 ||
త్వత్పాదపంకజరజ ప్రణిపాతపూర్వైః
పుణ్యైరనల్పమతిభిః కృతిభిః కవీంద్రైః |
క్షీరక్షపాకరదుకూలహిమావదాతా
కైరప్యవాపి భువనత్రితయేఽపి కీర్తిః || 7 ||
కల్పద్రుమప్రసవకల్పితచిత్రపూజాం
ఉద్దీపిత ప్రియతమామదరక్తగీతిం |
నిత్యం భవాని భవతీముపవీణయంతి
విద్యాధరాః కనకశైలగుహాగృహేషు || 8 ||
లక్ష్మీవశీకరణకర్మణి కామినీనాం
ఆకర్షణవ్యతికరేషు చ సిద్ధమంత్రః |
నీరంధ్రమోహతిమిరచ్ఛిదురప్రదీపో
దేవి త్వదంఘ్రిజనితో జయతి ప్రసాదః || 9 ||
దేవి త్వదంఘ్రినఖరత్నభువో మయూఖాః
ప్రత్యగ్రమౌక్తికరుచో ముదముద్వహంతి |
సేవానతివ్యతికరే సురసుందరీణాం
సీమంతసీంని కుసుమస్తబకాయితం యైః || 10 ||
మూర్ధ్ని స్ఫురత్తుహినదీధితిదీప్తిదీప్తం
మధ్యే లలాటమమరాయుధరశ్మిచిత్రం |
హృచ్చక్రచుంబి హుతభుక్కణికానుకారి
జ్యోతిర్యదేతదిదమంబ తవ స్వరూపం || 11 ||
రూపం తవ స్ఫురితచంద్రమరీచిగౌరం
ఆలోకతే శిరసి వాగధిదైవతం యః |
నిఃసీమసూక్తిరచనామృతనిర్ఝరస్య
తస్య ప్రసాదమధురాః ప్రసరంతి వాచః || 12 ||
సిందూరపాంసుపటలచ్ఛురితామివ ద్యాం
త్వత్తేజసా జతురసస్నపితామివోర్వీం |
యః పశ్యతి క్షణమపి త్రిపురే విహాయ
వ్రీడాం మృడాని సుదృశస్తమనుద్రవంతి || 13 ||
మాతర్ముహూర్తమపి యః స్మరతి స్వరూపం
లాక్షారసప్రసరతంతునిభం భవత్యాః |
ధ్యాయంత్యనన్యమనసస్తమనంగతప్తాః
ప్రద్యుంనసీంని సుభగత్వగుణం తరుణ్యః || 14 ||
యోఽయం చకాస్తి గగనార్ణవరత్నమిందుః
యోఽయం సురాసురగురుః పురుషః పురాణః |
యద్వామమర్ధమిదమంధకసూదనస్య
దేవి త్వమేవ తదితి ప్రతిపాదయంతి || 15 ||
ఇచ్ఛానురూపమనురూపగుణప్రకర్ష
సంకర్షిణి త్వమభిమృశ్య యదా బిభర్షి |
జాయేత స త్రిభువనైక గురుస్తదానీం
దేవః శివోఽపి భువనత్రయసూత్రధారః || 16 ||
ధ్యాతాసి హైమవతి యేన హిమాంశురశ్మి-
-మాలామలద్యుతిరకల్మషమానసేన |
తస్యావిలంబమనవద్యమనంతకల్పం
అల్పైర్దినైః సృజసి సుందరి వాగ్విలాసం || 17 ||
ఆధారమారుతనిరోధవశేన యేషాం
సిందూరరంజితసరోజగుణానుకారి |
దీప్తం హృది స్ఫురతి దేవి వపుస్త్వదీయం
ధ్యాయంతి తానిహ సమీహితసిద్ధిసార్థాః || 18 ||
యే చింతయంత్యరుణమండలమధ్యవర్తి
రూపం తవాంబ నవయావకపంకపింగం |
తేషాం సదైవ కుసుమాయుధబాణభిన్న-
-వక్షఃస్థలా మృగదృశో వశగా భవంతి || 19 ||
త్వామైందవీమివ కలామనుఫాలదేశం
ఉద్భాసితాంబరతలామవలోకయంతః |
సద్యో భవాని సుధియః కవయో భవంతి
త్వం భావనాహితధియాం కులకామధేనుః || 20 ||
శర్వాణి సర్వజనవందితపాదపద్మే
పద్మచ్ఛదద్యుతివిడంబితనేత్రలక్ష్మి |
నిష్పాపమూర్తిజనమానసరాజహంసి
హంసి త్వమాపదమనేకవిధాం జనస్య || 21 ||
ఉత్తప్తహేమరుచిరే త్రిపురే పునీహి
చేతశ్చిరంతనమఘౌఘవనం లునీహి |
కారాగృహే నిగలబంధనయంత్రితస్య
త్వత్సంస్మృతౌ ఝటితి మే నిగలాస్త్రుటంతి || 22 ||
త్వాం వ్యాపినీతి సుమనా ఇతి కుండలీతి
త్వాం కామినీతి కమలేతి కలావతీతి |
త్వాం మాలినీతి లలితేత్యపరాజితేతి
దేవి స్తువంతి విజయేతి జయేత్యుమేతి || 23 ||
ఉద్దామకామపరమార్థసరోజఖండ-
చండద్యుతిద్యుతిమపాసితషడ్వికారాం |
మోహద్విపేంద్రకదనోద్యతబోధసింహ-
-లీలాగుహాం భగవతీం త్రిపురాం నమామి || 24 ||
గణేశవటుకస్తుతా రతిసహాయకామాన్వితా
స్మరారివరవిష్టరా కుసుమబాణబాణైర్యుతా |
అనంగకుసుమాదిభిః పరివృతా చ సిద్ధైస్త్రిభిః
కదంబవనమధ్యగా త్రిపురసుందరీ పాతు నః || 25 ||
రుద్రాణి విద్రుమమయీం ప్రతిమామివ త్వాం
యే చింతయంత్యరుణకాంతిమనన్యరూపాం |
తానేత్య పక్ష్మలదృశః ప్రసభం భజంతే
కంఠావసక్తమృదుబాహులతాస్తరుణ్యః || 26 ||
త్వద్రూపైకనిరూపణప్రణయితాబంధో దృశోస్త్వద్గుణ-
-గ్రామాకర్ణనరాగితా శ్రవణయోస్త్వత్సంస్మృతిశ్చేతసి |
త్వత్పాదార్చనచాతురీ కరయుగే త్వత్కీర్తితం వాచి మే
కుత్రాపి త్వదుపాసనవ్యసనితా మే దేవి మా శాంయతు || 27 ||
త్వద్రూపముల్లసితదాడిమపుష్పరక్తం
ఉద్భావయేన్మదనదైవతమక్షరం యః |
తం రూపహీనమపి మన్మథనిర్విశేషం
ఆలోకయంత్యురునితంబతటాస్తరుణ్యః || 28 ||
బ్రహ్మేంద్రరుద్రహరిచంద్రసహస్రరశ్మి-
-స్కందద్విపాననహుతాశనవందితాయై |
వాగీశ్వరి త్రిభువనేశ్వరి విశ్వమాతః
అంతర్బహిశ్చ కృతసంస్థితయే నమస్తే || 29 ||
కస్తోత్రమేతదనువాసరమీశ్వరాయాః
శ్రేయస్కరం పఠతి వా యది వా శృణోతి |
తస్యేప్సితం ఫలతి రాజభిరీడ్యతేఽసౌ
జాయేత స ప్రియతమో మదిరేక్షణానాం || 30 ||
ఇతి శ్రీకాళిదాస విరచిత పంచస్తవ్యాం ద్వితీయః చర్చాస్తవః |

Sign In

OTP Verification

శ్రీ జ్వాలాముఖీ స్తోత్రం –2

శ్రీ దక్షిణకాళికా త్రిశతీ నామావళిః

శ్రీ తులజా భవానీ స్తోత్రం

త్రైలోక్యవిజయవిద్యా

శ్రీ దాక్షాయణీ స్తోత్రం

దేవ్యపరాధ క్షమాపణ స్తోత్రం

దేవీ చతుఃషష్ట్యుపచారపూజా స్తోత్రం

దేవి భుజంగ స్తోత్రం

దేవీ షట్కం

నవరత్నమాలికా

పంచస్తవి –1. లఘుస్తవః

పంచస్తవి –2. చర్చాస్తవః

MENU

LINKS

Astrologer Section

Vendor Section

GET ADVICE ON

Download Our Apps