Sacred Stotras & Deities

శ్రీ భద్రకాళీ అష్టోత్తర శత నామా స్తోత్రం

శ్రీనందికేశ్వర ఉవాచ
భద్రకాళీమహం వందే వీరభద్రసతీం శివామ్ ।
సుతామ్రార్చితపాదాబ్జం సుఖసౌభాగ్యదాయినీమ్ ॥ 1 ॥

అథ స్తోత్రం
భద్రకాళీ కామరూపా మహావిద్యా యశస్వినీ ।
మహాశ్రయా మహాభాగా దక్షయాగవిభేదినీ ॥ 2 ॥

రుద్రకోపసముద్భూతా భద్రా ముద్రా శివంకరీ ।
చంద్రికా చంద్రవదనా రోషతామ్రాక్షశోభినీ ॥ 3 ॥

ఇంద్రాదిదమనీ శాంతా చంద్రలేఖావిభూషితా ।
భక్తార్తిహారిణీ ముక్తా చండికానందదాయినీ ॥ 4 ॥

సౌదామినీ సుధామూర్తిః దివ్యాలంకారభూషితా ।
సువాసినీ సునాసా చ త్రికాలజ్ఞా ధురంధరా ॥ 5 ॥

సర్వజ్ఞా సర్వలోకేశీ దేవయోనిరయోనిజా ।
నిర్గుణా నిరహంకారా లోకకళ్యాణకారిణీ ॥ 6 ॥

సర్వలోకప్రియా గౌరీ సర్వగర్వవిమర్దినీ ।
తేజోవతీ మహామాతా కోటిసూర్యసమప్రభా ॥ 7 ॥

వీరభద్రకృతానందభోగినీ వీరసేవితా ।
నారదాదిమునిస్తుత్యా నిత్యా సత్యా తపస్వినీ ॥ 8 ॥

జ్ఞానరూపా కళాతీతా భక్తాభీష్టఫలప్రదా ।
కైలాసనిలయా శుభ్రా క్షమా శ్రీః సర్వమంగళా ॥ 9 ॥

సిద్ధవిద్యా మహాశక్తిః కామినీ పద్మలోచనా ।
దేవప్రియా దైత్యహంత్రీ దక్షగర్వాపహారిణీ ॥ 10 ॥

శివశాసనకర్త్రీ చ శైవానందవిధాయినీ ।
భవపాశనిహంత్రీ చ సవనాంగసుకారిణీ ॥ 11 ॥

లంబోదరీ మహాకాళీ భీషణాస్యా సురేశ్వరీ ।
మహానిద్రా యోగనిద్రా ప్రజ్ఞా వార్తా క్రియావతీ ॥ 12 ॥

పుత్రపౌత్రప్రదా సాధ్వీ సేనాయుద్ధసుకాంక్షిణీ ।
ఇచ్ఛా శంభోః కృపాసింధుః చండీ చండపరాక్రమా ॥ 13 ॥

శోభా భగవతీ మాయా దుర్గా నీలా మనోగతిః ।
ఖేచరీ ఖడ్గినీ చక్రహస్తా శూలవిధారిణీ ॥ 14 ॥

సుబాణా శక్తిహస్తా చ పాదసంచారిణీ పరా ।
తపఃసిద్ధిప్రదా దేవీ వీరభద్రసహాయినీ ॥ 15 ॥

ధనధాన్యకరీ విశ్వా మనోమాలిన్యహారిణీ ।
సునక్షత్రోద్భవకరీ వంశవృద్ధిప్రదాయినీ ॥ 16 ॥

బ్రహ్మాదిసురసంసేవ్యా శాంకరీ ప్రియభాషిణీ ।
భూతప్రేతపిశాచాదిహారిణీ సుమనస్వినీ ॥ 17 ॥

పుణ్యక్షేత్రకృతావాసా ప్రత్యక్షపరమేశ్వరీ ।
ఏవం నామ్నాం భద్రకాళ్యాః శతమష్టోత్తరం విదుః ॥ 18 ॥

పుణ్యం యశో దీర్ఘమాయుః పుత్రపౌత్రం ధనం బహు ।
దదాతి దేవీ తస్యాశు యః పఠేత్ స్తోత్రముత్తమమ్ ॥ 19 ॥

భౌమవారే భృగౌ చైవ పౌర్ణమాస్యాం విశేషతః ।
ప్రాతః స్నాత్వా నిత్యకర్మ విధాయ చ సుభక్తిమాన్ ॥ 20 ॥

వీరభద్రాలయే భద్రాం సంపూజ్య సురసేవితామ్ ।
పఠేత్ స్తోత్రమిదం దివ్యం నానా భోగప్రదం శుభమ్ ॥ 21 ॥

అభీష్టసిద్ధిం ప్రాప్నోతి శీఘ్రం విద్వాన్ పరంతప ।
అథవా స్వగృహే వీరభద్రపత్నీం సమర్చయేత్ ॥ 22 ॥

స్తోత్రేణానేన విధివత్ సర్వాన్ కామానవాప్నుయాత్ ।
రోగా నశ్యంతి తస్యాశు యోగసిద్ధిం చ విందతి ॥ 23 ॥

సనత్కుమారభక్తానామిదం స్తోత్రం ప్రబోధయ ।
రహస్యం సారభూతం చ సర్వజ్ఞః సంభవిష్యసి ॥ 24 ॥

ఇతి శ్రీభద్రకాళ్యష్టోత్తరశతనామ స్తోత్రమ్ ।

శ్రీ కాళీ అష్టోత్తర శత నామా స్తోత్రం

భైరవ ఉవాచ
శతనామ ప్రవక్ష్యామి కాళికాయా వరాననే ।
యస్య ప్రపఠనాద్వాగ్మీ సర్వత్ర విజయీ భవేత్ ॥ 1 ॥

కాళీ కపాలినీ కాంతా కామదా కామసుందరీ ।
కాళరాత్రిః కాళికా చ కాలభైరవపూజితా ॥ 2 ॥

కురుకుల్లా కామినీ చ కమనీయస్వభావినీ ।
కులీనా కులకర్త్రీ చ కులవర్త్మప్రకాశినీ ॥ 3 ॥

కస్తూరీరసనీలా చ కామ్యా కామస్వరూపిణీ ।
కకారవర్ణనిలయా కామధేనుః కరాళికా ॥ 4 ॥

కులకాంతా కరాళాస్యా కామార్తా చ కళావతీ ।
కృశోదరీ చ కామాఖ్యా కౌమారీ కులపాలినీ ॥ 5 ॥

కులజా కులకన్యా చ కులహా కులపూజితా ।
కామేశ్వరీ కామకాంతా కుంజరేశ్వరగామినీ ॥ 6 ॥

కామదాత్రీ కామహర్త్రీ కృష్ణా చైవ కపర్దినీ ।
కుముదా కృష్ణదేహా చ కాళిందీ కులపూజితా ॥ 7 ॥

కాశ్యపీ కృష్ణమాతా చ కులిశాంగీ కళా తథా ।
క్రీం రూపా కులగమ్యా చ కమలా కృష్ణపూజితా ॥ 8 ॥

కృశాంగీ కిన్నరీ కర్త్రీ కలకంఠీ చ కార్తికీ ।
కంబుకంఠీ కౌళినీ చ కుముదా కామజీవినీ ॥ 9 ॥

కులస్త్రీ కీర్తికా కృత్యా కీర్తిశ్చ కులపాలికా ।
కామదేవకళా కల్పలతా కామాంగవర్ధినీ ॥ 10 ॥

కుంతా చ కుముదప్రీతా కదంబకుసుమోత్సుకా ।
కాదంబినీ కమలినీ కృష్ణానందప్రదాయినీ ॥ 11 ॥

కుమారీపూజనరతా కుమారీగణశోభితా ।
కుమారీరంజనరతా కుమారీవ్రతధారిణీ ॥ 12 ॥

కంకాళీ కమనీయా చ కామశాస్త్రవిశారదా ।
కపాలఖట్వాంగధరా కాలభైరవరూపిణీ ॥ 13 ॥

కోటరీ కోటరాక్షీ చ కాశీకైలాసవాసినీ ।
కాత్యాయనీ కార్యకరీ కావ్యశాస్త్రప్రమోదినీ ॥ 14 ॥

కామాకర్షణరూపా చ కామపీఠనివాసినీ ।
కంకినీ కాకినీ క్రీడా కుత్సితా కలహప్రియా ॥ 15 ॥

కుండగోలోద్భవప్రాణా కౌశికీ కీర్తివర్ధినీ ।
కుంభస్తనీ కటాక్షా చ కావ్యా కోకనదప్రియా ॥ 16 ॥

కాంతారవాసినీ కాంతిః కఠినా కృష్ణవల్లభా ।
ఇతి తే కథితం దేవి గుహ్యాద్గుహ్యతరం పరమ్ ॥ 17 ॥

ప్రపఠేద్య ఇదం నిత్యం కాళీనామశతాష్టకమ్ ।
త్రిషు లోకేషు దేవేశి తస్యాఽసాధ్యం న విద్యతే ॥ 18 ॥

ప్రాతఃకాలే చ మధ్యాహ్నే సాయాహ్నే చ సదా నిశి ।
యః పఠేత్పరయా భక్త్యా కాళీనామశతాష్టకమ్ ॥ 19 ॥

కాళికా తస్య గేహే చ సంస్థానం కురుతే సదా ।
శూన్యాగారే శ్మశానే వా ప్రాంతరే జలమధ్యతః ॥ 20 ॥

వహ్నిమధ్యే చ సంగ్రామే తథా ప్రాణస్య సంశయే ।
శతాష్టకం జపన్మంత్రీ లభతే క్షేమముత్తమమ్ ॥ 21 ॥

కాళీం సంస్థాప్య విధివత్ స్తుత్వా నామశతాష్టకైః ।
సాధకః సిద్ధిమాప్నోతి కాళికాయాః ప్రసాదతః ॥ 22 ॥

ఇతి శ్రీ కాళీ కకారాష్టోత్తరశతనామ స్తోత్రమ్ ।

శ్రీ తారాంబా అష్టోత్తర శత నామా స్తోత్రం

శ్రీ శివ ఉవాచ
తారిణీ తరళా తన్వీ తారా తరుణవల్లరీ ।
తారరూపా తరీ శ్యామా తనుక్షీణపయోధరా ॥ 1 ॥

తురీయా తరుణా తీవ్రగమనా నీలవాహినీ ।
ఉగ్రతారా జయా చండీ శ్రీమదేకజటాశిరా ॥ 2 ॥

తరుణీ శాంభవీ ఛిన్నఫాలా స్యాద్భద్రదాయినీ ।
ఉగ్రా ఉగ్రప్రభా నీలా కృష్ణా నీలసరస్వతీ ॥ 3 ॥

ద్వితీయా శోభనా నిత్యా నవీనా నిత్యభీషణా ।
చండికా విజయారాధ్యా దేవీ గగనవాహినీ ॥ 4 ॥

అట్టహాసా కరాళాస్యా చరాస్యాదీశపూజితా ।
సగుణాఽసగుణాఽరాధ్యా హరీంద్రాదిప్రపూజితా ॥ 5 ॥

రక్తప్రియా చ రక్తాక్షీ రుధిరాస్యవిభూషితా ।
బలిప్రియా బలిరతా దుర్గా బలవతీ బలా ॥ 6 ॥

బలప్రియా బలరతా బలరామప్రపూజితా ।
అర్ధకేశేశ్వరీ కేశా కేశవా స్రగ్విభూషితా ॥ 7 ॥

పద్మమాలా చ పద్మాక్షీ కామాఖ్యా గిరినందినీ ।
దక్షిణా చైవ దక్షా చ దక్షజా దక్షిణేరతా ॥ 8 ॥

వజ్రపుష్పప్రియా రక్తప్రియా కుసుమభూషితా ।
మాహేశ్వరీ మహాదేవప్రియా పన్నగభూషితా ॥ 9 ॥

ఇడా చ పింగళా చైవ సుషుమ్నాప్రాణరూపిణీ ।
గాంధారీ పంచమీ పంచాననాదిపరిపూజితా ॥ 10 ॥

తథ్యవిద్యా తథ్యరూపా తథ్యమార్గానుసారిణీ ।
తత్త్వరూపా తత్త్వప్రియా తత్త్వజ్ఞానాత్మికాఽనఘా ॥ 11 ॥

తాండవాచారసంతుష్టా తాండవప్రియకారిణీ ।
తాలనాదరతా క్రూరతాపినీ తరణిప్రభా ॥ 12 ॥

త్రపాయుక్తా త్రపాముక్తా తర్పితా తృప్తికారిణీ ।
తారుణ్యభావసంతుష్టా శక్తి-ర్భక్తానురాగిణీ ॥ 13 ॥

శివాసక్తా శివరతిః శివభక్తిపరాయణా ।
తామ్రద్యుతి-స్తామ్రరాగా తామ్రపాత్రప్రభోజినీ ॥ 14 ॥

బలభద్రప్రేమరతా బలిభు-గ్బలికల్పనీ ।
రామప్రియా రామశక్తీ రామరూపానుకారిణీ ॥ 15 ॥

ఇత్యేతత్కథితం దేవి రహస్యం పరమాద్భుతమ్ ।
శ్రుత్వామోక్షమవాప్నోతి తారాదేవ్యాః ప్రసాదతః ॥ 16 ॥

య ఇదం పఠతి స్తోత్రం తారాస్తుతిరహస్యజమ్ ।
సర్వసిద్ధియుతో భూత్వా విహరేత్ క్షితి మండలే ॥ 17 ॥

తస్యైవ మంత్రసిద్ధిః స్యాన్మయి భక్తిరనుత్తమా ।
భవత్యేవ మహామాయే సత్యం సత్యం న సంశయః ॥ 18 ॥

మందే మంగళవారే చ యః పఠేన్నిశి సంయుతః ।
తస్యైవ మంత్రసిద్ధిస్స్యాద్గాణాపత్యం లభేత సః ॥ 19 ॥

శ్రద్ధయాఽశ్రద్ధయా వాఽపి పఠేత్తారా రహస్యకమ్ ।
సోఽచిరేణైవకాలేన జీవన్ముక్తశ్శివో భవేత్ ॥ 20 ॥

సహస్రావర్తనాద్దేవి పురశ్చర్యాఫలం లభేత్ ।
ఏవం సతతయుక్తా యే ధ్యాయంతస్త్వాముపాసతే ॥ 21 ॥

తే కృతార్థా మహేశాని మృత్యుసంసారవర్త్మనః ॥ 22 ॥

ఇతి శ్రీ స్వర్ణమాలాతంత్రే తారాంబాష్టోత్తరశతనామ స్తోత్రమ్ ।

శ్రీ షోడశీ (త్రిపుర సుందరీ) అష్టోత్తర శత నామా స్తోత్రం

భృగురువాచ
చతుర్వక్త్ర జగన్నాథ స్తోత్రం వద మయి ప్రభో ।
యస్యానుష్ఠానమాత్రేణ నరో భక్తిమవాప్నుయాత్ ॥ 1 ॥

బ్రహ్మోవాచ
సహస్రనామ్నామాకృష్య నామ్నామష్టోత్తరం శతమ్ ।
గుహ్యాద్గుహ్యతరం గుహ్యం సుందర్యాః పరికీర్తితమ్ ॥ 2 ॥

అస్య శ్రీషోడశ్యష్టోత్తరశతనామస్తోత్రస్య శంభురృషిః అనుష్టుప్ ఛందః శ్రీషోడశీ దేవతా ధర్మార్థకామమోక్షసిద్ధ్యర్థే జపే వినియోగః ।

త్రిపురా షోడశీ మాతా త్ర్యక్షరా త్రితయా త్రయీ ।
సుందరీ సుముఖీ సేవ్యా సామవేదపరాయణా ॥ 3 ॥

శారదా శబ్దనిలయా సాగరా సరిదంబరా ।
శుద్ధా శుద్ధతనుః సాధ్వీ శివధ్యానపరాయణా ॥ 4 ॥

స్వామినీ శంభువనితా శాంభవీ చ సరస్వతీ ।
సముద్రమథినీ శీఘ్రగామినీ శీఘ్రసిద్ధిదా ॥ 5 ॥

సాధుసేవ్యా సాధుగమ్యా సాధుసంతుష్టమానసా ।
ఖట్వాంగధారిణీ ఖర్వా ఖడ్గఖర్పరధారిణీ ॥ 6 ॥

షడ్వర్గభావరహితా షడ్వర్గపరిచారికా ।
షడ్వర్గా చ షడంగా చ షోఢా షోడశవార్షికీ ॥ 7 ॥

క్రతురూపా క్రతుమతీ ఋభుక్షక్రతుమండితా ।
కవర్గాదిపవర్గాంతా అంతస్థాఽనంతరూపిణీ ॥ 8 ॥

అకారాకారరహితా కాలమృత్యుజరాపహా ।
తన్వీ తత్త్వేశ్వరీ తారా త్రివర్షా జ్ఞానరూపిణీ ॥ 9 ॥

కాలీ కరాలీ కామేశీ ఛాయా సంజ్ఞాప్యరుంధతీ ।
నిర్వికల్పా మహావేగా మహోత్సాహా మహోదరీ ॥ 10 ॥

మేఘా బలాకా విమలా విమలజ్ఞానదాయినీ ।
గౌరీ వసుంధరా గోప్త్రీ గవాం పతినిషేవితా ॥ 11 ॥

భగాంగా భగరూపా చ భక్తిభావపరాయణా ।
ఛిన్నమస్తా మహాధూమా తథా ధూమ్రవిభూషణా ॥ 12 ॥

ధర్మకర్మాదిరహితా ధర్మకర్మపరాయణా ।
సీతా మాతంగినీ మేధా మధుదైత్యవినాశినీ ॥ 13 ॥

భైరవీ భువనా మాతాఽభయదా భవసుందరీ ।
భావుకా బగలా కృత్యా బాలా త్రిపురసుందరీ ॥ 14 ॥

రోహిణీ రేవతీ రమ్యా రంభా రావణవందితా ।
శతయజ్ఞమయీ సత్త్వా శతక్రతువరప్రదా ॥ 15 ॥

శతచంద్రాననా దేవీ సహస్రాదిత్యసన్నిభా ।
సోమసూర్యాగ్నినయనా వ్యాఘ్రచర్మాంబరావృతా ॥ 16 ॥

అర్ధేందుధారిణీ మత్తా మదిరా మదిరేక్షణా ।
ఇతి తే కథితం గోప్యం నామ్నామష్టోత్తరం శతమ్ ॥ 17 ॥

సుందర్యాః సర్వదం సేవ్యం మహాపాతకనాశనమ్ ।
గోపనీయం గోపనీయం గోపనీయం కలౌ యుగే ॥ 18 ॥

సహస్రనామపాఠస్య ఫలం యద్వై ప్రకీర్తితమ్ ।
తస్మాత్కోటిగుణం పుణ్యం స్తవస్యాస్య ప్రకీర్తనాత్ ॥ 19 ॥

పఠేత్సదా భక్తియుతో నరో యో
నిశీథకాలేఽప్యరుణోదయే వా ।
ప్రదోషకాలే నవమీదినేఽథవా
లభేత భోగాన్పరమాద్భుతాన్ప్రియాన్ ॥ 20 ॥

ఇతి బ్రహ్మయామలే పూర్వఖండే షోడశ్యష్టోత్తరశతనామ స్తోత్రమ్ ।

శ్రీ భువనేశ్వరీ అష్టోత్తర శత నామా స్తోత్రం

కైలాసశిఖరే రమ్యే నానారత్నోపశోభితే ।
నరనారీహితార్థాయ శివం పప్రచ్ఛ పార్వతీ ॥ 1 ॥

దేవ్యువాచ
భువనేశీ మహావిద్యా నామ్నామష్టోత్తరం శతమ్ ।
కథయస్వ మహాదేవ యద్యహం తవ వల్లభా ॥ 2 ॥

ఈశ్వర ఉవాచ
శృణు దేవి మహాభాగే స్తవరాజమిదం శుభమ్ ।
సహస్రనామ్నామధికం సిద్ధిదం మోక్షహేతుకమ్ ॥ 3 ॥

శుచిభిః ప్రాతరుత్థాయ పఠితవ్యః సమాహితైః ।
త్రికాలం శ్రద్ధయా యుక్తైః సర్వకామఫలప్రదః ॥ 4 ॥

అస్య శ్రీభువనేశ్వర్యష్టోత్తరశతనామ స్తోత్రమంత్రస్య శక్తిరృషిః గాయత్రీ ఛందః శ్రీభువనేశ్వరీ దేవతా చతుర్విధఫల పురుషార్థ సిద్ధ్యర్థే జపే వినియోగః ॥

అథ స్తోత్రం
ఓం మహామాయా మహావిద్యా మహాయోగా మహోత్కటా ।
మాహేశ్వరీ కుమారీ చ బ్రహ్మాణీ బ్రహ్మరూపిణీ ॥ 5 ॥

వాగీశ్వరీ యోగరూపా యోగినీకోటిసేవితా ।
జయా చ విజయా చైవ కౌమారీ సర్వమంగళా ॥ 6 ॥

హింగుళా చ విలాసీ చ జ్వాలినీ జ్వాలరూపిణీ ।
ఈశ్వరీ క్రూరసంహారీ కులమార్గప్రదాయినీ ॥ 7 ॥

వైష్ణవీ సుభగాకారా సుకుల్యా కులపూజితా ।
వామాంగా వామచారా చ వామదేవప్రియా తథా ॥ 8 ॥

డాకినీ యోగినీరూపా భూతేశీ భూతనాయికా ।
పద్మావతీ పద్మనేత్రా ప్రబుద్ధా చ సరస్వతీ ॥ 9 ॥

భూచరీ ఖేచరీ మాయా మాతంగీ భువనేశ్వరీ ।
కాంతా పతివ్రతా సాక్షీ సుచక్షుః కుండవాసినీ ॥ 10 ॥

ఉమా కుమారీ లోకేశీ సుకేశీ పద్మరాగిణీ ।
ఇంద్రాణీ బ్రహ్మచండాలీ చండికా వాయువల్లభా ॥ 11 ॥

సర్వధాతుమయీమూర్తిర్జలరూపా జలోదరీ ।
ఆకాశీ రణగా చైవ నృకపాలవిభూషణా ॥ 12 ॥

నర్మదా మోక్షదా చైవ ధర్మకామార్థదాయినీ ।
గాయత్రీ చాఽథ సావిత్రీ త్రిసంధ్యా తీర్థగామినీ ॥ 13 ॥

అష్టమీ నవమీ చైవ దశమ్యైకాదశీ తథా ।
పౌర్ణమాసీ కుహూరూపా తిథిమూర్తిస్వరూపిణీ ॥ 14 ॥

సురారినాశకారీ చ ఉగ్రరూపా చ వత్సలా ।
అనలా అర్ధమాత్రా చ అరుణా పీతలోచనా ॥ 15 ॥

లజ్జా సరస్వతీ విద్యా భవానీ పాపనాశినీ ।
నాగపాశధరా మూర్తిరగాధా ధృతకుండలా ॥ 16 ॥

క్షత్రరూపా క్షయకరీ తేజస్వినీ శుచిస్మితా ।
అవ్యక్తావ్యక్తలోకా చ శంభురూపా మనస్వినీ ॥ 17 ॥

మాతంగీ మత్తమాతంగీ మహాదేవప్రియా సదా ।
దైత్యఘ్నీ చైవ వారాహీ సర్వశాస్త్రమయీ శుభా ॥ 18 ॥

య ఇదం పఠతే భక్త్యా శృణుయాద్వా సమాహితః ।
అపుత్రో లభతే పుత్రం నిర్ధనో ధనవాన్ భవేత్ ॥ 19 ॥

మూర్ఖోఽపి లభతే శాస్త్రం చోరోఽపి లభతే గతిమ్ ।
వేదానాం పాఠకో విప్రః క్షత్రియో విజయీ భవేత్ ॥ 20 ॥

వైశ్యస్తు ధనవాన్ భూయాచ్ఛూద్రస్తు సుఖమేధతే ।
అష్టమ్యాం చ చతుర్దశ్యాం నవమ్యాం చైకచేతసః ॥ 21 ॥

యే పఠంతి సదా భక్త్యా న తే వై దుఃఖభాగినః ।
ఏకకాలం ద్వికాలం వా త్రికాలం వా చతుర్థకమ్ ॥ 22 ॥

యే పఠంతి సదా భక్త్యా స్వర్గలోకే చ పూజితాః ।
రుద్రం దృష్ట్వా యథా దేవాః పన్నగా గరుడం యథా ।
శత్రవః ప్రపలాయంతే తస్య వక్త్రవిలోకనాత్ ॥ 23 ॥

ఇతి శ్రీరుద్రయామలే దేవీశ్వరసంవాదే శ్రీ భువనేశ్వర్యష్టోత్తరశతనామ స్తోత్రమ్ ।

శ్రీ ఛిన్నమస్తా అష్టోత్తర శత నామా స్తోత్రం

శ్రీ పార్వత్యువాచ
నామ్నాం సహస్రం పరమం ఛిన్నమస్తాప్రియం శుభమ్ ।
కథితం భవతా శంభోస్సద్యశ్శత్రునికృంతనమ్ ॥ 1 ॥

పునః పృచ్ఛామ్యహం దేవ కృపాం కురు మమోపరి ।
సహస్రనామపాఠే చ అశక్తో యః పుమాన్ భవేత్ ॥ 2 ॥

తేన కిం పఠ్యతే నాథ తన్మే బ్రూహి కృపామయ ।

శ్రీ సదాశివ ఉవాచ
అష్టోత్తరశతం నామ్నాం పఠ్యతే తేన సర్వదా ॥ 3 ॥

సహస్రనామపాఠస్య ఫలం ప్రాప్నోతి నిశ్చితమ్ ।

ఓం అస్య శ్రీఛిన్నమస్తాదేవ్యష్టోత్తర శతనామ స్తోత్రమహామంత్రస్య సదాశివ
ఋషిః అనుష్టుప్ ఛందః శ్రీఛిన్నమస్తా దేవతా మమ సకలసిద్ధి ప్రాప్తయే జపే వినియోగః ॥

ఓం ఛిన్నమస్తా మహావిద్యా మహాభీమా మహోదరీ ।
చండేశ్వరీ చండమాతా చండముండప్రభంజినీ ॥ 4 ॥

మహాచండా చండరూపా చండికా చండఖండినీ ।
క్రోధినీ క్రోధజననీ క్రోధరూపా కుహూః కళా ॥ 5 ॥

కోపాతురా కోపయుతా కోపసంహారకారిణీ ।
వజ్రవైరోచనీ వజ్రా వజ్రకల్పా చ డాకినీ ॥ 6 ॥

డాకినీకర్మనిరతా డాకినీకర్మపూజితా ।
డాకినీసంగనిరతా డాకినీప్రేమపూరితా ॥ 7 ॥

ఖట్వాంగధారిణీ ఖర్వా ఖడ్గఖర్పరధారిణీ ।
ప్రేతాసనా ప్రేతయుతా ప్రేతసంగవిహారిణీ ॥ 8 ॥

ఛిన్నముండధరా ఛిన్నచండవిద్యా చ చిత్రిణీ ।
ఘోరరూపా ఘోరదృష్టిః ఘోరరావా ఘనోదరీ ॥ 9 ॥

యోగినీ యోగనిరతా జపయజ్ఞపరాయణా ।
యోనిచక్రమయీ యోనిర్యోనిచక్రప్రవర్తినీ ॥ 10 ॥

యోనిముద్రా యోనిగమ్యా యోనియంత్రనివాసినీ ।
యంత్రరూపా యంత్రమయీ యంత్రేశీ యంత్రపూజితా ॥ 11 ॥

కీర్త్యా కపర్దినీ కాళీ కంకాళీ కలకారిణీ ।
ఆరక్తా రక్తనయనా రక్తపానపరాయణా ॥ 12 ॥

భవానీ భూతిదా భూతిర్భూతిధాత్రీ చ భైరవీ ।
భైరవాచారనిరతా భూతభైరవసేవితా ॥ 13 ॥

భీమా భీమేశ్వరీ దేవీ భీమనాదపరాయణా ।
భవారాధ్యా భవనుతా భవసాగరతారిణీ ॥ 14 ॥

భద్రకాళీ భద్రతనుర్భద్రరూపా చ భద్రికా ।
భద్రరూపా మహాభద్రా సుభద్రా భద్రపాలినీ ॥ 15 ॥

సుభవ్యా భవ్యవదనా సుముఖీ సిద్ధసేవితా ।
సిద్ధిదా సిద్ధినివహా సిద్ధా సిద్ధనిషేవితా ॥ 16 ॥

శుభదా శుభగా శుద్ధా శుద్ధసత్త్వా శుభావహా ।
శ్రేష్ఠా దృష్టిమయీ దేవీ దృష్టిసంహారకారిణీ ॥ 17 ॥

శర్వాణీ సర్వగా సర్వా సర్వమంగళకారిణీ ।
శివా శాంతా శాంతిరూపా మృడానీ మదానతురా ॥ 18 ॥

ఇతి తే కథితం దేవీ స్తోత్రం పరమదుర్లభమ్ ।
గుహ్యాద్గుహ్యతరం గోప్యం గోపనియం ప్రయత్నతః ॥ 19 ॥

కిమత్ర బహునోక్తేన త్వదగ్రే ప్రాణవల్లభే ।
మారణం మోహనం దేవి హ్యుచ్చాటనమతః పరమ్ ॥ 20 ॥

స్తంభనాదికకర్మాణి ఋద్ధయస్సిద్ధయోఽపి చ ।
త్రికాలపఠనాదస్య సర్వే సిద్ధ్యంత్యసంశయః ॥ 21 ॥

మహోత్తమం స్తోత్రమిదం వరాననే
మయేరితం నిత్యమనన్యబుద్ధయః ।
పఠంతి యే భక్తియుతా నరోత్తమా
భవేన్న తేషాం రిపుభిః పరాజయః ॥ 22 ॥

ఇతి శ్రీఛిన్నమస్తాదేవ్యష్టోత్తరశతనామ స్తోత్రమ్ ॥

శ్రీ త్రిపుర భైరవీ అష్టోత్తర శత నామా స్తోత్రం

శ్రీదేవ్యువాచ
కైలాసవాసిన్ భగవన్ ప్రాణేశ్వర కృపానిధే ।
భక్తవత్సల భైరవ్యా నామ్నామష్టోత్తరం శతమ్ ॥ 1 ॥

న శ్రుతం దేవదేవేశ వద మాం దీనవత్సల ।

శ్రీశివ ఉవాచ
శృణు ప్రియే మహాగోప్యం నామ్నామష్టోత్తరం శతమ్ ॥ 2 ॥

భైరవ్యాశ్శుభదం సేవ్యం సర్వసంపత్ప్రదాయకమ్ ।
యస్యానుష్ఠానమాత్రేణ కిం న సిద్ధ్యతి భూతలే ॥ 3 ॥

ఓం భైరవీ భైరవారాధ్యా భూతిదా భూతభావనా ।
ఆర్యా బ్రాహ్మీ కామధేనుస్సర్వసంపత్ప్రదాయినీ ॥ 4 ॥

త్రైలోక్యవందితా దేవీ మహిషాసురమర్దినీ ।
మోహఘ్నీ మాలతీ మాలా మహాపాతకనాశినీ ॥ 5 ॥

క్రోధినీ క్రోధనిలయా క్రోధరక్తేక్షణా కుహూః ।
త్రిపురా త్రిపురాధారా త్రినేత్రా భీమభైరవీ ॥ 6 ॥

దేవకీ దేవమాతా చ దేవదుష్టవినాశినీ ।
దామోదరప్రియా దీర్ఘా దుర్గా దుర్గతినాశినీ ॥ 7 ॥

లంబోదరీ లంబకర్ణా ప్రలంబితపయోధరా ।
ప్రత్యంగిరా ప్రతిపదా ప్రణతక్లేశనాశినీ ॥ 8 ॥

ప్రభావతీ గుణవతీ గణమాతా గుహేశ్వరీ ।
క్షీరాబ్ధితనయా క్షేమ్యా జగత్త్రాణవిధాయినీ ॥ 9 ॥

మహామారీ మహామోహా మహాక్రోధా మహానదీ ।
మహాపాతకసంహర్త్రీ మహామోహప్రదాయినీ ॥ 10 ॥

వికరాళా మహాకాలా కాలరూపా కళావతీ ।
కపాలఖట్వాంగధరా ఖడ్గఖర్పరధారిణీ ॥ 11 ॥

కుమారీ కుంకుమప్రీతా కుంకుమారుణరంజితా ।
కౌమోదకీ కుముదినీ కీర్త్యా కీర్తిప్రదాయినీ ॥ 12 ॥

నవీనా నీరదా నిత్యా నందికేశ్వరపాలినీ ।
ఘర్ఘరా ఘర్ఘరారావా ఘోరా ఘోరస్వరూపిణీ ॥ 13 ॥

కలిఘ్నీ కలిధర్మఘ్నీ కలికౌతుకనాశినీ ।
కిశోరీ కేశవప్రీతా క్లేశసంఘనివారిణీ ॥ 14 ॥

మహోన్మత్తా మహామత్తా మహావిద్యా మహీమయీ ।
మహాయజ్ఞా మహావాణీ మహామందరధారిణీ ॥ 15 ॥

మోక్షదా మోహదా మోహా భుక్తిముక్తిప్రదాయినీ ।
అట్టాట్టహాసనిరతా క్వణన్నూపురధారిణీ ॥ 16 ॥

దీర్ఘదంష్ట్రా దీర్ఘముఖీ దీర్ఘఘోణా చ దీర్ఘికా ।
దనుజాంతకరీ దుష్టా దుఃఖదారిద్ర్యభంజినీ ॥ 17 ॥

దురాచారా చ దోషఘ్నీ దమపత్నీ దయాపరా ।
మనోభవా మనుమయీ మనువంశప్రవర్ధినీ ॥ 18 ॥

శ్యామా శ్యామతనుశ్శోభా సౌమ్యా శంభువిలాసినీ ।
ఇతి తే కథితం దివ్యం నామ్నామష్టోత్తరం శతమ్ ॥ 19 ॥

భైరవ్యా దేవదేవేశ్యాస్తవ ప్రీత్యై సురేశ్వరి ।
అప్రకాశ్యమిదం గోప్యం పఠనీయం ప్రయత్నతః ॥ 20 ॥

దేవీం ధ్యాత్వా సురాం పీత్వా మకారైః పంచకైః ప్రియే ।
పూజయేత్సతతం భక్త్యా పఠేత్ స్తోత్రమిదం శుభమ్ ॥ 21 ॥

షణ్మాసాభ్యంతరే సోఽపి గణనాథసమో భవేత్ ।
కిమత్ర బహునోక్తేన త్వదగ్రే ప్రాణవల్లభే ॥ 22 ॥

సర్వం జానాసి సర్వజ్ఞే పునర్మాం పరిపృచ్ఛసి ।
న దేయం పరశిష్యేభ్యో నిందకేభ్యో విశేషతః ॥ 23 ॥

ఇతి శ్రీత్రిపురభైరవీ అష్టోత్తరశతనామస్తోత్రమ్ ।

శ్రీ ధూమావతీ అష్టోత్తర శత నామా స్తోత్రం

ఈశ్వర ఉవాచ
ఓం ధూమావతీ ధూమ్రవర్ణా ధూమ్రపానపరాయణా ।
ధూమ్రాక్షమథినీ ధన్యా ధన్యస్థాననివాసినీ ॥ 1 ॥

అఘోరాచారసంతుష్టా అఘోరాచారమండితా ।
అఘోరమంత్రసంప్రీతా అఘోరమంత్రపూజితా ॥ 2 ॥

అట్టాట్టహాసనిరతా మలినాంబరధారిణీ ।
వృద్ధా విరూపా విధవా విద్యా చ విరళద్విజా ॥ 3 ॥

ప్రవృద్ధఘోణా కుముఖీ కుటిలా కుటిలేక్షణా ।
కరాళీ చ కరాళాస్యా కంకాళీ శూర్పధారిణీ ॥ 4 ॥

కాకధ్వజరథారూఢా కేవలా కఠినా కుహూః ।
క్షుత్పిపాసార్దితా నిత్యా లలజ్జిహ్వా దిగంబరీ ॥ 5 ॥

దీర్ఘోదరీ దీర్ఘరవా దీర్ఘాంగీ దీర్ఘమస్తకా ।
విముక్తకుంతలా కీర్త్యా కైలాసస్థానవాసినీ ॥ 6 ॥

క్రూరా కాలస్వరూపా చ కాలచక్రప్రవర్తినీ ।
వివర్ణా చంచలా దుష్టా దుష్టవిధ్వంసకారిణీ ॥ 7 ॥

చండీ చండస్వరూపా చ చాముండా చండనిఃస్వనా ।
చండవేగా చండగతిశ్చండముండవినాశినీ ॥ 8 ॥

చాండాలినీ చిత్రరేఖా చిత్రాంగీ చిత్రరూపిణీ ।
కృష్ణా కపర్దినీ కుల్లా కృష్ణారూపా క్రియావతీ ॥ 9 ॥

కుంభస్తనీ మహోన్మత్తా మదిరాపానవిహ్వలా ।
చతుర్భుజా లలజ్జిహ్వా శత్రుసంహారకారిణీ ॥ 10 ॥

శవారూఢా శవగతా శ్మశానస్థానవాసినీ ।
దురారాధ్యా దురాచారా దుర్జనప్రీతిదాయినీ ॥ 11 ॥

నిర్మాంసా చ నిరాకారా ధూమహస్తా వరాన్వితా ।
కలహా చ కలిప్రీతా కలికల్మషనాశినీ ॥ 12 ॥

మహాకాలస్వరూపా చ మహాకాలప్రపూజితా ।
మహాదేవప్రియా మేధా మహాసంకటనాశినీ ॥ 13 ॥

భక్తప్రియా భక్తగతిర్భక్తశత్రువినాశినీ ।
భైరవీ భువనా భీమా భారతీ భువనాత్మికా ॥ 14 ॥

భేరుండా భీమనయనా త్రినేత్రా బహురూపిణీ ।
త్రిలోకేశీ త్రికాలజ్ఞా త్రిస్వరూపా త్రయీతనుః ॥ 15 ॥

త్రిమూర్తిశ్చ తథా తన్వీ త్రిశక్తిశ్చ త్రిశూలినీ ।
ఇతి ధూమామహత్ స్తోత్రం నామ్నామష్టశతాత్మకమ్ ॥ 16 ॥

మయా తే కథితం దేవి శత్రుసంఘవినాశనమ్ ।
కారాగారే రిపుగ్రస్తే మహోత్పాతే మహాభయే ॥ 17 ॥

ఇదం స్తోత్రం పఠేన్మర్త్యో ముచ్యతే సర్వసంకటైః ।
గుహ్యాద్గుహ్యతరం గుహ్యం గోపనీయం ప్రయత్నతః ॥ 18 ॥

చతుష్పదార్థదం నౄణాం సర్వసంపత్ప్రదాయకమ్ ॥ 19 ॥

ఇతి శ్రీధూమావత్యష్టోత్తరశతనామస్తోత్రమ్ ।

శ్రీ బగలాముఖీ అష్టోత్తర శత నామా స్తోత్రం

నారద ఉవాచ
భగవన్ దేవదేవేశ సృష్టిస్థితిలయేశ్వర ।
శతమష్టోత్తరం నామ్నాం బగళాయా వదాధునా ॥ 1 ॥

శ్రీ భగవానువాచ
శృణు వత్స ప్రవక్ష్యామి నామ్నామష్టోత్తరం శతమ్ ।
పీతాంబర్యా మహాదేవ్యాః స్తోత్రం పాపప్రణాశనమ్ ॥ 2 ॥

యస్య ప్రపఠనాత్సద్యో వాదీ మూకోభవేత్ క్షణాత్ ।
రిపవస్స్తంభనం యాంతి సత్యం సత్యం వదామ్యహమ్ ॥ 3 ॥

ఓం అస్య శ్రీపీతాంబర్యష్టోత్తరశతనామస్తోత్రస్య సదాశివ ఋషిః అనుష్టుప్ఛందః శ్రీపీతాంబరీ దేవతా శ్రీపీతాంబరీ ప్రీతయే జపే వినియోగః ।

ఓం బగళా విష్ణువనితా విష్ణుశంకరభామినీ ।
బహుళా దేవమాతా చ మహావిష్ణుప్రసూరపి ॥ 4 ॥

మహామత్స్యా మహాకూర్మా మహావారాహరూపిణీ ।
నారసింహప్రియా రమ్యా వామనా పటురూపిణీ ॥ 5 ॥

జామదగ్న్యస్వరూపా చ రామా రామప్రపూజితా ।
కృష్ణా కపర్దినీ కృత్యా కలహా చ వికారిణీ ॥ 6 ॥

బుద్ధిరూపా బుద్ధభార్యా బౌద్ధపాషండఖండినీ ।
కల్కిరూపా కలిహరా కలిదుర్గతినాశినీ ॥ 7 ॥

కోటిసూర్యప్రతీకాశా కోటికందర్పమోహినీ ।
కేవలా కఠినా కాళీ కలా కైవల్యదాయినీ ॥ 8 ॥

కేశవీ కేశవారాధ్యా కిశోరీ కేశవస్తుతా ।
రుద్రరూపా రుద్రమూర్తీ రుద్రాణీ రుద్రదేవతా ॥ 9 ॥

నక్షత్రరూపా నక్షత్రా నక్షత్రేశప్రపూజితా ।
నక్షత్రేశప్రియా నిత్యా నక్షత్రపతివందితా ॥ 10 ॥

నాగినీ నాగజననీ నాగరాజప్రవందితా ।
నాగేశ్వరీ నాగకన్యా నాగరీ చ నగాత్మజా ॥ 11 ॥

నగాధిరాజతనయా నగరాజప్రపూజితా ।
నవీనా నీరదా పీతా శ్యామా సౌందర్యకారిణీ ॥ 12 ॥

రక్తా నీలా ఘనా శుభ్రా శ్వేతా సౌభాగ్యదాయినీ ।
సుందరీ సౌభగా సౌమ్యా స్వర్ణాభా స్వర్గతిప్రదా ॥ 13 ॥

రిపుత్రాసకరీ రేఖా శత్రుసంహారకారిణీ ।
భామినీ చ తథా మాయా స్తంభినీ మోహినీ శుభా ॥ 14 ॥

రాగద్వేషకరీ రాత్రీ రౌరవధ్వంసకారిణీ ।
యక్షిణీ సిద్ధనివహా సిద్ధేశా సిద్ధిరూపిణీ ॥ 15 ॥

లంకాపతిధ్వంసకరీ లంకేశరిపువందితా ।
లంకానాథకులహరా మహారావణహారిణీ ॥ 16 ॥

దేవదానవసిద్ధౌఘపూజితాపరమేశ్వరీ ।
పరాణురూపా పరమా పరతంత్రవినాశినీ ॥ 17 ॥

వరదా వరదారాధ్యా వరదానపరాయణా ।
వరదేశప్రియా వీరా వీరభూషణభూషితా ॥ 18 ॥

వసుదా బహుదా వాణీ బ్రహ్మరూపా వరాననా ।
బలదా పీతవసనా పీతభూషణభూషితా ॥ 19 ॥

పీతపుష్పప్రియా పీతహారా పీతస్వరూపిణీ ।
ఇతి తే కథితం విప్ర నామ్నామష్టోత్తరం శతమ్ ॥ 20 ॥

యః పఠేత్పాఠయేద్వాపి శృణుయాద్వా సమాహితః ।
తస్య శత్రుః క్షయం సద్యో యాతి నైవాత్ర సంశయః ॥ 21 ॥

ప్రభాతకాలే ప్రయతో మనుష్యః
పఠేత్సుభక్త్యా పరిచింత్య పీతామ్ ।
ధ్రువం భవేత్తస్య సమస్తవృద్ధిః
వినాశమాయాతి చ తస్య శత్రుః ॥ 22 ॥

ఇతి శ్రీవిష్ణుయామలే నారదవిష్ణుసంవాదే శ్రీబగళాష్టోత్తరశతనామస్తోత్రమ్ ।

శ్రీ మాతంగీ అష్టోత్తర శత నామా స్తోత్రం

శ్రీభైరవ్యువాచ
భగవన్ శ్రోతుమిచ్ఛామి మాతంగ్యాః శతనామకమ్ ।
యద్గుహ్యం సర్వతంత్రేషు కేనాపి న ప్రకాశితమ్ ॥ 1 ॥

శ్రీభైరవ ఉవాచ
శృణు దేవి ప్రవక్ష్యామి రహస్యాతిరహస్యకమ్ ।
నాఖ్యేయం యత్ర కుత్రాపి పఠనీయం పరాత్పరమ్ ॥ 2 ॥

యస్యైకవారపఠనాత్సర్వే విఘ్నా ఉపద్రవాః ।
నశ్యంతి తత్క్షణాద్దేవి వహ్నినా తూలరాశివత్ ॥ 3 ॥

ప్రసన్నా జాయతే దేవీ మాతంగీ చాస్య పాఠతః ।
సహస్రనామపఠనే యత్ఫలం పరికీర్తితమ్ ।
తత్కోటిగుణితం దేవీనామాష్టశతకం శుభమ్ ॥ 4 ॥

అస్య శ్రీమాతంగ్యష్టోత్తరశతనామస్తోత్రస్య భగవాన్మతంగ ఋషిః అనుష్టుప్ఛందః శ్రీమాతంగీ దేవతా శ్రీమాతంగీ ప్రీతయే జపే వినియోగః ।

మహామత్తమాతంగినీ సిద్ధిరూపా
తథా యోగినీ భద్రకాళీ రమా చ ।
భవానీ భవప్రీతిదా భూతియుక్తా
భవారాధితా భూతిసంపత్కరీ చ ॥ 1 ॥

ధనాధీశమాతా ధనాగారదృష్టి-
-ర్ధనేశార్చితా ధీరవాపీ వరాంగీ ।
ప్రకృష్టా ప్రభారూపిణీ కామరూపా
ప్రహృష్టా మహాకీర్తిదా కర్ణనాలీ ॥ 2 ॥

కరాళీ భగా ఘోరరూపా భగాంగీ
భగాహ్వా భగప్రీతిదా భీమరూపా ।
భవానీ మహాకౌశికీ కోశపూర్ణా
కిశోరీ కిశోరప్రియా నందీహా ॥ 3 ॥

మహాకారణాఽకారణా కర్మశీలా
కపాలీ ప్రసిద్ధా మహాసిద్ధఖండా ।
మకారప్రియా మానరూపా మహేశీ
మలోల్లాసినీ లాస్యలీలాలయాంగీ ॥ 4 ॥

క్షమా క్షేమశీలా క్షపాకారిణీ చా-
-ఽక్షయప్రీతిదా భూతియుక్తా భవానీ ।
భవారాధితా భూతిసత్యాత్మికా చ
ప్రభోద్భాసితా భానుభాస్వత్కరా చ ॥ 5 ॥

ధరాధీశమాతా ధరాగారదృష్టి-
-ర్ధరేశార్చితా ధీవరా ధీవరాంగీ ।
ప్రకృష్టా ప్రభారూపిణీ ప్రాణరూపా
ప్రకృష్టస్వరూపా స్వరూపప్రియా చ ॥ 6 ॥

చలత్కుండలా కామినీ కాంతయుక్తా
కపాలాఽచలా కాలకోద్ధారిణీ చ ।
కదంబప్రియా కోటరీ కోటదేహా
క్రమా కీర్తిదా కర్ణరూపా చ కాక్ష్మీః ॥ 7 ॥

క్షమాంగీ క్షయప్రేమరూపా క్షయా చ
క్షయాక్షా క్షయాహ్వా క్షయప్రాంతరా చ ।
క్షవత్కామినీ క్షారిణీ క్షీరపూర్ణా
శివాంగీ చ శాకంభరీ శాకదేహా ॥ 8 ॥

మహాశాకయజ్ఞా ఫలప్రాశకా చ
శకాహ్వాఽశకాహ్వా శకాఖ్యా శకా చ ।
శకాక్షాంతరోషా సురోషా సురేఖా
మహాశేషయజ్ఞోపవీతప్రియా చ ॥ 9 ॥

జయంతీ జయా జాగ్రతీ యోగ్యరూపా
జయాంగా జపధ్యానసంతుష్టసంజ్ఞా ।
జయప్రాణరూపా జయస్వర్ణదేహా
జయజ్వాలినీ యామినీ యామ్యరూపా ॥ 10 ॥

జగన్మాతృరూపా జగద్రక్షణా చ
స్వధావౌషడంతా విలంబాఽవిలంబా ।
షడంగా మహాలంబరూపాసిహస్తా-
పదాహారిణీహారిణీ హారిణీ చ ॥ 11 ॥

మహామంగళా మంగళప్రేమకీర్తి-
-ర్నిశుంభచ్ఛిదా శుంభదర్పాపహా చ ।
తథాఽఽనందబీజాదిముక్తిస్వరూపా
తథా చండముండాపదా ముఖ్యచండా ॥ 12 ॥

ప్రచండాఽప్రచండా మహాచండవేగా
చలచ్చామరా చామరా చంద్రకీర్తిః ।
సుచామీకరా చిత్రభూషోజ్జ్వలాంగీ
సుసంగీతగీతా చ పాయాదపాయాత్ ॥ 13 ॥

ఇతి తే కథితం దేవి నామ్నామష్టోత్తరం శతమ్ ।
గోప్యం చ సర్వతంత్రేషు గోపనీయం చ సర్వదా ॥ 14 ॥

ఏతస్య సతతాభ్యాసాత్సాక్షాద్దేవో మహేశ్వరః ।
త్రిసంధ్యం చ మహాభక్త్యా పఠనీయం సుఖోదయమ్ ॥ 15 ॥

న తస్య దుష్కరం కించిజ్జాయతే స్పర్శతః క్షణాత్ ।
సుకృతం యత్తదేవాప్తం తస్మాదావర్తయేత్సదా ॥ 16 ॥

సదైవ సన్నిధౌ తస్య దేవీ వసతి సాదరమ్ ।
అయోగా యే త ఏవాగ్రే సుయోగాశ్చ భవంతి వై ॥ 17 ॥

త ఏవ మిత్రభూతాశ్చ భవంతి తత్ప్రసాదతః ।
విషాణి నోపసర్పంతి వ్యాధయో న స్పృశంతి తాన్ ॥ 18 ॥

లూతావిస్ఫోటకాః సర్వే శమం యాంతి చ తత్క్షణాత్ ।
జరాపలితనిర్ముక్తః కల్పజీవీ భవేన్నరః ॥ 19 ॥

అపి కిం బహునోక్తేన సాన్నిధ్యం ఫలమాప్నుయాత్ ।
యావన్మయా పురా ప్రోక్తం ఫలం సాహస్రనామకమ్ ।
తత్సర్వం లభతే మర్త్యో మహామాయాప్రసాదతః ॥ 20 ॥

ఇతి శ్రీరుద్రయామలే శ్రీమాతంగీశతనామస్తోత్రమ్ ।

శ్రీ కమలా అష్టోత్తర శత నామా స్తోత్రం

శ్రీ శివ ఉవాచ
శతమష్టోత్తరం నామ్నాం కమలాయా వరాననే ।
ప్రవక్ష్యామ్యతిగుహ్యం హి న కదాపి ప్రకాశయేత్ ॥ 1 ॥

ఓం మహామాయా మహాలక్ష్మీర్మహావాణీ మహేశ్వరీ ।
మహాదేవీ మహారాత్రిర్మహిషాసురమర్దినీ ॥ 2 ॥

కాలరాత్రిః కుహూః పూర్ణానందాద్యా భద్రికా నిశా ।
జయా రిక్తా మహాశక్తిర్దేవమాతా కృశోదరీ ॥ 3 ॥

శచీంద్రాణీ శక్రనుతా శంకరప్రియవల్లభా ।
మహావరాహజననీ మదనోన్మథినీ మహీ ॥ 4 ॥

వైకుంఠనాథరమణీ విష్ణువక్షఃస్థలస్థితా ।
విశ్వేశ్వరీ విశ్వమాతా వరదాఽభయదా శివా ॥ 5 ॥

శూలినీ చక్రిణీ మా చ పాశినీ శంఖధారిణీ ।
గదినీ ముండమాలా చ కమలా కరుణాలయా ॥ 6 ॥

పద్మాక్షధారిణీ హ్యంబా మహావిష్ణుప్రియంకరీ ।
గోలోకనాథరమణీ గోలోకేశ్వరపూజితా ॥ 7 ॥

గయా గంగా చ యమునా గోమతీ గరుడాసనా ।
గండకీ సరయూస్తాపీ రేవా చైవ పయస్వినీ ॥ 8 ॥

నర్మదా చైవ కావేరీ కేదారస్థలవాసినీ ।
కిశోరీ కేశవనుతా మహేంద్రపరివందితా ॥ 9 ॥

బ్రహ్మాదిదేవనిర్మాణకారిణీ వేదపూజితా ।
కోటిబ్రహ్మాండమధ్యస్థా కోటిబ్రహ్మాండకారిణీ ॥ 10 ॥

శ్రుతిరూపా శ్రుతికరీ శ్రుతిస్మృతిపరాయణా ।
ఇందిరా సింధుతనయా మాతంగీ లోకమాతృకా ॥ 11 ॥

త్రిలోకజననీ తంత్రా తంత్రమంత్రస్వరూపిణీ ।
తరుణీ చ తమోహంత్రీ మంగళా మంగళాయనా ॥ 12 ॥

మధుకైటభమథనీ శుంభాసురవినాశినీ ।
నిశుంభాదిహరా మాతా హరిశంకరపూజితా ॥ 13 ॥

సర్వదేవమయీ సర్వా శరణాగతపాలినీ ।
శరణ్యా శంభువనితా సింధుతీరనివాసినీ ॥ 14 ॥

గంధర్వగానరసికా గీతా గోవిందవల్లభా ।
త్రైలోక్యపాలినీ తత్త్వరూపా తారుణ్యపూరితా ॥ 15 ॥

చంద్రావలీ చంద్రముఖీ చంద్రికా చంద్రపూజితా ।
చంద్రా శశాంకభగినీ గీతవాద్యపరాయణా ॥ 16 ॥

సృష్టిరూపా సృష్టికరీ సృష్టిసంహారకారిణీ ।
ఇతి తే కథితం దేవి రమానామశతాష్టకమ్ ॥ 17 ॥

త్రిసంధ్యం ప్రయతో భూత్వా పఠేదేతత్సమాహితః ।
యం యం కామయతే కామం తం తం ప్రాప్నోత్యసంశయమ్ ॥ 18 ॥

ఇమం స్తవం యః పఠతీహ మర్త్యో
వైకుంఠపత్న్యాః పరమాదరేణ ।
ధనాధిపాద్యైః పరివందితః స్యాత్
ప్రయాస్యతి శ్రీపదమంతకాలే ॥ 19 ॥

ఇతి శ్రీ కమలాష్టోత్తరశతనామస్తోత్రమ్ ।

శ్రీ విష్ణు అష్టోత్తర శతనామ స్తోత్రం

అష్టోత్తరశతం నామ్నాం విష్ణోరతులతేజసః ।
యస్య శ్రవణమాత్రేణ నరో నారాయణో భవేత్ ॥ 1 ॥

విష్ణుర్జిష్ణుర్వషట్కారో దేవదేవో వృషాకపిః । [వృషాపతిః]
దామోదరో దీనబంధురాదిదేవోఽదితేస్తుతః ॥ 2 ॥

పుండరీకః పరానందః పరమాత్మా పరాత్పరః ।
పరశుధారీ విశ్వాత్మా కృష్ణః కలిమలాపహా ॥ 3 ॥

కౌస్తుభోద్భాసితోరస్కో నరో నారాయణో హరిః ।
హరో హరప్రియః స్వామీ వైకుంఠో విశ్వతోముఖః ॥ 4 ॥

హృషీకేశోఽప్రమేయాత్మా వరాహో ధరణీధరః ।
వామనో వేదవక్తా చ వాసుదేవః సనాతనః ॥ 5 ॥

రామో విరామో విరజో రావణారీ రమాపతిః ।
వైకుంఠవాసీ వసుమాన్ ధనదో ధరణీధరః ॥ 6 ॥

ధర్మేశో ధరణీనాథో ధ్యేయో ధర్మభృతాంవరః ।
సహస్రశీర్షా పురుషః సహస్రాక్షః సహస్రపాత్ ॥ 7 ॥

సర్వగః సర్వవిత్సర్వః శరణ్యః సాధువల్లభః । [సర్వదః]
కౌసల్యానందనః శ్రీమాన్ రాక్షసఃకులనాశకః ॥ 8 ॥

జగత్కర్తా జగద్ధర్తా జగజ్జేతా జనార్తిహా ।
జానకీవల్లభో దేవో జయరూపో జలేశ్వరః ॥ 9 ॥

క్షీరాబ్ధివాసీ క్షీరాబ్ధితనయావల్లభస్తథా ।
శేషశాయీ పన్నగారివాహనో విష్టరశ్రవః ॥ 10 ॥

మాధవో మథురానాథో ముకుందో మోహనాశనః ।
దైత్యారిః పుండరీకాక్షో హ్యచ్యుతో మధుసూదనః ॥ 11 ॥

సోమసూర్యాగ్నినయనో నృసింహో భక్తవత్సలః ।
నిత్యో నిరామయశ్శుద్ధో వరదేవో జగత్ప్రభుః ॥ 12 ॥ [నరదేవో]

హయగ్రీవో జితరిపురుపేంద్రో రుక్మిణీపతిః ।
సర్వదేవమయః శ్రీశః సర్వాధారః సనాతనః ॥ 13 ॥

సౌమ్యః సౌమ్యప్రదః స్రష్టా విష్వక్సేనో జనార్దనః ।
యశోదాతనయో యోగీ యోగశాస్త్రపరాయణః ॥ 14 ॥

రుద్రాత్మకో రుద్రమూర్తిః రాఘవో మధుసూధనః । [రుద్రసూదనః]
ఇతి తే కథితం దివ్యం నామ్నామష్టోత్తరం శతమ్ ॥ 15 ॥

సర్వపాపహరం పుణ్యం దివ్యోరతులతేజసః ।
దుఃఖదారిద్ర్యదౌర్భాగ్యనాశనం సుఖవర్ధనమ్ ॥ 16 ॥

సర్వసంపత్కరం సౌమ్యం మహాపాతకనాశనమ్ ।
ప్రాతరుత్థాయ విపేంద్ర పఠేదేకాగ్రమానసః ॥ 17 ॥

తస్య నశ్యంతి విపదాం రాశయః సిద్ధిమాప్నుయాత్ ॥ 18 ॥

ఇతి శ్రీ విష్ణోః అష్టోత్తరశతనామ స్తోత్రమ్ ॥