Sacred Stotras & Deities

పార్వతీపంచకం

పార్వతీపంచకం.

Telugu

Read Stotra

పార్వతీపంచకం

శ్రీగణేశాయ నమః .

వినోదమోదమోదితా దయోదయోజ్జ్వలాంతరా

నిశుంభశుంభదంభదారణే సుదారుణాఽరుణా .

అఖండగండదండముండమండలీవిమండితా

ప్రచండచండరశ్మిరశ్మిరాశిశోభితా శివా .. 1..

అమందనందినందినీ ధరాధరేంద్రనందినీ

ప్రతీర్ణశీర్ణతారిణీ సదార్యకార్యకారిణీ .

తదంధకాంతకాంతకప్రియేశకాంతకాంతకా

మురారికామచారికామమారిధారిణీ శివా .. 2..

అశేషవేషశూన్యదేశభర్తృకేశశోభితా

గణేశదేవతేశశేషనిర్నిమేషవీక్షితా .

జితస్వశింజితాఽలికుంజపుంజమంజుగుంజితా

సమస్తమస్తకస్థితా నిరస్తకామకస్తవా .. 3..

ససంభ్రమం భ్రమం భ్రమం భ్రమంతి మూఢమానవా

ముధాఽబుధాః సుధాం విహాయ ధావమానమానసాః .

అధీనదీనహీనవారిహీనమీనజీవనా

దదాతు శంప్రదాఽనిశం వశంవదార్థమాశిషం .. 4..

విలోలలోచనాంచితోచితైశ్చితా సదా గుణైర్-

అపాస్యదాస్యమేవమాస్యహాస్యలాస్యకారిణీ ..

నిరాశ్రయాఽఽశ్రయాశ్రయేశ్వరీ సదా వరీయసీ

కరోతు శం శివాఽనిశం హి శంకరాంకశోభినీ .. 5..

ఇతి పార్వతీపంచకం సమాప్తం ..

పార్వతీతపశ్చర్యావర్ణనం

పార్వతీతపశ్చర్యావర్ణనం.

Telugu

Read Stotra

పార్వతీతపశ్చర్యావర్ణనం

(శివరహస్యాంతర్గతే ఈశాఖ్యే)

హిమవాన్ ఉవాచ .

హితం వదామి తే పుత్రి శ్రుణు మత్తస్తపః స్థితా .

మమైవ మౌలివివరే కేదారార్చనతత్పరా .. 19..

నానామునిజనాకీర్ణే నానాసిద్ధవిరాజితే .

నానాపక్షిరుతాపారమృగసంఘనిషేవితే .. 20..

సరోవరైకబహులే ప్రఫుల్లకమలోత్పలే .

అత్ర కేదారనాథస్య పూజనాన్ముక్తిభాఙ్నరః .. 21..

బహవోఽత్ర సమభ్యర్చ్య సురాశ్చ మునయః పురా .

లేభిరే వాంఛితాన్ కామాన్ తపసా తోష్య శంకరం .. 22..

సుబ్రహ్మణ్య ఉవాచ .

ఇత్యుక్తాం తాం సమాలింగ్య మేనయా హిమభూధరః .

పార్వతీయైర్గణైర్యుక్తో నానావర్ణైర్దురాసదైః .. 23..

మేనయా చ సమైనాకో గిరికన్యాయుతో యయౌ .

నానాదుందుభినిర్ఘోషైః పటహానకగోముఖైః .. 24..

పుష్పలాజోరువర్షేణ హర్షేణ మహతా యుతః .

దేవ్యా విమానమారుహ్య పుష్పదామావలంబినా .. 25..

పతాకాచామర భ్రాజిదివ్యచ్ఛత్రేణ భాస్వతా .

నీరాజయంతి తాం దేవీం గిరిసంస్థా వరాంగనాః .. 26..

తపస్యభిప్రయాతాం తాం దేవా దేవీం దివి స్థితాః .

సుమైర్వవర్షుశ్చ తదా గంధర్వాప్సరసో జగుః .. 27..

ననృతుర్మునయస్తత్ర జేపుః శాంతిం తదాఖిలాః .

విమానాదవరుహ్యాశు కేదారశిఖరే స్వకే .. 28..

ఉత్ఫుల్లసహకారౌఘే తమాలాలివిరాజితే .

తాలసంఘర్షిమరుతా రాజితే పానసైర్వనైః .. 29..

ఫుల్లమందారవిపినే కర్ణికారాలిశోభితే .

కదంబకేతకీగుచ్ఛసంఛన్నాలివిరాజితే .. 30..

దాడిమీనిబిడే వృక్షైః ఫలపుష్పావనామితైః .

చంపకోద్దామగంధాఢ్యే కృతమాలవిరాజితే .. 31..

అశోకదేవదారూణాం తరుభిర్బిల్వసంయుతే .

అశోకైః శోకహారైశ్చ మాతులుంగైః ఫలానతైః .. 32..

కరజైః కకుభైశ్చైవ కపిత్థైర్బదరైర్యుతే .

నారంగరంజితే తత్ర పక్షిసంఘవిరాజితే .. 33..

నదన్నత్యూహకారండచక్రవాకోపకూజితే .

భ్రమత్సారంగమాతంగపతంగవ్రజషట్పదే .. 34..

మునీనామాశ్రమయుతే శ్రమహారిణి వారిణి .

ఉత్ఫుల్లకరవీరాలికదలీదలలోలితే .. 35..

నారికేలద్రుమైశ్చైవ నానాతరువిరాజితే .

శిఖండితాండవకృతకేకాలాపవినాదితే .. 36..

పుంస్కోకిలోరువిరుతే హంసక్రేంకారఘోషితే .

సముత్ఫుల్లాబ్జినీం గాహ్య పరిధాయ దుకూలకం .. 37..

గిరిణా సమనుజ్ఞాతా తపసే ధృతనిశ్చయా .

ధృతత్రిపుండ్రరుద్రాక్షా కంకణాంగదవర్జితా .. 38..

సూక్ష్మపర్ణైకవసనా అపర్ణా తృణసంస్తరా .

కృతధమ్మిల్లజటిలా సఖీభిః సా మనోరమా .. 39..

విముక్తముక్తామాలా సాఽభూషయత్తత్తపోవనం .

స్వవక్త్రజాతసౌందర్యం పద్మేషు నిదధే శివా .. 40..

స్వనేత్రనీలిమానం సా దదౌ నీలోత్పలే శివా .

స్వనాసాపుటసంశోభాం దదౌ చంపకకుడ్మలే .. 41..

స్వాధరస్య చ రాగం సా విద్రుమేషు న్యధాత్తదా .

రదనావలిసంశోభాం కుందేషు సమకల్పయత్ .. 42..

కపోలయోర్యత్సౌందర్యం ఆదర్శేషు దదౌ తదా .

కంఠమండలశోభాం చ శంఖేషు పరితన్వతీ .. 43..

మాతులుంగేషు కుచయోస్తుంగశోభాం న్యధాచ్చ సా .

జఘనస్థలశోభాం చ కుంభిమస్తే దదౌ శివా .. 44..

స్వోరుశోభాం చ రంభాయాం నిదధే హిమశైలజా .

ప్రపదస్య చ సౌందర్యం కమఠేషు దదౌ శివా .. 45..

కటిభాగస్థసౌందర్యం సిహ్మేషు నిదధే తదా .

నఖానాం చ రుచిం దేవీ సామిచంద్రే దదౌ శివా .. 46..

భూశయ్యా సాఽభవద్బాలా వర్షం పవనభోజనా .

వర్షం పర్ణఫలాహారా నిరాహారా చ హాయనం .. 47..

హేమంతే జలమధ్యస్థా వసంతే స్థండిలేశయా .

గ్రీష్మే పంచాగ్నినిరతా వర్షాస్వభ్రావకాశగా .. 48..

రుద్రమావర్తయంతీ సా పంచాక్షరపరాయణా .

తపస్యంతీం తథా దేవీం ముదా తత్ర మహర్షయః .. 49..

సమవేతాః సదారాస్తే విస్మయంతశ్చ సంస్థితాః .

నిత్యం సైకతలింగే సా పూజయామాస శంకరం .. 50..

తత్రత్యవృక్షాశ్చ మృగాః పక్షిణో రక్షయంతి తాం .

కరిణః పుష్కరాసారైస్తస్యా అంగమశీతయన్ .. 51..

శిఖండినః స్వపింఛాగ్రైర్గీష్మార్తాం తామవీజయన్ .

చమరాః పుచ్ఛగుచ్ఛైస్తాం ధున్వంతో దంశవారకాః .. 52..

కోకిలా రాగసల్లాసైస్స్తువంత ఇవ సంస్థితాః .

శాఖినః స్వస్వశాఖాభిః ఛాదయంత్యాతపార్దితాం .. 53..

గిరిరాడపి తాం దేవీం విలోక్యాయాతి యాతి చ .

సఖ్యోఽభవన్ తదా తస్యా మునిపత్న్యః కుమారికాః .. 54..

సుపుష్పాపచయైస్తత్ర కందమూలఫలాదిభిః .

శీతపానీయ దానేనాప్యసేవంత మహేశ్వరీం .. 55..

కేదారేశ్వరపూజాయాం నిరతా ద్వాదశాబ్దకం .

పంచామృతాఽఽసేచనేన గంధపుష్పైర్మనోహరైః .. 56..

ధూపర్దీపైశ్చ నైవేద్యైః ప్రణామప్రక్రమాదిభిః .

పూజయామాస సా దేవీ గిరిరాజసుమౌలిగా .. 57..

తేన సంప్రేషితేనైవ సంభారేణ వరా శివా .

సంపూజయేత్స్తువంత్యేవం స్తోత్రేణ పరమేశ్వరం .. 58..

భాద్రశుక్ల తృతీయాయాం సిక్తాయాం మహేశ్వరం .

సమర్చయంతీ రాత్రౌ సా బిల్వపత్రైర్మహేశ్వరం .. 59..

సాఽకరోజ్జాగరం దేవీ కేదారేశస్తవే రతా .

విరతా సర్వభోగేభ్యః శర్వవి(సం)న్యస్తమానసా .. 60..

.. ఇతి శివరహస్యాంతర్గతే మహాదేవీతపశ్చర్యావర్ణనం సంపూర్ణం ..

- .. శ్రీశివరహస్యం . ఈశాఖ్యః ద్వాదశమాంశః . అధ్యాయః 10 దేవీతపశ్చర్యా . 19-60 ..

శ్రీకనకధారాస్తోత్రం

శ్రీకనకధారాస్తోత్రం.

Telugu

Read Stotra

శ్రీకనకధారాస్తోత్రం

వందే వందారుమందారమిందిరానందకందలం .

అమందానందసందోహబంధురం సింధురాననం ..

అంగం హరేః పులకభూషణమాశ్రయంతీ

భృంగాంగనేవ ముకులాభరణం తమాలం .

అంగీకృతాఖిలవిభూతిరపాంగలీలా

మాంగల్యదాఽస్తు మమ మంగలదేవతాయాః .. 1..

ముగ్ధా ముహుర్విదధతీ వదనే మురారేః

ప్రేమత్రపాప్రణిహితాని గతాగతాని .

మాలా దృశోర్మధుకరీవ మహోత్పలే యా

సా మే శ్రియం దిశతు సాగరసంభవాయాః .. 2..

విశ్వామరేంద్రపదవిభ్రమదానదక్షం

ఆనందహేతురధికం మురవిద్విషోఽపి .

ఈషన్నిషీదతు మయి క్షణమీక్షణార్ధం

ఇందీవరోదరసహోదరమిందిరాయాః .. 3..

ఆమీలితాక్షమధిగమ్య ముదా ముకుందం

ఆనందకందమనిమేషమనంగతంత్రం .

ఆకేకరస్థితకనీనికపక్ష్మనేత్రం

భూత్యై భవేన్మమ భుజంగశయాంగనాయాః .. 4..

బాహ్వంతరే మధుజితః శ్రితకౌస్తుభే యా

హారావలీవ హరినీలమయీ విభాతి .

కామప్రదా భగవతోఽపి కటాక్షమాలా

కల్యాణమావహతు మే కమలాలయాయాః .. 5..

కాలాంబుదాలిలలితోరసి కైటభారేః

ధారాధరే స్ఫురతి యా తడిదంగనేవ .

మాతుస్సమస్తజగతాం మహనీయమూర్తిః

భద్రాణి మే దిశతు భార్గవనందనాయాః .. 6..

ప్రాప్తం పదం ప్రథమతః ఖలు యత్ప్రభావాత్

మాంగల్యభాజి మధుమాథిని మన్మథేన .

మయ్యాపతేత్తదిహ మంథరమీక్షణార్ధం

మందాలసం చ మకరాలయకన్యకాయాః .. 7..

దద్యాద్దయానుపవనో ద్రవిణాంబుధారాం

అస్మిన్నకించనవిహంగశిశౌ విషణ్ణే .

దుష్కర్మఘర్మమపనీయ చిరాయ దూరం

నారాయణప్రణయినీనయనాంబువాహః .. 8..

ఇష్టావిశిష్టమతయోఽపి యయా దయార్ద్ర-

దృష్ట్యా త్రివిష్టపపదం సులభం లభంతే .

దృష్టిః ప్రహృష్టకమలోదరదీప్తిరిష్టాం

పుష్టిం కృషీష్ట మమ పుష్కరవిష్టరాయాః .. 9..

గీర్దేవతేతి గరుడధ్వజసుందరీతి (గరుడధ్వజభామినీతి)

శాకంభరీతి శశిశేఖరవల్లభేతి .

సృష్టిస్థితిప్రలయకేలిషు సంస్థితాయై

తస్యై నమస్త్రిభువనైకగురోస్తరుణ్యై .. 10..

శ్రుత్యై నమోఽస్తు శుభకర్మఫలప్రసూత్యై

రత్యై నమోఽస్తు రమణీయగుణార్ణవాయై .

శక్త్యై నమోఽస్తు శతపత్రనికేతనాయై

పుష్ట్యై నమోఽస్తు పురుషోత్తమవల్లభాయై .. 11..

నమోఽస్తు నాలీకనిభాననాయై

నమోఽస్తు దుగ్ధోదధిజన్మభూమ్యై .

నమోఽస్తు సోమామృతసోదరాయై

నమోఽస్తు నారాయణవల్లభాయై .. 12..

సంపత్కరాణి సకలేంద్రియనందనాని

సామ్రాజ్యదానవిభవాని సరోరుహాక్షి . (సరోరుహాణి)

త్వద్వందనాని దురితాహరణోద్యతాని (దురితోత్తరణోద్యతాని, దురితోద్ధరణోద్యతాని)

మామేవ మాతరనిశం కలయంతు మాన్యే .. 13..

యత్కటాక్షసముపాసనావిధిః

సేవకస్య సకలార్థసంపదః .

సంతనోతి వచనాంగమానసైః

త్వాం మురారిహృదయేశ్వరీం భజే .. 14..

సరసిజనిలయే సరోజహస్తే

ధవలతమాంశుకగంధమాల్యశోభే .

భగవతి హరివల్లభే మనోజ్ఞే

త్రిభువనభూతికరి ప్రసీద మహ్యం .. 15..

దిగ్ హస్తిభిః కనకకుంభముఖావసృష్ట-

స్వర్వాహినీవిమలచారుజలప్లుతాంగీం .

ప్రాతర్నమామి జగతాం జననీమశేష-

లోకాధినాథగృహిణీమమృతాబ్ధిపుత్రీం .. 16..

కమలే కమలాక్షవల్లభే త్వం

కరుణాపూరతరంగితైరపాంగైః .

అవలోకయ మామకించనానాం

ప్రథమం పాత్రమకృత్రిమం దయాయాః .. 17..

స్తువంతి యే స్తుతిభిరమీభిరన్వహం

త్రయీమయీం త్రిభువనమాతరం రమాం .

గుణాధికా గురుతరభాగ్యభాగినో

భవంతి తే భువి బుధభావితాశయాః .. 18..

.. ఇతి శ్రీమచ్ఛంకరాచార్యకృత శ్రీ కనకధారాస్తోత్రం సంపూర్ణం ..

నమోఽస్తు హేమాంబుజపీఠికాయై

నమోఽస్తు భూమండలనాయికాయై .

నమోఽస్తు దేవాదిదయాపరాయై

నమోఽస్తు శార్ఙ్గాయుధవల్లభాయై .. 19..

నమోఽస్తు దేవ్యై భృగునందనాయై

నమోఽస్తు విష్ణోరురసి స్థితాయై .

నమోఽస్తు లక్ష్మ్యై కమలాలయాయై

నమోఽస్తు దామోదరవల్లభాయై .. 20..

నమోఽస్తు కాంత్యై కమలేక్షణాయై

నమోఽస్తు భూత్యై భువనప్రసూత్యై .

నమోఽస్తు దేవాదిభిరర్చితాయై

నమోఽస్తు నందాత్మజవల్లభాయై .. 21..

దేవి ప్రసీద జగదీశ్వరి లోకమాతః

కల్యాణగాత్రి కమలేక్షణజీవనాథే .

దారిద్ర్యభీతిహృదయం శరణాగతం మాం

ఆలోకయ ప్రతిదినం సదయైరపాంగైః .. 22..

అయం స్తవః స్వామినా శంకరభగవత్పాదేన బ్రహ్మవ్రతస్థేన కాలటినామ్ని

స్వగ్రామ ఏవాకించన్యపరిఖిన్నాయా ద్విజగృహిణ్యా నిర్ధనత్వమార్జనాయ

నిరమాయి . తేన స్తవేన ప్రీతా లక్ష్మీర్విప్రం విపులధనదానేనాప్రీణయదితి

శంకరవిజయతః సమాధిగమ్యతే, ``స మునిర్మురజిత్కుటుంబినీం

పదచిత్రైర్నవనీత కోమలైః ంఅధురైరూపతస్థివాం- స్తవైః''

ఇత్యాదినా .. ఏతే శ్రీమన్మాతురభ్యర్థనయా స్తవమేతమతనిషతేతి

కాలటిగ్రామనికటవర్తినాం విదుషాం మతం . తదారభ్య కర్ణాకర్ణికయా

తథానుశ్రుతం .

శ్రీకనకదుర్గాఽఽనందలహరీ

శ్రీకనకదుర్గాఽఽనందలహరీ.

Telugu

Read Stotra

శ్రీకనకదుర్గాఽఽనందలహరీ

వందే గురుపదద్వంద్వమవాఙ్మానసగోచరం .

రక్తశుక్లప్రభామిశ్రమతర్క్యం త్రైపురం మహః ..

అఖండమండలాకారం విశ్వం వ్యాప్య వ్యవస్థితం .

తత్పదం దర్శితం యేన తస్మై శ్రీగురవే నమః ..

శివే సేవాసక్తాశ్రితభరణకార్యైకచతురే

శిరోభిర్వేదానాం చిరవినుతకల్యాణచరితే .

స్మితజ్యోత్స్నాలీలారుచిరరుచిమచ్చంద్రవదనే

జగన్మాతర్మాతర్జయ కనకదుర్గే భగవతి .. 1..

నగాధీశట్కన్యే నలినదళసంకాశనయనే

సుగీతైర్గంధర్వైస్సురయువతిభిశ్చానుచరితే . var శ్లాఘ్యచరితే

అగణ్యైరామ్నాయైరపి గుణనికాయైర్విలసితే

జగన్మాతర్మాతర్జయ కనకదుర్గే భగవతి .. 2..

నిజశ్రేయస్కామైర్నిటలఘటితాం చ తత్కరపుటైః

స్తువద్భిస్సానందం శ్రుతిమధురవాచాం విరచనైః .

అసంఖ్యైర్బ్రహ్మాద్యైరమరసముదాయైః పరివృతే

దయా కర్తవ్యా తే మయి కనకదుర్గే భగవతి .. 3..

భవత్పాదన్యాసోచితకనకపీఠీపరిసరే

పతంతస్సాష్టాంగం ముదితహృదయా బ్రహ్మఋషయః .

న వాంఛంతి స్వర్గం న చ కమలసంభూతభవనం

న వా ముక్తేర్మార్గం నను కనకదుర్గే భగవతి .. 4..

శచీస్వాహాదేవీప్రముఖహరిదీశానరమణీ-

మణీహస్తన్యస్తైర్మణిఖచితపాత్రైరనుదినం .

ససంగీతం నీరాజితచరణపంకేరుహయుగే

కృపాపూరం మహ్యం దిశ కనకదుర్గే భగవతి .. 5..

ప్రవర్షత్యశ్రాంతం బహుగుణమభీష్టార్థనిచయం

స్వరూపధ్యాతౄణాం చికురనికురుంబం తవ శివే .

అపామేకం వర్షం వితరతి కదాచిజ్జలధరో

ద్వయోస్సామ్యం కిం స్యాన్నను కనకదుర్గే భగవతి .. 6..

కృశాంగం స్వారాతిం తుహినకరమావృత్య తరసా

స్థితం మన్యే ధన్యే తిమిరనికరం తే కచభరం .

సహాయం కృత్వాయం హరమనసి మోహాంధతమసం

వితేనే కామః శ్రీమతి కనకదుర్గే భగవతి .. 7..

తమో నామ్నా సమ్యగ్గళితపునరుద్వాంతరుచిర-

ప్రభాశేషం భానోరివ తరుణిమానం ధృతవతః .

త్వదీయే సీమంతే కృతపదమిదం కుంకుమరజో-

వసేదశ్రాంతం మే హృది కనకదుర్గే భగవతి .. 8..

త్రిలోకీ వైచిత్రీజనకఘనసౌందర్యసదనం

విరాజత్కస్తూరీతిలకమపి ఫాలే విజయతే .

యదాలోకవ్రీడాకుపిత ఇవ జూటే పశుపతే-

ర్విలీనో బాలేందుర్నను కనకదుర్గే భగవతి .. 9..

పరాభూతశ్చేశాళికనయనకీలావిలసనా-

ద్విసృజ్య ప్రాచీనం భువనవినుతం కార్ముకవరం .

హరం జేతుం త్వద్భ్రూచ్ఛలమపరబాణాసనయుగం

స్మరో ధత్తే సర్వేశ్వరి కనకదుర్గే భగవతి .. 10..

త్వదీయభ్రూవల్లీచ్ఛలమదనకోదండయుగళీ

సమీపే విభ్రాజత్తవ సువిపులం నేత్రయుగళం .

విజేతుం స్వారాతిం వికచనవనీలోత్పలశర-

ద్వయం తేనానీతం ఖలు కనకదుర్గే భగవతి .. 11..

దరిద్రం శ్రీమంతం జరఠమబలానాం ప్రియతమం

జడం సంఖ్యావంతం సమరచలితం శౌర్యకలితం .

మనుష్యం కుర్వంతోఽమరపరివృఢం నిత్యసదయాః

కటాక్షాస్తే కార్యా మయి కనకదుర్గే భగవతి .. 12..

పురారాతేర్బాణాః కుసుమశరతూణీరగళితా

నతానాం సంత్రాణే నిరవధిసుధావీచినిచయాః .

వియద్గంగాభంగా బహుదురితజాలావృతిమతాం

కటాక్షాస్తే కార్యా మయి కనకదుర్గే భగవతి .. 13..

దరిద్రాణాం కల్పద్రుమసుమమరందోదకఝరా

అవిద్యాధ్వాంతానామరుణకిరణానాం విహృతయః .

పురా పుణ్యశ్రేణీసులలితలతాచైత్రసమయాః

కటాక్షాస్తే కార్యా మయి కనకదుర్గే భగవతి .. 14..

గజంతో వాహంతః కనకమణినిర్మాణవిలసా

రథంతశ్ఛత్రంతో బలయుత భటంతః ప్రతిదినం .

స్వభక్తానాం గేహాంగణభువి చరంతో నిరుపమాః

కటాక్షాస్తే కార్యా మయి కనకదుర్గే భగవతి .. 15..

పురారాతేరంగం పులకనికురంబైః పరివృతం

మునివ్రాతైర్ధ్యాతం ముకుళయుతకల్పద్రుమనిభం .

శ్రయంతశ్చానందం విచలదలిపోతా ఇవ చిరం

కటాక్షాస్తే కార్యా మయి కనకదుర్గే భగవతి .. 16..

హరిబ్రహ్మేంద్రాద్యైః శ్రుతివిదితగీర్వాణనిచయై-

ర్వసిష్ఠవ్యాసాద్యైరపి చ పరమబ్రహ్మఋషిభిః .

సమస్తైరాశాస్యాస్సకలశుభదా యద్విహృతయః

కటాక్షాస్తే కార్యా మయి కనకదుర్గే భగవతి .. 17..

విరించిర్యద్యోగాద్విరచయతి లోకాన్ ప్రతిదినం

విధత్తే లక్ష్మీశో వివిధజగతాం రక్షణవిధిం .

లలాటాక్షో దక్షోఽభవదఖిలసంహారకరణే

కటాక్షాస్తే కార్యా మయి కనకదుర్గే భగవతి .. 18..

ఉరోభాగే శంభోర్వికచనవనీలోత్పలదళ-

స్రజం సంగృహ్ణంతో మృగమదరసం ఫాలఫలకే .

శిరోఽగ్రే గంగాయాం రవిదుహితృసందేహజనకాః

కటాక్షాస్తే కార్యా మయి కనకదుర్గే భగవతి .. 19..

మదీయశ్రీలీలాహరణపటుపాటచ్చరమితి

క్వతా హంతాగంతుం శ్రుతివిమలనీలోత్పలమివ .

తదభ్యర్ణం యాతాస్సహజనిజవైశాల్యకలితాః

కటాక్షాస్తే కార్యా మయి కనకదుర్గే భగవతి .. 20..

కళంకీ మాసాంతే వహతి కృశతాం నిత్యజడ ఇ-

త్యముం చంద్రం హిత్వా తవ వదనచంద్రాశ్రితమిదం .

స్థితం జీవం జీవద్వితయమితి మన్యే నయనయో-

ర్యుగం కామారాతేస్సతి కనకదుర్గే భగవతి .. 21..

ప్రసాదో మయ్యాస్తే మయి చ సహజం సౌరభమిదం

తులా మే మైతస్యేత్యవిరతవివాదాభిరతయోః .

నివృత్తా నేదానీమపి చ రిపుతా గ్లౌనళినయో-

స్త్వదాస్యం దృష్ట్వా శ్రీమతి కనకదుర్గే భగవతి .. 22..

మనోజాతాదర్శప్రతిమనిజలీలౌ తవ శివే

కపోలౌ భూయాస్తాం మమ సకలకల్యాణజనకౌ .

శ్రితశ్రీతాటంకద్వితయరుచయో యత్ర మిళితా-

స్సుధారుక్సూర్యాభా ఇవ కనకదుర్గే భగవతి .. 23..

త్రయీ స్తుత్యే నిత్యే తవ వదనపంకేరుహభవ-

త్సుగంధాయాతశ్రీప్రచలదళినీవారణధియా .

లసన్నాసాకారే వహసి సహసా చంపకతులాం

న తత్సౌందర్యార్థం నను కనకదుర్గే భగవతి .. 24..

వహత్వం కారుణ్యం వరకమలరాగాహ్వయమణి-

స్సుధాపూరం సారం సురుచిరమృదుత్వం యది వహేత్ .

తదా లబ్ధుం యోగ్యో భవతి భవదీయాధరతులాం

జగద్రక్షాదీక్షావతి కనకదుర్గే భగవతి .. 25..

లసన్నాసాభూషాగ్రగపృథులముక్తామణియుతం

నితాంతారుణ్యంతత్తవ దశనవాసో విజయతే .

సుధాసింధోర్మధ్యే నిపతిత సుధాబిందుసహిత-

ప్రవాళశ్రీచోరం నను కనకదుర్గే భగవతి .. 26..

అయోగ్యా ఇత్యార్యే తవ దశనసామ్యాయ కవిభి-

ర్విముక్తా ముక్తా ఇత్యధికవిదితా మౌక్తికగణాః .

దశామల్పాంగత్వా తదనుముఖతాంబూలసహితా

గతాస్తత్సాహిత్యం ఖలు కనకదుర్గే భగవతి .. 27..

జితోఽహం పార్వత్యా మృదులతరవాణీవిలసనైః

కథం దృప్యస్యంబాధరసమతయా బింబ కథయ .

ఇతి క్రోధాచ్చంచ్వా దళితవదనే రక్తిమయుతః

శుకోఽయం విజ్ఞానీ ఖలు కనకదుర్గే భగవతి .. 28..

ఫలం బింబస్యేదం భవతి భవదీయాధరతులా

కృతాళం తన్మాద్యం వహతి మతిరస్యేతి విదితా .

న చేత్తస్మిన్ భుక్తే సుమతి కవితానామపి నృణాం

కథం స్యాత్తన్మాద్యం భువి కనకదుర్గే భగవతి .. 29..

అతుల్యం తే కంఠం హరతరుణి దృష్ట్వా సుకవయః

ప్రభాషంతే శంఖం పరిహసనపాత్రం భవతి తత్ .

స్వరూపధ్యాతౄణాం స భవతి నిధిశ్శంఖ ఇతిచే-

దసందేహం స్థానే ఖలు కనకదుర్గే భగవతి .. 30..

ఆకంఠం తే కంఠస్థితకనకసూత్రం విజయతే

హరో యత్సామర్థ్యాదమృతమివ పీత్వాపి గరళం .

సమాఖ్యాం విఖ్యాతాం సమలభత మృత్యుంజయ ఇతి

త్రయీవేద్యక్రీడావతి కనకదుర్గే భగవతి .. 31..

చిరం ధ్యాత్వా ధ్యాత్వా సకలవిబుధాభీష్టనిచయం

తతస్త్వల్లావణ్యామృతజలధిసంప్రాప్తజననే .

భుజాకారేణైకే భువనవినుతే కల్పకలతే

శ్రియై మే భూయాస్తాం నను కనకదుర్గే భగవతి .. 32..

విరాజత్కేయూరద్వయమణివిభాభానుకిరణై-

ర్నితాంతవ్యాకోశీకృతమదనజిన్నేత్రకమలౌ .

విభోః కంఠాశ్లేషాద్విపులపులకాంకూరజనకౌ

భుజౌ మే త్రాతారౌ నను కనకదుర్గే భగవతి .. 33..

సుపర్వారామాంతఃస్ఫురితసహకారద్రుమలతా-

సమగ్రశ్రీజాగ్రత్కిసలయసగర్వోద్యమహరౌ .

కరౌ తే భూయాస్తాం మమ శుభకరౌ కాంతినికరా-

కరౌ నిశ్శంకం శాంకరి కనకదుర్గే భగవతి .. 34..

ప్రశస్తౌ త్రైలోక్యే బహుళదనుజత్రాసవిచల-

న్మరున్మస్తన్యస్తౌ జనని తవ హస్తౌ హృది భజే .

స్మరో యత్సంకాశా ఇతి కిసలయానేవ ధృతవాన్

త్రిలోకీ జేతాఽఽసీత్ఖలు కనకదుర్గే భగవతి .. 35..

పురారాతేః పాణిగ్రహణసమయే మౌక్తికచయాన్

విధాతుం తచ్ఛీర్షే జనకవచనాదున్నమితయోః .

యయోరూపం దృష్ట్వాఽభవదుదితలజ్జా సురనదీ

కదార్తిత్రాతారౌ మమ కనకదుర్గే భగవతి .. 36..

స్ఫురంతో నిశ్శంకం పురహరనిరాతంకవిజయ-

క్రియాయాత్రోద్యుక్తస్మరబిరుదపాఠా ఇవ భృశం .

ఝణత్కారారావాః కనకవలయానాం తవ శివే

వితన్వంతు శ్రేయో మమ కనకదుర్గే భగవతి .. 37..

కుచౌ తే రూపశ్రీవిజితలకుచౌ మే శుభకరౌ

భవేతాం వ్యాకీర్ణౌ ప్రకటతరముక్తామణిరుచౌ .

విరించాద్యా దేవా యదుదితసుధాపాతురనిశం

సునమ్రాస్సేనాన్యో నను కనకదుర్గే భగవతి .. 38..

అతుల్యం తే మధ్యం వదతి హరిమధ్యేన సదృశం

జగత్తన్నో యుక్తం జనని ఖలు తద్రూపకలనే .

కృతాశః పంచాస్యో భవతి తవ వాహః ప్రతిదినం

జగత్సర్గక్రీడావతి కనకదుర్గే భగవతి .. 39..

అసౌ పున్నాగస్య ప్రసవమృదుశాఖాశ్చలగతం

తపఃకృత్వా లేభే జనని తవ నాభేః సదృశతాం .

ప్రమత్తః పున్నాగప్రసవ ఇతరస్తావక గతే-

స్తులామాప్తుం వాంఛత్యపి కనకదుర్గే భగవతి .. 40..

త్రిలోకీవాసాంచద్యువతిజనతాదుర్గమభవ-

న్నితంబశ్రీచౌర్యం కృతవదితి సంచిత్య పులినం .

సరో బాహ్యంచక్రే జనని భవదీయస్మరణతో

ఝరేవాధీరైశా జనని కనకదుర్గే భగవతి .. 41..

జితోఽహం పార్వత్యా మృదుతరగతీనాం విలసనైః

తదూర్వోస్సౌందర్యం సహజమధిగంతుం జడతయా .

కృతారంభా రంభా ఇతి విదళితాఽఽసాం వనమయం

కరీ సామర్షః శ్రీకరి కనకదుర్గే భగవతి .. 42..

ప్రవిష్టా తే నాభీబిలమసితరోమావళిరియం

కటీచంచత్కాంచీగుణవిహితసౌత్రామణమణేః .

రుచాం రేఖేవాస్తే రుచిరతరమూర్ధ్వాయనగతా

శ్రితశ్రేణీసంపత్కరి కనకదుర్గే భగవతి .. 43..

అనిర్వాచ్యం జంఘారుచిరరుచిసౌందర్యవిభవం

కథం ప్రాప్తుం యోగ్యస్తవ కలమగర్భో గిరిసుతే .

తదీయం సౌభాగ్యం కణిశజననైకావధి సుధీ-

జనైశ్చింతాకార్యా నను కనకదుర్గే భగవతి .. 44..

సదా మే భూయాత్తే ప్రపదమమితాభీష్టసుఖదం

సురస్త్రీఫాలాగ్రచ్యుతమృగమదానాం సముదయం .

అశేషం నిర్ధౌతః ప్రణయకలహే యత్ర పురజి-

జ్జటా గంగానీరైర్నను కనకదుర్గే భగవతి .. 45..

మనోజ్ఞాకారం తే మధురనినదం నూపురయుగం

గ్రహీతుం విఖ్యాతాన్ గతివిలసనానామతిరయాన్ .

స్థితమ్మన్యే హంసద్వయమితి న చేద్ధంసకపదం

కథం ధత్తే నామ్నా నను కనకదుర్గే భగవతి .. 46..

త్వదీయం పాదాబ్జద్వయమచలకన్యే విజయతే

సురస్త్రీకస్తూరీతిలకనికరాత్యంతసురభి .

భ్రమంతో యత్రార్యాప్రకరహృదయేందిందిరగణా-

స్సదా మాద్యంతి శ్రీమతి కనకదుర్గే భగవతి .. 47..

అపర్ణే తే పాదావతనుతనులావణ్యసరసీ

సముద్భూతే పద్మే ఇతి సుకవిభిర్నిశ్చితమిదం .

న చేద్గీర్వాణస్త్రీసముదయలలాటభ్రమరకాః

కథం తత్రాసక్తా నను కనకదుర్గే భగవతి .. 48..

రమావాణీంద్రాణీముఖయువతిసీమంతపదవీ-

నవీనార్కచ్ఛాయాసదృశరుచి యత్కుంకుమరజః .

స్వకాంగాకారేణ స్థితమితి భవత్పాదకమల-

ద్వయే మన్యే శంభోస్సతి కనకదుర్గే భగవతి .. 49..

దవాగ్నిం నీహారం గరళమమృతం వార్ధిమవనీ-

స్థలం మృత్యుమ్మిత్రం రిపుమపి చ సేవాకరజనం .

విశంకం కుర్వంతో జనని తవ పాదాంబురుహయోః

ప్రణామాస్సంస్తుత్యా మమ కనకదుర్గే భగవతి .. 50..

జలప్రాయా విద్యా హృది సకలకామాః కరగతాః

మహాలక్ష్మీర్దాసీ మనుజపతివర్యాస్సహచరాః .

భవత్యశ్రాంతం తే పదకమలయోర్భక్తిసహితాం

నతింకుర్వాణానాం నను కనకదుర్గే భగవతి .. 51..

తవ శ్రీమత్పాదద్వితయగతమంజీరవిలస-

న్మణిచ్ఛాయాచ్ఛన్నాకృతిభవతియత్ఫాలఫలకం .

స తత్రైవాశేషావనివహనదీక్షాసముచితం

వహేత్పట్టం హైమం నను కనకదుర్గే భగవతి .. 52..

తనోతు క్షేమం త్వచ్చరణనఖచంద్రావళిరియం

భవత్ప్రాణేశస్య ప్రణయకలహారంభసమయే .

యదీయజ్యోత్స్నాభిర్భవతి నితరాం పూరితతను-

శ్శిరోఽగ్రే బాలేందుర్నను కనకదుర్గే భగవతి .. 53..

సమస్తాశాధీశప్రవరవనితాహస్తకమలై-

స్సుమైః కల్పద్రూణాం నిరతకృతపూజౌ నిరుపమౌ .

నతానామిష్టార్థప్రకరఘటనాపాటవయుతౌ

నమస్యామః పాదౌ తవ కనకదుర్గే భగవతి .. 54..

పురా బాల్యే శీతాచలపరిసరక్షోణిచరణే

యయోస్స్పర్శం లబ్ధ్వా ముదితమనసః కీటనిచయాన్ .

విలోక్య శ్లాఘంతే విబుధసముదాయాః ప్రతిదినం

నమామస్తౌ పాదౌ నను కనకదుర్గే భగవతి .. 55..

నరాణామజ్ఞానాం ప్రశమయితుమంతఃస్థతిమిరా-

ణ్యలక్ష్మీసంతాపం గమితమనుజాన్ శీతలయితుం .

సమర్థాన్నిర్దోషాంశ్చరణనఖచంద్రానభినవాన్

నమామస్సద్భక్త్యా తవ కనకదుర్గే భగవతి .. 56..

ముకుందబ్రహ్మేంద్రప్రముఖబహుబర్హిర్ముఖశిఖా-

విభూషావిభ్రాజన్మఘవమణిసందర్భరుచిభిః .

విశంకం సాకం త్వచ్చరణనఖచంద్రేషుఘటితం

కవీంద్రైః స్తోతవ్యం తవ కనకదుర్గే భగవతి .. 57..

నఖానాం ధావళ్యం నిజమరుణిమానంచ సహజం

నమద్గీర్వాణస్త్రీతిలకమృగనాభిశ్రియమపి .

వహంతౌ సత్త్వాదిత్రిగుణరుచిసారానివ సదా

నమస్యామః పాదౌ తవ కనకదుర్గే భగవతి .. 58..

మణిశ్రేణీభాస్వత్కనకమయమంజీరయుగళీ-

ఝణత్కారారావచ్ఛలమధురవాచాం విలసనైః .

అభీష్టార్థాన్ దాతుం వినతజనతాహ్వానచతురా-

వివ ఖ్యాతౌ పాదౌ తవ కనకదుర్గే భగవతి .. 59..

నమద్గీర్వాణస్త్రీతిలకమృగనాభీద్రవయుతం

నఖచ్ఛాయాయుక్తం జనని తవ పాదాంబు జయతి .

సమంచత్కాళిందీఝరసలిలసమ్మ్మిశ్రితవియ-

న్నదీవారీవ శ్రీకరి కనకదుర్గే భగవతి .. 60..

సురశ్రేణీపాణిద్వితయగతమాణిక్యకలశై-

ర్ధృతం హేమాంభోజప్రకరమకరందేన మిళితం .

సతాం వృందైర్వంద్యం చరణయుగసంక్షాళనజలం

పునాత్వస్మాన్నిత్యం తవ కనకదుర్గే భగవతి .. 61..

విరావన్మంజీరద్వయనిహితహీరోపలరుచి-

ప్రసాదే నిర్భేదం ప్రథితపరమబ్రహ్మఋషిభిః .

శిరోభాగైర్ధార్యం పదకమలనిర్ణేజనజలం

వసన్మే శీర్షాగ్రే తవ కనకదుర్గే భగవతి .. 62..

సమీపే మాణిక్యస్థగితపదపీఠస్య నమతాం

శిరస్సు త్వత్పాదస్నపనసలిలం యన్నిపతతి .

తదేవోచ్చస్థానస్థితికృదభిషేకాంబు భవతి

ప్రభావోఽయం వర్ణ్యస్తవ కనకదుర్గే భగవతి .. 63..

నృణాందీనానాం త్వచ్చరణకమలైకాశ్రయవతాం

మహాలక్ష్మీప్రాప్తిర్భవతి న హి చిత్రాస్పదమిదం .

సమాశ్రిత్యాంభోజం జడమపి చ రేఖాకృతిధరం

శ్రియో నిత్యం ధామాజని కనకదుర్గే భగవతి .. 64..

ఖగోత్తంసా హంసాస్తవ గతివిలాసేన విజితా-

స్సలజ్జాస్తత్తుల్యం గమనమధిగంతుం సకుతుకాః .

భజంతే స్రష్టారం రథవహన ఏవైకనిరతా

మనోజాతారాతేస్సతి కనకదుర్గే భగవతి .. 65..

జగన్మాతర్భవ్యాంగుళివివరమార్గేషు గళితం

చతుర్ధా తే పాదాంబుజసలిలమేతద్విజయతే .

ప్రదాతుం ధర్మార్థప్రముఖపురుషార్థద్వయయుగం

చతుర్మూర్త్యా విద్ధావివ కనకదుర్గే భగవతి .. 66..

అజోఽయం శ్రీశోఽయం సురపరివృఢోఽయం రవిరయం

శశాంకోఽయం కోఽయం సకలజలధీనాం పతిరయం .

ఇతి త్వాం సంద్రష్టుం సముపగతదేవాః పరిచరై-

ర్జనైర్విజ్ఞాప్యంతే ఖలు కనకదుర్గే భగవతి .. 67..

మహాపీఠాసీనాం మఘవముఖబర్హిర్ముఖసఖీ-

నికాయైస్సంసేవ్యాం కరతలచలచ్చామరయుతైః .

ప్రదోషే పశ్యంతీం పశుపతిమహాతాండవకలాం

భజే త్వాం శ్రీమాహేశ్వరి కనకదుర్గే భగవతి .. 68..

పరంజ్యోతిస్తజ్జ్ఞాస్సురతరులతాం దుర్గతజనా

మహాజ్వాలామగ్నేర్భువనభయదా రాక్షసగణాః .

లలాటాక్షస్సాక్షాదతనుజయలక్ష్మీమవిరతం

హృది ధ్యాయంతి త్వాం కనకదుర్గే భగవతి .. 69..

సముద్యద్బాలార్కాయుతశతసమానద్యుతిమతీం

శరద్రాకాచంద్రప్రతిమదరహాసాంచితముఖీం .

సఖీం కామారాతేశ్చకితహరిణీశాబనయనాం

సదాహం సేవే త్వాం హృది కనకదుర్గే భగవతి .. 70..

తపఃకృత్వా లేభే త్రిపురమథనస్త్వాం ప్రియసఖీం

తపస్యంతీ ప్రాప్తా త్వమపి గిరిశం ప్రాణదయితం .

తదేవం దాంపత్యం జయతి యువయోర్భీతధవయోః

కవిస్తుత్యం నిత్యం నను కనకదుర్గే భగవతి .. 71..

విభోర్జానాసి త్వం విపులమహిమానం పశుపతే-

స్స ఏవ జ్ఞాతా తే చరితజలరాశేరనవధేః .

న హి జ్ఞాతుందక్షో భవతి భవతోస్తత్వమితర-

స్త్రీలోకీసంధానేష్వపి కనకదుర్గే భగవతి .. 72..

న విష్ణుర్నబ్రహ్మా న చ సురపతిర్నాపి సవితా

న చంద్రో నోవాయుర్విలసతి హి కల్పాంతసమయే .

తదా నాట్యంకుర్వంస్తవ రమణ ఏకో విజయతే

త్వయా సాకం లోకేశ్వరి కనకదుర్గే భగవతి .. 73..

ధనుశ్చక్రే మేరుం గుణమురగరాజం శితశరం

రమాధీశంచాపి త్రిపురమథనేన త్రినయనః .

తదేతత్సామర్థ్యం సహజనిజశక్తేస్తవ శివే

జగద్రక్షాదీక్షావతి కనకదుర్గే భగవతి .. 74..

త్రికోణాంతర్బిందూపరివిలసనాత్యంతరసికాం

త్రిభిర్వేదైః స్తుత్యాం త్రిగుణమయమూర్తిత్రయయుతాం .

త్రిలోకైరారాధ్యాం త్రినయనమనఃప్రేమజననీం

త్రికాలం సేవే త్వాం హృది కనకదుర్గే భగవతి .. 75..

మనో ధ్యాతుం నాలం జనని తవ మూర్తిం నిరుపమాం

వచో వక్తుం శక్యం న భవతి హి తే చిత్రచరితం .

తనుస్త్వత్సేవాయాం భవతి వివశా దీనసమయే

కథం వాహం రక్ష్యస్తవ కనకదుర్గే భగవతి .. 76..

వియోగం తే నూనం క్షణమసహమానః పశుపతి-

ర్దదౌ తే దేహార్ధం తరుణసుమబాణాయుతసమం .

అనేన జ్ఞాతవ్యస్తవ జనని సౌందర్యమహిమా

త్రిలోకీ స్తోతవ్యః ఖలు కనకదుర్గే భగవతి .. 77..

కృతా యాగా యేన శ్రుతిషు విదితాః పూర్వజననే

ధనం దత్తం యేన ద్విజకులవరేభ్యో బహువిధం .

తపస్తప్తం యేనాస్ఖలితమతినా తస్య ఘటతే

భవద్భక్తిశ్శంభోస్సతి కనకదుర్గే భగవతి .. 78..

భవన్మూర్తిధ్యానప్రవణమమలంచాపి హృదయం

భవన్నామశ్రేణీపఠననిపుణాం చాపి రసనాం .

భవత్సేవాదార్ఢ్యప్రథితమపి కాయం వితర మే

భవానందశ్రేయస్కరి కనకదుర్గే భగవతి .. 79..

ప్రభాషంతే వేదాశ్చకితచకితం తావకగుణాన్

న పారస్య ద్రష్టా తవ మహిమవార్ధేర్విధిరపి .

భవత్తత్వం జ్ఞాతుం ప్రకృతిచపలానామపి నృణాం

కథం వా శక్తిస్స్యాన్నను కనకదుర్గే భగవతి .. 80..

నృపా ఏకచ్ఛత్రం సకలధరణీపాలనపరా-

స్సుధామాధుర్యశ్రీలలితకవితాకల్పనచణాః .

నిరాతంకం శాస్త్రాధ్యయనమనసాం నిత్యకవితా

త్వదీయా జ్ఞేయా శ్రీమతి కనకదుర్గే భగవతి .. 81..

కదంబానాం నాగాధికచతురసంచారిభసరీ

కదంబానాం మధ్యే ఖచరతరుణీకోటికలితే .

స్థితాం వీణాహస్తాం త్రిపురమథనానందజననీం

సదాహం సేవే త్వాం హృది కనకదుర్గే భగవతి .. 82..

గిరాం దేవీ భూత్వా విహరసి చతుర్వక్త్రవదనే

మహాలక్ష్మీరూపా మధుమథనవక్షస్థలగతా .

శివాకారేణ త్వం శివతనునివాసం కృతవతీ

కథం జ్ఞేయా మాయా తవ కనకదుర్గే భగవతి .. 83..

మహారాజ్యప్రాప్తావతిశయితకౌతూహలవతాం

సుధామాధుర్యోద్యత్సరసకవితా కౌతుకయుజాం .

కృతాశానాం శశ్వత్సుఖజనకగీర్వాణభజనే

త్వమేవైకా సేవ్యా నను కనకదుర్గే భగవతి .. 84..

ఫణీ ముక్తాహారో భవతి భసితం చందనరజో

గిరీంద్రః ప్రాసాదో గరళమమృతం చర్మ సుపటః .

శివే శంభోర్యద్యద్వికృతచరితం తత్తదఖిలం

శుభంజాతం యోగాత్తవ కనకదుర్గే భగవతి .. 85..

దరిద్రే వా క్షుద్రే గిరివరసుతే యత్ర మనుజే

సుధాపూరాధారస్తవ శుభకటాక్షో నిపతతి .

బహిర్ద్వారప్రాంతద్విరదమదగంధస్స భవతి

ప్రియే కామారాతేర్నను కనకదుర్గే భగవతి .. 86..

ప్రభాషంతే వేదాః ప్రకటయతి పౌరాణికవచః

ప్రశస్తం కుర్వంతి ప్రథితబహుశాస్త్రాణ్యవిరతం .

స్తువంతః ప్రత్యగ్రం సుకవినిచయాః కావ్యరచనై-

రనంతాం తే కీర్తిం నను కనకదుర్గే భగవతి .. 87..

అసూయేర్ష్యాదంభాద్యవగుణపరిత్యాగచతురా-

స్సదాచారాసక్తాస్సదయహృదయాస్సత్యవచనాః .

జితస్వాంతాశ్శాంతా విమలచరితా దాననిరతాః

కృపాపాత్రీభూతాస్తవ కనకదుర్గే భగవతి .. 88..

యదీయాంభస్నానాద్దురితచరితానాం సముదయా

మహాపుణ్యాయంతే మహిమవతి తస్యాశ్శుభకరే .

తటే కృష్ణానద్యా విహితమహితానందవసతే

కృపా కర్తవ్యా తే మయి కనకదుర్గే భగవతి .. 89..

యథా పుష్పశ్రేణీవిలసితకదంబద్రుమవనే

తనోర్భాగే నాగేశ్వరవలయినః శ్రీమతి యథా .

తథా భక్తౌఘానాం హృది కృతవిహారే గిరిసుతే

దయా కర్తవ్యా తే మయి కనకదుర్గే భగవతి .. 90..

సమారుహ్యాభంగం మృగపతితురంగం జనయుతం

గళాగ్రే ధూమ్రాక్షప్రముఖబలబర్హిర్ముఖరిపూన్ .

నిహత్య ప్రత్యక్షం జగదవనలీలాం కృతవతీ

ప్రసన్నా భూయాస్త్వం మయి కనకదుర్గే భగవతి .. 91..

పరాభూయ త్ర్యక్షం సవనకరణే యత్రసహితం

దురాత్మానం దక్షం పితరమపి సంత్యజ్య తరసా .

గృహే నీహారాద్రేర్నిజజననమంగీకృతవతీ

ప్రసన్నా భూయాస్త్వం మయి కనకదుర్గే భగవతి .. 92..

తపః కృత్వా యస్మిన్ సురపతిసుతోఽనన్యసులభం

భవాదస్త్రం లేభే ప్రబలరిపుసంహారకరణం .

కిరాతేఽస్మిన్ ప్రీత్యా సహవిహరణే కౌతుకవతీ

ప్రసన్నా భూయాస్త్వం మయి కనకదుర్గే భగవతి .. 93..

శరచ్చంద్రాలోకప్రతిమరుచిమందస్మితయుతే

సురశ్రీసంగీతశ్రవణకుతుకాలంకృతమతే .

కృపాపాత్రీభూతప్రణమదమరాభ్యర్చితపదే

ప్రసన్నా భూయాస్త్వం మయి కనకదుర్గే భగవతి .. 94..

కపాలస్రగ్ధారీ కఠినగజచర్మాంబరధరః

స్మరద్వేషీ శంభుర్బహుభవనభిక్షాటనపరః .

అవిజ్ఞాతోత్పత్తిర్జనని తవ పాణిగ్రహణతో

జగత్సేవ్యో జాతః ఖలు కనకదుర్గే భగవతి .. 95..

పదాభ్యాం ప్రత్యూషస్ఫుటవికచశోణాబ్జవిలసత్-

ప్రభాభ్యాం భక్తానామభయవరదాభ్యాం తవ శివే .

చరద్భ్యాం నీహారాచలపదశిలాభంగసరణౌ

నమః కుర్మః కామేశ్వరి కనకదుర్గే భగవతి .. 96..

మదీయే హృత్పద్మే నివసతు పదాంభోజయుగళం

జగద్వంద్యం రేఖాధ్వజకులిశవజ్రాంకితమిదం .

స్ఫురత్కాంతిజ్యోత్స్నా వితతమణిమంజీరమహితం

దయాఽఽధేయాఽమేయా మయి కనకదుర్గే భగవతి .. 97..

సదాఽహం సేవే త్వత్పదకమలపీఠీపరిసరే

స్తువన్ భక్తిశ్రద్ధాపరిచయపవిత్రీకృతధియా .

భవంతీం కల్యాణీం ప్రచురతరకల్యాణచరితాం

దయాఽఽధేయాఽమేయా మయి కనకదుర్గే భగవతి .. 98..

హరశ్శూలీ చైకః పితృవననివాసీ పశుపతి-

ర్దిశావాసో హాలాహలకబళనవ్యగ్రధృతిమాన్ .

గిరీశోఽభూదేవంవిధగుణచరిత్రోఽపి హి భవత్

సుసాంగత్యాత్ శ్లాఘ్యో నను కనకదుర్గే భగవతి .. 99..

సమస్తాశాధీశ ప్రముఖ సురవర్యైః ప్రణమితా-

మహర్నాథజ్వాలాపతిహరణపాలీ త్రినయనాం .

సదా ధ్యాయేఽహం త్వాం సకలవిబుధాభీష్టకలనే

రతాం తాం కల్యాణీం హృది కనకదుర్గే భగవతి .. 100..

సుసంతోషం యో వా జపతి నియమాదూహితశత-

జ్వలద్వృత్తైశ్శ్రావ్యాం నిశి కనకదుర్గాస్తుతిమిమాం .

మహాలక్ష్మీపాత్రం భవతి సదనం తస్య వదనం

గిరాం దేవీపాత్రం కులమపి విధేః కల్పశతకం .. 101..

స్తుతిం దుర్గాదేవ్యాస్సతతమఘసంహారకరణే

సుశక్తాం వా లోకే పఠతి సుధియా బుద్ధికుశలః .

శ్రియం మాతః తస్మై వితరసి సుతానాంచ జగతాం

పతిత్వం వాగ్మిత్వం బహు కనకదుర్గే భగవతి .. 102..

శతశ్లోకీబద్ధం నను కనకదుర్గాంకితపదం

గురూపన్యస్తం తద్భువి కనకదుర్గాస్తవమిదం .

నిబద్ధం మాణిక్యైః కనకశతమానం భవతి తే

యథా హృద్యం దేవి స్ఫుటపదవిభక్తం విజయతాం .. 103..

ఇతి శ్రీమత్పరమహంస పరివ్రాజకాచార్యవర్య శ్రీవిద్యాశంకరామార్య-

విరచితం శ్రీమత్కనకదుర్గాఽఽనందలహరీస్తోత్రం సంపూర్ణం .

శ్రీఅష్టలక్ష్మీమంత్రసిద్ధివిధానం

శ్రీఅష్టలక్ష్మీమంత్రసిద్ధివిధానం.

Telugu

Read Stotra

శ్రీఅష్టలక్ష్మీమంత్రసిద్ధివిధానం

ఆదౌ శ్రీరమానాథధ్యానం

శ్రీవత్సవక్షసం విష్ణుం చక్రశంఖసమన్వితం .

వామోరువిలసల్లక్ష్మ్యాఽఽలింగితం పీతవాససం ..

సుస్థిరం దక్షిణం పాదం వామపాదం తు కుంజితం .

దక్షిణం హస్తమభయం వామం చాలింగితశ్రియం ..

శిఖిపీతాంబరధరం హేమయజ్ఞోపవీతినం .

ఏవం ధ్యాయేద్రమానాథం పశ్చాత్పూజాం సమాచరేత్ ..

ఋషిః - ఛందః - దేవతా - వినియోగః

అస్య శ్రీఅష్టలక్ష్మీమహామంత్రస్య - దక్షప్రజాపతిః ఋషిః -

గాయత్రీ ఛందః - మహాలక్ష్మీర్దేవతా - శ్రీం బీజం - హ్రీం శక్తిః -

నమః కీలకం - శ్రీమహాలక్ష్మీప్రసాదేన అష్టైశ్వర్యప్రాప్తిద్వారా

మనోవాక్కాయసిద్ధ్యర్థే జపే వినియోగః ..

కరన్యాసః

శ్రీం హ్రీం శ్రీం కమలే శ్రీం హ్రీం శ్రీం అంగుష్టాభ్యాం నమః .

శ్రీం హ్రీం శ్రీం కమలాలయే శ్రీం హ్రీం శ్రీం తర్జనీభ్యాం నమ ..

శ్రీం హ్రీం శ్రీం ప్రసీద శ్రీం హ్రీం శ్రీం మధ్యమాభ్యాం నమః .

శ్రీం హ్రీం శ్రీం ప్రసీద శ్రీం హ్రీం శ్రీం అనామికాభ్యాం నమః .

శ్రీం హ్రీం శ్రీం మహాలక్ష్మ్యై శ్రీం హ్రీం శ్రీం కనిష్ఠికాభ్యాం నమః .

శ్రీం హ్రీం శ్రీం నమః శ్రీం హ్రీం శ్రీం కరతలకరపృష్ఠాభ్యాం నమః ..

హృదయాది న్యాసః

శ్రీం హ్రీం శ్రీం కమలే శ్రీం హ్రీం శ్రీం హృదయాయ నమః .

శ్రీం హ్రీం శ్రీం కమలాలయే శ్రీం హ్రీం శ్రీం శిరసే స్వాహా .

శ్రీం హ్రీం శ్రీం ప్రసీద శ్రీం హ్రీం శ్రీం శిఖాయై వషట్ .

శ్రీం హ్రీం శ్రీం ప్రసీద శ్రీం హ్రీం శ్రీం కవచాయ హుం .

శ్రీం హ్రీం శ్రీం మహాలక్ష్మ్యై శ్రీం హ్రీం శ్రీం నేత్రత్రయాయ వౌషట్ .

శ్రీం హ్రీం శ్రీం నమః శ్రీం హ్రీం శ్రీం అస్త్రాయ ఫట్ .

భూర్భువస్సువరోమితి దిగ్బంధః ..

ధ్యానం -

వందే లక్ష్మీం వరశశిమయీం శుద్ధజాంబూనదాభాం

తేజోరూపాం కనకవసనాం సర్వభూషోజ్జ్వలాంగీం .

బీజాపూరం కనకకలశం హేమపద్మే దధానాం

ఆద్యాం శక్తిం సకలజననీం విష్ణువామాంకసంస్థాం ..

పూజా