Sacred Stotras & Deities

జైమినిమునికృతం పార్వతీస్తోత్రం 5

జైమినిరువాచ .

నమః శివాయై జగదంబికాయై శివప్రియాయై శివవిగ్రహాయై .

సముద్బభూవాద్రిపతేః సుతా యా చతుష్కపర్దా యువతిః సుపేశాః .. 134..

హిరణ్యవర్ణాం మణినూపురాంఘ్రిం ప్రసన్నవక్త్రాం శుకపద్మహస్తాం .

విశాలనేత్రాం ప్రణమామి గౌరీం వచోవిదం వాచముదీరయంతీం .. 135..

నమామి మేనాతనయామమేయామిమాముమాం కాంతిమతీమమేయాం .

కరోతి యా భూతిసితౌ స్తనౌ ద్వౌ ప్రియం సఖాయం పరిషస్వజానా .. 136..

కాంతాముమాం కాంతనిభాంగకాంతిం భాంతాముపాత్తానతహర్యజేంద్రాం .

నతోఽస్మి యాస్తే గిరిశస్య పార్శ్వే విశ్వాని దేవీ భువనాని చష్టే .. 137..

వందే గౌరీం తుంగపీనస్తనీం తాం చంద్రాచూడాం క్లిష్టసర్వాంగరాగాం .

యైషా దుఃఖిప్రాణినామాత్మకాంతిం దేవీం దేవీం రాధసే చోదయంతీం .. 138..

ఏనాం వందే దీనరక్షావినోదాం మేనాకన్యాం మానదానందదాత్రీం .

యా విద్యానాం మంగలానాం చ వాచామేషా నేత్రీ రాధసః సూనృతానాం .. 139..

సంసారతాపోరుభయాపహంత్రీ భవాని భోజ్యాభరణైకభోగే .

ధియం వరాం దేహి శివే నిరర్గలాం యయాతి విశ్వా దురితా తరేమ .. 140..

శివే కథం త్వత్సమతా క్వ దీయతే జగత్కృతిః కేలిరయం శివః పతిః .

హరిస్తు దాసోఽనుచరీందిరా శచీ సరస్వతీ వా సుభగాదదిర్వసు .. 141..

ఇతి నారదపురాణే ఉత్తరభాగే త్రిసప్తతితమాధ్యాయాంతర్గతం

         జైమినిమునికృతం పార్వతీస్తోత్రం సమాప్తం .

బృహన్నారదీయపురాణ . ఉత్తరభాగ . అధ్యాయ -141..

తాపీస్తోత్రం

ఛాయా వివస్వద్దుహితా హితార్థా పురాతనీ త్వత్ర ధునీ కృతార్థా .

యయాఽఽస భూరన్యవిభూషితాపి తాపీసరిత్సాఽవతు మాం స్మృతాపి .. 1..

తపతీ పతిమాప్తుముద్గతా వరవింధ్యాద్రిపదాన్మహోన్నతా .

ప్రయయౌ నవయౌవనాంచితా జలధిం పశ్చిమకం హ్యవంచితా .. 2..

పునానాపి నానాజనానంహసోఽత్ర పదం రాతి యాతి ప్రశస్తం పరత్ర .

యదీయే ప్రతీరేఽత్ర పాపీ న తాపీ న కోపీయమస్మానవత్వత్ర తాపీ .. 3..

భుజంగప్రయాతోపమా యద్గతిర్యా మతిం నః పునానా దదానా గతిం యా .

వరం పశ్చిమాబ్ధి సుఖేనోపమేయే హతత్వద్య తాన్ పాప్మనః సంతి యే మే .. 4..

అవరజా వరజాతిసుపూజితా ద్యుమణిజా మణిజాతివిభూషితా .

సుతపతీ తపతీ పతితాన్నతావతీ సా యశసా పయసాన్వితా .. 5..

యా వారయత్యాశు యదింద్రవజ్రలేపోపమం పాతకమాప్లవేన .

ప్లవేన యజ్ఞేన తథా గతిర్న యథా నదీ రాతి సహాప్లవేన .. 6..

జగతి తపనశీలా యాహి తాపీ సుశీలా,

     చలతి భువి విశాలా ముక్తిపానీయశాలా .

పరిహృతజనకాలా ఖేలదుచ్చోర్మిమాలా,

     నిఖిలసుకృతపాలా పాతు నః సూర్యబాలా .. 7..

అయే తాపీహాపి ప్రశమితభయే తే సుఖమయే,

     సదా దత్తాత్రేయో నివసతి సతిప్రార్పితనయే .

న యే త్వాం సేవంతే త ఇహ జనిభాజోఽత్ర భజతే,

     గతిః సద్యో రాసీత్యత ఋషిగణస్త్వాం హి భజతే .. 8..

దత్తాత్రేయాదృతాం తాపీం పాపినిర్ముక్తిమష్టభిః .

పద్యైస్తుష్టావ సుకృతీ వాసుదేవసరస్వతీ .. 9..

ఇతి శ్రీవాసుదేవానందసరస్వతీవిరచితం తాపీస్తోత్రం సంపూర్ణం .

అంధకకృతం పార్వతీస్తోత్రం

అథాంధకో మహేశ్వరీం దదర్శ దేవపార్శ్వగాం .

పపాత దండవత్క్షితౌ ననామ పాదపద్మయోః ..

అంధకోవాచ .

నమామి దేవవల్లభామనాదిమద్రిజామిమాం .

యతః ప్రధానపూరుషౌ నిహంతి యాఽఖిలం జగత్ .. 1..

విభాతి యా శివాసనే శివేన సాకమవ్యయా

      హిరణ్మయేఽతినిర్మలే నమామి తాం హిమాద్రిజాం .

యదంతరాఖిలం జగజ్జగంతి యాంతి సంక్షయం

      నమామి యత్ర తాముమామశేషభేదవర్జితాం .. 2..

న జాయతే న హీయతే న వర్ద్ధతే చ తాముమాం

      నమామి యా గుణాతిగాం గిరీశపుత్రికామిమాం .

క్షమస్వ దేవి శైలజే కృతం మయా విమోహితం

      సురాసురైర్నమస్కృతం నమామి తే పదాంబుజం .. 3..

ఇత్థం భగవతీ దివీ భక్తినమ్రేణ పార్వతీ .

సంస్తుతా దైత్యపతినా పుత్రత్వే జగృహేఽన్ధకం .. 4..

ఇతి కూర్మపురాణే పూర్వభాగే షోడశాధ్యాయాంతర్గతం

అంధకకృతం పార్వతీస్తోత్రం సమాప్తం .

కూర్మపురాణే పూర్వభాగే 16/216-219

శ్రీపార్వతీస్తోత్రం

బాలార్కాయుతసత్ప్రభాం కరతలే లోలంబమాలాకులాం

      మాలా సందధతీం మనోహరతనుం మందస్మితోద్యన్ముఖీం .

మందం మందముపేయుషీం వరయితుం శంభుం జగన్మోహినీం

      వందే దేవమునీంద్రవందితపదామిష్టార్థదాం పార్వతీం .. 1..

హేమాభాం మతివాగతీతగుణశీలానల్పశిల్పాకృతిం

      ప్రేమారోహమనోహరాం కరలసత్కల్యాణదామాంచితాం .

శ్యామామీశ్వరముద్యతాం వరయితుం త్రైలోక్యసమ్మోహినీం

      కామాపాదనకల్పవల్లిమనిశం వందే పరాం దేవతాం .. 2..

కరధృతవరమాల్యా సర్వరక్తాంగభూషా

      నిఖిలనయనచేతోహారిరూపాగ్ర్యవేషా వేషా .

భవతు భవదభీష్టప్రాప్తయే శైలకన్యా

      పురుషయువతివశ్యాకృష్టినిత్యప్రగల్భా .. 3..

హేమాద్రౌ హేమపీఠే నతనిఖిలసురైరీడ్యమానాం విరాజ-

      త్పుష్పేష్విష్వాసపాశాంకుశకరకమలాం రక్తవేషాభిరక్తాం .

దిక్షూద్యద్భిశ్చతుర్భిర్మణిమయకలశైః పంచశక్త్యంచితైః స్వ-

      ర్వృక్షైః క్లృప్తాభిషేకాం భజత భగవతీం భూతిదామంత్యయామే .. 4..

చక్రం శంఖమసిం చ చర్మ సశరం చాపం గదాం శూలకం

      బిభ్రాణాం వరదాభయామృతఘటాన్ రత్నౌఘపాత్రం తథా .

భూషాభిర్మకుటాదిభిస్త్రినయనాం పీతాంబరామంబికాం

      ధ్యాయేచ్చంద్రకలాసితాం సురగణైరీడ్యాం జగన్మంగలాం .. 5..

శ్రీకైలాసే శుకాద్యైః శివకరవటమూలే నిషణ్ణో నిషేవ్యః

      కృత్వోరౌ వామపాదం కిసలయమృదులం దక్షిణే దక్షవైరీ .

బిభ్రాణో దోర్భిరక్షస్త్రజమమృతఘటం పుస్తకం జ్ఞానముద్రాం

      భూయాద్భుక్త్యై చ ముక్త్యై మమ రజతనిభో దక్షిణామూర్తిశన్భుః .. 6..

ఇతి శ్రీపార్వతీస్తోత్రం సంపూర్ణం .

పార్వతీస్తోత్రం

విబుధాధిపతేజినీశకాంతే వదనాభాజితయామినీశకాంతే .

నవకుందవిరాజమానదంతే నలినాభం ప్రణమామ్యహం పదం తే .. 1..

వికచాంబురుహాం విలాసచోరైరతిశీతైః ప్రవహద్దయాంబుపూరైః .

శశిశేఖరచిత్తనృత్తరంగైస్తరసాలోకయ దేవి మామపాంగైః .. 2..

అవనీధరనాయకస్య కన్యే కృపణం మాం పరిపాలయాతిధన్యే .

విధిమాధవవాసవాదిమాన్యే ద్రుతమున్మూలితభక్తలోకదైన్యే .. 3..

కుచనిందితశాతకుంభశైలే మణికాంచీవలయోల్లసద్దుకూలే .

పరిపాలయ మాం భవాని బాలే త్రిజగద్రక్షణజాగరూకలీలే .. 4..

స్వరుచా జితతప్తశాతకుంభే కచశోభాజితకాలమేఘడంభే .

పరిపాలయ మాం త్రసన్నిశుంభే మకుటోల్లాసిసుధామయూఖడింభే .. 5..

కుసుమాయుధజీవనాక్షికోణే పరితో మామవ పద్మరాగశోణే .

స్మరవైరివశీకృతప్రవీణే చరణాబ్జానతసత్క్రియాధురీణే .. 6..

గిరిజే గగనోపమావలగ్నే గిరితుంగస్తనగౌరవేణ భుగ్నే .

వస మే హృదయే తవాంగలగ్నే తవ సందర్శనమోదసింధుమగ్నే .. 7..

సకలోపనిషత్సరోజవాటీకలహంస్యాస్తవ మే కవిత్వధాటీ .

కృపయావిరభూదియం తు పేటీ వహతు త్వద్గుణరమ్యరత్నకోటీః .. 8..

.. ఇతి శ్రీపార్వతీస్తోత్రం సంపూర్ణం..

వీరకకృతా పార్వతీస్తుతిః

వీరక ఉవాచ .

నతసురాసురమౌలిమిలన్మణిప్రచయకాంతి కరాల నఖాంకితే .

నగసుతే! శరణాగతవత్సలే! తవ నతోఽస్మి నతార్తివినాశిని .. 1..

తపనమండలమండితకంధరే ! పృథుసువర్ణసువర్ణనగద్యుతే .

విషభుజంగనిషంగవిభూషితే ! గిరిసుతే ! భవతీమహమాశ్రయే .. 2..

జగతి కః ప్రణతాభిమతం దదౌ ఝటితి సిద్ధనుతే భవతీ యథా .

జగతి కాం చ న వాఙ్ఛతి శంకరో భువనధృత్తనయే ! భవతీం యథా .. 3..

విమలయోగ వినిర్మిత దుర్జయ స్వతను తుల్యమహేశ్వర మండలే .

విదలితాంధక బాంధవసంహతిః సురవరైః ప్రథమం త్వమభిష్టుతా .. 4..

సితసటాపటలోద్ధత కంధరా భరమహా మృగరాజ రథస్థితా .

విమలశక్తిముఖానలపింగలా యతభుజౌఘ విపిష్టమహాసురా .. 5..

నిగదితా భువనైరితి చండికా జనని ! శుంభ నిశుంభ నిషూదనీ .

ప్రణత చింతిత దానవ దానవ ప్రమథనైకరతిస్తరసా భువి .. 6..

వియతి వాయుపథే జ్వలనోజ్జ్వలేఽవనితలే తవ దేవి! చ యద్వపుః .

తదజితేఽప్రతిమే ప్రణమామ్యహం భువన భావిని! తే భవవల్లభే .. 7..

జలధయో లలితోద్ధత వీచయో హుతవహద్యుతయశ్చ చరాచరం .

ఫణసహస్రభృతశ్చ భుజంగమా స్త్వదభిధాస్యతి మయ్యభయంకరాః .. 8..

భగవతి! స్థిరభక్తజనాశ్రయే! ప్రతిగతో భవతీ చరణాశ్రయం .

కరణజాతమిహాస్తు మమాచలం నుతిలవాప్తిఫలాశయహేతుతః .. 9..

ప్రశమమేహి మమాత్మజ వత్సలే ! తవ నమోఽస్తు ! జగత్త్రయసంశ్రయే ! .

త్వయి మమాస్తు మతిః సతతం శివే శరణగోఽస్మి నతోఽస్మి నమోఽస్తు తే .. 10..

ఇతి మత్స్యపురాణాంతర్గతా వీరకకృతా పార్వతీస్తుతిః సమాప్తా .

పార్వతీస్తుతిః

బ్రహ్మాదయ ఊచుః -

త్వం మాతా జగతాం పితాపి చ హరః సర్వే ఇమే బాలకా-

     స్తస్మాత్త్వచ్ఛిశుభావతః సురగణే నాస్త్యేవ తే సంభ్రమః .

మాతస్త్వం శివసుందరి త్రిజగతాం లజ్జాస్వరూపా యత-

     స్తస్మాత్త్వం జయ దేవి రక్ష ధరణీం గౌరి ప్రసీదస్వ నః .. 1..

త్వమాత్మా త్వం బ్రహ్మ త్రిగుణరహితం విశ్వజనని

     స్వయం భూత్వా యోషిత్పురుషవిషయాహో జగతి చ .

కరోష్యేవం క్రీడాం స్వగుణవశతస్తే చ జననీం

     వదంతి త్వాం లోకాః స్మరహరవరస్వామిరమణీం .. 2..

త్వం స్వేచ్ఛావశతః కదా ప్రతిభవస్యంశేన శంభుః పుమా-

     న్స్త్రీరూపేణ శివే స్వయం విహరసి త్రైలోక్యసమ్మోహిని .

సైవ త్వం నిజలీలయా ప్రతిభవన్ కృష్ణః కదాచిత్పుమాన్

     శంభుం సంపరికల్ప్య చాత్మమహిషీం రాధాం రమస్యంబికే .. 3..

ప్రసీద మాతర్దేవేశి జగద్రక్షణకారిణి .

విరమ త్వమిదానీం తు ధరణీరక్షణాయ వై .. 4..

ఇతి శ్రీమహాభాగవతే మహాపురాణే బ్రహ్మాద్యైః కృతా పార్వతీస్తుతిః సంపూర్ణా .

హిందీ భావార్థ -

బ్రహ్మా ఆది దేవతాఓంనే కహా -మాతా ! శివసుందరీ! ఆప తీనోం లోకోంకీ

మాతా హైం ఔర శివజీ పితా హైం తథా యే సభీ దేవతాగణ ఆపకే

బాలక హైం . అపనేకో ఆపకా శిశు మాననేకే కారణ దేవతాఓం కో

ఆపసే కోఈ భీ భయ నహీం హై . దేవి! ఆపకీ జయ హో . గౌరి! ఆప

తీనోం లోకోం మే లజ్జారూపసే వ్యాప్త హైం, అతః పృథ్వీకీ రక్షా కరేం

ఔర హమలోగోంపర ప్రసన్న హోం .. 1..

విశ్వజననీ! ఆప సర్వాత్మా హైం ఔర ఆప తీనోం గుణోంసే రహిత

బ్రహ్మ హైం . అహో, అపనే గుణోంకే వశీభూత హోకర ఆప హీ స్త్రీ

తథా పురుష కా స్వరూప ధారణ కరకే సంసార మేం ఇస ప్రకారకీ

క్రీడా కరతీ హైం ఔర లోగ ఆప జగజ్జననీకో కామదేవకే వినాశక

పరమేశ్వర శివకీ రమణీ కహతే హైం .. 2..

తీనోం లోకోం కో సమ్మోహిత కరనేవాలీ శివే ! ఆప అపనీ ఇచ్ఛా కే

అనుసార అపనే అంశసే కభీ పురుషరూపమేం శివ బన జాతీ హైం ఔర

స్వయం స్త్రీరూపమేం విద్యమాన రహకర ఉనకే సాథ విహార కరతీ హైం .

అంబికే!  వే హీ ఆప అపనీ లీలాసే కభీ పురుషరూపమేం కృష్ణకా

రూప ధారణ కర లేతీ హైం ఔర ఉనమేం శివకీ పరిభావనా కర

స్వయం కృష్ణకీ పటరానీ రాధా బనకర ఉనకే సాథ రమణ కరతీ

హైం .. 3..

జగత్ కీ రక్షా కరనేవాలీ దేవేశ్వరి! మాతా! ప్రసన్న హోఇయే ఔర

పృథ్వీకీ రక్షాకే లియే అబ ఇస లీలావిలాససే విరత హో జాఇయే .. 4..

ఇస ప్రకార శ్రీమహాభాగవతమహాపురాణమేం బ్రహ్మాది దేవతాఓం ద్వారా

కీ గయీ పార్వతీస్తుతి సంపూర్ణ హుఈ .

కుమారవిరచితం పార్వతీస్తవః

ఉమా గౌరీ మహాకాలీ మహాగౌరీ శివా సతీ .

శర్వాణీ చండికా దుర్గా రుద్రాణీ గిరికన్యకా .. 1..

మృడానీ పార్వతీ మాయా మహామాయా మహేశ్వరీ .

అపర్ణా శాంభవీ భద్రా శుభా త్రిపురభైరవీ .. 2..

శ్రీః సర్వమంగలా లక్ష్మీః భవానీ దక్షకన్యకా .

ఆర్యా హైమవతీ చేతి స్మృత్వా జయమవాప్నుయాత్ .. 3..

ఏకైకమపి యన్నామ గౌర్యాస్తద్దుఃఖనాశకం .

జయదం ధనదం చైతత్ ఆయుర్వృద్ధికరం పరం .. 4.. (జయప్రదమిదం చైతత్)

తతః కుమార తాం గౌరీం స్మృత్వా యుద్ధాయ యాహి తే .

జయో భవత్యసందిగ్ధం తన్నామ జయదం యతః .. 5..

స్మృత్వాపి గౌరీం గిరిరాజకన్యాం ధన్యాం చ మాన్యాం చ కలంకశూన్యాం .

దుర్గామనన్యామపి భావయంతః సద్యో భవంత్యేవ హి భాగ్యవంతః .. 6..

స్మృత్వాపి యాం పాతకమాగరేభ్యో నిర్గత్య సంగత్య చ సౌఖ్యసంఘైః .

స్వర్గం సమేత్యాప్యపవర్గమేత్య తిష్ఠంతి భాగ్యేన నరాః శివాగ్రే .. 7..

యద్దృష్టిపాతేన జగత్సమస్తముత్పన్నమేతత్ పరిపాలితం చ .

కల్పావసానే ప్రలయం ప్రయాతి సా దేవతా మంగలదేవతా యా .. 8..

యత్పాదపద్మస్మరణం మునీనాం తపస్యయా కేవలమంబికా సా .

స్మృతా సదా సర్వ సుఖప్రదాత్రీ సైషా విధాత్రీ సుఖసాగరాణాం .. 9..

యామన్నపూర్ణాం ప్రవదంతి దేవాః స్తువంతి గంధర్వగణా మునీంద్రాః .

మర్త్యాశ్చ తత్పాదరజఃప్రసాదాత్ రమాదిభిః సా ఖలు పూజనీయా .. 10.. (రమాదయః)

యస్యాః కటాక్షప్రసరేణ ధన్యో దీనో దరిద్రః కృపణోఽపి ధన్యః .

మాన్యః సురాణాం ధనసాగరాణామధీశ్వరః స్యాదితి తాం భజామ్యాం .. 11..

యత్పాదపద్మాంబుజరేణులేశం దధార శౌరిర్ధృతకూర్మరూపః .

శేషః సహస్రేణ దధార మూర్ధ్నా సైపా భవానీ శుభరాజధానీ .. 12..

కులాచలైః మేరుసమానధైర్యైః అతిప్రయత్నేన విభుగ్నకాయైః .

యత్పాదపద్మాంబుజరేణుశైలో ధృతో ముదా సా గిరిజా సదాఽమ్బా .. 13..

దిగ్దంతిభిర్యత్పదపద్మరేణుః ధృతః స్వకుంభస్థలపంకిలోఽపి .

మదాంబుధారాపరివీతగాత్రైః తద్ధారణాయాసగతైః స్వతంత్రైః .. 14..

యత్పాదపద్మాంబురుహార్చనాయ రత్నాకరో నూతనరత్నజాలం .

సంపాదయత్యన్వహమాదరేణ సా కిం న గౌరీ తవ పూజనీయా .. 15..

.. ఇతి శివరహస్యాంతర్గతే కుమారవిరచితం పార్వతీస్తవః సంపూర్ణః ..

- .. శ్రీశివరహస్యం . హరాఖ్యః తృతీయాంశః . పూర్వార్ధం . అధ్యాయః 13. 29-43..

శ్రీపార్వతీసహస్రనామావలిః

ఓం శివాయై నమః . ఉమాయై . పరమాయై . శక్త్యై . అనంతాయై .

నిష్కలాయై . అమలాయై . శాంతాయై . మాహేశ్వర్యై . నిత్యాయై .

శాశ్వత్యై . పరమాక్షరాయై . అచింత్యాయై . కేవలాయై . అనంత్యాయై .

శివాత్మనే . పరమాత్మికాయై . అనాదయే . అవ్యయాయై . శుద్ధాయై నమః . 20

ఓం దేవాత్మనే నమః . సర్వగాయై . అచలాయై . ఏకాయై .

అనేకవిభాగస్థాయై . మాయాతీతాయై . సునిర్మలాయై . మహామాహేశ్వర్యై .

సత్యాయై . మహాదేవ్యై . నిరంజనాయై . కాష్ఠాయై . సర్వాంతరస్థాయై .

చిచ్ఛక్త్యై . అతిలాలసాయై . నందాయై . సర్వాత్మికాయై . విద్యాయై .

జ్యోతీరూపాయై . అమృతాయై నమః . 40

ఓం అక్షరాయై నమః . శాంత్యై . సర్వేషాం ప్రతిష్ఠాయై . నివృత్యై .

అమృతప్రదాయై . వ్యోమమూర్త్యై . వ్యోమలయాయై . వ్యోమాధారాయై .

అచ్యుతాయై . అమరాయై . అనాదినిధనాయై . అమోఘాయై . కారణాత్మనే .

కలాయై . అకలాయై . క్రతవే . ప్రథమజాయై . అమృతస్యనాభ్యై .

ఆత్మసంశ్రయాయై . ప్రాణేశ్వరప్రియాయై నమః . 60

ఓం మాత్రే నమః . మహామహిషఘాతిన్యై . ప్రాణేశ్వర్యై . ప్రాణరూపాయై .

ప్రధానపురుషేశ్వర్యై . సర్వశక్తికలాకారాయై . జ్యోత్స్నాయై . దివే .

మహిమాస్పదాయై . సర్వకార్యనియంత్ర్యై . సర్వభూతేశ్వరేశ్వర్యై .

అనాదయే . అవ్యక్తగుహాయై . మహానందాయై . సనాతన్యై . ఆకాశయోన్యై .

యోగస్థాయై . మహాయోగేశ్వరేశ్వర్యై . మహామాయాయై . సుదుష్పూరాయై నమః . 80

ఓం మూలప్రకృత్యై నమః . ఈశ్వర్యై . సంసారయోన్యై . సకలాయై .

సర్వశక్తిసముద్భవాయై . సంసారపారాయై . దుర్వారాయై .

దుర్నిరీక్ష్యాయై . దురాసదాయై . ప్రాణశక్త్యై . ప్రాణవిద్యాయై .

యోగిన్యై . పరమాయై . కలాయై . మహావిభూత్యై . దుర్ధర్షాయై .

మూలప్రకృతిసంభవాయై . అనాద్యనంతవిభవాయై . పరార్థాయై .

పురుషాయైఅరణ్యై . సర్గస్థిత్యంతకరణ్యై . సుదుర్వాచ్యాయై .

దురత్యయాయై . శబ్దయోన్యై . శబ్దమయ్యై . నాదాఖ్యాయై .

నాదవిగ్రహాయై . ప్రధానపురుషాతీతాయై . ప్రధానపురుషాత్మికాయై .

పురాణ్యై . చిన్మయ్యై . పుంసామాదయే . పురుషరూపిణ్యై . భూతాంతరాత్మనే .

కూటస్థాయై . మహాపురుషసంజ్ఞితాయై . జన్మమృత్యుజరాతీతాయై .

సర్వశక్తిసమన్వితాయై . వ్యాపిన్యై . అనవచ్ఛిన్నాయై నమః . 120

ఓం ప్రధానానుప్రవేశిన్యై నమః . క్షేత్రజ్ఞశక్త్యై .

అవ్యక్తలక్షణాయై . మూలవర్జితాయై . అనాదిమాయాసంభిన్నాయై .

త్రితత్త్వాయై . ప్రకృత్యై . గుహాయై . మహామాయాసముత్పన్నాయై . తామస్యై .

పౌరుష్యై . ధ్రువాయై . వ్యక్తాయై . అవ్యక్తాత్మికాయై . కృష్ణాయై .

రక్తాయై . శుక్లాయై . ప్రసూతికాయై . అకార్యాయై . కార్యజనన్యై నమః . 140

ఓం నిత్యంప్రసవధర్మిణ్యై నమః . సర్గప్రలయనిర్ముక్తాయై .

సృష్టిస్థిత్యంతధర్మిణ్యై . బ్రహ్మగర్భాయై . చతుర్వింశాయై .

పద్మనాభాయై . అచ్యుతాత్మికాయై . వైద్యుత్యై . శాశ్వత్యై . యోన్యై .

జగన్మాత్రే . ఈశ్వరప్రియాయై . సర్వాధారాయై . మహారూపాయై .

సర్వైశ్వర్యసమన్వితాయై . విశ్వరూపాయై . మహాగర్భాయై .

విశ్వేశేచ్ఛానువర్తిన్యై . మహీయస్యై . బ్రహ్మయోన్యై నమః . 160

ఓం మహాలక్ష్మీసముద్భవాయై నమః . మహావిమానమధ్యస్థాయై .

మహానిద్రాయై . ఆత్మహేతుకాయై . సర్వసాధారణ్యై . సూక్ష్మాయై .

అవిద్యాయై . పారమార్థికాయై . అనంతరూపాయై . అనంతస్థాయై . దేవ్యై .

పురుషమోహిన్యై . అనేకాకారసంస్థానాయై . కాలత్రయవివర్జితాయై .

బ్రహ్మజన్మనే . హరేర్మూర్త్యై . బ్రహ్మవిష్ణుశివాత్మికాయై .

బ్రహ్మేశవిష్ణుజనన్యై . బ్రహ్మాఖ్యాయై . బ్రహ్మసంశ్రయాయై నమః . 180

ఓం వ్యక్తాయై నమః . ప్రథమజాయై . బ్రాహ్మ్యై . మహత్యై . జ్ఞానరూపిణ్యై .

వైరాగ్యైశ్వర్యధర్మాత్మనే . బ్రహ్మమూర్త్యై . హృదిస్థితాయై .

అపాంయోన్యై . స్వయంభూత్యై . మానస్యై . తత్త్వసంభవాయై . ఈశ్వరాణ్యై .

శర్వాణ్యై . శంకరార్ధశరీరిణ్యై . భవాన్యై . రుద్రాణ్యై .

మహాలక్ష్మ్యై . అంబికాయై . మహేశ్వరసముత్పన్నాయై నమః . 200

ఓం భుక్తిముక్తిఫలప్రదాయై నమః . సర్వేశ్వర్యై . సర్వవంద్యాయై .

నిత్యంముదితమానసాయై . బ్రహ్మేంద్రోపేంద్రనమితాయై .

శంకరేచ్ఛానువర్తిన్యై . ఈశ్వరార్ధాసనగతాయై .

మహేశ్వరపతివ్రతాయై . సకృద్విభావితాయై . సర్వాయై .

సముద్రపరిశోషిణ్యై . పార్వత్యై . హిమవత్పుత్ర్యై . పరమానందదాయిన్యై .

గుణాఢ్యాయై . యోగజాయై . యోగ్యాయై . జ్ఞానమూర్త్యై . వికాసిన్యై .

సావిత్ర్యై నమః . 220

ఓం కమలాయై నమః . లక్ష్మ్యై . శ్రియై . అనంతోరసిస్థితాయై .

సరోజనిలయాయై . ముద్రాయై . యోగనిద్రాయై . సురార్దిన్యై . సరస్వత్యై .

సర్వవిద్యాయై . జగజ్జ్యేష్ఠాయై . సుమంగలాయై . వాగ్దేవ్యై .

వరదాయై . వాచ్యాయై . కీర్త్యై . సర్వార్థసాధికాయై . యోగీశ్వర్యై .

బ్రహ్మవిద్యాయై . మహావిద్యాయై నమః . 240

ఓం సుశోభనాయై నమః . గుహ్యవిద్యాయై . ఆత్మవిద్యాయై . ధర్మవిద్యాయై .

ఆత్మభావితాయై . స్వాహాయై . విశ్వంభరాయై . సిద్ధ్యై . స్వధాయై .

మేధాయై . ధృత్యై . శ్రుత్యై . నీత్యై . సునీత్యై . సుకృత్యై .

మాధవ్యై . నరవాహిన్యై . అజాయై . విభావర్యై . సౌమ్యాయై నమః . 260

ఓం భోగిన్యై నమః . భోగదాయిన్యై . శోభాయై . వంశకర్యై . లోలాయై .

మాలిన్యై . పరమేష్ఠిన్యై . త్రైలోక్యసుందర్యై . రమ్యాయై . సుందర్యై .

కామచారిణ్యై . మహానుభావాయై . సత్త్వస్థాయై . మహామహిషమర్దిన్యై .

పద్మమాలాయై . పాపహరాయై . విచిత్రాయై . ముకుటాననాయై . కాంతాయై .

చిత్రాంబరధరాయై నమః . 280

ఓం దివ్యాభరణభూషితాయై నమః . హంసాఖ్యాయై . వ్యోమనిలయాయై .

జగత్సృష్టివివర్ధిన్యై . నిర్యంత్రాయై . యంత్రవాహస్థాయై . నందిన్యై .

భద్రకాలికాయై . ఆదిత్యవర్ణాయై . కౌమార్యై . మయూరవరవాహిన్యై .

వృషాసనగతాయై . గౌర్యై . మహాకాల్యై . సురార్చితాయై . అదిత్యై .

నియతాయై . రౌద్ర్యై . పద్మగర్భాయై . వివాహనాయై నమః . 300

ఓం విరూపాక్ష్యై నమః . లేలిహానాయై . మహాపురనివాసిన్యై . మహాఫలాయై .

అనవద్యాంగ్యై . కామపూరాయై . విభావర్యై . విచిత్రరత్నముకుటాయై .

ప్రణతార్తిప్రభంజిన్యై . కౌశిక్యై . కర్షణ్యై . రాత్ర్యై .

త్రిదశార్త్తివినాశిన్యై . బహురూపాయై . సురూపాయై . విరూపాయై .

రూపవర్జితాయై . భక్తార్తిశమన్యై . భవ్యాయై .

భవభావవినాశిన్యై నమః . 320

ఓం నిర్గుణాయై నమః . నిత్యవిభవాయై . నిఃసారాయై . నిరపత్రపాయై .

యశస్విన్యై . సామగీత్యై . భవాంగనిలయాయై . అలయాయై . దీక్షాయై .

విద్యాధర్యై . దీప్తాయై . మహేంద్రవినిపాతిన్యై . సర్వాతిశాయిన్యై .

విద్యాయై . సర్వసిద్ధిప్రదాయిన్యై . సర్వేశ్వరప్రియాయై . తార్క్ష్యాయై .

సముద్రాంతరవాసిన్యై . అకలంకాయై . నిరాధారాయై నమః . 340

ఓం నిత్యసిద్ధాయై నమః . నిరామయాయై . కామధేన్వై . బృహద్గర్భాయై .

ధీమత్యై . మోహనాశిన్యై . నిఃసంకల్పాయై . నిరాతంకాయై .

వినయాయై . వినయప్రదాయై . జ్వాలామాలాసహస్రాఢ్యాయై . దేవదేవ్యై .

మనోన్మన్యై . మహాభగవత్యై . దుర్గాయై . వాసుదేవసముద్భవాయై .

మహేంద్రోపేంద్రభగిన్యై . భక్తిగమ్యై . పరావరాయై .

జ్ఞానజ్ఞేయాయై నమః . 360

ఓం జరాతీతాయై నమః . వేదాంతవిషయాయైగత్యై . దక్షిణాయై . దహనాయై .

దాహ్యాయై . సర్వభూతనమస్కృతాయై . యోగమాయాయై . విభావజ్ఞాయై .

మహామాయాయై . మహీయస్యై . సంధ్యాయై . సర్వసముద్భూత్యై .

బ్రహ్మవృక్షాశ్రయాయై . నత్యై . బీజాంకురసముద్భూత్యై . మహాశక్త్యై .

మహామత్యై . ఖ్యాత్యై . ప్రజ్ఞాయై . చిత్యై నమః . 380

ఓం సంవిదే నమః . మహాభోగీంద్రశాయిన్యై . వికృత్యై . శాంకర్యై .

శాస్త్ర్యై . గణగంధర్వసేవితాయై . వైశ్వానర్యై . మహాశాలాయై .

దేవసేనాయై . గుహప్రియాయై . మహారాత్ర్యై . శివానందాయై . శచ్యై .

దుఃస్వప్ననాశిన్యై . ఇజ్యాయై . పూజ్యాయై . జగద్ధాత్ర్యై . దుర్విజ్ఞేయాయై .

సురూపిణ్యై . గుహాంబికాయై నమః . 400

ఓం గుణోత్పత్యై నమః . మహాపీఠాయై . మరుత్సుతాయై . హవ్యవాహాయై .

అంతర్యాగాద్యై . హవ్యవాహసముద్భవాయై . జగద్యోన్యై .

జగన్మాత్రే . జన్మమృత్యుజరాతిగాయై . బుద్ధిమాత్రే . బుద్ధిమత్యై .

పురుషాంతరవాసిన్యై . తరస్విన్యై . సమాధిస్థాయై . త్రినేత్రాయై .

దివిసంస్థితాయై . సర్వేంద్రియమనోమాత్రే . సర్వభూతహృదిస్థితాయై .

సంసారతారిణ్యై . విద్యాయై నమః . 420

ఓం బ్రహ్మవాదిమనోలయాయై నమః . బ్రహ్మాణ్యై . బృహత్యై . బ్రాహ్మయై .

బ్రహ్మభూతాయై . భవారణ్యై . హిరణ్మయ్యై . మహారాత్ర్యై .

సంసారపరివర్తికాయై . సుమాలిన్యై . సురూపాయై . భావిన్యై . తారిణ్యై .

ప్రభాయై . ఉన్మీలన్యై . సర్వసహాయై . సర్వప్రత్యయసాక్షిణ్యై .

సుసౌమ్యాయై . చంద్రవదనాయై . తాండవాసక్తమానసాయై నమః . 440

ఓం సత్త్వశుద్ధికర్యై నమః . శుద్ధ్యై . మలత్రయవినాశిన్యై .

జగత్ప్రియాయై . జగన్మూర్త్యై . త్రిమూర్త్యై . అమృతాశ్రయాయై .

నిరాశ్రయాయై . నిరాహారాయై . నిరంకురవనోద్భవాయై . చంద్రహస్తాయై .

విచిత్రాంగ్యై . స్రగ్విణ్యై . పద్మధారిణ్యై . పరావరవిధానజ్ఞాయై .

మహాపురుషపూర్వజాయై . విద్యేశ్వరప్రియాయై . విద్యాయై . విద్యుజ్జిహ్వాయై .

జితశ్రమాయై నమః . 460

ఓం విద్యామయ్యై నమః . సహస్రాక్ష్యై . సహస్రవదనాత్మజాయై .

సహస్రరశ్మ్యై . సత్త్వస్థాయై . మహేశ్వరపదాశ్రయాయై . క్షాలిన్యై .

సన్మయ్యై . వ్యాప్తాయై . తైజస్యై . పద్మబోధికాయై . మహామాయాశ్రయాయై .

మాన్యాయై . మహాదేవమనోరమాయై . వ్యోమలక్ష్మ్యై . సింహరథాయై .

చేకితానాయై . అమితప్రభాయై . వీరేశ్వర్యై . విమానస్థాయై నమః . 480

ఓం విశోకాయై నమః . శోకనాశిన్యై . అనాహతాయై . కుండలిన్యై .

నలిన్యై . పద్మవాసిన్యై . సదానందాయై . సదాకీర్త్యై .

సర్వభూతాశ్రయస్థితాయై . వాగ్దేవతాయై . బ్రహ్మకలాయై .

కలాతీతాయై . కలారణ్యై . బ్రహ్మశ్రియై . బ్రహ్మహృదయాయై .

బ్రహ్మవిష్ణుశివప్రియాయై . వ్యోమశక్త్యై . క్రియాశక్త్యై .

జ్ఞానశక్త్యై . పరాయైగత్యై నమః . 500

ఓం క్షోభికాయై నమః . బంధికాయై . భేద్యాయై . భేదాభేదవివర్జితాయై .

అభిన్నాయై . భిన్నసంస్థానాయై . వంశిన్యై . వంశహారిణ్యై .

గుహ్యశక్త్యై . గుణాతీతాయై . సర్వదాయై . సర్వతోముఖ్యై . భగిన్యై .

భగవత్పత్న్యై . సకలాయై . కాలకారిణ్యై . సర్వవిదే . సర్వతోభద్రాయై .

గుహ్యాతీతాయై . గుహారణ్యై నమః . 520

ఓం ప్రక్రియాయై నమః . యోగమాత్రే . గంగాయై . విశ్వేశ్వరేశ్వర్యై .

కపిలాయై . కాపిలాయై . కాంతాయై . కనకాభాయై . కలాంతరాయై .

పుణ్యాయై . పుష్కరిణ్యై . భోక్త్ర్యై . పురందరపురఃసరాయై . పోషణ్యై .

పరమైశ్వర్యభూతిదాయై . భూతిభూషణాయై . పంచబ్రహ్మసముత్పత్త్యై .

పరమార్థాయై . అర్థవిగ్రహాయై . ధర్మోదయాయై నమః . 540

ఓం భానుమత్యై నమః . యోగిజ్ఞేయాయై . మనోజవాయై . మనోహరాయై .

మనోరక్షాయై . తాపస్యై . వేదరూపిణ్యై . వేదశక్త్యై . వేదమాత్రే .

వేదవిద్యాప్రకాశిన్యై . యోగేశ్వరేశ్వర్యై . మాత్రే . మహాశక్త్యై .

మనోమయ్యై . విశ్వావస్థాయై . వియన్మూర్త్యై . విద్యున్మాలాయై . విహాయస్యై .

కిన్నర్యై . సురభ్యై నమః . 560

ఓం వంద్యాయై నమః . నందిన్యై . నందివల్లభాయై . భారత్యై .

పరమానందాయై . పరాపరవిభేదికాయై . సర్వప్రహరణోపేతాయై .

కామ్యాయై . కామేశ్వరేశ్వర్యై . అచింత్యాయై . అచింత్యవిభవాయై .

హృల్లేఖాయై . కనకప్రభాయై . కూష్మాండ్యై . ధనరత్నాఢ్యాయై .

సుగంధాయై . గంధదాయిన్యై . త్రివిక్రమపదోద్భూతాయై . ధనుష్పాణ్యై .

శివోదయాయై నమః . 580

ఓం సుదుర్లభాయై నమః . ధనాధ్యక్షాయై . ధన్యాయై .

పింగలలోచనాయై . శాంత్యై . ప్రభావత్యై . దీప్త్యై .

పంకజాయతలోచనాయై . ఆద్యాయై . హృత్కమలోద్భూతాయై . గవాం మాత్రే .

రణప్రియాయై . సత్క్రియాయై . గిరిజాయై . శుద్ధాయై . నిత్యపుష్టాయై .

నిరంతరాయై . దుర్గాయై . కాత్యాయన్యై . చండ్యై నమః . 600

ఓం చర్చికాయై నమః . శాంతవిగ్రహాయై . హిరణ్యవర్ణాయై . రజన్యై .

జగద్యంత్రప్రవర్తికాయై . మందరాద్రినివాసాయై . శారదాయై .

స్వర్ణమాలిన్యై . రత్నమాలాయై . రత్నగర్భాయై . పృథ్వ్యై .

విశ్వప్రమాథిన్యై . పద్మాననాయై . పద్మనిభాయై . నిత్యతుష్టాయై .

అమృతోద్భవాయై . ధున్వత్యై . దుఃప్రకంప్యాయై . సూర్యమాత్రే .

దృషద్వత్యై నమః . 620

ఓం మహేంద్రభగిన్యై నమః . మాన్యాయై . వరేణ్యాయై . వరదర్పితాయై .

కల్యాణ్యై . కమలాయై . రామాయై . పంచభూతాయై . వరప్రదాయై .

వాచ్యాయై . వరేశ్వర్యై . వంద్యాయై . దుర్జయాయై . దురతిక్రమాయై .

కాలరాత్ర్యై . మహావేగాయై . వీరభద్రప్రియాయై . హితాయై . భద్రకాల్యై .

జగన్మాత్రే నమః . 640

ఓం భక్తానాంభద్రదాయిన్యై నమః . కరాలాయై . పింగలాకారాయై .

నామభేదాయై . అమహామదాయై . యశస్విన్యై . యశోదాయై .

షడధ్వపరివర్తికాయై . శంఖిన్యై . పద్మిన్యై . సాంఖ్యాయై .

సాంఖ్యయోగప్రవర్తికాయై . చైత్రాయై . సంవత్సరారూఢాయై .

జగత్సంపూరణ్యై . ఇంద్రజాయై . శుంభార్యై . ఖేచర్యై . స్వస్థాయై .

కంబుగ్రీవాయై నమః . 660

ఓం కలిప్రియాయై నమః . ఖగధ్వజాయై . ఖగారూఢాయై . పరార్ధ్యాయై .

పరమాలిన్యై . ఐశ్వర్యవర్త్మనిలయాయై . విరక్తాయై . గరుడాసనాయై .

జయంత్యై . హృద్గుహాయై . రమ్యాయై . గహ్వరేష్ఠాయై . గణాగ్రణీయై .

సంకల్పసిద్ధాయై . సామ్యస్థాయై . సర్వవిజ్ఞానదాయిన్యై .

కలికల్మషహంత్ర్యై . గుహ్యోపనిషదే . ఉత్తమాయై . నిష్ఠాయై నమః . 680

ఓం దృష్ట్యై నమః . స్మృత్యై . వ్యాప్త్యై . పుష్ట్యై . తుష్ట్యై .

క్రియావత్యై . విశ్వామరేశ్వరేశానాయై . భుక్త్యై . ముక్త్యై . శివాయై .

అమృతాయై . లోహితాయై . సర్పమాలాయై . భీషణ్యై . వనమాలిన్యై .

అనంతశయనాయై . అనన్యాయై . నరనారాయణోద్భవాయై . నృసింహ్యై .

దైత్యమథన్యై నమః . 700

ఓం శంఖచక్రగదాధరాయై నమః . సంకర్షణసముత్పత్యై .

అంబికాయై . పాదసంశ్రయాయై . మహాజ్వాలాయై . మహామూర్త్యై .

సుమూర్త్యై . సర్వకామదుహే . సుప్రభాయై . సుస్తనాయై . గౌర్యై .

ధర్మకామార్థమోక్షదాయై . భ్రూమధ్యనిలయాయై . పూర్వాయై .

పురాణపురుషారణ్యై . మహావిభూతిదాయై . మధ్యాయై . సరోజనయనాయై .

సమాయై . అష్టాదశభుజాయై నమః . 720

ఓం అనాద్యాయై నమః . నీలోత్పలదలప్రభాయై . సర్వశక్త్యాసనారూఢాయై .

ధర్మాధర్మార్థవర్జితాయై . వైరాగ్యజ్ఞాననిరతాయై . నిరాలోకాయై .

నిరింద్రియాయై . విచిత్రగహనాధారాయై . శాశ్వతస్థానవాసిన్యై .

స్థానేశ్వర్యై . నిరానందాయై . త్రిశూలవరధారిణ్యై .

అశేషదేవతామూర్త్యై . దేవతాయై . వరదేవతాయై . గణాంబికాయై .

గిరేఃపుత్ర్యై . నిశుంభవినిపాతిన్యై . అవర్ణాయై . వర్ణరహితాయై నమః . 740

ఓం నివర్ణాయై నమః . బీజసంభవాయై . అనంతవర్ణాయై . అనన్యస్థాయై .

శంకర్యై . శాంతమానసాయై . అగోత్రాయై . గోమత్యై . గోప్త్ర్యై .

గుహ్యరూపాయై . గుణోత్తరాయై . గవే . గీరే . గవ్యప్రియాయై . గౌణ్యై .

గణేశ్వరనమస్కృతాయై . సత్యమాత్రాయై . సత్యసంధాయై . త్రిసంధ్యాయై .

సంధివర్జితాయై నమః . 760

ఓం సర్వవాదాశ్రయాయై నమః . సంఖ్యాయై . సాంఖ్యయోగసముద్భవాయై .

అసంఖ్యేయాయై . అప్రమేయాఖ్యాయై . శూన్యాయై . శుద్ధకులోద్భవాయై .

బిందునాదసముత్పత్త్యై . శంభువామాయై . శశిప్రభాయై . విసంగాయై .

భేదరహితాయై . మనోజ్ఞాయై . మధుసూదన్యై . మహాశ్రియై .

శ్రీసముత్పత్త్యై . తమఃపారేప్రతిష్ఠితాయై . త్రితత్త్వమాత్రే .

త్రివిధాయై . సుసూక్ష్మపదసంశ్రయాయై నమః . 780

ఓం శాంత్యతీతాయై నమః . మలాతీతాయై . నిర్వికారాయై . నిరాశ్రయాయై .

శివాఖ్యాయై . చిత్తనిలయాయై . శివజ్ఞానస్వరూపిణ్యై .

దైత్యదానవనిర్మాత్ర్యై . కాశ్యప్యై . కాలకల్పికాయై . శాస్త్రయోన్యై .

క్రియామూర్త్యై . చతుర్వర్గప్రదర్శికాయై . నారాయణ్యై . నరోద్భూత్యై .

కౌముద్యై . లింగధారిణ్యై . కాముక్యై . లలితాయై . భావాయై నమః . 800

ఓం పరాయై నమః . పరవిభూతిదాయై . పరాంతజాతమహిమాయై . బడవాయై .

వామలోచనాయై . సుభద్రాయై . దేవక్యై . సీతాయై . వేదవేదాంగపారగాయై .

మనస్విన్యై . మన్యుమాత్రే . మహామన్యుసముద్భవాయై . అమృత్యవే .

అమృతాయై . స్వాహాయై . పురుహూతాయై . పురుష్టుతాయై . అశోచ్యాయై .

భిన్నవిషయాయై . హిరణ్యరజతప్రియాయై నమః . 820

ఓం హిరణ్యాయై నమః . రాజత్యై . హైమ్యై . హేమాభరణభూషితాయై .

విభ్రాజమానాయై . దుర్జ్ఞేయాయై . జ్యోతిష్టోమఫలప్రదాయై .

మహానిద్రాసముద్భూత్యై . అనిద్రాయై . సత్యదేవతాయై . దీర్ఘాయై .

కకుద్మిన్యై . హృద్యాయై . శాంతిదాయై . శాంతివర్ధిన్యై .

లక్ష్మ్యాదిశక్తిజనన్యై . శక్తిచక్రప్రవర్తికాయై . త్రిశక్తిజనన్యై .

జన్యాయై . షడూర్మిపరివర్జితాయై నమః . 840

ఓం సుధామాయై నమః . కర్మకరణ్యై . యుగాంతదహనాత్మికాయై .

సంకర్షణ్యై . జగద్ధాత్ర్యై . కామయోన్యై . కిరీటిన్యై . ఐంద్ర్యై .

త్రైలోక్యనమితాయై . వైష్ణవ్యై . పరమేశ్వర్యై . ప్రద్యుమ్నదయితాయై .

దాంతాయై . యుగ్మదృష్ట్యై . త్రిలోచనాయై . మదోత్కటాయై . హంసగత్యై .

ప్రచండాయై . చండవిక్రమాయై . వృషావేశాయై నమః . 860

ఓం వియన్మాత్రే నమః . వింధ్యపర్వతవాసిన్యై . హిమవన్మేరునిలయాయై .

కైలాసగిరివాసిన్యై . చాణూరహంతృతనయాయై . నీతిజ్ఞాయై .

కామరూపిణ్యై . వేదవిద్యావ్రతస్నాతాయై . ధర్మశీలాయై . అనిలాశనాయై .

వీరభద్రప్రియాయై . వీరాయై . మహాకాలసముద్భవాయై . విద్యాధరప్రియాయై .

సిద్ధాయై . విద్యాధరనిరాకృత్యై . ఆప్యాయన్యై . హరంత్యై . పావన్యై .

పోషణ్యై నమః . 880

ఓం ఖిలాయై నమః . మాతృకాయై . మన్మథోద్భూతాయై . వారిజాయై .

వాహనప్రియాయై . కరీషిణ్యై . సుధావాణ్యై . వీణావాదనతత్పరాయై .

సేవితాయై . సేవికాయై . సేవ్యాయై . సినీవాల్యై . గురుత్మత్యై . అరుంధత్యై .

హిరణ్యాక్ష్యై . మృగాంకాయై . మానదాయిన్యై . వసుప్రదాయై .

వసుమత్యై . వసోర్ధారాయై నమః . 900

ఓం వసుంధరాయై నమః . ధారాధరాయై . వరారోహాయై . వరాయై .

వరసహస్రదాయై . శ్రీఫలాయై . శ్రీమత్యై . శ్రీశాయై .

శ్రీనివాసాయై . శివప్రియాయై . శ్రీధరాయై . శ్రీకర్యై . కల్యాయై .

శ్రీధరార్ధశరీరిణ్యై . అనంతదృష్ట్యై . అక్షుద్రాయై . ధాత్రీశాయై .

ధనదప్రియాయై . దైత్యసంఘానాంనిహంత్ర్యై . సింహికాయై నమః . 920

ఓం సింహవాహనాయై నమః . సుషేణాయై . చంద్రనిలయాయై . సుకీర్త్యై .

ఛిన్నసంశయాయై . రసజ్ఞాయై . రసదాయై . రామాయై . లేలిహానాయై .

అమృతస్రవాయై . నిత్యోదితాయై . స్వయంజ్యోతిషే . ఉత్సుకాయై .

మృతజీవన్యై . వజ్రదండాయై . వజ్రజిహ్వాయై . వైదేహ్యై .

వజ్రవిగ్రహాయై . మంగల్యాయై . మంగలాయై నమః . 940

ఓం మాలాయై నమః . మలినాయై . మలహారిణ్యై . గాంధర్వ్యై .

గారుడ్యై . చాంద్ర్యై . కంబలాశ్వతరప్రియాయై . సౌదామిన్యై .

జనానందాయై . భ్రుకుటీకుటిలాననాయై . కర్ణికారకరాయై . కక్ష్యాయై .

కంసప్రాణాపహారిణ్యై . యుగంధరాయై . యుగావర్తాయై . త్రిసంధ్యాయై .

హర్షవర్ధన్యై . ప్రత్యక్షదేవతాయై . దివ్యాయై . దివ్యగంధాయై నమః . 960

ఓం దివాపరాయై నమః . శక్రాసనగతాయై . శాక్ర్యై . సాధ్వ్యైనార్యై .

శవాసనాయై . ఇష్టాయై . విశిష్టాయై . శిష్టేష్టాయై .

శిష్టాశిష్టప్రపూజితాయై . శతరూపాయై . శతావర్తాయై . వినతాయై .

సురభ్యై . సురాయై . సురేంద్రమాత్రే . సుద్యుమ్నాయై . సుషుమ్నాయై .

సూర్యసంస్థితాయై . సమీక్ష్యాయై . సత్ప్రతిష్ఠాయై నమః . 980

ఓం నివృత్యై నమః . జ్ఞానపారగాయై . ధర్మశాస్త్రార్థకుశలాయై .

ధర్మజ్ఞాయై . ధర్మవాహనాయై . ధర్మాధర్మవినిర్మాత్ర్యై .

ధార్మికాణాంశివప్రదాయై . ధర్మశక్త్యై . ధర్మమయ్యై . విధర్మాయై .

విశ్వధర్మిణ్యై . ధర్మాంతరాయై . ధర్మమేఘాయై . ధర్మపూర్వాయై .

ధనావహాయై . ధర్మోపదేష్ట్ర్యై . ధర్మాత్మనే . ధర్మగమ్యాయై .

ధరాధరాయై . కాపాలీశకలామూర్త్యై నమః . 1000

ఓం కలాకలితవిగ్రహాయై నమః . సర్వశక్తివినిర్ముక్తాయై .

సర్వశక్త్యాశ్రయాశ్రయాయై . సర్వాయై .

సర్వేశ్వర్యై . సూక్ష్మసుసూక్ష్మజ్ఞానరూపిణ్యై .

ప్రధానపురుషేశేశమహాదేవైకసాక్షిణ్యై . సదాశివాయై .

వియన్మూర్త్యై . విశ్వమూర్త్యై . అమూర్తికాయై .

ఇతి శ్రీపార్వతీసహస్రనామావలిః సమాప్తా .

శ్రీపార్వతీసహస్రనామస్తోత్రం

(దుర్గాసహస్రనామస్తోత్రమితి స్కాందే క్వచిత్కచిద్భిన్నం .)

     హిమవానువాచ .

కా త్వం దేవి విశాలాక్షి శశాంకావయవాంకితే .

న జానే త్వామహం వత్సే యథావద్ బ్రూహి పృచ్ఛతే .. 1..

గిరీంద్రవచనం శ్రుత్వా తతః సా పరమేశ్వరీ .

వ్యాజహార మహాశైలం యోగినామభయప్రదా .. 2..

     దేవ్యువాచ .

మాం విద్ధి పరమాం శక్తిం పరమేశ్వరసమాశ్రయాం .

అనన్యామవ్యయామేకాం యాం పశ్యంతి ముముక్షవః .. 3..

అహం వై సర్వభావానామాత్మా సర్వాంతరా శివా .

శాశ్వతైశ్వర్యవిజ్ఞానమూర్తిః సర్వప్రవర్తికా .. 4..

అనంతాఽనంతమహిమా సంసారార్ణవతారిణీ .

దివ్యం దదామి తే చక్షుః పశ్య మే రూపమైశ్వరం .. 5..

ఏతావదుక్త్వా విజ్ఞానం దత్త్వా హిమవతే స్వయం .

స్వం రూపం దర్శయామాస దివ్యం తత్ పారమేశ్వరం .. 6..

కోటిసూర్యప్రతీకాశం తేజోబింబం నిరాకులం .

జ్వాలామాలాసహస్రాఢ్యం కాలానలశతోపమం .. 7..

దంష్ట్రాకరాలం దుర్ధర్షం జటామండలమండితం .

త్రిశూలవరహస్తం చ ఘోరరూపం భయానకం .. 8..

ప్రశాంతం సౌమ్యవదనమనంతాశ్చర్యసంయుతం .

చంద్రావయవలక్ష్మాణం చంద్రకోటిసమప్రభం .. 9..

కిరీటినం గదాహస్తం నూపురైరుపశోభితం .

దివ్యమాల్యాంబరధరం దివ్యగంధానులేపనం .. 10..

శంఖచక్రధరం కామ్యం త్రినేత్రం కృత్తివాససం .

అండస్థం చాండబాహ్యస్థం బాహ్యమాభ్యంతరం పరం .. 11..

సర్వశక్తిమయం శుభ్రం సర్వాకారం సనాతనం .

బ్రహ్మేంద్రోపేంద్రయోగీంద్రైర్వంద్యమానపదాంబుజం .. 12..

సర్వతః పాణిపాదాంతం సర్వతోఽక్షిశిరోముఖం .

సర్వమావృత్య తిష్ఠంతం దదర్శ పరమేశ్వరం .. 13..

దృష్ట్వా తదీదృశం రూపం దేవ్యా మాహేశ్వరం పరం .

భయేన చ సమావిష్టః స రాజా హృష్టమానసః .. 14..

ఆత్మన్యాధాయ చాత్మానమోంకారం సమనుస్మరన్ .

నామ్నామష్టసహస్రేణ తుష్టావ పరమేశ్వరీం .. 15..

     హిమవానువాచ .

ఓం శివోమా పరమా శక్తిరనంతా నిష్కలాఽమలా .

శాంతా మాహేశ్వరీ నిత్యా శాశ్వతీ పరమాక్షరా .. 1..

అచింత్యా కేవలాఽనంత్యా శివాత్మా పరమాత్మికా .

అనాదిరవ్యయా శుద్ధా దేవాత్మా సర్వగాఽచలా .. 2..

ఏకానేకవిభాగస్థా మాయాతీతా సునిర్మలా .

మహామాహేశ్వరీ సత్యా మహాదేవీ నిరంజనా .. 3..

కాష్ఠా సర్వాంతరస్థా చ చిచ్ఛక్తిరతిలాలసా .

నందా సర్వాత్మికా విద్యా జ్యోతీరూపాఽమృతాక్షరా .. 4..

శాంతిః ప్రతిష్ఠా సర్వేషాం నివృత్తిరమృతప్రదా .

వ్యోమమూర్తిర్వ్యోమలయా వ్యోమాధారాఽచ్యుతాఽమరా .. 5..

అనాదినిధనాఽమోఘా కారణాత్మా కలాఽకలా .

క్రతుః ప్రథమజా నాభిరమృతస్యాత్మసంశ్రయా .. 6..

ప్రాణేశ్వరప్రియా మాతా మహామహిషఘాతినీ .

ప్రాణేశ్వరీ ప్రాణరూపా ప్రధానపురుషేశ్వరీ .. 7..

సర్వశక్తికలాకారా జ్యోత్స్నా ద్యౌర్మహిమాస్పదా .

సర్వకార్యనియంత్రీ చ సర్వభూతేశ్వరేశ్వరీ .. 8..

అనాదిరవ్యక్తగుహా మహానందా సనాతనీ .

ఆకాశయోనిర్యోగస్థా మహాయోగేశ్వరేశ్వరీ .. 9..

మహామాయా సుదుష్పూరా మూలప్రకృతిరీశ్వరీ .

సంసారయోనిః సకలా సర్వశక్తిసముద్భవా .. 10..

సంసారపారా దుర్వారా దుర్నిరీక్ష్యా దురాసదా .

ప్రాణశక్తిః ప్రాణవిద్యా యోగినీ పరమా కలా .. 11..

మహావిభూతిర్దుర్ధర్షా మూలప్రకృతిసంభవా .

అనాద్యనంతవిభవా పరార్థా పురుషారణిః .. 12..

సర్గస్థిత్యంతకరణీ సుదుర్వాచ్యా దురత్యయా .

శబ్దయోనిః శబ్దమయీ నాదాఖ్యా నాదవిగ్రహా .. 13..

ప్రధానపురుషాతీతా ప్రధానపురుషాత్మికా .

పురాణీ చిన్మయీ పుంసామాదిః పురుషరూపిణీ .. 14..

భూతాంతరాత్మా కూటస్థా మహాపురుషసంజ్ఞితా .

జన్మమృత్యుజరాతీతా సర్వశక్తిసమన్వితా .. 15..

వ్యాపినీ చానవచ్ఛిన్నా ప్రధానానుప్రవేశినీ .

క్షేత్రజ్ఞశక్తిరవ్యక్తలక్షణా మూలవర్జితా .. 16..

అనాదిమాయాసంభిన్నా త్రితత్త్వా ప్రకృతిర్గుహా .

మహామాయాసముత్పన్నా తామసీ పౌరుషీ ధ్రువా .. 17..

వ్యక్తావ్యక్తాత్మికా కృష్ణా రక్తా శుక్లా ప్రసూతికా .

అకార్యా కార్యజననీ నిత్యం ప్రసవధర్మిణీ .. 18..

సర్గప్రలయనిర్ముక్తా సృష్టిస్థిత్యంతధర్మిణీ .

బ్రహ్మగర్భా చతుర్వింశా పద్మనాభాఽచ్యుతాత్మికా .. 19..

వైద్యుతీ శాశ్వతీ యోనిర్జగన్మాతేశ్వరప్రియా .

సర్వాధారా మహారూపా సర్వైశ్వర్యసమన్వితా .. 20..

విశ్వరూపా మహాగర్భా విశ్వేశేచ్ఛానువర్తినీ .

మహీయసీ బ్రహ్మయోనిర్మహాలక్ష్మీసముద్భవా .. 21..

మహావిమానమధ్యస్థా మహానిద్రాత్మహేతుకా .

సర్వసాధారణీ సూక్ష్మా హ్యవిద్యా పారమార్థికా .. 22..

అనంతరూపాఽనంతస్థా దేవీ పురుషమోహినీ .

అనేకాకారసంస్థానా కాలత్రయవివర్జితా .. 23..

బ్రహ్మజన్మా హరేర్మూర్తిర్బ్రహ్మవిష్ణుశివాత్మికా .

బ్రహ్మేశవిష్ణుజననీ బ్రహ్మాఖ్యా బ్రహ్మసంశ్రయా .. 24..

వ్యక్తా ప్రథమజా బ్రాహ్మీ మహతీ జ్ఞానరూపిణీ .

వైరాగ్యైశ్వర్యధర్మాత్మా బ్రహ్మమూర్తిర్హృదిస్థితా .

అపాంయోనిః స్వయంభూతిర్మానసీ తత్త్వసంభవా .. 25..

ఈశ్వరాణీ చ శర్వాణీ శంకరార్ధశరీరిణీ .

భవానీ చైవ రుద్రాణీ మహాలక్ష్మీరథాంబికా .. 26..

మహేశ్వరసముత్పన్నా భుక్తిముక్తిఫలప్రదా .

సర్వేశ్వరీ సర్వవంద్యా నిత్యం ముదితమానసా .. 27..

బ్రహ్మేంద్రోపేంద్రనమితా శంకరేచ్ఛానువర్తినీ .

ఈశ్వరార్ధాసనగతా మహేశ్వరపతివ్రతా .. 28..

సకృద్విభావితా సర్వా సముద్రపరిశోషిణీ .

పార్వతీ హిమవత్పుత్రీ పరమానందదాయినీ .. 29..

గుణాఢ్యా యోగజా యోగ్యా జ్ఞానమూర్తిర్వికాసినీ .

సావిత్రీ కమలా లక్ష్మీః శ్రీరనంతోరసి స్థితా .. 30..

సరోజనిలయా ముద్రా యోగనిద్రా సురార్దినీ .

సరస్వతీ సర్వవిద్యా జగజ్జ్యేష్ఠా సుమంగలా .. 31..

వాగ్దేవీ వరదా వాచ్యా కీర్తిః సర్వార్థసాధికా .

యోగీశ్వరీ బ్రహ్మవిద్యా మహావిద్యా సుశోభనా .. 32..

గుహ్యవిద్యాత్మవిద్యా చ ధర్మవిద్యాత్మభావితా .

స్వాహా విశ్వంభరా సిద్ధిః స్వధా మేధా ధృతిః శ్రుతిః .. 33..

నీతిః సునీతిః సుకృతిర్మాధవీ నరవాహినీ .

అజా విభావరీ సౌమ్యా భోగినీ భోగదాయినీ .. 34..

శోభా వంశకరీ లోలా మాలినీ పరమేష్ఠినీ .

త్రైలోక్యసుందరీ రమ్యా సుందరీ కామచారిణీ .. 35..

మహానుభావా సత్త్వస్థా మహామహిషమర్దనీ .

పద్మమాలా పాపహరా విచిత్రా ముకుటాననా .. 36..

కాంతా చిత్రాంబరధరా దివ్యాభరణభూషితా .

హంసాఖ్యా వ్యోమనిలయా జగత్సృష్టివివర్ధినీ .. 37..

నిర్యంత్రా యంత్రవాహస్థా నందినీ భద్రకాలికా .

ఆదిత్యవర్ణా కౌమారీ మయూరవరవాహినీ .. 38..

వృషాసనగతా గౌరీ మహాకాలీ సురార్చితా .

అదితిర్నియతా రౌద్రీ పద్మగర్భా వివాహనా .. 39..

విరూపాక్షీ లేలిహానా మహాపురనివాసినీ .

మహాఫలాఽనవద్యాంగీ కామపూరా విభావరీ .. 40..

విచిత్రరత్నముకుటా ప్రణతార్తిప్రభంజనీ .

కౌశికీ కర్షణీ రాత్రిస్త్రిదశార్త్తివినాశినీ .. 41..

బహురూపా సురూపా చ విరూపా రూపవర్జితా .

భక్తార్తిశమనీ భవ్యా భవభావవినాశినీ .. 42..

నిర్గుణా నిత్యవిభవా నిఃసారా నిరపత్రపా .

యశస్వినీ సామగీతిర్భవాంగనిలయాలయా .. 43..

దీక్షా విద్యాధరీ దీప్తా మహేంద్రవినిపాతినీ .

సర్వాతిశాయినీ విద్యా సర్వసిద్ధిప్రదాయినీ .. 44..

సర్వేశ్వరప్రియా తార్క్ష్యా సముద్రాంతరవాసినీ .

అకలంకా నిరాధారా నిత్యసిద్ధా నిరామయా .. 45..

కామధేనుర్బృహద్గర్భా ధీమతీ మోహనాశినీ .

నిఃసంకల్పా నిరాతంకా వినయా వినయప్రదా .. 46..

జ్వాలామాలా సహస్రాఢ్యా దేవదేవీ మనోన్మనీ .

మహాభగవతీ దుర్గా వాసుదేవసముద్భవా .. 47..

మహేంద్రోపేంద్రభగినీ భక్తిగమ్యా పరావరా .

జ్ఞానజ్ఞేయా జరాతీతా వేదాంతవిషయా గతిః .. 48..

దక్షిణా దహనా దాహ్యా సర్వభూతనమస్కృతా .

యోగమాయా విభావజ్ఞా మహామాయా మహీయసీ .. 49..

సంధ్యా సర్వసముద్భూతిర్బ్రహ్మవృక్షాశ్రయానతిః .

బీజాంకురసముద్భూతిర్మహాశక్తిర్మహామతిః .. 50..

ఖ్యాతిః ప్రజ్ఞా చితిః సంవిత్ మహాభోగీంద్రశాయినీ .

వికృతిః శాంకరీ శాస్త్రీ గణగంధర్వసేవితా .. 51..

వైశ్వానరీ మహాశాలా దేవసేనా గుహప్రియా .

మహారాత్రిః శివానందా శచీ దుఃస్వప్ననాశినీ .. 52..

ఇజ్యా పూజ్యా జగద్ధాత్రీ దుర్విజ్ఞేయా సురూపిణీ .

గుహాంబికా గుణోత్పత్తిర్మహాపీఠా మరుత్సుతా .. 53..

హవ్యవాహాంతర్యాగాదిః హవ్యవాహసముద్భవా .

జగద్యోనిర్జగన్మాతా జన్మమృత్యుజరాతిగా .. 54..

బుద్ధిమాతా బుద్ధిమతీ పురుషాంతరవాసినీ .

తరస్వినీ సమాధిస్థా త్రినేత్రా దివి సంస్థితా .. 55..

సర్వేంద్రియమనోమాతా సర్వభూతహృది స్థితా .

సంసారతారిణీ విద్యా బ్రహ్మవాదిమనోలయా .. 56..

బ్రహ్మాణీ బృహతీ బ్రాహ్మీ బ్రహ్మభూతా భవారణిః .

హిరణ్మయీ మహారాత్రిః సంసారపరివర్త్తికా .. 57..

సుమాలినీ సురూపా చ భావినీ తారిణీ ప్రభా .

ఉన్మీలనీ సర్వసహా సర్వప్రత్యయసాక్షిణీ .. 58..

సుసౌమ్యా చంద్రవదనా తాండవాసక్తమానసా .

సత్త్వశుద్ధికరీ శుద్ధిర్మలత్రయవినాశినీ .. 59..

జగత్ప్రియా జగన్మూర్తిస్త్రిమూర్తిరమృతాశ్రయా .

నిరాశ్రయా నిరాహారా నిరంకురవనోద్భవా .. 60..

చంద్రహస్తా విచిత్రాంగీ స్రగ్విణీ పద్మధారిణీ .

పరావరవిధానజ్ఞా మహాపురుషపూర్వజా .. 61..

విద్యేశ్వరప్రియా విద్యా విద్యుజ్జిహ్వా జితశ్రమా .

విద్యామయీ సహస్రాక్షీ సహస్రవదనాత్మజా .. 62..

సహస్రరశ్మిః సత్త్వస్థా మహేశ్వరపదాశ్రయా .

క్షాలినీ సన్మయీ వ్యాప్తా తైజసీ పద్మబోధికా .. 63..

మహామాయాశ్రయా మాన్యా మహాదేవమనోరమా .

వ్యోమలక్ష్మీః సింహరథా చేకితానాఽమితప్రభా .. 64..

వీరేశ్వరీ విమానస్థా విశోకా శోకనాశినీ .

అనాహతా కుండలినీ నలినీ పద్మవాసినీ .. 65..

సదానందా సదాకీర్తిః సర్వభూతాశ్రయస్థితా .

వాగ్దేవతా బ్రహ్మకలా కలాతీతా కలారణిః .. 66..

బ్రహ్మశ్రీర్బ్రహ్మహృదయా బ్రహ్మవిష్ణుశివప్రియా .

వ్యోమశక్తిః క్రియాశక్తిర్జ్ఞానశక్తిః పరాగతిః .. 67..

క్షోభికా బంధికా భేద్యా భేదాభేదవివర్జితా .

అభిన్నాభిన్నసంస్థానా వంశినీ వంశహారిణీ .. 68..

గుహ్యశక్తిర్గుణాతీతా సర్వదా సర్వతోముఖీ .

భగినీ భగవత్పత్నీ సకలా కాలకారిణీ .. 69..

సర్వవిత్ సర్వతోభద్రా గుహ్యాతీతా గుహారణిః .

ప్రక్రియా యోగమాతా చ గంగా విశ్వేశ్వరేశ్వరీ .. 70..

కపిలా కాపిలా కాంతా కనకాభా కలాంతరా .

పుణ్యా పుష్కరిణీ భోక్త్రీ పురందరపురస్సరా .. 71..

పోషణీ పరమైశ్వర్యభూతిదా భూతిభూషణా .

పంచబ్రహ్మసముత్పత్తిః పరమార్థార్థవిగ్రహా .. 72..

ధర్మోదయా భానుమతీ యోగిజ్ఞేయా మనోజవా .

మనోహరా మనోరక్షా తాపసీ వేదరూపిణీ .. 73..

వేదశక్తిర్వేదమాతా వేదవిద్యాప్రకాశినీ .

యోగేశ్వరేశ్వరీ మాతా మహాశక్తిర్మనోమయీ .. 74..

విశ్వావస్థా వియన్మూర్తిర్విద్యున్మాలా విహాయసీ .

కిన్నరీ సురభీ వంద్యా నందినీ నందివల్లభా .. 75..

భారతీ పరమానందా పరాపరవిభేదికా .

సర్వప్రహరణోపేతా కామ్యా కామేశ్వరేశ్వరీ .. 76..

అచింత్యాఽచింత్యవిభవా హృల్లేఖా కనకప్రభా .

కూష్మాండీ ధనరత్నాఢ్యా సుగంధా గంధదాయినీ .. 77..

త్రివిక్రమపదోద్భూతా ధనుష్పాణిః శివోదయా .

సుదుర్లభా ధనాధ్యక్షా ధన్యా పింగలలోచనా .. 78..

శాంతిః ప్రభావతీ దీప్తిః పంకజాయతలోచనా .

ఆద్యా హృత్కమలోద్భూతా గవాం మాతా రణప్రియా .. 79..

సత్క్రియా గిరిజా శుద్ధా నిత్యపుష్టా నిరంతరా .

దుర్గాకాత్యాయనీ చండీ చర్చికా శాంతవిగ్రహా .. 80..

హిరణ్యవర్ణా రజనీ జగద్యంత్రప్రవర్తికా .

మందరాద్రినివాసా చ శారదా స్వర్ణమాలినీ .. 81..

రత్నమాలా రత్నగర్భా పృథ్వీ విశ్వప్రమాథినీ .

పద్మాననా పద్మనిభా నిత్యతుష్టాఽమృతోద్భవా .. 82..

ధున్వతీ దుఃప్రకంప్యా చ సూర్యమాతా దృషద్వతీ .

మహేంద్రభగినీ మాన్యా వరేణ్యా వరదర్పితా .. 83..

కల్యాణీ కమలా రామా పంచభూతా వరప్రదా .

వాచ్యా వరేశ్వరీ వంద్యా దుర్జయా దురతిక్రమా .. 84..

కాలరాత్రిర్మహావేగా వీరభద్రప్రియా హితా .

భద్రకాలీ జగన్మాతా భక్తానాం భద్రదాయినీ .. 85..

కరాలా పింగలాకారా నామభేదాఽమహామదా .

యశస్వినీ యశోదా చ షడధ్వపరివర్త్తికా .. 86..

శంఖినీ పద్మినీ సాంఖ్యా సాంఖ్యయోగప్రవర్తికా .

చైత్రా సంవత్సరారూఢా జగత్సంపూరణీంద్రజా .. 87..

శుంభారిః ఖేచరీ స్వస్థా కంబుగ్రీవా కలిప్రియా .

ఖగధ్వజా ఖగారూఢా పరార్ధ్యా పరమాలినీ .. 88..

ఐశ్వర్యవర్త్మనిలయా విరక్తా గరుడాసనా .

జయంతీ హృద్గుహా రమ్యా గహ్వరేష్ఠా గణాగ్రణీః .. 89..

సంకల్పసిద్ధా సామ్యస్థా సర్వవిజ్ఞానదాయినీ .

కలికల్మషహంత్రీ చ గుహ్యోపనిషదుత్తమా .. 90..

నిష్ఠా దృష్టిః స్మృతిర్వ్యాప్తిః పుష్టిస్తుష్టిః క్రియావతీ .

విశ్వామరేశ్వరేశానా భుక్తిర్ముక్తిః శివాఽమృతా .. 91..

లోహితా సర్పమాలా చ భీషణీ వనమాలినీ .

అనంతశయనాఽనన్యా నరనారాయణోద్భవా .. 92..

నృసింహీ దైత్యమథనీ శంఖచక్రగదాధరా .

సంకర్షణసముత్పత్తిరంబికాపాదసంశ్రయా .. 93..

మహాజ్వాలా మహామూర్తిః సుమూర్తిః సర్వకామధుక్ .

సుప్రభా సుస్తనా గౌరీ ధర్మకామార్థమోక్షదా .. 94..

భ్రూమధ్యనిలయా పూర్వా పురాణపురుషారణిః .

మహావిభూతిదా మధ్యా సరోజనయనా సమా .. 95..

అష్టాదశభుజాఽనాద్యా నీలోత్పలదలప్రభా .

సర్వశక్త్యాసనారూఢా ధర్మాధర్మార్థవర్జితా .. 96..

వైరాగ్యజ్ఞాననిరతా నిరాలోకా నిరింద్రియా .

విచిత్రగహనాధారా శాశ్వతస్థానవాసినీ .. 97..

స్థానేశ్వరీ నిరానందా త్రిశూలవరధారిణీ .

అశేషదేవతామూర్తిర్దేవతా వరదేవతా .

గణాంబికా గిరేః పుత్రీ నిశుంభవినిపాతినీ .. 98..

అవర్ణా వర్ణరహితా నివర్ణా బీజసంభవా .

అనంతవర్ణాఽనన్యస్థా శంకరీ శాంతమానసా .. 99..

అగోత్రా గోమతీ గోప్త్రీ గుహ్యరూపా గుణోత్తరా .

గౌర్గీర్గవ్యప్రియా గౌణీ గణేశ్వరనమస్కృతా .. 100..

సత్యమాత్రా సత్యసంధా త్రిసంధ్యా సంధివర్జితా .

సర్వవాదాశ్రయా సంఖ్యా సాంఖ్యయోగసముద్భవా .. 101..

అసంఖ్యేయాఽప్రమేయాఖ్యా శూన్యా శుద్ధకులోద్భవా .

బిందునాదసముత్పత్తిః శంభువామా శశిప్రభా .. 102..

విసంగా భేదరహితా మనోజ్ఞా మధుసూదనీ .

మహాశ్రీః శ్రీసముత్పత్తిస్తమఃపారే ప్రతిష్ఠితా .. 103..

త్రితత్త్వమాతా త్రివిధా సుసూక్ష్మపదసంశ్రయా .

శాంత్యతీతా మలాతీతా నిర్వికారా నిరాశ్రయా .. 104..

శివాఖ్యా చిత్తనిలయా శివజ్ఞానస్వరూపిణీ .

దైత్యదానవనిర్మాత్రీ కాశ్యపీ కాలకల్పికా .. 105..

శాస్త్రయోనిః క్రియామూర్తిశ్చతుర్వర్గప్రదర్శికా .

నారాయణీ నరోద్భూతిః కౌముదీ లింగధారిణీ .. 106..

కాముకీ లలితా భావా పరాపరవిభూతిదా .

పరాంతజాతమహిమా బడవా వామలోచనా .. 107..

సుభద్రా దేవకీ సీతా వేదవేదాంగపారగా .

మనస్వినీ మన్యుమాతా మహామన్యుసముద్భవా .. 108..

అమృత్యురమృతా స్వాహా పురుహూతా పురుష్టుతా .

అశోచ్యా భిన్నవిషయా హిరణ్యరజతప్రియా .. 109..

హిరణ్యా రాజతీ హైమీ హేమాభరణభూషితా .

విభ్రాజమానా దుర్జ్ఞేయా జ్యోతిష్టోమఫలప్రదా .. 110..

మహానిద్రాసముద్భూతిరనిద్రా సత్యదేవతా .

దీర్ఘా కకుద్మినీ హృద్యా శాంతిదా శాంతివర్ధినీ .. 111..

లక్ష్మ్యాదిశక్తిజననీ శక్తిచక్రప్రవర్తికా .

త్రిశక్తిజననీ జన్యా షడూర్మిపరివర్జితా .. 112..

సుధామా కర్మకరణీ యుగాంతదహనాత్మికా .

సంకర్షణీ జగద్ధాత్రీ కామయోనిః కిరీటినీ .. 113..

ఐంద్రీ త్రైలోక్యనమితా వైష్ణవీ పరమేశ్వరీ .

ప్రద్యుమ్నదయితా దాంతా యుగ్మదృష్టిస్త్రిలోచనా .. 114..

మదోత్కటా హంసగతిః ప్రచండా చండవిక్రమా .

వృషావేశా వియన్మాతా వింధ్యపర్వతవాసినీ .. 115..

హిమవన్మేరునిలయా కైలాసగిరివాసినీ .

చాణూరహంతృతనయా నీతిజ్ఞా కామరూపిణీ .. 116..

వేదవిద్యావ్రతస్నాతా ధర్మశీలాఽనిలాశనా .

వీరభద్రప్రియా వీరా మహాకాలసముద్భవా .. 117..

విద్యాధరప్రియా సిద్ధా విద్యాధరనిరాకృతిః .

ఆప్యాయనీ హరంతీ చ పావనీ పోషణీ ఖిలా .. 118..

మాతృకా మన్మథోద్భూతా వారిజా వాహనప్రియా .

కరీషిణీ సుధావాణీ వీణావాదనతత్పరా .. 119..

సేవితా సేవికా సేవ్యా సినీవాలీ గురుత్మతీ .

అరుంధతీ హిరణ్యాక్షీ మృగాంకా మానదాయినీ .. 120..

వసుప్రదా వసుమతీ వసోర్ధారా వసుంధరా .

ధరాధరా వరారోహా వరావరసహస్రదా .. 121..

శ్రీఫలా శ్రీమతీ శ్రీశా శ్రీనివాసా శివప్రియా .

శ్రీధరా శ్రీకరీ కల్యా శ్రీధరార్ధశరీరిణీ .. 122..

అనంతదృష్టిరక్షుద్రా ధాత్రీశా ధనదప్రియా .

నిహంత్రీ దైత్యసంఘానాం సింహికా సింహవాహనా .. 123..

సుషేణా చంద్రనిలయా సుకీర్తిశ్ఛిన్నసంశయా .

రసజ్ఞా రసదా రామా లేలిహానాఽమృతస్రవా .. 124..

నిత్యోదితా స్వయంజ్యోతిరుత్సుకా మృతజీవనీ .

వజ్రదండా వజ్రజిహ్వా వైదేహీ వజ్రవిగ్రహా .. 125..

మంగల్యా మంగలా మాలా మలినా మలహారిణీ .

గాంధర్వీ గారుడీ చాంద్రీ కంబలాశ్వతరప్రియా .. 126..

సౌదామినీ జనానందా భ్రుకుటీకుటిలాననా .

కర్ణికారకరా కక్ష్యా కంసప్రాణాపహారిణీ .. 127..

యుగంధరా యుగావర్త్తా త్రిసంధ్యా హర్షవర్ధనీ .

ప్రత్యక్షదేవతా దివ్యా దివ్యగంధా దివాపరా .. 128..

శక్రాసనగతా శాక్రీ సాధ్వీ నారీ శవాసనా .

ఇష్టా విశిష్టా శిష్టేష్టా శిష్టాశిష్టప్రపూజితా .. 129..

శతరూపా శతావర్త్తా వినతా సురభిః సురా .

సురేంద్రమాతా సుద్యుమ్నా సుషుమ్నా సూర్యసంస్థితా .. 130..

సమీక్ష్యా సత్ప్రతిష్ఠా చ నివృత్తిర్జ్ఞానపారగా .

ధర్మశాస్త్రార్థకుశలా ధర్మజ్ఞా ధర్మవాహనా .. 131..

ధర్మాధర్మవినిర్మాత్రీ ధార్మికాణాం శివప్రదా .

ధర్మశక్తిర్ధర్మమయీ విధర్మా విశ్వధర్మిణీ .. 132..

ధర్మాంతరా ధర్మమేఘా ధర్మపూర్వా ధనావహా .

ధర్మోపదేష్ట్రీ ధర్మాత్మా ధర్మగమ్యా ధరాధరా .. 133..

కాపాలీశా కలామూర్తిః కలాకలితవిగ్రహా .

సర్వశక్తివినిర్ముక్తా సర్వశక్త్యాశ్రయాశ్రయా .. 134..

సర్వా సర్వేశ్వరీ సూక్ష్మా సుసూక్ష్మా జ్ఞానరూపిణీ .

ప్రధానపురుషేశేశా మహాదేవైకసాక్షిణీ .

సదాశివా వియన్మూర్తిర్విశ్వమూర్తిరమూర్తికా .. 135..

ఏవం నామ్నాం సహస్రేణ స్తుత్వాఽసౌ హిమవాన్ గిరిః .

భూయః ప్రణమ్య భీతాత్మా ప్రోవాచేదం కృతాంజలిః .. 1..

యదేతదైశ్వరం రూపం ఘోరం తే పరమేశ్వరి .

భీతోఽస్మి సాంప్రతం దృష్ట్వా రూపమన్యత్ ప్రదర్శయ .. 2..

ఏవముక్తాఽథ సా దేవీ తేన శైలేన పార్వతీ .

సంహృత్య దర్శయామాస స్వరూపమపరం పునః .. 3..

నీలోత్పలదలప్రఖ్యం నీలోత్పలసుగంధికం .

ద్వినేత్రం ద్విభుజం సౌమ్యం నీలాలకవిభూషితం .. 4..

రక్తపాదాంబుజతలం సురక్తకరపల్లవం .

శ్రీమద్ విశాలసంవృత్తలలాటతిలకోజ్జ్వలం .. 5..

భూషితం చారుసర్వాంగం భూషణైరతికోమలం .

దధానమురసా మాలాం విశాలాం హేమనిర్మితాం .. 6..

ఈషత్స్మితం సుబింబోష్ఠం నూపురారావసంయుతం .

ప్రసన్నవదనం దివ్యమనంతమహిమాస్పదం .. 7..

తదీదృశం సమాలోక్య స్వరూపం శైలసత్తమః .

భీతిం సంత్యజ్య హృష్టాత్మా బభాషే పరమేశ్వరీం .. 8..

.. ఇతి శ్రీకూర్మపురాణే పార్వతీ సహస్రనామ స్తోత్రం సంపూర్ణం ..

శ్రీపార్వతీశ్రీకంఠస్తోత్రం

(శ్రీగరలపురతః ప్రస్థానసమయే)

బహుభ్యో ఘస్రేభ్యస్తవ పదసరోజాతయుగలం

నిరీక్ష్యాహం మోదం బహులమగమం శైలతనయే .

భవిష్యాన్మాతస్త్వత్పదయుగసరోజాతవిరహా-

ద్భవేద్యః ఖేదస్తం శమయ హృదయాబ్జే విలసనాత్ .. 1..

ప్రభోఽష్టమూర్తే మమ చిత్తమధ్యే సంస్థాప్య చైకాం తవ మూర్తిమారాత్ .

అపి స్థితస్య ప్రముదం విధేహి కా తే క్షతిస్తేన కృపాపయోధే .. 2..

మన్మూర్తిమేకాం తవ పాదమూలే దధాసి యస్మాచ్ఛశిబాలమౌలే .

తస్మాచ్చ మన్మానసపంకజాతే త్వయా విధేయా తవ మూర్తిరేకా .. 3..

ఆకాశస్య విభుత్వాత్తత్రస్థత్వాచ్చ పాదపద్మస్య .

తవ నటనాథ పదం మచ్చిత్తే స్ఫురతాద్ధి యత్ర కుత్రాపి .. 4..

ఇతి శృంగేరి శ్రీజగద్గురు శ్రీసచ్చిదానందశివాభినవనృసింహ-

భారతీస్వామిభిః విరచితం శ్రీపార్వతీశ్రీకంఠస్తోత్రం సంపూర్ణం .

శ్రీపార్వతీశ్రీకంఠస్తుతిః

(శ్రీగరలపురప్రవేశకాలే)

ఆసన్బహవో ఘస్రా మాతస్త్వచ్చరణదర్శనం హిత్వా

పార్వతి కృతార్థతాం ఖలు గమితస్త్వత్పాదదర్శనాదద్య .. 1..

సచ్చిత్సుఖస్వరూపాం బ్రహ్మైతత్పశ్యతేందుశీర్షాఖ్యం .

ఇతి వదతి శైలతనయా సాక్షాన్నూనం ప్రసారితాంగుల్యా .. 2..

భక్తానాం పాపవృక్షౌఘచ్ఛేదనాయేందుశేఖర .

బిభర్షి పట్టసం రత్నత్సరుం కిం లోకశంకర .. 3..

స్పృష్టస్య చైకేన పదాసురస్య మహత్పదం ముక్తిరభూత్కిలాస్య .

స్పర్శేఽన్యపాదస్య ఫలం హి దాతుం నాస్తీత్యతో వ్యోమ్ని దధాసి చాన్యం .. 4..

ఇతి శృంగేరి శ్రీజగద్గురు శ్రీసచ్చిదానందశివాభినవనృసింహ-

భారతీస్వామిభిః విరచితా శ్రీపార్వతీశ్రీకంఠస్తుతిః సంపూర్ణా .