Sacred Stotras & Deities

జగన్మంగలా ప్రాతఃస్మరణస్తోత్రం

గణేశసూరిచంద్రాత్రేయవిరచితం

ప్రాతః స్మరామి గిరిజాం నవచంపకాభాం

కౌసుంభరాగరుచిరం వసనం వసానాం .

వీణానినాదకలనాకులలోలమౌలి-

మంకస్థకీరకలనాదకృతోఽనుమోదం .. 1..

ప్రాతర్నమామి భవభామిని తేఽఙ్ఘ్రియుగ్మం

సద్యఃప్రఫుల్లనదకోకనదానుకారి .

భక్తిప్రణమ్రదివిషడ్గణమౌలికోటి-

వ్యాసక్తహీరరుచిభిః పరిదీప్యమానం .. 2..

దివ్యప్రభం  కనకనిర్మితరత్నచిత్ర -

మంజీరరశ్మిలలితం ఘనగూఢవృత్తం  .

గుల్ఫద్వయం జనని తే పరిభావయామి

ప్రాతః ప్రబుద్ధనవనీరజముంజులశ్రీః .. 3..

జంఘే శుభే తుహినాద్రిధరజే త్వదీయే 

వృత్తానుపూర్వరచితే స్మరభూమిభర్తుః .

మత్తద్విపేంద్రకరబంధురతాపహారే

ప్రాతః స్మృతే సకలసంపదమాశు దత్తాం .. 4..

కామస్య శంభువశకారి మహౌషధీభిః

సంపూరితం చటులసంపుటయుగ్మలంబం ..

జానుద్వయం కనకనిర్మితదర్పణశ్రీః

ప్రాతస్తుషారగిరిజే తవ చింతయామి .. 5..

రంభాభిరూప్యమదహారినవప్రకారౌ

భక్తాఘపర్వతపరాకృతివజ్రమారౌ .

ధ్యాయామి తేఽమ్బ ప్రతినాయకపోషకారా-

వూరుప్రగే హరరతాహరసజ్జవీరౌ .. 6..

ప్రాతర్భజామి జనమోహిని తే నితంబం

సంరబ్ధమన్మథమహేశవిమర్దభూమిం .

యల్లీలయా వితనునాపి స భూతనాథః

సద్యో భవద్భవనకింకరతామలంభి .. 7..

యత్ర స్వజీవనమవేక్ష్య రతీశ్వరేణ

స్వం మందిరం తు నిరమాయి భవం విజేతుం .

తత్తే శ్రయే గిరిసుతే జఘనం ప్రభాతే

కాంచీగుణగ్రథితరత్నవిరోచమానం .. 8..

యశ్చాణిమాద్యఖిలసిద్ధివిలాసభూమి-

ర్యోఽజీవయద్ధరరుషా నిహతం రతీశం .

యస్మాదుదేతి నవరోమలతాతిదివ్యా

తం చింతయామి గిరిజే తవ నాభికూపం .. 9..

బ్రహ్మాణడమండలమిదం విధివాసరాంతే

యస్మిన్నివాసమకరోద్భువి వస్తురూపం .

తన్ముష్టిమేయముదరం హరనాయికే తే

సంచింతయే వికచపంకజపింజరాభం .. 10..

అర్హన్మనోరథపయఃపరిపూర్ణరూపౌ

దివ్యాంగరాగలులితావతిగాఢవృత్తౌ .

ప్రాణప్రియాంగపరిరంభణవామనాగ్రౌ

ప్రాతః స్తనౌ తవ భజామి భవాంగభూషే .. 11..

దైత్యవ్రజప్రమథనోత్కటకోటివీర్యౌ

కోదండకాండకలితౌ కలకంకణాంకౌ .

కామారికంఠకలనాకమనీయకాంతీ

ప్రాతః కరౌ కనకసుందరి తే స్మరామి .. 12..

పాశాంకుశాభిరుచిరావపరౌ కరౌ తౌ

కేయూరకంకణకరోర్మికరాభిరామౌ .

ఊర్ద్ధ్వౌ భవద్భజనచంచుజనాంతరాయ-

నిర్వాపణైకనిపుణావుషసి స్మరామి .. 13..

ప్రత్యగ్రకోకనదకోషవికాసమాన-

సంవర్తికాః కరచతుష్టయశాఖికాస్తే .

మాణిక్యకందకిరణోత్కలికానుకారా

మాం పాతు భూతపతిగేహిని కల్య ఏతాః .. 14..

నిర్భర్స్తితాంబుజదలామలకోమలాభం

పద్మాంకితం కరతలద్వయయుగ్మమంబ .

ప్రాతర్భవత్పదసరోరుహలీయమాన-

చేతోఽలినః శిరసి మే దయాయ నిధేహి .. 15..

విద్యానటీనటనకర్మవిశాలశాలా-

సప్తస్వరైకజనిభూర్జితకంబులీలః .

కంఠస్తవైష  నవచంపకకోరకాభః

ప్రాతః స్మృతః శమయతాచ్ఛమలం మదీయం  .. 16..

నారంగరంగపరిభంగవిధాయిభర్గ-

భవ్యాంగులీపరిచితం సురతాంతరాలే .

స్వం వీక్షితుం  న ముకురో రతినాయకస్య

ప్రాతర్భజామి చిబుకం హిమశైలజే తే .. 17..

బంధూకబంధురధరః స్మితపాటలస్తే

సద్యో వికస్వరముఖాంబుజపత్రలీలః .

ప్రేయోమిలిందపరిపీతమరందసారః

ప్రాతర్భవాని భవతాన్మమ మంగలాయ .. 18..

సౌదామినీద్యుతినిరాకరణప్రవీణ-

దంతాలిరంబ తవ దాడిమబీజవర్ణా .

ధ్వాంతం ధునోతు మమ కాంచనబిందుకీర్ణా

ప్రాతర్భవాని భవచుంబనరాగపూర్ణా  .. 19..

కర్ణావతంసఘనరత్నరుచాభిరామౌ

కాశ్మీరపత్రరచనానులలోలలీలౌ .

ప్రాణేశదంతదలనామలకోమలాంకౌ

పాతాం ప్రభాతసమయే తవ దేవి గల్లౌ .. 20..

నాసాం స్మరామి గిరిరాజసుతే భవత్యాః

ప్రాతఃప్రబుద్ధతిలపుష్యసమానభాసాం .

శ్వాసానుమోదసరణీసురభీకృతాశాం

ప్రాణేశచిత్తపరికర్షణదివ్యపాశాం .. 21..

త్వల్లోచనే చటులఖంజనగంజనేయే

ధ్యాయంతి నిశ్చలధియోఽమ్బ విభాతకాలే .

నిస్స్వార్థపాదనికరోపగతాన్ శిరఃసు

బద్ధాంజలీన్ క్షితిభృతోఽపి నిభాలయంతి .. 22..

క్రూరాకృతీ ఖలకులే సరలే స్వవర్గే

ప్రేమాంచితే భవమనోభవభావనేఽమ్బ .

స్వాభావికప్రకృతికే పరివారవర్గే

ప్రాతః శుభాని కురుతాం భ్రుకుటీలతే తే .. 23..

కేశాంధకారరజనీపతినేమిబింబం

సామిందుఖండకలితం శిఖిలోచనాంకం .

కామారికామమతికాజనిమూలకందం

భాలం  భజామి తవ దేవి విభాతకాలే .. 24..

మాణిక్యనిర్మితరతీశరథాంగజైత్ర-

తాటంకయుగ్మలలితం నవకంజయుక్తం .

కర్ణద్వయం చపలలోచనకోణభాసి

ప్రాతర్మమాపహరతామఖిలం కలంకం .. 25..

మన్మానసే సరసి కిం నవపుండరీకం

కిం  మన్మనోవియతీ శారదమిందుబింబం .

భర్గస్య  సౌఖ్యసదనం సురతోత్సవేషు

ధ్యాయామి దుఃఖదలనం వదనం శివం తే  .. 26..

దివ్యాంగదీప్తిసరసీవికసన్ముఖాబ్జ-

సంలీనమత్తమధుపావలికాంతకాంతం .

వక్త్రాయమానవిధుబింబకలంకకల్పం

కైశ్యం కుమారజనయిత్రి తవ స్మరామి .. 27..

ధ్యాత్వా శిరస్యుషసి యే గురుపాదయుగ్మం

త్వాం చిత్కలాం జనని చేతసి చింతయంతి  .

తే వాంఛితాని సమవాప్య నితాంతమంతే

పూర్ణం పరాత్పరతరం తవ ధామ యాంతి .. 28..

ప్రాతః స్మరామి జనయిత్రి జగత్పవిత్రం

త్వన్నామ మంగలమిదం కలయంతి యేఽన్తః .

తే మత్తకిన్నరవధూకుచకుంకుమాంకాః

కామం కలాపినగరావనిగా రమంతే  .. 29. .

దేవి త్వదీయనఖకోటిలవస్య శోభాం

శేషోఽపి నాలమతివర్ణయితుం గురుర్వా .

యచ్చాపలం వ్యరచి తత్ర మయాల్పమత్యా

క్షంతవ్యమేవ తవ తచ్ఛిశుభాషణత్వాత్ .. 30..

ఉచ్చావచప్రలపనం యదిహాస్తి కించి-

త్తత్రాపరాధకణికాపి న మే విభావ్యా .

యాదృక్ త్వయా హృదయవర్తిధియా నియుక్తా-

స్తాదృఙ్మయా విరచితం విదితం తవాపి .. 31..

రుద్రః పితా మమ తథా జననీ భవానీ

మన్నామ దేవి గణనాథ ఇతి ప్రసిద్ధం .

జాయేత చైతదఖిలం హి యథా యథార్థం

తాదృగ్విధేహి దయయా కిమితః పరం  తే .. 32..

యః సంప్రబుద్ధ్య హరనామసుందరికల్ప ఉచ్చైః .

స్తోత్రం పఠిష్యతి జనస్త్వయి వృత్తభక్తిః .

తం సర్వతోఽపి కృపయా నిజమాత్మజంవ -

త్త్వం రక్ష రక్ష జనజీవిని కిం బహూక్త్యా .. 33..

ఇతి శ్రీమయూగిరినివాసిచంద్రాత్రేయోపనామకగణేశసూరీవిరచితం

జగన్మంగలాప్రాతఃస్మరణం .

శుభమస్తు .

సంవత్ 1756 వర్షే భాద్రపదమాసే శుక్లపక్షే 14 సోమవారే లిఖితం .

పాఠ శివనందనస్వహస్తేన ..

ఆత్మార్పణం

అపార-కారుణ్య-సుధా-సముద్ర-రింగత్తరంగావలి-లీనచేతాః .

వందారు-వృందాథిత-కల్పవల్లి ! దుర్గా-ప్రసాదస్య గతిస్త్వమేకా .. 1..

అసీమ-సారల్య-లతా-ప్రతాన-విజృంభణోద్యాన-విశాల-సీమా .

నిఃశేష-భక్తార్తి-వినాశ-శీలే ! దుర్గా-ప్రసాదస్య గతిస్త్వమేకా .. 2..

ఉదార-చారిత్ర-వికాశ-గంధ-సంచారణాడంబర-రోదసీకా .

హృద్యావదానోత్కర-భాసమానే  ! దుర్గా-ప్రసాదస్య గతిస్త్వమేకా .. 3..

సంసార-దావానల-దీనభక్త-ప్రసాదనైకామృత-పూర-పూర్తిః .

ఉపాసక-ప్రీణన-బద్ధకక్షే ! దుర్గా-ప్రసాదస్య గతిస్త్వమేకా .. 4..

దౌర్భాగ్య-తూల-జ్వలనాయమాన-సహస్రనామ-శ్రవణార్ద్ర-చిత్తా .

నిసర్గ-సౌభాగ్య-విసర్గ-నిష్ఠే ! దుర్గా-ప్రసాదస్య గతిస్త్వమేకా .. 5..

క్లిశ్యత్-కవిత్వ-వ్రతతీ-వితాన-ప్రకాశనానభ్ర-నభస్యవృష్టిః .

సముచ్ఛలద్-భక్తి-విశేష-తుష్టే ! దుర్గా-ప్రసాదస్య గతిస్త్వమేకా .. 6..

దృక్పాత-మాత్రార్పిత-సాధ్యసిద్ధి-నిషేవణానందిత-సాధకేంద్రా .

వదాన్య-సీమాయిత-చిత్తవృత్తే ! దుర్గా-ప్రసాదస్య గతిస్త్వమేకా .. 7..

పద్మాసనోపేంద్ర-మహేంద్ర-మౌలి-మందార-మాలాంకిత-పాదపీఠా .

మాతః ! శిశూక్తి-శ్రవణ-స్వభావే ! దుర్గా-ప్రసాదస్య గతిస్త్వమేకా .. 8..

సేవాసక్త-సురాసురావలి-శిరో-మాల్యాంతరాల-స్ఖల-

ద్ధూలీ-ధూసర-పాదపీఠ-విలుఠత్-సౌభాగ్య-సీమాయితే ! .

నిర్వ్యాజ-స్థిర-భక్తియోగ-సులభే ! మాతస్తవారాధనే

చేతో మేఽనిశముద్గతాధిక-రసం  వైపుల్యమాలంబతాం ..

ఇతి శ్రీదుర్గాప్రసాదద్వివేదీవిరచితం ఆత్మార్పణం సంపూర్ణం ..

జగదీశ్వరీవందనా

జగదీశ్వరీ ! శుభం నః శక్తా త్వమేవ దాతుం .

భక్తాస్తవానురక్తాః సోఢుం వ్యథామశక్తాః .

తేషాం త్వమేవ శక్తా బాధామధో విధాతుం .. జగదీశ్వరీ .. 1..

దుష్టా అహర్నిశం హా ! ఘ్నంతి హ్యసంఖ్యకా గాః .

మాతర్జగత్తలే నా కోప్యస్తి తాస్తు పాతుం !  జగదీశ్వరీ .. 2..

ఆయత్త ఏష దేశః క్వ స్యాత్ సుఖస్య లేశః ?

భారస్త్వయి హ్యశేషః శక్యో జనైర్నిధాతుం .. జగదీశ్వరీ .. 3..

దీనా దశా తు నాథః సందృశ్యతే  హి మాతః !

సర్వ శుభం తవాతః సామర్థ్యమస్తి రాతుం .. జగదీశ్వరీ .. 4..

ఇతి జగదీశ్వరీవందనా సంపూర్ణా .

రచయితృ -  శ్రీబాలకృష్ణశర్మా సారస్వతః .

ఆత్మతత్త్వనిరూపణం

(దేవీభాగవతతః దేవీగీతాయాం ప్రథమోఽధ్యాయః)

శ్రీదేవ్యువాచ -

శృణ్వంతు నిర్జరాః సర్వే వ్యాహరంత్యా వచో మమ .

యస్య శ్రవణమాత్రేణ మద్రూపత్వం ప్రపద్యతే .. 1..

అహమేవాస పూర్వం తు నాన్యత్కించిన్నగాధిప .

తదాత్మరూపం చిత్సంవిత్పరబ్రహ్మైకనామకం .. 2..

అప్రతర్క్యమనిర్దేశ్యమనౌపమ్యమనామయం .

తస్య కాచిత్స్వతః సిద్ధా శక్తిర్మాయేతి విశ్రుతా .. 3..

న సతీ సా నాసతీ సా నోభయాత్మా విరోధతః .

ఏతద్విలక్షణా కాచిద్వస్తుభూతాస్తి సర్వదా .. 4..

పావకస్యోష్ణతేవేయముష్ణాంశోరివ దీధితిః .

చంద్రస్య చంద్రికేవేయం మమేయం సహజా ధ్రువా .. 5..

తస్యాం కర్మాణి జీవానాం జీవాః కాలాశ్చ సంచరే .

అభేదేన విలీనాః స్యుః సుషుప్తౌ వ్యవహారవత్ .. 6..

స్వశక్తేశ్చ సమాయోగాదహం బీజాత్మతాం గతా .

స్వాధారావరణాత్తస్యా దోషత్వం చ సమాగతం .. 7..

చైతన్యస్య సమాయోగాన్నిమిత్తత్వం చ కథ్యతే .

ప్రపంచపరిణామాచ్చ సమవాయిత్వముచ్యతే .. 8..

కేచిత్తాం తప ఇత్యాహుస్తమః కేచిజ్జడం పరే .

జ్ఞానం మాయాం ప్రధానం చ ప్రకృతిం శక్తిమప్యజాం .. 9..

విమర్శ ఇతి తాం ప్రాహుః శైవశాస్త్రవిశారదాః .

అవిద్యామితరే ప్రాహుర్వేదతత్త్వార్థచింతకాః .. 10..

ఏవం నానావిధాని స్యుర్నామాని నిగమాదిషు .

తస్యా జడత్వం దృశ్యత్వాజ్జ్ఞాననాశాత్తతోఽసతీ .. 11..

చైతన్యస్య న దృశ్యత్వం దృశ్యత్వే జడమేవ తత్ .

స్వప్రకాశం చ చైతన్యం న పరేణ ప్రకాశితం .. 12..

అనవస్థాదోషసత్త్వాన్న స్వేనాపి ప్రకాశితం .

కర్మకర్త్రీవిరోధః స్యాత్తస్మాత్తద్దీపవత్స్వయం .. 13..

ప్రకాశమానమన్యేషాం భాసకం విద్ధి పర్వత .

అత ఏవ చ నిత్యత్వం సిద్ధసంవిత్తనోర్మమ .. 14..

జాగ్రత్స్వప్నసుషుప్త్యాదౌ దృశ్యస్య వ్యభిచారతః .

సంవిదో వ్యభిచారశ్చ నానుభూతోఽస్తి కర్హిచిత్ .. 15..

యది తస్యాప్యనుభవస్తర్హ్యయం యేన సాక్షిణా .

అనుభూతః స ఏవాత్ర శిష్టః సంవిద్వపుః పురా .. 16..

అత ఏవ చ నిత్యత్వం ప్రోక్తం సచ్ఛాస్త్రకోవిదైః .

ఆనందరూపతా చాస్యాః పరప్రేమాస్పదత్వతః .. 17..

మా న భూవం హి భూయాసమితి ప్రేమాత్మని స్థితం .

సర్వస్యాన్యస్య మిథ్యాత్వాదసంగత్వం స్ఫుటం మమ .. 18..

అపరిచ్ఛిన్నతాప్యేవమత ఏవ మతా మమ .

తచ్చ జ్ఞానం నాత్మధర్మో ధర్మత్వే జడతాఽఽత్మనః .. 19..

జ్ఞానస్య జడశేషత్వం న దృష్టం న చ సంభవి .

చిద్ధర్మత్వం తథా నాస్తి చితశ్చిన్న హి భిద్యతే .. 20..

తస్మాదాత్మా జ్ఞానరూపః సుఖరూపశ్చ సర్వదా .

సత్యః పూర్ణోఽప్యసంగశ్చ ద్వైతజాలవివర్జితః .. 21..

స పునః కామకర్మాదియుక్తయా స్వీయమాయయా .

పూర్వానుభూతసంస్కారాత్ కాలకర్మవిపాకతః .. 22..

అవివేకాచ్చ తత్త్వస్య సిసృక్షావాన్ప్రజాయతే .

అబుద్ధిపూర్వః సర్గోఽయం కథితస్తే నగాధిప .. 23..

ఏతద్ధి యన్మయా ప్రోక్తం మమ రూపమలౌకికం .

అవ్యాకృతం తదవ్యక్తం మాయాశబలమిత్యపి .. 24..

ప్రోచ్యతే సర్వశాస్త్రేషు సర్వకారణకారణం .

తత్త్వానామాదిభూతం చ సచ్చిదానందవిగ్రహం .. 25..

సర్వకర్మఘనీభూతమిచ్ఛాజ్ఞానక్రియాశ్రయం .

హ్రీంకారమంత్రవాచ్యం తదాదితత్త్వం తదుచ్యతే .. 26..

తస్మాదాకాశ ఉత్పన్నః శబ్దతన్మాత్రరూపకః .

భవేత్స్పర్శాత్మకో వాయుస్తేజోరూపాత్మకం పునః .. 27..

జలం రసాత్మకం పశ్చాత్తతో గంధాత్మికా ధరా .

శబ్దైకగుణ ఆకాశో వాయుః స్పర్శరవాన్వితః .. 28..

శబ్దస్పర్శరూపగుణం తేజ ఇత్యుచ్యతే బుధైః .

శబ్దస్పర్శరూపరసైరాపో వేదగుణాః స్మృతాః .. 29..

శబ్దస్పర్శరూపరసగంధైః పంచగుణా ధరా .

తేభ్యోఽభవన్మహత్సూత్రం యల్లింగం పరిచక్షతే .. 30..

సర్వాత్మకం తత్సంప్రోక్తం సూక్ష్మదేహోఽయమాత్మనః .

అవ్యక్తం కారణో దేహః స చోక్తః పూర్వమేవ హి .. 31..

యస్మింజగద్బీజరూపం స్థితం లింగోద్భవో యతః .

తతః స్థూలాని భూతాని పంచీకరణమార్గతః .. 32..

పంచసంఖ్యాని జాయంతే తత్ప్రకారస్త్వథోచ్యతే .

పూర్వోక్తాని చ భూతాని ప్రత్యేకం విభజేద్ద్విధా .. 33..

ఏకైకం భాగమేకస్య చతుర్ధా విభజేద్గిరే .

స్వస్వేతరద్వితీయాంశే యోజనాత్పంచ పంచ తే .. 34..

తత్కార్యం చ విరాడ్దేహః స్థూలదేహోఽయమాత్మనః .

పంచభూతస్థసత్త్వాంశైః శ్రోత్రాదీనాం సముద్భవః .. 35..

జ్ఞానేంద్రియాణాం రాజేంద్ర ప్రత్యేకం మిలితైస్తు తైః .

అంతఃకరణమేకం స్యాద్వృత్తిభేదాచ్చతుర్విధం .. 36..

యదా తు సంకల్పవికల్పకృత్యం

     తదా భవేత్తన్మన ఇత్యభిఖ్యం .

స్యాద్బుద్ధిసంజ్ఞం చ యదా ప్రవేత్తి

     సునిశ్చితం సంశయహీనరూపం .. 37..

అనుసంధానరూపం తచ్చిత్తం చ పరికీర్తితం .

అహంకృత్యాత్మవృత్త్యా తు తదహంకారతాం గతం .. 38..

తేషాం రజోంశైర్జాతాని క్రమాత్కర్మేంద్రియాణి చ .

ప్రత్యేకం మిలితైస్తైస్తు ప్రాణో భవతి పంచధా .. 39..

హృది ప్రాణో గుదేఽపానో నాభిస్థస్తు సమానకః .

కంఠదేశేఽప్యుదానః స్యాద్వ్యానః సర్వశరీరగః .. 40..

జ్ఞానేంద్రియాణి పంచైవ పంచకర్మేంద్రియాణి చ .

ప్రాణాదిపంచకం చైవ ధియా చ సహితం మనః .. 41..

ఏతత్సూక్ష్మశరీరం స్యాన్మమ లింగం యదుచ్యతే .

తత్ర యా ప్రకృతిః ప్రోక్తా సా రాజంద్వివిధా స్మృతా .. 42..

సత్త్వాత్మికా తు మాయా స్యాదవిద్యా గుణమిశ్రితా .

స్వాశ్రయం యా తు సంరక్షేత్సా మాయేతి నిగద్యతే .. 43..

తస్యాం యత్ప్రతిబింబం స్యాద్బింబభూతస్య చేశితుః .

స ఈశ్వరః సమాఖ్యాతః స్వాశ్రయజ్ఞానవాన్పరః .. 44..

సర్వజ్ఞః సర్వకర్తా చ సర్వానుగ్రహకారకః .

అవిద్యాయాం తు యత్కించిత్ప్రతిబింబం నగాధిప .. 45..

తదేవ జీవసంజ్ఞం స్యాత్సర్వదుఃఖాశ్రయం పునః .

ద్వయోరపీహ సంప్రోక్తం దేహత్రయమవిద్యయా .. 46..

దేహత్రయాభిమానాచ్చాప్యభూన్నామత్రయం పునః .

ప్రాజ్ఞస్తు కారణాత్మా స్యాత్సూక్ష్మదేహీ తు తైజసః .. 47..

స్థూలదేహీ తు విశ్వాఖ్యస్త్రివిధః పరికీర్తితః .

ఏవమీశోఽపి సంప్రోక్త ఈశసూత్రవిరాట్పదైః .. 48..

ప్రథమో వ్యష్టిరూపస్తు సమష్ట్యాత్మా పరః స్మృతః .

స హి సర్వేశ్వరః సాక్షాజ్జీవానుగ్రహకామ్యయా .. 49..

కరోతి వివిధం విశ్వం నానాభోగాశ్రయం పునః .

మచ్ఛక్తిప్రేరితో నిత్యం మయి రాజన్ప్రకల్పితః .. 50..

ఇతి దేవీభాగవతే సప్తమస్కంధేద్వాత్రింశాధ్యాయాంతర్గతం

దేవ్యాః ఆత్మతత్త్వనిరూపణం  సమాప్తం .

ఇతి శ్రీదేవీభాగవతే దేవీగీతాయాం ప్రథమోఽధ్యాయః .

అష్టాదశశక్తిపీఠస్తోత్రం

లంకాయాం శాంకరీ దేవీ కామాక్షీ కాంచికాపురే .

ప్రద్యుమ్నే శృంఖలాదేవీ చాముండీ క్రౌంచపట్టణే ..

అలంపురే జోగులాంబా శ్రీశైలే భ్రమరాంబికా .

కోల్హాపురే మహాలక్ష్మీ మాహూర్యే ఏకవీరికా ..

ఉజ్జయిన్యాం మహాకాలీ పీఠిక్యాం పురుహూతికా .

ఓఢ్యాయాం గిరిజాదేవీ మాణిక్యా దక్షవాటకే ..

హరిక్షేత్రే కామరూపా ప్రయాగే మాధవేశ్వరీ .

జ్వాలాయాం వైష్ణవీ దేవీ గయా మాంగల్యగౌరికా ..

వారణస్యాం విశాలాక్షీ కాశ్మీరేషు సరస్వతీ .

అష్టాదశ సుపీఠాని యోగినామపి దుర్లభం ..

సాయంకాలే పఠేన్నిత్యం సర్వశత్రువినాశనం .

సర్వరోగహరం దివ్యం సర్వసంపత్కరం శుభం ..

ఇతి అష్టాదశశక్తిపీఠస్తుతిః .

అష్టలక్ష్మీస్తోత్రం

  .. ఆదిలక్ష్మీ ..

సుమనసవందిత సుందరి మాధవి

     చంద్ర సహోదరి హేమమయే .

మునిగణమండిత మోక్షప్రదాయిని

     మంజుళభాషిణి వేదనుతే ..

పంకజవాసిని దేవసుపూజిత

     సద్గుణవర్షిణి శాంతియుతే .

జయజయ హే మధుసూదన కామిని

     ఆదిలక్ష్మి సదా పాలయ మాం .. 1..

   .. ధాన్యలక్ష్మీ ..

అహికలి కల్మషనాశిని కామిని

     వైదికరూపిణి వేదమయే .

క్షీరసముద్భవ మంగలరూపిణి

     మంత్రనివాసిని మంత్రనుతే ..

మంగలదాయిని అంబుజవాసిని

     దేవగణాశ్రిత పాదయుతే .

జయజయ హే మధుసూదన కామిని

     ధాన్యలక్ష్మి సదా పాలయ మాం .. 2..

  .. ధైర్యలక్ష్మీ ..

జయవరవర్ణిని వైష్ణవి భార్గవి

     మంత్రస్వరూపిణి మంత్రమయే .

సురగణపూజిత శీఘ్రఫలప్రద

     జ్ఞానవికాసిని శాస్త్రనుతే ..

భవభయహారిణి పాపవిమోచని

     సాధుజనాశ్రిత పాదయుతే .

జయజయ హే మధుసూదన కామిని

     ధైర్యలక్ష్మి సదా పాలయ మాం .. 3..

   .. గజలక్ష్మీ ..

జయజయ దుర్గతినాశిని కామిని

     సర్వఫలప్రద శాస్త్రమయే .

రథగజ తురగపదాది సమావృత

     పరిజనమండిత లోకనుతే ..

హరిహర బ్రహ్మ సుపూజిత సేవిత

     తాపనివారిణి పాదయుతే .

జయజయ హే మధుసూదన కామిని

     గజలక్ష్మి రూపేణ పాలయ మాం .. 4..

   .. సంతానలక్ష్మీ ..

అహిఖగ వాహిని మోహిని చక్రిణి

     రాగవివర్ధిని జ్ఞానమయే .

గుణగణవారిధి లోకహితైషిణి

     స్వరసప్త భూషిత గాననుతే ..

సకల సురాసుర దేవమునీశ్వర

     మానవవందిత పాదయుతే .

జయజయ హే మధుసూదన కామిని

     సంతానలక్ష్మి త్వం పాలయ మాం .. 5..

   .. విజయలక్ష్మీ ..

జయ కమలాసని సద్గతిదాయిని

     జ్ఞానవికాసిని గానమయే .

అనుదినమర్చిత కుంకుమధూసర-

     భూషిత వాసిత వాద్యనుతే ..

కనకధరాస్తుతి వైభవ వందిత

     శంకర దేశిక మాన్య పదే .

జయజయ హే మధుసూదన కామిని

     విజయలక్ష్మి సదా పాలయ మాం .. 6..

   .. విద్యాలక్ష్మీ ..

ప్రణత సురేశ్వరి భారతి భార్గవి

     శోకవినాశిని రత్నమయే .

మణిమయభూషిత కర్ణవిభూషణ

     శాంతిసమావృత హాస్యముఖే ..

నవనిధిదాయిని కలిమలహారిణి

     కామిత ఫలప్రద హస్తయుతే .

జయజయ హే మధుసూదన కామిని

     విద్యాలక్ష్మి సదా పాలయ మాం ..7..

   .. ధనలక్ష్మీ ..

ధిమిధిమి ధింధిమి ధింధిమి ధింధిమి

     దుందుభి నాద సుపూర్ణమయే .

ఘుమఘుమ ఘుంఘుమ ఘుంఘుమ ఘుంఘుమ

    శంఖనినాద సువాద్యనుతే ..

వేదపురాణేతిహాస సుపూజిత

     వైదికమార్గ ప్రదర్శయుతే .

జయజయ హే మధుసూదన కామిని

     ధనలక్ష్మి రూపేణ పాలయ మాం .. 8..

జగదాదిశక్తిస్తోత్రం

దేవీం నమామి శిరసా జగదాదిశక్తిం

     కాత్యాయనీం భగవతీం సుఖదాం చ దుర్గాం .

యా హంతి రాక్షసగణాన్ యుధి భద్రకాలీ

     సా పాతు మాం భగవతీ గిరిజా కరాలీ .. 1..

మాహేశ్వరీ త్వమసి వైష్ణవీ నారసింహీ

     బ్రాహ్మీ త్వమేవ లలితా సురసుందరీ త్వం .

వారాహి షోడశి కరాలి శుభే త్వమైంద్రీ

     కౌమారి భైరవి జయే సతతం నమస్తే .. 2..

శైలే వనే వసతి యో వనరాజసింహ

     ఆరుహ్య తం భ్రమతి దుర్గమపర్వతేషు .

గ్రామేషు యా చ నగరేషు చ మందిరేషు

     సా పాతు మాం భగవతీ జగదాదిశక్తిః .. 3..

యా క్వాపి లోకజననీ ప్రథితా భవానీ

     యా సర్వమంగలయుతా చ శుభా మృడాణి .

తాం చండికాం హతఖలామధునా స్మరామి

     తాం కాలికాం భగవతీం శిరసా నమామి .. 4..

జ్వాలాముఖీ త్వమసి భానుముఖీ ప్రభా త్వ-

     ముల్కాముఖీ రవిముఖీ వడవాముఖీ త్వం .

కంఠే నిజే ధరతి యా రిపు ముండమాలాం

     సా పాతు మాం భగవతీ జగదాదిశక్తిః .. 5..

అష్టాదశాపి చ భుజాః ప్రభవంతి యస్యాః

     యా పూజ్యతే దశభుజా క్వచనాష్టహస్తా .

యా దైత్యశుంభ-మహిషాసుర-మర్దినీ చ

     తాం చండికాం భగవతీం ప్రణమామి దుర్గాం .. 6..

మాతంగినీ త్వమసి భూతభయంకరీ త్వం

     శ్రీకాలికాసి రిపుహా జగదంబికాసి .

వైరోచినీ త్వమసి కాలజయా తమిస్త్రా

     త్వం డాకినీ  యమనిశాసి నమోఽస్తు తుభ్యం .. 7..

భీమాకృతే త్రిపురసుందరి రాక్షసఘ్నే

     తారాఽఽకృతే త్రిపురభైరవి కాలవహ్నే .

ఘోరాకృతే త్రిగుణదే త్రిపురారివంద్యే

     ధూమాకృతే భువనజీవనదే నమస్తే .. 8..

కాల్యై నమోఽస్తు సతతం జగదంబికాయై

     దేవ్యై నమోఽస్తు హరిణాధిపవాహనాయై .

తేజః ప్రభాకిరణభూషితమస్తకాయై

     తస్యై నమోఽస్తు సతతం జగదాదిశక్త్యై .. 9..

యోత్పత్తిపాలనకరీ జగతీ జనానాం

     గంధర్వకిన్నరసురార్చితపాదపద్మా .

శర్వప్రియా ప్రియశివా శివదా శివానీ

     సా పాతు మాం భగవతీ గిరిజా భవానీ .. 10..

యా శాంకరీ భగవతీ వృషవాహనస్థా

     తాం మోక్షదాం శివకరీం హృదయే భజామి .

శంఖత్రిశూలహలచక్రగదాఽఽయుధా యా

     సా పాతు మాం భగవతీ జగదాదిశక్తిః .. 11..

ఇతి శ్రీరామకిశోరమిశ్రవిరచితం జగదాదిశక్తిస్తోత్రం సంపూర్ణం .

అష్టలక్ష్మీ సంప్రత్ప్రదస్తవః

అథ సంపత్ప్రదస్తవః .

ప్రత్యూహద్ధ్వాంతచండాంశుః ప్రత్యూహారణ్యపావకః .

ప్రత్యూహసిహ్మశరభః పాతు నః పార్వతీసుతః ..

చిత్సభానాయకం వందే చింతాధికఫలప్రదం .

అపర్ణాస్వర్ణ కుంభాభ కుచాశ్లిష్టకలేవరం .. 1..

విరాడ్ఢృదయ పద్మస్థత్రికోణేశివయాసహ .

సయోనః కురుతేలాస్యమష్టలక్ష్మీః ప్రయచ్ఛతు .. 2..

శ్రుతిస్తంభాంతరేచక్ర యుగ్మేగిరిజయాసహ .

సయోనః కురుతేలాస్యమష్టలక్ష్మీః ప్రయచ్ఛతు .. 3..

శివకామీకుచాంభోజ సవ్యభాగవిరాజితః .

సయోనః కురుతేలాస్యమష్టలక్ష్మీః ప్రయచ్ఛతు .. 4..

కరస్థ డమరుధ్వాన పరిష్కృతరవాగమః .

సయోనః కురుతేలాస్యమష్టలక్ష్మీః ప్రయచ్ఛతు .. 5..

నారదబ్రహ్మ గోవింద వీణాతాల మృదంగకైః .

సయోనః కురుతేలాస్యమష్టలక్ష్మీః ప్రయచ్ఛతు .. 6..

జైమిని వ్యాఘ్రపాచ్ఛేషస్తు తిస్మేరముఖాంబుజః .

సయోనః కురుతేలాస్యమష్టలక్ష్మీః ప్రయచ్ఛతు .. 7..

తిల్వవిప్రైస్త్రయీ మార్గ పూజితాంఘ్రిసరోరుహః

సయోనః కురుతేలాస్యమష్టలక్ష్మీః ప్రయచ్ఛతు .. 8..

మంత్రనూపుర పద్పద్మ ఝణజ్ఝణి తదింద్ముఖః .

సయోనః కురుతేలాస్యమష్టలక్ష్మీః ప్రయచ్ఛతు .. 9..

సంపత్ప్రదమిదం స్తోత్రం ప్రాతరుత్థాయ యః పఠేత్ .

అచలాం శ్రియమాప్నోతి నటరాజప్రసాదతః .. 10..

ఇతి అష్టలక్ష్మీసంప్రత్ప్రదస్తవః .

అష్టమాతృకాస్తోత్రం

ఓం నమః శ్రీవిఘ్నేశ్వరాష్టమాతృకాభ్యః .

విఘ్నేశ్వర మహావీర సిద్ధిరూపాయ వృద్ధయే .

విఘ్ననాశాయ దేవాయ గణేశాయ నమామ్యహం .. 1..

పూర్వే బ్రహ్మాణీ దేవీ హంసమారుహ్య సంస్థితా .

పీతవర్ణప్రభా దేవీ శ్రీబ్రహ్మాణి నమోఽస్తు తే .. 2..

దక్షిణే శ్రీవారాహీ మహిషాసనసంస్థితా .

రక్తవర్ణాఽఙ్కుశహస్తా శ్రీవారాహి నమోఽస్తు తే .. 3..

పశ్చిమే చేంద్రాణీ దేవీ గజమారుహ్య సంస్థితా .

కుంకుమాభా వజ్రహస్తా శ్రీఇంద్రాణి నమోఽస్తు తే .. 4..

ఉత్తరే మాహేశ్వరీ దేవీ వృషమారుహ్య సంస్థితా .

శ్వేతవర్ణప్రభా దేవీ మాహేశ్వరి నమోఽస్తు తే .. 5..

ఆగ్నేయే బాలకౌమారీ మయూరకాంతిపూరణీ .

రక్తవర్ణా శక్తిహస్తా శ్రీకౌమారి నమోఽస్తు తే .. 6..

నైరృత్యే వైష్ణవీ దేవీ శ్యామాభా గరుడాసనా .

శంఖచక్రధరా దేవీ నారాయణి నమోఽస్తు తే .. 7..

వాయవ్యే చాముండా దేవీ సింహమారుహ్య సంస్థితా .

కకారమూర్తిధారీ చ ఖడ్గహస్తాం నమామ్యహం .. 8..

ఈశానే చండికా దేవీ ధూమ్రవర్ణా ప్రజ్వాలినీ .

కర్తిముండధరా దేవీ మహాలక్ష్మి నమోఽస్తు తే .. 9..

అష్టపీఠస్థితా దేవీరష్టవృక్షనివాసినీః .

అష్టభైరవసంయుక్తా అష్టమాతృకా నమామ్యహం .. 10..

సూర్యః సోమో మహీపుత్రో బుధో దేవాసురగురూ .

శనిశ్చ రాహుః కేతుశ్చ యమాయ చ నమో నమః .. 11..

ఇతి శ్రీ అష్టమాతృకాస్తోత్రం సంపూర్ణం ..

జగదంబార్తిక్యం

సర్వస్య స్వమసి మతా సద్విదుషామాద్యా

శ్రుతిభిః స్మృతిమిః శాస్త్రైః కవిభిః ప్రతిపాద్యా

గాయంతి త్వచ్చరితం నిపుణా వృతవాద్యాః

సా కా త్వత్తోఽన్యావతి నామ్నా పాపాద్యా

జయ దేవి ప్రణమదఖిలవరవితరణదక్షే

జయ జగదంబ సముద్ధృతశరణాగతలక్షే . ధ్రువ0.. 1..

మాతర్జగదుత్పత్తిస్థితిసంహృతిలీలే

సంశ్రితజనకల్మషవనకల్పదహనకీలే

సర్వత్ర సదా సాదరనతలాలనశీలే

స్వవిమలగుణగణరంజితవిధిశివధననీలే . జయ దేవి 0.. 2..

తవ సేవాఽర్థిజనానాం చింతామణిశాలా

భక్తమయూరాణాం తే స్మృతిరంబుదమాలా

త్వాం స్తోతుం త్వత్పురతో గీరపి ఖలు బాలా

కా తత్రాన్యకవికథా క్వ సుధా క్వ చ (1)హాలా? . జయ దేవి0.. 3..

ఇతి శ్రీరామనందనమయూరేశ్వరకృతం జగదంబార్తిక్యం సంపూర్ణం .

1. హాలాసురా .

అష్టమహిషీప్రార్థనాశతకం

శ్రీవేంకటేశదారా ధీరా క్షేమస్య మే సదాధారా .

కరుణావనసంచారా తారాసంకాశరత్నమయహారా .. 1..

నారాయణవనజనితా నారీ నారాయణస్య మే మాతా .

పారాయణార్హచరితా త్రాతా పీతాంబరేణ చాయాతా .. 2..

మాతర్భూమేర్యాతః ప్రాతః సాయం నమామి తవ పోతః .

నిహితం తవ పది చేతః కాతః పరమవితుమస్తి మాం మాతః .. 3..

లసనప్రసూనవేషే ప్రసు మే వసు మేఽద్య దేహి హరియోషే .

కుసుమైరాభ్యాం భాషే ప్రాసూయామాం మనః స్వసంతోషే .. 4..

కాంచీలాంఛితదేవీం కాంచనదేవీం చ వరదవశనీవీం .

వందే మహతీం దేవీం చంద్రాం దంతావలాద్రిసుఖపృథివీం .. 5..

మాధవసాప్తపదీనే మామవ గతినిర్జితేభవతి యూనే .

నవనవభవనవిధానే భవ భవ నిత్యం మదీయహృత్స్థానే .. 6..

సజ్జనరక్షణధన్యాం మాన్యాం మన్యే సరిత్పతేః కన్యాం .

మేదిన్యాం కామిన్యాం గుణ్యాం గణయేయ భూరి సుధరిణ్యాం .. 7..

కరుణామధుమయచరణామరుణామరుణాన్వవాయపరిచరణాం .

కరుణావివృతాభరణాం సుగుణాభరణాం భజామి హరిశరణాం .. 8..

మజ్జనయిత్రీం ధాత్రీం సజ్జనపాత్రీం సుదీర్ఘఝషనేత్రీం .

భేజే ప్రసూనగాత్రీం దాత్రీం పాత్రీం నతస్య హరిమైత్రీం .. 9..

లక్ష్మీమక్షయసదయాం సార్ద్రసుహృదయాం సముద్రహితతనయాం .

ఆశ్రితరక్షణవిజయామాజానీయాస్యహృదయశుభనిలయాం .. 10..

అంబాం కచలోలంబాం కంబుగ్రీవాం ప్రసన్నముఖబింబాం .

పదగతిజితకాదంబామంబుజవల్లీం నమామి లోకాంబాం .. 11..

సీతాస్మాకం మాతా సాకేతాధీశ్వరీష్టిభూజాతా .

పీతాంబరపరిణీతా త్రాతా పూతాఖిలేభ్య ఇతి గీతా .. 12..

హరిపరిచర్యాప్రీతా భూతత్రాతార్చితేతి కవిగీతా .

తాతోపమితా మాతా త్రాతా శాతాంగినీహ మాం సీతా .. 13..

సేవితదనుజత్రిజటా పాలితనిశ్రీకగర్గరత్రిజటా .

స్వవశీకృనపీతపటా ప్రతిభటహరిణాయ చాస్తు హరివేలా .. 14..

భాషావినుతవిశేషా భాషాపతిశేషవినుతపరిభాషా .

భూషాభిలషితభూషా భూషా భూషాయమానవపుషాస్తు .. 15..

ఘటికాద్రికుశలపేటీ సజ్జనసంత్రాణసక్తపరిపాటీ .

విలసితకాంచనశాటీ పాతు రతిభీష్టిదీనజనకోటీః .. 16..

వైదేహి దేహి విత్తం శ్రీదే పాదే హ లగ్నమథ చిత్తం .

కుర్యామార్యావృత్తం ధార్యం నిత్యం కరోమి తవ వృత్తం .. 17..

కరలలితకమలయుగలా కరికరచామరసుజాతమృద్వనిలా .

త్వరమభయం మే కమలా కురుతాజ్జననీ కరేణ హరిమహిలా .. 18..

నామాచలలక్ష్మి రమే మాయైవాచల ....స్వలోభమయే .

ఆశ్రితరక్షాకామే స్వాత్మజయుగలం చ దేహి హరిమామే .. 19..

ఉపమానాముపమైషా భూషా భూషాసు భాసు మంజూషా .

స్వవశీకృతాదిపురుషా సవిశేషా పాతుమస్తు హరియోషా .. 20..

అబలానాం ప్రబలాసౌ స్త్రీషు శ్రీరుత్తమా చ వామానాం .

రామాభిరామరామా శాంతా కాంతాసు కోపనాస్వేషా .. 21..

సర్వదసర్వద ....శ్రీః శ్రీదా శ్రీదార్చితాబ్జమయపాదా .

కృతజీవేశ్వరభేదా నిర్భేదానందబోధనానందా .. 22..

ఆత్మోపమానరహితా సహితా శ్రీవత్సకౌస్తుభాభరణైః .

హరిమధ్యా హరివత్సా హరిపీఠాలంకృతాస్తు హరివాణీ .. 23..

అస్మాకం యా మాతా సా భవతి పితామహస్య చిత్రం తత్ .

గంగాతనయోపాస్యా గంగాజననీ హి గీతగాంగేయా .. 24..

హరివత్సప్రాసాదా హరివత్సప్రసాదబహులసమ్మోదా !

కరివత్సాంచితగమనా కరివత్సాంచితపదాస్తు మే వరదా .. 25..

శిరసాదృతనారతతా చరణాదృతనారదాదిమునిజనతా .

వచసాదృతశుకకలితా పదపాలిత ....శుకాస్తు మే మాతా .. 26..

గంధర్వపూర్వలలితా గంధర్వైః కిన్నరైశ్చ బహువినుతా .

గంధర్వవక్త్రవినుతా గంధద్వారా చ పాతు మాం మాతా .. 27..

శ్రీశుకనగరవిశేషే నాశితదారిద్ర్యదుఃఖబహుదోషే .

శ్రీశ్రీనివాసభూషే స్వాశాం మే పూరయస్వ హరియోషే .. 28..

దశశతకమలవికాసే దిశి దిశి మాతర్ధనాని దాతాసే .

మమ హృదయగృహనివాసే శిథిలా భూయ .... మద్వాసే .. 29..

విజ్ఞానాఖ్యో మనుతే పూర్వో హరిరేవ చేతి భూదేవీ .

శ్రియమథ విద్వానార్యః సాదరమార్యాం ప్రవతి పూర్వే త్వాం .. 30..

పూర్ణిమయా చామాయాః భాసశ్చిత్రం తిథిద్వయం త్వయి వై .

శిరసః పరతో దర్శః తత్పరతస్తే సుపూర్ణిమేంద్వాస్యే .. 31..

చంద్రాదమృతం పిప్సుః రాహుస్తం చాక్రమచ్చ చాహస్యే .

ముఖదృగ్భూషాచంద్రః బద్ధ్వా తం చాపహంతి గిరిమధ్యే .. 32..

నయనం సుదర్శనం తే శాంఖః కంఠః ఫణీ చ తవ వేణీ .

పరమం పదయుగలం తే యానే చరణే చ పక్షిరాజోఽస్తి .. 33..

నయనం సుభరద్వాజో ధమ్మిల్లో నారదశ్చ తవ మాతః .

శుకవదమోదాశీతే నానారత్నే మరీచిరపి దేవీ .. 34..

అవనే శక్తిశ్చాస్తే వక్షోజో కుంభసంభవో మాతః .

వల్మీకినిభో నాభిః వ్యాసోఽర్భక ఏవ నిత్యమా స్థానే .. 35..

తదిదం చిత్రం మాతః కాంచ్యాంతస్తేత్య హో బిలం చేతి .

నేదం పుత్రకచిత్రం హరిరుభయత్రాపి తత్ర సర్వే స్యాత్ .. 36..

కాంచీకుచకైలాసో మాతః శూన్యం తవాంతరతిహాసః .

కైలాసావపి కాంచీం న విశతి చేత్తం చ తేఽన్తరధికోఽయం .. 37..

హరికరకమలవిలాసే తవ కుచసూర్యో హి దేవి సుచకాసే .

హరినయనపద్మభాసే తవ ముఖచంద్రం ప్రకాశయత్యాసే .. 38..

డోలీకృతవనమాలా మాలీకృతవిధివశాండమణియుగలా .

యుగలీకృతహరిలీలా బాలా సింధోః ప్రభాతు కరకమలా .. 39..

పాదగ్రహణాత్ తాతోఽమోదత చాస్మాకమమ్వ బహుధాప్తః .

గృహ్ణామ్యంఘ్రీ పూర్ణం తూర్ణం మాం మోదయస్వ హరిగృహిణి .. 40..

కృష్ణః కచమారోఽధాన్నయతే మీనౌ తవాద్య భాసేతే .

హరిరంబ మధ్యమస్తే దేవోఽఙ్గీ సంబభూవ చాంగాని .. 41..

తవ చరణమీక్ష్య తారా అవదధురనిశం సరోరుహాకారే .

అవలోకయ నయనమిందుః తరణిం పర్యభవచ్చ కుముదాక్షి .. 42..

నీచైర్వాసవినిదాం మోక్తుం దిఙ్నాగనాగంకావద్య .

నాభేరుచ్చైర్మాతః భాతః కుచయోశ్చ రోమరాజ్యాం తే .. 43..

త్వామాశ్రిత్య విశేషః రోమ్ణా రాజ్యాం విభాతి సవిశేషః .

ఇతి వాసుకిరపి చాన్యో వేణీం శిశ్రాయ నాన్యవర్ధిష్ణుః .. 44..

ఆకాశే కాంచ్యైకా తస్యాం హరిరంబ యోగిసందృశ్యః .

మాతర్ధత్తే స హరిః గిరిమహిమిభమిందుమర్కమభ్రాదీన్ .. 45..

కుచయుగమస్తకమంచే దృష్ట్వా రోషాతురోఽపి హర్యక్షః .

నిజగణనామతిహీనో సన్నిధిమాహాత్మ్యతో హితేఽభూత్ సః .. 46..

ఏకత్ర చ తరణీందూ భూతే నామా తథాపి హరిగృహిణి .

ఏకత్ర రాహుచంద్రావుపరాగో నైవ చానురాగోఽభూత్ .. 47..

కమలే చంద్రోత్పత్తిః చంద్రాదుచ్చైశ్చ భాతి చంద్రోఽన్యః .

చంద్రద్వయభీతః సన్ రాహుర్నీచైః ప్రయాతి పశ్చాన్మే .. 48..

తవ భుజగవిహగరాజౌ శయనే యానే సదా ప్రథాభాజౌ .

భవతాం స తయోర్మాతః శేషో వేషే విశేషభాషాసీత్ .. 49..

ధన్యం కురు మాం మాన్యే ధన్యేవాసే సముద్రహితకన్యే .

మాన్యే లోకవరేణ్యే ధన్యాయ త్వాం ధినాయకాం మన్యే .. 50..

హరినఖభీతౌ కరిణావంతర్ధ్యాయేవ కంచుకే త్రాసి .

జననీవైరిరిరక్షా పత్యా ఘృణయా బభూవ కిం పద్మే .. 51..

శివపదయుగలాచ్ఛ్రేష్ఠం విధిపదదశకం చ మాతరాలేషు .

బహుధనదపురాణ్యన్యే విష్ణోః పదమేకమేవ పతివత్తే .. 52..

ఉపనయనం తవ భక్తిః ఉపదేష్టా తవ పతిశ్చ మే మాతః .

ఉపదిష్టం నామ చ తే భవతి సుభిక్షాం ప్రదేహి వైదేహి .. 53..

తవ భక్త్యా మంతూక్తిః భవతు చ మాతస్త్వయైవ కిల భుక్తిః .

గేహే ముఖ్యా గృహిణీ విఖ్యాతిశ్చాస్య ఏవ గృహముఖ్యః .. 54..

మాతః సాగరకన్యే తవ నను వక్త్రం సుధాంశురితి మన్యే .

సత్యస్త్వేషస్తర్కః నో చేత్ కా స్యాత్ విధావలోకేచ్ఛా .. 55..

తవ సన్నిధిమాహాత్మ్యాద్వేష్యో న త్విష్ట ఏవ తే దేవి .

నయనాబ్జే ముఖచంద్రే సింహాదుచ్చైః ప్రభాత ఇవ మస్తౌ .. 56..

మాతస్తవ మాహాత్మ్యాదుచ్చైర్నీచైశ్చ భాసమానేభౌ .

విక్రాంతౌ తౌ దృష్ట్వా మృగపతిమృగ్యః స ఏవ మూఢోఽభూత్ .. 57..

కాంతస్తే పరమాత్మానంతస్తల్పస్త్రయీమయో యానం .

అమరా నిత్యా భృత్యాః సత్యం పుత్రోఽస్మి యవనికా మాయా .. 58..

జక్షత్ క్రీడన్ శ్రుత్యా రక్షితుమేవాంబ రహసి కాంతేన .

జిత్వా పురుషం స్వవశం కృత్వా నస్తేన పాలయసి చాంబ .. 59..

సపది జటాయోర్మోక్షః త్వత్తః పత్యుః సుకంధరే పక్షః .

సా మాపితరి కటాక్షః త్వత్తో భర్తా బభూవ బహుదక్షః .. 60..

వీరః కిల తవ భర్తా విశ్వస్మిన్ యత్ర యత్ర యాతాసే .

వారః కిల తవ పాతా చింతా నారాయణే హి కిము న స్యాత్ .. 61..

శ్యామా వా హరిణీ త్వం హ్యచలాతనయాపి చంచలాసి త్వం .

జననీ మారస్య స్యాః సుకుమారేభ్యశ్చ నౌమి మాతస్త్వాం .. 62..

కవిజననుతచరణా వా గురుజననుతపాదుకైవ మే మాతః .

పుణ్యజనైర్నృతచరితా పుణ్యజనధ్వంసినీహ భూర్మాతః .. 63..

అలకాలంకృతవదనా హ్యలకేశాలంకృతాబ్జమృదుచరణా

పులకాంకితసంహననా ఫలకాలం నిత్యమేవ కురుతాం మే .. 64..

శతధృతిశతమతివినుతే శతమఖముఖవినుతలలితబహువసతే .

అతులితశతకృతిఫలితే గతిరిహ భవతీతి మే మనో మనుతే .. 65..

శ్రీశైలజఘనభాగా శ్రీరేఫాలంకృతోత్తమాంగా హి .

అస్తాచలమధ్యస్థా చక్షోః సౌదర్శనాస్తు మాం పాతుం .. 66..

హరివత్సేచ్ఛా వా స్యాత్ కరివత్సేచ్ఛేతి దేవి కవిగీతే .

హరివత్సేచ్ఛా వా స్యాత్ మాం కరివరదో యథా తథా పాహి .. 67..

రిపుశరపీడాం భర్తుః వారితుమేవాస ఉరసి తత్పూర్వా .

మమ పుత్రస్య హి మహితే పూర్వస్థా వారయాంబ వర .... .. 68..

ఏకస్యాం వ్యక్తౌ తే బహువచనం నిత్యపుంస్త్వమాసాతే .

స్వాతంత్ర్యం బహుతత్త్వే కిం న స్యాన్నను న యుజ్యతే హరిదారాః .. 69..

కో వా కా వా పురతః న వదతి తవ నామ న స్మరత్యంబ .

సర్వత్ర చ భవదీయం శిరసా నతిరస్తి కుత్ర వా దేవి .. 70..

ఇభ్యం సభ్యం కురు మామద్భిః ప్రక్షాలయామి తవ పాదౌ .

లభ్యం కురు మే సౌఖ్యం విఖ్యాతే దీనపోషణే దేవి .. 71..

పూర్వం విత్తం దత్త్వా పూజాం తేనైవ కారయస్వాంబ .

ధనసుతహితభూలాభం దత్త్వైవాగ్రే విధేహి తవ భక్తం .. 72..

తవ చరితం మమ విహితం సుకృతాల్లబ్ధం హి మాతరాఢ్యాసి .

మూఢం శ్రీదం కురు మాం బాఢం కరవాణి తేఽద్య పరిచర్యాం .. 73..

విధినా మమైవ సిద్ధిః యది తే కృపయా కిమస్తి మే మాతః .

తవ వా తవ పత్యుర్వా స్వాతంత్ర్యేణైకమేకమైశ్వర్యాత్ .. 74..

పృథుకా దత్తకుచేలాః రుచ్యాః కే తే చ పత్యురపి చాస్యాః .

తస్మాదివ మత్తస్త్వం కిం వా నాభ్యవజహశ్చ మాతస్త్వం .. 75..

ఆరాద్ధాసి చ యేన ప్రథమః పైతామహశ్చ మునిరాట్ సః .

తం భారద్వాజం వా బహుమానేనావలోక్య మాం పాహి .. 76..

పాపాదివధ్యవిషయే కరుణా కార్యా ను తేఽతిమృదువచనం .

ఊచిథ మారుతయే త్వం వ్యస్మార్షీః కిం తదుక్తమధికం మే .. 77..

ప్రత్యక్షం కార్యం మే దాతుం శక్నోషి న యది మే మాతః .

మోక్షం వా దాతా చేత్ కరుణాజనితా తవేతి మన్వీయ .. 78..

నార్థీతుమపి శక్నోమి స్మర్తుం స్తోతుం చ నాహాణ్ ఇహ భవతీం .

పూర్ణాం భుక్తిం శక్తిం దత్త్వాసక్తిం చ దేహి పదభక్తిం .. 79..

నిద్రాలుర్జనకో మే గ్రహయాలుర్మయి సదా స్వపతయాలుః .

స్పృహయాలుః శ్రద్ధాలుః మద్రక్షాయై సదాపి భవ మాతః .. 80..

ధ్యాయేమహి మహియాతః యాతః పూర్వం పరం చ జననీం త్వాం .

పూయేమహి వయమధునా గేయేఽమేయే త్వదీయభజనేన .. 81..

దిత్సాదిత్సాకుత్సైః కుత్సితబేరైః కుమారజననీభిః .

ఉత్సవహీనైః కిం వా చోత్సాహయ మేఽద్య కిం చాన్యైః .. 82..

ప్రత్యక్షమాత్రవార్తే చార్వాకే మధ్యగోద్యదాస్తిక్యం .

త్వమపి చ న ప్రత్యక్షః వక్తి హరిస్త్వయి తథా హి సిద్ధాంతే .. 83..

అద్వైతాన్వారంభౌ వవృధాతే తవ కుచౌ చ హే మాతః .

సిద్ధాంతే ద్వైతవిధౌ సూత్రాణ్యవలోక్య తత్ తథాభూతాం .. 84..

కమలం వికాసయేద్యో హ్యర్కం తం తర్కయంతి తర్కజ్ఞాః .

గురుకుచక్రమలేన చ తే హరినేత్రార్కే వికాస ఊహైః కిం .. 85..

పాదస్త్రయీమయస్తే వేదాః కామాశ్రయంతి మే మాతః .

భర్తా త్రివిక్రమస్తే స జటీ వా స్యాద్ధనాశ్చ తే కేశాః .. 86..

కతి కవయః కతి గురవః కతి మందాః కతి బుధాశ్చ రాజానః .

కతి భీమా అదితిసుతాః శిశ్రూయూరంఘ్రి .... గణకైః కా .. 87..

సగుణం నిర్గుణమితి వా తవ వాచా నిశ్చినోమి భో మాతః .

వాగ్భిః కిం పుత్రక మే జనకం కాంతం చ పశ్య సుగుణం మే .. 88..

ఆరోగ్యకారిణి ....స్వోషధినాథాః కటాక్షకామాస్తే .

అమృతాబ్ధేస్త్వాం తనయాం లబ్ధ్వా కిం ....జాతా .. 89..

అనిలజనుతపదకమలాం సలిలధి ...aర్యబలాం .

కరుణాతరంగశాలాం కాంచనమహిలాం కటాక్షసువిశాలాం .. 10..

గజరాజరాజిలలితామజశతసుతహేమపాదుకాంభోజాం .

సజ్జన కృతబహుపూజాం వాజిగ్రీవప్రభాతముఖభాజాం .. 91..

అర్జునసారథిమహిషీ దుర్జన నిర్మూలనేఽస్తు విదితకృషిః .

సజ్జనపాలనవిదుషీ నిర్జరదేవీ చ నిగమమంజూషా .. 92..

ఆకాశరాజతనయే చాకాశాకారమధ్యమప్రలయే .

పాకారీడితనిలయే మాతస్త్వాం నౌమి దేహి సంతతయే .. 93..

అనుభుక్తమాలికాదౌ శ్రీదా మాతావనేఽస్తు మే గోదా .

ధనునగరసుప్రసాదా హేమంతవ్రతతిశేషసమ్మోదా .. 94..

శార్ఙ్గకరకల్పవల్లీం కోమలవల్లీం భజే సుధావల్లీం .

శార్ఙ్గశ్రీభ్రూవల్లీం స్తౌమి చ నిత్యం ప్రమాణపదవల్లీం .. 95..

ఆశ్రితతాపద్రవితాం రాఘవవనితాం నమామి మృదుకలతాం .

ఆశ్రితశీర్షాభరణాం నాయకమణిభామతుల్యదివ్యాంగీం .. 96..

అరణీతటినీతోషా ధరణీదేవీ కుమారికావేషా .

కరిణీ పుష్కరిణీశా జననీ మాం పాతు భూరిహరియోషా .. 97..

మామపి కురు తవ తనయం త్వామథ తత్త్వేన నౌమ్యహం సనయం .

యామి చ కృపయా విజయం భూమిసుతే దేహి భద్రసముదాయం .. 18..

పవనజపూజాలోలామవనిజనత్రాణవిహితహరిలీలాం .

దుర్భూతదమనకాలామమృతాం వల్లీం భజామి మణిమాలాం .. 99..

ప్రణమతి కస్తవ పాదం ధనపతిరపి భవతి దేవి నిష్ఖేదం .

ప్రపఠతి కస్తవ వేదం స భవతి భువి యాతి మాతరామోదం .. 100..

ఆత్రేయగోత్రజనినా కథితం రామానుజార్యవిదుషేదం .

అంగీకుర్వంత్వార్యాః కృపయా శ్రీవేంకటేశదారాశ్చ .. 101..

ఇతి రామానుజార్యకృతం శ్రీ అష్టమహిషీప్రార్థనాశతకం సంపూర్ణం .

స్తోత్రసముచ్చయః 2 (81)

జగదంబా జయవాదః

జయ జగదంబ ! కదంబవిహారిణి ! మంగలకారిణి ! కామకలే !

జయ తనుశోభా-కంపితశంపే ! లసదనుకంపే ! కాంతినిధే !    .

జయ జితకామేఽపి జనితకామే ! ధూర్జటి-వామే ! వామగతే !

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 1..

      నానాలంకృతి-ఝంకృతిశాలిని ! మౌక్తికమాలిని ! కేలిపరే !

      మునిజన-హృదయాగార-నివాసిని ! విద్యాస్వామిని ! బోధఘనే !     .

      సాంద్రానంద-సుధారస-భాసిని ! వీణావాదిని ! వేదనుతే !

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 2..

ఆపత్తూల-మహానిలకీలే ! పాలనశీలే ! భూతిఖనే !

ద్యుతిజిత-చంపకదామకలాపే ! మధురాలాపే ! హంసగతే !

విభ్రమరంజిత-శంకరహృదయే ! కృతజగదుదయే ! శైలసుతే !

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 3..

      మూలే దీపకకలికాకారే ! విద్యాసారే ! భవసి పరా

      తస్మాదపసృతి-కలనావృద్ధే ! మణిపురమధ్యే  పశ్యంతీ  .

      స్వాంతే మధ్యమభావాకూతా, కంఠే వితతా వైఖరికా

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 4..

పశ్చాదావిర్భవదనవద్యే ! శ్రేయఃపద్యే !  యత్తదిదం

శబ్దబ్రహ్మతయా ఖలు గేయం, ఖమివామేయం కిమపి ఘనం   .

పంచాశల్లిపి-భేదవిచిత్రం వాఙ్మయమాత్రం త్వమసి పరే

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 5..

      భవభవవిభవ-పరాభవహేతో ! గిరికులకేతో ! భక్తహితే !

      నానావిధ-వృజినోత్కర-వారిణి ! కరుణాసారిణి ! శాంతతరే !  .

      సహసోత్సాదిత-సాధకవిఘ్నే ! శ్రద్ధానిఘ్నే ! సుఖకలికే !

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 6..

సిందూరద్రవ-చుంబితభాలే ! సేవితహాలే ! ప్రేమభరే !

మాతశ్చింతామణి-భవనాంతే ! నిర్భరకాంతే ! వితతతతం     .

సోత్కం గాయసి కిన్నరదారైః సాకముదారైః పతిచరితం

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 7..

      క్లేశం భంజయ, రంజయ చిత్తం, విత్తం స్ఫారీకురు వరదే !

      శత్రుం మర్దయ, వర్ధయ శక్తిం , భక్తిం సాంద్రీకురు వరదే     .

      నాస్తి కృపానిధిరంబ ! త్వత్తో మత్తో మత్తతమో న శివే

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 8..

వజ్రాలంకరణాయాః వజ్రాతటినీ-విహారశీలాయాః  .

వజ్రేశ్యాః స్తవమేతం పఠతాం సంగచ్ఛతాం శ్రేయః .. 9..

ఇతి దుర్గాప్రసాదద్వివేదీవిరచితః జగదంబా జయవాదః సంపూర్ణః .