Sacred Stotras & Deities

అభీష్టప్రార్థనాష్టకం

కదా గోష్ఠే గోష్ఠక్షితిపగృహదేవ్యా కిల తయా

     సబాష్పం కుర్వత్యా విలసతి సుతే లాలనవిధిం .

ముహుర్దృష్టం రోహిణ్యపీహితనివేశామవనతం

     నిషేవే తాంబూలైరహమపి విశాఖాప్రియసఖీం .. 1..

కదా గాంధర్వాయాం శుచి విరచయంత్యాం హరికృతే

     ముదా హారాన్వృందైః సహ సవయసామాత్మసదనే .

విచిత్య శ్రీహస్తే మణిమిహ ముహుః సంపుటచయా-

     దహో విన్యస్యంతీ సఫలయతి సేయం భుజలతాం .. 2..

కదా లీలారాజ్యే వ్రజవిపినరూపే విజయినీ

     నిజం భాగ్యం సాక్షాదిహ విదధతీ వల్లభతయా .

సమంతాద్క్రీడంతీ పికమధుపముఖ్యాభిరభితః

     ప్రజాభిః సంజుష్టా ప్రమదయతి సా మాం మదధిపా .. 3..

కదా కృష్ణాతీరే త్రిచతురసఖీభిః సమమహో

     ప్రసూనాం గుంఫంతీం రవిసఖసుతామానతతయా .

సమేత్య ప్రచ్ఛన్నం సపది పరిరిప్సోర్బకరిపో-

     ర్నిషేధే భ్రూభంగం భృశమనుభజేఽహం వ్యజనినీ .. 4..

కదా శుభ్రే తస్మిన్పులినవలయే రాసమహసా

     సువర్ణాగ్గీసంఘేష్టహమహమికామత్తమతిషు .

హరౌ యాతే నీలోత్పలనికసతాం జిత్వరగుణా-

     ద్గుణాదస్మాందివ్యద్రవిణమివ రాధా మదయతి .. 5..

కదా భాండీరస్య ప్రథితరుచిరోత్సంగనిలయే

     వరామధ్యాసీనం కుసుమమయతూలీమతులితం .

ప్రియే చిత్రం పత్రం లిఖతి నిహితస్వంగలతికాం

     విశాఖాప్రాణాలీం భజతి దిశతీ వర్ణకమసౌ .. 6..

కదా తుంగే తుంగే రహసి గిరిశృంగే వ్రతతిజా-

     న్ప్రియే పూర్వా లీలా నిగమయతి సంస్తవ్య నిలయాన్.

మదేనావిష్పష్టం సకలితపదం వ్రీడితతయా

     ద్రుతమౌత్క్యేనైషా విరచయతి పృచ్ఛాం మమ పురః .. 7..

గతిర్యన్మే నిత్యా యదఖిలమపి స్వం సవయసాం

     మదీశ్వర్యాః ప్రేష్ఠప్రణయకృతసౌభాగ్యవరిమా .

హరేర్యత్ప్రేమశ్రీర్నివసతిరముష్యస్తులనయా

     సదా తస్మిన్కుండే లసతు లలితాలీ మమ దృశీ .. 8..

ఇతి శ్రీరఘునాథదాసగోస్వామివిరచితస్తవావల్యాం

          అభీష్టప్రార్థనాష్టకం సంపూర్ణం .

ఛేదిన్యాఃస్తవః

అథ వక్ష్యే మహాదేవ్యాః ఛేదిన్యాః స్తవముత్తమం .

ఛేత్తా త్వం సర్వగ్రంథీనాం మత్ప్రసాదాద్ యతీశ్వరః .. 31-24..

యత్ప్రసాదాదనంతో హి యోగీ సంసారమండలే .. 31-25..

దేశానందా సకలగుణదా ఛేదినీ ఛేదనస్థా

హవ్యస్థా సా విభవనిరతా యా నిధిస్థా నిశాయాం .

సా మే నిత్యం కులకమలగా గోపనీయా విధిజ్ఞా

శ్రీవాగేశీ గగనవసనా సర్వయోగం ప్రపాయాత్ .. 31-26..

కామానందా మదననిరతా భావితా భావసింధౌ

కామానందోద్భవరసవతీ యోగియోగస్థధాత్రీ .

సా మే ధౌతం ప్రకురు వపుషో

ధర్మపుంజం ప్రపాయాత్ .. 31-27..

కాలాకాలం కమలకలికావాసినీ కాలికా మే

గ్రంథిచ్ఛేదం స్థిరగృహగతా గాత్రనాడీపథస్థా .

వక్త్రాంభోజే వచనమధురం ధారయంతీ జనానాం .

సా మే రంధ్రం మమ రుచిరతనోః పాతు పంచాననా యా .. 31-28..

యోగాంగస్థా స్థితిలయవిభవా లోమకూపాంబుజస్థా

మాతా గౌరీ గిరిపతిసుతా భాసురాస్త్రప్రదీప్తా .

సంపాయాన్మే హృదయవివరం ఛేదినీమూలపూరే

కైలాసస్థా మమమనుగిరిం పాతు రుద్రప్రసాదా .. 31-29..

నాదాంతఃస్థా మనగుణధరణాసన్నసిద్ధాంతపారా

భోగానందా భగనగబిలే కాశయంతీ జనానాం .

విద్యావిద్యా వివిధగగనా ఛేదినీ ఛన్నరూపా .

సా సర్వాంతఃకరణనిలయా లాకినీ ప్రేమభావా .. 31-30..

యోగం స్వర్గేఽర్పయసి మనసి ప్రేమభావం పరేశే

యా యా యాత్రా త్రివిధకరణా కారణా సర్వజంతోః .

మాతా జ్ఞాత్రీ గణేశే గృహిగణసదయా సర్వకర్త్రీ మనో మే

రక్షా రక్షాక్షరగతకలా కేవలా నిష్కలా యా .. 31-31..

సా యోగేంద్రా సమవతు ముదా మే గుదం కుండలిన్యాం

జహ్నోః కన్యా కమలనిలయా రాకిణీ ప్రేమభావాన్ .

మోక్షప్రాణాన్ తపనరహితా పాతు మే వేదవక్త్రా

సిద్ధా మూలాంబుజదలగతా పావనీ పాతు తుండం .. 31-32..

హేరంబాజ్ఞా ప్రలయఘటితా కాకినీ క్రోధరూపా .. 31-33..

యది భజతి కులీనః కామినీం క్రోధవిద్యాం

స భవతి పరయోగీ ఛేదినీస్తోత్రపాఠాత్ .

సకలదురితనాశః క్షాలనాదిప్రసిద్ధిః

సకలజనవశః స్యాత్ తస్య నిత్యం సురాజ్యం .. 31-34..

ఏతత్ స్తోత్రం పఠేద్విద్వాన్ మహాసంయమతత్పరః .

మూలే మనః స్థిరో యాతి సర్వానిష్టవినాశనః .. 31-35..

సర్వసిద్ధిః కరే తస్య యో భావం సముపాశ్రయేత్

శృణుష్వ పరమానంద రససాగరసంభవ .. 31-36..

ఇతి శ్రీరుద్రయామలే ఉత్తరతంత్రే మహాతంత్రోద్దీపనే షట్చక్రప్రకాశే

సిద్ధిమంత్రప్రకరణే భైరవభైరవీసంవాదే ఏకత్రింశః పటలే

ఛేదిన్యాః స్తవః సమాప్తః .. 31..

ఛిన్నమస్తాధ్యానం

 1. ప్రత్యాలీఢపదాం సదైవ దధతీం ఛిన్నం శిరః కర్త్రికాం

దిగ్వస్త్రాం స్వకబంధశోణితసుధాధారాం పిబంతీం ముదా .

నాగాబద్ధశిరోమణిం త్రినయనాం హృద్యుత్పలాలంకృతాం

రత్యాసక్తమనోభవోపరి దృఢాం వందే జపాసన్నిభాం .. 1..

 2. దక్షే చాతిసితా విముక్తచికురా కర్త్రీం తథా ఖర్పరం .

హస్తాభ్యాం దధతీ రజోగుణభవా నామ్నాపి సా వర్ణినీ ..

దేవ్యాశ్ఛిన్నకబంధతః పతదసృగ్ధారాం పిబంతీ ముదా .

నాగాబద్ధశిరోమణిర్మనువిదా ధ్యేయా సదా సా సురైః .. 2..

ప్రత్యాలీఢపదా కబంధవిగలద్రక్తం పిబంతీ ముదా .

సైషా యా ప్రలయే సమస్తభువనం భోక్తుం క్షమా తామసీ ..

శక్తిః సాపి పరాత్పరా భగవతీ నామ్నా పరా డాకినీ .

ధ్యేయా ధ్యానపరైః సదా సవినయం భక్తేష్టభూతిప్రదా .. 3..

 2. భాస్వన్మండలమధ్యగాం నిజశిరశ్ఛిన్నం వికీర్ణాలకం .

స్ఫారాస్యం ప్రపిబద్గలాత్స్వరుధిరం వామే కరే బిభ్రతీం ..

యాభాసక్తరతిస్మరోపరిగతాం సఖ్యౌ నిజే డాకినీ-

వర్ణిన్యౌ పరిదృశ్య మోదకలితాం శ్రీఛిన్నమస్తాం భజే .. 4..

 3. స్వనాభౌ నీరజం ధ్యాయామ్యర్ధం వికసితం సితం .

తత్పద్మకోశమధ్యే తు మండలం చండరోచిషః .. 5..

జపాకుసుమసంకాశం రక్తబంధూకసన్నిభం .

రజస్సత్వతమోరేఖా యోనిమండలమండితం .. 6..

తన్మధ్యే తాం మహాదేవీం సూర్యకోటిసమప్రభాం .

ఛిన్నమస్తాం కరే వామే ధారయంతీం స్వమస్తకం .. 7..

ప్రసారితముఖీం దేవీం లేలిహానాగ్రజిహ్వికాం .

పిబంతీం రౌధిరీం ధారాం నిజకంఠవినిర్గతాం .. 8..

వికీర్ణకేశపాశాం చ నానాపుష్పసమన్వితాం .

దక్షిణే చ కరే కర్త్రీం ముండమాలావిభూషితాం .. 9..

దిగంబరాం మహాఘోరాం ప్రత్యాలీఢపదే స్థితాం .

అస్థిమాలాధరాం దేవీం నాగయజ్ఞేపవీతినీం .. 10..

రతికామోపరిష్ఠాం చ సదా ధ్యాతాం చ మంత్రిభిః .

సదా షోడశవర్షీయాం పీనోన్నతపయోధరాం .. 11..

 4. విపరీతరతాసక్తౌ ధ్యాయామి రతిమన్మథౌ .

శాకినీవర్ణినీయుక్తాం వామదక్షిణయోగతః .. 12..

దేవీగలోచ్ఛలద్రక్తధారాపానం ప్రకుర్వతీం .

వర్ణినీం లోహితాం సౌమ్యాం ముక్తకేశీం దిగంబరాం .. 13..

కపాలకర్త్రికాహస్తాం వామదక్షిణయోగతః .

నాగయజ్ఞేపవీతాఢ్యాం జ్వలత్తేజోమయీమివ .. 14..

ప్రత్యాలీఢపదాం విద్యాం నానాలంకారభూషితాం .

సదా ద్వాదశవర్షీయాం అస్థిమాలావిభూషితాం .. 15..

డాకినీం వామపార్శ్వే తు కల్పసూర్యానలోపమాం .

విద్యుజ్జటాం త్రినయనాం దంతపంక్తిబలాకినీం .. 16..

దంష్ట్రాకరాలవదనాం పీనోన్నతపయోధరాం .

మహాదేవీం మహాఘోరాం ముక్తకేశీం దిగంబరాం .. 17..

లేలిహానమహాజిహ్వాం ముండమాలావిభూషితాం .

కపాలకర్త్రికాహస్తాం వామదక్షిణయోగతః .. 18..

దేవీగలోచ్ఛలద్రక్తధారాపానం ప్రకుర్వతీం .

కరస్థితకపాలేన భీషణేనాతిభీషణాం .

ఆభ్యాం నిషేవ్యమాణాం తాం కలయే జగదీశ్వరీం .. 19..

ఇతి ఛిన్నమస్తాధ్యానం ..

ఛిన్నమస్తాద్వాదశనామస్తోత్రం

ఛిన్నగ్రీవా ఛిన్నమస్తా ఛిన్నముండధరాఽక్షతా .

క్షోదక్షేమకరీ స్వక్షా క్షోణీశాచ్ఛాదనక్షమా .. 1..

వైరోచనీ వరారోహా బలిదానప్రహర్షితా .

బలిపూజితపాదాబ్జా వాసుదేవప్రపూజితా .. 2..

ఇతి ద్వాదశనామాని ఛిన్నమస్తాప్రియాణి యః .

స్మరేత్ప్రాతః సముత్థాయ తస్య నశ్యంతి శత్రవః .. 3..

ఇతి ఛిన్నమస్తాద్వాదశనామస్తోత్రం సంపూర్ణం .

ఛాయావింశతిః

గురూణాం విద్యాసౌ స్ఫురితకరుణోదన్వదుదిత-

     ప్రభావేందుజ్యోత్స్నా హృదయకుముదోద్భేదనపటుః .

యయా సూక్తిస్రోతఃస్రవదమృతయా ధ్వస్తతమసా

     ప్రకాశ్యంతే సర్వా అపి సపది శాస్త్రార్థకకుభః .. 1..

అనీశామీశానీం వదతి నిరయాణాం ప్రశమదో

     గురుః కల్యాణీం యామథ చ సకలాం పూర్వపరగాం .

సితా పీతా రాగోజ్జ్వలితతనురుద్ధారసహితా

     విచిత్రా ప్రోక్తా సా మనసి రమతాం మే భగవతీ .. 2..

మనోవాగ్దుఃస్పర్శే మురరిపువిధాత్రోరపి తవ

     స్వరూపే జాత్యంధః కథమివ కరోమి స్తుతిమహం .

దిశో లక్షీకృత్య ప్రహిత ఇవ బాణోఽయమథవా

     మదీయో వాగ్బంధస్త్వయి పతతి సర్వాత్మవపుషి .. 3..

శివం గుర్వాత్మానం గురుమపి శివాత్మానమసకృత్

     ప్రణమ్యాంతర్భక్త్యా స్రజమివ తదాజ్ఞాం చ శిరసా .

దృశావానందాస్రైః కుసుమనికరైరంజలిపుటం

     ప్రపూర్యాంతఃప్రేమ్ణా ప్రణతవరదాం నౌమి భవతీం .. 4..

రసార్ద్రా వా కామం రసవిరహితా వా స్తుతిరసా-

     వసాధ్వీ సాధ్వీ వా న ఖలు గుణదోషౌ భవతు నః .

యథాత్మానం దృష్టిర్ముకురపతితా పశ్యతి తథా

     గిరం త్వాం గీర్భిస్త్వం యన్ముఖగతా స్తౌషి వరదే .. 5.. (మమముఖగతా)

సముద్భూతా చోచ్చైఃస్థితిముపగతాత్ కేశవపదాత్

     స్థితా గౌరీశేన స్వపదపరిపూజాహితముదా .

శుచిశ్రీమత్తీర్థా శివగురుగిరిప్రాప్తమహిమా

     స్వరూపం తే విద్యా మమ భజతు గంగేవ జలధిం .. 6..

అయం తేజోవర్ణః కవిభిరుదితో వాగ్భవ ఇతి

     స్ఫురద్బిందుద్భేదస్త్రిగుణతనురాధారవితతః .

సముద్బుద్ధో యస్య వ్రజతి సహసా బ్రహ్మ సదనం

     స యోగీ చోద్బుద్ధో వ్రజతి సహసా బ్రహ్మసదనం .. 7..

విదుర్బ్రాహ్మీం కేచిత్ కిల విషమభిన్నాం తదితరే

     తథాప్యేకా సా తే తనురితి వయం నిశ్చినుమహే .

ప్రభేదో వాగ్వాణీ వచ ఇతి సమాఖ్యాసు బహుధా

     స్వయంవాచ్యే శబ్దే న భవతి పునః కాచన భిదా .. 8..

ద్వితీయః కామాత్మా స్ఫురతి తవ లీనో హృది సదా

     స బిందుః సన్నాదో భగవతి ముదాం బీజమివ యః .

స్మితే యస్మిన్ క్షుభ్యత్యఖిలమపి చంద్రోదయగళ-

     న్మహాంభోధిప్రఖ్యం భవనమబలాం కిం పునరమూం .. 9..

మనోరమ్యః సౌమ్యః ప్రశమితతమో యేన శిరసి

     స్మృతో బీజాత్మా తే భగవతి ముదాం బీజమివ యః .

వచోవీచీవేగోద్ధతివిధుతవిధ్వస్తగరిమ

     క్షిపేత్ క్షిప్రం వాదిప్లవకులమసావంబుధిరివ .. 10..

స్వమూర్ధ్ని ధ్యాతాయాస్తవ ధవలపీఠాబ్జగదితా

     సుధాంభోవృష్టిర్యా స్ఫుటపుళకసస్యాంకురసుహృత్ .

పునః సూక్తిచ్ఛద్మా శ్రుతిచుళుకపేయా ముఖశశి-

     ప్రణాళీవాంతా సా సరిదివ సరీసర్తి సరసా .. 11..

ప్రమోదేందుక్లిన్నం నయనశశికాంతాత్సముదితం

     యదంభస్త్వద్రూపం స్మృతిమయసుఖాస్వాదసుఖినః .

న తద్ బాష్పం మన్యే సముపనతలక్ష్మీకరపుట-

     త్రిలోకీరాజ్యాప్తే రుచితమభిషేకాంబు గళతి .. 12..

చిదాత్మా తే విద్యుత్కణరుచిరణోరప్యణుతరో

     నిరీక్ష్యో యో బిందుః క్షణమపి దృశా సూక్ష్మతరయా .

సశైలాబ్ధిద్వీపం సకలమపి స బ్రహ్మసదనం

     తదంతఃసంలీనం తత ఉదితమత్యద్భుతమిదం .. 13..

అజప్తా జప్తా వా స్వయమతిమహాంతోఽతిలఘవః

     సకీలా నిష్కీలా గురుభిరుపదిష్టా అపి న వా .

ప్రసన్నాయాం దేవి త్వయి సకలతంత్రాశ్చ ఫలదా-

     స్తరుర్మూలే సిక్తః ఫలతి ఖలు శాఖాశతమయః .. 14..

యశోవశ్యైశ్వర్యద్రవిణకవితాద్యైహికఫలం

     లఘు ప్రాప్తుం యస్త్వాం భజతి పరమానందఫలదాం .

సుమేరుం మాషార్ఘం సురభిమపి తక్రం సురతరుం

     సుజీర్ణం కౌపీనం సుజళమతిరభ్యర్థయతి సః .. 15..

తవ ధ్యాత్వా మూర్తిం జతురసజపాపుష్పసదృశీం

     నరస్తస్యాం యో నిక్షిపతి కుసుమాన్యర్చనవిధౌ .

ధ్రువం తైరేవాశు స్మరవిశిఖభూతైః స్వహృదయే

     విలాసిన్యో విద్ధా విదధతి తదంకే విలుఠనం .. 16..

నృముండైరాబద్ధాం స్రజమురసిజాభోగలుఠితాం

     దధానామారక్తాంశుకకిసలయాం కింశుకనిభాం .

చతుర్బాహు చంద్రావయవసుమనశ్శేఖరజటాం

     ప్రణౌమి త్వాం ప్రేతాసనముపగతాం భైరవవధూం .. 17..

శిరశ్చంద్రచ్ఛాయాప్రసరపునరుక్తస్మితరుచిం

     వపుర్లక్ష్మీలబ్ధాధికసితమహార్ఘాంబరధరాం .

వరోద్యుక్తాం సాక్షస్రజమభయదాం పుస్తకధరాం

     సకృద్ యస్త్వాం భక్త్యా ప్రణమతి నమామ్యంబ తమహం .. 18..

యజంతే యేఽష్టాభిర్దినమను విధానేన సుభగా

     భగాద్యాభిస్తాభిర్భగవతి శివే త్వాం పరివృతాం .

క్షమాభృతిరూపాతిద్యుతిమతిధృతిశ్రీసుభగతా-

     పరీతాః పూజ్యంతే స్వయమను జనైస్తే సుకృతినః .. 19..

యథోక్తం యైరిష్టో విధివిరచితాష్టాష్టకభిదా

     గణో మాతౄణాం తే గహనమహిమా భైరవసఖః .

స్ఫురద్విద్యాదీపద్యుతివితతిసందర్శితపదాః

     ప్రయాంతి త్వత్స్థానం పునరపునరావర్తనమమీ .. 20..

యథైకశ్చైకస్థః స్వయమపిహితాత్మా దినకరో

     విభాతి ఛాయావాన్ బహుషు జలకుంభేషు బహువత్ .

తథైవైకా బహ్వీ స్ఫురతి శబరీశౌరితనయా-

     రమావాణీకాళీరతిధృతిధరణ్యాదితనుభిః .. 21..

నరాత్మా నారీత్వే తరురపి లతాత్వే తవ మృగో

     మృగీత్వే లక్ష్మీత్వే హరిరపి శచీత్వే శతమఖః .

ఉమాత్వే రుద్రాత్మేత్యథ తదనురూపాకృతిరసౌ

     శివః సర్వత్రాపి స్వయమనుచరత్యంబ భవతీం .. 22..

స్త్రియో యాస్త్రైలోక్యే విదధతి చ యా సంసృతిరసం

     వినా యాభిః సృష్టిః క్వచిదపి న కాచిత్ ప్రసరతి .

వినా యాభిర్ముద్యత్యపి జయతి యాభిర్మనసిజః

     సమస్తాభ్యస్తాభ్యో భగవతి తనూభ్యస్తవ నమః .. 23..

శివే విద్యే దేవి త్రిభువనజనన్యంబ శబరి

     క్రియే శ్రద్ధే మేధే సతి గిరిసుతే వాణి పరమే .

మహామాయే నిత్యే మధుమతి మహాభైరవి రమే .

     భవాని శ్రీః శక్తే భగవతి నమస్తేఽహమకృషి .. 24..

శ్రియం పృష్ఠే కృత్వా హృది తవ పదాంభోజయుగళీం

     వయం వాణీపుష్పైః స్రజమరచయామ స్తుతిమయీం .

స్వయం గృహ్ణీష్వైనాం శరణమనుగృహ్ణాతు భవతీ

     త్వదీయా భూయాస్మ త్వయి భవతు భక్తిః స్థిరతరా .. 25..

సదా సూక్తిధ్యానామృతరసనిషేకోత్థపుళక-

     ప్రరోహాః స్వాంతే త్వత్పదకిసలయం దేవి దధతి .

స్ఫురంత్యేవాభీష్టాశ్చులుకపుటికాకోమలపుట-

     స్ఫురత్పూజాపుష్పాన్వయసముదితా భక్తిలలితాః .. 26..

(T

అభిరామిస్తోత్రం

నమస్తే లలితే దేవి శ్రీమత్సింహాసనేశ్వరి .

భక్తానామిష్టదే మాతః అభిరామి నమోఽస్తుతే .. 1..

చంద్రోదయం కృతవతీ తాటంకేన మహేశ్వరి .

ఆయుర్దేహి జగన్మాతః అభిరామి నమోఽస్తుతే .. 2..

సుధాఘటేశశ్రీకాంతే శరణాగతవత్సలే .

ఆరోగ్యం దేహి మే నిత్యమభిరామి నమోఽస్తుతే .. 3..

కల్యాణి మంగలం దేహి జగన్మంగలకారిణి .

ఐశ్వర్యం దేహి మే నిత్యమభిరామి నమోఽస్తుతే .. 4..

చంద్రమండలమధ్యస్థే మహాత్రిపురసుందరి .

శ్రీచక్రరాజనిలయే అభిరామి నమోఽస్తుతే .. 5..

రాజీవలోచనే పూర్ణే పూర్ణచంద్రవిధాయిని .

సౌభాగ్యం దేహి మే నిత్యమభిరామి నమోఽస్తుతే .. 6..

గణేశస్కందజనని వేదరూపే ధనేశ్వరి .

విద్యాం చ దేహి మే కీర్తిమభిరామి నమోఽస్తుతే .. 7..

సువాసినీప్రియే మాతః సౌమాంగల్యవివర్ధినీ .

మాంగల్యం దేహి మే నిత్యమభిరామి నమోఽస్తుతే .. 8..

మార్కండేయ మహాభక్త సుబ్రహ్మణ్య సుపూజితే .

శ్రీరాజరాజేశ్వరీ త్వం హ్యభిరామి నమోఽస్తుతే .. 9..

సాన్నిధ్యం కురు కల్యాణీ మమ పూజాగృహే శుభే .

బింబే దీపే తథా పుష్పే హరిద్రాకుంకుమే మమ .. 10..

అభిరామ్యా ఇదం స్తోత్రం యః పఠేచ్ఛక్తిసన్నిధౌ .

ఆయుర్బలం యశో వర్చో మంగలం చ భవేత్సుఖం .. 11..

ఇతి అభిరామిస్తోత్రం సంపూర్ణం .

అపీతకుచాంబాస్తవః

ఆనందసింధులహరీమమృతాంశుమౌలే-

        రాసేవినామమృత-నిర్మిత-వర్తిమక్ష్ణోః .

        ఆనందవల్లివితతేరమృతార్ద్రగుచ్ఛం

        అంబ స్మరామ్యహమపీతకుచే వపుస్తే .. 1..

        నిర్నిద్ర-కోకనద-కోమలకాంతమంబ-

        నిత్యం సుధానికరవర్షి పదం త్వదీయం .

        మూర్ఛాకరజ్వరరుజా మమ తాపితస్య

        మూర్ధ్ని క్షణం సకృదపీతకుచే నిధేహి .. 2..

        శీతాంశుకోటి సుషమాశిశిరైః కటాక్షైః

        అవ్యాజభూతకరుణారసపూరపూర్ణైః .

        కర్పూరధూలిమివ దిక్షు సమాకిరద్భిః

        అంబ క్షణం స్నపయ మామరుణాద్రిమాన్యే .. 3..

        ఆవిర్భవ క్షణమపీతకుచే పురస్తాత్

        అంబ జ్వరేణ మహతా మమ తాపితస్య .

        యేన త్వదంఘ్రిరుచిజాల-సుధాప్రవాహే

        మగ్నస్తదైవ తనుతాపమముం త్యజేయం .. 4..

        నానావిధైర్నలిన-జాతలిపిప్రకౢప్తైః

        ఆనీతమూర్ఛమధికం క్షుభితైర్జ్వరాద్యైః .

        ఆశ్వాసయ క్షణమపీతకుచే కరాగ్ర-

        క్రీడాకనత్కనకహల్లకసౌరభేణ .. 5..

        కంఠే విషం విషముచో భుజగాః కపర్దే

        పార్శ్వే చ భూతపతయః ప్రమథాశ్చ భీమాః .

        శోణాచలేశముపసృత్య భజేత కో వా

        న స్యాత్తవాంబ సవిధే యది సన్నిధానం .. 6 ..

        శక్తిర్జగజ్జననపాలన-భంజనేషు

        భోగేషు దివ్యమహిషీ తరుణేందుమౌలేః .

        సిద్ధిః కరప్రణయినీ తవ సన్నిధానం

        యన్నాసి తస్య తదపీతకుచే న జానే .. 7..

        త్వం సాక్షిణీ ప్రలయభైరవతాండవానాం

        త్వం శేషిణీ సహరిధాతృ చరాచరాణాం .

        త్వం మోచినీ సకలసంసృతిజాలకానాం

        త్వాం బ్రహ్మసంవిదమపీతకుచే నమామి .. 8..

        .. శ్రీ అప్పయ్యదీక్షితేంద్రైః కృతః

                      అపీతకుచాంబాస్తవః సంపూర్ణః ..

అపరాధక్షమాపణస్తోత్రం

ఓం అపరాధశతం కృత్వా జగదంబేతి చోచ్చరేత్ .

యాం గతిం సమవాప్నోతి న తాం బ్రహ్మాదయః సురాః  .. 1..

సాపరాధోఽస్మి శరణం ప్రాప్తస్త్వాం జగదంబికే .

ఇదానీమనుకంప్యోఽహం యథేచ్ఛసి తథా కురు  .. 2..

అజ్ఞానాద్విస్మృతేర్భ్రాంత్యా యన్న్యూనమధికం కృతం .

తత్సర్వం క్షమ్యతాం దేవి ప్రసీద పరమేశ్వరి  .. 3..

కామేశ్వరి జగన్మాతః సచ్చిదానందవిగ్రహే .

గృహాణార్చామిమాం ప్రీత్యా ప్రసీద పరమేశ్వరి  .. 4..

సర్వరూపమయీ దేవీ సర్వం దేవీమయం జగత్ .

అతోఽహం విశ్వరూపాం త్వాం నమామి పరమేశ్వరీం  .. 5..

యదక్షరం పరిభ్రష్టం మాత్రాహీనంచ యద్భవేత్ .

పూర్ణం భవతు తత్ సర్వం త్వత్ప్రసాదాన్మహేశ్వరి  .. 6..

యదత్ర పాఠే జగదంబికే మయా

     విసర్గబింద్వక్షరహీనమీరితం .

తదస్తు సంపూర్ణతమం ప్రసాదతః

     సంకల్పసిద్ధిశ్వ సదైవ జాయతాం  .. 7..

యన్మాత్రాబిందుబిందుద్వితయపదపదద్వంద్వవర్ణాదిహీనం

భక్త్యాభక్త్యానుపూర్వం  ప్రసభకృతివశాత్ వ్యక్త్తమవ్యక్త్తమంబ .

మోహాదజ్ఞానతో వా పఠితమపఠితం సాంప్రతం  తే స్తవేఽస్మిన్

తత్ సర్వం సాంగమాస్తాం భగవతి వరదే త్వత్ప్రసాదాత్ ప్రసీద  .. 8..

ప్రసీద భగవత్యంబ ప్రసీద భక్తవత్సలే .

ప్రసాదం కురు మే దేవి దుర్గే దేవి నమోఽస్తు తే  .. 9..

   .. ఇతి అపరాధక్షమాపణస్తోత్రం సమాప్తం..

అపరాజితాస్తోత్రం

శ్రీత్రైలోక్యవిజయా అపరాజితాస్తోత్రం .

ఓం నమోఽపరాజితాయై .

ఓం అస్యా వైష్ణవ్యాః పరాయా అజితాయా మహావిద్యాయాః

వామదేవ-బృహస్పతి-మార్కండేయా ఋషయః .

గాయత్ర్యుష్ణిగనుష్టుబ్బృహతీ ఛందాంసి .

లక్ష్మీనృసింహో దేవతా .

ఓం క్లీం శ్రీం హ్రీం బీజం .

హుం శక్తిః .

సకలకామనాసిద్ధ్యర్థం అపరాజితవిద్యామంత్రపాఠే వినియోగః .

ఓం నీలోత్పలదలశ్యామాం భుజంగాభరణాన్వితాం .

శుద్ధస్ఫటికసంకాశాం చంద్రకోటినిభాననాం .. 1..

శంఖచక్రధరాం దేవీ వైష్ణ్వీమపరాజితాం

బాలేందుశేఖరాం దేవీం వరదాభయదాయినీం .. 2..

నమస్కృత్య పపాఠైనాం మార్కండేయో మహాతపాః .. 3..

మార్కండేయ ఉవాచ -

శృణుష్వం మునయః సర్వే సర్వకామార్థసిద్ధిదాం .

అసిద్ధసాధనీం దేవీం వైష్ణవీమపరాజితాం .. 4..

ఓం నమో నారాయణాయ, నమో భగవతే వాసుదేవాయ,

నమోఽస్త్వనంతాయ సహస్రశీర్షాయణే, క్షీరోదార్ణవశాయినే,

శేషభోగపర్య్యంకాయ, గరుడవాహనాయ, అమోఘాయ

అజాయ అజితాయ పీతవాససే,

ఓం వాసుదేవ సంకర్షణ ప్రద్యుమ్న, అనిరుద్ధ,

హయగ్రీవ, మత్స్య కూర్మ్మ, వారాహ నృసింహ, అచ్యుత,

వామన, త్రివిక్రమ, శ్రీధర రామ రామ రామ .

వరద, వరద, వరదో భవ, నమోఽస్తు తే, నమోఽస్తుతే, స్వాహా,

ఓం అసుర-దైత్య-యక్ష-రాక్షస-భూత-ప్రేత-పిశాచ-కూష్మాండ-

సిద్ధ-యోగినీ-డాకినీ-శాకినీ-స్కందగ్రహాన్

ఉపగ్రహాన్నక్షత్రగ్రహాంశ్చాన్యా హన హన పచ పచ

మథ మథ విధ్వంసయ విధ్వంసయ విద్రావయ విద్రావయ

చూర్ణయ చూర్ణయ శంఖేన చక్రేణ వజ్రేణ శూలేన

గదయా ముసలేన హలేన భస్మీకురు కురు స్వాహా .

ఓం సహస్రబాహో సహస్రప్రహరణాయుధ,

జయ జయ, విజయ విజయ, అజిత, అమిత,

అపరాజిత, అప్రతిహత, సహస్రనేత్ర,

జ్వల జ్వల, ప్రజ్వల ప్రజ్వల,

విశ్వరూప బహురూప, మధుసూదన, మహావరాహ,

మహాపురుష, వైకుంఠ, నారాయణ,

పద్మనాభ, గోవింద, దామోదర, హృషీకేశ,

కేశవ, సర్వాసురోత్సాదన, సర్వభూతవశంకర,

సర్వదుఃస్వప్నప్రభేదన, సర్వయంత్రప్రభంజన,

సర్వనాగవిమర్దన, సర్వదేవమహేశ్వర,

సర్వబంధవిమోక్షణ,సర్వాహితప్రమర్దన,

సర్వజ్వరప్రణాశన, సర్వగ్రహనివారణ,

సర్వపాపప్రశమన, జనార్దన, నమోఽస్తుతే స్వాహా .

విష్ణోరియమనుప్రోక్తా సర్వకామఫలప్రదా .

సర్వసౌభాగ్యజననీ సర్వభీతివినాశినీ .. 5..

సర్వైంశ్చ పఠితాం సిద్ధైర్విష్ణోః పరమవల్లభా .

నానయా సదృశం కించిద్దుష్టానాం నాశనం పరం .. 6..

విద్యా రహస్యా కథితా వైష్ణవ్యేషాపరాజితా .

పఠనీయా ప్రశస్తా వా సాక్షాత్సత్త్వగుణాశ్రయా .. 7..

ఓం శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్సర్వవిఘ్నోపశాంతయే .. 8..

అథాతః సంప్రవక్ష్యామి హ్యభయామపరాజితాం .

యా శక్తిర్మామకీ వత్స రజోగుణమయీ మతా .. 9..

సర్వసత్త్వమయీ సాక్షాత్సర్వమంత్రమయీ చ యా .

యా స్మృతా పూజితా జప్తా న్యస్తా కర్మణి యోజితా .

సర్వకామదుఘా వత్స శృణుష్వైతాం బ్రవీమి తే .. 10..

య ఇమామపరాజితాం పరమవైష్ణవీమప్రతిహతాం

పఠతి సిద్ధాం స్మరతి సిద్ధాం మహావిద్యాం

జపతి పఠతి శృణోతి స్మరతి ధారయతి కీర్తయతి వా

న తస్యాగ్నివాయువజ్రోపలాశనివర్షభయం,

న సముద్రభయం, న గ్రహభయం, న చౌరభయం,

న శత్రుభయం, న శాపభయం వా భవేత్ .

క్వచిద్రాత్ర్యంధకారస్త్రీరాజకులవిద్వేషి-విషగరగరదవశీకరణ-

విద్వేషోచ్చాటనవధబంధనభయం వా న భవేత్ .

ఏతైర్మంత్రైరుదాహృతైః సిద్ధైః సంసిద్ధపూజితైః .

ఓం నమోఽస్తుతే .

అభయే, అనఘే, అజితే, అమితే, అమృతే, అపరే,

అపరాజితే, పఠతి, సిద్ధే జయతి సిద్ధే,

స్మరతి సిద్ధే, ఏకోనాశీతితమే, ఏకాకిని, నిశ్చేతసి,

సుద్రుమే, సుగంధే, ఏకాన్నశే, ఉమే ధ్రువే, అరుంధతి,

గాయత్రి, సావిత్రి, జాతవేదసి, మానస్తోకే, సరస్వతి,

ధరణి, ధారణి, సౌదామని, అదితి, దితి, వినతే,

గౌరి, గాంధారి, మాతంగీ కృష్ణే, యశోదే, సత్యవాదిని,

బ్రహ్మవాదిని, కాలి, కపాలిని, కరాలనేత్రే, భద్రే, నిద్రే,

సత్యోపయాచనకరి, స్థలగతం జలగతం అంతరిక్షగతం

వా మాం రక్ష సర్వోపద్రవేభ్యః స్వాహా .

యస్యాః ప్రణశ్యతే పుష్పం గర్భో వా పతతే యది .

మ్రియతే బాలకో యస్యాః కాకవంధ్యా చ యా భవేత్ .. 11..

ధారయేద్యా ఇమాం విద్యామేతైర్దోషైర్న లిప్యతే .

గర్భిణీ జీవవత్సా స్యాత్పుత్రిణీ స్యాన్న సంశయః .. 12..

భూర్జపత్రే త్విమాం విద్యాం లిఖిత్వా గంధచందనైః .

ఏతైర్దోషైర్న లిప్యేత సుభగా పుత్రిణీ భవేత్ .. 13..

రణే రాజకులే ద్యూతే నిత్యం తస్య జయో భవేత్ .

శస్త్రం వారయతే హ్యేషా సమరే కాండదారుణే .. 14..

గుల్మశూలాక్షిరోగాణాం క్షిప్రం నాశ్యతి చ వ్యథాం ..

శిరోరోగజ్వరాణాం న నాశినీ సర్వదేహినాం .. 15..

ఇత్యేషా కథితా విద్యా అభయాఖ్యాఽపరాజితా .

ఏతస్యాః స్మృతిమాత్రేణ భయం క్వాపి న జాయతే .. 16..

నోపసర్గా న రోగాశ్చ న యోధా నాపి తస్కరాః .

న రాజానో న సర్పాశ్చ న ద్వేష్టారో న శత్రవః ..17..

యక్షరాక్షసవేతాలా న శాకిన్యో న చ గ్రహాః .

అగ్నేర్భయం న వాతాచ్చ న స్ముద్రాన్న వై విషాత్ .. 18..

కార్మణం వా శత్రుకృతం వశీకరణమేవ చ .

ఉచ్చాటనం స్తంభనం చ విద్వేషణమథాపి వా .. 19..

న కించిత్ప్రభవేత్తత్ర యత్రైషా వర్తతేఽభయా .

పఠేద్ వా యది వా చిత్రే పుస్తకే వా ముఖేఽథవా .. 20..

హృది వా ద్వారదేశే వా వర్తతే హ్యభయః పుమాన్ .

హృదయే విన్యసేదేతాం ధ్యాయేద్దేవీం చతుర్భుజాం .. 21..

రక్తమాల్యాంబరధరాం పద్మరాగసమప్రభాం .

పాశాంకుశాభయవరైరలంకృతసువిగ్రహాం .. 22..

సాధకేభ్యః ప్రయచ్ఛంతీం మంత్రవర్ణామృతాన్యపి .

నాతః పరతరం కించిద్వశీకరణమనుత్తమం .. 23..

రక్షణం పావనం చాపి నాత్ర కార్యా విచారణా .

ప్రాతః కుమారికాః పూజ్యాః ఖాద్యైరాభరణైరపి .

తదిదం వాచనీయం స్యాత్తత్ప్రీత్యా ప్రీయతే తు మాం .. 24..

ఓం అథాతః సంప్రవక్ష్యామి విద్యామపి మహాబలాం .

సర్వదుష్టప్రశమనీం సర్వశత్రుక్షయంకరీం .. 25..

దారిద్ర్యదుఃఖశమనీం దౌర్భాగ్యవ్యాధినాశినీం .

భూతప్రేతపిశాచానాం యక్షగంధర్వరక్షసాం .. 26..

డాకినీ శాకినీ-స్కంద-కూష్మాండానాం చ నాశినీం .

మహారౌద్రిం మహాశక్తిం సద్యః ప్రత్యయకారిణీం .. 27..

గోపనీయం ప్రయత్నేన సర్వస్వం పార్వతీపతేః .

తామహం తే ప్రవక్ష్యామి సావధానమనాః శృణు .. 28..

ఏకాన్హికం ద్వ్యన్హికం చ చాతుర్థికార్ద్ధమాసికం .

ద్వైమాసికం త్రైమాసికం తథా చాతుర్మాసికం .. 29..

పాంచమాసికం షాఙ్మాసికం వాతిక పైత్తికజ్వరం .

శ్లైష్పికం సాత్రిపాతికం తథైవ సతతజ్వరం .. 30..

మౌహూర్తికం పైత్తికం శీతజ్వరం విషమజ్వరం .

ద్వ్యహిన్కం త్ర్యహ్నికం చైవ జ్వరమేకాహ్నికం తథా .

క్షిప్రం నాశయేతే నిత్యం స్మరణాదపరాజితా .. 31..

ఓం హౄం హన హన, కాలి శర శర, గౌరి ధం,

ధం, విద్యే ఆలే తాలే మాలే గంధే బంధే పచ పచ

విద్యే నాశయ నాశయ పాపం హర హర సంహారయ వా

దుఃఖస్వప్నవినాశిని కమలస్థితే వినాయకమాతః

రజని సంధ్యే, దుందుభినాదే, మానసవేగే, శంఖిని,

చక్రిణి గదిని వజ్రిణి శూలిని అపమృత్యువినాశిని

విశ్వేశ్వరి ద్రవిడి ద్రావిడి ద్రవిణి ద్రావిణి

కేశవదయితే పశుపతిసహితే దుందుభిదమని దుర్మ్మదదమని .

శబరి కిరాతి మాతంగి ఓం ద్రం ద్రం జ్రం జ్రం క్రం

క్రం తురు తురు ఓం ద్రం కురు కురు .

యే మాం ద్విషంతి ప్రత్యక్షం పరోక్షం వా తాన్ సర్వాన్

దమ దమ మర్దయ మర్దయ తాపయ తాపయ గోపయ గోపయ

పాతయ పాతయ శోషయ శోషయ ఉత్సాదయ ఉత్సాదయ

బ్రహ్మాణి వైష్ణవి మాహేశ్వరి కౌమారి వారాహి నారసింహి

ఐంద్రి చాముండే మహాలక్ష్మి వైనాయికి ఔపేంద్రి

ఆగ్నేయి చండి నైరృతి వాయవ్యే సౌమ్యే ఐశాని

ఊర్ధ్వమధోరక్ష ప్రచండవిద్యే ఇంద్రోపేంద్రభగిని .

ఓం నమో దేవి జయే విజయే శాంతి స్వస్తి-తుష్టి పుష్టి- వివర్ద్ధిని .

కామాంకుశే కామదుఘే సర్వకామవరప్రదే .

సర్వభూతేషు మాం ప్రియం కురు కురు స్వాహా .

ఆకర్షణి ఆవేశని-, జ్వాలామాలిని-, రమణి రామణి,

ధరణి ధారిణి, తపని తాపిని, మదని మాదిని, శోషణి సమ్మోహిని .

నీలపతాకే మహానీలే మహాగౌరి మహాశ్రియే .

మహాచాంద్రి మహాసౌరి మహామాయూరి ఆదిత్యరశ్మి జాహ్నవి .

యమఘంటే కిణి కిణి చింతామణి .

సుగంధే సురభే సురాసురోత్పన్నే సర్వకామదుఘే .

యద్యథా మనీషితం కార్యం తన్మమ సిద్ధ్యతు స్వాహా .

ఓం స్వాహా .

ఓం భూః స్వాహా .

ఓం భువః స్వాహా .

ఓం స్వః స్వహా .

ఓం మహః స్వహా .

ఓం జనః స్వహా .

ఓం తపః స్వాహా .

ఓం సత్యం స్వాహా .

ఓం భూర్భువః స్వః స్వాహా .

యత ఏవాగతం పాపం తత్రైవ ప్రతిగచ్ఛతు స్వాహేత్యోం .

అమోఘైషా మహావిద్యా వైష్ణవీ చాపరాజితా .. 32..

స్వయం విష్ణుప్రణీతా చ సిద్ధేయం పాఠతః సదా .

ఏషా మహాబలా నామ కథితా తేఽపరాజితా .. 33..

నానయా సదృశీ రక్షా త్రిషు లోకేషు విద్యతే .

తమోగుణమయీ సాక్షద్రౌద్రీ శక్తిరియం మతా .. 34..

కృతాంతోఽపి యతో భీతః పాదమూలే వ్యవస్థితః .

మూలాధారే న్యసేదేతాం రాత్రావేనం చ సంస్మరేత్ .. 35..

నీలజీమూతసంకాశాం తడిత్కపిలకేశికాం .

ఉద్యదాదిత్యసంకాశాం నేత్రత్రయవిరాజితాం .. 36..

శక్తిం త్రిశూలం శంఖం చ పానపాత్రం చ విభ్రతీం .

వ్యాఘ్రచర్మపరీధానాం కింకిణీజాలమండితాం .. 37..

ధావంతీం గగనస్యాంతః పాదుకాహితపాదకాం .

దంష్ట్రాకరాలవదనాం వ్యాలకుండలభూషితాం .. 38..

వ్యాత్తవక్త్రాం లలజ్జిహ్వాం భృకుటీకుటిలాలకాం .

స్వభక్తద్వేషిణాం రక్తం పిబంతీం పానపాత్రతః .. 39..

సప్తధాతూన్ శోషయంతీం క్రూరదృష్ట్యా విలోకనాత్ .

త్రిశూలేన చ తజ్జిహ్వాం కీలయంతీం ముహుర్ముహుః .. 40..

పాశేన బద్ధ్వా తం సాధమానవంతీం తదంతికే .

అర్ద్ధరాత్రస్య సమయే దేవీం ధాయేన్మహాబలాం .. 41..

యస్య యస్య వదేన్నామ జపేన్మంత్రం నిశాంతకే .

తస్య తస్య తథావస్థాం కురుతే సాపి యోగినీ .. 42..

ఓం బలే మహాబలే అసిద్ధసాధనీ స్వాహేతి .

అమోఘాం పఠతి సిద్ధాం శ్రీవైష్ణవీం .. 43..

శ్రీమదపరాజితావిద్యాం ధ్యాయేత్ .

దుఃస్వప్నే దురారిష్టే చ దుర్నిమిత్తే తథైవ చ .

వ్యవహారే భేవేత్సిద్ధిః పఠేద్విఘ్నోపశాంతయే .. 44..

యదత్ర పాఠే జగదంబికే మయా

విసర్గబింద్వఽక్షరహీనమీడితం .

తదస్తు సంపూర్ణతమం ప్రయాంతు మే

సంకల్పసిద్ధిస్తు సదైవ జాయతాం .. 45..

తవ తత్త్వం న జానామి కీదృశాసి మహేశ్వరి .

యాదృశాసి మహాదేవీ తాదృశాయై నమో నమః .. 46..

ఇస స్తోత్ర కా విధివత పాఠ కరనే సే సబ ప్రకార కే రోగ తథా

సబ ప్రకార కే శత్రు ఔర సబ బంధ్యా దోష నష్ట హోతా హై .

విశేష రూప సే ముకదమేం మేం సఫలతా ఔర రాజకీయ కార్యోం మేం

అపరాజిత రహనే కే లియే యహ పాఠ రామబాణ హై .

అన్నపూర్ణోపనిషత్

సర్వాపహ్నవసంసిద్ధబ్రహ్మమాత్రతయోజ్జ్వలం .

త్రైపదం శ్రీరామతత్త్వం స్వమాత్రమితి భావయే ..

ఓం భద్రం కర్ణేభిః శృణుయామ దేవాః .. భద్రం పశ్యేమాక్షభిర్యజత్రాః ..

స్థిరైరంగైస్తుష్టువాꣳసస్తనూభిః .. వ్యశేమ దేవహితం యదాయుః ..

స్వస్తి న ఇంద్రో వృద్ధశ్రవాః .. స్వస్తి నః పూషా విశ్వవేదాః ..

స్వస్తి నస్తార్క్ష్యో అరిష్టనేమిః .. స్వస్తి నో బృహస్పతిర్దధాతు ..

ఓం శాంతిః శాంతిః శాంతిః ..

ప్రథమోఽధ్యాయః

హరిః ఓం నిదాఘో నామ యోగీంద్ర ఋభుం బ్రహ్మవిదాం వరం .

ప్రణమ్య దండవద్భూమావుత్థాయ స పునర్మునిః .. 1..

ఆత్మతత్త్వమనుబ్రూహీత్యేవం పప్రచ్ఛ సాదరం .

కయోపాసనయా బ్రహ్మన్నీదృశం ప్రాప్తవానసి .. 2..

తాం మే బ్రూహి మహావిద్యాం మోక్షసామ్రాజ్యదాయినీం .

నిదాఘ త్వం కృతార్థోఽసి శృణు విద్యాం సనాతనీం .. 3..

యస్యా విజ్ఞానమాత్రేణ జీవన్ముక్తో భవిష్యసి .

మూలశృంగాటమధ్యస్థా బిందునాదకలాశ్రయా .. 4..

నిత్యానందా నిరాధారా విఖ్యాతా విలసత్కచా .

విష్టపేశీ మహాలక్ష్మీః కామస్తారో నతిస్తథా .. 5..

భగవత్యన్నపూర్ణేతి మమాభిలషితం తతః .

అన్నం దేహి తతః స్వాహా మంత్రసారేతి విశ్రుతా .. 6..

సప్తవింశతి వర్ణాత్మా యోగినీగణసేవితా .. 7..

ఐం హ్రీం సౌం శ్రీం క్లీమోన్నమో భగవత్యన్నపూర్ణే

మమాభిలషితమన్నం దేహి స్వాహా .

ఇతి పిత్రోపదిష్టోఽస్మి తదాదినియమః స్థితః .

కృతవాన్స్వాశ్రమాచారో మంత్రానుష్ఠానమన్వహం .. 8..

ఏవం గతే బహుదినే ప్రాదురాసీన్మమాగ్రతః .

అన్నపూర్ణా విశాలాక్షీ స్మయమానముఖాంబుజా .. 9..

తాం దృష్ట్వా దండవద్భూమౌ నత్వా ప్రాంజలిరాస్థితః .

అహో వత్స కృతార్థోఽసి వరం వరయ మా చిరం .. 10..

ఏవముక్తో విశాలాక్ష్యా మయోక్తం మునిపుంగవ .

ఆత్మతత్త్వం మనసి మే ప్రాదుర్భవతు పార్వతి .. 11..

తథైవాస్థితి మాముక్త్వా తత్రైవాంతరధీయత .

తదా మే మతిరుత్పన్నా జగద్వైచిత్ర్యదర్శనాత్ .. 12..

భ్రమః పంచవిధో భాతి తదేవేహ సముచ్యతే .

జీవేశ్వరౌ భిన్నరూపావితి ప్రాథమికో భ్రమః .. 12..

ఆత్మనిష్ఠం కర్తృగుణం వాస్తవం వా ద్వితీయకః .

శరీరత్రయసంయుక్తజీవః సంగీ తృతీయకః .. 13..

జగత్కారణరూపస్య వికారిత్వం చతుర్థకః .

కారణాద్భిన్నజగతః సత్యత్వం పంచమో భ్రమః .

పంచభ్రమనివృత్తిశ్చ తదా స్ఫురతి చేతసి .. 15..

బింబప్రతిబింబదర్శనేన భేదభ్రమో నివృత్తః .

స్ఫటికలోహితదర్శనేన పారమార్థికకర్తృత్వభ్రమో నివృత్తః .

ఘటమఠాకాశదర్శనేన సంగీతిభ్రమో నివృత్తః .

రజ్జుసర్పదర్శనేన కారణాద్భిన్నజగతః సత్యత్వభ్రమో నివృత్తః .

కనకరుచకదర్శనేన వికారిత్వభ్రమో నివృత్తః .

తదాప్రభృతి మచ్చిత్తం బ్రహ్మాకారమభూత్స్వయం .

నిదాఘ త్వమపీత్థం హి తత్త్వజ్ఞానమవాప్నుహి .. 16..

నిదాఘః ప్రణతో భూత్వా ఋభుం పప్రచ్ఛ సాదరం .

బ్రూహి మే శ్రద్దధానాయ బ్రహ్మవిద్యామనుత్తమాం .. 17..

తథేత్యాహ ఋభుః ప్రీతస్తత్త్వజ్ఞాం వదామి తే .

మహాకర్తా మహాభోక్తా మహాత్యాగీ భవానఘ .

స్వస్వరూపానుసంధానమేవం కృత్వా సుఖీ భవ .. 18..

నిత్యోదితం విమలమాద్యమనతరూపం

     బ్రహ్మాస్మి నేతరకలాకలనం హి కించిత్ .

ఇత్యేవ భావయ నిరంజనతాముపేతో

     నిర్వాణమేహి సకలామలశాంతవృత్తిః .. 19..

యదిదం దృశ్యతే కించిత్తత్తన్నాస్తీతి భావయ .

యథా గంధర్వనగరం యథా వారి మరుస్థలే .. 20..

యత్తు నో దృశ్యతే కించిద్యన్ను కించిదివ స్థితం .

మనఃషష్ఠేంద్రియాతీతం తన్మయో భవ వై మునే .. 21..

అవినాశి చిదాకాశం సర్వాత్మకమఖండితం .

నీరంధ్రం భూరివాశేషం తదస్మీతి విభావయ .. 22..

యదా సంక్షీయతే చిత్తమభావాత్యంతభావనాత్ .

చిత్సామాన్యస్వరూపస్య సత్తాసామాన్యతా తదా .. 23..

నూనం చైత్యాంశరహితా చిద్యదాత్మని లీయతే .

అసద్రూపవదత్యచ్ఛా సత్తాసామాన్యతా తదా .. 24..

దృష్టిరేషా హి పరమా సదేహాదేహయోః సమా .

ముక్తయోః సంభవత్యేవ తుర్యాతీతపదాభిధా .. 25..

వ్యుత్థితస్య భవత్యేషా సమాధిస్థస్య చానఘ .

జ్ఞస్య కేవలమజ్ఞస్య న భవత్యేవ బోధజా .

అనానందసమానందముగ్ధముగ్ధముఖద్యుతిః .. 26..

చిరకాలపరిక్షీణమననాదిపరిభ్రమః .

పదమాసాద్యతే పుణ్యం ప్రజ్ఞయైవైకయా తథా .. 27..

ఇమం గుణసమాహారమనాత్మత్వేన పశ్యతః .

అంతఃశీతలయా యాసౌ సమాధిరితి కథ్యతే .. 28..

అవాసనం స్థిరం ప్రోక్తం మనోధ్యానం తదేవ చ .

తదేవ కేవలీభానం శాంతతైవ చ తత్సదా .. 29..

తనువాసనమత్యుచ్చైః పదాయోద్యతముచ్యతే .

అవాసగం మనోఽకర్తృపదం తస్మాదవాప్యతే .. 30..

ఘనవాసనమేతత్తు చేతఃకర్తృత్వభావనం .

సర్వదుఃఖప్రదం తస్మాద్వాసనాం తనుతాం నయేత్ .. 31..

చేతసా సంపరిత్యజ్య సర్వభావాత్మభావనాం .

సర్వమాకాశతామేతి నిత్యమంతర్ముఖస్థితేః .. 32..

యథా విపణగా లోకా విహరంతోఽప్యసత్సమాః .

అసంబంధాత్తథా జ్ఞస్య గ్రామోఽపి విపినోపమః .. 33..

అంతర్ముఖతయా నిత్యం సుప్తో బుద్ధో వ్రజన్పఠన్ .

పురం జనపదం గ్రామమరణ్యమివ పశ్యతి .. 34..

అంతఃశీతలతాయాం తు లబ్ధాయాం శీతలం జగత్ .

అంతస్తృష్ణోపతప్తానాం దావదాహమయం జగత్ .. 35..

భవత్యఖిలజంతూనాం యదంతస్తద్బహిః స్థితం .. 36..

యస్త్వాత్మరతిరేవాంతః కుర్వన్కర్మేంద్రియైః క్రియాః .

న వశో హర్షశోకాభ్యాం స సమాహిత ఉచ్యతే .. 37..

ఆత్మవత్సర్వభూతాని పరద్రవ్యాణి లోష్ఠవత్ .

స్వభావాదేవ న భయాద్యః పశ్యతి స పశ్యతి .. 38..

అద్యైవ మృతిరాయాతు కల్పాంతనిచయేన వా .

నాసౌ కలంకమాప్నోతి హేమ పంకగతం యథా .. 39..

కోఽహం కథమిదం కిం వా కథం మరణజన్మనీ .

విచారయాంతరే వేత్థం మహత్తత్ఫలమేష్యసి .. 40..

విచారేణ పరిజ్ఞాతస్వభావస్య సతస్తవ .

మనః స్వరూపముత్సృజ్య శమమేష్యతి విజ్వరం .. 41..

విజ్వరత్వం గతం చేతస్తవ సంసారవృత్తిషు .

న నిమజ్జతి తద్బ్రహ్మన్గోష్పదేష్వివ వారణః .. 42..

కృపణం తు మనో బ్రహ్మన్గోష్పదేఽపి నిమజ్జతి .

కార్యే గోష్పదతోయేఽపి విశీర్ణో మశకో యథా .. 43..

యావద్యావన్మునిశ్రేష్ఠ స్వయం సంతజ్యతేఽఖిలం .

తావత్తావత్పరాలోకః పరమాత్మైవ శిష్యతే .. 44..

యావత్సర్వం న సంత్యక్తం తావదాత్మా న లభ్యతే .

సర్వవస్తుపరిత్యాగే శేష ఆత్మేతి కథ్యతే .. 45..

ఆత్మావలోకనార్థం తు తస్మాత్సర్వం పరిత్యజేత్ .

సర్వం సంత్యజ్య దూరేణ యచ్ఛిష్టం తన్మయో భవ .. 46..

సర్వం కించిదిదం దృశ్యం దృశ్యతే యజ్జగద్గతం .

చిన్నిష్పందాంశమాత్రం తన్నాన్యత్కించన శాశ్వతం .. 47..

సమాహితా నిత్యతృప్తా యథాభూతార్థదర్శినీ .

బ్రహ్మన్సమాధిశబ్దేన పరా ప్రజ్ఞోచ్యతే బుధైః .. 48..

అక్షుబ్ధా నిరహంకారా ద్వంద్వేష్వననుపాతినీ .

ప్రోక్తా సమాధిశబ్దేన మేరోః స్థిరతరా స్థితిః .. 49..

నిశ్చితా విగతాభీష్టా హేయోపదేయవర్జితా .

బ్రహ్మన్సమాధిశబ్దేన పరిపూర్ణా మనోగతిః .. 50..

కేవలం చిత్ప్రకాశాంశకల్పితా స్థిరతాం గతా .

తుర్యా సా ప్రాప్యతే దృష్టిర్మహద్భిర్వేదవిత్తమైః .. 51..

అదూరగతసాదృశ్యా సుషుప్తస్యోపలక్ష్యతే .

మనోహంకారవిలయే సర్వభావాంతరస్థితా .. 52..

సముదేతి పరానందా యా తనుః పారమేశ్వరీ .

మనసైవ మనశ్ఛిత్త్వా సా స్వయం లభ్యతే గతిః .. 53..

తదను విషయవాసనావినాశ-

     స్తదను శుభః పరమః స్ఫుటప్రకాశః .

తదను చ సమతావశాత్స్వరూపే

     పరిణమనం మహతామచింత్యరూపం .. 54..

అఖిలమిదమనంతమనంతమాత్మతత్త్వం

     దృఢపరిణామిని చేతసి స్థితోఽన్తః .

బహిరుపశమితే చరాచరాత్మా

     స్వయమనుభూయత ఏవ దేవదేవః .. 55..

అసక్తం నిర్మలం చిత్తం యుక్తం సంసార్యవిస్ఫుటం .

సక్తం తు దీర్ఘతపసా ముక్తమప్యతిబద్ధవత్ .. 56..

అంతఃసంసక్తినిర్ముక్తో జీవో మధురవృత్తిమాన్ .

బహిః కుర్వన్నకుర్వన్వా కర్తా భోక్తా న హి క్వచిత్ .. 57..

ఇతి ప్రథమోఽధ్యాయః .. 1..

ద్వితీయోఽధ్యాయః

నిదాఘ ఉవాచ ..

సంగః కీదృశ ఇత్యుక్తః కశ్చ బంధాయ దేహినాం .

కశ్చ మోక్షాయ కథితః కథం త్వేష చికిత్స్యతే .. 1..

దేహదేహివిభాగైకపరిత్యాగేన భావనా .

దేహమాత్రే హి విశ్వాసః సంగో బంధాయ కథ్యతే .. 2..

సర్వమాత్మేదమత్రాహం కిం వాంఛామి త్యజామి కిం .

ఇత్యసంగస్థితిం విద్ధి జీవన్ముక్తతనుస్థితాం .. 3..

నాహమస్మి న చాన్యోస్తి న చాయం న చ నేతరః .

సోఽసంగ ఇతి సంప్రోక్తో బ్రహ్మాస్మీత్యేవ సర్వదా .. 4..

నాభినందతి నైష్కర్మ్యం న కర్మస్వనుషజ్జతే .

సుసమో యః పరిత్యాగీ సోఽసంసక్త ఇతి స్మృతః .. 5..

సర్వకర్మఫలాదీనాం మనసైవ న కర్మణా .

నిపుణో యః పరిత్యాగీ సోఽసంసక్త ఇతి స్మృతః .. 6..

అసంకల్పేన సకలాశ్చేష్టా నానా విజృంభితాః .

చికిత్సితా భవంతీహ శ్రేయః సంపాదయంతి హి .. 7..

న సక్తమిహ చేష్టాసు న చింతాసు న వస్తుషు .

న గమాగమచేష్టాసు న కాలకలనాసు చ .. 8..

కేవలం చితి విశ్రమ్య కించిచ్చైత్యావలంబ్యపి .

సర్వత్ర నీరసమిహ తిష్ఠత్యాత్మరసం మనః .. 9..

వ్యవహారమిదం సర్వం మా కరోతు కరోతు వా .

అకుర్వన్వాపి కుర్వన్వా జీవః స్వాత్మరతిక్రియః .. 10..

అథవా తమపి త్యక్త్వా చైత్యాంశం శాంతచిద్ఘనః .

జీవస్తిష్ఠతి సంశాంతో జ్వలన్మణిరివాత్మని .. 11..

చిత్తే చైత్యదశాహీనే యా స్థితిః క్షీణచేతసాం .

సోచ్యతే శాంతకలనా జాగ్రత్యేవ సుషుప్తతా .. 12..

ఏషా నిదాఘ సౌషుప్తస్థితిరభ్యాసయోగతః .

ప్రౌఢా సతీ తురీయేతి కథితా తత్త్వకోవిదైః .. 13..

అస్యాం తురీయావస్థాయాం స్థితిం ప్రాప్యావినాశినీం .

ఆనందైకాంతశీలత్వాదనానందపదం గతః .. 14..

అనానందమహానందకాలాతీతస్తతోఽపి హి .

ముక్త ఇత్యుచ్యతే యోగీ తుర్యాతీతపదం గతః .. 15..

పరిగలితసమస్తజన్మపాశః

     సకలవిలీనతమోమయాభిమానః .

పరమరసమయీం పరాత్మసత్తాం

     జలగతసైంధవఖండవన్మహాత్మా .. 16..

జడాజడదృశోర్మధ్యే యత్తత్త్వం పారమార్థికం .

అనుభూతిమయం తస్మాత్సారం బ్రహ్మేతి కథ్యతే .. 17..

దృశ్యసంవలితో బంధస్తన్ముక్తౌ ముక్తిరుచ్యతే .

ద్రవ్యదర్శనసంబంధే యానుభూతిరనామయా .. 18..

తామవష్టభ్య తిష్ఠ త్వం సౌషుప్తీం భజతే స్థితిం .

సైవ తుర్యత్వమాప్నోతి తస్యాం దృష్టిం స్థిరాం కురు .. 19..

ఆత్మా స్థూలో న చైవాణుర్న ప్రత్యక్షో న చేతరః .

న చేతనో న చ జడో న చైవాసన్న సన్మయః .. 20..

నాహం నాన్యో న చైవైకో న చానేకోఽద్వయోఽవ్యయః .

యదీదం దృశ్యతాం ప్రాప్తం మనః సర్వేంద్రియాస్పదం .. 21..

దృశ్యదర్శనసంబంధే యత్సుఖం పారమార్థికం .

తదతీతం పదం యస్మాత్తన్న కించిదివైవ తత్ .. 22..

న మోక్షో నభసః పృష్ఠే న పాతాలే న భూతలే .

సర్వాశాసంక్షయే చేతఃక్షయో మోక్ష ఇతీష్యతే .. 23..

మోక్షో మేఽస్త్వితి చింతాంతర్జాతా చేదుత్థితం మనః .

మననోత్థే మనస్యైష బంధః సాంసారికో దృఢః .. 24..

ఆత్మన్యతీతే సర్వస్మాత్సర్వరూపేఽథ వా తతే .

కో బంధః కశ్చ వా మోక్షో నిర్మూలం మననం కురు .. 25..

అధ్యాత్మరతిరాశాంతః పూర్ణపావనమానసః .

ప్రాప్తానుత్తమవిశ్రాంతిర్న కించిదిహ వాంఛతి .. 26..

సర్వాధిష్ఠానసన్మాత్రే నిర్వికల్పే చిదాత్మని .

యో జీవతి గతస్నేహః స జీవన్ముక్త ఉచ్యతే .. 27..

నాపేక్షతే భవిష్యచ్చ వర్తమానే న తిష్ఠతి .

న సంస్మరత్యతీతం చ సర్వమేవ కరోతి చ .. 28..

అనుబంధపరే జంతావసంసర్గమనాః సదా .

భక్తే భక్తసమాచరః శఠే శఠ ఇవ స్థితః .. 29..

బాలో బాలేషు వృద్ధేషు వృద్ధో ధీరేషు ధైర్యవాన్ .

యువా యౌవనవృత్తేషు దుఃఖితేషు సుదుఃఖధీః .. 30..

ధీరధీరుదితానందః పేశలః పుణ్యకీర్తనః .

ప్రాజ్ఞః ప్రసన్నమధురో దైన్యాదపగతాశయః .. 31..

అభ్యాసేన పరిస్పందే ప్రాణానాం క్షయమాగతే .

మనః ప్రశమమాయాతి నిర్వాణమవశిష్యతే .. 32..

యతో వాచో నివర్తంతే వికల్పకలనాన్వితాః .

వికల్పసంక్షయాజ్జంతోః పదం తదవశిష్యతే .. 33..

అనాద్యంతావభాసాత్మా పరమాత్మైవ విద్యతే .

ఇత్యేతన్నిశ్చయం స్ఫారం సమ్యగ్జ్ఞానం విదుర్బుధాః .. 34..

యథాభూతార్థదర్శిత్వమేతావద్భువనత్రయే .

యదాత్మైవ జగత్సర్వమితి నిశ్చిత్య పూర్ణతా .. 35..

సర్వమాత్మైవ కౌ దృష్టౌ భావాభావౌ క్వ వా స్థితౌ .

క్వ బంధమోక్షకలనే బ్రహ్మైవేదం విజృంభతే .. 36..

సర్వమేకం పరం వ్యోమ కో మోక్షః కస్య బంధతా .

బ్రహ్మేదం బృంహితాకారం బృహద్బృహదవస్థితం .. 37..

దూరాదస్తమితద్విత్వం భవాత్మైవ త్వమాత్మనా .

సమ్యగాలోకితే రూపే కాష్ఠపాషాణవాససాం .. 38..

మనాగపి న భేదోఽస్తి క్వాసి సంకల్పనోన్ముఖః .

ఆదావంతే చ సంశాంతస్వరూపమవినాశి యత్ .. 39..

వస్తూనామాత్మనశ్చైతత్తన్మయో భవ సర్వదా .

ద్వైతాద్వైతసముద్భేదైర్జరామరణవిభ్రమైః .. 40..

స్ఫురత్యాత్మభిరాత్మైవ చిత్తైరబ్ధీవ వీచిభిః .

ఆపత్కరంజపరశుం పరాయా నిర్వృతేః పదం .. 41..

శుద్ధమాత్మానమాలింగ్య నిత్యమంతస్థయా ధియా .

యః స్థితస్తం క ఆత్మేహ భోగో బాధయితుం క్షమః .. 42..

కృతస్ఫారవిచారస్య మనోభోగాదయోఽరయః .

మనాగపి న భిందంతి శైలం మందానిలా ఇవ .. 43..

నానాత్వమస్తి కలనాసు న వస్తుతోఽన్త-

     ర్నానావిధాసు సరసీవ జలాదివాన్యత్ .

ఇత్యేకనిశ్చయమయః పురుషో విముక్త

     ఇత్యుచ్యతే సమవలోకితసమ్యగర్థః .. 44..

ఇతి ద్వితీయోఽధ్యాయః .. 2..

త్రితీయోఽధ్యాయః

విదేహముక్తేః కిం రూపం తద్వాన్కో వా మహామునిః .

కం యోగం సముపస్థాయ ప్రాప్తవాన్పరమం పదం .. 1..

సుమేరోర్వసుధాపీఠే మాండవ్యో నామ వై మునిః .

కౌండిన్యాత్తత్త్వమాస్థాయ జీవన్ముక్తో భవత్యసౌ .. 2..

జీవన్ముక్తిదశాం ప్రాప్య కదాచిద్బ్రహ్మవిత్తమః .

సర్వేంద్రియాణి సంహర్తుం మనశ్చక్రే మహామునిః .. 3..

బద్ధపద్మాసనస్తిష్ఠన్నర్ధోన్మీలితలోచనః .

బాహ్యానాభ్యాంతరాంశ్చైవ స్పర్శాన్పరిహరంఛనైః .. 4..

తతః స్వమనసః స్థైర్యం మనసా విగతైనసా .

అహో ను చంచలమిదం ప్రత్యాహృతమపి స్ఫుటం .. 5..

పటాద్ఘటముపాయాతి ఘటాచ్ఛకటముత్కటం .

చిత్తమర్థేషు చరతి పాదపేష్వివ మర్కటః .. 6..

పంచ ద్వారాణి మనసా చక్షురాదీన్యమూన్యలం .

బుద్ధీంద్రియాభిధానాని తాన్యేవాలోకయామ్యహం .. 7..

హంతేంద్రియగణా యూయం త్యజతాకులతాం శనైః .

చిదాత్మా భగవాన్సర్వసాక్షిత్వేన స్థితోఽస్మ్యహం .. 8..

తేనాత్మనా బహుజ్ఞేన నిర్జ్ఞాతాశ్చక్షురాదయః .

పరినిర్వామి శాంతోఽస్మి దిష్ట్యాస్మి విగతజ్వరః .. 9..

స్వాత్మన్యేవావతిష్ఠేఽహం తుర్యరూపపదేఽనిశం .

అంతరేవ శశామాస్య క్రమేణ ప్రాణసంతతిః .. 10..

జ్వాలాజాలపరిస్పందో దగ్ధేంధన ఇవానలః .

తదితోఽస్తం గత ఇవ హ్యస్తం గత ఇవోదితః .. 11..

సమః సమరసాభాసస్తిష్ఠామి స్వచ్ఛతాం గతః .

ప్రబుద్ధోఽపి సుషుప్తిస్థః సుషుప్తిస్థః ప్రబుద్ధవాన్ .. 12..

తుర్యమాలంబ్య కాయాంతస్తిష్ఠామి స్తంభితస్థితిః .

సబాహ్యాభ్యంతరాన్భావాన్స్థూలాన్సూక్ష్మతరానపి .. 13..

త్రైలోక్యసంభవాంస్త్యక్త్వా సంకల్పైకవినిర్మితాన్ .

సహ ప్రణవపర్యంతదీర్ఘనిఃస్వనతంతునా .. 14..

జహావింద్రియతన్మాత్రజాలం ఖగ ఇవానలః .

తతోఽఙ్గసంవిదం స్వచ్ఛాం ప్రతిభాసముపాగతాం .. 15..

సద్యోజాతశిశుజ్ఞానం ప్రాప్తవాన్మునిపుంగవః .

జహౌ చిత్తం చైత్యదశాం స్పందశక్తిమివానిలః .. 16..

చిత్సామాన్యమథాసాద్య సత్తామాత్రాత్మకం తతః .

సుషుప్తపదమాలంబ్య తస్థౌ గిరిరివాచలః .. 17..

సుషుప్తస్థైర్యమాసాద్య తుర్యరూపముపాయయౌ .

నిరానందోఽపి సానందః సచ్చాసచ్చ బభూవ సః .. 18..

తతస్తు సంబభూవాసౌ యద్గిరామప్యగోచరః .

యచ్ఛూన్యవాదినాం శూన్యం బ్రహ్మ బ్రహ్మవిదాం చ యత్ .. 19..

విజ్ఞానమాత్రం విజ్ఞానవిదాం యదమలాత్మకం .

పురుషః సాంఖ్యదృష్టీనామీశ్వరో యోగవాదినాం .. 20..

శివః శైవాగమస్థానాం కాలః కాలైకవాదినాం .

యత్సర్వశాస్త్రసిద్ధాంతం యత్సర్వహృదయానుగం .. 21..

యత్సర్వం సర్వగం వస్తు యత్తత్త్వం తదసౌ స్థితః .

యదనుక్తమనిష్పందం దీపకం తేజసామపి .. 22..

స్వానుభూత్యైకమానం చ యత్తత్త్వం తదసౌ స్థితః .

యదేకం చాప్యనేకం చ సాంజనం చ నిరంజనం .

యత్సర్వం చాప్యసర్వం చ యత్తత్త్వం తదసు స్థితః .. 23..

అజమమరమనాద్యమాద్యమేకం

     పదమమలం సకలం చ నిష్కలం చ .

స్థిత ఇతి స తదా నభఃస్వరూపా-

     దపివిమలస్థితిరీశ్వరః క్షణేన .. 24..

ఇతి తృతీయోఽధ్యాయః .. 3..

చతుర్థోఽధ్యాయః

జీవన్ముక్తస్య కిం లక్ష్మ హ్యాకాశగమనాదికం .

తథా చేన్మునిశార్దూల తత్ర నైవ ప్రలక్ష్యతే .. 1..

అనాత్మవిదముక్తోఽపి నభోవిహరణాదికం .

ద్రవ్యమంత్రక్రియాకాలశక్త్యాప్నోత్యేవ స ద్విజః ..2..

నాత్మజ్ఞస్యైష విషయ ఆత్మజ్ఞో హ్యాత్మమాత్రదృక్ .

ఆత్మనాత్మని సంతృప్తో నావిద్యామనుధావతి .. 3..

యే యే భావాః స్థితా లోకే తానవిద్యామయాన్విదుః .

త్యక్తావిద్యో మహాయోగీ కథం తేషు నిమజ్జతి .. 4..

యస్తు మూఢోఽల్పబుద్ధిర్వా సిద్ధిజాలాని వాంఛతి .

సిద్ధిసాధనైర్యోగైస్తాని సాధయతి క్రమాత్ .. 5..

ద్రవ్యమంత్రక్రియాకాలయుక్తయః సాధుసిద్ధిదాః .

పరమాత్మపదప్రాప్తౌ నోపకుర్వంతి కాశ్చన .. 6..

యస్యేచ్ఛా విద్యతే కాచిత్సా సిద్ధిం సాధయత్యహో .

నిరిచ్ఛోః పరిపూర్ణస్య నేచ్ఛా సంభవతి క్వచిత్ .. 7..

సర్వేచ్ఛాజాలసంజ్ఞాంతావాత్మలాభో భవేన్మునే .

స కథం సిద్ధిజాలాని నూనం వాంఛంత్యచిత్తకః .. 8..

అపి శీతరుచావర్కే సుతీక్ష్ణేఽపీందుమండలే .

అప్యధః ప్రసరత్యగ్నౌ జీవన్ముక్తో న విస్మయీ .. 9..

అధిష్ఠానే పరే తత్త్వే కల్పితా రజ్జుసర్పవత్ .

కల్పితాశ్చర్యజాలేషు నాభ్యుదేతి కుతూహలం .. 10..

యే హి విజ్ఞాతవిజ్ఞేయా వీతరాగా మహాధియః .

విచ్ఛిన్నగ్రంథయః సర్వే తే స్వతంత్రాస్తనౌ స్థితః .. 11

సుఖదుఃఖదశాధీరం సామ్యాన్న ప్రోద్ధరంతి యం .

నిశ్వాసా ఇవ శైలేంద్రం చిత్తం తస్య మృతం విదుః .. 12..

ఆపత్కార్పణ్యముత్సాహో మదో మాంద్యం మహోత్సవః .

యం నయంతి న వైరూప్యం తస్య నష్టం మనో విదుః .. 13..

ద్వివిధచిత్తనాశోఽస్తి సరూపోఽరూప ఏవ చ .

జీవన్ముక్తౌ సరూపః స్యాదరూపో దేహముక్తిగః .. 14..

చిత్తసత్తేహ దుఃఖాయ చిత్తనాశః సుఖాయ చ .

చిత్తసత్తం క్షయం నీత్వా చిత్తం నాశముపానయేత్ .. 15..

మనస్తాం మూఢతాం విద్ధి యదా నశ్యతి సానఘ .

చిత్తనాశాభిధానం హి తత్స్వరూపమితీరితం .. 16..

మైత్ర్యాదిభిర్గుణైర్యుక్తం భవత్యుత్తమవాసనం .

భూయో జన్మవినిర్ముక్తం జీవన్ముక్తస్య తన్మనః .. 17..

సరూపోఽసౌ మనోనాశో జీవన్ముక్తస్య విద్యతే .

నిదాఘాఽరూపనాశస్తు వర్తతే దేహముక్తికే .. 18..

విదేహముక్త ఏవాసౌ విద్యతే నిష్కలాత్మకః .

సమగ్రాగ్ర్యగుణాధారమపి సత్త్వం ప్రలీయతే .. 19..

విదేహముక్తౌ విమలే పదే పరమపావనే .

విదేహముక్తివిషయే తస్మిన్సత్త్వక్షయాత్మకే .. 20..

చిత్తనాశే విరూపాఖ్యే న కించిదిహ విద్యతే .

న గుణా నాగుణాస్తత్ర న శ్రీర్నాశ్రీర్న లోకతా .. 21..

న చోదయో నాస్తమయో న హర్షామర్షసంవిదః .

న తేజో న తమః కించిన్న సంధ్యాదినరాత్రయః .

న సత్తాపి న చాసత్తా న చ మధ్యం హి తత్పదం .. 22..

యే హి పారం గతా బుద్ధేః సంసారాడంబరస్య చ .

తేషాం తదాస్పదం స్ఫారం పవనానామివాంబరం .. 23..

సంశాంతదుఃఖమజడాత్మకమేకసుప్త-

     మానందమంథరమపేతరజస్తమో యత్ .

ఆకాశకోశతనవోఽతనవో మహాంత-

     స్తస్మిన్పదే గలితచిత్తలవా భవంతి .. 24..

హే నిదాఘ మహాప్రాజ్ఞ నిర్వాసనమనా భవ .

బలాచ్చేతః సమాధాయ నిర్వికల్పమనా భవ .. 25..

యజ్జగద్భాసకం భానం నిత్యం భాతి స్వతః స్ఫురత్ .

స ఏవ జగతః సాక్షీ సర్వాత్మా విమలాకృతిః .. 26..

ప్రతిష్ఠా సర్వభూతానాం ప్రజ్ఞానఘనలక్షణః .

తద్విద్యావిషయం బ్రహ్మ సత్యజ్ఞానసుఖాద్వనం .. 27..

ఏకం బ్రహ్మాహమస్మీతి కృతకృత్యో భవేన్మునిః .. 28..

సర్వాధిష్ఠానమద్వంద్వం పరం బ్రహ్మ సనాతనం .

సచ్చిదానందరూపం తదవాఙ్మనసగోచరం .. 29..

న తత్ర చంద్రార్కవపుః ప్రకాశతే

     న వాంతి వాతః సకలాశ్చ దేవతాః .

స ఏవ దేవః కృతభావభూతః

     స్వయం విశుద్ధో విరజః ప్రకాశతే .. 30..

భిద్యతే హృదయగ్రంథిశ్ఛిద్యంతే సర్వసంశయాః .

క్షీయంతే చాస్య కర్మాణి తస్మిందృష్టే పరావరే .. 31..

ద్వౌ సుపర్ణౌ శరీరేఽస్మింజీవేశాఖ్యౌ సహ స్థితౌ .

తయోర్జీవః ఫలం భుంక్తే కర్మణో న మహేశ్వరః .. 32..

కేవలం సాక్షిరూపేణ వినా భోగో మహేశ్వరః .

ప్రకాశతే స్వయం భేదః కల్పితో మాయయా తయోః .

చిచ్చిదాకారతో భిన్నా న భిన్నా చిత్త్వహానితః .. 33..

తర్కతశ్చ ప్రమాణాచ్చ చిదేకత్వవ్యవస్థితేః .

చిదేకత్వపరిజ్ఞానే న శోచతి న ముహ్యతి .. 34..

అధిష్ఠానం సమస్తస్య జగతః సత్యచిద్ఘనం .

అహమస్మీతి నిశ్చిత్య వీతశోకో భవేన్మునిః .. 35..

స్వశరీరే స్వయంజ్యోతిస్వరూపం సర్వసాక్షిణం .

క్షీణదోషాః ప్రపశ్యంతి నేతరే మాయయావృతాః .. 36..

తమేవ ధీరో విజ్ఞాయ ప్రజ్ఞాం కుర్వీత బ్రాహ్మణః .

నానుధ్యాయాద్బహూంఛబ్దాన్వాచో విగ్లాపనం హి తత్ .. 37..

బాలేనైవ హి తిష్ఠాసేన్నిర్విద్య బ్రహ్మవేదనం .

బ్రహ్మవిద్యాం చ బాల్యం చ నిర్విద్య మునిరాత్మవాన్ .. 38..

అంతర్లీనసమారంభః శుభాశుభమహాంకురం .

సంసృతివ్రతతేర్బీజం శరీరం విద్ధి భౌతికం .. 39..

భావాభావదశాకోశం దుఃఖరత్నసముద్గకం .

బీజమస్య శరీరస్య చిత్తమాశావశానుగం .. 40..

ద్వే బీజే చిత్తవృక్షస్య వృత్తివ్రతతిధారిణః .

ఏకం ప్రాణపరిస్పందో ద్వితీయో దృఢభావనా .. 41..

యదా ప్రస్పందంతే ప్రాణో నాడీసంస్పర్శనోద్యతః .

తదా సంవేదనమయం చిత్తమాశు ప్రజాయతే .. 42..

సా హి సర్వగతా సంవిత్ప్రాణస్పందేన బోధ్యతే .

సంవిత్సంరోధనం శ్రేయః ప్రాణాదిస్పందనం వరం .. 43..

యోగినశ్చిత్తశాంత్యర్థం కుర్వంతి ప్రాణరోధనం .

ప్రాణాయామైస్తథా ధ్యానైః ప్రయోగైర్యుక్తికల్పితైః .. 44..

చిత్తోపశాంతిఫలదం పరమం విద్ధి కారణం .

సుఖదం సంవిదః స్వాస్థ్యం ప్రాణసంరోధనం విదుః .. 45..

దృఢభావనయా త్యక్తపూర్వాపరవిచారణం .

యదాదానం పదార్థస్య వాసనా సా ప్రకీర్తితా .. 46..

యదా న భావ్యతే కించిద్ధేయోపాదేయరూపి యత్ .

స్థీయతే సకలం త్యక్త్వా తదా చిత్తం న జాయతే .. 47..

అవాసనత్వాత్సతతం యదా న మనుతే మనః .

అమనస్తా తదోదేతి పరమోపశమప్రదా .. 48..

యదా న భావ్యతే భావః క్వచిజ్జగతి వస్తుని .

తదా హృదంబరే శూన్యే కథం చిత్తం ప్రజాయతే .. 49..

యదభావనమాస్థాయ యదభావస్య భావనం .

యద్యథా వస్తుదర్శిత్వం తదచిత్తత్వముచ్యతే .. 50..

సర్వమంతః పరిత్యజ్య శీతలాశయవర్తి యత్ .

వృత్తిస్థమపి తచ్చిత్తమసద్రూపముదాహృతం .. 51..

భ్రష్టబీజోపమా యేషాం పునర్జననవర్జితా .

వాసనారసనాహీనా జీవన్ముక్తా హి తే స్మృతాః .. 52..

సత్త్వరూపపరిప్రాప్తచిత్తాస్తే జ్ఞానపారగాః .

అచిత్తా ఇతి కథ్యంతే దేహాంతే వ్యోమరూపిణః .. 53..

సంవేద్యసంపరిత్యాగాత్ప్రాణస్పందనవాసనే .

సమూలం నశ్యతః క్షిప్రం మూలచ్ఛేదాదివ ద్రుమః .. 54..

పూర్వదృష్టమదృష్టం వా యదస్యాః ప్రతిభాసతే .

సంవిదస్తత్ప్రయత్నేన మార్జనీయం విజానతా .. 55..

తదమార్జనమాత్రం హి మహాసంసారతాం గతం .

తత్ప్రమార్జనమాత్రం తు మోక్ష ఇత్యభిధీయతే .. 56..

అజడో గలితానందస్త్యక్తసంవేదనో భవ .. 57..

సంవిద్వస్తుదశాలంబః సా యస్యేహ న విద్యతే .

సోఽసంవిదజడః ప్రోక్తః కుర్వన్కార్యశతాన్యపి .. 58..

సంవేద్యేన హృదాకాశే మనాగపి న లిప్యతే .

యస్యాసావజడా సంవిజ్జీవన్ముక్తః స కథ్యతే .. 59..

యదా న భావ్యతే కించిన్నిర్వాసనతయాత్మని .

బాలమూకాదివిజ్ఞానమివ చ స్థీయతే స్థిరం .. 60..

తదా జాడ్యవినిర్ముక్తమసంవేదనమాతతం .

ఆశ్రితం భవతి ప్రాజ్ఞో యస్మాద్భూయో న లిప్యతే .. 61..

సమస్తా వాసనాస్త్యక్త్వా నిర్వికల్పసమాధితః .

తన్మయత్వాదనాద్యంతే తదప్యంతర్విలీయతే .. 62..

తిష్ఠన్గచ్ఛన్స్పృశంజిఘ్రన్నపి తల్లేపవర్జితః .

అజడో గలితానందస్త్యక్తసంవేదనః సుఖీ .. 63..

ఏతాం దృష్టిమవష్టభ్య కష్టచేష్టాయుతోఽపి సన్ .

తరేద్దుఃఖాంబుధేః పారమపారగుణసాగరః .. 64..

విశేషం సంపరిత్యజ్య సన్మాత్రం యదలేపకం .

ఏకరూపం మహారూపం సత్తాయాస్తత్పదం విదుః .. 65..

కాలసత్తా కలాసత్తా వస్తుసత్తేయమిత్యపి .

విభాగకలనాం త్యక్త్వా సన్మాత్రైకపరో భవ .. 66..

సత్తాసామాన్యమేవైకం భావయన్కేవలం విభుః .

పరిపూర్ణః పరానంది తిష్ఠాపూరితదిగ్భరః .. 67..

సత్తాసామాన్యపర్యంతే యత్తత్కలనయోజ్ఝితం .

పదమాద్యమనాద్యంతం తస్య బీజం న విద్యతే .. 68..

తత్ర సంలీయతే సంవిన్నిర్వికల్పం చ తిష్ఠతి .

భూయో న వర్తతే దుఃఖే తత్ర లబ్ధపదః పుమాన్ .. 69..

తద్ధేతుః సర్వభూతానాం తస్య హేతుర్న విద్యతే .

స సారః సర్వసారాణాం తస్మాత్సారో న విద్యతే .. 70..

తస్మింశ్చిద్దర్పణే స్ఫారే సమస్తా వస్తుదృష్టయః .

ఇమాస్తాః ప్రతిబింబంతి సరసీవ తటద్రుమాః .. 71..

తదమలమరజం తదాత్మతత్త్వం

     తదవగతావుపశాంతిమేతి చేతః .

అవగతవిగతైకతత్స్వరూపో

     భవభయముక్తపదోఽసి సమ్యగేవ .. 72..

ఏతేషాం దుఃఖబీజానాం ప్రోక్తం యద్యన్మయోత్తరం .

తస్య తస్య ప్రయోగేణ శీఘ్రం తత్ప్రాప్యతే పదం .. 73..

సత్తాసామాన్యకోటిస్థే ద్రాగిత్యేవ పదే యది .

పౌరుషేణ ప్రయత్నేన బలాత్సంత్యజ్య వాసనాం .. 74..

స్థితిం బధ్నాసి తత్త్వజ్ఞ క్షణమప్యక్షయాత్మికాం .

క్షణేఽస్మిన్నేవ తత్సాధు పదమాసాదయస్యలం ..75..

సత్తాసామాన్యరూపే వా కరోషి స్థితిమాదరాత్ .

తత్కించిదధికేనేహ యత్నేనాప్నోషి తత్పదం .. 76..

సంవిత్తత్త్వే కృతధ్యానో నిదాఘ యది తిష్ఠసి .

తద్యత్నేనాధికేనోచ్చైరాసాదయసి తత్పదం .. 77..

వాసనాసంపరిత్యాగే యది యత్నం కరోషి భోః .

యావద్విలీనం న మనో న తావద్వాసనాక్షయః .. 78..

న క్షీణా వాసనా యావచ్చిత్తం తావన్న శామ్యతి .

యావన్న తత్త్వవిజ్ఞానం తావచ్చిత్తశమః కుతః .. 79..

యావన్న చిత్తోపశమో న తావత్తత్త్వవేదనం .

యావన్న వాసనానాశస్తావత్తత్త్వాగమః కుతః .

యావన్న తత్త్వసంప్రాప్తిర్న తావద్వాసనక్షయః .. 80..

తత్త్వజ్ఞానం మనోనాశో వాసనాక్షయ ఏవ చ .

మిథః కారణతాం గత్వా దుఃసాధాని స్థితాన్యతః .. 81..

భోగేచ్ఛాం దూరతస్త్యక్త్వా త్రయమేతత్సమాచర .. 82..

వాసనాక్షయవిజ్ఞానమనోనాశా మహామతే .

సమకాలం చిరాభ్యస్తా భవంతి ఫలదా మతాః .. 83..

త్రిభిరేభిః సమభ్యస్తైర్హృదయగ్రంథయో దృఢాః .

నిఃశేషమేవ త్రుట్యంతి బిసచ్ఛేదాద్గుణా ఇవ .. 84..

వాసనాసంపరిత్యాగసమం ప్రాణనిరోధనం .

విదుస్తత్త్వవిదస్తస్మాత్తదప్యేవం సమాహరేత్ .. 85..

వాసనాసంపరిత్యాగాచ్చిత్తం గచ్ఛత్యచిత్తతాం .

ప్రాణస్పందనిరోధాచ్చ యథేచ్ఛసి తథా కురు .. 86..

ప్రాణాయామదృఢాధ్యాసైర్యుక్త్యా చ గురుదత్తయా .

ఆసనాశనయోగేన ప్రాణస్పందో నిరుధ్యతే .. 87..

నిఃసంగవ్యవహారత్వాద్భవభావనవర్జనాత్ .

శరీరనాశదర్శిత్వాద్వాసనా న ప్రవర్తతే .. 88..

యః ప్రాణపవనస్పందశ్చిత్తస్పందః స ఏవ హి .

ప్రాణస్పందజయే యత్నః కర్తవ్యో ధీమతోచ్చకైః .. 89..

న శక్యతే మనో జేతుం వినా యుక్తిమనిందితాం .

శుద్ధాం సంవిదమాశ్రిత్యవీతరాగః స్థిరో భవ .. 90..

సంవేద్యవర్జితమనుత్తమమాద్యమేకం

     సంవిదత్పదం వికలనం కలయన్మహాత్మన్ .

హృద్యేవ తిష్ఠ కలనారహితః క్రియాం తు

     కుర్వన్నకర్తృపదమేత్య శమోదితశ్రీః .. 91..

మనాగపి విచారేణ చేతసః స్వస్య నిగ్రహః .

పురుషేణ కృతో యేన తేనాప్తం జన్మనః ఫలం .. 92..

ఇతి చతుర్థోఽధ్యాయః .. 4..

పంచమోఽధ్యాయః

గచ్ఛతస్తిష్ఠతో వాపి జాగ్రతః స్వపతోఽపి వా .

న విచారపరం చేతో యస్యాసౌ మృత ఉచ్యతే .. 1..

సమ్యగ్జ్ఞానసమాలోకః పుమాఽజ్ఞేయసమః స్వయం .

న బిభేతి న చాదత్తే వైవశ్యం న చ దీనతాం .. 2..

అపవిత్రమపథ్యం చ విషసంసర్గదూషితం .

భుక్తం జరయతి జ్ఞానీ క్లిన్నం నష్ఠం చ మృష్టవత్ .. 3..

సంగత్యాగం విదుర్మోక్షం సంగత్యాగాదజన్మతా .

సంగం త్యజ త్వం భావానాం జీవన్ముక్తో భవానఘ .. 4..

భావాభావే పదార్థానాం హర్షామర్షవికారదా .

మలినా వాసనా యైషా సాఽసంగ ఇతి కథ్యతే .. 5..

జీవన్ముక్తశరీరాణామపునర్జన్మకారిణీ .

ముక్తా హర్షవిషాదాభ్యాం శుద్ధా భవతి వాసనా .. 6..

దుఃఖైర్న గ్లానిమాయాసి హృది హృష్యసి నో సుఖైః .

ఆశావైవశ్యముత్సృజ్య నిదాఘాఽసంగతాం వ్రజ .. 7..

దిక్కాలాద్యనవచ్ఛిన్నమదృష్టోభయకోటికం .

చిన్మాత్రమక్షయం శాంతమేకం బ్రహ్మాస్మి నేతరత్ .. 8..

ఇతి మత్వాహమిత్యంతర్ముక్తాముక్తవపుః పుమాన్ .

ఏకరూపః ప్రశాంతాత్మా మౌనీ స్వాత్మసుఖో భవ .. 9..

నాస్తి చిత్తం న చావిద్యా న మనో న చ జీవకః .

బ్రహ్మైవైకమనాద్యంతమబ్ధివత్ప్రవిజృంభతే .. 10..

దేహే యావదహంభావో దృశ్యేఽస్మిన్యావదాత్మతా .

యావన్మమేదమిత్యాస్థా తావచ్చిత్తాదివిభ్రమః .. 11..

అంతర్ముఖతయా సర్వం చిద్వహ్నౌ త్రిజగత్తృణం .

జుహ్వంతోఽన్తర్నివర్తంతే మునే చిత్తాదివిభ్రమాః .. 12..

చిదాత్మాస్మి నిరంశోఽస్మి పరాపరవివర్జితః .

రూపం స్మరన్నిజం స్ఫారం మా స్మృత్యా సంమితో భవ .. 13..

అధ్యాత్మశాస్త్రమంత్రేణ తృష్ణావిషవిషూచికా .

క్షీయతే భావితేనాంతః శరదా మిహికా యథా .. 14..

పరిజ్ఞాయ పరిత్యాగో వాసానానం య ఉత్తమః .

సత్తాసామాన్యరూపత్వాత్తత్కైవల్యపదం విదుః .. 15..

యన్నాస్తి వాసనా లీనా తత్సుషుప్తం న సిద్ధయే .

నిర్బీజా వాసనా యత్ర తత్తుర్యం సిద్ధిదం స్మృతం .. 16..

వాసనాయాస్తథా వహ్నేరృణవ్యాధిద్విషామపి .

స్నేహవైరవిషాణ చ శేషః స్వల్పోఽపి బాధతే .. 17..

నిర్దగ్ధవాసనాబీజః సత్తాసామాన్యరూపవాన్ .

సదేహో వా విదేహో వా న భూయో దుఃఖభాగ్భవేత్ .. 18..

ఏతావదేవావిద్యాత్వం నేదం బ్రహ్మేతి నిశ్చయః .

ఏష ఏవ క్షయస్తస్యా బ్రహ్మేదమితి నిశ్చయః .. 19..

బ్రహ్మ చిద్బ్రహ్మ భువనం బ్రహ్మ భూతపరంపరా .

బ్రహ్మాహం బ్రహ్మ చిచ్ఛత్రుర్బ్రహ్మ చిన్మిత్రబాంధవాః .. 20..

బ్రహ్మైవ సర్వమిత్యేవ భావితే బ్రహ్మ వై పుమాన్ .

సర్వత్రావస్థితం శాంతం చిద్బ్రహ్మేత్యనుభూయతే .. 21..

అసంస్కృతాధ్వగాలోకే మనస్యన్యత్ర సంస్థితే .

యా ప్రతీతిరనాగసకా తచ్చిద్బ్రహ్మాస్మి సర్వగం .. 22..

ప్రశాంతసర్వసంకల్పం విగతాఖిలకౌతుకం .

విగతాశేషసంరంభం చిదాత్మానం సమాశ్రయ .. 23..

ఏవం పూర్ణధియో ధీరాః సమా నీరాగచేతసః .

న నందంతి న నిందంతి జీవితం మరణం తథా .. 24..

ప్రాణోఽయమనిశం బ్రహ్మస్పందశక్తిః సదాగతిః .

సబాహ్యాభ్యంతరే దేహేప్రాణోఽసావూర్ధ్వగః స్థితః .. 25..

అపానోఽప్యనిశం బ్రహ్మస్పందశక్తిః సదాగతిః .

సబాహ్యాభ్యంతరే దేహే అపానోఽయమవాక్స్థితః .. 26..

జాగ్రతః స్వపతశ్చైవ ప్రాణాయామోఽయముత్తమః .

ప్రవర్తతే హ్యభిజ్ఞస్య తం తావచ్ఛ్రేయసే శృణు .. 27..

ద్వాదశాంగులపర్యంతం బాహ్యమాక్రమతాం తతః .

ప్రాణాంగనామా సంస్పర్శో యః స పూరక ఉచ్యతే .. 28..

అపానశ్చంద్రమా దేహమాప్యాయయతి సువ్రత .

ప్రాణః సూర్యోఽగ్నిరథ వా పచత్యనత్రిదం వపుః .. 29..

ప్రాణక్షయసమీపస్థమపానోదయకోటిగం .

అపానప్రాణయోరైక్యం చిదాత్మానం సమాశ్రయ .. 30..

అపానోఽస్తంగతో యత్ర ప్రాణో నాభ్యుదితః క్షణం .

కలాకలంకరహితం తచ్చిత్తత్త్వం సమాశ్రయ .. 31..

నాపానోఽస్తంగతో యత్ర ప్రాణశ్చాస్తముపాగతః .

నాసాగ్రగమనావర్తం తచ్చిత్తత్త్వముపాశ్రయ .. 32..

ఆభాసమాత్రమేవేదం న సనాసజ్జగత్త్రయం .

ఇత్యన్యకలనాత్యాగం సమ్యగ్జ్ఞానం విదుర్బుధాః .. 33..

ఆభాసమాత్రకం బ్రహ్మంశ్చిత్తదర్శకలంకితం .

తతస్తదపి సంత్యజ్య నిరాభాసో భవోత్తమ ..34..

భయప్రదమకల్యాణం ధైర్యసర్వస్వహారిణం .

మనఃపిశాచముత్సార్య యోఽసి సోఽసి స్థిరో భవ .. 35..

చిద్వ్యోమేవ కిలాస్తీహ పరాపరవివర్జితం .

సర్వత్రాసంభవచ్చైత్యం యత్కల్పాంతేఽవశిష్యతే .. 36..

వాంఛాక్షణే తు యా తుష్టిస్తత్ర వాంఛైవ కారణం .

తుష్టిస్త్వతుష్టిపర్యంతా తస్మాద్వాంఛాం పరిత్యజ .. 37..

ఆశా యాతు నిరాశాత్వమభావం యాతు భావనా .

అమనస్త్వం మనో యాతు తవాసంగేన జీవతః .. 38..

వాసనారహితైరంతరింద్రియైరాహరన్క్రియా .

న వికారమవాప్నోషి ఖవత్క్షోభశతైరపి .. 39..

చిత్తోన్మేషనిమేషాభ్యాం సంసారప్రలయోదయౌ .

వాసనాప్రాణసంరోధమనున్మేషం మనః కురు .. 40..

ప్రాణోన్మేషనిమేషాభ్యాం సంసృతేః ప్రలయోదయౌ .

తమభ్యాసప్రయోగాభ్యామున్మేషరహితం కురు .. 41..

మౌర్ఖ్యోన్మేషనిమేషాభ్యాం కర్మణాం ప్రలయోదయౌ .

తద్విలీనం కురు బలాద్గురుశాస్త్రార్థసంగమైః .. 42..

అసంవిత్స్పందమాత్రేణ యాతి చిత్తమచిత్తతాం .

ప్రాణానాం వా నిరోధేన తదేవ పరమం పదం .. 43..

దృశ్యదర్శనసంబంధే యత్సుఖం పారమార్థికం .

తదంతైకాంతసంవిత్త్యా బ్రహ్మదృష్ట్యావలోకయ .. 44..

యత్ర నాభ్యుదితం చిత్తం తద్వై సుఖమకృత్రిమం .

క్షయాతిశయనిర్ముక్తం నోదేతి న చ శామ్యతి .. 45..

యస్య చిత్తం న చిత్తాఖ్యం చిత్తం చిత్తత్త్వమేవ హి .

తదేవ తుర్యావస్థాయం తుర్యాతీతం భవత్యతః .. 46..

సంన్యస్తసర్వసంకల్పః సమః శాంతమనా మునిః .

సంన్యాసయోగయుక్తాత్మా జ్ఞానవాన్మోక్షవాన్భవ .. 47..

సర్వసంకల్పసంశాంతం ప్రశాంతఘనవాసనం .

న కించిద్భావనాకారం యత్తద్బ్రహ్మ పరం విదుః .. 48..

సమ్యగ్జ్ఞానావరోధేన నిత్యమేకసమాధినా .

సాంఖ్య ఏవావబుద్ధా యే తే సాంఖ్యా యోగినః పరే .. 49..

ప్రాణాద్యనిలసంశాంతౌ యుక్త్యా యే పదమాగతాః .

అనామయమనాద్యంతం తే స్మృతా యోగయోగినః .. 50..

ఉపాదేయం తు సర్వేషాం శాతం పదమకృత్రిమం .

ఏకార్థాభ్యసనం ప్రాణరోధశ్చేతః పరిక్షయః .. 51..

ఏకస్మిన్నేవ సంసిద్ధే సంసిద్ధ్యంతి పరస్పరం .

అవినాభావినీ నిత్యం జంతూనాం ప్రాణచేతసీ .. 52..

ఆధారాధేయవచ్చైతే ఏకభావే వినశ్యతః .

కురుతః స్వవినాశేన కార్యం మోక్షాఖ్యముత్తమం .. 53..

సర్వమేతద్ధియా త్యక్త్వా యది తిష్ఠసి నిశ్చలః .

తదాహంకారవిలయే త్వమేవ పరమం పదం .. 54..

మహాచిదేకైవేహాస్తి మహాసత్తేతి యోచ్యతే .

నిష్కలంకా సమా శుద్ధా నిరహంకారరూపిణీ .. 55..

సకృద్విభాతా విమలా నిత్యోదయవతీ సమా .

సా బ్రహ్మ పరమాత్మేతి నామభిః పరిగీయతే .. 56..

సైవాహమితి నిశ్చిత్య నిదాఘ కృతకృత్యవాన్ .

న భూతం న భవిష్యచ్చ చింతయామి కదాచన .. 57..

దృష్టిమాలంబ్య తిష్ఠామి వర్తమానామిహాత్మనా .

ఇదమద్య మయా లబ్ధమిదం ప్రాప్స్యామి సుందరం .. 58..

న స్తౌమి న చ నిందామి ఆత్మనోఽన్యన్నహి క్వచిత్ .

న తుష్యామి శుభప్రాప్తౌ న ఖిద్యామ్యశుభాగమే .. 59..

ప్రశాంతచాపలం వీతశోకమస్తసమీహితం .

మనో మమ మునే శాంతం తేన జీవామ్యనామయః .. 60..

అయం బంధుః పరశ్చాయం మమాయమయమన్యకః .

ఇతి బ్రహ్మన్న జానామి సంస్పర్శం న దదామ్యహం .. 61..

వాసనామాత్రసంత్యాగాజ్జరామరణవర్జితం .

సవాసనం మనో జ్ఞానం జ్ఞేయం నిర్వాసనం మనః .. 62..

చిత్తే త్యక్తే లయం యాతి ద్వైతమేతచ్చ సర్వతః .

శిష్యతే పరమం శాంతమేకమగచ్ఛమనామయం .. 63..

అనంతమజమవ్యక్తమజరం శాంతమచ్యుతం .

అద్వితీయమనాద్యంతం యదాద్యముపలంభనం .. 64..

ఏకమాద్యంతరహితం చిన్మాత్రమమలం తతం .

ఖాదప్యతితరాం సూక్ష్మం తద్బ్రహ్మాస్మి న సంశయః .. 65..

దిక్కాలాద్యనవచ్ఛిన్నం స్వచ్ఛం నిత్యోదితం తతం .

సర్వార్థమయమేకార్థం చిన్మాత్రమమలం భవ .. 66..

సర్వమేకమిదం శాంతమాదిమధ్యాంతవర్జితం .

భావాభావమజం సర్వమితి మత్వా సుఖీ భవ .. 67..

న బద్ధోఽస్మి న ముక్తోఽస్మి బ్రహ్మైవాస్మి నిరామయం .

ద్వైతభావవిముక్తోఽస్మి సచ్చిదానందలక్షణః .

ఏవం భావయ యత్నేన జీవన్ముక్తో భవిష్యసి .. 68..

పదార్థవృందే దేహాదిధియా సంత్యజ్య దూరతః .

ఆశీతలాంతఃకరణో నిత్యమాత్మపరో భవ .. 69..

ఇదం రమ్యమిదం నేతి బీజం తే దుఃఖసంతతేః .

తస్మిన్సామ్యాగ్నినా దగ్ధే దుఃఖస్యావసరః కుతః .. 70..

శాస్త్రసజ్జనసంపర్కైః ప్రజ్ఞామాదౌ వివర్ధయేత్ .. 71..

ఋతం సత్యం పరం బ్రహ్మ సర్వసంసారభేషజం .

అత్యర్థమమలం నిత్యమాదిమధ్యాంతవర్జితం .. 72..

తథా స్థూలమనాకాశమసంస్పృశ్యమచాక్షుషం .

న రసం న చ గంధాఖ్యమప్రమేయమనూపమం .. 73..

ఆత్మానం సచ్చిదానందమనంతం బ్రహ్మ సువ్రత .

అహమస్మీత్యభిధ్యాయేద్ధ్యేయాతీతం విముక్తయే .. 74..

సమాధిః సంవిదుత్పత్తిః పరజీవైకతం ప్రతి .

నిత్యః సర్వగతో హ్యాత్మా కూటస్థో దోషవర్జితః .. 75..

ఏకః సన్భిద్యతే భ్రాంత్యా మాయయా న స్వరూపతః .

తస్మాదద్వైత ఏవాస్తి న ప్రపంచో న సంసృతిః .. 76..

యథాకాశో ఘటాకాశో మహాకాశ ఇతీరితః .

తథా భ్రాంతేర్ద్విధా ప్రోక్తో హ్యాత్మా జీవేశ్వరాత్మనా .. 77..

యదా మనసి చైతన్యం భాతి సర్వత్రగం సదా .

యోగినోఽఽవ్యవధానేన తదా సంపద్యతే స్వయం .. 78..

యదా సర్వాణి భూతాని స్వాత్మన్యేవ హి పశ్యతి .

సర్వభూతేషు చాత్మానం బ్రహ్మ సంపద్యతే సదా .. 79..

యదా సర్వాణి భూతాని సమాధిస్థో న పశ్యతి .

ఏకీభూతః పరేణాసౌ తదా భవతి కేవలః .. 80..

శాస్త్రసజ్జనసంపర్కవైరాగ్యాభ్యాసరూపిణీ .

ప్రథమా భూమికైషోక్తా ముముక్షుత్వప్రదాయినీ .. 81..

విచారణా ద్వితీయా స్యాత్తృతీయా సాంగభావనా .

విలాపినీ చతుర్థీ స్యాద్వాసనా విలయాత్మికా .. 82..

శుద్ధసంవిన్మనానందరూపా భవతి పంచమీ .

అర్ధసుప్తప్రబుద్ధాభో జీవన్ముక్తోఽత్ర తిష్ఠతి .. 83..

అసంవేదనరూపా చ షష్ఠీ భవతి భూమికా .

ఆనందైకఘనాకారా సుషుప్తసదృశీ స్థితిః .. 84..

తుర్యావస్థోపశాంతా సా ముక్తిరేవ హి కేవలా .

సమతా స్వచ్ఛతా సౌమ్యా సప్తమీ భూమికా భవేత్ .. 85..

తుర్యాతీతా తు యావస్థా పరా నిర్వాణరూపిణీ .

సప్తమీ సా పరా ప్రౌఢా విషయో నైవ జీవతాం .. 86..

పూర్వావస్థాత్రయం తత్ర జాగ్రదిత్యేవ సంస్థితం .

చతుర్థీ స్వప్న ఇత్యుక్తా స్వప్నాభం యత్ర వై జగత్ .. 87..

ఆనందైకఘనాకారా సుషుప్తాఖ్యా తు పంచమీ .

అసంవేదనరూపా తు షష్ఠీ తుర్యపదాభిధా .. 88..

తుర్యాతీతపదావస్థా సప్తమీ భూమికోత్తమా .

మనోవచోభిరగ్రాహ్యా స్వప్రకాశసదాత్మికా .. 89..

అంతః ప్రత్యాహృతివశాచ్చైత్యం చేన్న విభావితం .

ముక్త ఏవ న సందేహో మహాసమతయా తయా .. 90..

న మ్రియే న చ జీవామి నాహం సన్నాప్యసన్మయః .

అహం న కించిచ్చిదితి మత్వా ధీరో న శోచతి .. 91..

అలేపకోఽహమజరో నీరాగః శాంతవాసనః .

నిరంశోఽస్మి చిదాకాశమితి మత్వా న శోచతి .. 92..

అహంమత్యా విరహితః శుద్ధో బుద్ధోఽజరోఽమరః .

శాంతః శమసమాభాస ఇతి మత్వా న శోచతి .. 93..

తృణాగ్రేష్వంబరే భానౌ నరనాగామరేషు చ .

యత్తిష్ఠతి తదేవాహమితి మత్వా న శోచతి .. 94..

భావనాం సర్వభావేభ్యః సముత్సృజ్య సముత్థితః .

అవశిష్టం పరం బ్రహ్మ కేవలోఽస్మీతి భావయ .. 95..

వాచామతీతవిషయో విషయాశాదశోజ్ఝితః .

పరానందరసాక్షుబ్ధో రమతే స్వాత్మనాత్మని .. 96..

సర్వకర్మపరిత్యాగీ నిత్యతృప్తో నిరాశ్రయః .

న పుణ్యేన న పాపేన నేతరేణ చ లిప్యతే .. 97..

స్ఫటికః ప్రతిబింబేన యథా నాయాతి రంజనం .

తజ్జ్ఞః కర్మఫలేనాంతస్తథా నాయాతి రంజనం .. 98..

విహరంజనతావృందే దేవకీర్తన పూజనైః .

ఖేదాహ్లాదౌ న జానాతి ప్రతిబింబగతైరివ .. 99..

నిస్స్తోత్రో నిర్వికారశ్చ పూజ్యపూజావివర్జితః .

సంయుక్తశ్చ వియుక్తశ్చ సర్వాచారనయక్రమైః .. 100..

తనుం త్యజతు వా తీర్థే శ్వపచస్య గృహేఽథ వా .

జ్ఞానసంపత్తిసమయే ముక్తోఽసౌ విగతాశయః .. 101..

సంకల్పత్వం హి బంధస్య కారణం తత్పరిత్యజ .

మోక్షో భవేదసంకల్పాత్తదభ్యాసం ధియా కురు .. 102..

సావధానో భవ త్వం చ గ్రాహ్యగ్రాహకసంగమే .

అజస్రమేవ సంకల్పదశాః పరిహరఞ్శనైః .. 103..

మా భవ గ్రాహ్యభావాత్మా గ్రాహకాత్మా చ మా భవ .

భావనామఖిలాం త్యక్త్వా యచ్ఛిష్టం తన్మయో భవ .. 104..

కించిచ్చేద్రోచతే తుభ్యం తద్బద్ధోఽసి భవస్థితౌ .

న కించిద్రోచతే చేత్తే తన్ముక్తోఽసి భవస్థితౌ .. 105..

అస్మాత్పదార్థనిచయాద్యావత్స్థావరజంగమాత్ .

తృణాదేర్దేహపర్యంతాన్మా కించిత్తత్ర రోచతాం .. 106..

అహంభావానహంభావౌ త్యక్త్వా సదసతీ తథా .

యదసక్తం సమం స్వచ్ఛం స్థితం తత్తుర్యముచ్యతే .. 107..

యా స్వచ్ఛా సమతా శాంతా జీవన్ముక్తవ్యవస్థితిః .

సాక్ష్యవస్థా వ్యవహృతౌ సా తుర్యా కలనోచ్యతే .. 108..

నైతజ్జాగ్రన్న చ స్వప్నః సంకల్పానామసంభవాత్ .

సుషుప్తభావో నాఽప్యేతదభావాజ్జడతాస్థితేః .. 109..

శాంతసమ్యక్ప్రబుద్ధానాం యథాస్థితమిదం జగత్ .

విలీనం తుర్యమిత్యాహురబుద్ధానాం స్థితం స్థిరం .. 110..

అహంకారకలాత్యాగే సమతాయాః సముద్గమే .

విశరారౌ కృతే చిత్తే తుర్యావస్థోపతిష్ఠతే .. 111..

సిద్ధాంతోఽధ్యాత్మశాస్త్రాణాం సర్వాపహ్నవ ఏవ హి .

నావిద్యాస్తీహ నో మాయా శాంతం బ్రహ్మేదమక్లమం .. 112..

శాంత ఏవ చిదాకాశే స్వచ్ఛే శమసమాత్మని .

సమగ్రశక్తిఖచితే బ్రహ్మేతి కలితాభిధే .. 113..

సర్వమేవ పరిత్యజ్య మహామౌనీ భవానఘ .

నిర్వాణవాన్నిర్మననః క్షీణచిత్తః ప్రశాంతధీః .. 114..

ఆత్మన్యేవాస్వ శాంతాత్మా మూకాంధబధిరోపమః .

నిత్యమంతర్ముఖః స్వచ్ఛః స్వాత్మనాంతః ప్రపూర్ణధీః .. 115..

జాగ్రత్యేవ సుషుప్తస్థః కురు కర్మాణి వై ద్విజ .

అంతః సర్వపరిత్యాగీ బహిః కురు యథాగతం .. 116..

చిత్తసత్తా పరం దుఃఖం చిత్తత్యాగః పరం సుఖం .

అతశ్చిత్తం చిదాకాశే నయ క్షయమవేదనాత్ .. 117..

దృష్ట్వా రమ్యమరమ్యం వా స్థేయం పాషాణవత్సదా .

ఏతావతాత్మయత్నేన జితా భవతి సంసృతిః .. 118..

వేదాంతే పరమం గుహ్యం పురాకల్పప్రచోదితం .

నాప్రశాంతాయ దాతవ్యం న చాశిష్యాయ వై పునః .. 119..

అన్నపూర్ణోపనిషదం యోఽధీతే గుర్వనుగ్రహాత్ .

స జీవన్ముక్తతాం ప్రాప్య బ్రహ్మైవ భవతి స్వయం .. 120..

ఇత్యుపనిషత్ .. ఇతి పంచమోఽధ్యాయః .. 5..

ఓం భద్రం కర్ణేభిః శృణుయామ దేవాః .. భద్రం పశ్యేమాక్షభిర్యజత్రాః ..

స్థిరైరంగైస్తుష్టువాꣳసస్తనూభిః .. వ్యశేమ దేవహితం యదాయుః ..

స్వస్తి న ఇంద్రో వృద్ధశ్రవాః .. స్వస్తి నః పూషా విశ్వవేదాః ..

స్వస్తి నస్తార్క్ష్యో అరిష్టనేమిః .. స్వస్తి నో బృహస్పతిర్దధాతు ..

ఓం శాంతిః శాంతిః శాంతిః ..

ఇత్యన్నపూర్ణోపనిషత్సమాప్తా ..

చోరశైలాష్టకం

నాభౌ సన్నతమున్నతం కుచభరే నానాయుధోద్యద్భుజం

     సౌభాగ్యావధిముగ్ధవక్త్రకమలం సర్వాభిరామాకృతి .

పారేబద్ధపయోధి భాసురతరం చోరాచలాధీశ్వరం

     దూరే దుర్గతిజృంభితాని భవతాం ధూనోతు దౌర్గం మహః .. 1..

వ్యామీలన్మహిషాసురత్రికతటీవిన్యస్తపాదాంబుజా

     శ్యామీభూతశశాంకబింబరచనాసంభావ్యవక్త్రాంబుజా .

సీమోల్లంఘనశంకయా శ్రుతిపథే విశ్రాంతనేత్రాంబుజా

     శ్రీమచ్చోరగిరీశ్వరీ గిరిసుతా శ్రేయాంసి పుష్ణాతు వః .. 2..

లీలాలీనలులాయకంఠకదలీకాండాగ్రనాలీగల-

     త్కీలాలద్రవకర్దమద్రుతగతిక్రీడాకృతాధ్వశ్రమా .

హేలావల్గితహృద్యఖడ్గలతికాఖాస్కారవీరోద్ధతా

     బాలా మండితచోరశైలగహనా మథ్నాతు వో వైరిణః .. 3..

నిస్త్రింశప్రకటత్రుటద్గళగళన్నీరంధ్రరక్తచ్ఛటా-

     విస్తారస్తబకాంతరవ్యతిరటద్వేతాళమాలావృతా .

విష్టభ్యాంఘ్రితలేన మాహిషమహాదైత్యం ముహుర్మథ్నతీ

     పక్షాన్ మంక్షు భవద్ద్విషాం విశసతాత్ పాటచ్చరాద్రీశ్వరా .. 4..

బల్గత్ఖడ్గభుజంగఫూత్కృతధుతప్రధ్వస్తదైత్యాయుతం

     నృత్యద్దృతమహాలులాయకలహక్రీడత్కృపాణీతలం .

తృప్యత్స్వర్పతిర్దివ్యవందివదనప్రక్రాంతజైత్రారవం

     గర్జద్ద్విట్ఛదభర్జనం భవతు వశ్చోరాద్ర్యమాద్యం మహః .. 5..

సేవానమ్రసురేంద్రవీరపృతనామాణిక్యమౌలిచ్ఛటా-

     ఖేలోద్ధట్టఘణద్ధణత్కృతమణిక్షోణీమహామండపే .

నానారాగమరీచివీచివిభవప్రోన్నిద్రభద్రాసనే

     వీరాస్థానవహా మలిమ్లుచగిరేర్నాథైవ నాథాస్తు వః .. 6..

ఆనందద్రవదివ్యసింధులహరీవర్షాభివర్షం దృశా-

     మాయామీ యమినాం మనోభిరనిశాలేహ్యో నవాహ్యో రసః .

నీరంధ్రాభరణప్రభానిరవధిఖాదు ద్రుతం పాతు వ-

     శ్చోరాద్రేర్మణిదీపధామ జగతాం మాతా సహః పాతు వః .. 7..

ధారావర్షి ధనం ధనప్రణయినామారాధనీయం పరం

     వీరాణాం మరుతాం విపత్సు శరణం వాగ్వైభవం వాగ్మినాం .

ధీరాణాం ద్రుతనివృతిః సుకృతినాం నేత్రే సుధాస్ఖాదిమా

     చోరాద్రేర్మణిదీపథామ జగతాం మాతా మహః పాతు వః .. 8..

ఇతి తదిదమష్టకం పుష్టభూషా పరం

జగదభిమతశ్రియాంప్యధారాధకం . (నవ్యధారాధరం .)

శ్రవణయుగళే ముహుః శీతగీతామృ తై-

ర్వహతు భువనేశ్వరా చోరశైలేశ్వరా .. 9..

ఇతి చోరశైలాష్టకం సంపూర్ణం .

అన్నపూర్ణాస్తోత్రం 3

మందార-కల్ప-హరిచందన-పారిజాత-

     మధ్యే శశాంక-మణిమండిత-వేదిసంస్థే .

అర్ధేందు-మౌలి-సులలాట-షడర్ధనేత్రే

     భిక్షాం ప్రదేహి గిరిజే! క్షుధితాయ మహ్యం .. 1..

కేయూర-హార-కటాంగద -కర్ణపూరే

     కాంచీ కలాప-మణికాంత-లసద్దుకూలే .

దుగ్ధా-ఽన్నపాత్ర-వర-కాంచన-దర్విహస్తే

     భిక్షాం ప్రదేహి గిరిజే! క్షుధితాయ మహ్యం .. 2..

ఆలీ-కదంబ-పరిసేవిత-పార్శ్వభాగే

     శక్రాదిభి-ముకులితాంజలిభిః పురస్తాత్ .

దేవి! త్వదీయ-చరణౌ శరణం ప్రపద్యే

     భిక్షాం ప్రదేహి గిరిజే! క్షుధితాయ మహ్యం .. 3..

గంధర్వ-దేవ-ఋషినారద-కౌశికాఽత్రి

     వ్యాసా-ఽమ్వరీష -కలశోద్భవ -కశ్యపాద్యాః .

భక్త్యా స్తువంతి నిగమాఽఽగమ-సూక్తమంత్రై-

     ర్భిక్షాం ప్రదేహి గిరిజే! క్షుధితాయ మహ్యం .. 4..

లీలావచాంసి తవ దేవి! ఋగాదివేదాః

     సృష్ట్యాది-కర్మరచనా భవదీయ-చేష్టా .

త్వత్తేజసా జగదిదం ప్రతిభాతి నిత్యం

     భిక్షాం ప్రదేహి గిరిజే! క్షుధితాయ మహ్యం .. 5..

శబ్దాత్మికే శశికలాభరణార్ధదేహే

     శంభోరురస్థల -నికేతన -నిత్యవాసే .

దారిద్ర్యదుఃఖ-భయహారిణి కా త్వదన్యా

     భిక్షాం ప్రదేహి గిరిజే! క్షుధితాయ మహ్యం .. 6..

సంధ్యాత్రయే సకల-భూసుర-సేవ్యమానే

     స్వాహా స్వధామి పితృదేవగణార్తిహంత్రీ .

జాయాః సుతాః పరిజనాతిథయోఽన్నకామాః

     భిక్షాం ప్రదేహి గిరిజే! క్షుధితాయ మహ్యం .. 7..

సద్భక్తకల్పలతికే భువనైకవంద్యే

భూతేశ -హృత్కమలమగ్న -కుచాగ్రభృంగే

కారుణ్యపూర్ణనయనే కిముపేక్షసే మాం

భిక్షాం ప్రదేహి గిరిజే! క్షుధితాయ మహ్యం .. 8..

అంబ! త్వదీయ -చరణాంబుజసంశ్రయేణ

     వ్రహ్మాదయోఽప్యవికలాం శ్రియమాశ్రయంతే .

తస్మాదహం తవ నతోఽస్మి పదారవిందం

     భిక్షాం ప్రదేహి గిరిజే! క్షుధితాయ మహ్యం .. 9..

ఏకాగ్రమూలనిలయస్య మహేశ్వరస్య

     ప్రాణేశ్వరీ ప్రణత-భక్తజనాయ శీఘ్రం .

కామాక్షి-రక్షిత-జగత్-త్రితయేఽన్నపూర్ణే!

     భిక్షాం ప్రదేహి గిరిజే! క్షుధితాయ మహ్యం .. 10..

భక్త్యా పఠంతి గిరిజా-దశకం ప్రభాతే

     మోక్షార్థినో బహుజనాః ప్రథితోఽన్నకామాః .

ప్రీతా మహేశవనితా హిమశైలకన్యా

     తేషాం దదాతి సుతరాం మనసేప్సితాని .. 11..

ఇతి శ్రీశంకరాచార్యవిరచితమన్నపూర్ణాస్తోత్రం సంపూర్ణం .