Sacred Stotras & Deities

చండికాదండకస్తోత్రం

ఓం నమః శ్రీచండికాయై ఊం ఊం ఊం ఉగ్రచండం చచకితచకితం చంచరా(లా)

దుర్గనేత్రం హూం హూం హూంకారరూపం ప్రహసితవదనం ఖంగపాశాన్ ధరంతం .

దం దం దం దండపాణిం డమరుడిమిడిమాం డండమానం భ్రమంతం

భ్రం భ్రం భ్రం భ్రాంతనేత్రం జయతు విజయతే సిద్ధిచండీ నమస్తే .. 1..

ఘ్రం ఘ్రం ఘ్రం ఘోరరూపం ఘుఘురితఘురితం ఘర్ఘరీనాదఘోషం

హుం హుం హుం హాస్యరూపం త్రిభువనధరితం ఖేచరం క్షేత్రపాలం .

భ్రూం భ్రూం భ్రూం భూతనాథం సకలజనహితం తస్య దేహా (?) పిశాచం

హూం హూం హూంకారనాదైః సకలభయహరం సిద్ధిచండీ నమస్తే .. 2..

వ్రం వ్రం వ్రం వ్యోమఘోరం భ్రమతి భువనతః సప్తపాతాలతాలం

క్రం క్రం క్రం కామరూపం ధధకితధకితం తస్య హస్తే త్రిశూలం .

ద్రుం ద్రుం ద్రుం దుర్గరూపం భ్రమతి చ చరితం తస్య దేహస్వరూపం

మం మం మం మంత్రసిద్ధం సకలభయహరం సిద్ధిచండీ నమస్తే .. 3..

ఝం ఝం ఝంకారరూపం ఝమతి ఝమఝమా ఝంఝమానా సమంతాత్

కం కం కంకాలధారీ ధుధురితధురితం ధుంధుమారీ కుమారీ .

ధూం ధూం ధూం ధూమ్రవర్ణా భ్రమతి భువనతః కాలపాస్త్రిశూలం

తం తం తం తీవ్రరూపం మమ భయహరణం సిద్ధిచండీ నమస్తే .. 4..

రం రం రం రాయరుద్రం రురుధితరుధితం దీర్ఘజిహ్వాకరాలం

పం పం పం ప్రేతరూపం సమయవిజయినం సుంభదంభే నిసుంభే .

సంగ్రామే ప్రీతియాతే జయతు విజయతే సృష్టిసంహారకారీ

హ్రీం హ్రీం హ్రీంకారనాదే భవభయహరణం సిద్ధిచండీ నమస్తే .. 5..

హూంకారీ కాలరూపీ నరపిశితముఖా సాంద్రరౌద్రారజిహ్వే

హూంకారీ ఘోరనాదే పరమశిరశిఖా హారతీ పింగలాక్షే .

పంకే జాతాభిజాతే చురు చురు చురుతే కామినీ కాండకంఠే

కంకాలీ కాలరాత్రీ భగవతి వరదే సిద్ధిచండీ నమస్తే .. 6..

ష్ట్రీం ష్ట్రీం ష్ట్రీంకారనాదే త్రిభువననమితే ఘోరఘోరాతిఘోరం

కం కం కం కాలరూపం ఘుఘురితఘురితం ఘుం ఘుమా బిందురూపీ .

ధూం ధూం ధూం ధూమ్రవర్ణా భ్రమతి భువనతః కాలపాశత్రిశూలం

తం తం తం తీవ్రరూపం మమ భయహరణం సిద్ధిచండీ నమస్తే .. 7..

ఝ్రీం ఝ్రీం ఝ్రీంకారవృందే ప్రచరితమహసా వామహస్తే కప్ఃలం

ఖం ఖం ఖం ఖంగహస్తే డమరుడిమడిమాం ముండమాలాసుశోభాం .

రుం రుం రుం రుద్రమాలాభరణవిభూషితా దిర్ఘజిహ్వా కరాలా

దేవి శ్రీ ఉగ్రచండీ భగవతి వరదే సిద్ధిచండీ నమస్తే .. 8..

ఆరుణవర్ణసంకాశా ఖడ్గఫేటకబిందుకా .

కామరూపీ మహాదేవీ ఉగ్రచండీ నమోఽస్తుతే .. 9..

ఇతి శ్రీ చండికాదండకస్తోత్రం సంపూర్ణం ..

అనసూయాస్తోత్రం

పతివ్రతాశిరోరత్నభూతా సుదంరవిగ్రహా .

సుచరిత్రా దివ్యతేజా సర్వలోకనమస్కృతః .. 1..

విష్ణుప్రపౌత్రీ కపౌత్రీ సతీ కర్దమపుత్రికా .

దేవహూతిసముత్పన్నా సుముఖీ కపిలస్వసా .. 2..

అత్రిపత్నీ మహాభాగా దయాక్షాంత్యాదిభూషితా .

అనసూయా వేదగేయా నిజధర్మజితాఖిలా .. 3..

శ్రీదత్తాత్రేయజననీ చంద్రమాతా మనస్వినీ .

దుర్వాసోజనయిత్రీశా జగత్సంకటవారిణీ .. 4..

చతుర్వింశతినామాని మంగలాని పరాణి చ .

పావన్యాన్యనుసూయాయా దత్తమాతుః పఠేన్నరః .. 5..

త్రికాలమేకకాలం వా శ్రద్ధాభక్తిసమన్వితః .

తస్య ధర్మే రుచిర్దత్తే భక్తిముక్తి క్రమాద్భవేత్ .. 6..

ఇతి శ్రీవాసుదేవానందసరస్వతీవిరచితం అనసూయాస్తోత్రం సంపూర్ణం .

గౌర్యుత్పత్తివర్ణనం

(శివరహస్యాంతర్గతే ఈశాఖ్యే)

సుబ్రహ్మణ్య ఉవాచ .

యదా సతీ తనుం త్యక్త్వా యోగేనైవ స్వతేజసా .

సుముహూర్తే సుదివసే మేనాగర్భే సమావిశత్ .. 7..

విచిత్రశక్తిః సా దేవీ మాయా పశుపతేస్తదా .

తత్రైవ దశమే మాసి శుభలగ్నే గ్రహైర్యుతే .. 8..

పంచగ్రహేషూచ్చగేషు తదా హిమవతో గృహే .

జజ్ఞే తత్ర మహాదేవీ తత్రాసీదుత్సవో మహాన్ .. 9..

దేవాస్తత్ర సమాజగ్ముర్విష్ణుబ్రహ్మాదయః సురాః .

మరుతో వసవః సాధ్యా గంధర్వాశ్చ జగుః కలం .. 10..

దేవదుందుభయో నేదుః పుష్పవృష్టిరభూచ్చ ఖాత్ .

నృత్యంత్యప్సరసో హృష్టాస్తదా హిమవతో గృహే .. 11..

సోఽపి విశ్రాణయామాస ధనధాన్యం గవాం గణం .

రత్నాని చైవ వాసాంసి స దదౌ శాంభవేషు సః .. 12..

మునయః పూజితాస్తేన నారదాద్యా మహర్షయః .

విష్ణుబ్రహ్మాదివిబుధాన్ గంధపుష్పైః సమార్చయత్ .. 13..

భక్ష్యైర్భోజ్యైశ్చ వాసోభిర్భూషణైర్ముదమాదధత్ .

జాతకర్మాదికర్మాణి చకార స గిరీశ్వరః .. 14..

యయుః సంతోషమతులం ముదా తే విబుధర్షయః .

మేనయా సహితాం దృష్ట్వా పార్వతీం సూతికాగృహే .. 15..

ఉత్తానశయనాం బాలాం నీలకుంతలమూర్ధజాం .

పద్మపత్రేక్షణాం చారు బింబోష్ఠీం పద్మవక్త్రకాం .. 16..

కంబుకంఠీం మృణాలాభబాహుద్వయవిరాజితాం .

రక్తాబ్జాభసుహస్తాం చ నఖచంద్రయుతాంగులిం .. 17..

బాలారంభాభవృత్తోరుస్ఫిగ్జంఘాజఘనావృతాం .

ఫుల్లపద్మభపాదేన ఉత్తానేన విరాజితాం .. 18..

ద్వితీయాసోమసంకాశపాదాంబునఖావలిం .

వ్యాలోలనయనాం బాలాం సర్వభూషణభూషితాం .. 19..

రత్నగ్రైవేయవలయైర్ముక్తాహారవిరాజితాం .

భాలమధ్యాలకాలోలముక్తాజాలకభూషితాం .. 20..

తిలకాఢ్యముఖేందూత్థకర్ణావలికభూషితాం .

రూషితాం దివ్యగంధేన దివ్యపుష్పైః సురార్చితాం .. 22..

కాంచీఖచితమధ్యాం చ క్షుద్రఘంటాలసత్కటిం .

పాదనూపుర సంరావజిత క్రౌంచవరస్వనాం .. 23..

దివ్యవాసోభిరాచ్ఛన్నాం లోలాందోలనవీజితాం .

దేవపత్న్యః సమాగత్య శచీ స్వాహా స్వాధా రమా .. 24..

నీరాజయంతి తాం దేవీం దివ్యమంగలగాయనైః .

రక్షాం రక్షాకరీం తస్యా రాక్షసేభ్యస్తదా ముదా .. 25..

రాత్రౌ రాత్రౌ పఠంతి స్మ సమవేతా మహర్షయః .

గాయంతి లలితం వల్గు మధురం గాయనాస్తదా .. 26..

తద్గానేన చ సా దేవీ వినిద్రాతి దినే దినే .

దేవస్త్రియః ఊచుః .

అయి జగదంబ కదంబవనస్థిత నీపవిదీపితసౌధ-

యుతామృతవార్ధితరంగిత వాతసుపోతక వీజితరత్నగణ-

ప్రభ లోలకడోలవరాసన తాత వితాన సువస్త్రమణీగణ-

పుష్పవిరాజితఫుల్లసుహల్లక లోలసమావృతమంచవికర్షణ

కూజితకం .. 27..

ఘనరవరాగసురాగవిరాగమృగావలి ధూత సుచామర-

చంద్రక వీజనవీజితమారుతసాపధనావృత చంద్ర-

సమప్రభ ధూతతరాకృతి దేవగజాంగనగీతమిదం .. 28..

విశ్రుతమణిగణభూషణకృతరవ రింఖణ ఝణఝణ

రవ వర ఘోషణ నిద్రిత హర్షితధర్షితమేధ సుచాతకపోతక-

జాతక భావుకకల్పనశిల్పనజాతసుసంభ్రమదిగ్గజ-

సుద్విజగర్జన తోషస్తుతావితసర్వసురావనపావన-

సుందర నిర్జరదారకృతస్తుతినిద్రితపర్వతబాల-

మబాలతనుప్రభభావితనతజనపోషితవిశ్రుత గీతమిదం .. 29..

ఏవం గీతేన తాం బాలాం దేవ్యో నిద్రాపయంత్యపి .

లాలయంతి స్త్రియః కాశ్చిత్స్నాపయంతి మనోరమాః .. 30..

భూషయంతి తథా బాలం తిలకైర్వేణిమండనైః .

పాయయంతి తథాన్యాస్తా ధిక్కృతామృతముత్తమం .. 31..

దినే దినే మహాదేవీం తథా నీరాజయంత్యపి .

దుకూలవసనైశ్చిత్రైర్వాసయంతి స్త్రియోఽఖిలాః .. 32..

ఏవం తత్ర మహాదేవీం పూజయంతి సురాంగనాః .

తదా సా వవృధే బాలా కలా చాంద్రమసీవ సా .. 33..

.. ఇతి శివరహస్యాంతర్గతే సుబ్రహ్మణ్యప్రోక్తం గౌర్యుత్పత్తివర్ణనం సంపూర్ణం ..

- .. శ్రీశివరహస్యం . ఈశాఖ్యః ద్వాదశమాంశః . అధ్యాయః 9 గౌర్యుత్పత్తిః . 1-68 ..

గౌర్యష్టోత్తరశతనామావలిః

ఓం గౌర్యై నమః .

ఓం గిరీంద్రతనయాయై నమః .

ఓం గరలాశన-వల్లభాయై నమః .

ఓం దాక్షాయణ్యై నమః .

ఓం దైత్యహంత్ర్యై నమః .

ఓం దరస్మితముఖోజ్వలాయై నమః .

ఓం కల్యాణ్యై నమః .

ఓం కామజయదాయై నమః .

ఓం కార్తికేయాంకితాంకాయై నమః .

ఓం గణేశజనన్యై నమః . 10

ఓం గర్భ-స్థిత-బ్రహ్మాండమండలాయై నమః .

ఓం తాపత్రయహరాయై నమః .

ఓం తరుణేందుకలాధరాయై నమః .

ఓం మోహితేశానహృదయాయై నమః .

ఓం మేనా-హృదయనందిన్యై నమః .

ఓం కుమార్యై నమః .

ఓం కోకిలాలాపాయై నమః .

ఓం కుంకుమద్రవలేపిన్యై నమః .

ఓం కుమారజనన్యై నమః .

ఓం కోమలాయై నమః . 20

ఓం కంజలోచనాయై నమః .

ఓం ధర్మిష్ఠాయై నమః .

ఓం ధర్మవచనాయై నమః .

ఓం ధరణ్యై నమః .

ఓం ధరణీస్తుతాయై నమః .

ఓం ధరాత్మజాయై నమః .

ఓం ధీస్వరూపాయై నమః .

ఓం ధ్యేయాయై నమః .

ఓం ధీమత్యై నమః .

ఓం నిత్యాయై నమః . 30

ఓం నుత్యాయై నమః .

ఓం నతార్తిఘ్న్యై నమః .

ఓం నిత్యానందాయై నమః .

ఓం నిరాకులాయై నమః .

ఓం నిష్కలాయై నమః .

ఓం నిర్గుణాయై నమః .

ఓం నీలాయై నమః .

ఓం నిరాకారాయై నమః .

ఓం పార్వత్యై నమః .

ఓం పావన్యై నమః . 40

ఓం ప్రాప్యాయై నమః .

ఓం పరమాయై నమః .

ఓం పరమేశ్వర్యై నమః .

ఓం పరాయై నమః .

ఓం శుభాయై నమః .

ఓం రమాయై నమః .

ఓం రామాయై నమః .

ఓం కేవలాయై నమః .

ఓం కోపవర్జితాయై నమః .

ఓం ప్రీతాయై నమః . 50

ఓం ప్రయతహృత్స్థితాయై నమః .

ఓం ప్రయత్నేఙ్యాయై నమః .

ఓం ఫణిస్తుతాయై నమః .

ఓం బాలాయై నమః .

ఓం భద్రాయై నమః .

ఓం బుద్ధిమత్యై నమః .

ఓం విషయస్థాయై నమః .

ఓం వియత్సమాయై నమః .

ఓం ఫుల్లాబ్జలోచనాయై నమః .

ఓం ఫుల్లాయై నమః . 60

ఓం పుష్పచూడాయై నమః .

ఓం పురస్కృతాయై నమః .

ఓం విఘ్నౌఘశమన్యై నమః .

ఓం విశ్వస్యై నమః .

ఓం విశ్వరూపాయై నమః .

ఓం విధిస్తుతాయై నమః .

ఓం పాపహరాయై నమః .

ఓం తృష్ణావిహీనాయై నమః .

ఓం త్రాణతత్పరాయై నమః .

ఓం అంబుజాక్ష్యై నమః . 70

ఓం అంబరాభాయై నమః .

ఓం అంబాయై నమః .

ఓం అరుణతేజసే నమః .

ఓం కాల్యై నమః .

ఓం కరాలవదనాయై నమః .

ఓం కఠినాపన్నివారిణ్యై నమః .

ఓం కంబుకంఠ్యై నమః .

ఓం కాంతిమత్యై నమః .

ఓం కామరూపాయై నమః .

ఓం కృపాఘనాయై నమః . 80

ఓం హరప్రియాయై నమః .

ఓం హర్షయిత్ర్యై నమః .

ఓం హృత-భక్తాఘ-సంతతయే నమః .

ఓం శివప్రదాయై నమః .

ఓం శివాంతస్థాయై నమః .

ఓం శివాయై నమః .

ఓం శ్రీపతిసోదర్యై నమః .

ఓం శంకర్యై నమః .

ఓం శాశ్వత్యై నమః .

ఓం శాంతాయై నమః . 90

ఓం అర్ధాంగీకృతశంకరాయై నమః .

ఓం నిశుంభ-శుంభ-సంహర్త్ర్యై నమః .

ఓం భండాసుర-నిషూదిన్యై నమః .

ఓం అఖిలామర-తేజఃస్థాయై నమః .

ఓం అగ్నికుండ-సముద్భవాయై నమః .

ఓం ఇనేందువహ్ని-నయనాయై నమః .

ఓం ఇష్టాయై నమః .

ఓం ఇష్టప్రదాయై నమః .

ఓం పరస్యై కలాయై నమః .

ఓం పరస్యై శక్తయే నమః . 100

ఓం పరస్మై తేజసే నమః .

ఓం పరాఽపర్యై నమః .

ఓం రాజరాజేశ్వర్యై నమః .

ఓం రాజ్యదాయై నమః .

ఓం రాజ్యవర్ధిన్యై నమః .

ఓం చతుర్ముఖనుతాయై నమః .

ఓం చిత్రాయై నమః .

ఓం చంద్రాధిదేవతాయై నమః . 108

ఇతి శ్రీకూర్మపురాణోక్తా గౌర్యష్టోత్తర-శత-నామావలిస్సమాప్తా .

అనంతశక్తిస్తవః

ప్రసాంతపదతః స్వతః స్ఫురతి యేయమాద్యప్రభా

     సమతగుణగర్భిణీ వివిధమంత్రవర్ణాంబికా .

నిరుత్తరచమత్కృతిప్రసరసారసంబోధికా

     జయత్యగమజా త్రిధా త్రిపురసుందరీ సావ్యయా .. 1..

ఇచ్ఛాజ్ఞానక్రియాఖ్యం త్రితయమిహ పరం వాగ్భవాదిక్రమౌఘై-

     ర్యా దేవీ నిర్విభాగా పరమశివపదా స్ఫారయంతీ నితాంతం .

స్వాతంత్ర్యోల్లాసవృత్తిర్నిరవధివిభవా నిర్మలా నిర్ణయేతా- (నిర్ణయేదా)

     వర్ణావర్ణకారస్ఫురిత్తనులతా సా జ్యత్యాద్యశక్తిః .. 2..

వర్గైరష్టభిరాకృతిస్తనగతిః శీర్షాంసహృత్పృష్ఠగై-

     ర్గుహ్యాంఘ్రిక్రమనిష్ఠితస్తవ సదా జ్ఞానప్రతానప్రదా .

చిద్రూపా పరమా విభాతి నితరాం దేవ్యక్షగాక్షాశ్రయా

     పీఠాజ్ఞానిలయా త్రిమూర్తివసతిః కోలాపహా కౌళినీ .. 3..

నిరుత్తరేచ్ఛోభయసామరస్యా-

     ద్యా మూర్తిరాద్యా ప్రవిభాతి దీప్తా .

ఆనందదాహార్ధకలార్ధగర్భా

     తాం నౌమి శృంగాటవరాసనస్థాం .. 4..

హుతవహరవిసోమబ్రహ్మచక్రాంతరాలే

     స్ఫురతి నిరవకాశా శంభుశక్తిః స్వతంత్రా .

సకలభువనవర్గం పూరయంతీ స్వభాభిః

పరమశివధరాద్యా భిన్నమూర్తిం నుమస్తాం .. 5.. (నమస్తాం)

బ్రహ్మవ్యోమ్నో వికసితగతిః శక్తిరాద్యా స్ఫురంతీ

     మాయాగర్భే సమరసతయా వ్యక్తరూపం విధాయ .

త్యక్త్వా భూమిం భరితభువనా జన్మసంంజ్ఞాం సుసూక్ష్మ-

     ప్రాణోద్ధాతైః శిఖిశితముఖా మోహినీ గ్రంథిసక్తాం .. 6..

ప్రోల్లంఘ్యాశు ప్రతతహృదయవ్యోమధామావ్యయాభా

     స్వైరం ప్రాప్య క్షపితకలనా యా మహానాదవృత్తిః .

నిత్యా దేవీ నిరవధిలసద్వాగ్విలాసప్రపంచ-

     స్ఫూర్త్యుద్దామగ్రథితరచనాహేతుభూతాం నుమస్తాం .. 7..

భూయస్తతోఽపి హృదయార్ధకలాకృతిర్యా

     శక్తిః పరా నిరవధి కరవా విరౌతి .

ప్రాణప్రవృత్తిశమతః పరభృమిమప్తా

వక్త్రాతిగా వితతతుర్యనమఃస్వరూపా .. 8.. (వితతతుర్యనభఃస్వరూపా)

తాం నౌమ్యనంతవిభవాం భువనాలివర్తి-

     మత్తాంగనాహృదయమోహనదక్షలక్షాం .

దేవీం పరాం త్రిపురసుందరినామధేయాం

     సర్వాభిలాషపరిపూరణకల్పవల్లీం .. 9..

బిందుం విగాహ్య పరమామృతసారవర్షా

     వేగాద్ విముచ్య పరితః కపిలావనిస్థాం .

హార్ధాకృతిప్రబలవహ్నిసహస్రదీప్తా

     మాయావిమోహవిల్యాచ్ఛివధామఖస్థా .. 10..

శక్తిః పరా జయతి సా పరమా విభేద-

     వృత్త్యా జగత్సుఖచరం వచసామగమ్యం .

ఆసాద్య సత్సు వితనోతి విముక్తిలక్ష్మీం

     యస్యాః స్మృతే చ లయమేతి విషం త్రిధోత్థం .. 11..

ఇత్థం దేవ్యా నిరవధి మహః సర్వాదిక్కం విభాతి

     త్రేధా మాంత్రం సతతవితతం కామచారక్రమేణ .

ఋద్ధిం సిద్ధిం నిరుపమమహామోక్షకక్ష్యామపీహ

     ప్రస్ఫార్యాశు స్వకుళపద్గం యస్య సమ్యక్ స ముక్తః .. 12..

శాక్తేన బీజేన వికాస్య శక్తి-

     మిచ్ఛాత్మికా యా విషమత్తి సర్వం .

ఉన్మీలయంతీ భువనాన్యభేద-

     రూపాణి గర్భే తు నమామ్యహం తాం .. 13..

నైరంజనం ధామ పరం నితాంతం

     వికాసయంతీ సదసద్విహీనం .

చక్రాశ్రయాదిక్రమవిక్రమౌధ-

     సంహారిణీం నౌమి చితిం స్వతంత్రాం .. 14..

కామాఖ్యబీజేన చితిం క్రియాఖ్యాం

     ప్రోల్లాస విశ్వం వమనాత్ సమగ్రాం .

కరోతి నిత్యం నిజబీజవృత్తి-

     మాహాత్మ్యతో యా గ్రణమామ్యహం తాం .. 15..

ఆద్యేన బీజేన సదేవ దేవీ (సదైవ)

     జ్ఞానాభిధాం శక్తిమిహామితాభాం .

విష్ఫార్య గంగాజలవీచివిద్యా (వీచివద్యా)

     తనోతి కావ్యం రుచిరం నుమస్తాం .. 16..

బ్రాహ్మే బిలే హృద్భువి నాభిధామ్ని

     యద్వర్ణభంగిర్నితరాం విభాతి .

తాం నౌమి దేవీం పరనాదశక్తిం

     ప్రోల్లాసరూపాం త్రిపురాం త్రిమార్గాం .. 17..

స్ఫటికమణినిభం యచ్ఛక్తిబీజం కరంధ్రే

     ప్రభవతి పరసంవిద్యాభినీనాథరూపం .

అమృతనికరధారాసారముచ్చైర్విముచ్య

     ప్రతతకులకలాపవ్యాపకం తత్ ప్రపద్యే .. 18..

అభినవదిననాథప్రస్ఫురత్కాంతివర్ణం

     హృదయగగనధామ్ని భ్రాజతే యత్ సదైవ .

తదిహ కుసుమచాపస్ఫారకం కామరాజం

     భవతి నిఖిలకాంతాసంతతేర్ధ్యానయోగాత్ .. 19..

కుసుమవిశిఖవర్ణైః పంచభిః సాధ్యనామ

     స్ఫురదనుపమనాదస్ఫారమావిశ్య సమ్యక్ .

వృతమిహ నితరాం యత్ కామరాజోదరస్థం

     కతిపయదినపూజాధ్యానతః క్షుభ్యతే తత్ .. 20..

కుళగగనపదాంతర్దివ్యలింగాగ్రభాగే

     ప్రభవతి పరబీజం వాగ్భవం విద్యుదాభం .

యదిహ వివిధవిద్యాద్యోతకం ధ్యానగమ్యం

     జయతి నిరుపరాగం తత్ పరం విశ్వరూపం .. 21..

వాగ్భావాద్యైః స్ఫురదమితభాభాస్వరైః షట్ప్రకారై-

     ర్దివ్యం మాంత్రం వపురనుపమం తావకం యే విదంతి .

తేషాం దేవి! త్వమపి పరమాం సిద్ధిముచ్చైర్దదాసి

     స్థూలం సూక్ష్మం పరమథ మహాధ్యానమాశ్రిత్య మాతః .. 22..

ఇతి జనని తవేదం దివ్యమంత్రాక్షరాణాం

     నిగదితమనుపాధి ధ్యానమధ్యాత్మదృష్ట్యా .

గురువరపరవక్త్రస్ఫారసత్సంప్రదాయాత్

     ప్రభవతి నిజచిత్తే యస్య సమ్యక్ స సిద్ధః .. 23..

ఇత్థం త్వదిచ్ఛోచ్చలితా త్రిధేయం

     వర్ణోజ్ఝితం వార్ణమిదం స్వరూపం .

ప్రకాశయంతీ పరచిద్వికాస-

     ప్రోల్లాసితం యా ప్రణమామ్యహం తాం .. 24..

జయత్రయం గౌణమథావిరూపం (జగత్త్రయ్ం)

     ధామాభిధం కారణసంజ్ఞితం చ .

చక్రాదికం తాత్వికమప్యనంత-

     ఖ్యాప్యేత్థమాశు ప్రథితా ఖతో యా .. 25..

త్రిధా త్రిధేదం తు వికాస్య విశ్వం

     సర్వాదిగానుత్తరచిద్ విభాతి .

సదాత్మనా ప్రచ్యుతవృత్తిరుచ్చైః

     స్థితేహ తాం నౌమి పరాం భవానీం .. 26..

విశ్వం సర్వం సమరసతయా వ్యక్తమంతర్విధత్తే

     ద్వివ్యోమాంకాకులితవిభవా యాంబికా సా నిరుక్తా .

సంప్రత్యేషా శితతరముఖా బీజభావం స్వతంత్రా

     శక్తిర్వామా ప్రథమహకలాకారమాప్తాంకురత్వం .. 27..

కౌండిల్యేవ ప్రభవతి శిఖాకారమాశ్రిత్య దీప్తా

     జ్యేష్ఠా దండాకృతిరివ కలా దర్శితా శాస్త్రదృష్ట్యా .

రౌద్రీ రౌద్రా త్రిజగదఖిలం భాసయంతీ త్రికోణా

త్వం దేవ్యేవ త్రిదశనభితే భాసనంతైకతైవ .. 28.. (భాసనంతైకదైవ)

ఆభిః కలాభిరభితో నిజరూపమత్ర

     ప్రస్ఫార్య వర్ణరచనామవలంబ్య దేవి! .

సన్మంత్రతంత్రవరవిశ్వవిభాగచిత్రం

     సంవిన్నయస్యఖిలమాత్మరుచో విభిన్నం .. 29..

నామరూపకలనాకులం ప్రియే

     స్వైరతాత్ర కులనాయికే కులం .

ఆశ్రితార్థమగుణం కుళక్రమం

     కౌళ్యతే కమపి చేష్టితం త్విదం .. 30..

ప్రకాశధర్మా భగవాన్ మహేశో

     యయా వినా భాతి న కుత్రచిచ్చ .

యద్వీర్యవిజ్ఞానవికాసయోగాద్

     విశ్వోదయాభాసనిరాసకృత్యై .. 31..

కర్తా విభుర్భేదవిభాగముక్తః

     సత్తాం విగాహ్య ప్రథతే సదైవ .

తాం నౌమి శక్తిం త్రిపురాభిధానాం

     మహావిమర్శోదయవృత్తిరూపాం .. 32..

ఏకా యా పంచశక్తిక్రమపరహుతభుగ్యుగ్మయుగ్మైక్యవృత్తౌ

     శార్వీ సన్మండలేఽన్తః ప్రభవతి సతతం యోనిభిస్త్ర్యుత్తరాభిః .

చత్వారింశద్భిరుచ్చైరకృతకరచనారాంజితే దివ్యపద్మ-

     ద్వంద్వాంకే ద్వారతుర్యం దిశతు జగతి శం చక్రదేవీయుతా సా .. 33..

ప్రాణో వహ్నిరిహోచ్యతే ప్రళయకృజ్జన్మాదిశీర్పాంతగః

     ప్రోన్మేషః క్షితితుర్థమారుతమహాభూతాంతసత్తాశ్రయః .

శక్తిః శాంభవధామతస్త్వనవధిః సృష్టిక్రమప్రోదితా

     కాదిక్షాంతగతా సదేతి గురుతో జ్ఞాత్వామరత్వం యజేత్ .. 34..

అగ్నిరూర్ధ్వగతిర్నౄణాం వపుః సంహర్తుముద్గతః .

శక్తిః సామృతవర్షేణ తం విలాప్య తతః సృజేత్ .. 35..

తస్మాదకుళతః శక్తిం ప్రసృతాం భావయేద్ బుధః .

తద్భావనాతః సతతం త్రిజగత్ స్యాదనశ్వరం .. 36..

అపానధర్మా ప్రతిభాతి యస్యాః

     పురఃస్థితం పూరకధామనిష్ఠః .

గణాధినాథః సకలాన్ విలాప్య

     సంకల్పవిఘ్నాన్ ప్రణమామ్యహం తాం .. 37..

ప్రాణప్రవాహప్రచయస్వరూపో

     ద్వారాగ్రవర్తీ బటుకో విభాతి .

వాంహ్యోన్యవర్గౌఘనిపానసక్తో (వాహ్యో?)

     యస్యా నతోనం త్రిపురేశ్వరీం తాం .. 38..

సుధాబ్ధిముఖ్యం ప్రవిభాతి యస్యాః

     షోఢాసనం చక్రకలాత్మికాయాం .

తాం విశ్వరూపాం ప్రణమామ్యనల్ప-

     ప్రోన్మేషరూపాం త్రిపురాం త్రిమార్గాం .. 39..

త్ర్యశ్రమధ్యగగనోదరోదితా

     సర్వచక్రవిభవౌఘనాయికా .

తుర్యరూపమత్రగాహ్య భాతి యా

     తాం పరాం త్రిపురసుందరీం నుమః .. 40..

ఓడ్డియాణపరపీఠసంశ్రయం

     సంశ్రితా నిరవకాశధర్మిణీ .

నిర్వికల్పపరధామచారిణీ

     యా కలామయమహం నతోఽస్మి తాం .. 41..

సర్వజ్ఞతాద్యాని వరాణి భాంతి

     యస్యాః సదాంగాని హృదాదికాని .

తాం నౌమి దేవీం పరిబోధధామ-

     స్పందామరూపామిహ వామకేశీం .. 42..

ఇచ్ఛాదిశక్తిత్రితయం క్రమేణ

     కామేశ్వరీముఖ్యమిహ త్రికం చ .

పీఠత్రయాకారమయే త్రికోణే

     చకాస్తి యస్యాః ప్రణమామ్యహం తాం .. 43..

రుద్రస్య విష్ణోః కమలోద్భవస్య

     పరస్య చ బ్రహ్మతనోః శివస్య .

ఏకైవ శక్తిః ప్రతిభాతి నిత్యం

     నిజేచ్ఛయా జన్మపదే చ శుద్ధాం .. 44..

శబ్దాదితన్మాత్రవపుర్మహోగ్రం

     యస్యాః పురోవర్తి మహః సమిద్ధం .

అస్త్రాష్టకం చైవ పరాంతరాళే

     విరాజతే తాం ప్రణమామి దేవీం .. 45..

చక్రం వశిన్యాది పురం మహేశ్యా

     వర్గాష్టకాకార మనుస్వరూపం .

చకాస్తి యస్యాః పరితోఽష్టకోణే

     చక్రేశ్వరీం తామిహ నౌమి నిత్యాం .. 46..

తతో దశారం హుతభుక్కలాత్మ-

     సర్వజ్ఞదేవీప్రముఖం తు చక్రం .

అవ్యక్తరూపం ప్రవిభాతి యస్యా-

     స్తాం సూక్ష్మనాదాం గణమామి నిత్యాం .. 47..

ద్విపంచకోణేఽథ విభాతి దీప్తం

     చక్రం ద్వితీయే దహనాంశురూపం .

సిద్ధిప్రదాదిప్రముఖం తు యస్యా

     వ్యక్తం పురస్తాత్ త్రిపురాం భజే తాం .. 48..

చతుర్దశారే కృతసుప్రతిష్టం

     సంక్షోభిణీముఖ్యమిహార్క చక్రం .

అంతర్బహీరూపకలాద్వయేన

     యుక్తం తు యస్యాః సతతం నుమస్తాం .. 49..

పద్మే ఽష్టపత్రే స్థితమష్టధోత్థం

     చక్రం తు పుర్యష్టకభేదభిన్నం .

ఉర్వ్యాద్యహంకారమయరత్వనంగ-

     పుష్పాదికం యత్పురగం నుమస్తాం .. 50..

ద్విరష్టపత్రే జలజేఽన్తరాళే

     శీతాంశురశ్మిప్రవిభక్తగాత్రం .

కామాభిధాముఖ్యభిహోదితం తు

     యస్యాశ్చితేస్తామిహ నౌమి నిత్యాం .. 51..

బాహ్యనిష్ఠచతురశ్రసంస్థితా

     మాతరోఽష్టకకలాత్మికా ఇమాః .

వ్యక్తవర్గతనవో యదంగనా-

     స్తాం నమామి పరరావచారిణీ .. 52..

త్ర్యశ్రాదిచక్రనివహే ప్రథితాం సదైవం

చక్రేశ్వరీచయమయే స్వయమేవ దేవీ ..

నిర్ధామధామవిభత్రా పరమేశధామ్ని

యేయం విరాజితవపుః స్వచితిం నుమస్తాం .. 53..

ముద్రాభిరు చ్చైర్దశభిః స్వధామ-

     రూపాభిరాశు ప్రవిభాత్యమేయా .

త్రిఖండముద్రాదిమయీభిరాద్యా

     యేయం చితిస్తాం ప్రణమామి నిత్యాం .. 54..

మోదయంతి స్వచిత్స్ఫారైర్ద్రావయంతి మలాని యాః .

ముదం రాంతి చ ముద్రాఖ్యాః ఖ్యాతాస్తా ఇహ శక్తయః .. 55..

ఏకైవ యా పూజనవైభవేన నానావిచిత్రేణ బహుప్రకారం .

విష్ఫార్య రూపం నిజమప్రమేయం విరాజతే తాం ప్రణతోఽస్మి దేవీం .. 56..

ప్రోద్దామపూజాక్రమభేదభంగయా

     యా ప్రోద్గతా వ్యుత్క్రమతః సమంతాత్ .

నిజస్వరూపప్రతిపాదనాయ

     తాం నౌమి దేవీ గురుమూర్తిమాప్తాం .. 57..

చిద్విమర్శవపుషో నిరంతరా

     రశ్మయస్త్రిపురసుందరీహ యే .

భాంతి తే పరశివాంబరప్రభా-

     మండలం తదిహ ధామ వాచకం .. 58..

రేఖాక్రమో భాతి విచిత్రవృత్తి -

     ర్యోఽయం స్వశక్తిప్రసరప్రభేదః .

ఏకస్య చిద్వ్యోమతనోరనేక-

     స్తథైవ సా సద్ధృది పోస్ఫురీతి .. 59..

బాలభానుసదృశేన మూర్తిమ-

     ద్వైభవేన నిజమాంతరం మహః .

దర్శయత్యమితబోధబృంహితం

     సర్వదిక్కమిహ యా నతోఽస్మి తాం .. 60..

ఏకేన యా వక్త్రవరేణ దేవీ

     సర్వోదయం సర్వవికల్పముక్తం .

సత్సూచయంతీ పరభక్తిభాజాం

     త్వాం శక్తిమానందతనుం నమామి .. 61..

నేత్రత్రయేణేహ సదా భవానీ

     యా జాగరాదిప్రభవాత్మకేన .

జ్ఞేయాదిరూపం త్రిజగత్ప్రపంచం

     సంలక్షయంతీ ప్రణమామ్యహం తాం .. 62..

దోర్దండయుగ్మద్వయసన్నివేశ-

     క్రమేణ యా వర్గచతుష్కముచ్చైః .

ఆవేశయంత్యాశు విచిత్రమూర్తీ-

     స్తాం నౌమి నిత్యాం పరమామవాచ్యాం .. 63..

దృగాదివృత్తిప్రచయస్వరూపం

     శరౌ ఘముచ్చైరిహ పంచధా యా .

విభక్తి దేవీ నితరామనాది- (భినత్తి దేవీ)

     బోధైకమూర్తిః ప్రణమామ్యహం తాం .. 64..

చైతన్యవిష్ఫారవపుర్బిభర్తి

     యా కార్ముకం బుద్ధిగుణేన యుక్తం .

తాం నౌమి దేవీం పరచిత్ప్రకాశ-

     రూపేశ్వరా భిన్నవిమర్శశక్తిం .. 65..

ఆకృష్య పాశేన సమస్తదోషాన్

     మోహాదికాన్ కౌండలివిగ్రహేణ .

భినత్తి యాస్త్రేణ మహాంకుశాఖ్య-

     రూపేణ సంహారకలామయేన .. 66..

తాం నౌమి దేవీం కుళశూన్యధామ-

     మధ్యోదితాం కారణపంచకం చ .

జన్మాదిభూభ్యంతరగం సమంతాద్

     విలాపయంతీమకుళామవాచ్యాం .. 67..

యా ద్వాదశాంతఃస్థితశైవధామ-

     లబ్ధాస్పదా కాలకలావిముక్తా .

తాం నౌమి దేవీం పరశూన్యగర్భే

     శాంతాం ప్రశాంతం వపురుద్వహంతీం .. 68..

స్వాతంత్ర్యతంత్రేణ తతోఽపి**

     వికాసవృత్తిం పరమాం విగాహ్య .

చాంద్రం మహామండలమప్రమేయం

     విద్రావ్య తూర్ణం కుళమావిశంతీం .. 69..

పీయూషధారాప్రచయేన నిత్య-

     మాపూర్య జన్మావధి ధామ్ని భూయః .

లబ్ధప్రరోహప్రభవప్రశాంతి-

     రూపేహ తాం శక్తిమహం నమామి .. 70..

ఆధారమాకుంచ్య గురూక్తయుక్త్యా

     ప్రాణాన్ నిరుయోర్ధ్వవహం సమస్తం .

ప్రజ్వాల మధ్యస్థిత శక్తితేజః- (ప్రజ్వాల్య?)

     పుంజం సమాధిం విభజంతి ధన్యాః .. 71..

ఇత్థం సమావిశ్య కుళక్త్రమస్థాం

     ముద్రాం మహామంత్రమయీస్వరూపాం .

ప్రకాశతాం యాతి నిరాఖ్యరూపా

     యేయం పరా శక్తిరిహ స్తుమస్తాం .. 72..

విగాహ్య మేఢ్రాదినవప్రకార-

     స్థానౌఘముచ్చైర్నవభిః సమేతం .

శిఖాగ్నిలక్షైర్జ్వలితా దదాతి

     సిద్ధిం పరాం యా ప్రణమామ్యహం తాం .. 73..

అనేన సద్దోశికసంప్రదాయ

క్రమోదయేనాశ్వవగమ్యతే యైః

దేవీ యదేషాం పరభుక్తిముక్తీ

దదాతి గర్భే తు నమామ్యహం తాం .. 74..

దేవీం నుమస్తాం పరితః స్వసంవి-

     ద్రూపాం వరాం భక్తివికాసయోగాత్ .

యయా మలాదిత్రితప్రపంచః

     ప్రక్షాలితో బోధజలప్రపూరైః .. 75..

పుష్పాదిబాహ్యప్రతతోపచారై-

     ర్దేవ్యర్చ్యతే భక్తజనైః సదైవ .

ఆభ్యంతరా కాప్యమితాత్ర పూజా

     యస్యాః స్వరూపానుగుణస్థితాయాః .. 76..

తామేవ వక్ష్యే గురువక్త్రయుక్త్యాః

     సంక్షేపతః సాధువిబోధనాయ .

సూక్ష్మాం పరాం చ స్వచితిస్వరూపాం

     సమ్యక్ సమావిశ్య నిజప్రబోధం .. 77..

పితామహరమాధిపప్రభృతిపంచకం హేలయా

విలాపయతి ఏన్మహః ప్రథమనాదవృత్త్యుద్గమాత్ . (సన్మహ?)

తదేవ వితతప్రథం స్వకుళమధ్యగం దేవి తే

స్థితం స్వరసతః సతాం వితతమధ్యగం నిర్మలం .. 78..

తాసాం మహత్ కంచుకపంచకే(?)యత్

     తదేవ యస్యార్ఘ్యమనర్గళస్య .

సమర్చ్యతే తత్ ప్రణమామి భక్త్త్యా

     దేవీస్వరూపం వితతప్రకాశం .. 79..

పంచప్రవాహోదితశక్తిచక్ర-

     క్రమోద్ధృతైర్భావవిభాగపుష్పైః .

యాహర్నిశం దేవ్యనురోధతస్త్వం

     సమతే సద్భిరభిష్టుమస్తాం .. 80..

బ్రాహ్మాద్ బిలాదూర్ధ్వగమోదితాలం

     శక్తిప్రభా ధూపశిఖేవ భాతి .

యదగ్రగాం నౌమి సమస్తభావ-

     సంహారిణీం తాం నిజచిద్విభూతిం .. 81..

ప్రాణప్రవాహౌఘనిఘట్టనేన

     యజ్జ్యోతిరాగ్నేయమనల్పవీర్యం .

ఉదైత్యసౌ దీపవరః ప్రదీప్తో

     యదగ్రగస్తాం ప్రణమామి దేవీం .. 82..

అఖండితస్వాత్మమహావభాస-

     చిత్కుంకుమౌఘః ప్రతతప్రమోదః .

సదాంగరాగః ప్రవిభాతి యస్యా-

     స్తాం నౌమి దేవీం రమణీయవృత్తిం .. 83..

అక్షవర్గగమనిష్ఠితం పరం

     చిత్తభైరవవపుర్నివేదనం .

యత్ప్రియం నిరవధిం నమామి తాం

     సుందరీమపరబోధబృంహితాం .. 84..

చిన్మృగాంకవపుపశ్చ్యుతామృత-

     స్రావసంభృతమహార్ఘ్యపాత్రతః .

తర్పణం వితతమాస్థితం సదా

     యత్తనోః సతతమస్మి తో నతః .. 85..

జన్మకుండగగనోదరోద్గతశ్చిత్రభానురిహ భాభిరుత్కటః .

అక్షపక్షవిషయాహుతీః సదా భక్షయన్ నిరవధిక్రమాక్రమైః .. 86..

జాజ్వలీతి కరణేశసప్తకప్రాజ్యఘస్మరశిఖావిరాజితః .

చిత్తత్రిభ్రమమయేంధనైః సదా వహ్నికర్మ తవ దేవ్యవరిథతం .. 87..

ఇత్థం సదా సద్భిరనాందివోధధామా నికేతం గురువక్త్రగమ్యం .

సమ్యక్ సమావిశ్య సమర్చ్యతే యా తాం నౌమి కాంచిచ్చితిమ ప్రమేయాం .. 88..

ఇయం పరస్మాదవిభిన్నరూపా శివస్వతంత్రా క్రమతోఽక్రమేణ .

ఆదౌ పరేణాథ పరావరాఖ్యభేదేనం పశ్చాదపరేణ దేవీ .. 89..

నిజస్వరూపం తు విభజ్య నిత్యం జహాతి నైవాప్రతిమప్రభావం .

శైవం మహః సర్వవిభేదముక్తం నిరుత్తరం యా గ్రణమాభ్యహం తాం .. 90..

చిదంకురం కామ కలాస్వరూపం బిందుం విచింత్యామృతతేజసేద్ధం .

అనాహతోన్మేషనినాదశక్తివక్త్రే స్థితం వ్యోమబిలాంతరాళే .. 91..

తస్యాధరస్థం శశిసూర్యరూపం బిందుద్వయం పార్శ్వయుగప్రవాహం .

తస్యాప్యధో వహ్నిశిఖాస్వరూపరేఖాకృతిం చ ప్రవిలాప్య సమ్యక్ .. 92..

ఏతం క్రమం ధ్యానపరం సదైవ త్యక్త్వా క్త్రమం సర్వావికల్పముక్తం .

ధ్యాయేన్మహాసాధకపుంగవో యో లభేత్ స సిద్ధి పరమ శివోత్తమం .. 93..

మాయాకామాసనస్థం హృదయపదాతం కామరాజస్య సాధ్యం (హృదయపదమతం?)

     ధ్యాత్వా తద్వాహ్యకోష్టం పుటితమనుపమం వాగ్భవం తద్బహిశ్చ .

బ్రూంకారం కోణషట్కే బహిరపి చ తతస్త్రిస్థితా తుంబురూర్ధ్వం

     కృత్వా క్లీంబీజకం యత్ స్మరతి స భువనం క్షోభయేద్ దేవి సమ్యక్ .. 94..

ఇదం యంత్రం సమాధిస్థో దృగ్గోళో కేళియోగతః (?) .

మహాకామకలాం ధ్యాత్వా పూజయేద్ యః స సిద్ధిభాక్ .. 95..

విద్యాధరీ సురవధూరపి సిద్ధపత్నీ

     గంధర్వదివ్యలలనోరగనాయికాపి .

యక్షేశ్వరప్రియతమా నరధుర్యరామా

     త్వత్సేవకస్య భవేతీహ వశా సదైవ .. 96..

ఏకైకాక్షరసాధనం విధివరైస్త్వన్మూర్తిమాద్యాం పరాం

     ధ్యాత్వా యే భవపత్ని! సాధకవరాః కుర్వంతి తేషాం సదా .

త్వద్దృక్పాతపవిత్రితైకమనసామత్యద్భుతా జాయతే

     సిద్ధిర్యద్వశతః సురాధిపముఖా దాస్యం స్పృశంత్యాదరాత్ .. 97..

యో లక్షాణి వరాంగజన్మహృదయబ్రహ్మాఖ్యరంధ్రాత్మనా

     ఖ్యాతాన్యత్ర కుళాగమే గురువరైర్యాన్యాద్యసిద్ధేశ్వరైః .

తద్ధ్యానం పరితో విధాయ నిపుణైర్లక్షత్రయం జప్యతే

     శక్తయుద్దీపనపూర్వకం తు పరమా సిద్ధిస్తతో జాయతే .. 98..

వశ్యాకర్షణవాగ్భవాదిపృతనాస్తంభాదికార్యక్రమ-

     శ్చక్రధ్యానసమర్చనాదివిధినా సిద్ధ్యత్యవశ్యం నృణాం .

కారుణ్యాత్ తవ దేవి! నిర్మలధియాం మోహాభిధానక్షయా-

     న్మోక్షప్రత్యయదర్శనాయ సతతం ముఖ్యానుభావోఽత్ర నః .. 99..

చతుర్థశక్తిప్రథితం విలాప్య మోహప్రరోహం భవభేదదం యా .

వికాస్య నిర్ద్వంద్వచితిప్రకాశప్రకాశితాం శక్తిమనుగ్రహాఖ్యాం .. 100..

విభాతి తాం నౌమి భవాబ్ధిమధ్యే

     ప్రోన్మగ్నజంతూద్ధరణైకదీక్షాం .

నిర్ధామధామక్రమ విష్ఫులింగ-

     ప్రపూరితాశేషదిగంతరాళాం .. 101..

అకృతకపరభక్తివ్యక్తిసంసక్తచిత్త-

     ప్రథితవితరబోధస్ఫారసంప్రేరణేన .

కృతమిదమనికేతధ్యానసాధ్యైక మూర్తే-

     ర్నిరుపమనిజసంవిద్దేవతామాయయోచ్చైః .. 102..

గురువరవదనోత్థప్రాజ్యసత్సంప్రదాయ -

     క్రమపరమరహస్యైర్బృంహితైర్వాగ్విలాసైః .

త్రిపురమథనకాంతాభక్తిసక్తేన యత్తత్

     స్తబకమమలచిత్తా హంత శృణ్వంతు సంతః .. 103..

అనంతశక్తి కృచ్చేదం స్తోత్రం తవ మహేశ్వరి ! .

యత్ తేన దేవి! భక్తానాం భుక్తిముక్తిమహాఫలం .. 104..

(అనంతశక్తిస్తవనామకమిదం త్రిపురసుందరీస్తోత్రం .

కుళయోగానుసారం వివిధ-మూలమాలసంపుటితైః పరశ్శతైరనవద్యైః

పద్యైః సంగుంఫితమిదం సాధకానామనంతశక్తిప్రదం .

దేవ్యాం త్రిపురాంబికాయాం అకృతక-భక్తిమతా వితతబోధేన

గురూపదేశద్వారా కౌళ-సంప్రదాయరహస్యవేదినా కేనాపి సాధకవరేణ

విరచితమిదం స్తవరత్నమిత్యేతస్యాంతిమశ్లోకాభ్యామవగమ్యతే .. )

రేణుకాస్తోత్రం

 శ్రీగణేశాయ నమః .

పాకామృతాంశుమకుటాభరణా భవానీ

     శోకాపహా నతజనస్య శుభాఖిలాంగీ .

కోకాకృతిస్తనభరా కుశలాని నిత్యం

     మూకాంబికా మమ తనోతు మునీంద్రవంద్యా ..

శ్లోకస్యాద్యంతయోర్వాగ్భవముచ్చార్య పఠేదితి సంప్రదాయః .. ఓం ..

కాలాగ్న్యాది శివావసానమఖిలం తే గుల్ఫదఘ్నం శివే

     మూర్తిం కీర్తయితుం న కస్య రసనా లజ్జాంబుధౌ మజ్జతి .

తస్మాత్ త్వచ్చరణైకదేశనఖరజ్యోతిఃస్ఫులింగా ఇవ

     స్ఫూర్జంతి ప్రభవిష్ణవశ్చ సతతం తే పద్మనాభాదయః .. 1..

కల్పః కోఽపి స శాంభవో విజయతే మాతస్త్వయా కల్పితో

     యత్రానల్పవికల్పజాలవిముఖః కశ్చిద్విపశ్చిత్ పరః .

సా త్వం సత్త్వవతామపీహ సులభా నైవాసి కిం స్తూయసే

     స్వచ్ఛందం శిశవో యథా తవ పునః క్రీడంతి వేదా ఇమే .. 2..

లీలాచామరధారిణీసహచరీగత్యా మహాసిద్ధయో

     నూనం వంచయితుం స్ఫురంతి భవతీకారుణ్యశూన్యం జనం .

అంబ త్వన్నయనాంచలం కరుణయా యస్మిన్ పరిక్రీడతే

     తస్య ద్వారి నివారితోఽపి కురుతే సేవాం సురాణాం గణః .. 3..

ఆ పాతాలతలాత్ ఫణీశ్వరశిరోరత్నాంశునీరాజితా-

     దా సర్వజ్ఞనికేతనాదపి శిఖాయౌతాంశుధౌతాంకణాత్ .

ఏకచ్ఛత్రమవాప్య వైభవమహో దీవ్యంతి తే సంతతం

     యే సంధ్యాచలనిశ్చలం తవ పదం ధ్యాయంతి గాయంతి చ .. 4..

యే త్వామంబ పలాశబిల్వకుసుమైరుల్లాసిభిర్మల్లికా-

     పుష్పైర్వా వనమల్లికావిరచితైరుద్దామభిర్దామభిః .

ముగ్ధోన్మీలితమాలతీభిరభితః సంపూజయంత్యాదరాత్

     తేషాముద్ధృతసౌరభా ప్రతిదినం వ్యాజృంభతే భారతీ .. 5..

త్వాం సహ్యాచలమౌలిసుస్థితపదాం శ్రీ-ఏకవీరాంబికే

     యే లింపంతి సచంద్రచందనరసైస్తేషాం సుధాస్రావిణీ .

వాణీవిస్మయవర్ణ్యమానగిరిశవ్యాలోలగంగాజల-

     స్వచ్ఛందోర్మిపరంపరావిజయినీ వాణీ నరీనృత్యతి .. 6..

యే త్వాం బ్రాహ్మముహూర్తనిర్మలధియస్త్వాధారతశ్చింతయ-

     న్త్యూర్ధ్వం మూర్ధ్ని సరోరుహేఽతిధవలే పీయూషధారావృతే .

తే మృత్యుం సహసా విజిత్య రచయంత్యుచ్చైర్గతిం నిత్యశః

     ప్రత్యాదిష్టపురఃసుధాకరసుధాహంభావసంభావితాః .. 7..

యస్త్వాం పశ్యతి తస్య నశ్యతి మహాపాపాంధకారః క్షణాత్

     కిం చార్ధాదపరే పురాణపురుషప్రాణప్రియే పార్వతి .

మూర్ధ్నస్తస్య తతో భవేత్ కృతధియః శ్రీ-ఏకవీరాంబికే

     దృశ్యంతే న మనాగపీహ యదియం ప్రత్యక్షముద్యోతసే .. 8..

కిం యోగేన కిమర్చనేన కిమథ జ్ఞానేన కిం కర్మణా

     కిం ధ్యానేన కిమిజ్యయా కిమథవా దానేన కిం దీక్షయా .

దృశ్యంతే యది సహ్యశైలశిఖరశ్రీగర్వితాః సర్వదా

     మాతః పార్వతి రేణుకే తవ పదాంభోజప్రభావిభ్రమాః .. 9..

హే సహ్యాచలనిత్యకేలిరసికే కర్పూరకస్తూరికా-

     విన్యస్తాగరుకుంకుమైర్మలయజైస్త్వం చర్చితాభ్యర్చితా .

తే దీవ్యంతి సురేంద్రముఖ్యవిబుధశ్రేణీకిరీటస్ఫుర-

     న్మాణిక్యప్రతిబింబితారుణపదస్థాః సంప్రదాః సంపదాం .. 10..

హే సహ్యాద్రివినిద్రలింగవపుషి శ్రీ-ఏకవీరాంబికే

     త్వాం కృష్ణాగరుగుగ్గులుప్రభృతిభిర్యే ధూపయంత్యాదరాత్ .

తే కైలాసనివాసినీభిరభితః సంచారితైశ్చారుభి-

     ర్లీలాచామరమారుతైశ్చిరతరం నందంతి రుద్రా ఇవ .. 11..

మాతః శాంభవి జృంభితామృతశిలాలింగాత్మికే రేణుకే

     త్వాం సహ్యాద్రిశిరోవిహారసులభాం నీరాజయంత్యాదరాత్ .

తే వృందారకవృందవందితపదాశ్చంద్రార్కచూడామణి-

     జ్యోతిర్మేదురమందిరాంకణభువో భూతిం లభంతేఽద్భుతాం .. 12..

దూరాదంగణరంగసంగతరజోరాజీవిరాజద్వపు-

     స్తుభ్యం యః ప్రణిపత్తిమంబ కురుతే కశ్చిత్ కదాచిత్ క్వచిత్ .

సంప్రాప్య శ్రియమిందుసుందరయశఃసందోహనిష్యందినీ-

     మంతే నిర్విషయం స్వయం ప్రవిశతి శ్రీశాంభవం వైభవం .. 13..

త్వాముద్దిశ్య కదాపి కోఽపి కిమపి క్వాపి ప్రపద్యన్ నరో

     భక్త్యావేశవశీకృతో జపతి వా యో యజ్జుహోత్యాదరాత్ .

తత్ తస్యాక్షయమేవ దేవి భవతి స్వర్గాపవర్గప్రదం

     త్వన్నామస్మరణం గతో విజయతే సర్వోఽపి శర్వో జనః .. 14..

మాతస్త్వచ్చరణేన యాస్యతి చిరం రుద్రోఽపి భద్రాశయ-

     శ్చూడాచంద్రకలామరీచినిచయైరాచాంతరత్నాసనైః .

తత్త్వానాముపరి స్థితో విజయతే వామాదిభిర్నామభిః

     శ్రీకామేశ్వరి దక్షపుత్రి గిరిజే త్వం రేణుకే రక్ష మాం .. 15..

మాతర్భైరవి భర్గపత్ని గిరిజే గాయత్రి గోత్రాత్మికే

     దుర్గే గౌరి సరస్వతి త్రిణయనే శ్రీసిద్ధలక్ష్మీ ధృతే .

నిత్యే మృత్యువికారహారిణి శివే శ్రీ-ఏకవీరాంబికే

     సోఽహం తే శరణాగతః కరుణయా త్వం రేణుకే రక్ష మాం .. 16..

     ఇతి శ్రీరేణుకాస్తోత్రం సమాప్తః ..

పాకామృతాంశుమకుటాభరణా భవానీ

     శోకాపహా నతజనస్య శుభాఖిలాంగీ .

కోకాకృతిస్తనభరా కుశలాని నిత్యం

     మూకాంబికా మమ తనోతు మునీంద్రవంద్యా ..

శ్లోకస్యాద్యంతయోర్వాగ్భవముచ్చార్య పఠేదితి సంప్రదాయః .. ఓం..

రేణుకాస్తోత్రం శ్రీవినాయకశాస్త్రికృతం

శ్రీగణేశాయ నమః .

త్వదీయపదరేణుకే శిరసి మామకే రేణుకే

నిధాయ వరదం కరం ననుదరం మమాఽనీనశః .

స్వవత్సలతయాఽనుదోర్నయనలాలనచ్ఛద్మనా

ప్రమోదభర-దృగ్ఝర-స్తుతమదశ్రుభిర్ధావయే ..

ప్రణమ్య సుషమామిషద్ దృగ్నిమేషశీర్సోల్లసత్-

కిరీటకులసంకులం పరిమలాఽలమంఘ్ర్యుత్పలం .

మనోలిరయముమదః సపది తేఽనుజిఘ్రన్మనాక్

తదన్యసుమనస్సు కిం వ్రజతి నాధునా తత్స్మరన్ ..

భజంతు విషయాన్ సజూర్విషయిణో విషాణీవతే

రసారసికమౌలినా మమ మనోఽలినాన్యక్కృతాః .

శ్రుతం తదవలోకితం భవతు తత్స్పృశన్ జిఘ్రతా

రసాలపదపంకజం జనని తే సదా స్వాద్యతాం ..

విజిత్య హృదుపస్థితో ముహురుపస్థితానందకం

విశుద్ధిముపసంహరన్  విరమతాభవద్భక్తిషు .

గిరా భజతు నామ తే కరఘృతార్చనోపస్కరం

ప్రయాతు తవ మందిరం విసృజతు త్వదన్యాదరం ..

ముమోచ కిల మాం ప్రసూః రథవిదగ్రణీరగ్రజా

పితాఽపి దయితోఽగ్రజః పర ఇహాశ్రయో యస్య మే .

శ్రయేఽహమధునేహకం   వ్రజిన (బ్రజిన) పుఙ్జవాక్యాహతః

ప్రయామి దిశమంబికే నిదిశ కాందిశికోఽద్యకాం ..

యథాయథమనుష్ఠితాః స్తుతికథాః కథంచిన్నమతే

స్మరామి చ కృతం న తే తేఽర్చనమకించనః కించనః .

తపోమనుజపోఽప్యుపోషణకారి న త్వత్కృతే-

ఽపరాద్ధమముమంబికే ! వద కిముద్ధరిష్యస్యతః ..

విధిర్హరిహరాదయో యదవధీరితా నాంతికే

పురందరపురోగమా న పుర  ఆసితుం శక్నుయుః .

నిగృహ్య కృపయాఽమికే ! గుణగణైః స్వకీయైర్దృఢం

బధాన న యథా పునః శ్రయతి హృత్పశుః శోచ్యతాం ..

అగాధ వదపారద్రుమ-మదాదియదో యుతా

వివేకముఖమత్సఖాఽప్యుదధివీచిమగ్నాః పరం .

నిధాయ చరణౌ పురో నియమయాఽఽశు తృష్ణా నదీ

వినశ్యతి యథాఽమ్బికే! న పరమార్థ-మార్గో మమ ..

స్తవీమి జమదగ్నిసద్గృహిణి నామ పృథ్వీగతాం

గృణన్ పరశురామ-సజ్జనని  ! జల్పితాప్తర్థయే .

తదంబ  ! కౄపయాఽఽప్స్యతేఽద్య వయసో న పంచాశతాః

మయాపద్ధతి కోఽపి చేత్సఫలమాప్నుయాత్తాదృశం ..

ఇతి శ్రీమత్పూజ్యపాదవినాయకశాస్త్రివేతాలవిరచితం

                    శ్రీరేణుకాస్తోత్రం సంపూర్ణం ..

 రేణుకాస్తోత్రం శ్రీవాయుపురాణే శ్రీపరశురామకృతం

            శ్రీగణేశాయ నమః .

           శ్రీసరస్వత్యై నమః .

              శ్రీగురుభ్యో నమః .

            శ్రీరేణుకాంబాయై  నమః .

ఓం నమః పరమానందే సర్వదేవమయీ శుభే .

అకారాది-క్షకారాంతం మాతృకా మంత్రమాలినీ .. 1..

ఏకవీరే ఏకరూపే మహారూపే అరూపిణి .

అవ్యక్తే వ్యక్తిమాపన్నే గుణాతీతే గుణాత్మికే .. 2..

కమలే కమలాభాసే హృత్సచ్చిత్తరణికాలయే .

నాభిచక్రస్థితే దేవి కుండలీ తంతురూపిణి .. 3..

వీరమాతా వీరబంధా యోగినీ సమరప్రియే .

వేదమాతా వేదగర్భే విశ్వగర్భే నమోఽస్తు తే .. 4 ..

రామమాతర్నమస్తుభ్యం నమస్త్రైలోక్యరూపిణి .

మహ్యాదికే పంచభూతా జమదగ్నిప్రియే శుభే .. 5 ..

యైస్తు భక్త్యా స్తుతా ధ్యాతా అర్చయిత్వాఽర్పితే శుభే .

భోగమోక్షప్రదే దేవి కామేశ్వరి నమోఽస్తు తే .. 6..

నమోఽస్తు తే నిరాలంబే పరమానందవిగ్రహే .

పంచభూతాత్మికే దేవి భూతభావివర్జితే .. 7..

మహారౌద్రే మహాకాయే సృష్టిసంహారకారిణి .

బ్రహ్మాండగోలకాకారే విశ్వరూపే నమోఽస్తు తే .. 8..

చతుర్భుజే ఖడ్గహస్తే మహాడమరుధారిణి .

శిరఃపాత్రధరే దేవి ఏకవీరే నమోఽస్తు తే .. 9..

నీలాంబరే నీలవర్ణే మయూరపిచ్ఛధారిణి .

వనభిల్లధనుర్వామే దక్షిణే బాణధారిణి .. 10..

రౌద్రకాయే మహాకాయే సహస్రార్జునభంజని .

ఏకం శిరః పురా స్థిత్వా రక్తపాత్రే చ పూరితం .. 11..

మృతధారా పిబందేవి రుధిరం దైత్యదేహజం .

రక్తవర్ణే రక్తదంతే ఖడ్గలాంగలధారిణి .. 12..

వామహస్తే చ ఖట్వాంగం డమరుం చైవ దక్షిణే .

ప్రేతవాహనకే దేవి-ఋషిపత్నీ చ దేవతే .. 13..

ఏకవీరే మహారౌద్రే మాలినీ విశ్వభైరవి .

యోగినీ యోగయుక్తా చ మహాదేవీ మహేశ్వరీ .. 14..

కామాక్షీ భద్రకాలీ చ హుంకారీ త్రిపురేశ్వరీ .

రక్తవస్త్రే రక్తనేత్రే మహాత్రిపురసుందరి .. 15..

రేణుకా సూనుయోగీ చ భక్తానామభయంకరీ .

భోగలక్ష్మీర్యోగలక్ష్మీర్దివ్యలక్ష్మీశ్చ సర్వదా .. 16..

కాలరాత్రి మహారాత్రి మద్యమాంసశివప్రియే .

భక్తానాం శ్రీపదే దేవి లోకత్రయవిమోహిని .. 17..

క్లీంకారీ కామపీఠే చ హ్రీంకారీ చ ప్రబోధ్యతా .

శ్రీంకారీ చ శ్రియా దేవి సిద్ధలక్ష్మీశ్చ సుప్రభా .. 18..

మహాలక్ష్మీశ్చ కౌమారీ కౌబేరీ సింహవాహినీ .

సింహప్రేతాసనే దేవి రౌద్రి క్రూరావతారిణి .. 19..

దైత్యా నారీ కుమారీ చ రౌద్రదైత్యనిపాతినీ .

త్రినేత్రా శ్వేతరూపా చ సూర్యకోటిసమప్రభా .. 20..

ఖడ్గినీ బాణహస్తా చారూఢా మహిషవాహినీ .

మహాకుండలినీ సాక్షాత్ కంకాలీ భువనేశ్వరీ .. 21..

కృత్తివాసా విష్ణురూపా హృదయా దేవతామయా .

దేవమారుతమాతా చ భక్తమాతా చ శంకరీ .. 22..

చతుర్భుజే చతుర్వక్త్రే స్వస్తిపద్మాసనస్థితే .

పంచవక్త్రా మహాగంగా గౌరీ శంకరవల్లభా .. 23..

కపాలినీ దేవమాతా కామధేనుస్త్రయోగుణీ .

విద్యా ఏకమహావిద్యా శ్మశానప్రేతవాసినీ .. 24..

దేవత్రిగుణత్రైలోక్యా జగత్త్రయవిలోకినీ .

రౌద్రా వైతాలి కంకాలీ భవానీ భవవల్లభా .. 25..

కాలీ కపాలినీ క్రోధా మాతంగీ వేణుధారిణీ .

రుద్రస్య న పరాభూతా రుద్రదేహార్ద్ధధారిణీ .. 26..

జయా చ విజయా చైవ అజయా చాపరాజితా .

రేణుకాయై నమస్తేఽస్తు సిద్ధదేవ్యై నమో నమః .. 27..

శ్రియై దేవ్యై నమస్తేఽస్తు దీననాథే నమో నమః .

జయ త్వం దేవదేవేశి సర్వదేవి నమోఽస్తు తే .. 28..

దేవదేవస్య జనని పంచప్రాణప్రపూరితే .

త్వత్ప్రసాదాయ దేవేశి దేవాః క్రందంతి విష్ణవే .. 29..

మహాబలే మహారౌద్రే సర్వదైత్యనిపాతిని .

ఆధారా బుద్ధిదా శక్తిః కుండలీ తంతురూపిణీ .. 30..

షట్చక్రమణే దేవి యోగిని దివ్యరూపిణి .

కామికా కామరక్తా చ లోకత్రయవిలోకినీ .. 31..

మహానిద్రా మద్యనిద్రా మధుకైటభభంజినీ .

భద్రకాలీ త్రిసంధ్యా చ మహాకాలీ కపాలినీ .. 32..

రక్షితా సర్వభూతానాం దైత్యానాం చ క్షయంకరీ .

శరణ్యం సర్వసత్త్వానాం రక్ష త్వం పరమేశ్వరి .. 33..

త్వామారాధయతే  లోకే తేషాం రాజ్యం చ భూతలే .

ఆషాఢే కార్తికే చైవ పూర్ణే పూర్ణచతుర్దశీ  .. 34..

ఆశ్వినే పౌషమాసే చ కృత్వా పూజాం ప్రయత్నతః .

గంధపుష్పైశ్చ నైవేద్యైస్తోషితాం పంచభిః సహ .. 35..

యం యం ప్రార్థయతే నిత్యం తం తం ప్రాప్నోతి నిశ్చితం .

తత్త్వం మే వరదే దేవి రక్ష మాం పరమేశ్వరి .. 36..

తవ వామాంకితం దేవి రక్ష మే సకలేశ్వరి .

సర్వభూతోదయే దేవి ప్రసాద వరదే శివే .. 37..

           శ్రీదేవ్యువాచ

వరం బ్రూహి మహాభాగ రాజ్యం కురు మహీతలే .

మామారాధ్యతే లోకే భయం క్వాపి న విద్యతే .. 38..

మమ మార్గే చ ఆయాంతీ భీర్దేవీ మమ సన్నిధౌ .

అభార్యో లభతే భార్యాం నిర్ధనో లభతే ధనం .. 39..

విద్యాం పుత్రమవాప్నోతి శత్రునాశం చ విందతి .

అపుత్రో లభతే పుత్రాన్ బద్ధో ముచ్యేత బంధనాత్ .. 40..

కామార్థీ లభతే కామం రోగీ ఆరోగ్యమాప్నుయాత్ .

మమ ఆరాధనం నిత్యం రాజ్యం ప్రాప్నోతి భూతలే .. 41..

సర్వకార్యాణి సిధ్యంతి ప్రసాదాన్మే న సంశయః .

సర్వకార్యాణ్యవాప్నోతి దీర్ఘాయుశ్చ లభేత్సుఖీ .. 42..

       శ్రీపరశురామ ఉవాచ

అత్ర స్థానేషు భవతాం అభయం కురు సర్వదా .

యం యం ప్రార్థయతే నిత్యం తం తం ప్రాప్నోతి నిశ్చితం .. 43..

ప్రయాగే పుష్కరే చైవ గంగాసాగరసంగమే .

స్నానం చ కురుతే నిత్యం నిత్యం చ చరణోదకే .. 44..

ఇదం స్తోత్రం పఠేన్నిత్యం త్రిసంధ్యం శ్రద్ధయాన్వితః .

సర్వాన్ కామానవాప్నోతి ప్రాప్యతే పరమం పదం .. 45..

ఇతి శ్రీవాయుపురాణే పరశురామకృతం శ్రీరేణుకాస్తోత్రం సంపూర్ణం ..

            .. శ్రీరేణుకార్పణమస్తు ..

రేణుకాస్తోత్రం శ్రీధరస్వామికృతం

శ్రీగణేశాయ నమః .

శివాం శాంతరూపాం మనోవాగతీతాం

నిజానందపూర్ణాం సదాఽద్వైతరూపాం .

పరాం వేదగమ్యాం పరబ్రహ్మరూపాం

భజే రేణుకాం సర్వలౌకైకవేద్యాం  .. 1..

సదాచారసద్భక్తిబోధాదిభిర్యా

గురోరంఘ్రిశుశ్రూషయాం ముఖ్యవృత్త్యా .

సువేద్యా సులభ్యా పరానందపూర్ణా

భజే రేణుకాం తాం విమోహప్రశాంత్యై .. 2..

శ్రుతిర్నేతినేతీతి సర్వం నిరస్య

వదత్యేకమాద్యం విభుం చిత్సుఖం యత్ .

తదేవావశిష్టం స్వరూపం విశుద్ధం

భజే రేణుకాం తాం సదా మృత్యుహీనాం .. 3..

యదానందసింధౌ నిమగ్నో న పశ్యేద్-

అహో కర్మజాలం ఫలం వా తదీయం .

న జైవం న శైవం జగన్నైవ మాయాం

చిదేకస్వరూపాం భజే రేణుకాం తాం .. 4..

అనేకాంతికాం సర్వభేదాతిరూపాం

తమోఽజ్ఞానదుఃఖాతిగాం శుద్ధరూపాం .

సదాఽధ్యాత్మవిద్యాప్రదానైకశీలం

భజే రేణుకాం ముక్తిసౌఖ్యాధిదేవీం .. 5..

త్రితాపప్రశంత్యై సమారాధ్యమానాం

సదా జీవలోకే స్వసౌఖ్యప్రదాత్రీం .

భవోంబోధిసేతుం చిదానందకందాం

భజే రేణుకాం జ్ఞానముద్రైకలక్ష్యాం .. 6..

సదా భక్తహృత్కౌముదీం భద్రభద్రాం

సదోంకారవాచ్యాం వరేణ్యాం శరణ్యాం .

స్వభక్తార్తినాశాం శుభాంగాం గుణాఢ్యాం

భజే రేణుకాం భక్తసౌఖ్యాబ్ధిరూపాం .. 7..

సదా భక్తవాత్సల్యపూర్ణాం సురమ్యాం

సురేంద్రాదిభిః స్తూయమానాం సుషూక్తైః .

సదా భక్తవృందైశ్చ సంసేవ్యమానాం

భజే రేణుకాం భక్తభాగ్యాం భవానీం .. 8..

పఠేద్యః సదా భక్తియుతో విశుద్ధః

స్వవర్ణాశ్రమాచారతో నిత్యయుక్తః .

స ముక్తః కృతీ రేణుకాయాః ప్రసాదాత్

సదా రాజతే రాజతే లోకపూజ్యా .. 9..

ఇతి శ్రీమత్పరమహంసపరివ్రాజకాచార్యసద్గురుభగవతా శ్రీధరస్వామినా

విరచితం శ్రీరేణుకాస్తోత్రం సంపూర్ణం ..

రేణుకాస్తోత్రం ముచుకుందకృతం

శ్రీగణేశాయ నమః .

           ముచుకుంద ఉవాచ

అనాథమకృతప్రజ్ఞం అజ్ఞానతిమిరావృతం .

మోహపంకనిమగ్నంచ మాముద్ధర సురేశ్వరి ..

త్వాం రేణుకేతి వరదేతి చ సుందరీతి

   వాగీశ్వరీతి సకలేతి చ పార్వతీతి .

సిద్ధేశ్వరీతి సుభగేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

అంబేతి విశ్వజననీతి జగద్ధితేతి

   విద్యేతి ధర్మనిరతేతి పరాత్పరేతి .

ఆద్యేతి వేదజననీతి చ యే వదంతి

   తాన్ దేవి నిత్యమనధాన్ పరిపాలయ త్వం ..

త్వాం వేదశాస్త్రమితిహాసవినోదినీతి

   బ్రహ్మేతి బ్రహ్మగమకేతి శుభావహేతి .

విశ్వేశ్వరీతి కమలేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

ఆనందభూతనిలయేత్యనలోద్భవేతి

   గూఢేతి భావగమకేతి శుభావహేతి .

విశ్వేశ్వరీతి కమలేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

నిత్యేతి దివ్యచరణేతి మహావ్రతేతి

   హృద్యేతి భక్తజనదుఃఖవినాశినీతి .

శ్రద్ధేతి రామజననీతి చ యే వదంతి

   తాన్ దేవి నిత్యమనధాన్ పరిపాలయ త్వం ..

త్వాం పుణ్యదేతి జమదగ్ని-ఋషిప్రియేతి

   గంగేతి తత్త్వవిహితేతి పరాపరేతి .

సుద్ధేతి పాతకకదంబకుఠారకేతి

   తాన్ దేవి నిత్యమనధాన్ పరిపాలయ త్వం ..

త్వాం రాజనీతి పరమామృతభోజనేతి

   శృంగారముఖ్యనవషట్ చ రసప్రియేతి .

లక్ష్మీప్రదేతి సుముఖేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

                స్కంద ఉవాచ

స్తుతైవం ముచుకుందేన రేణుకా బ్రహ్మరూపిణీ .

ప్రత్యక్షరూపా ప్రాహేదం  ప్రసన్నాహం మునీశ్వర ..

                దేవ్యువాచ

ముచుకుంద త్వయా తుల్యః కశ్చిద్భక్తో న విద్యతే .

కిం ప్రార్థయసి మత్తస్త్వం బ్రూహి యత్తేఽభివాంఛితం ..

               ముచుకుంద ఉవాచ

త్వద్భక్తిమతులాం దేహి దేవి త్వం విశ్వరూపిణీ .

నాన్యదిచ్ఛామ్యహం మాతః సత్యమేతన్మయోదితం ..

ఆత్మనః స్వం పరం బ్రహ్మస్వరూపం దర్శయస్వ మే .

యది తుష్టాసి దాసస్య కృపయా త్వం మమోపరి ..

ఇతి శ్రీస్కందమహాపురాణే రేణుకామాహాత్మ్యే

            శ్రీరేణుకాస్తోత్రం ముచుకుందకృతం ..

రేణుకాస్తవరాజస్తోత్రం కౌలార్ణవే భైరవోక్తం

శ్రీ గణేశాయ నమః .

సదాశివం నమస్కృత్య ఉమాం దుర్గాం గణేశ్వరం .

వక్ష్యామి రేణుకాస్తోత్రం భుక్తి-ముక్తి-ఫలప్రదం .

గుప్తప్రకట-సిద్ధానాం యోగినీ చక్ర-పాదుకాం .

నమామి శిరసా నాథం కాల కౌలేశ్వరం ప్రభుం ..

ఆనంద-పీఠ-మధ్యస్థమానంద-పరవేష్టితం .

ప్రణమ్య చ కులానందం జ్ఞానానంద-ప్రకాశకం ..

అక్షరం క్షరమాద్యంతం ప్రకృతిం పురుషం పరం .

తం వందే సచ్చిదానందమేకవీరం సశాంభవం ..

సింహపర్వతమాసీనం దేవదేవేశ్వరోత్తమం .

తత్రస్థంచ సురవాసినమాత్రేయం బ్రహ్మవాదినం ..

అనుసూయా వరం ప్రాప్తం పుత్రస్నేహేన వత్సలాం .

యత్ర యోగీశ్వరో విష్ణుః సంభవిష్యత్వయోనిజాం ..

నానాభోగసమాకీర్ణం క్రీడతే ప్రమదాదిభిః .

మదిరానందచైతన్యం జ్ఞానానందప్రబోధకం ..

జమదగ్నేస్తు యా భార్యా రేణుకా నామ విశ్రుతా .

రామమాతేతి విఖ్యాతా త్రిషు లోకేషు విస్తృతా ..

దత్తాత్రయో మహాత్మాఽసౌ నాగపింగలపూర్వకం .

రేణుకాయాః వినిక్షిప్తం సద్భావం బీజముత్తమం ..

మాయా బీజేన సంయుక్తం మహాపీఠోద్భవం శుభం .

తత్రస్థా శాంభవీ శక్తిః సోమయా చ కులాన్వయా ..

కులాకులవిభాగేన వామ-దక్షిణ-సంజ్ఞకం .

సంతానం త్రిః ప్రకారం చతుః సింహాసనే సదా ..

క్రమపీఠేః సదా యుక్తం ద్వీప-ద్వీపాంతరే స్థితం .

పంచాశద్వర్ణభేదేన మంత్రయంత్రాణి వై స్థితం ..

చతుష్కం పంచకం షట్కం చతుష్కం పంచకంత్రికం .

వషట్కారః సముత్పన్నః కౌమార్యా బటుకాద్వయః ..

షడ్భిః చక్రైస్తు వై దేవ్యాః శ్రీకంఠాద్యాశ్చైవ భైరవాః .

శ్రియా క్రమేణ సంయుక్తా చతుఃషష్ఠ్యాస్తు దేవతాః ..

బ్రాహ్మీ మాహేశ్వరీ చైవ కౌమారీ వైష్ణవీ తథా .

వారాహీ చ తథేంద్రాణీ చాముండా చ శివోద్భవా ..

ప్రయోగే వారుణం కౌలం ఆదావాహ్య జయంతికా .

చరత్రికం ప్రతంచైవ దేవీ కోష్ఠేన చాష్టధా ..

మాహేంద్రీ చ తథాగ్నేయీ యామ్యాం నైరృత్య వారుణీ .

వాయవ్యాం హి చ కౌవేరీ ఈశాన్యాం దివ్యయోగినీ ..

ఉడ్యాయనీ జలంధరీ కామరూపా చ యా స్థితా .

కౌలార్ణవే స్థితా యా చ మంత్రే చక్రే తు యా స్థితా ..

ప్రసన్నా ప్రకటా చైవ సహజా కులజాదయః .

క్షేత్రపాలాశ్చ దిక్పాలా వేతాలాశ్చైవ రాక్షసాః ..

పిశాచా గణగంధర్వా శాకినీ డాకినీ తథా .

ఖేచరా భూచరాశ్చైవ పాతాలాశ్చాంతరిక్షగాః ..

నానారూపధరా సర్వే బలిపూజాభికాంక్షిణః .

అధికారస్వరూపేణ విచరంతి మహీతలే ..

క్రీడతే యోగినీ వృందం క్షేత్రమాతృగృహే స్థితం .

కేచిద్ గాయంతి నృత్యంతి పూజయంతి స్తువంతి చ ..

హసంతి కిలకిలాయంతి గర్జయంతి మహాబలాః .

మాతృపాదోద్భవా సర్వే మాతృమండలసంస్థితా ..

తన్మధ్యే శాంభవీ శక్తిర్రేణుకా సురపూజితా .

శ్రావణ్యశ్చైవ శాక్తేయమష్టవ్యా శాంభవీపదం ..

తేన సా శాంభవీ ప్రోక్తా హకారాద్ధి కలాస్మృతా .

బ్రహ్మా విష్ణుశ్చ రుద్రశ్చ ఈశ్వరః శివ ఏవ చ ..

మాలాబీజసముత్పన్నా సా శక్తిర్రేణుకా మతా .

నమోఽస్తు తే మహాదేవి మహామాయే నమోఽస్తు తే ..

నమోఽస్తు తే వీరభద్రే వీరమాత్రే నమోఽస్తు తే .

రామమాత్రే నమస్తుభ్యం త్రిషు లోకేషు పూజితా ..

నమోఽస్తు కులకౌలేశి నమోఽస్తు జ్ఞానభైరవి .

నమోఽస్తు జ్ఞానగే సర్వే సర్వేశ్వరి నమోఽస్తు తే ..

రామేశ్వరి నమస్తుభ్యం కామేశ్వరి నమోఽస్తు తే .

భద్రకాలి నమస్తుభ్యం కామేశ్వరి నమోఽస్తు తే ..

జమదగ్నిప్రియే శుభ్రే రేణుకే త్వాం నమోఽస్తు తే .

చైతన్యవిగ్రహే నిత్యే వ్యాపకే త్వాం నమోఽస్తు ..

త్రైలోక్యవ్యాపినీ దేవీ విష్ణుమాయే నమోఽస్తు తే .

శంకర-ప్రేమపాత్రత్వం పార్వతి త్వాం నమోఽస్తు తే ..

హరకాయార్ద్ధవాసిత్వం శంకరి త్వాం నమోఽస్తు తే .

భక్తిప్రియే మహాశుభ్రే మాలిని త్వాం నమోఽస్తు తే ..

పంచముద్రే మహాముద్రే భూతపంచకముద్రితే .

మహాముద్రాత్మికే శాంతే రేణుకాయై నమోఽస్తు తే ..

సద్భావబీజముత్పన్నం భావేన తవ సంస్థితం .

స్వాత్మభావాత్మజాత్మస్థా రేణుకాయై నమోఽస్తు ..

స్వచ్ఛందవిహరిణీ శక్తిః స్వచ్ఛందేన చ సంస్థితా .

స్వచ్ఛందోన్మత్తమాతంగీ రేణుకాయై నమోఽస్తు తే ..

ప్రమత్తే మదిరానందే మదిరానందవిగ్రహే .

చిద్రుపే పరమానందే రేణుకాయై నమోఽస్తు తే ..

జగద్బీజే జగద్రూపే జగద్భూతే జగన్మయే .

జగన్మాతే జగన్మాతః రేణుకాయై నమోఽస్తు తే ..

వైష్ణవీ విష్ణుమాయా త్వం మోహితం సచరాచరం .

వాంఛితార్థప్రదాదేవి తాం వందే రేణుకామహం ..

స్వచ్ఛందభైరవీచండే మాతంగీ మత్తరూపిణీ .

యోగినీవృందమధ్యస్థే ఏకవీరే నమోఽస్తు తే ..

బ్రహ్మవైకుంఠరుద్రాద్యా మునీంద్రాః సిద్ధకిన్నరాః .

త్వత్పదం పూజయంతీహ మాతృపీఠే నమోఽస్తు ..

త్వం పరా త్వం చ పశ్యంతీ మధ్యమా త్వం చ వైఖరీ .

ఋగ్యజుః సామాథర్వాణి శబ్దబ్రహ్మాత్మికే నమః ..

యజ్ఞవిద్యా త్రిసంధ్యా త్వం వేదగర్భా సురేశ్వరి .

గంగా గయా చ గాయత్రీ మాతాపురనివాసినీ ..

త్వం స్వాహా త్వం స్వధా చైవ పంచయజ్ఞమహామఖే .

యస్య జాతి ద్విజేంద్రాణాం మాతృలింగమహేశ్వరి ..

త్వం చ కాలీ మహాకాలీ మహాలక్ష్మీ సరస్వతీ .

త్రిపురా త్వరితా త్వం చ రేణుకాయై నమోఽస్తు తే ..

కపాలినీ కాలికాత్వం భైరవీ త్వం చాంబికా .

మాహేంద్రీ త్వం విశాలాక్షీ రేణుకాయై నమోఽస్తు తే ..

క్షేత్రజా పీఠజా త్వం చ మంత్రజా త్వం కలాంబికే .

ప్రసన్నా ప్రకటా త్వం చ సహజా త్వం చ రేణుకే ..

వామే జ్యేష్ఠే చ రౌద్రే చ మాలినీ మంత్రయోగినీ .

వేద సిద్ధాంతయానిత్యం తాం వందే రేణుకామహం ..

సురజ్యేష్ఠే సురానందే సర్వదేవమయీ శివే .

సచ్చిదానందచిద్రూపే విశ్వేశ్వరి నమోఽస్తు తే ..

పీఠక్షేత్రే శ్మశానే చ క్రీడతే వృందభైరవీ .

చత్వారి యోగినీ వృందే రేణుకాయై నమోఽస్తు తే ..

చతుఃషష్ఠిస్తు యోగిన్యాః సిద్ధసంఘట్టమేలకే .

మాతృమండలమధ్యస్థే రేణుకాయై నమోఽస్తు తే ..

మంత్రయంత్రకులాద్యే తు కులకౌలేశ్వరి శివే .

జ్ఞానానందసురాపూర్ణే రేణుకాయై నమోఽస్తు తే ..

చతురష్టకపీఠా త్వం మాయా సా చండికా మతా .

బిందు-నాద-కలా-జ్యోతిః శివశక్తిః సుశాంభవీ ..

పంచబీజసమాయుక్తా పంచప్రణవసంభవా .

ఉకారవిగ్రహా శక్తిః సమయా చంచలాంబికా ..

కౌలాన్వయసముద్భూతే కౌలికాన్వయపూజితే .

భారతీ చైకవీరా త్వం కులకౌలాంతరాలినీ ..

రాజరాజేశ్వరీ త్వం చ సింహే చండేశ్వరీ మతే .

స్వచ్ఛందా శ్రీభవా ప్రోక్తా సా శక్తిర్మాతృమండలే ..

ఆది సూత్రక్రమైర్యుక్తం మధ్యసూత్రం తథైవ చ .

సంవర్త్తమండలాంతస్థే వీరమాత్రే నమోఽస్తు తే ..

కులావలిమథా వృక్షా అంబా శ్రీనాథపాదుకా .

అకృష్టకేతకి త్వం చ కుబ్జే చండి నమోఽస్తు తే ..

దూతీ బటుకకౌమార్యా భైరవీ క్షేత్రపాలకా .

సిద్ధసంఘట్టయోగిన్యాం క్రీడతే మాతృమండలే ..

యోగినీ పీఠమధ్యస్థం మహాపీఠం సశాంభవం .

ఏకవీరాక్షరం బ్రహ్మ సూరసిద్ధాలయం పరం ..

హంసపర్యంకమారూఢం త్రికోణం బీజపూరకం .

ఏకవీరామిదం బీజం వాగ్భవం పరమేశ్వరం ..

త్రిబీజం బాణసంయుక్తం త్రిశట్కోష్ఠదలే స్థితం .

తన్మధ్యే శాంభవీ బీజమేకవీరం చిదాత్మకం ..

త్రికోణాన్యేకబీజంచ మాయాబీజేన వేష్టితం .

ఆనంద కందకల్లోలం హసంతం మాతృమండలం ..

బ్రహ్మా విష్ణుర్మహాదేవ ఇంద్రాద్యాశ్చైవ దేవతా .

యద్బీజం మాతృపీఠస్థం శాంభవం తం నమామ్యహం ..

అకారస్యాష్టమం బీజం శివశక్తిసమన్వితం .

తన్మధ్యే వస్తునిష్క్రాంతం ఏకవీరం సశాంభవం ..

హృదిమధ్యే స్థితం పద్మం హృది పద్మం సకర్ణకం .

తన్మధ్యే వస్తునిష్క్రాంతమేకవీరం సశంభవం ..

సర్వనారీశుభత్వంచ కూటస్థం బీజమవ్యయం .

హకరార్ధకులధరమేకవీరే నమోఽస్తు తే ..

నిత్యక్లిన్నే మదద్రావే ప్రాణజీవాత్మసంజ్ఞకే .

హృల్లేఖే సచ్చిదానందే విశ్వేశ్వరి నమోఽస్తు తే ..

కులపంకజమార్తండే హంసాక్షే ప్రాణధారిణీ .

చైతన్యవిగ్రహే నిత్యే రేణుకాయై నమోఽస్తు తే ..

కదంబగోలకాకారే బ్రహ్మరంధ్రవిలంబినీ .

సూక్ష్మసూక్ష్మాంతరే నిత్యే రేణుకాయై నమోఽస్తు తే ..

కేందుః స్రవలిత శక్తిః షట్చక్రక్రమభేదినీ .

బ్రహ్మరంధ్రే వినిష్క్రాంతే రేణుకా వ్యోమమండలే ..

లింగత్రయాంతే నిష్క్రాంతే శూన్యే నాదవినిగ్రహే .

నిరాలంబే నిరాభాసే రేణుకాయై నమోఽస్తు తే ..

నాభిమూలేషు యా శక్తిః కుండిల్యాః సర్పరూపిణీ .

షట్చక్రవిందునాదాంతే రేణుకా వ్యోమమండలే ..

ఇడా పింగలమధ్యస్థే బ్రహ్మమార్గప్రవాహినీ .

మృణాలతంతురూపేణ హిమాంశు నిత్యం చిదాంబికే ..

ద్వాసప్తతి-సహస్రాణి నాడీ వృందాని చాలయేత్ .

సోమ-సూర్యాగ్నిభిన్నేఽసి చిద్రూపే పరమామృతే ..

శశికోటి సమాభాసే అవసీః బ్రహ్మమండలే .

అచలే సర్వభూతస్థే రామమాత్రే నమోఽస్తు తే ..

అంతఃకరణసంబంధి నాడీయంత్రప్రవాహినీ .

ప్రణవాత్మక హః సమ్యక్ హృత్ప్రష్ఠే ప్రతితిష్ఠతి ..

ఆధారే నాభి మధ్యస్థే హృత్పద్మ-కంఠ-తాలుకే .

ప్రాణస్యాంతర్గతే సూక్ష్మే షోడశ చైవ రేణుకే ..

స్థానత్రయవినిష్క్రాంతే మాత్రాత్రయవినిష్ఠితే .

మాతృకేత్యేకవీరే చ వ్యోమాతీతే పరాత్పరే ..

పీఠస్థే పీఠమధ్యస్థే మాయాతీత-పరాత్పరే .

హంకారార్ధకలాపూర్ణే రేణుకాయై నమోఽస్తు తే ..

త్వయా వినైకభేదేన వ్యాపితం సచరాచరం .

ఇచ్ఛా-జ్ఞాన-క్రియా-శక్తి రేణుకాయై నమోఽస్తు తే ..

గిరిమధ్యే తథారణ్యే మేరుమధ్యే హిమాచలే .

నందా కాత్యాయనీ దుర్గే రేణుకాయై నమోఽస్తు తే ..

స్వర్గపాతాలమర్త్యేషు విచరంతీ త్వనేకధా .

ప్రచండయోగినీ చండే ఏకవీరే నమోఽస్తు తే ..

తేజోమండలదుర్ధర్షే సూర్యకోటి-సమప్రభే .

దుర్నిరీక్ష్యే దురాధారే ఏకవీరే నమోఽస్తు తే ..

ఐం బీజం వ్యాపితం యేన వజ్రేయం సచరాచరం .

త్రైలోక్యం క్షోభయంతీం త్వా మాయాబీజేన రేణుకాం ..

త్వమేవ పరమం జాప్యం త్వమేవ పరమం తపః .

త్వమేవ పరమం జ్ఞానం రేణుకాయై నమోఽస్తు తే ..

త్వం మాతా త్వం పితా భ్రాతా త్వం సఖా త్వం గురుప్రభుః .

త్వమేవ జగతాం ధాత్రీ త్రాహి మాం భక్తవత్సలే ..

అధర్మః కురు తే ధర్మ ధనవాన్ ధనమీశ్వరి .

అజాతిః కురు తే జాతిస్త్వయాజ్ఞా పరమేశ్వరి ..

అపవిత్రం పవిత్రేయం కురుషే త్వం సదాంబికే .

త్వమేవ పరమం తీర్థం త్రైమూర్తిస్త్వం జగన్మయే ..

జాతిభ్రష్టా కులభ్రష్టా వ్రతభ్రష్టా చ యే నరాః .

ఏకవీరాప్రసాదేన శుద్ధాస్తే నాత్ర సంశయః ..

ద్విజాతి మ్లేక్ష పర్యంతం పాపం యః కురుతే నరః .

తత్సర్వం దహ్యతే క్షిప్రం రేణుకాదర్శనేన తు ..

వర్ణావర్ణో న తస్యాస్తి త్వన్మార్గే యే యథేరితం .

తీర్థం భూతాసి మాతంగీ రేణుకాయై నమోఽస్తు తే ..

విరజే రజనీమూర్తే నిర్ధూతే ధూతకల్మషే .

త్రైలోక్య పావని పుణ్యే ఏకవీరే నమోఽస్తు తే ..

సమనో ఘ్రాణాంఘ్రి పాణిశ్చ దద్రుస్ఫోటకమేవ చ .

దారిద్ర్య-దుఃఖ-రోగఘ్నీం తాం వందే రేణుకామహం ..

కల్పద్రుమ-సమాఖ్యాతా చింతామణి-విభూషితా .

రేజనాః కిం పశ్యంతి రేణుకాం కామధేనుకాం ..

ధర్మార్థకామమోక్షాణాం పురుషాణాం చతుర్విధాం .

ఏకవీరాప్రసాదేన సిధ్యంతే నాత్ర సంశయః ..

సర్వం తీర్థాభిషేకం తు సర్వయజ్ఞఫలం లభేత .

ఆషాఢే చైవ కార్తిక్యాం రేణుకాదర్శనేన తు ..

పృథివ్యాం యాని తీర్థాని సముద్రా సరితాని చ .

ఏకవీరా పరం నాస్తి సద్యః ప్రత్యయకారకం ..

కార్తిక్యాం కృత్తికాయోగే యః పశ్యంతీహ రేణుకాం .

న తేషాం పునరావృత్తిః కల్పకోటిశతైరపి ..

శ్రీసింహామలకం దేవ దేవదేవేన సేవితం .

ముక్తిగతా సమాసాద్య ద్విసప్తతిచతుర్ముఖాః ..

దేవదేవో తథా రుద్రః సంభేదో భాస్కరాలయం .

తోయం మేరుస్తడాగస్య సద్యః పాపహరాణి షట్ ..

కురుక్షేత్రే సకృత్తీర్థే రాహుగ్రస్తే దివాకరే .

ప్రయాగం చ సదాతీర్థం గయా గంగా చ రేణుకా ..

ఆధారభూతనిలయో లలనారూపధారిణీ .

క్షుధా తృషా చ దుఃఖఘ్నీం తాం వందే రేణుకామహం ..

యే పశ్చిమాస్తు యే సిద్ధా పూర్వాయై యే చ సంస్థితాః .

ఏకవీరా పరం బీజం శాశ్వతం పదమవ్యయం ..

మాయాబీజేన యా ప్రోక్తా హంకారార్ద్ధకలాస్మృతా .

సా యోనిః సర్వమంత్రాణాం సా శక్తిః రేణుకా స్మృతా ..

కిం తస్య బహుభిర్మంత్రైర్వేదసిద్ధాంతవిస్తరైః ..

ఏకవీరామహామంత్రం సర్వ-కామ-ఫలప్రదం ..

మూలమంత్రమిదం ప్రోక్తం హంసభేదేన సంస్థితం .

స సాక్షాద్ భైరవే ప్రోక్తమేకవీరం పరాత్పరం ..

శివశక్తిమిదం బీజం రేణుకామిదమవ్యయం .

సర్వమంగలమాంగల్యే పవిత్రం పాపనాశనం ..

య ఇదం పఠతే నిత్యం త్రిసంధ్యం శ్రద్ధయాన్వితం .

ఆయురారోగ్యమైశ్వర్యం పదం నిర్వాణమాప్నుయాత్ ..

అచలాం శ్రియామాప్నోతి పుత్రదారాది సంపదాం .

భుంజతే విపులాన్భోగాన్ త్రైలోక్యం మోహయేద్ధ్రువం ..

ఏకవీరా ఇదం బీజం త్రైలోక్యే యః పఠేన్నరః .

ఐశ్వర్యం లభతే రాజ్యం వాగైశ్వర్యం చ జాయతే ..

దుర్వృత్తానామశేషేణ తథా దుఃస్వప్నదర్శనే .

రక్షోభూత-పిశాచేభ్యో గ్రహపీడాం వ్యపోహతి ..

రేణుకాపరమం స్తోత్రం యే జపంతి చ మానవాః .

ప్రాప్నుయాత్పరమాం సిద్ధిమణిమాది గుణాష్టధాం ..

మాతాపురస్థితా దేవీ మాతృపీఠోద్భవా శివా .

మహాదేవేన సంస్తుత్య భుక్తి-ముక్తి-ఫలప్రదాం ..

రేణుకాయా ఇదం స్తోత్రం పఠిష్యతి దినే దినే .

స గచ్ఛేత్ పరమం స్థానం యత్ర దేవో మహేశ్వరః ..

ఇతి శ్రీకౌలార్ణవే శ్రీభైరవప్రోక్తం రేణుకాస్తవరాజస్తోత్రం సంపూర్ణం .

            .. శ్రీ రేణుకార్పణమస్తు ..

రేణుకాష్టక మరాఠీ శ్రీవిష్ణుదాసకృత

శ్రీగణేశాయ నమః .

లక్ష-కోటి-చండకీర్ణ-సుప్రచండ విలపతీ .

అంబ  చంద్రవదనబింబ దీప్తీమాజి లోపతీ .

సింహ-శిఖర-అచలవాసి మూళపీఠ నాయికా .

ధర్మ-అర్థ-కామ-మోక్ష కల్పవృక్ష రేణుకా .. 1..

ఆకర్ణ అరుణవర్ణ నేత్ర శ్రవణీం దివ్య కుండలే .

డోలతాతి పుష్పహార భార ఫార దాటలే .

అష్టదండి బాజుబంది కంకణాది ముద్రికా .

ధర్మ-అర్థ-కామ-మోక్ష కల్పవృక్ష రేణుకా .. 2..

ఇంద్రనీళ-పద్మరాగ-పాచహీర వేగళా .

పాయఘోళ-బోరమాళ-చంద్రహార వేగళా .

పైంజణాది భూషణేచ లోపల్యాతి పాదుకా .

ధర్మ-అర్థ-కామ-మోక్ష కల్పవృక్ష రేణుకా .. 3..

ఇంద్ర-చంద్ర-విష్ణు-బ్రహ్మ-నారదాది వందితీ .

ఆది-అంత ఠావహీన ఆదిశక్తి భగవతీ .

ప్రచండ చండముండ ఖండవిఖండకారి అంబికా .

ధర్మ-అర్థ-కామ-మోక్ష కల్పవృక్ష రేణుకా .. 4..

పర్వతాగ్రవాసి పక్షి అంబ ! అంబ ! బోలతీ .

విశాల శాలవృక్ష రానీం భవాని ధ్యాని డోలతీ .

అవతార కృత్యాసార జడ-ముడాది తారకా .

ధర్మ-అర్థ-కామ-మోక్ష కల్పవృక్ష రేణుకా .. 5..

అనంత బ్రహ్మాండ పోటి పూర్వముఖాం బైసలీ .

అనంతగుణ అనంతశక్తి విశ్వజనని భాసలీ .

సవ్యభాగి దత్త-అత్రి వామభాగి కాలికా .

ధర్మ-అర్థ-కామ-మోక్ష కల్పవృక్ష రేణుకా .. 6..

పవిత్ర మాతృక్షేత్ర ధన్య వాస పుణ్య ఆశ్రమీం .

అంబదర్శనాస భక్త అభక్త యేతి ఆశ్రమీం .

మ్హణూని విష్ణుదాస నిజలాభ పావలా ఫుకా ..

ధర్మ-అర్థ-కామ-మోక్ష కల్పవృక్ష రేణుకా .. 7..

             .. శ్రీరేణుకార్పణమస్తు ..