Sacred Stotras & Deities

గౌర్యష్టోత్తరశతనామస్తోత్రం

దత్తాత్రేయేణ గౌర్యష్టోత్తరశతనామస్తోత్రోపదేశవర్ణనం .

అథ గౌర్యష్టోత్తరశతనామస్తోత్రం .

ఇతి శ్రుత్వా కథాం పుణ్యాం గౌరీవీర్యవిచిత్రితాం .

అపృచ్ఛద్భార్గవో భూయో దత్తాత్రేయం మహామునిం .. 1..

భగవన్నద్భుతతమం గౌర్యా వీర్యముదాహృతం .

శృణ్వతో న హి మే తృప్తిః కథాం తే ముఖనిఃసృతాం .. 2..

గౌర్యా నామాష్టశతకం యచ్ఛచ్యై ధిషణో జగౌ .

తన్మే కథయ యచ్ఛ్రోతుం మనో మేఽత్యంతముత్సుకం .. 3..

భార్గవేణేత్థమాపృష్టో యోగిరాడత్రినందనః .

అష్టోత్తరశతం నామ్నాం ప్రాహ గౌర్యా దయానిధిః .. 4..

జామదగ్న్య శృణు స్తోత్రం గౌరీనామభిరంకితం .

మనోహరం వాంఛితదం మహాఽఽపద్వినివారణం .. 5..

స్తోత్రస్యాఽస్య ఋషిః ప్రోక్త అంగిరాశ్ఛంద ఈరితః .

అనుష్టుప్ దేవతా గౌరీ ఆపన్నాశాయ యో జపేత్ .. 6..

హ్రాం హ్రీం ఇత్యాది విన్యస్య ధ్యాత్వా స్తోత్రముదీరయేత్ ..

    .. ధ్యానం ..

సింహసంస్థాం మేచకాభాం కౌసుంభాంశుకశోభితాం .. 7..

ఖడ్గం ఖేటం త్రిశూలంచ ముద్గరం బిభ్రతీం కరైః .

చంద్రచూడాం త్రినయనాం ధ్యాయేత్గౌరీమభీష్టదాం .. 8..

    .. స్తోత్రం ..

ఓం గౌరీ గోజననీ విద్యా శివా దేవీ మహేశ్వరీ .

నారాయణాఽనుజా నమ్రభూషణా నుతవైభవా .. 9..

త్రినేత్రా త్రిశిఖా శంభుసంశ్రయా శశిభూషణా .

శూలహస్తా శ్రుతధరా శుభదా శుభరూపిణీ .. 10..

ఉమా భగవతీ రాత్రిః సోమసూర్యాఽగ్నిలోచనా .

సోమసూర్యాత్మతాటంకా సోమసూర్యకుచద్వయీ .. 11..

అంబా అంబికా అంబుజధరా అంబురూపాఽఽప్యాయినీ స్థిరా .

శివప్రియా శివాంకస్థా శోభనా శుంభనాశినీ .. 12..

ఖడ్గహస్తా ఖగా ఖేటధరా ఖాఽచ్ఛనిభాకృతిః .

కౌసుంభచేలా కౌసుంభప్రియా కుందనిభద్విజా .. 13..

కాలీ కపాలినీ క్రూరా కరవాలకరా క్రియా .

కామ్యా కుమారీ కుటిలా కుమారాంబా కులేశ్వరీ .. 14..

మృడానీ మృగశావాక్షీ మృదుదేహా మృగప్రియా .

మృకండుపూజితా మాధ్వీప్రియా మాతృగణేడితా .. 15..

మాతృకా మాధవీ మాద్యన్మానసా మదిరేక్షణా .

మోదరూపా మోదకరీ మునిధ్యేయా మనోన్మనీ .. 16..

పర్వతస్థా పర్వపూజ్యా పరమా పరమార్థదా .

పరాత్పరా పరామర్శమయీ పరిణతాఖిలా .. 17..

పాశిసేవ్యా పశుపతిప్రియా పశువృషస్తుతా .

పశ్యంతీ పరచిద్రూపా పరీవాదహరా పరా .. 18..

సర్వజ్ఞా సర్వరూపా సా సంపత్తిః సంపదున్నతా .

ఆపన్నివారిణీ భక్తసులభా కరుణామయీ .. 19..

కలావతీ కలామూలా కలాకలితవిగ్రహా .

గణసేవ్యా గణేశానా గతిర్గమనవర్జితా .. 20..

ఈశ్వరీశానదయితా శక్తిః శమితపాతకా .

పీఠగా పీఠికారూపా పృషత్పూజ్యా ప్రభామయీ .. 21..

మహమాయా మతంగేష్టా లోకాలోకా శివాంగనా ..

    .. ఫలశ్రుతిః ..

ఏతత్తేఽభిహితం రామ ! స్తోత్రమత్యంతదుర్లభం .. 22..

గౌర్యష్టోత్తరశతనామభిః సుమనోహరం .

ఆపదంభోధితరణే సుదృఢప్లవరూపకం .. 23..

ఏతత్ ప్రపఠతాం నిత్యమాపదో యాంతి దూరతః .

గౌరీప్రసాదజననమాత్మజ్ఞానప్రదం నృణాం .. 24..

భక్త్యా ప్రపఠతాం పుంసాం సిధ్యత్యఖిలమీహితం .

అంతే కైవల్యమాప్నోతి సత్యం తే భార్గవేరితం .. 25..

రేణుకాకవచం భైరవరుద్రయామాలే

శ్రీ దేవ్యువాచ .

జమదగ్నిప్రియాం దేవీం రేణుకామేకమాతరం

సర్వారంభే ప్రసీద త్వం నమామి కులదేవతాం .

అశక్తానాం ప్రకారో వై కథ్యతాం మమ శంకర

పురశ్చరణకాలేషు కా వా కార్యా క్రియాపరా ..

శ్రీ శంకర ఉవాచ .

వినా జపం వినా దానం వినా హోమం మహేశ్వరి .

రేణుకా మంత్రసిద్ధిస్యాన్నిత్యం కవచపాఠతః ..

త్రైలోక్యవిజయం నామ కవచం పరమాద్భుతం .

సర్వసిద్ధికరం లోకే సర్వరాజవశంకరం ..

డాకినీ-భూతవేతాల-బ్రహ్మరాక్షస-నాశనం .

పురా దేవాసురే యుధ్దే మాహిషే లోకే విగ్రహే ..

బ్రహ్మణా నిర్మితా రక్షా సాధకానాం సుఖాయ చ .

మంత్రవీర్యం సమోపేతం భూతాపస్మార-నాశనం ..

దేవైర్దేవస్య విజయే సిద్ధేః ఖేచర-సిధ్దయే .

దివా రాత్రమధీతం స్యాత్ రేణుకా కవచం ప్రియే ..

వనే రాజగృహే యుద్ధే బ్రహ్మరాక్షససంకులే .

బంధనే గమనే చైవ కర్మణి రాజసంకటే ..

కవచస్మరణాదేవ సర్వం కల్యాణమశ్నుతే .

రేణుకాయాః మహాదేవ్యాః కవచం శృణు పార్వతి ..

యస్య స్మరణమాత్రేణ ధర్మకామార్థభాజనం .

రేణుకా-కవచస్యాస్య ఋషిర్బ్రహ్మా విధీయతే ..

ఛందశ్చిత్రాహ్వయం ప్రోక్తం దేవతా రేణుకా స్మృతా .

పృథ్వీ బీజం రమా శక్తిః పురుషార్థ-చతుష్టయం ..

వినియోగో మహేశాని తదాకాలే ప్రకీర్త్తితః ( ప్రకీర్తితః ).

ధ్యాత్వా దేవీం మహామాయాం జగన్మాతరమంబికాం ..

పూర్ణకుంభసమాయుక్తాం ముక్తాహారవిరాజితాం .

స్వర్ణాలంకారసంయుక్తాం స్వర్ణసింహాసనస్థితాం ..

మస్తకే గురుపాదాబ్జం ప్రణమ్య కవచం పఠేత్ .

ఇంద్రో మాం రక్షతు ప్రాచ్యాం వహ్నౌ వహ్నిః సురేశ్వరి ..

యామ్యాం యమః సదా పాతు నైరృత్యాం నిరృతిస్తథా .

పశ్చిమే వరుణః పాతు వాయవ్యే వాయుదేవతా ..

ధనశ్చోత్తరే పాతు ఈశాన్యామీశ్వరో విభుః .

ఊర్ధ్వం బ్రహ్మా సదా పాతు అనంతోఽధః సదాఽవతు ..

పంచాంతకో మహేంద్రశ్చ వామకర్ణేందుభూషితః .

ప్రణవం పుటితం కృత్వా తత్కృత్వా ప్రణవం పునః ..

సముచ్చార్య తతో దేవీకవచం ప్రపఠే తథా .

బ్రహ్మాణీ మే శిరః పాతు నేత్రే పాతు మహేశ్వరీ ..

వైష్ణవీ నాసికాయుగ్మం కర్ణయోః కర్ణవాసినీ .

కంఠం మాతు మహాలక్ష్మీర్హృదయం చండభైరవీ ..

బాహూ మే బగలా పాతు కరౌ మహిషమర్దినీ .

కరాంగులిషు కేశేషు నాభిం మే చర్చికాఽవతు ..

గుహ్యం గుహ్యేశ్వరీ పాతు ఊరూ పాతు మహామతిః .

జానునీ జననీ రామా గుల్ఫయోర్నారసింహికా ..

వసుంధరా సదా పాదౌ పాయాత్పాదాంగులీషు చ .

రోమకూపే మేదమజ్జా రక్త-మాంసాస్థిఖండికే ..

రేణుకా జననీ పాతు మహాపురనివాసినీ  .

రక్షాహీనం తు యత్స్థానం వర్జితం కవచేన తు ..

పూర్వం బీజం సముచ్చార్య సంపుటక్రమయోగతః .

ముద్రాం వధ్వా మహేశాని గోలం న్యాసం సమాచరేత్ ..

అస్య శ్రీరేణుకా-కవచమంత్రస్య బ్రహ్మా ఋషిః అనుష్టుప్ ఛందః రేణుకా దేవతా

లం బీజం రేణుకా ప్రీత్యర్థే గోలన్యాసే వినియోగః .

ఓం రాం అంగుష్ఠాభ్యాం నమః .

ఓం రీం తర్జనీభ్యాం నమః .

ఓం రూం మధ్యమాభ్యాం నమః .

ఓం రైం అనామికాభ్యాం నమః .

ఓం రౌం కనిష్ఠికాభ్యాం నమః .

ఓం రః కరతలకరపృష్ఠాభ్యాం నమః .

ఏవం హృదయాదిన్యాసః .

ఓం పం నమః మూర్ధ్ని .

ఓం ఫం నమః దక్షిణనేత్రే .

ఓం బం నమః వామనేత్రే .

ఓం భం నమః దక్షిణనాసాపుటే .

ఓం మం నమః వామనాసాపుటే .

ఓం యం నమః దక్షిణకర్ణే .

ఓం రం నమః వామకర్ణే .

ఓం లం నమః ముఖే .

ఓం వం నమః గుదే .

బ్రహ్మాణీ బ్రహ్మభాగే చ శిరో ధరణి ధారిణీ .

రక్ష రక్ష మహేశాని సదా మాం పాహి పార్వతీ ..

భైరవీ త్రిపురా బాలా వజ్రా మే తారిణీ పఱా .

రక్ష రక్ష మహేశాని సదా మాం పాహి పార్వతీ ..

ఏషా మేఽఙ్గం సదా పాతు పార్వతీ హరవల్లభా .

మహిషాసురసంహర్త్రీ విధాతృవరదాయినీ ..

మస్తకే పాతు మే నిత్యం మహాకాలీ ప్రసీదతు .

ఆకాశే తాడకా పాతు పాతాలే వహ్నివాసినీ ..

వామదక్షిణయోశ్చాపి కాలికా చ కరాలికా .

ధనుర్బాణధరా చైవ ఖడ్గ-ఖట్వాంగ-ధారిణీ ..

సర్వాంగం మే సదా పాతు రేణుకా వరదాయినీ .

రాం రాం రాం రేణుకే మాతర్భార్గవోద్ధారకారిణీ ..

రాజరాజకులోద్భూతే సంగ్రామే శత్రుసంకటే .

జలాప్నావ్యే వ్యాఘ్రభయే తథా రాజభయేఽపి చ .

శ్మశానే సంకటే ఘోరే పాహి మాం పరమేశ్వరి ..

రూపం దేహి యశో దేహి ద్విషతాం నాశమేవ చ .

ప్రసాదః స్యాచ్ఛుభో మాతర్వరదా రేణుకే భవ ..

ఐం మహేశి మహేశ్వరి చండిమే

       భుజంగధారిణి శంఖకపాలికే .

కనక-కుండల-మండల-భాజనే

       వపురిదంచ పునీహి మహేశ్వరి ..

ఇదం శ్రీకవచం దేవ్యాః రేణుకాయా మహేశ్వరి .

త్రికాలం యః పఠేన్నిత్యం తస్య సిద్ధిః ప్రజాయతే ..

గ్రహణేఽర్కస్య చంద్రస్య శుచిః పూర్వముపోషితః .

శతత్రయావృత్తిపాఠాద్మంత్రసిద్ధిః ప్రజాయతే ..

నదీసంగమమాసాద్య నాభిమాత్రోదకస్థితః .

రవిమండలముద్వీక్ష్య జలే తత్ర స్థితాం శివాం ..

విచింత్య మండలే దేవీ కార్యే సిద్ధిర్భవేద్ధ్రువం .

ఘటం తవ ప్రతిష్ఠాప్య విభూతిస్తత్ర వేశయేత్ .

దీపం సర్షపతైలేన కవచం త్రిః పఠేత్తదా ..

భూతప్రేత-పిశాచాశ్చ డాకిన్యో యాతుధానికా .

సర్వ తే నాశమాయాంతి కవచస్మరణాత్ప్రియే ..

ధనం ధాన్యం యశో మేధాం యత్కించిన్మనసేప్సితం .

కవచస్మరణాదేవ సర్వమాప్నోతి నిత్యశః ..

ఇతి శ్రీ మాతృసంస్థానే భైరవరుద్రయామలే రేణుకాకల్పే

పంచమం పటలం సంపూర్ణం ..

రేణుకాకవచం డామరేశ్వరతంత్రే షష్ఠితమోఽధ్యాయః

  .. శ్రీ గణేశాయ నమః ..

శృణు దేవి ప్రవక్ష్యామి రేణుకాకవచం పరం .

యేన విజ్ఞానమాత్రేణ సాన్నిధ్యం రేణుకా భవేత్ ..

రేణుకాకవచస్యాస్య భార్గవస్తు ఋషిః స్మృతః .

ఛందోఽనుష్టుప్ తథా దేవీ రేణుకా దేవతా మమ ..

ఇష్ట-కామ్యార్థ-సిద్ధ్యర్థే వినియోగో వరాననే .

రేణుకా మే శిరః పాతు పరా శక్తిస్వరూపిణీ ..

భాలం రక్షతు భువనేశీ లోచనం మే త్రిలోచనీ .

ముఖం మే రేణుకా పాతు నాసికాం కాలనాశినీ ..

భ్రువౌ సుభ్రూలతా పాతు దంతాన్మే కుందదంతికా .

ఓష్ఠం బింబోష్ఠికా పాతు జింహ్వాం పాతు సురేశ్వరీ ..

గ్రీవాం రక్షతు ఇంద్రాణీ కుక్షౌ రక్షేత్కులేశ్వరీ .

గండం మే పాతు చాముండా మహాలక్ష్మీస్తు కంధరం ..

అసౌ హంసప్రియా పాతు బాహూ సాయుధవాహుకా .

వాణీం వక్షస్థలం పాతు హృదయం హృదయేశ్వరీ ..

జఘనే ఘనవాహా మే గుహ్యం గుహ్యేశ్వరీ మమ .

ఊరూ వరోరుకా పాతు శ్రీదేవీ సిద్ధిదేవతా ..

సర్వాంగం సర్వదా పాతు సర్వాణీ రూపిణీ వరా .

ఇతి శ్రీరేణుకా వర్మ దుష్కర్మ త్రాసనం సదా ..

స్తుతిమాత్రేణ  భక్తానాం సంరక్షణవిచక్షణం .

జప్త్వా తు కవచం దేవ్యాః యత్ర తత్ర తు గచ్ఛతి ..

తత్ర తత్ర జయో లాభః కార్యసిద్ధిశ్చ జాయతే .

.. ఇతి శ్రీ డామరేశ్వరతంత్రే రేణుకాకవచం నామ షష్ఠితమోఽధ్యాయః ..

రేణుకాకవచం 3 డామరేశ్వరతంత్రే ఈశ్వరపార్వతీసంవాదే

  .. శ్రీ గణేశాయ నమః ..

          శ్రీ దేవ్యువాచ

భగవన్ బ్రూహి కవచం భుక్తి-ముక్తి-ప్రదాయకం .

త్రైలోక్యమోహనం నామ కృపయా మే జగద్గురో ..

            ఈశ్వర ఉవాచ

శృణు దేవి వరారోహే కవచం బ్రహ్మరూపిణి .

బ్రహ్మేశ-ప్రముఖాధీశ-నారాయణ-ముఖాచ్యుతం ..

కవచం రేణుకాదేవ్యాః యః పఠేత్ప్రయతో నరః .

తచ్ఛ్రుత్వా పఠనాద్బ్రహ్మా సృష్టికర్తాఽభవత్ప్రభుః ..

కృష్ణో దూర్వాదలశ్యామో దేవకీ గర్భసంభవః .

హ్యత్పద్మే రేణుకాం ధ్యాత్వా ఋద్ధి-సిద్ధి-ఫలప్రదాం ..

సర్వాః శ్యామా భవంత్యేతాః జనార్దన-విభూతయః .

ఏవం దేవగణాః సర్వే సర్వైశ్వర్యమవాప్నుయుః ..

శిష్యాయ గురుభక్తాయ సాధకాయ ప్రకాశయేత్ .

యో దదాత్యన్యశిష్యాయ శఠాయ పశురూపిణే ..

పంచత్వం జాయతే తస్య హ్యథవా వాతులో భవేత్ .

కవచస్యాస్య సుభగే యోగీ రుద్ర ఋషిః స్వయం ..

విరాట్ ఛందో నిగదితం దేవతా రేణుకా పరా .

ధర్మార్థకామమోక్షేషు వినియోగ ఉదాహృతః ..

క్లీం క్లీం క్లీం మే శిరః పాతు భాలం నేత్రయుగం తథా .

రేణుకా నేత్రయుగలం క్లీం క్లీం నాసాపుటద్వయం ..

రామమాతా చ మే పాతు సజిహ్వాం ముఖమేవ చ .

భుజయుగ్మం తథా పాతు క్లీం క్లీం మే త్ర్యక్షరాత్మికా ..

కంఠం చ చిబుకం చైవ రక్షేన్మే జగదంబికా .

స్వాహాఽవతు బ్రహ్మరంధ్రం మహాపురనివాసినీ ..

క్లీం క్లీం మే రేణుకా పశ్చాత్ రక్షేన్మే పాదమేవ చ .

క్లీం క్లీం మే హృదయం పాతు క్లీం క్లీం మే పార్శ్వమేవ చ ..

క్లీం క్లీం మే నాభికమలం క్లీం క్లీం మే పృష్ఠమేవ చ .

క్లీం క్లీం మే ద్విఫడంతే చ స్వాహేతి పరికీర్తితా ..

ఏకాక్షరీ మహావిద్యా సర్వాంగం మే సదాఽవతు .

ప్రాచ్యాం రక్షతు మాం దేవి ఆగ్నేయాం మాతృకా తథా ..

రేణుకా దక్షిణే రక్షేద్రామమాతా చ నైరృత్యే .

విరోధినీ ప్రతీచ్యాం మే వాయవ్యాం జగద్మ్బికా ..

ఉగ్రా రక్షేదుదీచ్యాం చ ఈశాన్యాం మాం ప్రభావతీ .

దీప్తా రక్షేత్త్వధోభాగే నీలా చైవోర్ధ్వదేశికే ..

పుత్రమిత్రకలత్రాదీన్ దేవీ రక్షతు సర్వదా .

ఇతి తే కథితం దేవి సర్వమన్మౌఘవిగ్రహం ..

త్రైలోక్యమోహనం నామ కవచం బ్రహ్మరూపిణీ .

బ్రహ్మేశ-ప్రముఖాధీశ-నారాయణ-ముఖాచ్యుతం ..

కవచం రేణుకా దేవ్యాః యః పఠేత్ప్రయతో నరః .

స సర్వసిద్ధమాప్నోతి సత్యమేవ న సంశయః ..

గానే తు తుంబరుః సాక్షాద్దానే వై వాసవో యథా .

దత్తాత్రేయసమో జ్ఞానే గంగేవ మలనాశకః ..

కామదేవసమో రూపే వాయుతుల్యః పరాక్రమే .

స భవేత్సాధకః శ్రేష్ఠః సత్యం సత్యం మయోదితం ..

న హన్యతే గతిస్తస్య వాయోరివ నభస్తలే .

శతమష్టోత్తరం చాస్య పురశ్చర్యావిధిస్మృతః ..

హవనం తద్దశాంశేన కృత్వా తత్సాధయేద్భువం .

యది చేత్ సిద్ధకవచః శివతుల్యో భవేత్స్వయం ..

పఠనాద్ధారణాత్సర్వా పృథ్వీ కాశీపురీసమా .

యత్ర కుత్ర విపన్నోఽపి వారాణస్యాం మృతో భవేత్ ..

న మంత్రో నౌషధం తస్య నాకాలమరణం తథా .

భవత్యేవ మహేశాని కవచే హృది సంస్థితే ..

అశ్వమేధసహస్రాణి వా జపేయ శతాని చ .

మహాదానాని యాన్యేవ ప్రాదక్షిణ్యం భువస్తథా ..

కలాం నార్హంతి తాన్యేవ సకృదుచ్చారణాదతః .

పుష్పాంజలిం రేణుకాయై మూలేనైవ సదాఽర్పయేత్ ..

శతవర్షసహస్రాయాః పూజాయాః ఫలమాప్నుయాత్ .

లిఖిత్వా భూర్జపత్రే తు వధ్నీయాత్సర్వకార్యకే ..

ఇదం కవచమజ్ఞాత్వా యో జపేద్రేణుకాం శివాం .

శతలక్షం ప్రజప్త్వాఽపి న మంత్రః సిద్ధిదాయకః ..

ఇతి శ్రీడామరేశ్వరతంత్రే ఈశ్వరపార్వతీసంవాదే రేణుకాకవచం సమాప్తం ..

రేణుకా గీతం

శ్రీ గణేశాయ నమః .

సుర శిరశ్చరచ్చరణ రేణుకా . జగదధీశ్వరీ జయతి రేణుకా ..

దేవతా శిరో దేశ లాలితం . రేణుకా పాదం దిశతు మే ముదం ..

కుండలీపురీ మండనం మహః . కిమపి భాసతాం మమ సదా హృది ..

మస్తకైతవం వస్తు శాశ్వతం . అస్తి మే సదా శస్తదం హృది ..

ఆదినారి తే పాదపంకజం . స్ఫురతు మే మనః సరసిజే సదా ..

కేవలం పదో సేవకోఽస్మి తే . వేద్మి నేతరద్వేద సన్నుతే ..

హృదయ తేణునః సముచితోఽణునా . పరిచయోఽమ్బికా పాదరేణునా ..

పాహి ముంచ వా పాదపంకజం . త్రిదశ సన్నుతే న త్యజామి తే ..

చరణమంబ తే యో నిషేవతే . పునరయం కుచౌ ధయతి కిం కృతీ ! ..

అహరహోఽమ్బ తే రహసి చింతయా . ధన్యతాం గతో నాన్యదర్థయే ..

స్మరజితో యథా శిరసి జాహ్నవీ . జనని రేణుకే మనసి తే కృపా ..

అంబ పాహి మాం దంబ తాపసి . పాదపంకజయోః ఆదికింకరం ..

పుత్రమాత్మనః పుణ్యకీర్తనే . బహుకృపే కుతో మాముపేక్షసే ..

అంబ సంస్తుతే జంభ వైరిణా .

పాహి మామిమం మగ్నమాపది . తత్త్వవాదినాః సత్త్వశాలినీ ..

త్వామజే విందుః సత్స్వరూపిణీం . త్వాం ప్రచక్షతే సదయవీక్షితే ..

వేది వేదినో మోదరూపిణీం . సంవిదం విదుస్త్వామిదం ప్రభుం ..

పరమయోగినః పరమదేవతే .

జనని కుండలీపుర నివాసిని . పరశురామవత్పశ్య మామిమం ..

తనయరోదనం శ్రవణశాలిని . శృణుసురార్చితే యది దయా హృది ..

యాచకః సుతో భజనమీప్సితం . తదపిదుర్లభం కిమిదమంబికే ..

మాస్తు వేతనం ఛిన్నమస్తకే . భజనమేవ తే యాచ్యతే మయా ..

తరలతారయా జ్వలనదీర్ఘయా . సానుకంపయా శీతపాతయా ..

కేవలం దృశాం పశ్య రేణుకే . తేన మే శుభం న చ తవాశుభం ..

కింకరీభవత్సురవిలాసినీ . జయతి కుండలీ నగరవాసినీ ..

మధురమంబ తే చరణపంకజం . తత్ర యద్రతైస్త్యజ్యతేఽఖిలం ..

చరణమంబ తే చరతు మే హృది . ఇయమనామయే ప్రార్థనా మమ ..

భుజగకంకణప్రభూతి సంస్తుతే . భుజభువామరేర్జనని పాహిమాం ..

కుండలీపురీ మండనాయితా . గణపతిస్తుతా జయతి రేణుకా ..

ఇతి శ్రీ వసిష్ఠ గణపతిముని ప్రోక్తం రేణుకా గీతం సంపూర్ణం ..

శ్రీమూకాంబికా దివ్యసహస్రనామస్తోత్రం

పురా కైలాసశిఖరే మార్కండేయో మహామునిః .

పప్రచ్ఛ గిరిజానాథం సిద్ధగంధర్వసేవితం .. 1..

సహస్రార్కప్రతీకాశం త్రినేత్రం చంద్రశేఖరం .

భగవత్యా కృతం కర్మ దానవానాం రణే కథం .. 2..

శ్రీ శివ ఉవాచ .

శృణు వత్స ప్రవక్ష్యామి యన్మాం త్వం పరిపృచ్ఛసి .

త్రిగుణా శ్రీర్మహాలక్ష్మీః యోఽసౌభాగ్యవతీ పరా .. 3..

యోగనిద్రానిమగ్నస్య విష్ణోరమితతేజసః .

పిన్ఽజూషతత్సముద్భూతౌ విఖ్యాతౌ మధుకైటభౌ .. 4..

తయోః విష్ణోరభూద్భూయో యుద్ధం సార్వభయంకరం .

చక్రిణా నిహతావేతౌ మహామాయావిమోహితౌ .. 5..

అథ దేవశరీరేభ్యః ప్రాదుర్భూతా మహేశ్వరీ .

మహిషం సా మహావీర్యం అవధీన్నామరూపకం .. 6..

తతో దైత్యార్దితైః దేవైః పురుహూతాదిభిః స్తుతా .

సైషా భగవతీ దైత్యం ధూమ్రలోచనసంజ్ఞితం .. 7..

చండముండౌ మహావీర్యౌ రక్తబీజం భయంకరం .

నిహత్య దేవీ దైత్యేంద్రం నిశుంభమురువిక్రమం .. 8..

శుంభాసురం మహావీర్యం దేవతామృత్యురూపిణం .

యుధ్యమానం ససైన్యం తం అవధీదంబికా పునః .. 9..

దేవాశ్చ ఋషయః సిద్ధాః గంధర్వాశ్చ ముదా తదా .

తుష్టువుః భక్తినమ్రాత్మమూర్తయః పరమేశ్వరీం .. 10..

సూత ఉవాచ .

ఏతత్చ్ఛ్రుత్వా శివోక్తం తత్ మార్కండేయో మహామునిః .

పద్మైర్నామ్నాం సహస్రేణ పూజయామాస తాం శివాం .. 11..

ఓం అస్యశ్రీ మూకాంబికాయాః

వరదివ్యసహస్రనామస్తోత్రమాలామహామంత్రస్య

మార్కండేయ భగవాన్ ఋషిః - గాయత్రీ ఛందః -

త్రిమూర్త్యైక్యస్వరూపిణీ మహాకాలీ-మహాలక్ష్మీ-మహాసరస్వతీ

త్రిగుణాత్మికా శ్రీ మూకాంబికా దేవతా -

హ్రాం బీజం - హ్రీం శక్తిః - హ్రూం కీలకం -

శ్రీ మూకాంబికా వరప్రసాదసిద్ధ్యర్థే జపే వినియోగః ..

(హ్రాం ఇత్యాది వా మూకాంబికాయాః గౌరీ పంచదశాక్షర్యాఖ్యా

బాలకుమారికా విద్యయా వా న్యాసమాచరేత్)

ధ్యానం -

శైలాధిరాజతనయాం శరదిందుకోటి-

      భాస్వన్ ముఖాంబుజకిరీటయుతాం త్రినేత్రాం .

శంఖార్యభీతివరవర్యకరాం మనోజ్ఞాం

      మూకాంబికాం మునిసురాఽభయదాం స్మరామి .. 1..

ప్రమత్త మధుకైటభౌ మహిషదానవం యాఽవధీత్

      సధూమ్రనయనాహ్వయౌ సబలచండముండావపి .

సరక్తదనుజౌ భయంకరనిశుభశుంభాసురౌ అసౌ .

      భగవతీ సదా హృది విభాతు మూకాంబికా .. 2..

ప్రపన్నజనకామదాం ప్రబలమూకదర్పాపహాం

      అనుష్ణసుకలాధరాం అరిదరాభయేష్టాన్వితాం .

తటిద్విసరభాసురాం కుటజశైలమూలాశ్రితాం .

      అశేషవిభుధాత్మికాం అనుభజామి మూకాంబికాం .. 3..

.. లమిత్యాది పంచపూజా ..

శ్రీ మార్కండేయ ఉవాచ .

శ్రీం హ్రీం ఐం ఓం .

ఓం మూకాంబికా మూకమాతా మూకవాగ్భూతిదాయినీ .

మహాలక్ష్మీః మహాదేవీ మహారాజ్యప్రదాయినీ .. 1..

మహోదయా మహారూపా మాన్యా మహితవిక్రమా .

మనువంద్యా మహేష్వాసా మంత్రివర్యా మనస్వినీ .. 2..

మేనకాతనయా మాతా మహితా మాతృపూజితా .

మహతీ మారజననీ మృతసంజీవినీ మతిః .. 3..

మహనీయా మదోల్లాసా మందారకుసుమప్రభా .

మాధవీ మల్లికాపూజ్యా మలయాచలవాసినీ .. 4..

మహాంకభగినీ మూర్తా మహాసారస్వతప్రదా .

మర్త్యలోకాశ్రయా మన్యుః మతిదా మోక్షదాయినీ .. 5..

మహాపూజ్యా మఖఫలప్రదా మఘవదాశ్రయా .

మరీచిమారుతప్రాణాః మనుజ్యేష్ఠా మహౌషధిః .. 6..

మహాకారుణికా ముక్తాభరణా మంగలప్రదా .

మణిమాణిక్యశోభాఢ్యా మదహీనా మదోత్కటా .. 7..

మహాభాగ్యవతీ మందస్మితా మన్మథసేవితా .

మాయావిద్యామయీ మంజుభాషిణీ మదలాలసా .. 8..

మృడాణీ మృత్యుమథినీ మృదుభాషా మృడప్రియా .

మంత్రజ్ఞా మిత్రసంకాశా మునిః మహిషమర్దినీ .. 9..

మహోదయా మహోరస్కా మృగదృష్టిః మహేశ్వరీ .

మృనాలశీతలా మృత్యుః మేరుమందరవాసినీ .. 10..

మేధ్యా మాతంగగమనా మహామారీస్వరూపిణీ .

మేఘశ్యామా మేఘనాదా మీనాక్షీ మదనాకృతిః .. 11..

మనోన్మయీ మహామాయా మహిషాసురమోక్షదా .

మేనకావందితా మేన్యా మునివందితపాదుకా .. 12..

మృత్యువంద్యా మృత్యుదాత్రీ మోహినీ మిథునాకృతిః .

మహారూపా మోహితాంగీ మునిమానససంస్థితా .. 13..

మోహనాకారవదనా ముసలాయుధధారిణీ .

మరీచిమాలా మాణిక్యభూషణా మందగామినీ .. 14..

మహిషీ మారుతగతిః మహాలావణ్యశాలినీ .

మృదంగనాదినీ మైత్రీ మదిరామోదలాలసా .. 15..

మాయామయీ మోహనాశా మునిమానసమందిరా .

మార్తాండకోటికిరణా మిథ్యాజ్ఞాననివారిణీ .. 16..

మృగాంకవదనా మార్గదాయినీ మృగనాభిధృక్ .

మందమారుతసంసేవ్యా మందారతరుమూలగా .. 17..

మందహాసా మదకరీ మధుపానసముద్యతా మధురా .

మాధవనుతా మాధవీ మాధవార్చితా .. 18..

మార్తాండకోటిజననీ మార్తాండగతిదాయినీ .

మృణాలమూర్తిః మాయావీ మహాసామ్రాజ్యదాయినీ .. 19..

కాంతా కాంతముఖీ కాలీ కచనిర్జితభృంగికా .

కంజాక్షీ కంజవదనా కస్తూరీతిలకోజ్జ్వలా .. 20..

కలికాకారవదనా కర్పూరామోదసంయుతా .

కోకిలాలాపసంగీతా కనకాకృతిబింబభృత్ .. 21..

కంబుకంఠీ కంజహారా కలిదోషవినాశినీ .

కంచుకాఢ్యా కంజరూపా కాంచీభూషణరాజితా .. 22..

కంఠీరవజితామధ్యా కాంచీదామవిభూషితా .

కృతకింకిణికాశోభా కాంచనస్రావినీవికా .. 23..

కాంచనోత్తమశోభాఢ్యా కనకాక్లృప్తపాదుకా .

కంఠీరవసమాసీనా కంఠీరవపరాక్రమా .. 24..

కల్యాణీ కమలా కామ్యా కమనీయా కలావతీ .

కృతిః కల్పతరుః కీర్తిః కుటజాచలవాసినీ .. 25..

కవిప్రియా కావ్యలోలా కపర్దీరుచిరాకృతిః .

కంఠీరవధ్వజా కామరూపా కామితదాయినీ .. 26..

కృషాణుః కేశవనుతా కృతప్రజ్ఞా కృశోదరీ .

కోశాధీశ్వరసంసేవ్యా కృశాకర్షితపాతకా .. 27..

కరీంద్రగామినీ కేళీ కుమారీ కలభాషిణీ .

కలిదోషహరా కాష్ఠా కరవీరసుమప్రియా .. 28.. (కరవీరసుమప్రభా)

కలారూపా కృష్ణనుతా కలాధరసుపూజితా .

కుబ్జా కంజేక్షణా కన్యా కలాధరముఖా కవిః .. 29..

కలా కలాంగీ కావేరీ కౌముదీ కాలరూపిణీ .

కలాఢ్యా కోలసంహర్త్రీ కుసుమాఢ్యా కులాంగనా .. 30..

కుచోన్నతా కుంకుమాఢ్యా కౌసుంభకుసుమప్రియా .

కుచశోభా కాలరాత్రిః కీచకారణ్యసేవితా .. 31..

కుష్ఠరోగహరా కూర్మపృష్ఠా కామితవిగ్రహా .

కలాననా కలాలాపా కలాభాధీశ్వరార్చితా .. 32..

కేతకీకుసుమప్రీతా కైలాసపదదాయినీ .

కపర్దినీ కలామాలా కేశవార్చితపాదుకా .. 33..

కుశాత్మజా కేశపాశా కోలాపురనివాసినీ .

కోశనాథా క్లేశహంత్రీ కీశసేవ్యా కృపాపరా .. 34..

కౌంతేయార్చితపాదాబ్జా కాలిందీ కుముదాలయా .

కనత్కనకతాటంకా కరిణీ కుముదేక్షణా .. 35..

కోకస్తనీ కుందరదనా కులమార్గప్రవర్తినీ .

కుబేరపూజితా స్కందమాతా కీలాలశీతలా .. 36..

కాలీ కామకలా కాశీ కాశపుష్పసమప్రభా .

కిన్నరీ కుముదాహ్లాదకారిణీ కపిలాకృతిః .. 37..

కార్యకారణనిర్ముక్తా కృమికీటాంతమోక్షదా .

కిరాతవనితా కాంతిః కార్యకారణరూపిణీ .. 38..

కపిలా కపిలారాధ్యా కపీశధ్వజసేవితా .

కరాలీ కార్తికేయాఖ్యజననీ కాంతవిగ్రహా .. 39..

కరభోరుః కరేణుశ్రీః కపాలిప్రీతిదాయినీ .

కోలర్షివరసంసేవ్యా కృతజ్ఞా కాంక్షితార్థదా .. 40..

బాలా బాలనిభా బాణధారిణీ బాణపూజితా .

బిసప్రసూననయనా బిసతంతునిభాకృతిః .. 41..

బహుప్రదా బహుబలా బాలాదిత్యసమప్రభా .

బలాధరహితా బిందునిలయా బగలాముఖీ .. 42..

బదరీఫలవక్షోజా బాహ్యదంభవివర్జితా .

బలా బలప్రియా బంధుః బంధా బౌద్ధా బుధేశ్వరీ .. 43.. (బుధా బౌద్ధా)

బిల్వప్రియా బాలలతా బాలచంద్రవిభూషితా .

బుద్ధిదా బంధనచ్ఛేత్రీ బంధూకకుసుమప్రియా .. 44..

బ్రాహ్మీ బ్రహ్మనుతా బ్రధ్నతనయా బ్రహ్మచారిణీ .

బృహస్పతిసమారాధ్యా బుధార్చితపదాంబుజా .. 45..

బృహత్కుక్షిః బృహద్వాణీ బృహత్పృష్ఠా బిలేశయా .

బర్హిధ్వజసుతా బర్హికచా బీజాశ్రయా బలా .. 46..

బిందురూపా బీజాపూరప్రియా బాలేందుశేఖరా .

బిజాంకురోద్భవా బీజరూపిణీ బ్రహ్మరూపిణీ .. 47..

బోధరూపా బృహద్రూపా బంధినీ బంధమోచినీ .

బింబసంస్థా బాలరూపా బాలరాత్రీశధారిణీ .. 48..

వనదుర్గా వహ్నినౌకా శ్రీవంద్యా వనసంస్థితా .

వహ్నితేజా వహ్నిశక్తిః వనితారత్నరూపిణీ .. 49..

వసుంధరా వసుమతీ వసుధా వసుదాయినీ .

వాసవాదిసురారాధ్యా వంధ్యతావినివర్తినీ .. 50..

వివేకినీ విశేషజ్ఞా విష్ణుః వైష్ణవపూజితా .

పండితాఖిలదైత్యారిః విజయా విజయప్రదా .. 51..

విలాసినీ వేదవేద్యా వియత్పూజ్యా విశాలినీ .

విశ్వేశ్వరీ విశ్వరూపా విశ్వసృష్టివిధాయినీ .. 52..

వీరపత్నీ వీరమాతా వీరలోకప్రదాయినీ .

వరప్రదా వర్యపదా వైష్ణవశ్రీః వధూవరా .. 53.. (వీర్యప్రదా)

వధూః వారిధిసంజాతా వారణాదిసుసంస్థితా .

వామభాగాధికా వామా వామమార్గవిశారదా .. 54..

వామినీ వజ్రిసంసేవ్యా వజ్రాద్యాయుధధారిణీ .

వశ్యా వేద్యా విశ్వరూపా విశ్వవంద్యా విమోహినీ .. 55..

విద్వద్రూపా వజ్రనఖా వయోవస్థావివర్జితా .

విరోధశమనీ విద్యా వారితౌఘా విభూతిదా .. 56..

విశ్వాత్మికా విశ్వపాశమోచినీ వారణస్థితా .

విబుధార్చ్యా విశ్వవంద్యా విశ్వభ్రమణకారిణీ .. 57..

విలక్షణా విశాలాక్షీ విశ్వామిత్రవరప్రదా .

విరూపాక్షప్రియా వారిజాక్షీ వారిజసంభవా .. 58..

వాంగ్మయీ వాక్పతిః వాయురూపా వారణగామినీ .

వార్ధిగంభీరగమనా వారిజాక్షసతీ వరా .. 59..

విషయా విషయాసక్తా విద్యాఽవిద్యాస్వరూపిణీ .

వీణాధారీ విప్రపూజ్యా విజయా విజయాన్వితా .. 60..

వివేకజ్ఞా విధిస్తుతా విశుద్ధా విజయార్చితా .

వైధవ్యనాశినీ వైవాహితా విశ్వవిలాసినీ .. 61..

విశేషమానదా వైద్యా విబుధార్తివినాశినీ .

విపులశ్రోణిజఘనా వలిత్రయవిరాజితా .. 62..

విజయశ్రీః విధుముఖీ విచిత్రాభరణాన్వితా .

విపక్షవ్రాతసంహర్త్రీ విపత్సంహారకారిణీ .. 63..

విద్యాధరా విశ్వమయీ విరజా వీరసంస్తుతా .

వేదమూర్తిః వేదసారా వేదభాషావిచక్షణా .. 64..

విచిత్రవస్త్రాభరణా విభూషితశరీరిణీ .

వీణాగాయనసంయుక్తా వీతరాగా వసుప్రదా .. 65.. (వీణాగాయనసంసక్తా)

విరాగిణీ విశ్వసారా విశ్వావస్థావివర్జితా .

విభావసుః వయోవృద్ధా వాచ్యవాచకరూపిణీ .. 66..

వృత్రహంత్రీ వృత్తిదాత్రీ వాక్స్వరూపా విరాజితా .

వ్రతకార్యా వజ్రహస్తా వ్రతశీలా వ్రతాన్వితా .. 67..

వ్రతాత్మికా వ్రతఫలా వ్రతషాడ్గుణ్యకారిణీ .

వృత్తిః వాదాత్మికా వృత్తిప్రదా వర్యా వషట్కృతా .. 68..

విజ్ఞాత్రీ విబుధా వేద్యా విభావసుసమద్యుతిః . (విభవా వేద్యా)

విశ్వవేద్యా విరోధఘ్నీ విబుధస్తోమజీవనా .. 69..

వీరస్తుత్యా వియద్యానా విజ్ఞానఘనరూపిణీ .

వరవాణీ విశుద్ధాంతఃకరణా విశ్వమోహినీ .. 70..

వాగీశ్వరీ వాగ్విభూతిదాయినీ వారిజాననా .

వారుణీమదరక్తాక్షీ వామమార్గప్రవర్తినీ .. 71..

వామనేత్రా విరాడ్రూపా వేత్రాసురనిషూదినీ .

వాక్యార్థజ్ఞానసంధాత్రీ వాగధిష్ఠానదేవతా .. 72..

వైష్ణవీ విశ్వజననీ విష్ణుమాయా వరాననా .

విశ్వంభరీ వీతిహోత్రా విశ్వేశ్వరవిమోహినీ .. 73..

విశ్వప్రియా విశ్వకర్త్రీ విశ్వపాలనతత్పరా .

విశ్వహంత్రీ వినోదాఢ్యా వీరమాతా వనప్రియా .. 74..

వరదాత్రీ వీతపానరతా వీరనిబర్హిణీ .

విద్యున్నిభా వీతరోగా వంద్యా విగతకల్మషా .. 75.. (వీతరోగా విద్యా)

విజితాఖిలపాషండా వీరచైతన్యవిగ్రహా .

రమా రక్షాకరీ రమ్యా రమణీయా రణప్రియా .. 76..

రక్షాపరా రాక్షసఘ్నీ రాజ్ఞీ రమణరాజితా .

రాకేందువదనా రుద్రా రుద్రాణీ రౌద్రవర్జితా .. 77..

రుద్రాక్షధారిణీ రోగహారిణీ రంగనాయికా .

రాజ్యశ్రీరంజితపదా రాజరాజనిషేవితా .. 78..

రుచిరా రోచనా రోచీ ఋణమోచనకారిణీ .

రజనీశకలాయుక్తా రజతాద్రినికేతనా .. 79..

రాగోష్ఠీ రాగహృదయా రామా రావణసేవితా .

రక్తబీజార్దినీ రక్తలోచనా రాజ్యదాయినీ .. 80..

రవిప్రభా రతికరా రత్నాఢ్యా రాజ్యవల్లభా .

రాజత్కుసుమధమ్మిల్లా రాజరాజేశ్వరీ రతిః .. 81..

రాధా రాధార్చితా రౌద్రీ రణన్మంజీరనూపురా .

రాకారాత్రిః ఋజూరాశిః రుద్రదూతీ ఋగాత్మికా .. 82..

రాజచ్చంద్రజటాజూటా రాకేందుముఖపంకజా .

రావణారిహృదావాసా రావణేశవిమోహినీ .. 83..

రాజత్కనకకేయూరా రాజత్కరజితాంబుజా .

రాగహారయుతా రామసేవితా రణపండితా .. 84..

రంభోరూ రత్నకటకా రాజహంసగతాగతిః .

రాజివరంజితపదా రాజసిమ్హాసనస్థితా .. 85..

రక్షాకరీ రాజవంద్యా రక్షోమండలభేదినీ .

దాక్షాయణీ దాంతరూపా దానకృత్ దానవార్దినీ .. 86..

దారిద్ర్యనాశినీ దాత్రీ దయాయుక్తా దురాసదా .

దుర్జయా దుఃఖశమనీ దుర్గదాత్రీ దురత్యయా .. 87..

దాసీకృతామరా దేవమాతా దాక్షిణ్యశాలినీ .

దౌర్భాగ్యహారిణీ దేవీ దక్షయజ్ఞవినాశినీ .. 88..

దయాకరీ దీర్ఘబాహుః దూతహంత్రీ దివిస్థితా .

దయారూపా దేవరాజసంస్తుతా దగ్ధమన్మథా .. 89..

దినకృత్కోటిసంకాశా దివిషద్దివ్యవిగ్రహా .

దీనచింతామణిః దివ్యస్వరూపా దీక్షితాయినీ .. 90..

దీధితిః దీపమాలాఢ్యా దిక్పతిః దివ్యలోచనా .

దుర్గా దుఃఖౌఘశమనీ దురితఘ్నీ దురాసదా .. 91..

దుర్జ్ఞేయా దుష్టశమనీ దుర్గామూర్తిః దిగీశ్వరీ .

దురంతాఖ్యా దుష్టదాహ్యా దుర్ధర్షా దుందుభిస్వనా .. 92..

దుష్ప్రధర్షా దురారాధ్యా దుర్నీతిజననిగ్రహా .

దూర్వాదలశ్యామలాంగీ ద్రుతదృగ్ధూషణోజ్ఝితా .. 93..

దేవతా దేవదేవేశీ దేవీ దేశికవల్లభా .

దేవికా దేవసర్వస్వా దేశప్రాదేశకారిణీ .. 94..

దోషాపహా దోషదూరా దోషాకరసమాననా .

దోగ్ధ్రీ దౌర్జన్యశమనీ దౌహిత్రప్రతిపాదినీ .. 95..

దూత్యాదిక్రీడనపరా ద్యుమణిః ద్యూతశాలినీ .

ద్యోతితాశా ద్యూతపరా ద్యావాభూమివిహారిణీ .. 96.. (ద్యుతవరా)

దంతినీ దండినీ దంష్ట్రీ దంతశూకవిషాపహా .

దంభదూరా దంతిసుతా దండమాత్రజయప్రదా .. 97..

దర్వీకరా దశగ్రీవా దహనార్చిః దధిప్రియా .

దధీచివరదా దక్షా దక్షిణామూర్తిరూపిణీ .. 98..

దానశీలా దీర్ఘవర్ష్మా దక్షిణార్ధేశ్వరా . (దీర్ఘవృష్ఠా)

దృతా దాడిమీకుసుమప్రీతా దుర్గదుష్కృతహారిణీ .. 99..

జయంతీ జననీ జ్యోత్స్నా జలజాక్షీ జయప్రదా .

జరా జరాయుజప్రీతా జరామరణవర్జితా .. 100..

జీవనా జీవనకరీ జీవేశ్వరవిరాజితా .

జగద్యోనిః జనిహరా జాతవేదా జలాశ్రయా .. 101..

జితాంబరా జితాహారా జితాకారా జగత్ప్రియా .

జ్ఞానప్రియా జ్ఞానఘనా జ్ఞానవిజ్ఞానకారిణీ .. 102..

జ్ఞానేశ్వరీ జ్ఞానగమ్యా జ్ఞాతాజ్ఞాతౌఘనాశినీ .

జిజ్ఞాసా జీర్ణరహితా జ్ఞానినీ జ్ఞానగోచరా .. 103..

అజ్ఞానధ్వంసినీ జ్ఞానరూపిణీ జ్ఞానకారిణీ .

జాతార్తిశమనీ జన్మహారిణీ జ్ఞానపంజరా .. 104..

జాతిహీనా జగన్మాతా జాబాలమునివందితా .

జాగరూకా జగత్పాత్రీ జగద్వంద్యా జగద్గురుః .. 105..

జలజాక్షసతీ జేత్రీ జగత్సంహారకారిణీ .

జితక్రోధా జితరతా జితచంద్రముఖాంబుజా .. 106..

యజ్ఞేశ్వరీ యజ్ఞఫలా యజనా యమపూజితా .

యతిః యోనిః యవనికా యాయజూకా యుగాత్మికా .. 107..

యుగాకృతిః యోగదాత్రీ యజ్ఞా యుద్ధవిశారదా .

యుగ్మప్రియా యుక్తచిత్తా యత్నసాధ్యా యశస్కరీ .. 108..

యామినీ యాతనహరా యోగనిద్రా యతిప్రియా .

యాతహృతకమలా యజ్యా యజమానస్వరూపిణీ .. 109..

యక్షేశీ యక్షహరణా యక్షిణీ యక్షసేవితా .

యాదవస్త్రీ యదుపతిః యమలార్జునభంజనా .. 110..

వ్యాలాలంకారిణీ వ్యాధిహారిణీ వ్యయనాశినీ .

తిరస్కృతమహావిద్యా తిర్యక్పృష్ఠా తిరోహితా .. 111..

తిలపుష్పసమాకారనాసికా తీర్థరూపిణీ .

తిర్యగ్రూపా తీర్థపాదా త్రివర్గా త్రిపురేశ్వరీ .. 112..

త్రిసంధ్యా త్రిగుణాధ్యక్షా త్రిమూర్తిః త్రిపురాంతకీ .

త్రినేత్రవల్లభా త్ర్యక్షా త్రయీ త్రాణపరాయణా .. 113..

తారణా తారిణీ తారా తారాపరికలావృతా .

తారాత్మికా తారజపా తురితాఢ్యా తరూత్తమా .. 114..

తూర్ణప్రసాదా తూణీరధారిణీ తూర్ణసంస్కృతా .

తోషిణీ తూర్ణగమనా తులాహీనాఽతులప్రభా .. 115..

తరంగిణీ తరంగాఢ్యా తులా తుందిలపుత్రిణీ .

తనూనపాత్ తంతురూపా తారాంగీ తంత్రరూపిణీ .. 116..

తారకారిః తుంగకుచా తిలకాలిః తిలార్చితా .

తమోపహా తార్క్ష్యగతిః తామసీ త్రిదివేశ్వరీ .. 117..

తపస్వినీ తపోరూపా తాపసేడ్యా త్రయీతనుః .

తపఃఫలా తపస్సాధ్యా తలాతలనివాసినీ .. 118..

తాండవేశ్వరసంప్రీతా తటిదీక్షణసంభ్రమా .

తనుమధ్యా తనూరూపా తళిభానుః తటిత్ప్రభా .. 119..

సదస్యా సదయా సర్వవందితా సదసత్పరా .

సద్యఃప్రసాదినీ సుధీః సచ్చిదానందరూపిణీ .. 120..

సరిద్వేగా సదాకారా సరిత్పతివసుంధరా .

సరీసృపాంగాభరణా సర్వసౌభాగ్యదాయినీ .. 121..

సామసాధ్యా సామగీతా సోమశేఖరవల్లభా .

సోమవక్త్రా సౌమ్యరూపా సోమయాగఫలప్రదా .. 122..

సగుణా సత్క్రియా సత్యా సాధకాభీష్టదాయినీ .

సుధావేణీ సౌధవాసా సుజ్ఞా సుశ్రీః సురేశ్వరీ .. 123.. (సుధావాణీ)

కేతకీకుసుమప్రఖ్యా కచనిర్జితనీరదా .

కుంతలాయితభృంగాలిః కుండలీకృతకైశికీ .. 124..

సిందూరాంకితకేశాంతా కంజాక్షీ సుకపోలికా .

కనత్కనకతాటంకా చంపకాకృతినాసికా .. 125.. (చలత్కనక)

నాసాలంకృతసన్ముక్తా బింబోష్ఠీ బాలచంద్రధృత్ .

కుందదంతా త్రినయనా పుణ్యశ్రవణకీర్తనా .. 126..

కాలవేణీ కుచజితచకోరా హారరంజితా .

కరస్థాంగులికా రత్నకాంచీదామవిరాజితా .. 127..

రత్నకింకిణికా రమ్యనీవికా రత్నకంచుకా .

హరిమధ్యాఽగాధపృష్ఠా కరభోరుః నితంబినీ .. 128..

పదనిర్జితపద్మాభా ఊర్మికారంజితాంగులిః .

గాంగేయకింకిణీయుక్తా రమణీయాంగులీయుతా .. 129..

మాణిక్యరత్నాభరణా మధుపానవిశారదా .

మధుమధ్యా మందగతా మత్తేభస్థాఽమరార్చితా .. 130..

మయూరకేతుజననీ మలయాచలపుత్రికా .

పరార్ధభాగా హర్యక్షవాహనా హరిసోదరీ .. 131..

హాటకాభా హరినుతా హంసగా హంసరూపిణీ .

హర్షరూపా హరిపతిః హయారూఢా హరిత్పతిః .. 132.. (హర్షప్రదా)

సర్వగా సర్వదేవేశీ సామగానప్రియా సతీ .

సర్వోపద్రవసంహర్త్రీ సర్వమంగలదాయినీ .. 133..

సాధుప్రియా సాగరజా సర్వకర్త్రీ సనాతనీ .

సర్వోపనిషదుద్గీతా సర్వశత్రినిబర్హిణీ .. 134..

సనకాదిమునిస్తుత్యా సదాశివమనోహరా .

సర్వజ్ఞా సర్వజననీ సర్వాధారా సదాగతిః .. 135..

సర్వభూతహితా సాధ్యా సర్వశక్తిస్వరూపిణీ .

సర్వగా సర్వసుఖదా సర్వేశీ సర్వరంజినీ .. 136..

శివేశ్వరీ శివారాధ్యా శివానందా శివాత్మికా . (సర్వేశ్వరీ)

సూర్యమండలమధ్యస్థా శివా శంకరవల్లభా .. 137..

సుధాప్లవా సుధాధారా సుఖసంవిత్స్వరూపిణీ .

శివంకరీ సర్వముఖీ సూక్ష్మజ్ఞానస్వరూపిణీ .. 138..

అద్వయానందసంశోభా భోగస్వర్గాపవర్గదా .

విష్ణుస్వసా వైష్ణవాప్తా వివిదార్థవినోదినీ .. 139..

గిరిజా గిరీశప్రీతా శర్వాణీ శమదాయినీ .

హృత్పద్మమధ్యనిలయా సర్వోజ్ఞప్తిః స్వరాత్మికా .. 140..

తరుణీ తరుణార్కాభా చింత్యాచింత్యస్వరూపిణీ .

శ్రుతిస్మృతిమయీ స్తుత్యా స్తుతిరూపా స్తుతిప్రియా .. 141..

ఓంకారగర్భా హ్యోఽఙ్కారీ కంకాలీ కాలరూపిణీ .

విశ్వంభరీ వినీతస్థా విధాత్రీ వివిధప్రభా .. 142..

శ్రీకరీ శ్రీమతీ శ్రేయః శ్రీదా శ్రీచక్రమధ్యగా .

ద్వాదశాంతసరోజస్థా నిర్వాణసుఖదాయినీ .. 143..

సాధ్వీ సర్వోద్భవా సత్త్వా శ్రీకంఠస్వాంతమోహినీ .

విద్యాతనుః మంత్రతనుః మదనోద్యానవాసినీ .. 144..

యోగలక్ష్మీః రాజ్యలక్ష్మీః మహాలక్ష్మీః సరస్వతీ .

సదానందైకరసికా బ్రహ్మవిష్ణ్వాదివందితా .. 145.. (బ్రహ్మవిష్ణ్వోంశవందితా)

కుమారీ కపిలా కాలీ పింగాక్షీ కృష్ణపింగలా .

చండఘంటాః మహాసిద్ధిః వారాహీ వరవర్ణినీ .. 146..

కాత్యాయనీ వాయువేగా కామాక్షీ కర్మసాక్షిణీ .

దుర్గాదేవీ మహాదేవీ ఆదిదేవీ మహాసనా .. 147..

మహావిద్యా మహామాయా విద్యాలోలా తమోమయీ .

శంఖచక్రగదాహస్తా మహామహిషమర్దినీ .. 148..

ఖడ్గినీ శూలినీ బుద్ధిరూపిణీ భూతిదాయినీ .

వారుణీ జటినీ త్రస్తదైత్యసంఘా శిఖండినీ .. 149..

సురేశ్వరీ శస్త్రపూజ్యా మహాకాలీ ద్విజార్చితా .

ఇచ్ఛాజ్ఞానక్రియా సర్వదేవతానందరూపిణీ .. 150..

మత్తశుంభనిశుంభఘ్నీ చండముండవిఘాతినీ .

వహ్నిరూపా మహాకాంతిః హరా జ్యోత్స్నావతీ స్మరా .. 151..

వాగీశ్వరీ వ్యోమకేశీ మూకహంత్రీ వరప్రదా .

స్వాహా స్వధా సుధాశ్వమేధా శ్రీః హ్రీః గౌరీ పరమేశ్వరీ .. 152..

                 .. ఓం ..

.. ఇతి శ్రీ స్కాందమహాపురాణే కోలాపురమూకాంబికామాహాత్మ్యాఖ్యే

ఉపాఖ్యానే శ్రీ దేవ్యాః దివ్యవరసాహాస్రనామ స్తోత్రం శివమస్తు ..

శ్రీమీనాక్ష్యష్టకం

శ్రీమీనాక్ష్యష్టకం ..

మాధుర్యే మహిమే మహాగిరిసుతే మల్లాది సంహారిణి

మూలాధారకృతే మహామరకతే శోభే మహాసుందరి .

మాతంగి మహిమే మహాసురవధే మంత్రోత్తమే మాధవి

మీనాక్షి మధురాంబికే మహిమయే మాం పాహి మీనాంబికే .. 1..

నానారత్నవిభూషణే నవగణే శోభే మహాసుంతరి

నిత్యానందవరే నిరూపణగుణే నిమ్నోన్నతే పంకజే .

నాట్యే నాటకవేషధారిణి శివే నాదే కాలనర్తకి(?)

మీనాక్షి మధురాంబికే మహిమయే మాం పాహి మీనాంబికే .. 2..

కామక్రోధనివారణే కరుణాలయే కాత్యాయని సన్మతే 

కారుణ్యాకృతికే కిరాతవరదే కం గం క బీజాంకురే .

కామార్థం తవ సిద్ధిహేతుకమిదం భక్త్యా భవత్సన్నిధౌ

మీనాక్షి మధురాంబికే మహిమయే మాం పాహి మీనాంబికే .. 3..

షట్చక్రాంతగతే షడాననవరే షడ్బీజరక్షాంకురే

షోడాధారకలే షడక్షరి శివే క్షోణీ మహాక్షీయతే .

క్షంతవ్యం జనని క్షమా రమ శివే క్షీరాబ్ధి మధ్యాంతరే

మీనాక్షి మధురాంబికే మహిమయే మాం పాహి మీనాంబికే .. 4..

వామే నీలదలాక్షి పుష్పరసికే బాలే మహాకుంకుమే

అన్యే పాణివరాబ్జభక్తజనని నిత్యం పరశ్రేయసి .

బాలే బంధువరాంగిణి బహువిధే భూచక్రసంచారిణి

మీనాక్షి మధురాంబికే మహిమయే మాం పాహి మీనాంబికే .. 5..

రాగస్తోత్రవిచారవేదవిభవే రమ్యే రతోల్లాసిని

రాజీవేక్షణి రాజ రాంగణరణే రాజాధిరాజేశ్వరి .

రాజ్ఞి రాజససత్త్వతామసగుణే రాధే రమాసోదరి

మీనాక్షి మధురాంబికే మహిమయే మాం పాహి మీనాంబికే .. 6..

సారాస్యే సరసీరుహస్య జనని సామ్రాజ్యదానేక్షణి

సామ్యాసామ్య చాష్టకలాసుఖవనే సాందీపనీసేవితే .

సత్యానందసుధే చ సుందరఫలే స్వాధిష్ఠచక్రాంతరే

మీనాక్షి మధురాంబికే మహిమయే మాం పాహి మీనాంబికే .. 7..

కర్పూరారుణకుంకుమార్చితపదే క్షీరాబ్ధిశోభే శివే

గాయత్రి కరుణాకటాక్షవినుతే కందర్పకాంతిప్రదే .

కల్యాణాష్టసురార్చితే సుకవితే కారుణ్యవారాన్నిధే

మీనాక్షి మధురాంబికే మహిమయే మాం పాహి మీనాంబికే .. 8..

ఇతి రాజపూజిత శ్రీకులంతయానంద(బాలానంద)స్వామినా విరచితం

శ్రీమీనాక్ష్యష్టకం సంపూర్ణం .

శ్రీమీనాక్షీస్తోత్రం

మందస్మితోదంచితమంజులాస్యాం కనన్నిటాలాం వరకుంకుమేన .

శ్రీసుందరేశేన సమం నిశీథే ప్రేంఖాధిరూఢాం భజ మీననేత్రాం .. 1..

దవిష్ఠలోకాంశ్చ దయోర్మిలేన విలోకనేనైవ విశాలనేత్రా .

మత్స్యా ఇవార్భాన్పరిపాలయంతీ డోలావిహారం తనుతే ఝషాక్షీ .. 2..

కృత్వా తపో దుశ్చరమంబికాయాః

      మాతా భవామీతి మనీషయా యా .

ప్రాప్తా పురా కాంచనమాలయా సా

      పాండ్యాధిరాజ్ఞీ వితనోతు భవ్యం .. 3..

దివ్యం రూపం దధానా లలితతరరవైర్వేణువీణాదిజాతైః

      ప్రాపయ్యాంతర్ముఖత్వం నిఖిలజనమనాంస్యాత్మరూపం వివేక్తుం .

వృత్తీర్మోదాదిరూపా అపి పరిగలితాః కుర్వతీ బ్రహ్మవిద్యా

      మీనాక్షీ జీవనీడం సుఖమమృతమహో బోధయంతీ విభాతి .. 4..

ప్రేంఖామారుహ్య పత్యా సహ సురరమణీగర్వనిర్వాపికాభిః

      నారీభిర్గీయమానా నవనవనటనైస్తోష్యమాణా చ నిత్యం .

ఆనందం దేవభోగ్యం ధిగితి సుమనసామాదధానా విరక్తిం

      సాంద్రానందం మహేశం పరమమృతమహో బోధయత్యంబికేయం .. 5..

యా దేవీ ద్వాదశాంతే వసతి విశదయా ప్రజ్ఞయైవాధిగమ్యా

      యస్యాః ప్రాప్త్యై విధత్తే శ్రుతిరపి వివిధాన్ యజ్ఞదానాదిధర్మాన్ .

సాక్షాచ్ఛ్రీమీననేత్రా మఘవదధిగతా కుంభజాద్యర్చితాంఘ్రిః

      సా మే సోమావతంసా శిథిలయతు తమో హార్దమాశు ప్రగాఢం .. 6..

యస్యా గేహం విశాలం పురమివ సకలం వస్తుజాతం బిభర్తి

      యద్దృష్ట్వైవాశు మోదం వహతి భువి జనో నాస్తికోఽపి ప్రకామం .

స్తంభైర్హైమైర్విచిత్రైరపి శిఖరవరైర్గోపురైః శౌకనీడైః

      తీర్థైర్హేమాంబుజిన్యాదిభిరపి పరితో భాసమానం శ్రియై స్తాత్ .. 7..

సా హి శ్రీరమృతా సతామితి ఋచః సామాని యస్మాద్యజూం-

      ష్యామ్నాయో విదధాతి తత్పరశివే మీనాక్షి విద్యాం త్రయీం .

సంబోధ్యామృతసౌఖ్యహేతుమచిరాదవ్యాజభవ్యాం దయాం

      నిత్యం ధేహి సుతే జగజ్జనని తే భూయోఽపి భూయో నమః .. 8..

శఫరనయనే శాంతారాధ్యే శివార్ధశరీరిణి

      ప్రచురయ సుఖం దుఃఖం సర్వం వినాశయ సత్వరం .

సఫలయ జనిం సక్తిం దేహే నిరాకురు సద్ధనే

      చితిసుఖతనావాత్మన్యాస్తాం మతిర్మమ సంతతం .. 9..

ఇతి శ్రీచంద్రశేఖరభారతీశ్రీచరణకృతం మీనాక్షీస్తోత్రం సంపూర్ణం .

శ్రీమీనాక్షీస్తుతిః

అద్రాక్షం బహుభాగ్యతో గురువరైః సంపూజ్యమానాం ముదా

      పుల్లన్మల్లిముఖప్రసూననివహైర్హాలాస్యనాథప్రియాం .

వీణావేణుమృదంగవాద్యముదితామేణాంక బింబాననాం

      కాణాదాదిసమస్తశాస్త్రమతితాం శోణాధరాం శ్యామలాం .. 1..

మాతంగకుంభవిజయీస్తనభారభుగ్న

      మధ్యాం మదారుణవిలోచనవశ్యకాంతాం .

తామ్రాధరస్ఫురితహాసవిధూతతార

      రాజప్రవాలసుషుమాం భజ మీననేత్రాం .. 2..

ఆపాదమస్తకదయారసపూరపూర్ణాం

      శాపాయుధోత్తమసమర్చితపాదపద్మాం .

చాపయితేక్షుమమలీమసచిత్తతాయై

      నీపాటవివిహర్ణాం భజ మీననేత్రం .. 3..

కందర్ప వైర్యపి యయా సవిలాస హాస

      నేత్రావలోకన వశీకృత మానసోఽభూత్ .

తాం సర్వదా సకల మోహన రూప వేషాం

      మోహాంధకార హరణాం భజ మీననేత్రాం .. 4..

అద్యాపి యత్పురగతః సకలోఽపి జంతుః

      క్షుత్తృడ్ వ్యథా విరహితః ప్రసువేవ బాలః .

సంపోశ్యతే కరుణయా భజకార్తి హంత్రీం

      భక్త్యాఽన్వహం తాం హృదయ భజ మీననేత్రాం .. 5..

హాలాస్యనాథ దయితే కరుణా పయోధే

      బాలం విలోల మనసం కరుణైక పాత్రం .

వీక్షస్వ మాం లఘు దయార్మిల దృష్టపాదైర్-

      మాతర్న మేఽస్తి భువనే గతిరంద్రా త్వం .. 6..

శ్రుత్యుక్త కర్మ నివహాకరణాద్విశుద్ధిః

      చిత్తస్య నాస్తి మమ చంచలతా నివృత్తైః .

కుర్యాం కిమంబ మనసా సకలాఘ శాంత్యైః

      మాతస్తవదంఘ్రి భజనం సతతం దయస్వ .. 7..

త్వద్రూపదేశికవరైః సతతం విభావ్యం

      చిద్రూపమాది నిధనంతర హీనమంబ .

భద్రావహం ప్రణమతాం సకలాఘ హంతృ

      త్వద్రూపమేవ మమ హృత్కమలే విభాతు .. 8..

.. ఇతి శ్రీ జగద్గురు శృంగగిరి చంద్రశేఖరభారతిస్వామిగళ్

      విరచితం మీనాక్షీస్తుతిః సంపూర్ణం ..

శ్రీమీనాక్షీసుప్రభాతం

శ్రీస్వామిశాస్త్రిణా అనంతానందనాథేన విరచితం

ఓం నమో భగవత్యై శ్రీచంద్రశేఖరమూర్తయే .

సచ్చిదానందరూపిణ్యై స్వాత్మబోధప్రపూర్తయే ..

శ్రీమాన్ గజాస్యో మధురాపురస్థో లంబోదరో మీనదృగాత్మజో యః .

త్రిప్రస్థపూర్ణాకృతిమోదకాఢ్యః క్రియాద్గణేశో మమ సుప్రభాతం .. 1..

మాతంగకన్యేతి కవీంద్రవంద్యా విద్యావతీపుణ్యఫలప్రదా యా .

శ్రీపాండ్యరాజస్య సుతా చ సాఽమ్బా కరోతు దేవీ మమ సుప్రభాతం .. 2..

చిదగ్నిజాతా మధురాపురేశీ పట్టాభిషిక్తా మలయధ్వజేన .

యయా జితా దిక్పతయో నృపాశ్చ కరోతు దేవీ మమ సుప్రభాతం .. 3..

యా త్రిస్తనీశానజయాయ గత్వా దృష్ట్వా మహేశం త్వతిసుందరాంగం .

సమ్మోహితాఽభూజ్జనమోహదాత్రీ కరోతు దేవీ మమ సుప్రభాతం .. 4..

శ్రీసుందరేశేక్షణమాత్రలుప్తమధ్యస్తనీ శాంతమహేశయుద్ధా .

మీనాంబకా శ్రీమధురాపురేశీ కరోతు దేవీ మమ సుప్రభాతం .. 5..

వాక్కామశక్త్యాదిమబీజపూర్వమంత్రస్య లక్ష్యార్థతనుర్మహేశీ .

షడంగశక్త్యావృతబిందువాసా కరోతు దేవీ మమ సుప్రభాతం .. 6..

పరప్రకాశాదిమశంకరాంత శ్రీదివ్యసిద్ధౌఘసుమానవౌఘైః .

సదా పరీతా గురుభిః స్వచక్రే కరోతు దేవీ మమ సుప్రభాతం .. 7..

రత్యాది శక్తిత్రయపంచబాణబాణైశ్చ కామాదిమపంచమారైః .

యా సేవితా మీననిభస్వనేత్రా కరోతు దేవీ మమ సుప్రభాతం .. 8..

బ్రాహ్మ్యాదిశక్త్యష్టకసేవితా యా లక్ష్మ్యాదిశక్త్యష్టకసంశ్రితాఽమ్బా .

కదంబకాంతారతలైకవాసా కరోతు దేవీ మమ సుప్రభాతం .. 9..

వజ్రాదిసంశోభితహస్తపద్మ వామాదిభిష్షోడశశక్తిభిర్యా .

సమావృతా సా ప్రియకప్రియాంబా కరోతు దేవీ మమ సుప్రభాతం .. 10..

త్రిశూలసంశోభికరాసితాంగముఖ్యైర్వృతా హ్యష్టసుభైరవైర్యా .

మీనాంబకా నీపవనైకవాసా కరోతు దేవీ మమ సుప్రభాతం .. 11..

మాతంగినీపూర్వకశక్తిసంఘైః గణేశపూర్వత్రిదివైశ్చతుర్భిః .

శుకప్రియాఽమ్బా పరిసేవ్యమానా కరోతు దేవీ మమ సుప్రభాతం .. 12..

శ్రీశారికావేణువిపంచికాఢ్యా శ్రీద్వాదశాంతస్థమతంగకన్యా .

యా వై లఘుశ్యామతనుర్ఝషాక్షీ కరోతు దేవీ మమ సుప్రభాతం .. 13..

వాగ్వాదినీ యా నకులీతి దేవీ సంకీర్త్యతే సిద్ధజనైః ప్రపంచే .

కవిత్వదా కామితదా ఝషాక్షీ కరోతు దేవీ మమ సుప్రభాతం .. 14..

సప్తస్వరాణామపి లక్ష్యభూతా సంగీతయోగిన్యభిధీయతే యా .

సానందరూపా ఝషలోచనాంబా కరోతు దేవీ మమ సుప్రభాతం .. 15..

సచ్చిత్స్వరూపా భవసంగరే మే జయప్రదా చంద్రకలావతంసా .

గురుస్వరూపా మధురాపురేశీ కరోతు దేవీ మమ సుప్రభాతం .. 16..

స్వర్ణాబ్జినీతీరవిహారశీలపదాంబుజా వర్ణతనూరపర్ణా .

భవాంధతామిస్రసమావృతస్య కరోతు దేవీ మమ సుప్రభాతం .. 17..

అనంతనాగేంద్రశయానవిష్ణు సహోద్భవా నీలతనుర్ఝషాక్షీ .

అనంతకల్యాణగుణైకభూమిః కరోతు దేవీ మమ సుప్రభాతం .. 18..

ఇతి అనంతానందనాథేన విరచితం శ్రీమీనాక్షీసుప్రభాతం సంపూర్ణం .

శ్రీమీనాక్షీషోడశోపచారస్తుతిః

ఇక్షుకోదండ పుష్పేషు పాశాంకుశకరోజ్జ్వలాం .

ఉద్యత్సూర్యనిభాం వందే మహాత్రిపురసుందరీం .. 1..

శ్రీమత్సుందరనాథస్య దేవీం శఫరలోచనాం .

కలయే హృదయే నిత్యం కదంబవనవాసినీం .. 2..

బాలార్కారుణపద్మపీఠనిలయాం వామాదిశక్త్యావృతాం

      ఏలాగంధి సుకుంతలాం ద్వినయనాం హేమాంబరాలంకృతాం .

వామే లంబిత దోర్లతాం సుచరణాం దక్షేధృతేందీవరాం

      శ్యామాభాం శరదిందుచారువదనాం వందే సుమీనేక్షణాం .. 3..

ఆగచ్ఛ వరదే దేవి సర్వసంపత్ప్రదాయిని .

పూజాం గృహాణ సుముఖి నమస్తే శంకరప్రియే .. 4..

శ్రీమీనాక్షి మహాభాగే రక్షార్థం మమ సర్వదా .

ఆవాహయామ్యహం దేవి సర్వకామార్థసిద్ధయే .. 5..

అనేకరత్నసంయుక్తం నానామణి గణాన్వితం .

కార్తస్వరమయం దివ్యమాసనం ప్రతిగృహ్యతాం .. 6..

గంగాది సర్వతీర్థేభ్యో మయా ప్రార్థనయాఽఽహృతం .

తోయమేతత్సుఖస్పర్శం పాద్యార్థం ప్రతిగృహ్యతాం .. 7..

నిధీనాం సర్వరత్నానాం త్వమనర్ఘ్యగుణా హ్యసి .

సింహాసన స్థితే దేవి గృహాణార్ఘ్యం నమోఽస్తు తే .. 8..

కర్పూరేణ సుగంధేన సురభి స్వాదు శీతలం .

తోయమాచమనీయార్థం దేవి త్వం ప్రతిగృహ్యతాం .. 9..

మందాకిన్యాః సమానీతైః హేమాంభోరుహ వాసితైః .

స్రానం కురుష్వ దేవేశి సలిలైశ్చ సుగంధిభిః .. 10..

పట్టకూలయుతం దేవి కంచుకేన సమన్వితం .

పరిదేహి కృపాం కృత్వా సర్వసంపత్ప్రదాయిని .. 11..

స్వర్ణసూత్రమయం దివ్యం బ్రహ్మణా నిర్మితం పురా .

ఉపవీతం మయా దత్తం గృహాణ పరమేశ్వరి .. 12..

శ్రీకంఠచందనం దివ్యం గంధాఢ్యం సుమనోహరం .

విలేపనం చ దేవేశి చందనం ప్రతిగృహ్యతాం .. 13..

హరిద్రాం కుంకుమం చైవ సిందూరం కజ్జలం తథా .

సౌభాగ్యద్రవ్యసంయుక్తం గృహాణ పరమేశ్వరి .. 14..

అక్షతాన్నిర్మలాన్శుద్ధాన్ ముక్తామణి సమన్వితాన్ .

గృహాణేమాన్ మహాదేవి దేహి మే నిర్మలాం ధియం .. 15..

మాంగల్య మణి సంయుక్తం ముక్తాఫలసమన్వితం .

దత్తం మంగల సూత్రం తే గృహాణ శివవల్లభే .. 16..

రత్నతాటంకకేయూర హార కంకణమండితే .

భూషణం గృహ్యతాం దేవి నమస్తే పాండ్యనందిని .. 17..

జాజీ పుత్రాగమందార కేతకీచంపకాని చ .

పుష్పాణి తవ పూజార్థమర్పయామి సదా శివే .. 18..

ఇతి శ్రీమీనాక్షీషోడశోపచారస్తుతిః సమాప్తా .

గౌరీదశకం అథవా గౌరీ స్తుతిః

.. శ్రీః ..

లీలాలబ్ధస్థాపితలుప్తాఖిలలోకాం

     లోకాతీతైర్యోగిభిరంతశ్చిరమృగ్యాం .

బాలాదిత్యశ్రేణిసమానద్యుతిపుంజాం

     గౌరీమమంబామంబురుహాక్షీమహమీడే .. 1..

ప్రత్యాహారధ్యానసమాధిస్థితిభాజాం

     నిత్యం చిత్తే నిర్వృతికాష్ఠాం కలయంతీం .

సత్యజ్ఞానానందమయీం తాం తనురూపాం

     గౌరీమంబామంబురుహాక్షీమహమీడే .. 2..

చంద్రాపీడానందితమందస్మితవక్త్రాం

     చంద్రాపీడాలంకృతనీలాలకభారాం .

ఇంద్రోపేంద్రాద్యర్చితపాదాంబుజయుగ్మాం

     గౌరీమంబామంబురుహాక్షీమహమీడే .. 3..

ఆదిక్షాంతామక్షరమూర్త్యా విలసంతీం

     భూతే భూతే భూతకదంబప్రసవిత్రీం .

శబ్దబ్రహ్మానందమయీం తాం తటిదాభాం

     గౌరీమంబామంబురుహాక్షీమహమీడే .. 4..

మూలాధారాదుత్థితవీథ్యా విధిరంధ్రం

     సౌరం చాంద్రం వ్యాప్య విహారజ్వలితాంగీం .

యేయం సూక్ష్మాత్సూక్ష్మతనుస్తాం సుఖరూపాం

     గౌరీమంబామంబురుహాక్షీమహమీడే .. 5..

నిత్యః శుద్ధో నిష్కల ఏకో జగదీశః

     సాక్షీ యస్యాః సర్గవిధౌ సంహరణే చ .

విశ్వత్రాణక్రీడనలోలాం శివపత్నీం

     గౌరీమంబామంబురుహాక్షీమహమీడే .. 6..

యస్యాః కుక్షౌ లీనమఖండం జగదండం

     భూయో భూయః ప్రాదురభూదుత్థితమేవ .

పత్యా సార్ధం తాం రజతాద్రౌ విహరంతీం

     గౌరీమంబామంబురుహాక్షీమహమీడే .. 7..

యస్యామోతం ప్రోతమశేషం మణిమాలా-

     సూత్రే యద్వత్క్కాపి చరం చాప్యచరం చ .

తామధ్యాత్మజ్ఞానపదవ్యా గమనీయాం

     గౌరీమంబామంబురుహాక్షీమహమీడే .. 8..

నానాకారైః శక్తికదంబైర్భువనాని

     వ్యాప్య స్వైరం క్రీడతి యేయం స్వయమేకా .

కల్యాణీం తాం కల్పలతామానతిభాజాం

     గౌరీమంబామంబురుహాక్షీమహమీడే .. 9..

ఆశాపాశక్లేశవినాశం విదధానాం

     పాదాంభోజధ్యానపరాణాం పురుషాణాం .

ఈశామీశార్ధాంగహరాం తామభిరామాం

     గౌరీమంబామంబురుహాక్షీమహమీడే .. 10..

ప్రాతఃకాలే భావవిశుద్ధః ప్రణిధానా-

     ద్భక్త్యా నిత్యం జల్పతి గౌరిదశకం యః .

వాచాం సిద్ధిం సంపదమగ్ర్యాం శివభక్తిం (సంపదం ఉచ్చైః)

     తస్యావశ్యం పర్వతపుత్రీ విదధాతి .. 11..

ఇతి శ్రీమత్పరమహంసపరివ్రాజకాచార్యస్య

శ్రీగోవిందభగవత్పూజ్యపాదశిష్యస్య

శ్రీమచ్ఛంకరభగవతః కృతౌ

గౌరీదశకం సంపూర్ణం  ..