Sacred Stotras & Deities

గోమంత్రపాఠః

బహులే సమంగే హ్యకుతోభయే చ

     క్షేమే చ సఖ్యేవ హి భూయసీ చ .

యథా పురా బ్రహ్మపురే సవత్సా

     శతక్రతోర్వజ్రధరస్య యజ్ఞే .. 1..

భూయశ్చ యా విష్ణుపదే స్థితా యా

     విభావసోశ్చాపి పథే స్థితా యా .

దేవాశ్చ సర్వే సహ నారదేన

     ప్రకుర్వతే సర్వసహేతి నామ .. 2..

మంత్రేణైతేనాభివందేత యో వై

     విముచ్యతే పాపకృతేన కర్మణా .

లోకానవాప్నోతి పురందరస్య

     గవాం ఫలం చంద్రమసో ద్యుతిం చ .. 3..

ఏతం హి మంత్రం త్రిదశాభిజుష్టం

     పఠేత యః పర్వసు గోష్ఠమధ్యే .

న తస్య పాపం న భయం న శోకః

     సహస్రనేత్రస్య చ యాతి లోకం .. 4..

ఇతి గోమంత్రపాఠః సమాప్తః .

శ్రీసురభియాగపద్ధతిః .

శ్రీలక్ష్మీ విశేషమంత్రాః

చతురక్షర లక్ష్మీమంత్రం

అస్య శ్రీచతురక్షరలక్ష్మీమహామంత్రస్య -

భృగు ఋషిః - నిచృచ్ఛందః - శ్రీలక్ష్మీః దేవతా -

మమ సర్వాభీష్టసిద్ధ్యర్థే జపే వినియోగః .

ఋష్యాది న్యాసః

భృగు ఋషయే నమః శిరసి - నిచృచ్ఛందసే నమః ముఖే

శ్రీలక్ష్మీ దేవతాయై నమః హృది - వినియోగాయ నమః సర్వాంగే

కరన్యాసః

ఓం శ్రాం అంగుష్టాభ్యాం నమః .

ఓం శ్రీం తర్జనీభ్యాం నమః .

ఓం శ్రూం మధ్యమాభ్యాం నమః .

ఓం శ్రైం అనామికాభ్యాం నమః .

ఓం శ్రౌం కనిష్ఠికాభ్యాం నమః .

ఓం శ్రఃకరతలకరపృష్ఠాభ్యాం నమః ..

ఓం శ్రాం జ్ఞానాయ హృదయాయ నమః .

ఓం శ్రీం ఐశ్వర్యాయ శిరసే స్వాహా .

ఓం శ్రూం శక్త్యై శిఖాయై వషట్ .

ఓం శ్రైం బలాయ కవచాయ హుం .

ఓం శ్రౌం తేజసే నేత్రాభ్యాం వౌషట్ .

ఓం శ్రః వీర్యాయ అస్త్రాయ ఫట్ .

ఓం భూర్భువస్యువః ఇతి దిగ్బంధః ..

ధ్యానం .

మాణిక్యప్రతిమప్రభాం హిమనిభైస్తుంగైశ్చతుర్భిర్గజైః,

హస్తగ్రాహితరత్నకుభసలిలైరాసిచ్యమానాం ముదా .

హస్తాబ్జైర్వరదానమంబుజయుగాభీతిర్దధానాం హరేః,

కాంతాం కాంక్షితపారిజాతలతికాం వందే సరోజాసనాం ..

మూలమంత్రః - ఐం - శ్రీం - హ్రీం - క్లీం .

షడక్షరీ శ్రీమంత్రం

అస్య శ్రీమంత్రస్య - భృగుః ఋషిః - నిచృచ్ఛందః -

శ్రీమహాలక్ష్మీః దేవతా - సర్వయంత్రస్య ప్రాణప్రతిష్ఠాది

సర్వతేజోబలప్రకాశాది సర్వశక్త్యాప్తయే జపే వినియోగః .

ఓం బీజం- శ్రీం శక్తిః -శ్రియై కీలకం .

ఋష్యాది న్యాసః

భృగు ఋషయే నమః శిరసి - నిచృచ్ఛందసే నమః ముఖే

శ్రీమహాలక్ష్మీ దేవతాయై నమః హృది - వినియోగాయ నమః సర్వాంగే

కరన్యాసః

ఓం శ్రాం అంగుష్టాభ్యాం నమః .

ఓం శ్రీం తర్జనీభ్యాం నమః .

ఓం శ్రూం మధ్యమాభ్యాం నమః .

ఓం శ్రైం అనామికాభ్యాం నమః .

ఓం శ్రౌం కనిష్ఠికాభ్యాం నమః .

ఓం శ్రః కరతలకరపృష్ఠాభ్యాంనమః .

హృదయాదిన్యాసః

ఓం శ్రాం జ్ఞానాయ హృదయాయ నమః .

ఓం శ్రీం ఐశ్వర్యాయ శిరసే స్వాహా .

ఓం శ్రూం శక్త్యై శిఖాయై వషట్ .

ఓం శ్రైం బలాయ కవచాయ హుం .

ఓం శ్రౌం తేజసే నేత్రాభ్యాం వౌషట్ .

ఓం శ్రః వీర్యాయ అస్త్రాయ ఫట్ .

ఓం భూర్భువస్సువరోం ఇతి దిగ్బంధః ..

ధ్యానం

వందే పద్మకరాం ప్రసన్నవదనాం సౌభాగ్యదాం భాగ్యదాం

హస్తాభ్యామభయప్రదాం మణిగణైర్నానావిధైర్భూషితాం .

భక్తాభీష్టఫలప్రదాం హరిహరబ్రహ్మాదిభిస్సేవితాం

పార్శ్వే పంకజశంఖపద్మనిధిభిర్యుక్తాం సదా శక్తిభిః ..

మూలమంత్రః - ఓం - శ్రీం - శ్రియై - నమః .

శ్రీలక్ష్మీ బీజమంత్రం

అస్య శ్రీ ఏకాక్షరీలక్ష్మీమహామంత్రస్య -

భృగుః ఋషిః - నిచృచ్ఛందః - శ్రీలక్ష్మీః దేవతా -

మమ ధనాప్తయే జపే వినియోగః .

ఋష్యాది న్యాసః

భృగు ఋషయే నమః శిరసి - నిచృచ్ఛందసే నమః ముఖే

శ్రీలక్ష్మీ దేవతాయై నమః హృది - వినియోగాయ నమః సర్వాంగే

కరన్యాసః

ఓం శ్రాం అంగుష్టాభ్యాం నమః .

ఓం శ్రీం తర్జనీభ్యాం నమః .

ఓం శ్రూం మధ్యమాభ్యాం నమః .

ఓం శ్రైం అనామికాభ్యాం నమః .

ఓం శ్రౌం కనిష్ఠికాభ్యాం నమః .

ఓం శ్రఃకరతలకరపృష్ఠాభ్యాం నమః ..

హృదయాది న్యాసః

ఓం శ్రాం హృదయాయ నమః .

ఓం శ్రీం శిరసే స్వాహా .

ఓం శ్రూం శిఖాయై వషట్ .

ఓం శ్రైం కవచాయ హుం .

ఓం శ్రౌం నేత్రాభ్యాం వౌషట్ .

ఓం శ్రః అస్త్రాయ పట్ .

ఓం భూర్భువస్సువరోం ఇతి దిగ్బంధః ..

ధ్యానం .

కాంత్యా కాంచనసన్నిభాం హిమగిరిప్రఖ్యైశ్చతుర్భిర్గజైః

హస్తాక్షిప్తహిరణ్మయామృతఘటైరాసిచ్యమానాం శ్రియం .

బిభ్రాణాం వరమబ్జయుగ్మమభయం హస్తైః కిరీటోజ్జ్వలాం

క్ష్మౌమాబద్ధనితంబబింబలసితాం వందేఽరవిందస్థితాం ..

(ధ్యానానంతరం సర్వతోభద్రమండలే మండూకాది పరతత్వాంతపీఠదేవతాః

సంస్థాపయేత్ - సంపూజయేత్తతః పూర్వద్యష్టసు దిక్షు నవపీఠశక్తీః పూజయేత్ .)

పూర్వే - ఓం విభూత్యై నమః . ఆగ్నేయే - ఓం ఉన్మత్యై నమః .

దక్షిణస్యాం - ఓం కాంత్యై నమః . నైరృత్యే - ఓం సృష్ట్యై నమః .

పశ్చిమే - ఓం కీర్త్యై నమః . వాయవ్యే - ఓం సంధ్యాయై నమః .

ఉత్తరే - ఓం పుష్ట్యై నమః . ఈశాన్యే - ఓం ఉత్కృష్ట్యై నమః .

పీఠమధ్యే - ఓం ఋత్యై నమః .

(తతః స్వర్ణాది నిర్మితం యంత్రం అగ్ని ఉద్ధారణపూర్వకం

శ్రీం కమలాసనాయై నమః ఇతి మంత్రేణ పుష్పాద్యాసనం దత్వా

పీఠమధ్యే సంస్థాప్య, ప్రాణప్రతిష్ఠాం కృత్వా మూలేన మూర్తిం

ప్రకల్ప్య, ఆవాహనాది ఉపచారైః సంపూజ్య దేవ్యాజ్ఞాం గృహీత్వా

ఆవరణపూజాం కుర్యాత్ .)

ప్రథమావరణపూజా - షట్కోణకేసరేషు

అగ్నికోణే - ఓం శ్రాం హృదయాయ నమః .

నైరృత్యే - ఓం శ్రీం శిరసే స్వాహా .

వాయవ్యే - ఓం శ్రూం శిఖాయై వషట్ .

ఈశాన్యే - ఓం శ్రైం కవచాయ హుం .

పూజ్యపూజకయోర్మధ్యే - ఓం శ్రౌం నేత్రత్రయాయ వౌషట్ .

దేవీ పశ్చిమే - ఓం శ్రః అస్త్రాయ పట్ .

ఇతి షడంగాని పూజయేత్ తతః పుష్పాంజలిం ఆదాయ మూలం ఉచ్చార్య -

ఓం అభీష్టసిద్ధిం మే దేహి శరణాగతవత్సలే .

భక్త్యా సమర్పయే తుభ్యం ప్రథమావరణార్చనం ..

ద్వితీయావరణపూజా - పూజ్యపూజ్యకయోః అంతరాలే ప్రాచ్యాది దిశః ప్రకల్పయేత్

పూర్వే         ఓం వసుదేవాయ నమః వాసుదేవ శ్రీపాదుకాం .

దక్షిణే         ఓం సంకర్షణాయ నమః .

పశ్చిమే         ఓం ప్రద్యుమ్నాయ నమః .

ఉత్తరే         ఓం అనిరుద్ధాయ నమః .

ఆగ్నేయే         ఓం దమకాయ నమః .

నేరృత్యే  ఓం సలిలాయ నమః .

వాయవ్యే         ఓం గుగ్గులాయ నమః .

ఈశాన్యే         ఓం గురుండికాయ నమః .

దేవ్యాః దక్షిణే         ఓం శంఖనిధయే నమః ఓం వసుంధారాయై నమః .

దేవ్యాః వామే         ఓం పద్మనిధయే నమః ఓం వసుమత్యై నమః .

(ఇతి పూజయిత్వా పుష్పాంజలిం ఆదాయ -)

ఓం అభీష్టసిద్ధిం మే దేహి శరణాగతవత్సలే .

భక్త్యా సమర్పయే తుభ్యం ద్వితీయావరణార్చనం ..

తృతీయావరణ పూజా - తతః పత్రాగ్రేషు పూర్వాది క్రమేణ -

పూర్వే        ఓం బలాక్యై నమః బలాకీ శ్రీపాదుకాం .

ఆగ్నేయే        ఓం విమలాయై నమః .

దక్షిణే        ఓం కమలాయై నమః .

నేరృత్యే   ఓం వనమాలికాయై నమః .

పశ్చిమే        ఓం విభీషికాయై నమః .

వాయవ్యే        ఓం పాలికాయై నమః .

ఉత్తరే        ఓం శార్ఙ్గ్యై నమః .

ఈశాన్యే         ఓం వసుమాలికాయై నమః .

(ఇతి పూజయిత్వా పుష్పాంజలిం ఆదాయ -)

ఓం అభీష్టసిద్ధిం మే దేహి శరణాగతవత్సలే .

భక్త్యా సమర్పయే తుభ్యం తృతీయావరణార్చనం ..

దశ దిక్పాలక పూజా - భూపురే ప్రాకారాది క్రమేణ -

పూర్వే        ఓం లం ఇంద్రాయ నమః .

ఆగ్నేయే        ఓం రం అగ్నయే నమః .

దక్షిణే        ఓం యం యమాయ నమః .

నైరృత్యే        ఓం క్షం నిరృతయే నమః .

పశ్చిమే        ఓం వం వరుణాయ నమః .

వాయవ్యే        ఓం యం వాయవే నమః .

ఉత్తరే        ఓం  కం కుబేరాయ నమః .

ఈశాన్యే  ఓం హం ఈశానాయ నమః .

ఈశాన-పూర్వయోర్మధ్యే   ఓం అం బ్రహ్మణే నమః .

నిరృతి-పశ్చిమయోర్మధ్యే  ఓం హ్రీం అనంతాయ నమః .

ఇతి దశ దిక్పాలకాన్ పూజయేత్ -

అస్త్ర పూజా - తత్ బాహ్యే -

పూర్వే        ఓం వం వజ్రాయ నమః .

ఆగ్నేయే        ఓం శం శక్తయే నమః .

దక్షిణే        ఓం దం దండాయ నమః .

నైరృత్యే        ఓం ఖం ఖడ్గాయ నమః .

పశ్చిమే        ఓం పం పాశాయ నమః .

వాయవ్యే        ఓం అం అంకుశాయ నమః .

ఉత్తరే        ఓం గం గదాయై నమః .

ఈశాన్యే        ఓం త్రిం త్రిశూలాయ నమః .

ఈశాన-పూర్వయోర్మధ్యే   ఓం పం పద్మాయ నమః .

నిరృతి-పశ్చిమయోర్మధ్యే    ఓం చం చక్రాయ నమః .

ఇతి అస్త్రాణి పూజయేత్ -

ఘూపదీపాది నీరాజనానంతరం సమ్యక్ పూజయిత్వా జపం కుర్యత్ .

ఇతి శ్రీలక్ష్మీ విశేషమంత్రాః సంపూర్ణాః .

గోదాస్తుతిః

(శ్రీవేదాంతదేశికవిరచితా)

శ్రీవిష్ణుచిత్తకులనందనకల్పవల్లీం

     శ్రీరంగరాజహరిచందనయోగదృశ్యాం .

సాక్షాత్క్షమాం కరుణయా కమలామివాన్యాం

     గోదామనన్యశరణః శరణం ప్రపద్యే .. 1..

వైదేశికః శ్రుతిగిరామపి భూయసీనాం

     వర్ణేషు మాతి మహిమా న హి మాదృశాం తే .

ఇత్థం విదంతమపి మాం సహసైవ గోదే

     మౌనద్రుహో ముఖరయంతి గుణాస్త్వదీయాః .. 2..

త్వత్ప్రేయసః శ్రవణయోరమృతాయమానాం

     తుల్యాం త్వదీయమణినూపురశింజితానాం .

గోదే త్వమేవ జనని త్వదభిష్టవార్హాం

     వాచం ప్రసన్నమధురాం మమ సంవిధేహి .. 3..

కృష్ణాన్వయేన దధతీం యమునానుభావం

     తీర్థైర్యథావదవగాహ్య సరస్వతీం తే .

గోదే వికస్వర ధియాం భవతీ కటాక్షాత్

     వాచః స్ఫురంతి మకరందముచః కవీనాం .. 4..

అస్మాదృశామపకృతౌ చిరదీక్షితానాం

     అహ్నాయ దేవి దయతే యదసౌ ముకుందః .

తన్నిశ్చితం నియమితస్తవ మౌలిదామ్నా

     తంత్రీనినాదమధురైశ్చ గిరాం నిగుంభైః .. 5..

శోణాధరేఽపి కుచయోరపి తుంగభద్రా

     వాచాం ప్రవాహనివహేఽపి సరస్వతీ త్వం .

అప్రాకృతైరపి రసైర్విరజా స్వభావాత్

     గోదాఽపి దేవి కమితుర్నను నర్మదాఽసి .. 6..

వల్మీకతః శ్రవణతో వసుధాత్మనస్తే

     జాతో బభూవ స మునిః కవిసార్వభౌమః .

గోదే కిమద్భుతమిదం యదమీ స్వదంతే

     వక్త్రారవిందమకరందనిభాః ప్రబంధాః .. 7..

భోక్తుం తవ ప్రియతమం భవతీవ గోదే

     భక్తిం నిజాం ప్రణయభావనయా గృణంతః .

ఉచ్చావచైర్విరహసంగమజైరుదంతైః

     శృంగారయంతి హృదయం గురవస్త్వదీయాః .. 8..

మాతః సముత్థితవతీమధివిష్ణుచిత్తం

     విశ్వోపజీవ్యమమృతం వచసా దుహానాం .

తాపచ్ఛిదం హిమరుచేరివ మూర్తిమన్యాం

     సంతః పయోధిదుహితుః సహజాం విదుస్త్వాం .. 9..

తాతస్తు తే మధుభిదః స్తుతిలేశవశ్యాత్

     కర్ణామృతైః స్తుతిశతైరనవాప్తపూర్వం .

త్వన్మౌలిగంధసుభగాముపహృత్య మాలాం

     లేభే మహత్తరపదానుగుణం ప్రసాదం .. 10..

దిగ్దక్షిణాఽపి పరిపక్త్రిమపుణ్యలభ్యాత్

     సర్వోత్తరా భవతి దేవి తవావతారాత్ .

యత్రైవ రంగపతినా బహుమానపూర్వం

     నిద్రాలునాపి నియతం నిహితాః కటాక్షాః .. 11..

ప్రాయేణ దేవి భవతీవ్యపదేశయోగాత్

     గోదావరీ జగదిదం పయసా పునీతే .

యస్యాం సమేత్య సమయేషు చిరం నివాసాత్

     భాగీరథీప్రభృతయోఽపి భవంతి పుణ్యాః .. 12..

నాగేశయః సుతను పక్షిరథః కథం తే

     జాతః స్వయంవరపతిః పురుషః పురాణః .

ఏవం విధాః సముచితం ప్రణయం భవత్యాః

     సందర్శయంతి పరిహాసగిరః సఖీనాం .. 13..

త్వద్భుక్తమాల్యసురభీకృతచారుమౌలేః

     హిత్వా భుజాంతరగతామపి వైజయంతీం .

పత్యుస్తవేశ్వరి మిథః ప్రతిఘాతలోలాః

     బర్హాతపత్రరుచిమారచయంతి భృంగాః .. 14..

ఆమోదవత్యపి సదా హృదయంగమాఽపి

     రాగాన్వితాఽపి లలితాఽపి గుణోత్తరాఽపి .

మౌలిస్రజా తవ ముకుందకిరీటభాజా

     గోదే భవత్యధరితా ఖలు వైజయంతీ .. 15..

త్వన్మౌలిదామని విభోః శిరసా గృహీతే

     స్వచ్ఛందకల్పితసపీతిరసప్రమోదాః .

మంజుస్వనా మధులిహో విదధుః స్వయం తే

     స్వాయంవరం కమపి మంగలతూర్యఘోషం .. 16..

విశ్వాయమానరజసా కమలేన నాభౌ (విశ్వాసమానరజసా)

     వక్షఃస్థలే చ కమలాస్తనచందనేన .

ఆమోదితోఽపి నిగమైర్విభురంఘ్రియుగ్మే

     ధత్తే నతేన శిరసా తవ మౌలిమాలాం .. 17..

చూడాపదేన పరిగృహ్య తవోత్తరీయం

     మాలామపి త్వదలకైరధివాస్య దత్తాం .

ప్రాయేణ రంగపతిరేష బిభర్తి గోదే

     సౌభాగ్యసంపదభిషేకమహాధికారం .. 18..

తుంగైరకృత్రిమగిరః స్వయముత్తమాంగైః

     యం సర్వగంధ ఇతి సాదరముద్వహంతి .

ఆమోదమన్యమధిగచ్ఛతి మాలికాభిః

     సోఽపి త్వదీయకుటిలాలకవాసితాభిః .. 19..

ధన్యే సమస్తజగతాం పితురుత్తమాంగే

     త్వన్మౌలిమాల్యభరసంభరణేన భూయః .

ఇందీవరస్రజమివాదధతి త్వదీయా-

     న్యాకేకరాణి బహుమానవిలోకితాని .. 20..

రంగేశ్వరస్య తవ చ ప్రణయానుబంధాత్

     అన్యోన్యమాల్యపరివృత్తిమభిష్టువంతః .

వాచాలయంతి వసుధే రసికాస్త్రిలోకీం

     న్యూనాధికత్వసమతావిషయైర్వివాదైః .. 21..

దూర్వాదలప్రతిమయా తవ దేహకాంత్యా

     గోరోచనారుచిరయా చ రుచేందిరాయాః .

ఆసీదనుజ్ఝితశిఖావలకంఠశోభం

     మాంగల్యదం ప్రణమతాం మధువైరిగాత్రం .. 22..

అర్చ్యం సమర్చ్య నియమైర్నిగమప్రసూనైః

     నాథం త్వయా కమలయా చ సమేయివాంసం .

మాతశ్చిరం నిరవిశన్నిజమాధిరాజ్యం

     మాన్యా మనుప్రభృతయోఽపి మహీక్షితస్తే .. 23..

ఆర్ద్రాపరాధిని జనేఽప్యభిరక్షణార్థం

     రంగేశ్వరస్య రమయా వినివేద్యమానే .

పార్శ్వే పరత్ర భవతీ యది తత్ర నాసీత్

     ప్రాయేణ దేవి వదనం పరివర్తితం స్యాత్ .. 24..

గోదే గుణైరపనయన్ ప్రణతాపరాధాన్

     భ్రూక్షేప ఏవ తవ భోగరసానుకూలః .

కర్మానుబంధి ఫలదానరతస్య భర్తుః

     స్వాతంత్ర్యదుర్వ్యసనమర్మభిదా నిదానం .. 25..

రంగే తటిద్గుణవతో రమయైవ గోదే

     కృష్ణాంబుదస్య ఘటితాం కృపయా సువృష్ట్యా .

దౌర్గత్యదుర్విషవినాశసుధానదీం త్వాం

     సంతః ప్రపద్య శమయంత్యచిరేణ తాపాన్ .. 26..

జాతాపరాధమపి మామనుకంప్య గోదే

     గోప్త్రీ యది త్వమసి యుక్తమిదం భవత్యాః .

వాత్సల్యనిర్భరతయా జననీ కుమారం

     స్తన్యేన వర్ధయతి దష్టపయోధరాఽపి .. 27..

శతమఖమణినీలా చారు కల్హారహస్తా

     స్తనభరనమితాంగీ సాంద్రవాత్సల్యసింధుః .

అలకవినిహితాభిః స్రగ్భరాకృష్టనాథా

     విలసతు హృది గోదా విష్ణుచిత్తాత్మజా నః .. 28..

ఇతి వికసితభక్తేరుత్థితాం వేంకటేశాత్

     బహుగుణరమణీయాం వక్తి గోదాస్తుతిం యః .

స భవతి బహుమాన్యః శ్రీమతో రంగభర్తుః

     చరణకమలసేవాం శాశ్వతీమభ్యుపైష్యన్ .. 29..

ఇతి శ్రీవేదాంతదేశికవిరచితా గోదాస్తుతిః సమాప్తా .

దేవీధామాష్టకం

కస్మైచిదంఘ్రిప్రణతాఖిలేష్టవిశ్రాణనవ్రీడితకౌస్తుభాయ .

కామారివామాంకజుషే కిరీటకనచ్ఛశాంకాయ నమోఽస్తు ధామ్నే .. 1..

కస్మైచిదుద్యద్రవికోటిభాసే కల్పద్రుమాణామపి గర్వహర్త్రే .

పుండ్రేక్షుపాశాంకుశపుష్పబాణహస్తాయ శస్తాయ నమోఽస్తు ధామ్నే .. 2..

కస్మైచిదాద్యాయ నమోఽస్తు ధామ్నే బంధూకపుష్పాభకలేవరాయ .

కులాద్రివంశాంబుధికౌస్తుభాయ మత్తేభకుంభస్తనబంధురాయ ..

కస్మైచిదాద్యాయ నమోఽస్తు ధామ్నే భండాసురాంభోనిధిబాడవాయ .

భక్తౌఘసంరక్షణదక్షిణాయ భాధీశనీకాశముఖాంబుజాయ .. 4..

కస్మైచిదస్తు ప్రణతిః కరాంబుజాతమ్రదిమ్నా హసతే ప్రవాలం .

కారుణ్యజన్మావనయే కాపర్దిమోదాబ్ధిరాకారజనీకరాయ .. 5..

కల్యాణశైలాధిపమధ్యశృంగనికేతనాయ ప్రణతార్తిహంత్రే .

క్రవ్యాదవైరిప్రముఖేడితాయ కుర్మః ప్రణామం కుతుకాయ శంభౌ .. 6..

కచప్రభానిర్జితనీరదాయ కస్తురికాకుంకుమలేపనాయ .

బింబాధరాయ శ్రుతిబోధితాయ బంధాపనోదాయ నమోఽస్తు ధామ్నే .. 7..

కటాక్షకాంక్షిప్రవరామరాయ కాలారిచిత్తాంబుజభాస్కరాయ .

పటీయసే పాపసమూహభేదే నమోఽస్తు కస్మైచిదమోఘధామ్నే .. 8..

ఇతి శృంగేరి శ్రీజగద్గురు శ్రీసచ్చిదానందశివాభినవనృసింహ-

భారతీస్వామిభిః విరచితం శ్రీదేవీధామాష్టకం సంపూర్ణం .

గోదాష్టోత్తరశతనామావలిః

ఓం శ్రీరంగనాయక్యై నమః . గోదాయై . విష్ణుచిత్తాత్మజాయై .

సత్యై . గోపీవేషధరాయై . దేవ్యై . భూసుతాయై . భోగశాలిన్యై .

తులసీవనసంజాతాయై . (తులసీకాననోద్భుతాయై) శ్రీధన్విపురవాసిన్యై .

శ్రీభట్టనాథప్రియకర్యై . శ్రీకృష్ణహితభోగిన్యై . ఆముక్తమాల్యదాయై .

బాలాయై . శ్రీరంగనాథప్రియాయై . పరాయై . విశ్వంభరాయై . కలాలాపాయై .

యతిరాజసహోదర్యై . శ్రీకృష్ణానురక్తాయై నమః .. 20..

ఓం సుభగాయై నమః . సులభశ్రియై . శ్రీసులక్షణాయై .

లక్ష్మీప్రియసఖ్యై . శ్యామాయై . దయాంచితదృగంచలాయై .

ఫాల్గున్యావిర్భవాయై . రమ్యాయై . ధనుర్మాసకృతవ్రతాయై .

చంపకాశోకపున్నాగమాలతీవిలసత్కచాయై . ఆకారత్రయసంపన్నాయై .

నారాయణపదాశ్రితాయై . శ్రీమదష్టాక్షరమంత్రరాజస్థితమనోధరాయై .

(మనోరథాయై) మోక్షప్రదాననిపుణాయై . మనురాజాధిదేవతాయై .

(మనురత్నాధిదేవతాయై) బ్రహ్మాణ్యై . లోకజనన్యై . లీలామానుషరూపిణ్యై .

బ్రహ్మజ్ఞానప్రదాయై . మాయాయై నమః .. 40..

ఓం సచ్చిదానందవిగ్రహాయై నమః . మహాపతివ్రతాయై .

విష్ణుగుణకీర్తనలోలుపాయై . ప్రపన్నార్తిహరాయై . నిత్యాయై .

వేదసౌధవిహారిణ్యై . శ్రీరంగనాథమాణిక్యమంజరీమంజుభాషిణ్యై .

పద్మప్రియాయై . పద్మహస్తాయై . వేదాంతద్వయబోధిన్యై . సుప్రసన్నాయై .

భగవత్యై . శ్రీజనార్దనజీవికాయై . (జనార్దనదీపికాయై)

సుగంధావయవాయై . చారురంగమంగలదీపికాయై .

ధ్వజవజ్రాంకుశాబ్జమాలతిమృదుపాదతలంఛితాయై .

(కుశాబ్జాంక) తారకాకారనఖరాయై . ప్రవాలమృదులాంగుల్యై .

కూర్మోపమేయపాదోర్ధ్వభాగాయై . శోభనపార్ష్ణికాయై .

వేదార్థభావతత్త్వజ్ఞాయై నమః .. 60..

ఓం లోకారాధ్యాంఘ్రిపంకజాయై నమః . ఆనందబుద్బుదాకారసుగుల్ఫాయై .

పరమాంశకాయై . (పరమాణుకాయై) అతులప్రతిమాభాస్వదంగులీయకభూషితాయై .

(తేజఃశ్రియోజ్జ్వలధృతపాదాంగులిసుభూషితాయై)

మీనకేతనతూణీరచారుజంఘావిరాజితాయై . కుబ్జజానుద్వయాఢ్యాయై .

(కకుద్వజ్జానుయుగ్మాఢ్యాయై) స్వరరంభాభశక్తికాయై .

(స్వర్ణరంభాభసక్థికాయై) విశాలజఘనాయై . పీతసుశ్రోణ్యై .

మణిమేఖలాయై . ఆనందసాగరావర్తగంభీరాంభోజనాభికాయై .

భాస్వద్బలిత్రికాయై . చారుపూర్ణలావణ్యసంయుతాయై .

(చారుజగత్పూర్ణమహోదర్యై) నవరోమావలిరాజ్యై .

(నవవల్లీరోమరాజ్యై) సుధాకుంభస్తన్యై . కల్పమాలానిభభుజాయై .

చంద్రఖండనఖాంచితాయై . ప్రవాలాంగులివిన్యస్తమహారత్నాంగులీయకాయై .

నవారుణప్రవాలాభపాణిదేశసమంచితాయై . కంబుకంఠ్యై నమః .. 80..

ఓం సుచిబుకాయై నమః . బింబోష్ఠ్యై . కుందదంతయుజే .

కారుణ్యరసనిష్పందలోచనద్వయశాలిన్యై . (నేత్రద్వయసుశోభితాయై)

కమనీయప్రభాభాస్వచ్చాంపేయనిభనాసికాయై .

(ముక్తాశుచిస్మితాచరుచాంపేయనిభనాసికాయై)

దర్పణాకారవిపులకపోలద్వితయాంచితాయై .

అనంతార్కప్రకాశోద్యన్మణితాటంకశోభితాయై .

కోటిసూర్యాగ్నిసంకాశనానాభూషణభూషితాయై . సుగంధవదనాయై .

సుభ్రవే . అర్ధచంద్రలలాటికాయై . పూర్ణచంద్రాననాయై .

నీలకుటిలాలకశోభితాయై . సౌందర్యసీమావిలసత్కస్తూరీతిలకోజ్జ్వలాయై .

ధగద్ధగాయమానోద్యన్మణి(సీమంత) భూషణరాజితాయై .

జాజ్జ్వల్యమానసద్రత్నదివ్యచూడావతంసకాయై .

సూర్యచంద్రాదికల్యాణభూషణాంచితవేణికాయై .

(సూర్యార్ధచంద్రవిలసద్భూషణాంచితవేణికాయై)

అత్యర్కానలతేజోవన్మణికంచుకధారిణ్యై . (తేజోఽధిమణి)

సద్రత్నజాలవిద్యోతవిద్యుత్పుంజాభశాటికాయై . (సద్రత్నాంచిత)

నానామణిగణాకీర్ణకాంచనాంగదభూషితాయై నమః .. 100..

(హేమాంగదసుభూషితాయై)

ఓం కుంకుమాగురుకస్తూరిదివ్యచందనచర్చితాయై

నమః . స్వోచితోజ్జ్వలవిద్యోతవిచిత్రమణిహారిణ్యై .

పరిభాస్వద్రత్నపుంజదీప్తస్వర్ణనిచోలికాయై .

అసంఖ్యేయసుఖస్పర్శసర్వావయవభూషణాయై . (సర్వాతిశయభూషణాయై)

మల్లికాపారిజాతాదిదివ్యపుష్పశ్రియాంచితాయై . శ్రీరంగనిలయాయై .

పూజ్యాయై . దివ్యదేవీసేవితాయై నమః .. 108 (దివ్యదేశసుశోభితాయై)

ఇతి గోదాష్టోత్తరశతనామావలిః సమాప్తా .

శ్రీలక్ష్మీ ఆర్యావృత్తం

ఆర్యావృత్తవిచిత్ర నార్యాస్సా జగతి సౌభగత్వకరీ .

వాయ్వా(వార్యా)కాశాద్యఖిలా భూర్యావద్ధార్యతే త్వయా దేవ్యా .. 1..

ఉన్మీలయ మన్నయనే త్వం మాన్యే లక్ష్మి లోకమాన్యాసి .

చిన్మయసుభగావయవే కర్మకరః స్యామహం చ తవ కమితుః .. 2..

మన్మథజనని మనోజ్ఞేఽహమ్మమతారహితయోగికులమహితే .

దృఙ్మలమున్మూలయ మే సమ్యక్ శ్రీకృష్ణమూర్తిమీక్షేఽహం .. 3..

కల్మషఖండనశీలే రమ్యకపోలే సరోజముఖి సుతనో .

అమ్లానపద్మహస్తే నిర్మలమచ్చక్షురీక్షతాం కృష్ణం .. 4..

పూర్వం త్రిగుణమయీ యా సర్వం కార్యం కరోతి యా పశ్చాత్ .

చార్వంబుజాక్షదీక్షాదక్షం మేఽక్షీహ సా రమా కుర్యాత్ .. 5..

వశ్యం యస్యాః సకలం దృశ్యం యస్యాః సమస్తమపి విశ్వం .

నశ్యత్సు యా న నశ్యేత్క్లిశ్యత్సు చ యా కదాఽపి న క్లిశ్యేత్ .. 6..

జ్ఞప్తేః కరణాని చ షట్పంచకృతేర్హేతుభూతకరాణాని .

బుధ్యేయుర్యత్కృతం సిధ్యేద్వై తత్ఫలం చ యత్కృపయా .. 7..

సా శ్రీరాశ్రితరక్షాదిక్షా దుష్కర్మశిక్షణే చ పటుః .

అశ్వాస్యం హి దిదృక్షోర్మేఽక్ష్ణోస్తద్వీక్షణోత్సవం దద్యాత్ .. 8..

సంగీతసాంగవేదా మంగలదేవీ మనోజ్ఞసర్వాంగీ .

భంగాదిదోషరహితా తం గుణరాశిం మమేక్షయేత్స్వపతిం .. 9..

శక్తిః సంవిత్స్ఫూర్తిర్మూర్తిః ప్రవృత్తిశ్చ యుద్వశే నిత్యం .

శక్తా త్వమేవ సుజనోద్ధర్త్రీ తం చేత్ప్రదర్శయ స్వపతిం .. 10..  var  తన్మే ప్రదర్శయ

కుండలరత్నతిలకలసన్నాసామణికంఠసూత్రహారధరా .

అంగదకంకణకాంచీసత్కంచుకపీతవసనరశనాభా .. 11..

సద్రత్నఖచితకింకిణిముద్రాగ్రైవేయనూపురాదిరుచా .

భద్రోద్యదిందువదనా పద్మా మే మధ్వవరదమీక్షయతు .. 12..

యా దేవీ నిజరమణస్యాంకగతా పశ్యతి స్మ తం సతతం .

తస్యాః స్తుతిమితి కృతవాన్కృష్ణదృగర్థీ స వాదిరాజయతిః .. 13..

.. ఇతి శ్రీమద్వాదిరాజపుజ్యచరణవిరచితం శ్రీలక్ష్మీ

                               ఆర్యావృత్తం సంపూర్ణం ..

గోదావరీస్తోత్రం 2

యా స్నానమాత్రాయ నరాయ గోదా గోదానపుణ్యాధిదృశిః కుగోదా .

గోదాసరైదా భువి సౌభగోదా గోదావరీ సాఽవతు నః సుగోదా .. 1..

యా గౌపవస్తేర్మునినా హృతాఽత్ర యా గౌతమేన ప్రథితా తతోఽత్ర .

యా గౌతమీత్యర్థనరాశ్వగోదా గోదావరీ సాఽవతు నః సుగోదా .. 2..

వినిర్గతా త్ర్యంబకమస్తకాద్యా స్నాతుం సమాయాంతి యతోఽపి కాద్యా .

కాఽఽద్యాధునీ దృక్సతతప్రమోదా గోదావరీ సాఽవతు నః సుగోదా .. 3..

గంగోద్గతిం రాతి మృతాయ రేవా తపఃఫలం దానఫలం తథైవ .

వరం కురుక్షేత్రమపి త్రయం యా గోదావరీ సాఽవతు నః సుగోదా .. 4..

సింహే స్థితే వాగధిపే పురోధః సింహే సమాయాంత్యఖిలాని యత్ర .

తీర్థాని నష్టాఖిలలోకఖేదా గోదావరీ సాఽవతు నః సుగోదా .. 5..

యదూర్ధ్వరేతోమునివర్గలభ్యం తద్యత్తటస్థైరపి ధామ లభ్యం .

అభ్యంతరక్షాలనపాటవోదా గోదావరీ సాఽవతు నః సుగోదా .. 6..

యస్యాః సుధాస్పర్ధి పయః పిబంతి న తే పునర్మాతృపయః పిబంతి .

యస్యాః పిబంతోఽమ్బ్వమృతం హసంతి గోదావరీ సాఽవతు నః సుగోదా .. 7..

సౌభాగ్యదా భారతవర్షధాత్రీ సౌభాగ్యభూతా జగతో విధాత్రీ .

ధాత్రీ ప్రబోధస్య మహామహోదా గోదావరీ సాఽవతు నః సుగోదా .. 8..

సమాప్లుతా మయా సా యా సిషేవే పూర్వసాగరం .

సప్తవక్త్రైస్తపః కృష్ణసప్తమ్యాం సతి వాసరే .. 9..

సప్తసుప్తేరసుప్తా సా గుప్తా సాగరమధ్యతః .

గోదావరీ వరీవర్తి న నిద్రాతి కదాచన .. 10..

ఇతి శ్రీవాసుదేవానందసరస్వతీవిరచితం గోదావరీస్తోత్రం సంపూర్ణం .

శ్రీకాకినీస్తోత్రం

అథైకోనషష్టితమః పటలః

శ్రీఆనందభైరవీ ఉవాచ

జ్ఞానేశ్వరీ శుభకరీ పరిభావనీయా

యోగేశ్వరైర్హరిహరైర్గురుభిర్మహేంద్రైః .

తాం కాకినీం పరశివాం పరమేశపత్నీం

సంస్తౌమి చారుహృదయాంబుజపీఠమధ్యే .. 59-1..

ఏకాకినీ త్రిజగతామతినాశకాలే

త్వాం కాకినీం సమరకార్ణా(ణ్డ) కకాకపత్నీం .

త్వం సాక్షిణీ భువనభంగవిధౌ సకాస్తే

భూషండకాకమహిషీవ వయం భజామః .. 59-2..

ఏకాకినీం సకలధారణకాలయోగే

ఆధార్య దేహసమయే సతి కాకినీం త్వాం .

వాయ్వాసనే మనస ఆశు వికారనాశే

కాకేంద్రచంచుచలితామహమేవమీడే .. 59-3..

భావోదయే ప్రణయినీమగతౌ చ భావా

ఆహ్లాదయోగవిభవే భువనేశ్వరీం త్వాం .

మందారహారరుచిరే పరమేశ్వరి త్వం

రక్షాం కురు ప్రథమతో మతిమాశ్రయామి .. 59-4..

చంద్రోదయే సుఖమయీ ద్యుతికోటిదీప్తా

గోప్యాగమే సుమతిభిః స్వమనాంసి శుద్ధా .

సా త్వం సుఖాత్త్వం భవ భావవిపూజనీయే

రక్షాం కురు ప్రథమభాస్కరమంఘ్రిమీడే .. 59-5..

తే పాదపంకజమజస్రమహం భజామి

సానందబిందు విమలాసనభావపుంజే .

గుంజావటీవిమలమాల్యసుశోభితాంగే

స్యామేవ మే చరమభావసమూహదాత్రీ .. 59-6..

పంచాననే దశభుజే సకలాస్త్రయుక్తే

విద్యే భయే నరహరే నరహారభూషే .

ప్రేతాసనే త్రినయనే జననీ త్వమేవ

రక్షే శుభే చరణపంకజమాశ్రయామి .. 59-7..

శ్రీ సుందరి ప్రణతరక్షిణి వేదమాత-

స్తారేశ్వరీ త్వమపి రక్ష వినాశకాలే .

యద్యేకభక్త ఇతిహాసపురాణవక్తా

నిత్యానురక్తహరపాదసరోజమీడే .. 59-8..

తే శ్రీపదం భువనసారమనంతసేవ్యం

యోగాస్పదం కృతిభిరాశ్రయమేకయోగం .

సర్వే భజంతి నిజమోక్షఫలాయ నిత్యం

దీనోఽహమంబ భువనేశి ముదా భజామి .. 59-9..

త్రైలోక్యపూజితపదం హృదయాంబుజస్థం

చిత్తప్రకాశకమలే స్వసుఖానుభూతం .

మాయాశ్రయం సకలసిద్ధినిదానరూపం

మంజీరహారవినతం వరమాశ్రయామి .. 59-10..

కౌటీరహారకమలప్రియమాల్యశోభే

శోభాకరే స్థిరతరా భవ మే హృదబ్జే .

భూమండలే హి బలవాన్కృతకృత్య ఏవ

త్వామీశ్వరీం హృది ముదా సుఖమాశ్రయామి .. 59-11..

నిత్యే పురా భజతి యోగసుసిద్ధయేఽసౌ

శంభుర్గిరీశ ఇతి చేశ్వరపార్శ్వగామి .

సాయుజ్యనాథపదవీం గత ఈశకాంతే

ఏకాకినీ కులవతాంఘ్రియుగం కిమన్యైః .. 59-12..

ధ్యాయంతి యోగిన ఇహాఘసమూహశైలం

సంహార హేతుకసదాఘవినాశనాయ .

చిత్తోత్సవాయ విభవాయ జయాయ భూమేః

దీనోఽహమాశు విభజామి పదం శ్రియే తే .. 59-13..

కృష్ణే సితే విమలపీతనిభే సురక్తే

వర్ణాశ్రయే త్వమవ మామతిదీనమేకం .

పుత్రం తవైవ చరణాంబుజమేవ కాంతం

నీలాంబుజే స్థిరతరం కురు కామదాత్రి .. 59-14..

సర్వేశ్వరీ ప్రియకరి భవభావహంత్రి

నానా ధ్వనిప్రణతకామదుఘే విచిత్రే .

రత్నాంబరే సుఖపదం యది దేహి దాస్యం

త్వం చారువర్ణగలితే పదమాశ్రయామి .. 59-15..

రత్నాకరే సకరుణేఽరుణకోటివర్ణే

స్వర్ణాదినిర్మితసృజాపవిశోభితాంగీ .

త్వం కాకినీ యది కటాక్షనిపాతమేకం

సర్వం కురుష్వ సుఖమోక్షపథప్రమోదీ .. 59-16..

ఆద్యే ప్రవాలవిమలేఽమలమాల్యశోభే

సూక్ష్మేఽతిసూక్ష్మనికరే కరుణానిధానే .

(క ) బాలే వలే ప్రచలే చపలే ప్రలాపే

యోగేశి పాదకమలం కులమాశ్రయామి .. 59-17..

(ఖ ) త్వం షోడశీ ఖరతరా ఖరఖడ్గహస్తే

ఖడ్గేశ్వరీ ప్రఖరవాక్యమథాఢ్యవక్త్రే .

ఖర్జూరహారరుచిరే ఖలహంత్రి తుభ్యం

నిత్యం నమో నమ ఉపేంద్రగిరీంద్రసేవ్యే .. 59-18..

(గ ) గీతానతే తరుతరే ప్రణమామి నిత్యం

గాత్రేశ్వరీ గతిహరే గణనాథసేవ్యే .

గాయంతి తే చరణపంకజసారగీతం

రక్షాప్రచండకలుషాదనుపేక్షణీయం .. 59-19..

(ఘ ) దీర్ఘస్వరే ఘనవరే ఘనఘోరనాదే

ఘోరాననే నవఘనే ఘటనాఘనానాం .

ఘోరాస్పదే ఘటగతే ఘటశూన్యకర్త్రి

త్వం కాకినీ సమవతు క్షితిదోషజాలాత్ .. 59-20..

(ఙ ) ఆనుస్వరే స్మరహరే నను రూపవిద్యే

సంయోగినీప్రబలశత్రువినాశభూతే .

రక్షేఽతిరక్ష కరుణాం కురు దేహి మోక్షం

 (చ ) చండి ప్రచండనయనే చరణం భజే తే .. 59-21..

(ఛ ) ఛత్రప్రదే ఛలహరే ఛదవాసినీ త్వం .

ఛద్మస్థితే హృదయపంకజదక్షయోగే .

(జ ) త్వాం పూజయే జయధరే యదునాథజన్యో .

జాయే జయం యదిహ దేహి పదం భజామి .. 59-22..

(ఝ ) ఝంకే ఝనజ్వలయతీహ రిపుం పిబంతి

త్వం కౌశికీ సకలదేహవిశోధనీ త్వం .

(న ) నిత్యేఽనునాసికపదే సకలార్థదే త్వం

(ఞ ) రక్షాం కురుష్వ విపదే కులపుంజగుంజే .. 59-23..

(ట ) టంకారగేఽట్టహసనే టలలేఽట్టహాసే .

(ఠ ) ఠాక్కారిణీ సఠహరా పరినిష్ఠితా త్వం .

సింహేష్టపృష్ఠనిలయేఽస్థిరయోగభావం

హృత్పద్మకే కురు సదా సకలార్థదాత్రి .. 59-24..

ఏతత్స్తోత్రం పఠేద్ధీమాన్ ధ్యానన్యాసపరాయణః .

విభావ్య స్తౌతి యో యోగీ స యోగీ మోక్షభాగ్భవేత్ .. 59-25..

హృత్పంకరుహమధ్యస్థం స పశ్యతి జగత్త్రయం .

అష్టసిద్ధియుతః శీఘ్రం జీవన్ముక్తో భవేన్నరః .. 59-26..

ఇతి శ్రీరుద్రయామలే మహాతంత్రోద్దీపనే సిద్ధమంత్రప్రకరణే

కాకినీస్తోత్రవిన్యాసో నామోనషష్టితమః పటలః .. 59..

గుహ్యేశ్వరీస్తోత్రం

భగవతి బహురూపే నిర్వికారే నిరంజే

నిమితనిఖిలరూపే నిశ్చయాతీతరూపే .

అఖిలనిగమపారే నిత్యనిత్యస్వభావే

చరణకమలయుగ్మం నౌమి దేవి త్వదీయం .. 1..

హసితముఖశశాంకం జ్యోత్స్నయా రాత్రిభూతం

దశశతకిరణోద్యద్వక్త్రమాధ్యందినం తే .

అరుణవదనశోభా ఔదయీ చాస్తకాలే

చరణకమలయుగ్మం నౌమి దేవి త్వదీయం .. 2..

గలజఠరపదేషు స్వర్గమర్త్యాహిలోకాః

సకలభగణదంతా రోమరాజీ ద్రుమాస్తే .

గిరయ ఇవ నితంబా రక్తశుక్లాః సముద్రాశ్

చరణకమలయుగ్మం నౌమి దేవి త్వదీయం .. 3..

పవనదహనవేగాః శ్వాసప్రశ్వాస ఏవ

ప్రలయప్రభవకాలో మీలనోన్మీలనాభ్యాం .

ద్విదశతపనభూతా భీమవక్త్రాస్త్వదీయాశ్

చరణకమలయుగ్మం నౌమి దేవి త్వదీయం .. 4..

అనుపమతనుదేహం వ్యాప్యమానం సమంతాన్

నిఖిలనిగమసారం దర్శయన్ దేవి దివ్యం .

త్రిభువనమఖిలం తే దర్శితుమేతి బుద్ధిశ్

చరణకమలయుగ్మం నౌమి దేవి త్వదీయం .. 5..

విధిముఖవిబుధాస్తే కింకరాః పాదసంస్థా

ముకుటవిధృతబుద్ధే సర్వమార్గా హి శుద్ధే .

కిము తవ మహిమానం వర్ణయే గుహ్యదేవి

చరణకమలయుగ్మం నౌమి దేవి త్వదీయం .. 6..

అనుపఠతి సమాప్తౌ పూజనే భక్తిమాన్ యో

నుతిమతి వితగోతి స్పష్టమేవాస్య బుద్ధిః .

సకలజనజనన్యా భక్తిసంపత్తిముచ్చైః

కరతలవశగాస్తాః సిద్ధిపుష్టయౌ లభంతే .. 7..

ఇతి శ్రీ స్వయంభూపురాణోద్ధృతం మంజునాథకృతం

గుహ్యేశ్వరీస్తోత్రం సంపూర్ణం ..

దేవీచతుఃషష్ట్యుపచారపూజాస్తోత్రం అథవా పరా మానిసికా పూజా

దేవీమానసికపూజా

దేవీమానసపూజా

ఓం అథ శ్రీ దేవీచతుఃషష్ట్యుపచారపూజాస్తోత్రం .

ఉషసి మాగధమంగలగాయనైః

      ఝటితి జాగృహి జాగృహి జాగృహి .

అతికృపార్ద్రకటాక్షనిఱీక్షణైః

      జగదిదం జగదంబ సుఖీకురు .. 1..

కనకమయవితర్దిశోభమానం

      దిశి దిశి పూర్ణసువర్ణకుంభయుక్తం .

మణిమయమంటపమధ్యమేహి మాతః

      మయి కృపయాశు సమర్చనం గ్రహీతుం .. 2..

కనకకలశశోభమానశీర్షం

      జలధరలంబి సముల్లసత్పతాకం .

భగవతి తవ సంనివాసహేతోః

      మణిమయమందిరమేతదర్పయామి .. 3..

తపనీయమయీ సుతూలికా

      కమనీయా మృదులోత్తరచ్ఛదా .

నవరత్నవిభూషితా మయా

      శిబికేయం జగదంబ తేఽర్పితా .. 4..

కనకమయవితర్దిస్థాపితే తూలికాఢయే

      వివిధకుసుమకీర్ణే కోటిబాలార్కవర్ణే .

భగవతి రమణీయే రత్నసింహాసనేఽస్మిన్

      ఉపవిశ పదయుగ్మం హేమపీఠే నిధాయ .. 5..

మణిమౌక్తికనిర్మితం మహాంతం

      కనకస్తంభచతుష్టయేన యుక్తం .

కమనీయతమం భవాని తుభ్యం

      నవముల్లోచమహం సమర్పయామి .. 6..

దూర్వయా సరసిజాన్వితవిష్ణు-

      క్రాంతయా చ సహితం కుసుమాఢ్యం .

పద్మయుగ్మసదృశే పదయుగ్మే

      పాద్యమేతదురరీకురు మాతః .. 7..

గంధపుష్పయవసర్షపదూర్వా-

      సంయుతం తిలకుశాక్షతమిశ్రం .

హేమపాత్రనిహితం సహ రత్నైః

      అధ్యర్మేతదురరీకురు మాతః .. 8..

జలజద్యుతినా కరేణ జాతీ-

      ఫలతక్కోలలవంగగంధయుక్తైః .

అమృతైరమృతైరివాతిశీతైః

      భగవత్యాచమనం విధీయతాం .. 9..

నిహితం కనకస్య సంపుటే

      పిహితం రత్నపిధానకేన యత్ .

తదిదం జగదంబ తేఽర్పితం

      మధుపర్కం జనని ప్రగృహ్యతాం .. 10..

ఏతచ్చంపకతైలమంబ వివిధైః పుష్పైః ముహుర్వాసితం

      న్యస్తం రత్నమయే సువర్ణచషకే భృంగైః భ్రమద్భిః వృతం .

సానందం సురసుందరీభిరభితో హస్తైః ధృతం తే మయా

      కేశేషు భ్రమరభ్రమేషు సకలేష్వంగేషు చాలిప్యతే .. 11..

మాతః కుంకుమపంకనిర్మితమిదం దేహే తవోద్వర్తనం

      భక్త్యాహం కలయామి హేమరజసా సంమిశ్రితం కేసరైః .

కేశానామలకైః విశోధ్య విశదాన్కస్తూరికోదంచితైః

      స్నానం తే నవరత్నకుంభసహితైః సంవాసితోష్ణోదకైః .. 12..

దధిదుగ్ధఘృతైః సమాక్షికైః సితయా శర్కరయా సమన్వితైః .

స్నపయామి తవాహమాదరాజ్జనని త్వాం పునరుష్ణవారిభిః .. 13..

ఏలోశీరసువాసితైః సకుసుమైర్గంగాది తీర్థోదకైః

      మాణిక్యామలమౌక్తికామృతరసైః స్వచ్ఛైః సువర్ణోదకైః .

మంత్రాన్వైదికతాంత్రికాన్పరిపఠన్సానందమత్యాదరాత్

      స్నానం తే పరికల్పయామి జనని స్నేహాత్త్వమంగీకురు .. 14..

బాలార్కద్యుతి దాడిమీయకుసుమప్రస్పర్ధి సర్వోత్తమం

      మాతస్త్వం పరిధేహి దివ్యవసనం భక్త్యా మయా కల్పితం .

ముక్తాభిః గ్రథితం సుకంచుకమిదం స్వీకృత్య పీతప్రభం

      తప్తస్వర్ణసమానవర్ణమతులం ప్రావర్ణమంగీకురు .. 15..

నవరత్నమయే మయార్పితే

      కమనీయే తపనీయపాదుకే .

సవిలాసమిదం పదద్వయం

      కృపయా దేవి తయోర్నిధీయతాం .. 16..

బహుభిరగరుధూపైః సాదరం ధూపయిత్వా

      భగవతి తవ కేశాన్కంకతైర్మార్జయిత్వా .

సురభిభిరరవిందైశ్చంపకైశ్చార్చయిత్వా

      ఝటితి కనకసూత్రైర్జూటయన్వేష్టయామి .. 17..

సౌవీరాంజనమిదమంబ చక్షుషోస్తే

      విన్యస్తం కనకశలాకయా మయా యత్ .

తన్న్యూనం మలినమపి త్వదక్షిసంగాత్

      బ్రహ్మేంద్రాద్యభిలషణీయతామియాయ .. 18..

మంజీరే పదయోర్నిధాయ రుచిరాం విన్యస్య కాంచీం కటౌ

      ముక్తాహారమురోజయోరనుపమాం నక్షత్రమాలాం గలే .

కేయూరాణి భుజేషు రత్నవలయశ్రేణీం కరేషు క్రమా-

      త్తాటంకే తవ కర్ణయోర్వినిదధే శీర్షే చ చూడామణిం .. 19..

ధమ్మిల్లే తవ దేవి హేమకుసుమాన్యాధాయ ఫాలస్థలే

      ముక్తారాజివిరాజమానతిలకం నాసాపుటే మౌక్తికం .

మాతర్మౌక్తికజాలికాం చ కుచయోః సర్వాంగులీషూర్మికాః

      కటయాం కాంచనకింకిణీర్వినిదధే రత్నావతంసం శ్రుతౌ .. 20..

మాతః ఫాలతలే తవాతివిమలే కాశ్మీరకస్తూరికా-

      కర్పూరాగరుభిః కరోమి తిలకం దేహేఽఙ్గరాగం తతః .

వక్షోజాదిషు యక్షకర్దమరసం సిక్త్వా చ పుష్పద్రవం

      పాదౌ చందనలేపనాదిభిరహం సంపూజయామి క్రమాత్ .. 21..

రత్నాక్షతైస్త్వాం పరిపూజయామి

      ముక్తాఫలైర్వా రుచిరైరవిద్ధైః .

అఖండితైర్దేవి యవాదిభిర్వా

      కాశ్మీరపంకాంకితతండులైర్వా .. 22..

జనని చంపకతైలమిదం పురో

      మృగమదోపయుతం పటవాసకం .

సురభిగంధమిదం చ చతుఃసమం

      సపది సర్వమిదం పరిగృహ్యతాం .. 23..

సీమంతే తే భగవతి మయా సాదరం న్యస్తమేతత్

      సిందూరం మే హృదయకమలే హర్షవర్షం తనోతి .

బాలాదిత్యద్యుతిరివ సదా లోహితా యస్య కాంతీ-

      రంతర్ధ్వాంతం హరతి సకలం చేతసా చింతయైవ .. 24..

మందారకుందకరవీరలవంగపుష్పైః

      త్వాం దేవి సంతతం అహం పరిపూజయామి .

జాతీజపావకులచంపకకేతకాది-

      నానావిధాని కుసుమాని చ తేఽర్పయామి .. 25..

మాలతీవకులహేమపుష్పికా-

      కాంచనారకరవీరకైతకైః .

కర్ణికారగిరికర్ణికాదిభిః

      పూజయామి జగదంబ తే వపుః .. 26..

పారిజాతశతపత్రపాటలైః

      మల్లికావకులచంపకాదిభిః .

అంబుజైః సుకుసుమైశ్చ సాదరం

      పూజయామి జగదంబ తే వపుః .. 27..

లాక్షాసంమిలితైః సితాభ్రసహితైః శ్రీవాససంమిశ్రితైః

      కర్పూరాకలితైః శిరైర్మధుయుతైర్గోసర్పిషా లోడితైః .

శ్రీఖండాగరుగుగ్గులుప్రభృతిభిర్నానావిధైర్వస్తుభిః

      ధూపం తే పరికల్పయామి జనని స్నేహాత్త్వమంగీకురు .. 28..

రత్నాలంకృతహేమపాత్రనిహితైర్గోసర్పిషా లోడితైః

      దీపైర్దీర్ఘతరాంధకారభిదురైర్బాలార్కకోటిప్రభైః .

ఆతామ్రజ్వలదుజ్జ్వలప్రవిలసద్రత్నప్రదీపైస్తథా

      మాతస్త్వామహమాదరాదనుదినం నీరాజయామ్యుచ్చకైః .. 29..

మాతస్త్వాం దధిదుగ్ధపాయసమహాశాల్యన్నసంతానికాః

      సూపాపూపసితాఘృతైః సవటకైః సక్షౌద్రరంభాఫలైః .

ఏలాజీరకహింగునాగరనిశాకుస్తుంభరీసంస్కృతైః

      శాకైః సాకమహం సుధాధికరసైః సంతర్పయామ్యర్చయన్ .. 30..

సాపూపసూపదధిదుగ్ధసితాఘృతాని

      సుస్వాదుభక్తపరమాన్నపురఃసరాణి .

శాకోల్లసన్మరిచిజీరకబాహ్నికాని

      భక్ష్యాణి భుంక్ష్వ జగదంబ మయార్పితాని .. 31..

క్షీరమేతదిదంముత్తమోత్తమం

      ప్రాజ్యమాజ్యమిదముజ్జ్వలం మధు .

మాతరేతదమృతోపమం పయః

      సంభ్రమేణ పరిపీయతాం ముహుః .. 32..

ఉష్ణోదకైః పాణియుగం ముఖం చ

      ప్రక్షాల్య మాతః కలధౌతపాత్రే .

కర్పూరమిశ్రేణ సకుంకుమేన

      హస్తౌ సముద్వర్తయ చందనేన .. 33..

అతిశీతముశీరవాసితం

      తపనీయే కలశే నివేశితం .

పటపూతమిదం జితామృతం

      శుచి గంగాజలమంబ పీయతాం .. 34..

జంబ్వామ్రరంభాఫలసంయుతాని

      ద్రాక్షాఫలక్షౌద్రసమన్వితాని .

సనారికేలాని సదాడిమాని

      ఫలాని తే దేవి సమర్పయామి .. 35..

కూశ్మాండకోశాతకిసంయుతాని

      జంబీరనారంగసమన్వితాని .

సబీజపూరాణి సబాదరాణి

      ఫలాని తే దేవి సమర్పయామి .. 36..

కర్పూరేణ యుతైర్లవంగసహితైస్తక్కోలచూర్ణాన్వితైః

      సుస్వాదుక్రముకైః సగౌరఖదిరైః సుస్నిగ్ధజాతీఫలైః .

మాతః కైతకపత్రపాండురుచిభిస్తాంబూలవల్లీదలైః

      సానందం ముఖమండనార్థమతులం తాంబూలమంగీకురు .. 37..

ఏలాలవంగాదిసమన్వితాని

      తక్కోలకర్పూరవిమిశ్రితాని .

తాంబూలవల్లీదలసంయుతాని

      పూగాని తే దేవి సమర్పయామి .. 38..

తాంబూలనిర్జితసుతప్తసువర్ణవర్ణం

      స్వర్ణాక్తపూగఫలమౌక్తికచూర్ణయుక్తం .

సౌవర్ణపాత్రనిహితం ఖదిరేన సార్ధం

      తాంబూలమంబ వదనాంబురుహే గృహాణ .. 39..

మహతి కనకపాత్రే స్థాపయిత్వా విశాలాన్

      డమరుసదృశరూపాన్బద్ధగోధూమదీపాన్ .

బహుఘృతమథ తేషు న్యస్య దీపాన్ప్రకృష్టా-

      న్భువనజనని కుర్వే నిత్యమారార్తికం తే .. 40..

సవినయమథ దత్వా జానుయుగ్మం ధరణ్యాం

      సపది శిరసి ధృత్వా పాత్రమారార్తికస్య .

ముఖకమలసమీపే తేఽమ్బ సార్థం త్రివారం  var  సార్ధం

      భ్రమయతి మయి భూయాత్తే కృపార్ద్రః కటాక్షః .. 41..

అథ బహుమణిమిశ్రైర్మౌక్తికైస్త్వాం వికీర్య

      త్రిభువనకమనీయైః పూజయిత్వా చ వస్త్రైః .

మిలితవివిధముక్తాం దివ్యమాణిక్యయుక్తాం

      జనని కనకవృష్టిం దక్షిణాం తేఽర్పయామి .. 42..

మాతః కాంచనదండమండితమిదం పూర్ణేందుబింబప్రభం

      నానారత్నవిశోభిహేమకలశం లోకత్రయాహ్లాదకం .

భాస్వన్మౌక్తికజాలికాపరివృతం ప్రీత్యాత్మహస్తే ధృతం

      ఛత్రం తే పరికల్పయామి శిరసి త్వష్ట్రా స్వయం నిర్మితం .. 43..

శరదిందుమరీచిగౌరవర్ణై-

      ర్మణిముక్తావిలసత్సువర్ణదండైః .

జగదంబ విచిత్రచామరైస్త్వా-

      మహమానందభరేణ బీజయామి .. 44..

మార్తాండమండలనిభో జగదంబ యోఽయం

      భక్త్యా మయా మణిమయో ముకురోఽర్పితస్తే .

పూర్ణేందుబింబరుచిరం వదనం స్వకీయ-

      మస్మిన్విలోకయ విలోలవిలోచనే త్వం .. 45..

ఇంద్రాదయో నతినతైర్మకుటప్రదీపై-

      ర్నీరాజయంతి సతతం తవ పాదపీఠం .

తస్మాదహం తవ సమస్తశరీరమేత-

      న్నీరాజయామి జగదంబ సహస్రదీపైః .. 46..

ప్రియగతిరతితుంగో రత్నపల్యాణయుక్తః

      కనకమయవిభూషః స్నిగ్ధగంభీరఘోషః .

భగవతి కలితోఽయం వాహనార్థం మయా తే

      తురగశతసమేతో వాయువేగస్తురంగః .. 47..

మధుకరవృతకుంభన్యస్తసిందూరరేణుః

      కనకకలితఘంటాకింకణీశోభికంఠః .

శ్రవణయుగలచంచచ్చామరో మేఘతుల్యో

      జనని తవ ముదే స్యాన్మత్తమాతంగ ఏషః .. 48..

ద్రుతతరతురగైర్విరాజమానం

      మణిమయచక్రచతుష్టయేన యుక్తం .

కనకమయమముం వితానవంతం

      భగవతి తే హి రథం సమర్పయామి .. 49..

హయగజరథపత్తిశోభమానం

      దిశి దిశి దుందుభిమేఘనాదయుక్తం .

అతిబహు చతురంగసైన్యమేత-

      ద్భగవతి భక్తిభరేణ తేఽర్పయామి .. 50..

పరిఘీకృతసప్తసాగరం

      బహుసంపత్సహితం మయాంబ తే విపులం .

ప్రబలం ధరణీతలాభిధం

      దృఢదుర్గం నిఖిలం సమర్పయామి .. 51..  var  సమర్పితం

శతపత్రయుతైః స్వభావశీతైః

      అతిసౌరభ్యయుతైః పరాగపీతైః .

భ్రమరీముఖరీకృతైరనంతైః

      వ్యజనైస్త్వాం జగదంబ వీజయామి .. 52..

భ్రమరలులితలోలకుంతలాలీ-

      విగలితమాల్యవికీర్ణరంగభూమిః .

ఇయమతిరుచిరా నటీ నటంతీ

      తవ హృదయే ముదమాతనోతు మాతః .. 53..

ముఖనయనవిలాసలోలవేణీ-

      విలసితనిర్జితలోలభృంగమాలాః .

యువజనసుఖకారిచారులీలా

      భగవతి తే పురతో నటంతి బాలాః .. 54..

భ్రమదలికులతుల్యాలోలధమ్మిల్లభారాః

      స్మితముఖకమలోద్యద్దివ్యలావణ్యపూరాః .

అనుపమితసువేషా వారయోషా నటంతి

      పరభృతకలకంఠ్యో దేవి దైన్యం ధునోతు .. 55..

డమరుడిండిమజర్ఝరఝల్లరీ-

      మృదురవద్రగడద్ద్రగడాదయః .

ఝటితి ఝాంకృతఝాంకృతఝాంకృతైః

      బహుదయం హృదయం సుఖయంతు తే .. 56..

విపంచీషు సప్తస్వరాన్వాదయంత్య-

      స్తవ ద్వారి గాయంతి గంధర్వకన్యాః .

క్షణం సావధానేన చిత్తేన మాతః

      సమాకర్ణయ త్వం మయా ప్రార్థితాసి .. 57..

అభినయకమనీయైర్నర్తనైర్నర్తకీనాం

      క్షనమపి రమయిత్వా చేత ఏతత్త్వదీయం .

స్వయమహమతిచితైర్నృత్తవాదిత్రగీతైః

      భగవతి భవదీయం మానసం రంజయామి .. 58..

తవ దేవి గుణానువర్ణనే

      చతురా నో చతురాననాదయః .

తదిహైకముఖేషు జంతుషు

      స్తవనం కస్తవ కర్తుమీశ్వరః .. 59..

పదే పదే యత్పరిపూజకేభ్యః సద్యోఽశ్వమేధాదిఫలం దదాతి .

తత్సర్వపాపక్షయ హేతుభూతం ప్రదక్షిణం తే పరితః కరోమి .. 60..

రక్తోత్పలారక్తలతాప్రభాభ్యాం ధ్వజోర్ధ్వరేఖాకులిశాంకితాభ్యాం .

అశేషవృందారకవందితాభ్యాం నమో భవానీపదపంకజాభ్యాం .. 61..

చరణనలినయుగ్మం పంకజైః పూజయిత్వా

      కనకకమలమాలాం కంఠదేశేఽర్పయిత్వా .

శిరసి వినిహితోఽయం రత్నపుష్పాంజలిస్తే

      హృదయకమలమధ్యే దేవి హర్షం తనోతు .. 62..

అథ మణిమయంచకాభిరామే

      కనకమయవితానరాజమానే .

ప్రసరదగరుధూపధూపితేఽస్మి-

      న్భగవతి భవనేఽస్తు తే నివాసః .. 63..

ఏతస్మిన్మణిఖచితే సువర్ణపీఠే

      త్రైలోక్యాభయవరదౌ నిధాయ హస్తౌ .

విస్తీర్ణే మృదులతరోత్తరచ్ఛదేఽస్మి-

      న్పర్యంకే కనకమయే నిషీద మాతః .. 64..

తవ దేవి సరోజచిహ్నయోః పదయోర్నిర్జితపద్మరాగయోః .

అతిరక్తతరైరలక్తకైః పునరుక్తాం రచయామి రక్తతాం .. 65..

అథ మాతరుశీరవాసితం నిజతాంబూలరసేన రంజితం .

తపనీయమయే హి పట్టకే ముఖగండూషజలం విధీయతాం .. 66..

క్షణమథ జగదంబ మంచకేఽస్మి-

      న్మృదుతలతూలికయా విరాజమానే .

అతిరహసి ముదా శివేన సార్ధం

      సుఖశయనం కురు తత్ర మాం స్మరంతీ .. 67..

ముక్తాకుందేందుగౌరాం మణిమయకుటాం రత్నతాటంకయుక్తా-

      మక్షస్రక్పుష్పహస్తామభయవరకరాం చంద్రచూడాం త్రినేత్రాం .

నానాలంకారయుక్తాం సురమకుటమణిద్యోతితస్వర్ణపీఠాం

      సానందాం సుప్రసన్నాం త్రిభువనజననీం చేతసా చింతయామి .. 68..

ఏషా భక్త్యా తవ విరచితా యా మయా దేవి పూజా

      స్వీకృత్యైనాం సపది సకలాన్మేఽపరాధాన్క్షమస్వ .

న్యూనం యత్తత్తవ కరుణయా పూర్ణతామేతు సద్యః

      సానందం మే హృదయకమలే తేఽస్తు నిత్యం నివాసః .. 69..

పూజామిమాం యః పఠతి ప్రభాతే

      మధ్యాహ్నకాలే యది వా ప్రదోషే .

ధ్రమార్థకామాన్పురుషోఽభ్యుపైతి

      దేహావసానే శివభావమేతి .. 70..

పూజామిమాం పఠేన్నిత్యం పూజాం కర్తుమనీశ్వరః .

పూజాఫలమవాప్నోతి వాంఛితార్థం చ విందతి .. 71..

ప్రత్యహం భక్తిసంయుక్తో యః పూజనమిదం పఠేత్ .

వాగ్వాదిన్యాః ప్రసాదేన వత్సరాత్స కవిర్భవేత్ .. 72..

ఇతి శ్రీమత్పరమహంసపరివ్రాజకాచార్యస్య

శ్రీగోవిందభగవత్పూజ్యపాదశిష్యస్య

శ్రీమచ్ఛంకరభగవతః కృతౌ

దేవీచతుఃషష్ట్యుపచారపూజాస్తోత్రం సంపూర్ణం ..

శ్రీసరస్వతీస్తోత్రం బృహస్పతివిరచితం

శ్రీగణేశాయ నమః .

బృహస్పతిరువాచ -

సరస్వతి నమస్యామి చేతనాం హృది సంస్థితాం .

కంఠస్థాం పద్మయోనిం త్వాం హ్రీంకారాం సుప్రియాం సదా .. 1..

మతిదాం వరదాం చైవ సర్వకామఫలప్రదాం .

కేశవస్య ప్రియాం దేవీం వీణాహస్తాం వరప్రదాం .. 2..

మంత్రప్రియాం సదా హృద్యాం కుమతిధ్వంసకారిణీం .

స్వప్రకాశాం నిరాలంబామజ్ఞానతిమిరాపహాం .. 3..

మోక్షప్రియాం శుభాం నిత్యాం సుభగాం శోభనప్రియాం .

పద్మోపవిష్టాం కుండలినీం శుక్లవస్త్రాం మనోహరాం .. 4..

ఆదిత్యమండలే లీనాం ప్రణమామి జనప్రియాం .

జ్ఞానాకారాం జగద్ద్వీపాం భక్తవిఘ్నవినాశినీం .. 5..

ఇతి సత్యం స్తుతా దేవీ వాగీశేన మహాత్మనా .

ఆత్మానం దర్శయామాస శరదిందుసమప్రభాం .. 6..

శ్రీసరస్వత్యువాచ -

వరం వృణీష్వ భద్రం త్వం యత్తే మనసి వర్తతే .

బృహస్పతిరువాచ -

ప్రసన్నా యది మే దేవి పరం జ్ఞానం ప్రయచ్ఛ మే .. 7..

శ్రీసరస్వత్యువాచ -

దత్తం తీ నిర్మలం జ్ఞానం కుమతిధ్వంసకారకం .

స్తోత్రేణానేన మాం భక్త్యా యే స్తువంతి సదా నరాః .. 8..

లభంతే పరమం జ్ఞానం మమ తుల్యపరాక్రమాః .

కవిత్వం మత్ప్రసాదేన ప్రాప్నువంతి మనోగతం .. 9..

త్రిసంధ్యం ప్రయతో భూత్వా యస్త్విమం పఠతే నరః .

తస్య కంఠే సదా వాసం కరిష్యామి న సంశయః .. 10..

.. ఇతి శ్రీరుద్రయామలే శ్రీబృహస్పతివిరచితం సరస్వతీస్తోత్రం

సంపూర్ణం ..

గుహ్యషోఢాన్యాసోపనిషత్

అథ గుహ్యాం న్యసేత్ . శివో భవేత్ . శక్తిరూపో భవేత్ .

విద్యారాజ్ఞీన్యాసమేవం చరేత్ . న జపో న పూజా న సాధనం న

కాలనియమో న దివా న రాత్రిః . సర్వకాలం న్యసేత్ . శక్తియుక్తో భవేత్ .

యథాధికారవాన్ న్యసేత్ . పూర్ణదీక్షాం లభేత్ . షోఢారూపో భవేత్ .

చింతామణిర్భవేత్ . క్రీం మాతృస్థానే న్యసేత్ . పరాత్ పరతరో భవేత్ .

శివో భవేదిత్యేకః . అథ తారాద్వయపుటితాం మాతృకాం మాతృకాపుటితాం

తాం మాతృకాస్థానే న్యసేత్ . పరాతీతారూపో భవేదితి ద్వితీయః . అథ

శక్తికాద్వయపుటితాం మాతృకాం మాతృకాపుటితాం తాం న్యసేత్ . తుర్యారూపో

భవేత్ . తృతీయకలారూపో భవేత్ . కాలసంకలనాత్ కాలీ . సహేలం సలీలం

వా స్మరణాద్వరదానేషు చతురా . తేనేయం దక్షిణా . సంబోధనద్వయపుటితాం

మాతృకాం మాతృకాపుటితం నామద్వయం లిపిస్థానే న్యసేత్ . తుర్యాత్ పరారూపో

భవేత్ . చతుర్థీకలారూపో భవేత్ . లోకపాలసంవాదినీ చతుర్థీ .

అథ పంచమీం కలాం న్యసేత్ . పంచమీకలారూపో భవేత్ . సుభగాత్రయం

కూర్చవహ్నిలలనాం వహ్నేస్త్రికోణదైవతస్య లాలనాచ్ఛ్రీకంఠరూపస్తుర్యా

పరాతీతా . ఏతత్పుటితమాతృకాపుటితమేతన్మంత్రం మాతృకాస్థానే న్యసేదితి

పంచమీ . శివత్వం గచ్ఛతి . స సర్వరూపో భవేత్ . అథ షష్ఠీం

కలాం న్యసేత్ . పూర్ణాం విద్యారాజ్ఞీం లిపిస్థానే న్యసేద్వ్యాపయేత్ . స శివో

భవేత్ . స సర్వజ్ఞత్వం గచ్ఛతి . స కవిర్భవేత్ . స సంన్యాసీ భవేత్ .

దేవో హ వై భవేత్ . విశ్వరూపో భవేత్ . అయుతం న్యసేత్ . ఋషిచ్ఛందాది

పూర్వవద్భవేత్ . బ్రహ్మాండగోలకేఽపి యా జగతీతలే తాం సర్వాం భునక్తి .

యస్యాః స్మరణాత్ సిద్ధో నిదేశవర్తీ చ భవేత్ తాం న్యసేత్ . న్యసనం

న్యాసః . సమ్యక్ న్యాసః సన్న్యాసః . న తు ముండితముండః . తస్య దేవాదయో

నమస్యంతీతి ప్రోతం వేద . ఓం శివం ..

(శాక్త-ఉపనిషదః)

ఇత్యాథర్వణే సౌభాగ్యకాండే గుహ్యషోఢాన్యాసోపనిషత్ సమాప్తా .