Sacred Stotras & Deities

గుహ్యకాల్యుపానిషత్

అథర్వవేదమధ్యే తు శాఖా ముఖ్యతమా హి షట్ .

స్వయంభువా యాః కథితాః పుత్రాయాథర్వణే పురా .. 1..

తాసు గుహ్యోపనిషదస్తిష్ఠంతి వరవర్ణిని .

నామాని శృణు శాఖానాం తత్రాద్యా వారతంతవీ .. 2..

మౌంజాయనీ ద్వితీయా తు తృతీయా తార్ణబైందవీ .

చతుర్థీ శౌనకీ ప్రోక్తా పంచమీ పైప్పలాదికా .. 3..

షష్ఠీ సౌమంతవీ జ్ఞేయా సారాత్ సారతమా ఇమాః .

గుహ్యోపనిషదో గృఢాః సంతి శాఖాసు షట్స్వపి .. 4..

తా ఏకీకృత్య సర్వాస్తు మయాఽస్యాం వినివేశితాః .

సంహితాయాం సాధకానాముద్ధారాయ వరాననే .. 5..

తాస్తే వదామి యత ప్రోక్తం ధ్యానం కుర్వంతి దేవతాః .

విరాట్ధ్యానం హి తజ్జ్ఞేయం మహాపాతకనాశనం .. 6..

బ్రహ్మాండాద్బహిరూర్ధ్వం హి మహత్తత్త్వమహంకృతిః .

రూపాణి పంచ తన్మాత్రాః పురుషః ప్రకృరతిర్నవ .. 7..

మహాపాతాలపాదాంతలంబా తస్యా జయం స్మరేత్ .

వ్బ్రహ్మాండార్ధం కపాలం హి శిరస్తమ్యా విభావయేత్ .. 8..

దేవలోకో లలాటం చ పట్వింశల్లక్షయోజనం .

మేరుః సమింతదండోఽమ్యా గ్రహరత్నసమాకులః .. 9..

అంతర్వీథీ నాగవీథీ భ్రువావమ్యాః ప్రకీర్తితే .

శివలోకశ్చ వైకుంఠలోకః కర్ణావుభౌ మతౌ .. 10..

లోహితం తిలకం ధ్యాయేన్నాసా మందాకినీ తథా .

చక్షుషీ చంద్రసూర్యౌ చ పక్ష్మాణి కిరణాస్తథా .. 11..

గండౌ న్యాతాం తపోలోకసత్యలోకౌ యథాక్రమం .

జనోలోకమహర్లోకౌ కపోలౌ పరికీర్తితౌ .. 12..

స్యాతాం హిమాద్రికౌమాసౌ తమ్యాం దేవ్యాస్తు కృండలే .

స్వర్లోకశ్చ భువర్లోకో దేవ్యా ఓష్ఠాధరౌ మతౌ .. 13..

దిక్పతీనాం గ్రహాణాం చ లోకాశ్చాథ రదావలీ .

గంధర్వసిద్ధసాధ్యానాం పితృరకిన్నరరక్షసాం .. 14..

పిశాచయక్షాప్సరసాం మరీచీయాయినాం తథా .

విద్యాధరాణామాజ్యోష్మపాణాం సోమైకపాయినాం .. 15..

సప్తర్షీణాం ధ్రువస్యాపి లోకా ఊర్ధ్వరదావలీ .

ముఖం చ రోదసీ జ్ఞేయం ద్యౌర్లోకశ్చిబుకం తథా .. 16..

బ్రహ్మలోకో గలః ప్రోక్తో వాయవ ప్రాణరూపిణః .

వనస్పతయ ఓషధ్యో లోమాని పరిచక్షతే .. 17..

విద్యుద్దృష్టిరహోరాత్రం నిమేషోన్మేషసంజ్ఞకం .

విశ్వం తు హృదయం ప్రోక్తం పృథివీ పాద ఉచ్యతే .. 18..

తలం తలాతలం చైవ పాతాలం సుతలం తథా .

రసాతలం నాగలోకాః పాదాంగుల్యః ప్రకీర్తితాః .. 19..

వేదా వాచః స్యందమానా నదా నద్యోఽమితా మతాః .

కలాః కాష్ఠా ముహూర్తాశ్చ ఋతవోఽయనమేవ చ .. 20..

పక్షా మాసాస్తథా చాబ్దాశ్చత్వారోఽపి యుగాః ప్రియే .

కఫోణిర్మణిబంధశ్చ తదూరుకటిబంధనాః .. 21..

ప్రపదాశ్చ స్ఫిచశ్చైవ సర్వాంగాని ప్రచక్షతే .

వైశ్వానరః కాలమృత్యుర్జిహ్వాత్రయమిదం స్మృతం .. 22..

ఆబ్రహ్మస్తంబపర్యంతం తనుమస్యాః ప్రచక్షతే .

ప్రలయో భోజనే కాలస్తృప్తిస్తేన చ నాసికా .. 23..

జ్ఞేయః పార్శ్వపరీవర్తో మహాకల్పాంతరోద్భవః .

విరాడ్రూపవోస్య తే ధ్యానమితి సంక్షేపతోఽర్పితం .. 24..

తస్యాః స్వరూపవిజ్ఞానం సపర్యా పరికీర్తితా .

తదేవ హి శ్రుతిప్రోక్తమవధారయ పార్వతి .. 25..

యథోర్ణనాభిః సూత్రాణి సృజత్యపి గిలత్యపి .

యథా పృథివ్యామోషధ్యః సంభవంతి గిలంత్యపి .. 26..

పురుషాత్ కేశలోమాని జాయంతే చ క్షరనత్యపి .

ఉత్పద్యంతే విలీయంతే తథా తస్యాం జగత్యపి .. 27..

జ్వలతః పావకాద్యద్వత్ స్ఫులింగాః కోటికోటిశః .

నిర్గత్య చ వినశ్యంతి విశ్వం తస్యాస్తథా ప్రియే .. 28..

ఋచో యజూంషి సామాని దీక్షా యజ్ఞాః సదక్షిణాః .

అధ్వర్యుర్యజమానశ్చ భువనాని చతుర్దశ .. 29..

బ్రహ్మవిష్ణ్వాదికా దేవా మనుష్యాః పశవో యతః .

ప్రాణాపానౌ వ్రీహయశ్చ సత్యం శ్రద్ధా విధిస్తపః .. 30..

సముద్రా గిరయో నద్యః సర్వే స్థావరజంగమాః .

విసృజ్యేమాని సర్గాదౌ త్వం ప్రకాశయసే తతః .. 31..

జంగమాని విధాయాంధే విశత్యప్రతిభూతకం .

నవద్వారం పురం కృత్వా గవాక్షాణీంద్రియాణ్యపి .. 32..

సా పశ్యత్యత్తి వహతి స్పృశతి క్రీడతీచ్ఛతి .

శృణోతి జిఘ్రతి తథా రమతే విరమత్యపి .. 33..

తయా ముక్తం పురం తద్ధి మతమిత్యభిధీయతే .. 34..

యే తపః క్షీణదోషాస్తే నైవ పశ్యంతి భావితాం .

జ్యోతిర్మయీం శరీరేఽన్తిర్ధ్యాయమానాం మహాత్మభిః .. 35..

బృహచ్చ తద్దివ్యమచింత్యరూపం సూక్ష్మాచ్చ తత్ సూక్ష్మతరం విభాతి .

దూరాత్ సుదూరే తదిహాస్తి కించిత్ పశ్యేత్త్విహైతన్నిహితం గుహాయాం .. 36..

న చక్షుషా గృహ్యతే నాపి వాచా నాన్యైర్యోగైర్న హి సా కర్మణా వా .

జ్ఞానప్రసాదేన విశుద్ధసత్త్వః తతస్తు తాం పశ్యతి నిష్కలాం చ .. 37..

యథా నద్యః స్యందమానాః సముద్రే గచ్ఛంత్యస్తం నామరూపే విహాయ .

తథా విద్వాన్ నామరూపాద్విముక్తః పరాత్ పరాం జగదంబాముపైతి .. 38..

సర్వే వేదా యత్పదమామనంతి తపాంసి సర్వాణి చ యద్వదంతి .

యదిచ్ఛంతో బ్రహ్మచర్యం చరంతి తత్తే పదం సంగ్రహేణ బ్రవీమి .. 39..

సైవైతత్ .

ఏషైవాలంబనం శ్రేష్ఠం సైషైవాలంబనం పరం .

ఏషైవాలంబనం జ్ఞాత్వా బ్రహ్మలోకే మహీయతే .. 40..

ఇంద్రియేభ్యః పరా హ్యర్థా హ్యర్థేభ్యశ్చ పరం మనః .

మనసస్తు పరా బుద్ధిర్బుద్ధేరాత్మా మహాన్ పరః .. 41..

మహతః పరమవ్యక్తమవ్యక్తాత్ పురుషః పరః .

పురుషాత్తు పరా దేవీ సా కాష్ఠా సా పరా గతిః .. 42..

యథోదకం గిరౌ సృష్టం సముద్రేషు విధావతి .

ఏవం ధర్మాన్ పృథక పశ్యంస్తామేవానువిధావతి .. 43..

ఏకా గుహ్యా సర్వభూతాంతరాత్మా ఏక రూపం బహుధా యా కరోతి .

తామాత్మస్థాం యేఽనుపశ్యంతి ధీరాః తేషాం సుఖం శాశ్వతం నేతరేషాం .. 44..

న తత్ర సూర్యో భాతి న చంద్రతారకం నేమా విద్యుతో భాంతి కుతోఽయమగ్నిః .

తామేవ భాంతీమనుభాతి సర్వం తస్యా భాసా సర్వమిదం విభాతి .. 45..

యస్యాః పరం నాపరమస్తి కించిత్ యస్యా నాణీయో న జ్యాయోఽస్తి కించిత్ .

వృక్ష ఇవ స్తబ్ధా దివి తిష్ఠత్యేకా యదంతః పూర్ణామవగత్య పూర్ణః .. 46..

సర్వాననశిరోగ్రీవా సర్వభూతగుహాశయా .

సర్వత్రస్థా భగవతీ తస్మాత్ సర్వగతా శివా .. 47..

సర్వతః పాణిపాదాంతా సర్వతోఽక్షిశిరోముఖా .

సర్వతః శ్రుతిమత్యేషా సర్వమావృత్య తిష్ఠతి .. 48..

సర్వేంద్రియగుణాభాసా సర్వేంద్రియవివర్జితా .

సర్వేషాం ప్రభురీశానీ సర్వేషాం శరణం సుహృత్ .. 49..

నవద్వారే పురే దేవీ హంసీ లీలాయతాం బహిః .

ధ్యేయా సర్వస్య లోకస్య స్థావరస్య చరస్య చ .. 50..

అపాణిపాదా జననీ గ్రహీత్రీ పశ్యత్యచక్షుః సా శ్రుణోత్యర్ణా .

సా వేత్తి వేద్యం న చ తస్యాస్తు వేత్తా తామాహురగ్ర్యాం మహతీం మహీయసీం .. 51..

సా చైవాగ్నిః సా చ సూర్యః సా వాయుః సా చ చంద్రమా .

సా చైవ శుకః సా బ్రహ్మ సా చాపః సా ప్రజాపతిః .

సా చైవ స్త్రీ సా చ పుమాన్ సా కుమారః కుమారికా .. 52..

ఋచో అక్షరే పరమే వ్యోమన్ యస్యాం దేవా అధిరుద్రా నిషేదుః .

యస్తాం న వేద కిమృచా కరిష్యతి యే తాం విదుస్తు ఇమే సమాసతే .. 53..

ఛందాంసి యజ్ఞాః క్రతవో వ్రతాని భృతం భవ్యం యచ్చ వేదా వదంతి .

సర్వం దేవీ సృజతే విశ్వమేతత్ తస్యాశ్చాన్యో మాయయా సన్నిరుద్ధః .. 54..

మాయాం తు ప్రకృతిం విద్యాత్ ప్రభుం తస్యా మహేశ్వరీం .

అస్యా అవయవైః సూక్ష్మైర్వ్యాప్తం సర్వమిదం జగత్ .. 55..

యా దేవానాం ప్రభవా చోద్భవా చ విశ్వాధిపా సర్వభూతేషు గూఢా .

హిరణ్యగర్భం జనయామాస పూర్వం సా నో బుద్ధ్యా శుభయా సంయునక్తుం .. 56..

సూక్ష్మాతిసూక్ష్మం సలిలస్య మధ్యే విశ్వస్య స్రష్ట్రీమనేకాననాఖ్యాం .

విశ్వస్య చైకాం పరివేష్టయిత్రీం జ్ఞాత్వా గుహ్యాం శాంతిమత్యంతమేతి .. 57..

సా హ్యేవ కాలే భువనస్య గోప్త్రీ విశ్వాధిపా సర్వభూతేషు గూఢా .

యమ్యాం ముక్తా బ్రద్మర్షయోఽపి దేవాః జ్ఞాత్వా తాం ముత్యుపాశాంఛినత్తి .. 58..

ఘృతాత్ పరం మండమివాతిసూక్ష్మం జ్ఞాత్వా కాలీం సర్వభూతేషు గూఢాం .

కల్పాంతే వై సర్వసంహారకత్రీం జ్ఞాత్వా గుహ్యాం ముచ్యతే సర్వపాపైః .. 59..

ఏషా దేవీ విశ్వయోనిర్మహాత్మా సదా జనానాం హృది సన్నివిష్టా .

హృదా మనీషా మనసాభికౢప్తా యే తాం విదురమృతాస్తే భవంతి .. 60..

యదా తమస్తత్ర దివా న రాత్రిః న సన్న చాసద్భగవత్యేవ గుహ్యా .

తదక్షరం తత్సవితుర్వరేణ్యం ప్రజ్ఞా చ తస్యాః ప్రసృతా పరా సా .. 61..

నైనామూర్ధ్వం న తిర్యక్ చ న మధ్యం పరిజగ్రభత్ .

న తస్యాః ప్రతిమాభిశ్చ తస్యా నామ మహద్యశః .. 62..

న సందృశే తిష్ఠతి ల్రూపమస్యాః న చక్షుషా పశ్యతి కశ్చిదేనాం .

హృదా మనీషా మనసాభికౢప్తాం య ఏనాం విదురమృతాస్తే భవంతి .. 63..

భూయశ్చ సృష్ట్వా త్రిదశానథేశీ సర్వాధిపత్యం కురుతే భవానీ .

సర్వా దిశశ్చోర్ధ్వమధశ్చ తిర్యక్ ప్రకాశయంతీ భ్రాజతే గుహ్యకాలీ .. 64..

నైవ స్త్రీ న పుమానేషా నైవ చేయం నపుంసకా .

యద్యచ్ఛరీరమాదత్తే తేన తేనైవ యుజ్యతే .. 65..

ధర్మావహాం పాపనుదాం భగేశీం జ్ఞాత్వాత్మస్థామమృతాం విశ్వమాతరం .

తామీశ్వరాణాం పరమాం మహేశ్వరీం తాం దేవతానాం పరదేవతాం చ .

పతిం పతీనాం పరమాం పురస్తాత్ విద్యావతాం గుహ్యకాలీం మనీషాం .. 66..

తస్యా న కార్యం కరణం చ విద్యతే న తత్సమా చాప్యధికా చ దృశ్యతే .

పరాస్యాః శక్తిర్వివిధైవ శ్రూయతే స్వాభావికీ జ్ఞానబలక్రియా చ .. 67..

కశ్చిన్న తస్యాః పతిరస్తి లోకే న చేశితా నైవ తస్యాశ్చ లింగం .

సా కారణం కారణకారణాధిపా నాస్యాశ్చ కశ్చిజ్జనితా న చాధిపః .. 68..

ఏకా దేవీ సర్వభూతేషు గూఢా వ్యాప్నోత్యేతత్ సర్వభూతాంతరస్థా .

కర్మాధ్యక్షా సర్వభూతాధివాసా సాక్షిణ్యేపా కేవలా నిర్గుణా చ .. 69..

వశిన్యేకా నిష్కియాణాం బహూనాం ఏకం బీజం బహుధా యా కరోతి .

నానారూపా దశవక్త్రం విధత్తే నానారూపాన్ యా చ బాహూన్ బిభర్తి .. 70..

నిత్యా నిత్యానాం చేతనా చేతనానాం ఏకా బహూనాం విదధాతి కామాన్ .

తత్కారణం సాంఖ్యయోగాధిగమ్యం జ్ఞాత్వా దేవీం ముచ్యతే సర్వపాశైః .. 71..

యా వై విష్ణుం పాలనే సన్నియుంక్తే రుద్రం దేవం సంహృతౌ చాపి గుహ్యా .

తాం వై దేవీమాత్మబుద్ధిప్రకాశాం ముముక్షుర్వై శరణమహం ప్రపద్యే .. 72..

నిష్కలా నిష్క్రియాం శాంతాం నిరవద్యాం నిరంజనాం .

బహ్వాననకరాం దేవీం గుహ్యామేకాం సమాశ్రయే .. 73..

ఇయం హి గుహ్యోపనిషత్ సుగృఢా యస్యా బ్రహ్మా దేవతా విశ్వయోనిః .

ఏతాం జపంశ్చాన్వహం భక్తియుక్తః సత్యం సత్యం హ్యమృరతః సంబభూవ .. 74..

వేదవేదాంతయోర్గుహ్యం పురాకల్పే ప్రచోదితం .

నాప్రశాంతాయ దాతవ్యం నాశిష్యాయ చ వై పునః .. 75..

యస్య దేవ్యాం పరా భక్తిర్యథా దేవ్యాం తథా గురౌ .

తస్యైతే కథితా హ్యర్థాః ప్రకాశంతే మహాత్మనః .. 76..

మహాకాల ఉవాచ -

గుహ్యోపనిషదిత్యేషా గోప్యాత్ గోప్యతరా సదా .

చతుర్భ్యశ్చాపి వేదేమ్య ఏకీకృత్యాత్ర యోజితా .. 77..

ఉపదిష్టా చ సర్గాదౌ సర్వానేవ దివౌకసః .

ఏవంవిధం చ యద్ధ్యానమేవంరూపం చ కీర్తితం .. 78..

సా సపర్యా పరిజ్ఞేయా విధానమధునా శృణు .

సోఽహమస్మీతి ప్రథమం సోఽహమస్మి ద్వితీయకం .. 79..

తదస్స్యహం తృతీయం చ మహావాక్యత్రయం భవేత్ .

ఆద్యాన్యేతాని వాక్యాని ఛందాంసి పరిచక్షతే .. 80..

దేవతా గుహ్యకాలీ చ రజఃసత్త్వతమోగుణాః .

సర్వేషాం ప్రణవో బీజం హంసః శక్తిః ప్రకీర్తితా .. 81..

మకారశ్చాప్యకారశ్చ హ్యుకారశ్చేతి కీలకం .

ఏభిర్వాక్యత్రయైః సర్వం కర్మ ప్రోతం విధానతః .. 82..

అనుక్షణం జపంశ్చైవ నిశ్చయః పరికీర్తితః .

ద్వితీయోపాసకానాం హి పరిపాటీయమీరితా .. 83..

ఏవం చాప్యాతురో యస్తు మనుష్యో భక్తిభావితః .

విముక్తః సర్వపాపేభ్యః కైవల్యాయోపకల్పతే .

సర్వాభిః సిద్ధిభిస్తస్య కిం కార్యం కమలాననే .. 84..

(శాక్త-ఉపనిషదః)

ఇతి శ్రీమహాకాలసంహితాయాం గుహ్యకాల్యుపనిషత్ సమాప్తా .

గుహ్యకాల్యాః సహస్రనామస్తోత్రం

మహాకాలసంహితాయాం

(పూర్వపీఠికా)

దేవ్యువాచ -

యదుక్తం భవతా పూర్వం ప్రాణేశ కరుణావశాత్ .. 1.. (1855)

నామ్నాం సహస్రం దేవ్యాస్తు తదిదానీం వదప్రభో .

శ్రీ మహాకాల ఉవాచ -

అతిప్రీతోఽస్మి దేవేశి తవాహం వచసామునా .. 2..

సహస్రనామస్తోత్రం యత్ సర్వేషాముత్తమోత్తమం .

సుగోపితం యద్యపి స్యాత్ కథయిష్యే తథాపి తే .. 3..

దేవ్యాః సహస్రనామాఖ్యం స్తోత్రం పాపౌఘమర్దనం .

మహ్యం పురా భువః కల్పే త్రిపురఘ్నేన కీర్తితం .. 4..

ఆజ్ఞప్తశ్చ తథా దేవ్యా ప్రత్యక్షంగతయా తయా .

త్వయైతత్ ప్రత్యహం పాఠ్యం స్తోత్రం పరమదుర్లభం .. 5..

మహాపాతకవిధ్వంసి సర్వసిద్ధివిధాయకం .

మహాభాగ్యప్రదం దివ్యం సంగ్రామే జయకారకం .. 6..

విపక్షదర్పదలనం విపదంభోధితారకం .

కృత్యాభిచారశమనం మహావిభవదాయకం .. 7..

మనశ్చింతితకార్యైకసాధకం వాగ్మితాకరం .

ఆయురారోగ్యజనకం బలపుష్టిప్రదం పరం .. 8..

నృపతస్కరభీతిఘ్నం వివాదే జయవర్ధనం .

పరశత్రుక్షయకరం కైవల్యామృతహైతుకం .. 9..

సిద్ధిరత్నాకరం శ్రేష్ఠం సద్యః ప్రత్యయకారకం .

నాతః పరతరం దేవ్యాః అస్త్యన్యత్ తుష్టిదం పరమం .. 10..

నామ్నాం సహస్రం గుహ్యాయాః కథయిష్యామి తే ప్రియే .

యత్పూర్వం సర్వదేవానాం మంత్రరూపతయా స్థితం .. 11..

దైత్యదానవయక్షాణాం గంధర్వోరగరక్షసాం .

ప్రాణవత్ కంఠదేశస్థం యత్స్వప్నేఽప్యపరిచ్యుతం .. 12..

దేవర్షీణాం మునీనాం చ వేదవద్రసనాగతం .

సార్వభౌమమహీపాలైః ప్రత్యహం యచ్చ పఠ్యతే .. 13..

మయా చ త్రిపురఘ్నేన జప్యతే యద్దినే దినే .

యస్మాత్ పరం నో భవితా స్తోత్రం త్రిజగతీతలే .. 14..

వేదవన్మంత్రవద్ యచ్చ శివవక్త్రవినిర్గతం .

యన్నాన్యతంత్రాగమేషు యామలే డామరే న చ .. 15..

న చాన్యసంహితాగ్రంథే నైవ బ్రహ్మాండగోలకే .

సంసారసాగరం తర్తుమేతత్ పోతవదిష్యతే .. 16..

నానావిధమహాసిద్ధికోషరూపం మహోదయం .

యా దేవీ సర్వదేవానాం యా మాతా జగదోకసాం .. 17..

యా సృర్ష్టికర్త్రీం దేవానాం విశ్వావిత్రీ చ యా స్మృతా .

యా చ త్రిలోక్యాః సంహర్త్రీ యా దాత్రీ సర్వసంపదాం .. 18..

బ్రహ్మాండం యా చ విష్టభ్య తిష్ఠత్యమరపూజితా .

పురాణోపనిషద్వేద్యా యా చైకా జగదంబికా .. 19..

యస్యాః పరం నాన్యదస్తి కిమపీహ జగత్త్రయే .

సా గుహ్యాస్య ప్రసాదేన వశీభూతేవ తిష్ఠతి .. 20..

అత ఏవ మహత్స్తోత్రమేతజ్జగతి దుర్లభం .

పఠనీయం ప్రయత్నేన పరం పదమభీప్సుభిః .. 21..

కిమన్యైః స్తోత్రవిస్తారైర్నాయం చేత్ పఠితోఽభవత్ .

కిమన్యైః స్తోత్రవిస్తారైరయం చేత్ పఠితో భవేత్ .. 22..

దుర్వాససే నారదాయ కపిలాయాత్రయే తథా .

దక్షాయ చ వసిష్ఠాయ సంవర్తాయ చ విష్ణవే .. 23..

అన్యేభ్యోఽపి దేవేభ్యోఽవదం స్తోత్రమిదం పురా .

ఇదానీం కథయిష్యామి తవ త్రిదశవందితే .. 24..

ఇదం శృణుష్వ యత్నేన శ్రుత్వా చైవావధారయ .

ధృత్వాఽన్యేభ్యోఽపి దేహి త్వం యాన్ వై కృపయసే సదా .. 25..

అథ వినియోగః

ఓం అస్య శ్రీగుహ్యకాలీసహస్రనామస్తోత్రస్య శ్రీత్రిపురఘ్న ఋషిః .

అనుష్టుప్ ఛందః . ఏకవక్త్రాదిశతవక్త్రాంతా శ్రీగుహ్యకాలీదేవతా .

ఫ్రూం బీజం . ఖ్రైం ఖ్రైం శక్తిః . ఛ్రీం ఖ్రీం కీలకం .

పురుషార్థచతుష్టయసాధనపూర్వకశ్రీచండయోగేశ్వరీప్రీత్యర్థే

జపే వినియోగః . ఓం తత్సత్ .

అథ శ్రీగుహ్యకాలీసహస్రనామస్తోత్రం .

ఓం ఫ్రేం కరాలీ చాముండా చండయోగేశ్వరీ శివా .

దుర్గా కాత్యాయనీ సిద్ధివికరాలీ మనోజవా .. 1.. (1880)

ఉల్కాముఖీ ఫేరురావా భీషణా భైరవాసనా .

కపాలినీ కాలరాత్రిర్గౌరీ కంకాలధారిణీ .. 2..

శ్మశానవాసినీ ప్రేతాసనా రక్తోదధిప్రియా .

యోగమాతా మహారాత్రిః పంచకాలానలస్థితా .. 3..

రుద్రాణీ రౌద్రరూపా చ రుధిరద్వీపచారిణీ .

ముండమాలాధరా చండీ బలవర్వరకుంతలా .. 4..

మేధా మహాడాకినీ చ యోగినీ యోగివందితా .

కౌలినీ కురుకుల్లా చ ఘోరా పింగజటా జయా .. 5..

సావిత్రీ వేదజననీ గాయత్రీ గగనాలయా .

నవపంచమహాచక్రనిలయా దారుణస్వనా .. 6..

ఉగ్రా కపర్దిగృహిణీ జగదాద్యా జనాశ్రయా .

కాలకర్ణీ కుండలినీ భూతప్రేతగణాధిపా .. 7..

జాలంధరీ మసీదేహా పూర్ణానందపతంగినీ .

పాలినీ పావకాభాసా ప్రసన్నా పరమేశ్వరీ .. 8..

రతిప్రియా రోగహరీ నాగహారా నగాత్మజా .

అవ్యయా వీతరాగా చ భవానీ భూతధారిణీ .. 9..

కాదంబినీ నీలదేహా కాలీ కాదంబరీప్రియా .

మాననీయా మహాదేవీ మహామండలవర్తినీ .. 10..

మహామాంసాశనీశానీ చిద్రూపా వాగగోచరా .

యజ్ఞాంబుజామనాదేవీ దర్వీకరవిభూషితా .. 11..

చండముండప్రమథనీ ఖేచరీ ఖేచరోదితా .

తమాలశ్యామలా తీవ్రా తాపినీ తాపనాశినీ .. 12..

మహామాయా మహాదంష్ట్రా మహోరగవిరాజితా .

లంబోదరీ లోలజటా లక్ష్మ్యాలక్ష్మీప్రదాయినీ .. 13..

ధాత్రీ ధారాధరాకారా ధోరణీ ధావనప్రియా .

హరజాయా హరారాధ్యా హరివక్త్రా హరీశ్వరీ .. 14..

విశ్వేశ్వరీ వజ్రనఖీ స్వరారోహా బలప్రదా .

ఘోణకీ ఘర్ఘరారావా ఘోరాఘౌఘప్రణాశినీ .. 15..

కల్పాంతకారిణీ భీమా జ్వాలామాలిన్యవామయా .

సృష్టిః స్థితిః క్షోభణా చ కరాలా చాపరాజితా .. 16..

వజ్రహస్తానంతశక్తిర్విరూపా చ పరాపరా .

బ్రహ్మాండమర్దినీ ప్రధ్వంసినీ లక్షభుజా సతీ .. 17..

విద్యుజ్జిహ్వా మహాదంష్ట్రా ఛాయాధ్వరసుతాద్యహృత్ .

మహాకాలాగ్నిమూర్తిశ్చ మేఘనాదా కటంకటా .. 18..

ప్రదీప్తా విశ్వరూపా చ జీవదాత్రీ జనేశ్వరీ .

సాక్షిణీ శర్వరీ శాంతా శమమార్గప్రకాశికా .. 19..

క్షేత్రజ్ఞా క్షేపణీ క్షమ్యాఽక్షతా క్షామోదరీ క్షితిః .

అప్రమేయా కులాచారకర్త్రీ కౌలికపాలినీ .. 20..

మాననీయా మనోగమ్యా మేనానందప్రదాయినీ .

సిద్ధాంతఖనిరధ్యక్షా ముండినీ మండలప్రియా .. 21..

బాలా చ యువతీ వృద్ధా వయోతీతా బలప్రదా .

రత్నమాలాధరా దాంతా దర్వీకరవిరాజితా .. 22..

ధర్మమూర్తిర్ధ్వాంతరుచిర్ధరిత్రీ ధావనప్రియా .

సంకల్పినీ కల్పకరీ కలాతీతా కలస్వనా .. 23..

వసుంధరా బోధదాత్రీ వర్ణినీ వానరానరా .

విద్యా విద్యాత్మికా వన్యా బంధనీ బంధనాశినీ .. 24..

గేయా జటాజటరమ్యా జరతీ జాహ్నవీ జడా .

తారిణీ తీర్థరూపా చ తపనీయా తనూదరీ .. 25..

తాపత్రయహరా తాపీ తపస్యా తాపసప్రియా .

భోగిభూష్యా భోగవతీ భగినీ భగమాలినీ .. 26..

భక్తిలభ్యా భావగమ్యా భూతిదా భవవల్లభా .

స్వాహారూపా స్వధారూపా వషట్కారస్వరూపిణీ .. 27..

హంతా కృతిర్నమోరూపా యజ్ఞాదిర్యజ్ఞసంభవా .

స్ఫ్యసూర్పచమసాకారా స్రక్స్రు వాకృతిధారిణీ .. 28..

ఉద్గీథహింకారదేహా నమః స్వస్తిప్రకాశినీ .

ఋగ్యజుః సామరూపా చ మంత్రబ్రాహ్మణరూపిణీ .. 29..

సర్వశాఖామయీ ఖర్వా పీవర్యుపనిషద్బుధా .

రౌద్రీ మృత్యుంజయాచింతామణిర్వైహాయసీ ధృతిః .. 30..

తార్తీయా హంసినీ చాంద్రీ తారా త్రైవిక్రమీ స్థితిః .

యోగినీ డాకినీ ధారా వైద్యుతీ వినయప్రదా .. 31..

ఉపాంశుర్మానసీ వాచ్యా రోచనా రుచిదాయినీ .

సత్వాకృతిస్తమోరూపా రాజసీ గుణవర్జితా .. 32..

ఆదిసర్గాదికాలీనభానవీ నాభసీ తథా .

మూలాధారా కుండలినీ స్వాధిప్ఠానపరాయణా .. 33..

మణిపూరకవాసా చ విశుద్ధానాహతా తథా .

ఆజ్ఞా ప్రజ్ఞా మహాసంజ్ఞా వర్వరా వ్యోమచారిణీ .. 34..

బృహద్రథంతరాకారా జ్యేష్ఠా చాథర్వణీ తథా .

ప్రాజాపత్యా మహాబ్రాహ్మీ హూంహూంకారా పతంగినీ .. 35..

రాక్షసీ దానవీ భూతిః పిశాచీ ప్రత్యనీకరా .

ఉదాత్తాప్యనుదాత్తా చ స్వరితా నిఃస్వరాప్యజా .. 36..

నిష్కలా పుష్కలా సాధ్వీ సా నుతా ఖండరూపిణీ .

గూఢా పురాణా చరమా ప్రాగ్భవీ వామనీ ధ్రువా .. 37..

కాకీముఖీ సాకలా చ స్థావరా జంగమేశ్వరీ .

ఈడా చ పింగలా చైవ సుషుమ్ణా ధ్యానగోచరా .. 38..

సర్గా విసర్గా ధమనీ కంపినీ బంధనీ హితా .

సంకోచినీ భాసురా చ నిమ్నా దృప్తా ప్రకాశినీ .. 39..

ప్రబుద్ధా క్షేపణీ క్షిప్తా పూర్ణాలస్యా విలంబితా .

ఆవేశినీ ఘర్ఘరా చ రూక్షా క్లిన్నా సరస్వతీ .. 40..

స్నిగ్ధా చండా కుహూః పూషా వారణా చ యశస్వినీ .

గాంధారీ శంఖినీ చైవ హస్తిజిహ్వా పయస్వినీ .. 41..

విశ్వోదరాలంబుషా చ బిభ్రా తేజస్వినీ సతీ .

అవ్యక్తా గాలనీ మందా ముదితా చేతనాపి చ .. 42..

ద్రావణీ చపలా లంబా భ్రామరీ మధుమత్యపి .

ధర్మా రసవహా చండీ సౌవీరీ కపిలా తథా .. 43..

రండోత్తరా కర్షిణీ చ రేవతీ సుముఖీ నటీ .

రజన్యాప్యాయనీ విశ్వదూతా చంద్రా కపర్దినీ .. 44..

నందా చంద్రావతీ మైత్రీ విశాలాపి చ మాండవీ .

విచిత్రా లోహినీకల్పా సుకల్పా పూతనాపి చ .. 45..

ధోరణీ ధారణీ హేలా ధీరా వేగవతీ జటా .

అగ్నిజ్వాలా చ సురభీ వివర్ణా కృంతనీ తథా .. 46..

తపినీ తాపినీ ధూమ్రా మరీచిర్జ్వాలినీ రుచిః .

తపస్వినీ స్వప్నవహా సంమోహా కోటరా చలా .. 47..

వికల్పా లంబికా మూలా తంద్రావత్యపి ఘంటికా .

అవిగ్రహా చ కైవల్యా తురీయా చాపునర్భవా .. 48..

విభ్రాంతిశ్చ ప్రశాంతా చ యోగినిః శ్రేణ్యలక్షితా .

నిర్వాణా స్వస్తికా వృద్ధిర్నివృత్తిశ్చ మహోదయా .. 49..

బోధ్యాఽవిద్యా చ తామిస్రా వాసనా యోగమేదినీ .

నిరంజనా చ ప్రకృతిః సత్తారవ్యా పారమార్థికీ .. 50..

ప్రతిబింబనిరాభాసా సదసద్రూపధారిణీ .

ఉపశాంతా చ చైతన్యా కూటా విజ్ఞానమయ్యపి .. 51..

శక్తివిద్యా వాసితా చ మోదినీ ముదితాననా .

అనయా ప్రవహా వ్యాడీ సర్వజ్ఞా శరణప్రదా .. 52..

వారుణీ మార్జనీభాషా ప్రతిమా బృహతీ ఖలా .

ప్రతీచ్ఛా ప్రమితిః ప్రీతిః కుహికా తర్పణప్రియా .. 53..

స్వస్తికా సర్వతోభద్రా గాయత్రీ ప్రణవాత్మికా .

సావిత్రీ వేదజననీ నిగమాచారబోధినీ .. 54..

వికరాలా కరాలా చ జ్వాలాజాలైకమాలినీ .

భీమా చ క్షోభణానంతా వీరా వజ్రాయుధా తథా .. 55..

ప్రధ్వంసినీ చ మాలంకా విశ్వమర్దిన్యవీక్షితా .

మృత్యుః సహస్రబాహుశ్చ ఘోరదంష్ట్రా వలాహకీ .. 56..

పింగా పింగశతా దీప్తా ప్రచండా సర్వతోముఖీ .

విదారిణీ విశ్వరూపా విక్రాంతా భూతభావనీ .. 57..

విద్రావిణీ మోక్షదాత్రీ కాలచక్రేశ్వరీ నటీ .

తప్తహాటకవర్ణా చ కృతాంతా భ్రాంతిభంజినీ .. 58..

సర్వతేజోమయీ భవ్యా దితిశోకకరీ కృతిః .

మహాక్రుద్ధా శ్మశానస్థా కపాలస్రగలంకృతా .. 59..

కాలాతికాలా కాలాంతకరీతిః కరుణానిధిః .

మహాఘోరా ఘోరతరా సంహారకరిణీ తథా .. 60..

అనాదిశ్చ మహోన్మత్తా భూతధాత్ర్యసితేక్షణా .

భీష్మాకారా చ వక్రాంగీ బహుపాదైకపాదికా .. 61..

కులాంగనా కులారాధ్యా కులమార్గరతేశ్వరీ .

దిగంబరా ముక్తకేశీ వజ్రముష్టిర్నిరింధనీ .. 62..

సమ్మోహినీ క్షోభకరీ స్తంభినీ వశ్యకారిణీ .

దుర్ధర్షా దర్పదలనీ త్రైలోక్యజననీ జయా .. 63..

ఉన్మాదోచ్చాటనకరీ కృత్యా కృత్యావిఘాతినీ .

విరూపా కాలరాత్రిశ్చ మహారాత్రిర్మనోన్మనీ .. 64..

మహావీర్యా గూఢనిద్రా చండదోర్దండమండితా .

నిర్మలా శూలినీ తంత్రా వజ్రిణీ చాపధారిణీ .. 65..

స్థూలోదరీ చ కుముదా కాముకా లింగధారిణీ .

ధటోదరీ ఫేరవీ చ ప్రవీణా కాలసుందరీ .. 66..

తారావతీ డమరుకా భానుమండలమాలినీ .

ఏకానంగా పింగలాక్షీ ప్రచండాక్షీ శుభంకరీ .. 67..

విద్యుత్కేశీ మహామారీ సూచీ తూండీ చ జృంభకా .

ప్రస్వాపినీ మహాతీవ్రా వరణీయా వరప్రదా .. 68..

చండచండా జ్వలద్దేహా లంబోదర్యగ్నిమర్దినీ .

మహాదంతోల్కాదృగంబా జ్వాలాజాలజలంధరీ .. 69..

మాయా కృశా ప్రభా రామా మహావిభవదాయినీ .

పౌరందరీ విష్ణుమాయా కీర్తిః పుష్టిస్తనూదరీ .. 70..

యోగజ్ఞా యోగదాత్రీ చ యోగినీ యోగివల్లభా .

సహస్రశీర్షపాదా చ సహస్రనయనోజ్వలా .. 71..

పానకర్త్రీ పావకాభా పరామృతపరాయణా .

జగద్గతిర్జగజ్జేత్రీ జన్మకాలవిమోచినీ .. 72..

మూలావతంసినీ మూలా మౌనవ్రతపరాఙ్ముఖీ .

లలితా లోలుపా లోలా లక్షణీయా లలామధృక్ .. 73..

మాతంగినీ భవానీ చ సర్వలోకేశ్వరేశ్వరీ .

పార్వతీ శంభుదయితా మహిషాసురమర్దినీ .. 74..

చండముండాపహర్త్రీ చ రక్తబీజనికృంతనీ .

నిశుంభశుంభమథనీ దేవరాజవరప్రదా .. 75..

కల్యాణకారిణీ కాలీ కోలమాంసాస్రపాయినీ .

ఖడ్గహస్తా చర్మిణీ చ పాశినీ శక్తిధారిణీ .. 76..

ఖట్వాంగినీ ముండధరా భుశుండీ ధనురన్వితా .

చక్రఘంటాన్వితా బాలప్రేతశైలప్రధారిణీ .. 77..

నరకంకాలనకులసర్పహస్తా సముద్గరా .

మురలీధారిణీ బలికుండినీ డమరుప్రియా .. 78..

భిందిపాలాస్త్రిణీ పూజ్యా సాధ్యా పరిఘిణీ తథా .

పట్టిశప్రాసినీ రమ్యా శతశో ముసలిన్యపి .. 79..

శివాపోతధరాదండాంకుశహస్తా త్రిశూలినీ .

రత్నకుంభధరా దాంతా ఛురికాకుంతదోర్యుతా .. 80..

కమండలుకరా క్షామా గృధ్రాఢ్యా పుష్పమాలినీ .

మాంసఖండకరా బీజపూరవత్యక్షరా క్షరా .. 81..

గదాపరశుయష్ట్యంకా ముష్టినానలధారిణీ .

ప్రభూతా చ పవిత్రా చ శ్రేష్ఠా పుణ్యవివర్ధనో .. 82..

ప్రసన్నానందితముఖీ విశిష్టా శిష్టపాలినీ .

కామరూపా కామగవీ కమనీయ కలావతీ .. 83..

గంగా కలింగతనయా సిప్రా గోదావరీ మహీ .

రేవా సరస్వతీ చంద్రభాగా కృష్ణా దృషద్వతీ .. 84..

వారాణసీ గయావంతీ కాంచీ మలయవాసినీ .

సర్వదేవీస్వరూపా చ నానారూపధరామలా .. 85..

లక్ష్మీర్గౌరీ మహాలక్ష్మీ రత్నపూర్ణా కృపామయీ .

దుర్గా చ విజయా ఘోరా పద్మావత్యమరేశ్వరీ .. 86..

వగలా రాజమాతంగీ చండీ మహిషమర్దినీ .

త్రిపుటోచ్ఛిష్టచాండాలీ భారుండా భువనేశ్వరీ .. 87..

రాజరాజేశ్వరీ నిత్యక్లిన్నా చ జయభైరవీ .

చండయోగేశ్వరీ రాజ్యలక్ష్మీ రుద్రాణ్యరుంధతీ .. 88..

అశ్వారూఢా మహాగుహ్యా యంత్రప్రమథనీ తథా .

ధనలక్ష్మీర్విశ్వలక్ష్మీర్వశ్యకారిణ్యకల్మషా .. 89..

త్వరితా చ మహాచండభైరవీ పరమేశ్వరీ .

త్రైలోక్యవిజయా జ్వాలాముఖీ దిక్కరవాసినీ .. 90..

మహామంత్రేశ్వరీ వజ్రప్రస్తారిణ్యజనావతీ .

చండకాపాలేశ్వరీ చ స్వర్ణకోటేశ్వరీ తథా .. 91..

ఉగ్రచండా శ్మశానోగ్రచండా వార్తాల్యజేశ్వరీ .

చండోగ్రా చ ప్రచండా చ చండికా చండనాయికా .. 92..

వాగ్వాదినీ మధుమతీ వారుణీ తుంబురేశ్వరీ .

వాగీశ్వరీ చ పూర్ణేశీ సౌమ్యోగ్రా కాలభైరవీ .. 93..

దిగంబరా చ ధనదా కాలరాత్రిశ్చ కుబ్జికా .

కిరాటీ శివదూతీ చ కాలసంకర్షణీ తథా .. 94..

కుక్కుటీ సంకటా దేవీ చపలభ్రమరాంబికా .

మహార్ణవేశ్వరీ నిత్యా జయఝంకేశ్వరీ తథా .. 95..

శవరీ పింగలా బుద్ధిప్రదా సంసారతారిణీ .

విజ్ఞా మహామోహినీ చ బాలా త్రిపురసుందరీ .. 96..

ఉగ్రతారా చైకజటా తథా నీలసరస్వతీ .

త్రికంటకీ ఛిన్నమస్తా బోధిసత్వా రణేశ్వరీ .. 97..

బ్రహ్మాణీ వైష్ణవీ మాహేశ్వరీ కౌమార్యలంబుషా .

వారాహీ నారసింహీ చ చాముండేంద్రాణ్యోనిజా .. 98..

చండేశ్వరీ చండఘంటా నాకులీ మృత్యుహారిణీ .

హంసేశ్వరీ మోక్షదా చ శాతకర్ణీ జలంధరీ .. 99..

(ఇంద్రాణీ వజ్రవారాహీ ఫేత్కారీ తుంబురేశ్వరీ .

హయగ్రీవా హస్తితుండా నాకులీ మృత్యుహారిణీ ..)

స్వరకర్ణీ ఋక్షకర్ణీ సూర్పకర్ణా బలాబలా .

మహానీలేశ్వరీ జాతవేతసీ కోకతుండికా .. 100..

గుహ్యేశ్వరీ వజ్రచండీ మహావిద్యా చ బాభ్రవీ .

శాకంభరీ దానవేశీ డామరీ చర్చికా తథా .. 101..

ఏకవీరా జయంతీ చ ఏకానంశా పతాకినీ .

నీలలోహితరూపా చ బ్రహ్మవాదిన్యయంత్రితా .. 102..

త్రికాలవేదినీ నీలకోరంగీ రక్తదంతికా .

భూతభైరవ్యనాలంబా కామాఖ్యా కులకుట్టనీ .. 103..

క్షేమంకరీ విశ్వరూపా మాయూర్యావేశినీ తథా .

కామాంకుశా కాలచండీ భీమాదేవ్యర్ధమస్తకా .. 104..

ధూమావతీ యోగనిద్రా బ్రహ్మవిష్ణునికృంతనీ .

చండోగ్రకాపాలినీ చ బోధికా హాటకేశ్వరీ .. 105..

మహామంగలచండీ చ తోవరా చండఖేచరీ .

విశాలా శక్తిసౌపర్ణీ ఫేరుచండీ మదోద్ధతా .. 106..

కాపాలికా చంచరీకా మహాకామధ్రువాపి చ .

విక్షేపణీ భూతతుండీ మానస్తోకా సుదామినీ .. 107..

నిర్మూలినీ రాంకవిణీ సద్యోజాతా మదోత్కటా .

వామదేవీ మహాఘోరా మహాతత్పురుషీ తథా .. 108..

ఈశానీ శాంకరీ భర్గో మహాదేవీ కపర్దినీ .

త్ర్యంబకీ వ్యోమకేశీ చ మారీ పాశుపతీ తథా .. 109..

జయకాలీ ధూమకాలీ జ్వాలాకాల్యుగ్రకాలికా .

ధనకాలీ ఘోరనాదకాలీ కల్పాంతకాలికా .. 110..

వేతాలకాలీ కంకాలకాలీ శ్రీనగ్నకాలికా .

రౌద్రకాలీ ఘోరఘోరతరకాలీ తథైవ చ .. 111..

తతో దుర్జయకాలీ చ మహామంథానకాలికా .

ఆజ్ఞాకాలీ చ సంహారకాలీ సంగ్రామకాలికా .. 112..

కృతాంతకాలీ తదను తిగ్మకాలీ తతః పరం .

తతో మహారాత్రికాలీ మహారుధిరకాలికా .. 113..

శవకాలీ భీమకాలీ చండకాలీ తథైవ చ .

సంత్రాసకాలీ చ తతః శ్రీభయంకరకాలికా .. 114..

వికరాలకాలీ శ్రీఘోరకాలీ వికటకాలికా .

కరాలకాలీ తదను భోగకాలీ తతః పరం .. 115..

విభూతికాలీ శ్రీకాలకాలీ దక్షిణకాలికా .

విద్యాకాలీ వజ్రకాలీ మహాకాలీ భవేత్తతః .. 116..

తతః కామకలాకాలీ భద్రకాలీ తథైవ చ .

శ్మశానకాలికోన్మత్తకాలికా ముండకాలికా .. 117..

కులకాలీ నాదకాలీ సిద్ధికాలీ తతః పరం .

ఉదారకాలీ సంతాపకాలీ చంచలకాలికా .. 118..

డామరీ కాలికా భావకాలీ కుణపకాలికా .

కపాలకాలీ చ దిగంబరకాలీ తథైవ చ .. 119..

ఉద్దామకాలీ ప్రపంచకాలీ విజయకాలికా .

క్రతుకాలీ యోగకాలీ తపఃకాలీ తథైవ చ .. 120..

ఆనందకాలీ చ తతః ప్రభాకాలీ తతః పరం .

సూర్యకాలీ చంద్రకాలీ కౌముదీకాలికా తతః .. 121..

స్ఫులింగకాల్యగ్నికాలీ వీరకాలీ తథైవ చ .

రణకాలీ హూంహూంకారనాదకాలీ తతః పరం .. 122..

జయకాలీ విఘ్నకాలీ మహామార్తండకాలికా .

చితాకాలీ భస్మకాలీ జ్వలదంగారకాలికా .. 123..

పిశాచకాలీ తదను తతో లోహితకాలికా .

ఖర (ఖగ) కాలీ నాగకాలీ తతో రాక్షసకాలికా .. 124..

మహాగగనకాలీ చ విశ్వకాలీ భవేదను .

మాయాకాలీ మోహకాలీ తతో జంగమకాలికా .. 125..

పున స్థావరకాలీ చ తతో బ్రహ్మాండకాలికా .

సృష్టికాలీ స్థితికాలీ పునః సంహారకాలికా .. 126..

అనాఖ్యాకాలికా చాపి భాసాకాలీ తతోఽప్యను .

వ్యోమకాలీ పీఠకాలీ శక్తికాలీ తథైవ చ .. 127..

ఊర్ధ్వకాలీ అధఃకాలీ తథా చోత్తరకాలికా .

తథా సమయకాలీ చ కౌలికక్రమకాలికా .. 128..

జ్ఞానవిజ్ఞానకాలీ చ చిత్సత్తాకాలికాపి చ .

అద్వైతకాలీ పరమానందకాలీ తథైవ చ .. 129..

వాసనాకాలికా యోగభూమికాలీ తతః పరం .

ఉపాధికాలీ చ మహోదయకాలీ తతోఽప్యను .. 130..

నివృత్తికాలీ చైతన్యకాలీ వైరాగ్యకాలికా .

సమాధికాలీ ప్రకృతికాలీ ప్రత్యయకాలికా .. 131..

సత్తాకాలీ చ పరమార్థకాలీ నిత్యకాలికా .

జీవాత్మకాలీ పరమాత్మకాలీ బంధకాలికా .. 132..

ఆభాసకాలికా సూక్ష్మకాలికా శేషకాలికా .

లయకాలీ సాక్షికాలీ తతశ్చ స్మృతికాలికా .. 133..

పృథివీకాలికా వాపి ఏకకాలీ తతః పరం .

కైవల్యకాలీ సాయుజ్యకాలీ చ బ్రహ్మకాలికా .. 134..

తతశ్చ పునరావృత్తికాలీ యాఽమృతకాలికా .

మోక్షకాలీ చ విజ్ఞానమయకాలీ తతః పరం .. 135..

ప్రతిబింబకాలికా చాపి ఏక(పిండ)కాలీ తతః పరం .

ఏకాత్మ్యకాలికానందమయకాలీ తథైవ చ .. 136..

సర్వశేషే పరిజ్ఞేయా నిర్వాణమయకాలికా .

ఇతి నామ్నాం సహస్రం తే ప్రోక్తమేకాధికం ప్రియే .. 137..

పఠతః స్తోత్రమేతద్ధి సర్వం కరతలే స్థితం .

.. సహస్రనామ్నః స్తోత్రస్య ఫలశ్రుతిః ..

నైతేన సదృశం స్తోత్రం భూతం వాపి భవిష్యతి .. 1.. (2017)

యః పఠేత్ ప్రత్యహమదస్తస్య పుణ్యఫలం శృణు .

పాపాని విలయం యాంతి మందరాద్రినిభాన్యపి .. 2..

ఉపద్రవాః వినశ్యంతి రోగాగ్నినృపచౌరజాః .

ఆపదశ్చ విలీయంతే గ్రహపీడాః స్పృశంతి న .. 3..

దారిద్ర్యం నాభిభవతి శోకో నైవ ప్రబాధతే .

నాశం గచ్ఛంతి రిపవః క్షీయంతే విఘ్నకోటయః .. 4..

ఉపసర్గాః పలాయంతే బాధంతే న విషాణ్యపి .

నాకాలమృత్యుర్భవతి న జాడ్యం నైవ మూకతా .. 5..

ఇంద్రియాణాం న దౌర్బల్యం విషాదో నైవ జాయతే .

అథాదౌ నాస్య హానిః స్యాత్ న కుత్రాపి పరాభవః .. 6..

యాన్ యాన్ మనోరథానిచ్ఛేత్ తాంస్తాన్ సాధయతి ద్రుతం .

సహస్రనామపూజాంతే యః పఠేద్ భక్తిభావితః .. 7..

పాత్రం స సర్వసిద్ధీనాం భవేత్సంవత్సరాదను .

విద్యావాన్ బలవాన్ వాగ్మీ రూపవాన్ రూపవల్లభః .. 8..

అధృష్యః సర్వసత్వానాం సర్వదా జయవాన్ రణే .

కామినీనాం ప్రియో నిత్యం మిత్రాణాం ప్రాణసన్నిభః .. 9..

రిపూణామశనిః సాక్షాద్దాతా భోక్తా ప్రియంవదః .

ఆకరః స హి భాగ్యానాం రత్నానామివ సాగరః .. 10..

మంత్రరూపమిదం జ్ఞేయం స్తోత్రం త్రైలోక్యదుర్లభం .

ఏతస్య బహవః సంతి ప్రయోగాః సిద్ధిదాయినః .. 11..

తాన్ విధాయ సురేశాని తతః సిద్ధీః పరీక్షయేత్ .

తారరావౌ పురా దత్త్వా నామ చైకైకమంతరా .. 12..

తచ్చ ఙేఽన్తం వినిర్దిశ్య శేషే హార్దమనుం న్యసేత్ .

ఉపరాగే భాస్కరస్యేందోర్వాప్యథాన్యపర్వణి .. 13..

మాలతీకుసుమైర్బిల్వపత్రైర్వా పాయసేన వా .

మధూక్షితద్రాక్షయా వా పక్వమోచాఫలేన వా .. 14..

ప్రత్యేకం జుహుయాత్ నామ పూర్వప్రోక్తక్రమేణ హి .

ఏవం త్రివారం నిష్పాద్య తతః స్తోత్రం పరీక్షయేత్ .. 15..

యావత్యః సిద్ధయః సంతి కథితా యామలాదిషు .

భవంత్యేతే న తావంత్యో దృఢవిశ్వాసశాలినాం .. 16..

(ఏతత్స్తోత్రస్య ప్రయోగవిధివర్ణనం)

పరచక్రే సమాయాతే ముక్తకేశో దిగంబరః .

రాత్రౌ తదాశాభిముఖః పంచవింశతిధా పఠేత్ .. 17..

పరచక్రం సదా ఘోరం స్వయమేవ పలాయతే .

మహారోగోపశమనే త్రింశద్వారముదీరయేత్ .. 18..

వివాదే రాజజనితోపద్రవే దశధా జపేత్ .

మహాదుర్భిక్షపీడాసు మహామారీభయేషు చ .. 19..

షష్టివారం స్తోత్రమిదం పఠన్నాశయతి ద్రుతం .

భూతప్రేతపిశాచాది కృతాభిభవకర్మణి .. 20..

ప్రజపేత్ పంచ దశధా క్షిప్రం తదభిధీయతే .

తథా నిగడబద్ధానాం మోచనే పంచధా జపేత్ .. 21..

బధ్యానాం ప్రాణరక్షార్థం శతవారముదీరయేత్ .

దుఃస్వప్నదర్శనే వారత్రయం స్తోత్రమిదం పఠేత్ .. 22..

ఏవం విజ్ఞాయ దేవేశి మహిమానమముష్య హి .

యస్మిన్ కస్మిన్నపి ప్రాప్తే సంకటే యోజయేదిదం .. 23..

శమయిత్వా తు తత్సర్వం శుభముత్పాదయత్యపి .

రణే వివాదే కలహే భూతావేశే మహాభయే .. 24..

ఉత్పాతరాజపీడాయాం బంధువిచ్ఛేద ఏవ వా .

సర్పాగ్నిదస్యునృపతిశత్రురోగభయే తథా .. 25..

జప్యమేతన్మహాస్తోత్రం సమస్తం నాశమిచ్ఛతా .

ధ్యాత్వా దేవీం గుహ్యకాలీం నగ్నాం శక్తిం విధాయ చ .. 26..

తద్యోనౌ యంత్రమాలిఖ్య త్రికోణం బిందుమత్ ప్రియే .

పూర్వోదితక్రమేణైవ మంత్రముచ్చార్య సాధకః .. 27..

గంధపుష్పాక్షతైర్నిత్యం ప్రత్యేకం పరిపూజయేత్ .

బలిం చ ప్రత్యహం దద్యాత్ చతుర్వింశతివాసరాన్ .. 28..

స్తోత్రాణాముత్తమం స్తోత్రం సిద్ధ్యంత్యేతావతాప్యదః .

స్తంభనే మోహనే చైవ వశీకరణ ఏవ చ .. 29..

ఉచ్చాటనే మారణే చ తథా ద్వేషాభిచారయోః .

గుటికాధాతువాదాదియక్షిణీపాదుకాదిషు .. 30..

కృపాణాంజనవేతాలాన్యదేహాదిప్రవేశనే .

ప్రయుంజ్యాదిదమీశాని తతః సర్వం ప్రసిద్ధ్యతి .. 31..

సర్వే మనోరథాస్తస్య వశీభూతా కరే స్థితాః .

ఆరోగ్యం విజయం సౌఖ్యం విభూతిమతులామపి .. 32..

త్రివిధోత్పాతశాంతించ శత్రునాశం పదే పదే .

దదాతి పఠితం స్తోత్రమిదం సత్యం సురేశ్వరి .. 33..

స్తోత్రాణ్యన్యాని భూయాంసి గుహ్యాయాః సంతి పార్వతి .

తాని నైతస్య తుల్యాని జ్ఞాతవ్యాని సునిశ్చితం .. 34..

ఇదమేవ తస్య తుల్యం సత్యం సత్యం మయోదితం .

నామ్నాం సహస్రం యద్యేతత్ పఠితు నాలమన్వహం .. 35..

(సహస్రనామ్నః పాఠాశక్తౌ వక్ష్యమాణపాఠస్య నిదేశః )

తదైతాని పఠేన్నిత్యం నామాని స్తోత్రపాఠకః .

చండయోగేశ్వరీ చండీ చండకాపాలినీ శివా .. 36..

చాముండా చండికా సిద్ధికరాలీ ముండమాలినీ .

కాలచక్రేశ్వరీ ఫేరుహస్తా ఘోరాట్టహాసినీ .. 37..

డామరీ చర్చికా సిద్ధివికరాలీ భగప్రియా .

ఉల్కాముఖీ ఋక్షకర్ణీ బలప్రమథినీ పరా .. 38..

మహామాయా యోగనిద్రా త్రైలోక్యజననీశ్వరీ .

కాత్యాయనీ ఘోరరూపా జయంతీ సర్వమంగలా .. 39..

కామాతురా మదోన్మత్తా దేవదేవీవరప్రదా .

మాతంగీ కుబ్జికా రౌద్రీ రుద్రాణీ జగదంబికా .. 40..

చిదానందమయీ మేధా బ్రహ్మరూపా జగన్మయీ .

సంహారిణీ వేదమాతా సిద్ధిదాత్రీ బలాహకా .. 41..

వారుణీ జగతామాద్యా కలాతీతా చిదాత్మికా .

నాభాన్యేతాని పఠతా సర్వం తత్ పరిపఠ్యతే .. 42..

ఇత్యేతత్ కథితం నామ్నాం సహస్రం తవ పార్వతి .

ఉదీరితం ఫలం చాస్య పఠనాద్ యత్ ప్రజాయతే .. 43..

నిఃశేషమవధార్య త్వం యథేచ్ఛసి తథా కురు .

పఠనీయం న చ స్త్రీభిరేతత్ స్తోత్రం కదాచన .. 44.. (2060)

.. ఇతి మహాకాలసంహితాయాం విశ్వమంగలకవచాంతం

పూజాపద్ధతిప్రభూతికథనం నామ దశమః పటలాంతర్గతం

గుహ్యకాలిసహస్రనామస్తోత్రం సంపూర్ణం ..

శ్రీసరస్వతీస్తోత్రం ఇంద్రకృతం సార్థం

         అథ శ్రీసరస్వతీస్తోత్రం .

         భృంగనీలనీలాంజనాలకా, పద్మరాగగాంగేయమౌలికా .

         పూర్ణచంద్రబింబోజ్జ్వలాననా, శ్రీసరస్వతీ మే ప్రసీదతు .. 1..

         ఫుల్లనేత్రపంకేరుహాన్వితా, రత్నకౢప్తతాటంకభూషితా .

         చంపకప్రసూనాభనాసికా, శ్రీసరస్వతీ మే ప్రసీదతు .. 2..

         దర్పణప్రభాగండమండలా, పల్లవాధరా దంతకుట్మలా .

         మందహాసినీ కంబుకంధరా, శ్రీసరస్వతీ మే ప్రసీదతు .. 3..

         దీర్ఘబాహుకా చాతికోమలా, రత్నకంచుకా పీవరస్తనా .

         స్వర్ణమౌక్తికాకర్ణభూషణా, శ్రీసరస్వతీ మే ప్రసీదతు .. 4..

         మంజుభాషణా చావలిత్రయీ, సుందరోదరా నిమ్ననాభికా .

         లంబితోదరాధారమేఖలా, శ్రీసరస్వతీ మే ప్రసీదతు .. 5..

         సూక్ష్మమధ్యమా భూనితంబినీ, రత్నదంతితుండోరుమండితా .

         బ్రహ్మదండజానుద్వయాన్వితా, శ్రీసరస్వతీ మే ప్రసీదతు .. 6..

         మారతూణికాకారజంఘికా, రత్నకింకిణీ పాదనూపురా .

         కూర్మపృష్ఠదేశాంఘ్రిపృష్ఠకా, శ్రీసరస్వతీ మే ప్రసీదతు .. 7..

         గూఢగుల్ఫలావణ్యరంజితా, చంద్రికాంశుకా శ్వేతవర్ణినీ .

         బిందువాసినీ బైందవప్రియా, శ్రీసరస్వతీ మే ప్రసీదతు .. 8..

         కాలికారమాపార్శ్వసేవితా, వేదవేదితా భేదనాశినీ .

         నిర్మలాత్మికాద్వైతరూపిణీ, శ్రీసరస్వతీ మే ప్రసీదతు .. 9..

         వాసరాలయా భూసురార్చితా, గౌతమీనదీతీరవాసినీ .

         బ్రాహ్మణప్రియాపారవైభవా, శ్రీసరస్వతీ మే ప్రసీదతు .. 10..

         ఇంద్రేణైవం కృతం స్తోత్రం యే పఠంత్యనిశం తు తే .

         సరస్వతీప్రసాదేన ప్రపద్యంతేఽష్టసిద్ధికాః ..

               .. ఇతి శ్రీసరస్వతీస్తోత్రం ..

గురుగంగాష్టకం

శ్రీగణేశాయ నమః .

మాతర్నందికతీర్థసుందరభవే శైవైరుపాస్యే శివే

     నిఃశేషాఘనివారిణి త్వముదిరే సౌందర్యరత్నాకరే .

దేవానీకసుసేవితే సుఖకరే సంసారతాపాపహే

     దీనం సుజ్ఞజనాలిసేవితపదే త్వం మాం పవిత్రం కురు .. 1..

రోగార్దితం సంసృతితాపతప్తం షట్కర్మహీనం త్వఘసంప్లుతం మాం .

న చాపగాన్యా భువనే త్వదన్యా నాఘం ప్రకర్తుం జననీ చ తాం గతం .. 2..

జగజ్జనని త్వద్యశో భువి మహత్సముద్యత్సదా

     జనావలి-పవిత్రతాం ప్రకురుతేఽత్ర బిందుస్తవ .

ఇతి శ్రవణతో మతిర్మమ తవాంబుసంసేవనే

     పవిత్రమకరోషి చేజ్జనని తాం కథం తే సుతే .. 3..

త్వదంబుసేవనాత్సదా నిరాకులా భవింత తే

     ఖగా మృగాః సురర్షయో నరోత్తమాః సురాసురాః .

సుభక్తియుక్తచేతసా నరస్త్వదంబుసేవనం

     కరోతి యః స యాతి ధామ వైష్ణవం సురార్థితం .. 4..

అసవో యది యాంతి త్వత్తటే స నరో ధన్యతయా దివం ప్రయాతి .

హరినామ ఇవాత్ర త్వత్తటం న విముంచంతి కదాపి మానవాః .. 5..

తవ తీరనివాసవర్జితా న జనిర్జగతీతలే మతా సా .

న యథా హరినామవర్జితా రసనాయా విషవల్లరీ మతా సా .. 6..

విరజాగురుగంగే మే సితాసితే యత్ర సంగతే తత్ర .

యః ప్లావయతి శరీరం స యాతి భక్త్యా సుమాణికం ధామ .. 7..

త్వద్దర్శనాత్త్వత్స్మరణాత్తవాంబుసంసేవనాన్మాణికపాదసంభవే .

యత్సౌకృతం తత్కథనే న శక్త్యా బ్రహ్మాదయస్తత్ర కియానహం నరః .. 8..

గురుగంగాష్టకమిదం పఠతాం సర్వసిద్ధిదం .

పఠితవ్యం సర్వకాలే శయనే చ విశేషతః .. 9..

ఇతి గురుగంగాష్టకం సంపూర్ణం .

గుప్తసప్తశతీ

సాత సౌ మంత్రోం కీ ``శ్రీ దుర్గా సప్తశతీ'', కా పాఠ కరనే సే

సాధకోం కా జైసా కల్యాణ హోతా హై, వైసా-హీ కల్యాణకారీ గుప్తసప్తశతీకా

పాఠ హై . యహ ``గుప్త-సప్తశతీ'' ప్రచుర మంత్ర-బీజోం కే హోనే సే

ఆత్మ-కల్యాణేచ్ఛు సాధకోం కే లిఏ అమోఘ ఫల-ప్రద హై . ఇసకే పాఠ

కా క్రమ ఇస ప్రకార హై . ప్రారంభ మేం ``కుంజికా-స్తోత్ర'',

ఉసకే బాద ``గుప్త-సప్తశతీ'', తదంతర ``తీవ్రచండికా

స్తోత్ర``కా పాఠ కరేం .

 Start with  కుంజికా-స్తోత్రం

అథ గుప్త-సప్తశతీ .

ఓం బ్రీం-బ్రీం-బ్రీం వేణు-హస్తే, స్తుత-సుర-బటుకైర్హాం గణేశస్య మాతా

స్వానందే నంద-రుపే, అనహత-నిరతే, ముక్తిదే ముక్తి-మార్గే .

హంసః సోహం విశాలే, వలయ-గతి-హసే, సిద్ధ-దేవీ సమస్తా

హీం-హీం-హీం సిద్ధ-లోకే, కచ-రుచి-విపులే, వీర-భద్రే నమస్తే .. 1..

ఓం హీంకారోచ్చారయంతీ, మమ హరతి భయం, చండ-ముండౌ ప్రచండే

ఖాం-ఖాం-ఖాం ఖడ్గ-పాణే, ధ్రక-ధ్రక ధ్రకితే, ఉగ్ర-రుపే స్వరుపే .

హుఀ-హుఀ హుఀకాంర-నాదే, గగన-భువి-తలే, వ్యాపినీ వ్యోమ-రుపే

హం-హం హంకార-నాదే, సుర-గణ-నమితే, చండ-రుపే నమస్తే .. 2..

ఐం లోకే కీర్తయంతీ, మమ హరతు భయం, రాక్షసాన్ హన్యమానే

ఘ్రాం-ఘ్రాం-ఘ్రాం ఘోర-రుపే, ఘఘ-ఘఘ-ఘటితే, ఘర్ఘరే ఘోర-రావే .

నిర్మాంసే కాక-జంఘే, ఘసిత-నఖ-నఖా, ధూమ్ర-నేత్రే త్రి-నేత్రే

హస్తాబ్జే శూల-ముండే, కుల-కుల కకులే, సిద్ధ-హస్తే నమస్తే .. 3..

ఓం క్రీం-క్రీం-క్రీం ఐం కుమారీ, కుహ-కుహ-మఖిలే, కోకిలేనానురాగే

ముద్రా-సంజ్ఞ-త్రి-రేఖా, కురు-కురు సతతం, శ్రీ మహా-మారి గుహ్యే .

తేజాంగే సిద్ధి-నాథే, మన-పవన-చలే, నైవ ఆజ్ఞా-నిధానే

ఐంకారే రాత్రి-మధ్యే, స్వపిత-పశు-జనే, తత్ర కాంతే నమస్తే .. 4..

ఓం వ్రాం-వ్రీం-వ్రూం వ్రైం కవిత్వే, దహన-పుర-గతే రుక్మి-రుపేణ చక్రే

త్రిః-శక్తయా, యుక్త-వర్ణాదిక, కర-నమితే, దాదివం పూర్వ-వర్ణే .

హ్రీం-స్థానే కామ-రాజే, జ్వల-జ్వల జ్వలితే, కోశిని కోశ-పత్రే

స్వచ్ఛందే కష్ట-నాశే, సుర-వర-వపుషే, గుహ్య-ముండే నమస్తే .. 5..

ఓం ఘ్రాం-ఘ్రీం-ఘ్రూం ఘోర-తుండే, ఘఘ-ఘఘ ఘఘఘే ఘర్ఘరాన్యాఙిఘ్ర-ఘోషే

హ్రీం క్రీం ద్రూం ద్రోంచ-చక్రే, రర-రర-రమితే, సర్వ-జ్ఞానే ప్రధానే .

ద్రీం తీర్థేషు చ జ్యేష్ఠే, జుగ-జుగ జజుగే మ్లీం పదే కాల-ముండే

సర్వాంగే రక్త-ధారా-మథన-కర-వరే, వజ్ర-దండే నమస్తే .. 6..

ఓం క్రాం క్రీం క్రూం వామ-నమితే, గగన గడ-గడే గుహ్య-యోని-స్వరుపే

వజ్రాంగే, వజ్ర-హస్తే, సుర-పతి-వరదే, మత్త-మాతంగ-రుఢే .

స్వస్తేజే, శుద్ధ-దేహే, లల-లల-లలితే, ఛేదితే పాశ-జాలే

కిండల్యాకార-రుపే, వృష వృషభ-ధ్వజే, ఐంద్రి మాతర్నమస్తే .. 7..

ఓం హుఀ హుఀ హుంకార-నాదే, విషమవశ-కరే, యక్ష-వైతాల-నాథే

సు-సిద్ధయర్థే సు-సిద్ధైః, ఠఠ-ఠఠ-ఠఠఠః, సర్వ-భక్షే ప్రచండే .

జూం సః సౌం శాంతి-కర్మేఽమృత-మృత-హరే, నిఃసమేసం సముద్రే

దేవి, త్వం సాధకానాం, భవ-భవ వరదే, భద్ర-కాలీ నమస్తే .. 8..

బ్రహ్మాణీ వైష్ణవీ త్వం, త్వమసి బహుచరా, త్వం వరాహ-స్వరుపా

త్వం ఐంద్రీ త్వం కుబేరీ, త్వమసి చ జననీ, త్వం కుమారీ మహేంద్రీ .

ఐం హ్రీం క్లీంకార-భూతే, వితల-తల-తలే, భూ-తలే స్వర్గ-మార్గే

పాతాలే శైల-శృంగే, హరి-హర-భువనే, సిద్ధ-చండీ నమస్తే .. 9..

హం లం క్షం శౌండి-రుపే, శమిత భవ-భయే, సర్వ-విఘ్నాంత-విఘ్నే

గాం గీం గూం గైం షడంగే, గగన-గతి-గతే, సిద్ధిదే సిద్ధ-సాధ్యే .

వం క్రం ముద్రా హిమాంశోర్ప్రహసతి-వదనే, త్ర్యక్షరే హ్సైం నినాదే

హాం హూం గాం గీం గణేశీ, గజ-ముఖ-జననీ, త్వాం మహేశీం నమామి .. 10..

గీర్లలితాంబికాస్తుతిః

(శ్రీశారదాగౌరీసహోత్సవకాలే)

కంజాక్షముఖ్యామర పూజితాభ్యాం

     నిజాశ్రితాశేషవరప్రదాభ్యాం .

శృంగాద్రికాంచీపురవాసినీభ్యాం

నమో నమో గీర్లలితాంబికాభ్యాం .. 1..

ఏకాంతపూజాపరితుష్టహృద్భ్యా-

     మేకాక్షరీశీలనలబ్ధపద్భ్యాం .

విధీశచిత్తాబ్జరవిప్రభాభ్యాం

నమో నమో గీర్లలితాంబికాభ్యాం .. 2..

ఈహాంబుధేర్బాడవభారభృద్భ్యా-

     మీకారయుఙ్మంత్రవిబోధితాభ్యాం .

అజాస్యశంభ్వంకవిభూషణాభ్యాం

     నమో నమో గీర్లలితాంబికాభ్యాం .. 3..

ఇతి శృంగేరి శ్రీజగద్గురు శ్రీసచ్చిదానందశివాభినవనృసింహ-

భారతీస్వామిభిః విరచితా శ్రీగీర్లలితాంబికాస్తుతిః సమాప్తా .

శ్రీసరస్వతీస్తోత్రం అథవా వాణీస్తవనం యాజ్ఞ్యవల్క్యోక్త

(దేవీభాగవతతశ్చ)

అథ పంచమోఽధ్యాయః .

నారాయణ ఉవాచ .

వాగ్దేవతాయాః స్తవనం శ్రూయతాం సర్వకామదం .

మహామునిర్యాజ్ఞవల్క్యో యేన తుష్టావ తాం పురా .. 1..

గురుశాపాచ్చ స మునిర్హతవిద్యో బభూవ హ .

తదా జగామ దుహ్ఖార్తో రవిస్థానం చ పుణ్యదం .. 2..

సంప్రాప్యతపసా సూర్యం కోణార్కే దృష్టిగోచరే .

తుష్టావ సూర్యం శోకేన రురోద స పునః పునః .. 3..

సూర్యాస్తం పాఠయామాస వేదవేదాంగమీశ్వరః .

ఉవాచ స్తుహి వాగ్దేవీం భక్త్యా చ శ్రుతిహేతవే .. 4..

తమిత్యుక్త్వా దీననాథో హ్యంతర్ధానం జగామ సః .

మునిస్నాత్వా చ తుష్టావ భక్తినమ్రాత్మకంధరః .. 5..

యాజ్ఞవల్క్య ఉవాచ .

కృపాం కురు జగన్మాతర్మామేవం హతతేజసం .

గురుశాపాత్స్మృతిభ్రష్టం విద్యాహీనం చ దుఃఖితం .. 6..

జ్ఞానం దేహి స్మృతిం దేహి విద్యాం దేహి దేవతే .

ప్రతిష్ఠాం కవితాం దేహి శాక్తం శిష్యప్రబోధికాం .. 7..

గ్రంథనిర్మితిశక్తిం చ సచ్ఛిష్యం సుప్రతిష్ఠితం .

ప్రతిభాం సత్సభాయాం చ విచారక్షమతాం శుభాం .. 8..

లుప్తాం సర్వాం దైవవశాన్నవం కురు పునః పునః .

యథాఽఙ్కురం జనయతి భగవాన్యోగమాయయా .. 9..

బ్రహ్మస్వరూపా పరమా జ్యోతిరూపా సనాతనీ .

సర్వవిద్యాధిదేవీ యా తస్యై వాణ్యై నమో నమః .. 10..

యయా వినా జగత్సర్వం శశ్వజ్జీవన్మృతం సదా .

జ్ఞానాధిదేవీ యా తస్యై సరస్వత్యై నమో నమః .. 11..

యయా వినా జగత్సర్వం మూకమున్మత్తవత్సదా .

వాగధిష్ఠాతృదేవీ యా తస్యై వాణ్యై నమో నమః .. 12..

హిమచందనకుందేందుకుముదాంభోజసంనిభా .

వర్ణాధిదేవీ యా తస్యై చాక్షరాయై నమో నమః .. 13..

విసర్గ బిందుమాత్రాణాం యదధిష్ఠానమేవ చ .

ఇత్థం త్వం గీయసే సద్భిర్భారత్యై తే నమో నమః .. 14..

యయా వినాఽత్ర సంఖ్యాకృత్సంఖ్యాం కర్తుం న శక్నుతే .

కాల సంఖ్యాస్వరూపా యా తస్యై దేవ్యై నమో నమః .. 15..

వ్యాఖ్యాస్వరూపా యా దేవీ వ్యాఖ్యాధిష్ఠాతృదేవతా .

భ్రమసిద్ధాంతరూపా యా తస్యై దేవ్యై నమో నమః .. 16..

స్మృతిశక్తిర్జ్ఞానశక్తిర్బుద్ధిశక్తిస్వరూపిణీ .

ప్రతిభాకల్పనాశక్తిర్యా చ తస్యై నమో నమః .. 17..

సనత్కుమారో బ్రహ్మాణం జ్ఞానం పప్రచ్ఛ యత్ర వై .

బభూవ జడవత్సోఽపి సిద్ధాంతం కర్తుమక్షమః .. 18..

తదాఽఽజగామ భగవానాత్మా శ్రీకృష్ణ ఈశ్వరః .

ఉవాచ స చ తం స్తౌహి వాణీమితి ప్రజాపతే .. 19..

స చ తుష్టావ తాం బ్రహ్మా చాఽఽజ్ఞయా పరమాత్మనః .

చకార తత్ప్రసాదేన తదా సిద్ధాంతముత్తమం .. 20..

యదాప్యనంతం పప్రచ్ఛ జ్ఞానమేకం వసుంధరా .

బభూవ మూకవత్సోఽపి సిద్ధాంతం కర్తుమక్షమః .. 21..

తదా త్వాం చ స తుష్టావ సంత్రస్తః కశ్యపాజ్ఞయా .

తతశ్చకార సిద్ధాంతం నిర్మలం భ్రమభంజనం .. 22..

వ్యాసః పురాణసూత్రం సమపృచ్ఛద్వాల్మికిం యదా .

 var  వ్యాసః పురాణసూత్రశ్చ సమపృచ్ఛతవాల్మికిం .

మౌనీభూతః స సస్మార త్వామేవ జగదంబికాం .. 23..

తదా చకార సిద్ధాంతం త్వద్వరేణ మునీశ్వరః .

స ప్రాప నిర్మలం జ్ఞానం ప్రమాదధ్వంసకారణం .. 24..

పురాణ సూత్రం శ్రుత్వా స వ్యాసః కృష్ణకలోద్భవః .

త్వాం సిషేవే చ దధ్యౌ తం శతవర్షం చ పుష్క్కరే .. 25..

తదా త్వత్తో వరం ప్రాప్య స కవీంద్రో బభూవ హ .

తదా వేదవిభాగం చ పురాణాని చకార హ .. 26..

యదా మహేంద్రే పప్రచ్ఛ తత్త్వజ్ఞానం శివా శివం .

క్షణం త్వామేవ సంచింత్య తస్యై జ్ఞానం దధౌ విభుః .. 27..

పప్రచ్ఛ శబ్దశాస్త్రం చ మహేంద్రస్చ బృహస్పతిం .

దివ్యం వర్షసహస్రం చ స త్వాం దధ్యౌ చ పుష్కరే .. 28..

తదా త్వత్తో వరం ప్రాప్య దివ్యం వర్షసహస్రకం .

ఉవాచ శబ్దశాస్త్రం చ తదర్థం చ సురేశ్వరం .. 29..

అధ్యాపితాశ్చ యైః శిష్యాః యైరధీతం మునీశ్వరైః .

తే చ త్వాం పరిసంచింత్య ప్రవర్తంతే సురేశ్వరి .. 30..

త్వం సంస్తుతా పూజితా చ మునీంద్రమనుమానవైః .

దైత్యైశ్చ సురైశ్చాపి బ్రహ్మవిష్ణుశివాదిభిః .. 31..

జడీభూతః సహస్రాస్యః పంచవక్త్రశ్చతుర్ముఖః .

యాం స్తోతుం కిమహం స్తౌమి తామేకాస్యేన మానవః .. 32..

ఇత్యుక్త్వా యాజ్ఞవల్క్యశ్చ భక్తినమ్రాత్మకంధరః .

ప్రణనామ నిరాహారో రురోద చ ముహుర్ముహుః .. 33..

తదా జ్యోతిః స్వరూపా సా తేనాఽదృష్టాఽప్యువాచ తం .

సుకవీంద్రో భవేత్యుక్త్వా వైకుంఠం చ జగామ హ .. 34..

మహామూర్ఖశ్చ దుర్మేధా వర్షమేకం చ యః పఠేత్ .

స పండితశ్చ మేధావీ సుకవిశ్చ భవేద్ధ్రువం .. 35..

ఇతి శ్రీబ్రహ్మవైవర్తే మహాపురాణే ప్రకృతిఖండే నారదనారాయణసంవాదే

యాజ్ఞవల్క్యోక్త వాణీస్తవనం నామ పంచమోఽధ్యాయః ..

ఇతి శ్రీమద్దేవీభాగవతే మహాపురాణే నవమస్కంధే

యాజ్ఞవల్క్యకృతం సరస్వతీస్తోత్రవర్ణనం నామ పంచమోఽధ్యాయః ..

శ్రీసరస్వతీస్తోత్రం అగస్త్యమునిప్రోక్తం

శ్రీగణేశాయ నమః .

యా కుందేందుతుషారహారధవలా యా శుభ్రవస్త్రావృతా

యా వీణావరదండమండితకరా యా శ్వేతపద్మాసనా .

యా బ్రహ్మాచ్యుతశంకరప్రభృతిభిర్దేవైస్సదా పూజితా (వందితా)

సా మాం పాతు సరస్వతీ భగవతీ నిశ్శేషజాడ్యాపహా .. 1..

దోర్భిర్యుక్తా చతుర్భిః స్ఫటికమణినిభైరక్షమాలాందధానా

హస్తేనైకేన పద్మం సితమపిచ శుకం పుస్తకం చాపరేణ .

భాసా కుందేందుశంఖస్ఫటికమణినిభా భాసమానాఽసమానా

సా మే వాగ్దేవతేయం నివసతు వదనే సర్వదా సుప్రసన్నా .. 2..

సురాసురాసేవితపాదపంకజా కరే విరాజత్కమనీయపుస్తకా .

విరించిపత్నీ కమలాసనస్థితా సరస్వతీ నృత్యతు వాచి మే సదా .. 3..

సరస్వతీ సరసిజకేసరప్రభా తపస్వినీ సితకమలాసనప్రియా .

ఘనస్తనీ కమలవిలోలలోచనా మనస్వినీ భవతు వరప్రసాదినీ .. 4..

సరస్వతి నమస్తుభ్యం వరదే కామరూపిణి .

విద్యారంభం కరిష్యామి సిద్ధిర్భవతు మే సదా .. 5..

సరస్వతి నమస్తుభ్యం సర్వదేవి నమో నమః .

శాంతరూపే శశిధరే సర్వయోగే నమో నమః .. 6..

నిత్యానందే నిరాధారే నిష్కలాయై నమో నమః .

విద్యాధరే విశాలాక్షి శుద్ధజ్ఞానే నమో నమః .. 7..

శుద్ధస్ఫటికరూపాయై సూక్ష్మరూపే నమో నమః .

శబ్దబ్రహ్మి చతుర్హస్తే సర్వసిద్ధ్యై నమో నమః .. 8..

ముక్తాలంకృతసర్వాంగ్యై మూలాధారే నమో నమః .

మూలమంత్రస్వరూపాయై మూలశక్త్యై నమో నమః .. 9..

మనోమయి మహాయోగే వాగీశ్వరి నమో నమః .

వాణ్యై వరదహస్తాయై వరదాయై నమో నమః .. 10..

వేద్యాయై వేదరూపాయై వేదాంతాయై నమో నమః .

గుణదోషవివర్జిన్యై గుణదీప్త్యై నమో నమః .. 11..

సర్వజ్ఞానే సదానందే సర్వరూపే నమో నమః .

సంపన్నాయై కుమార్యై చ సర్వజ్ఞాయై నమో నమః .. 12..

యోగరూపే రమాదేవ్యై యోగానందే నమో నమః .

దివ్యజ్ఞాయై త్రినేత్రాయై దివ్యమూర్త్యై నమో నమః .. 13..

అర్ధచంద్రజటాధారి చంద్రబింబే నమో నమః . (అర్ధచంద్రధరే దేవిచంద్రరూపే)

చంద్రాదిత్యజటాధారి చంద్రబింబే నమో నమః .. 14.. (చంద్రాదిత్యసమే దేవి చంద్రభూషే)

అణురూపే మహారూపే విశ్వరూపే నమో నమః .

అణిమాద్యష్టసిద్ధాయై ఆనందాయై నమో నమః .. 15..

జ్ఞానవిజ్ఞానరూపాయై జ్ఞానమూర్తే నమో నమః .

నానాశాస్త్రస్వరూపాయై నానారూపే నమో నమః .. 16..

పద్మదే పద్మవంశే చ పద్మరూపే నమో నమః .

పరమేష్ఠ్యై పరామూర్త్యై నమస్తే పాపనాశినీ .. 17..

మహాదేవ్యై మహాకాల్యై మహాలక్ష్మ్యై నమో నమః .

బ్రహ్మవిష్ణుశివాఖ్యాయై బ్రహ్మనార్యై నమో నమః .. 18..

కమలాకరపుష్పా చ కామరూపే నమో నమః . (కమలాకరగేహాయై)

కపాలి కర్మదీప్తాయై కర్మదాయై నమో నమః .. 19.. (కపాలిప్రాణనాథాయై)

సాయం ప్రాతః పఠేన్నిత్యం షాణ్మాసాత్సిద్ధిరుచ్యతే .

చోరవ్యాఘ్రభయం నాస్తి పఠతాం శృణ్వతామపి .. 20..

ఇత్థం సరస్వతీస్తోత్రమగస్త్యమునివాచకం .

సర్వసిద్ధికరం నౄణాం సర్వపాపప్రణాశనం .. 21..

.. ఇత్యగస్త్యమునిప్రోక్తం సరస్వతీస్తోత్రం సంపూర్ణం ..

 శ్రీసరస్వతీస్తుతీ

యా కుందేందు-తుషారహార-ధవలా యా శుభ్ర-వస్త్రావృతా

     యా వీణావరదండమండితకరా యా శ్వేతపద్మాసనా .

యా బ్రహ్మాచ్యుత-శంకర-ప్రభృతిభిర్దేవైః సదా పూజితా

     సా మాం పాతు సరస్వతీ భగవతీ నిఃశేషజాడ్యాపహా .. 1..

దోర్భిర్యుక్తా చతుర్భిః స్ఫటికమణిమయీమక్షమాలాం దధానా

     హస్తేనైకేన పద్మం సితమపి చ శుకం పుస్తకం చాపరేణ .

భాసా కుందేందు-శంఖస్ఫటికమణినిభా భాసమానాఽసమానా

     సా మే వాగ్దేవతేయం నివసతు వదనే సర్వదా సుప్రసన్నా .. 2..

ఆశాసు రాశీ భవదంగవల్లి

     భాసైవ దాసీకృత-దుగ్ధసింధుం .

మందస్మితైర్నిందిత-శారదేందుం

     వందేఽరవిందాసన-సుందరి త్వాం .. 3..

శారదా శారదాంబోజవదనా వదనాంబుజే .

సర్వదా సర్వదాస్మాకం సన్నిధిం సన్నిధిం క్రియాత్ .. 4..

సరస్వతీం చ తాం నౌమి వాగధిష్ఠాతృ-దేవతాం .

దేవత్వం ప్రతిపద్యంతే యదనుగ్రహతో జనాః .. 5..

పాతు నో నికషగ్రావా మతిహేమ్నః సరస్వతీ .

ప్రాజ్ఞేతరపరిచ్ఛేదం వచసైవ కరోతి యా .. 6..

శుద్ధాం బ్రహ్మవిచారసారపరమా-మాద్యాం జగద్వ్యాపినీం

     వీణాపుస్తకధారిణీమభయదాం జాడ్యాంధకారాపహాం .

హస్తే స్పాటికమాలికాం విదధతీం పద్మాసనే సంస్థితాం

     వందే తాం పరమేశ్వరీం భగవతీం బుద్ధిప్రదాం శారదాం .. 7..

వీణాధరే విపులమంగలదానశీలే

     భక్తార్తినాశిని విరించిహరీశవంద్యే .

కీర్తిప్రదేఽఖిలమనోరథదే మహార్హే

     విద్యాప్రదాయిని సరస్వతి నౌమి నిత్యం .. 8..

శ్వేతాబ్జపూర్ణ-విమలాసన-సంస్థితే హే

     శ్వేతాంబరావృతమనోహరమంజుగాత్రే .

ఉద్యన్మనోజ్ఞ-సితపంకజమంజులాస్యే

     విద్యాప్రదాయిని సరస్వతి నౌమి నిత్యం .. 9..

మాతస్త్వదీయ-పదపంకజ-భక్తియుక్తా

     యే త్వాం భజంతి నిఖిలానపరాన్విహాయ .

తే నిర్జరత్వమిహ యాంతి కలేవరేణ

     భూవహ్ని-వాయు-గగనాంబు-వినిర్మితేన .. 10..

మోహాంధకార-భరితే హృదయే మదీయే

     మాతః సదైవ కురు వాసముదారభావే .

స్వీయాఖిలావయవ-నిర్మలసుప్రభాభిః

     శీఘ్రం వినాశయ మనోగతమంధకారం .. 11..

బ్రహ్మా జగత్ సృజతి పాలయతీందిరేశః

     శంభుర్వినాశయతి దేవి తవ ప్రభావైః .

న స్యాత్కృపా యది తవ ప్రకటప్రభావే

     న స్యుః కథంచిదపి తే నిజకార్యదక్షాః .. 12..

లక్ష్మిర్మేధా ధరా పుష్టిర్గౌరీ తృష్టిః ప్రభా ధృతిః .

ఏతాభిః పాహి తనుభిరష్టభిర్మాం సరస్వతీ .. 13..

సరసవత్యై నమో నిత్యం భద్రకాల్యై నమో నమః

వేద-వేదాంత-వేదాంగ- విద్యాస్థానేభ్య ఏవ చ .. 14..

సరస్వతి మహాభాగే విద్యే కమలలోచనే .

విద్యారూపే విశాలాక్షి విద్యాం దేహి నమోఽస్తు తే .. 15..

యదక్షర-పదభ్రష్టం మాత్రాహీనం చ యద్భవేత్ .

తత్సర్వం క్షమ్యతాం దేవి ప్రసీద పరమేశ్వరి .. 16..

      .. ఇతి శ్రీసరస్వతీ స్తోత్రం సంపూర్ణం..

శ్రీసరస్వతీసప్తకం

విహసంతీ వరవదనే ! రతిమతిమేధాం చ సుధాం చ వికిరంతీ .

అజ్ఞానావృతగాత్రం స్వకృపాపాత్రం విధేహి మామీశే .. 1..

వితరంతీ శం, వాదం వాచి, విషాదం వినాశయ చజ్ఞానం .

వితరాపూర్వాహ్లాదం, జహి మతిసాదం ప్రసీద వాగీశే ! .. 2..

కలయంతీ హృది హారం హీరకసారం ప్రభాం ప్రవర్షంతీ .

రచయ స్వీయవిహారాగారం హృదయం మదీయమయి ధీశే ! .. 3..

దీనోద్ధారం కారం మాతః ! పారం నయాశు వినతోఽహం .

దుర్వృత్తీనాం కదనం కురు మే వదనం సదా స్వకం సదనం .. 4..

అర్పయ సదయాం దృష్టిం సపది సమర్పయ చ శాస్త్రసంబోధం .

సంతర్పయ మమ చాంతర్వరదే ! వరదేవి ! పాహి దాసస్తే .. 5..

సార్తస్వరాణాం త్వము చేన్న మాతః !

     కార్తస్వరాబ్జాసనసన్నివిష్టే! .

అజ్ఞాననాశం కురుషే స్వకానాం,

     కా నామ వామా న పునశ్చ శక్తిః .. 6..

మాతస్త్వదీయపదపంకజకల్పితాశో,

     దాసోఽస్మి తే చ జగతో నితరాం నిరాశః .

సద్యః ప్రసీద శరణే తవ బద్ధపాశః

     క్రందామి మేఽపి తనుతాం హృది సత్ప్రకాశం .. 7..

ఇతి రామకృపాలు ద్వివేదీ సాహిత్యాచార్యస్య విరచితం

                శ్రీసరస్వతీసప్తకం సంపూర్ణం .

శ్రీసరస్వతీవందనా

.. శ్రీగణేశాయ నమః . శ్రీపరమాత్మనే నమః . శ్రీసరస్వత్యై నమః ..

కరాంభోజే మాలాం శ్రితశుభమరాలా మణిమయీం

      సముత్సంగే తంత్రీం సకలభయహంత్రీం వహతి యా .

సుహాసా సద్భాషా ధవలితసుభాసా గుణమయీ

      ముఖాంభోజే భోజప్రభవవనితా నో విహరతు .. 1..

శారదే సుఖదేఽనిశం పాదాంబుజే ప్రణమామ్యహం

      శక్తిదే శుభదే సదా నమ్రస్తవం విదధామ్యహం .

శ్వేతాంబరే శ్వేతాబ్జవర్ణే శ్వేతపద్మవిలాసిని

      శర్మదే వరదేఽధ్యతే కాంచిత్ కలా కలయామ్యహం .. 2..

రాజతే వీణా యదుత్సంగే మరాలో వాహనం

      మంజులే మాలాకరే కాంతిం కథం కథయామ్యహం .

జ్ఞానదే మునయో న తే పారంగతాశ్ఛవివర్ణనే

      శక్తిదే కథమద్భుతాన్నిఖిలాన్ గుణాన్ గణయామ్యహం .. 3..

తారితా బహవో బుధాః కిం మాం ముదా సముపేక్ష్యసే

      దేవి చింతయ చేతసా చిరకాలతోఽనునయామ్యహం .

త్వత్ కృపాకలయా కలౌ కాలేఽపి కీర్తిరవాప్యతే

      కామదే కవికర్మదే నితరామదోఽనుభవామ్యహం .. 4..

కంఠకౌంఠ్యవికుంఠితా సహసా ప్రగల్భగిరోఽభవ-

      న్యత్కృపాకణతోఽద్భుతే గుణగౌరవాణి గృణామ్యహం .

దేవి త్వత్ సహయోగతో విదితోఽఖిలో జగదుత్థితం

బాలకో రహితో ధియా స్తవనే త్రుటిం కృతవానలం

      భక్తిదే తత్ తత్ క్షమార్థం ప్రాంజలిం రచయామ్యహం .. 5..

            .. శృంగవేరపురవందనా ..

దేవీ యత్ర విరాజతే త్రిపథగా భాగీరథీ శర్మదా

      ప్రత్యక్షేవ మనఃప్రసాదజననీ శాంతా చ శాంతిప్రదా .

బ్రహ్మర్షేర్నను శృంగిణోఽతివిమలం యస్మింస్తపో వర్తతే

      తద్వః శాంతిసుఖం సదా వితనుతాం శ్రీశృంగవేరం పురం .. 6..

ఇతి ఆచార్యసత్యనారాయణశుక్లవిరచితా శ్రీసరస్వతీవందనా సమాప్తా .

శ్రీసరస్వతీరహస్యోపనిషత్

ప్రతియోగివినిర్ముక్తబ్రహ్మవిద్యైకగోచరం .

అఖండనిర్వికల్పం తద్రామచంద్రపదం భజే ..

ఓం వాఙ్మే మనసి ప్రతిష్ఠితా మనో మే వాచి ప్రతిష్ఠిత-

మావిరావీర్మ ఏధి .. వేదస్య మ ఆణీస్థః శ్రుతం మే

ప్రహాసీరనేనాధీతేనాహోరాత్రాన్సందధామి ఋతం వదిష్యామి

సత్యం వదిష్యామి తన్మామవతు అవతు మామవతు వక్తార-

మవతు వక్తారం .. ఓం శాంతిః శాంతిః శాంతిః ..

హరిః ఓం .. ఋషయో హ వై భగవంతమాశ్వలాయనం సంపూజ్య

పప్రచ్ఛుః కేనోపాయేన తజ్జ్ఞానం తత్పదార్థావభాసకం .

యదుపాసనయా తత్త్వం జానాసి భగవన్వద .. 1..

సరస్వతీ దశశ్లోక్యా సఋచా బీజమిశ్రయా .

స్తుత్వా జప్త్వా పరాం సిద్ధిమలభం మునిపుంగవాః .. 2.. ఋషయ ఊచుః .

కథం సారస్వతప్రాప్తిః కేన ధ్యానేన సువ్రత .

మహాసరస్వతీ యేన తుష్టా భగవతీ వద .. 3..

స హోవాచాశ్వలాయనః . అస్య శ్రీసరస్వతీదశశ్లోకీమహామంత్రస్య .

అహమాశ్వలాయన ఋషిః . అనుష్టుప్ ఛందః . శ్రీ వాగీశ్వరీ దేవతా .

యద్వాగితి బీజం . దేవీం వాచమితి శక్తిః . ప్రణో దేవీతి కీలకం .

వినియోగస్తత్ప్రీత్యర్థే . శ్రద్ధా మేధా ప్రజ్ఞా ధారణా వాగ్దేవతా

మహాసరస్వతీత్యేతైరంగన్యాసః .. నీహారహారఘనసారసుధాకరాభాం

కల్యాణదాం కనకచంపకదామభూషాం . ఉత్తుంగపీనకుచకుంభ-

మనోహరాంగీం వాణీం నమామి మనసా వచసా విభూత్యై .. 1..

ఓం ప్రణోదేవీత్యస్య మంత్రస్య భరద్వాజ ఋషిః . గాయత్రీ ఛందః .

శ్రీసరస్వతీ దేవతా . ప్రణవేన బీజశక్తిః కీలకం . ఇష్టార్థే వినియోగః .

మంత్రేణ న్యాసః .. యా వేదాంతార్థతత్త్వైకస్వరూపా పరమార్థతః .

నామరూపాత్మనా వ్యక్తా సా మాం పాతు సరస్వతీ .. ఓం ప్రణో దేవీ సరస్వతీ

వాజేభిర్వాజినీవతీ .. ధీనామవిత్ర్యవతు .. 1..

ఆ నో దివ ఇతి మంత్రస్య అత్రిరృషిః . త్రిష్టుప్ ఛందః .

సరస్వతీ దేవతా . హ్రీమితి బీజశక్తిః కీలకం . ఇష్టార్థే

వినియోగః . మంత్రేణ న్యాసః .. యా సాంగోపాంగవేదేషు

చతుర్ష్వేకైవ గీయతే . అద్వైతా బ్రహ్మణః శక్తిః సా మాం

పాతు సరస్వతీ .. హ్రీం ఆ నో దివో బృహతః పర్వతాదా సరస్వతీ

యజతాగం తు యజ్ఞం . హవం దేవీ జుజుషాణా ఘృతాచీ

శగ్మాం నో వాచముశతీ శ్రుణోతు .. 2..

పావకా న ఇతి మంత్రస్య . మధుచ్ఛంద ఋషిః . గాయత్రీ

ఛందః . సరస్వతీ దేవతా . శ్రీమితి బీజశక్తిః కీలకం .

ఇష్టార్థే వినియోగః . మంత్రేణ న్యాసః .. యా వర్ణపదవాక్యార్థ-

స్వరూపేణైవ వర్తతే . అనాదినిధనానంతా సా మాం పాతు

సరస్వతీ .. శ్రీం పావకా నః సరస్వతీ వాజేభిర్వాజినీవతీ . యజ్ఞం

వష్టు ధియా వసుః .. 3..

చోదయిత్రీతి మంత్రస్య మధుచ్ఛంద ఋషిః . గాయత్రీ ఛందః .

సరస్వతీ దేవతా . బ్లూమితి బీజశక్తిః కీలకం . మంత్రేణ న్యాసః ..

అధ్యాత్మమధిదైవం చ దేవానాం సమ్యగీశ్వరీ . ప్రత్యగాస్తే

వదంతీ యా సా మాం పాతు సరస్వతీ .. బ్లూం చోదయిత్రీ సూనృతానాం

చేతంతీ సుమతీనాం . యజ్ఞం దధే సరస్వతీ .. 4..

మహో అర్ణ ఇతి మంత్రస్య . మధుచ్ఛంద ఋషిః . గాయత్రీ ఛందః .

సరస్వతీ దేవతా . సౌరితి బీజశక్తిః కీలకం . మంత్రేణ న్యాసః .

అంతర్యామ్యాత్మనా విశ్వం త్రైలోక్యం యా నియచ్ఛతి .

రుద్రాదిత్యారూపస్థా యస్యామావేశ్య తాం పునః . ధ్యాయంతి

సర్వరూపైకా సా మాం పాతు సరస్వతీ . సౌః మహో అర్ణః

సరస్వతీ ప్రచేతయతి కేతునా . ధియో విశ్వా విరాజతి .. 5..

చత్వారి వాగితి మంత్రస్య ఉచథ్యపుత్ర ఋషిః . త్రిష్టుప్ ఛందః .

సరస్వతీ దేవతా . ఐమితి బీజశక్తిః కీలకం . మంత్రేణ న్యాసః .

యా ప్రత్యగ్దృష్టిభిర్జీవైర్వ్యజ్యమానానుభూయతే . వ్యాపినీ

జ్`నప్తిరూపైకా సా మాం పాతు సరస్వతీ .. ఐం చత్వారి వాక్

పరిమితా పదాని తాని విదుర్బ్రాహ్మణా యే మనీషిణః . గుహా త్రీణి

నిహితా నేంగయంతి తురీయం వాచో మనుష్యా వదంతి .. 6..

యద్రాగ్వదంతీతి మంత్రస్య భార్గవ ఋషిః . త్రిష్టుప్ ఛందః .

సరస్వతీ దేవతా . క్లీమితి బీజశక్తిః కీలకం . మంత్రేణ న్యాసః .

నామజాత్యాదిభిర్భేదైరష్టధా యా వికల్పితా . నిర్వికల్పాత్మనా

వ్యక్తా సా మాం పాతు సరస్వతీ .. క్లీం యద్వాగ్వదంత్యవిచేతనాని

రాష్ట్రీ దేవానాం నిషసాద మంద్రా . చతస్ర ఊర్జం దుదుహే

పయాంసి క్వ స్విదస్యాః పరమం జగామ .. 7..

దేవీం వాచమితి మంత్రస్య భార్గవ ఋషిః . త్రిష్టుప్ ఛందః .

సరస్వతీ దేవతా . సౌరితి బీజశక్తిః కీలకం . మంత్రేణ న్యాసః .

వ్యక్తావ్యక్తగిరః సర్వే వేదాద్యా వ్యాహరంతి యాం . సర్వకామదుధా

ధేనుః సా మాం పాతు సరస్వతీ .. సౌః దేవీం వాచమజనయంత

దేవాస్తా విశ్వరూపాః పశవో వదంతి . సా నో మంద్రేషమూర్జం

దుహానా ధేనుర్వాగస్మానుపసుష్టుతైతు .. 8..

ఉత త్వ ఇతి మంత్రస్య బృహస్పతిరృషిః . త్రిష్టుప్ ఛందః .

సరస్వతీ దేవతా . సమితి బీజశక్తిః కీలకం . మంత్రేణ న్యాసః .

యాం విదిత్వాఖిలం బంధం నిర్మథ్యాఖిలవర్త్మనా . యోగీ యాతి

పరం స్థానం సా మాం పాతు సరస్వతీ .. సం ఉత త్వః పశ్యన్న

దదర్శ వాచముత త్వః శ్రుణ్వన్న శ్రుణోత్యేనాం . ఉతో త్వస్మై

తన్వం 1 విసస్రే జాయేవ పత్య ఉశతీ సువాసాః .. 9..

అంబితమ ఇతి మంత్రస్య గృత్సమద ఋషిః . అనుష్టుప్ ఛందః .

సరస్వతీ దేవతా . ఐమితి బీజశక్తిః కీలకం . మంత్రేణ న్యాసః .

నామరూపాత్మకం సర్వం యస్యామావేశ్య తాం పునః .

ధ్యాయంతి బ్రహ్మరూపైకా సా మాం పాతు సరస్వతీ .. ఐం అంబితమే

నదీతమే దేవితమే సరస్వతీ . అప్రశస్తా ఇవ స్మసి ప్రశస్తిమంబ

నస్కృధి .. 10..

చతుర్ముఖముఖాంభోజవనహంసవధూర్మమ .

మానసే రమతాం నిత్యం సర్వశుక్లా సరస్వతీ .. 1..

నమస్తే శారదే దేవి కాశ్మీరపురవాసిని .

త్వామహం ప్రార్థయే నిత్యం విద్యాదానం చ దేహి మే .. 2..

అక్షసూత్రాంకుశధరా పాశపుస్తకధారిణీ .

ముక్తాహారసమాయుక్తా వాచి తిష్ఠతు మే సదా .. 3..

కంబుకంఠీ సుతామ్రోష్ఠీ సర్వాభరణభూషితా .

మహాసరస్వతీ దేవీ జిహ్వాగ్రే సంనివిశ్యతాం .. 4..

యా శ్రద్ధా ధారణా మేధా వాగ్దేవీ విధివల్లభా .

భక్తజిహ్వాగ్రసదనా శమాదిగుణదాయినీ .. 5..

నమామి యామినీనాథలేఖాలంకృతకుంతలాం .

భవానీం భవసంతాపనిర్వాపణసుధానదీం .. 6..

యః కవిత్వం నిరాతంకం భుక్తిముక్తీ చ వాంఛతి .

సోఽభైర్చ్యైనాం దశశ్లోక్యా నిత్యం స్తౌతి సరస్వతీం .. 7..

తస్యైవం స్తువతో నిత్యం సమభ్యర్చ్య సరస్వతీం .

భక్తిశ్రద్ధాభియుక్తస్య షణ్మాసాత్ప్రత్యయో భవేత్ .. 8..

తతః ప్రవర్తతే వాణీ స్వేచ్ఛయా లలితాక్షరా .

గద్యపద్యాత్మకైః శబ్దైరప్రమేయైర్వివక్షితైః .. 9..

అశ్రుతో బుధ్యతే గ్రంథః ప్రాయః సారస్వతః కవిః .

ఇత్యేవం నిశ్చయం విప్రాః సా హోవాచ సరస్వతీ .. 10..

ఆత్మవిద్యా మయా లబ్ధ్వా బ్రహ్మణైవ సనాతనీ .

బ్రహ్మత్వం మే సదా నిత్యం సచ్చిదానందరూపతః .. 11..

ప్రకృతిత్వం తతః సృష్టం సత్త్వాదిగుణసామ్యతః .

సత్యమాభాతి చిచ్ఛాయా దర్పణే ప్రతిబింబవత్ .. 12..

తేన చిత్ప్రతిబింబేన త్రివిధా భాతి సా పునః .

ప్రకృత్యవచ్ఛిన్నతయా పురుషత్వం పునశ్చ తే .. 13..

శుద్ధసత్త్వప్రధానాయాం మాయాయాం బింబితో హ్యజః .

సత్త్వప్రధానా ప్రకృతిర్మాయేతి ప్రతిపాద్యతే .. 14..

సా మాయా స్వవశోపాధిః సర్వజ్ఞస్యేశ్వరస్య హి .

వశ్యమాయత్వమేకత్వం సర్వజ్ఞత్వం చ తస్య తు .. 15..

సాత్వికత్వాత్సమష్టిత్వాత్సాక్షిత్వాజ్జగతామపి .

జగత్కర్తుమకర్తుం వా చాన్యథా కర్తుమీశతే .. 16..

యః స ఈశ్వర ఇత్యుక్తః సర్వజ్ఞత్వాదిభిర్గుణైః .

శక్తిద్వయం హి మాయాయా విక్షేపావృతిరూపకం .. 17..

విక్షేపశక్తిర్లింగాదిబ్రహ్మాండాంతం జగత్సృజేత్ .

అంతర్దృగ్దృశ్యయోర్భేదం బహిశ్చ బ్రహ్మసర్గయోః .. 18..

ఆవృణోత్యపరా శక్తిః సా సంసారస్య కారణం .

సాక్షిణః పురతో భాతం లింగదేహేన సంయుతం .. 19..

చితిచ్ఛాయాసమావేశాజ్జీవః స్యాద్వ్యావహారికః .

అస్య జీవత్వమారోపాత్సాక్షిణ్యప్యవభాసతే .. 20..

ఆవృతౌ తు వినష్టాయాం భేదే భాతేఽపయాతి తత్ .

తథా సర్గబ్రహ్మణోశ్చ భేదమావృత్య తిష్ఠతి .. 21..

యా శక్తిస్త్వద్వశాద్బ్రహ్మ వికృతత్వేన భాసతే .

అత్రాప్యావృతినాశేన విభాతి బ్రహ్మసర్గయోః .. 22..

భేదస్తయోర్వికారః స్యాత్సర్గే న బ్రహ్మణి క్వచిత్ .

అస్తి భాతి ప్రియం రూపం నామ చేత్యంశపంచకం .. 23..

ఆద్యత్రయం బ్రహ్మరూపం జగద్రూపం తతో ద్వయం .

అపేక్ష్య నామరూపద్వే సచ్చిదానందతత్పరః .. 24..

సమాధిం సర్వదా కుర్యాధృదయే వాథ వా బహిః .

సవికల్పో నిర్వికల్పః సమాధిర్ద్వివిధో హృది .. 25..

దృశ్యశబ్దానుభేదేన స వికల్పః పునర్ద్విధా .

కామాద్యాశ్చిత్తగా దృశ్యాస్తత్సాక్షిత్వేన చేతనం .. 26..

ధ్యాయద్దృశ్యానువిద్ధోఽయం సమాధిః సవికల్పకః .

స్వానుభూతిరసావేశాద్దృశ్యశబ్దాద్యపేక్షితుః .. 28..

నిర్వికల్పః సమాధిః స్యాన్నివాంతస్థితదీపవత్ .

హృదీవ బాహ్యదేశేఽపి యస్మిన్కస్మింశ్చ వస్తుని .. 29..

సమాధిరాద్యసన్మాత్రాన్నామరూపపృథక్కృతిః .

స్తబ్ధీభావో రసాస్వాదాత్తృతీయః పూర్వవన్మతః .. 30..

ఏతైః సమాధిభిః షడ్భిర్నయేత్కాలం నిరంతరం .

దేహాభిమానే గలితే విజ్ఞాతే పరమాత్మని .

యత్ర యత్ర మనో యాతి తత్ర తత్ర పరామృతం .. 31..

భిద్యతే హృదయగ్రంథిశ్ఛిద్యంతే సర్వసంశయాః .

క్షీయంతే చాస్య కర్మాణి తస్మిందృష్టే పరావరే .. 32..

మయి జీవత్వమీశత్వం కల్పితం వస్తుతో నహి .

ఇతి యస్తు విజానాతి స ముక్తో నాత్ర సంశయః .. 33..

ఇత్యుపనిషత్ ..

ఓం వాఙ్మే మనసి ప్రతిష్ఠితా మనో మే వాచి ప్రతిష్ఠిత-

మావిరావీర్మ ఏధి .. వేదస్య మ ఆణీస్థః శ్రుతం మే మా

ప్రహాసీరనేనాధీతేనాహోరాత్రాన్సందధామి ఋతం వదిష్యామి

సత్యం వదిష్యామి తన్మామవతు తద్వక్తారమవత్వవతు మామవతు

వక్తారమవతు వక్తారం ..

ఓం శాంతిః శాంతిః శాంతిః ..

ఇతి సరస్వతీరహస్యోపనిషత్సమాప్తా ..