Sacred Stotras & Deities

శ్రీదుర్గాస్తోత్రం రుద్రయామలాంతర్గతం

అథ దుర్గాస్తోత్రం .

శ్రీభైరవ ఉవాచ

అధునా దేవి వక్ష్యామి దుర్గాస్తోత్రం మనోహరం .

మూలమంత్రమయం దివ్యం సర్వసారస్వతప్రదం .. 1..

దుర్గార్తిశమనం పుణ్యం సాధకానాం జయప్రదం .

దుర్గాయా అంగభూతం తు స్తోత్రరాజం పరాత్పరం .. 2..

శ్రీదుర్గాస్తోత్రరాజస్య ఋషిర్దేవో మహేశ్వరః .

ఛందోఽనుష్టుప్ దేవతాపి శ్రీదుర్గాష్టాక్షరా శివే .. 3..

దుం బీజంచ పరా శక్తిః నమః కీలకమీశ్వరి .

ధర్మార్థకామమోక్షార్థే శ్రీదుర్గాస్తోత్రపాఠే వినియోగః .. 4..

అథ ధ్యానం

దూర్వానిభాం త్రినయనాం విలసత్కిరీటాం

     శంఖాబ్జఖడ్గశరఖేటకశూలచాపాం .

సంతర్జనీం చ దధతీం మహిషాసనస్థాం

     దుర్గాంతవారకులపీఠగతాం భజేఽహం .. 1..

తారం హారం మంత్రమాలా సుబీజం ధ్యాయేదంతర్యో బలం బాలకాంతః .

తస్య స్మారం స్మారమంఘ్రిద్వయం చ రమ్యాయాతి స్వర్గతా కామవశ్యా .. 2..

మాయాం జపేద్యస్తవ మంత్రమధ్యే దుర్గే సదా దుర్గతిఖేదఖిన్నః .

భవేచ్చ భూమౌ నృపమాలిమాలామాణిక్యనిర్ధృష్టపదారవిందః .. 3..

చాక్రియం యది జపేత్తవాఽఙ్ఘ్రికే చక్రమధ్యగత ఈశ్వరీశ్వరి .

సాధకో భవతి చక్రవర్తినాం నాయకో మమ విలాసకోవిదః .. 4..

చక్రిబీజమపరం స్మరేచ్ఛివే యోఽరివర్గవిహితాదతవ్యయః .

ఆనిమేఽలగతే జపేద్రిపూన్ వాజివారణరథాశ్రితో నరః .. 5..

దుర్గాబీజం యో జపేత్ ప్రేతభూమౌ సాయం మాయా భస్మనాఽఽలిప్తకాయః .

త్రిర్వారణానాం నాయకో దేవి .

మంత్రీ భుక్త్వా రాజ్యం ప్రాజ్యమాజ్యం కరోతి .. 6..

వాయవ్యబీజం యది సాధకో జపేత్ ప్రియాకుచద్వంద్వవిమర్దనక్షమః .

సమస్తకాంతాజననేత్రవాగురో విలాసహంసో భవితా స పార్వతి .. 7..

విశ్వే విశ్వేశ్వరి యది జపేత్ కామవేలాకలార్తౌ

     రాత్రౌ మాత్రాక్షరవిలసితం మాస ఈశాని నామ .

తస్య స్మేరాననసరసిజా భ్రాజమానాంగలక్ష్మీ

     వశ్యావశ్యం సూరపూరవఘూమౌలి మాలా వశామా .. 8..

భూగేహాశ్చిత వహ్నివృత్తవిలసన్నాగారవృత్తార్చిత-

     వ్యగ్రారోల్ల సితాగ్నికోణ విలసచ్ఛ్రీ బిందు పీఠస్థితాం .

ధ్యాయేచ్చేతసి శర్వపత్ని భవతీం మాధ్వీరసాధృర్ణితాం

     యో మంత్రీ స భవిష్యతి స్మరసమః స్త్రీణాం ధరణ్యాం దివి .. 9..

దుర్గాస్తవం మనుమయం మనురాజమౌలి-

     ర్మాణిక్యముత్తమశివాంగరహస్యభూతం .

ప్రాతః పఠేద్యది జపావసరేఽర్యమాయాం

     భూమౌ భవేత్ స నృపతిర్దివి దేవనాథః .. 10..

ఇదం స్తోత్రం మహాపుణ్యం పంచాంగైకశిరోమణిం .

యః పఠేదర్ధరాత్రే తు తస్య వశ్యం జగత్త్రయం .. 11..

ఇదం పంచాంగమఖిలం శ్రీదుర్గాయా రహస్యకం .

సర్వసిద్ధిప్రదం గుహ్యం సర్వదా పరిపూరకం .. 12.. సర్వాశా

గుహ్యం మంత్రరహస్యం తు తవ భక్త్యా ప్రకాశితం .

అభక్తాయ న దాతవ్యమిత్యాజ్ఞా పారమేశ్వరీ .. 13..

శ్రీదేవ్యువాచ

భగవన్ భవతా తేన కథనేన మహేశ్వర .

శ్రీపంచాంగస్య దుర్గాయా అథ ప్రీతాస్మ్యహం పరం .. 14..

శ్రీభైరవ ఉవాచ

ఇదం రహస్యం పరమం దుర్గాసర్వస్వముత్తమం .

పంచాంగం వర్ణితం గోప్యం గోపనీయం స్వయోనివత్ .. 15..

ఇతి శ్రీరుద్రయామలేతంత్రే దేవీరహస్యే దుర్గాస్తోత్రం సంపూర్ణం ..

శ్రీపరశురామకృతం దుర్గాస్తోత్రం

పరశురామ ఉవాచ -

శ్రీకృష్ణస్య చ గోలోకే పరిపూర్ణతమస్య చ .

ఆవిర్భూతా విగ్రహతః పురా సృష్ట్యున్ముఖస్య చ .. 1..

సూర్యకోటిప్రభాయుక్తా వస్త్రాలంకారభూషితా .

వహ్నిశుద్ధాంశుకాధానా సుస్మితా సుమనోహరా .. 2..

నవయౌవనసంపన్నా సిందూరారుణ్యశోభితా .  var  సిందూరబిందుశోభితా .

లలితం కబరీభారం మాలతీమాల్యమండితం .. 3..

అహోఽనిర్వచనీయా త్వం చరుమూర్తిం చ బిభ్రతీ .

మోక్షప్రదా ముముక్షూణాం మహావిష్ణోర్విధిః స్వయం .. 4..

ముమోహ క్షణమాత్రేణ దృష్ట్వా త్వాం సర్వమోహినీం .

బాలైస్సంభూయ సహసా సస్మితా ధావితా పురా .. 5..

సద్భిః ఖ్యాతా తేన రాధా మూలప్రకృతిరీశ్వరీ .

కృష్ణస్త్వాం సహసాహూయ వీర్యాధానం చకార హ .. 6..  var  కృష్ణస్తాం సహసా భీతో

తతో డింభం మహజ్జజ్ఞే తతో జాతో మహావిరాట్ .

యస్యైవ లోమకూపేషు  బ్రహ్మాండాన్యాఖిలాని చ .. 7..

రాధారతిక్రమేణైవ తన్నిశ్శ్వాసో బభూవ హ .  var  తచ్ఛృంగారక్రమేణైవ

స నిఃశ్వాసో మహావాయుః స విరాడ్ విశ్వధారకః .. 8..

భయధర్మజలేనైవ పుప్లువే విశ్వగోలకం .  var  తవ ఘర్మ

స విరాడ్ విశ్వనిలయో జలరాశిర్బభూవ హ .. 9..

తతస్త్వం పంచధాభూయ పంచమూర్తీశ్చ బిభ్రతీ .

ప్రాణాధిష్ఠాతృమూర్తిర్యా కృష్ణస్య  పరమాత్మనః .

కృష్ణప్రాణాధికాం రాధాం తాం వదంతి పురావిదః .. 10..

వేదాధిష్ఠాతృమూర్తిర్యా వేదాశాస్త్రప్రసూరపి .

తాం సావిత్రీం శుద్ధరూపాం ప్రవదంతి మనీషిణః .. 11..

ఐశ్వర్యాధిష్ఠాతృమూర్తిః శాంతిస్త్వం శాంతరూపిణీ .  var  శాంతిశ్చ

లక్ష్మీం వదంతి సంతస్తాం శుద్ధాం సత్త్వస్వరూపిణీం .. 12..

రాగాధిష్ఠాతృదేవీ యా శుక్లమూర్తిః సతాం ప్రసూః .

సరస్వతీం తాం శాస్త్రజ్ఞాం శాస్త్రజ్ఞాః ప్రవదంత్యహో .. 13..

బుద్ధిర్విద్యాసర్వశక్తేర్యా మూర్తిరధిదేవతా .

సర్వమంగలమంగల్యా సర్వమంగలరూపిణీ .. 14..

సర్వమంగలబీజస్య శివస్య నిలయేఽధునా .. 15..

శివే శివాస్వరూపా త్వం లక్ష్మీర్నారాయణాంతికే .

సరస్వతీ చ సావిత్రీ వేదసూర్బ్రహ్మణః ప్రియా .. 16..

రాధా రాసేశ్వరస్యైవ పరిపూర్ణతమస్య చ .

పరమానందరూపస్య పరమానందరూపిణీ .. 17..

త్వత్కలాంశాంశకలయా దేవానామపి యోషితః .. 18..

త్వం విద్యా యోషితః సర్వాస్సర్వేషాం బీజరూపిణీ .  var  సర్వాస్త్వం సర్వబీజరూపిణీ

ఛాయా సూర్యస్య చంద్రస్య రోహిణీ సర్వమోహినీ .. 19..

శచీ శక్రస్య కామస్య కామినీ రతిరీశ్వరీ .

వరుణానీ జలేశస్య వాయోః స్త్రీ ప్రాణవల్లభా .. 20..

వహ్నేః ప్రియా హి స్వాహా చ కుబేరస్య చ సుందరీ .

యమస్య తు సుశీలా చ నైరృతస్య చ కైటభీ .. 21..

ఐశానీ స్యాచ్ఛ్శికలా శతరూపా మనోః ప్రియా .  var  ఈశానస్య శశికలా

దేవహూతిః కర్దమస్య వసిష్ఠస్యాప్యరుంధతీ .. 22..

లోపాముద్రాఽప్యగస్త్యస్య దేవమాతాఽదితిస్తథా .

అహల్యా గౌతమస్యాపి సర్వాధారా వసుంధరా .. 23..

గంగా చ తులసీ చాపి పృథివ్యాం యాః సరిద్వరాః .

ఏతాః సర్వాశ్చ యా హ్యన్యాః సర్వాస్త్వత్కలయాంబికే .. 24..

గృహలక్ష్మీర్గృహే నౄణాం రాజలక్ష్మీశ్చ రాజసు .

తపస్వినాం తపస్యా త్వం గాయత్రీ బ్రాహ్మణస్య చ .. 25..

సతాం సత్త్వస్వరూపా త్వమసతాం కలహాంకురా .

జ్యోతీరూపా నిర్గుణస్య శక్తిస్త్వం సగుణస్య చ .. 26..

సూర్యే ప్రభాస్వరూపా త్వం దాహికా చ హుతాశనే .

జలే శైత్యస్వరూపా చ శోభారూపా నిశాకరే .. 27..

త్వం భూమౌ గంధరూపా చ ఆకాశే శబ్దరూపిణీ .

క్షుత్పిపాసాదయస్త్వం చ జీవినాం సర్వశక్తయః .. 28..

సర్వబీజస్వరూపా త్వం సంసారే సారరూపిణీ .

స్మృతిర్మేధా చ బుద్ధిర్వా జ్ఞానశక్తిర్విపశ్చితాం .. 29..

కృష్ణేన విద్యా యా దత్తా సర్వజ్ఞానప్రసూః శుభా .

శూలినే కృపయా సా త్వం యతో మృత్యుంజయః శివః .. 30..

సృష్టిపాలనసంహారశక్తయస్త్రివిధాశ్ర్చ యాః .

బ్రహ్మవిష్ణుమహేశానాం సా త్వమేవ నమోఽస్తు తే .. 31..

మధుకైటభభీత్యా చ త్రస్తో ధాతా ప్రకంపితః .

స్తుత్వా ముక్తశ్చ యాం దేవీం తాం మూర్ధ్నా ప్రణమామ్యహం .. 32..  var  స్తుత్వా ముమోచ

మధుకైటభయోర్యుద్ధే త్రాతాఽసౌ విష్ణురీశ్వరీం .

బభూవ శక్తిమాన్స్తుత్వా తాం దుర్గాం ప్రణమామ్యహం .. 33..

త్రిపురస్య మహాయుద్ధే సరథే పతితే శివే .

యాం తుష్టువుః సురాః సర్వే తాం దుర్గాం ప్రణమామ్యహం .. 34..

విష్ణునా వృషరూపేణ స్వయం శంభుః సముత్థితః .

జఘాన త్రిపురం స్తుత్వా తాం దుర్గాం ప్రణమామ్యహం .. 35..

యదాజ్ఞయా వాతి వాతః సూర్యస్తపతి సంతతం .

వర్షతీంద్రో దహత్యగ్నిస్తాం దుర్గాం ప్రణమామ్యహం .. 36..

యదాజ్ఞయా హి కాలశ్చ శశ్వద్భ్రమతి వేగతః .

మృత్యుశ్చరతి జంత్వోఘే తాం దుర్గాం ప్రణమామ్యహం .. 37..  var  జంతూనాం

స్రష్టా సృజతి సృష్టిం చ పాతా పాతి యదాజ్ఞయా .

సంహర్తా సంహరేత్కాలే తాం దుర్గాం ప్రణమామ్యహం .. 38..

జ్యోతిఃస్వరూపో భగవాంఛ్రీకృష్ణో నిర్గుణః స్వయం .

యయా వినా న శక్తశ్చ సృష్టిం కర్తుం నమామి తాం .. 39..

రక్ష రక్ష జగన్మాతరపరాధం క్షమస్వ తే .  var  క్షమస్వ మే

శిశూనామపరాధేన కుతో మాతా హి కుప్యతి .. 40..

ఇత్యుక్త్వా పర్శురామశ్చ ప్రణమ్య తాం రురోద హ .  var  పరశురామశ్చేతి నత్వా తాం

తుష్టా దుర్గా సంభ్రమేణ చాభయం చ వరం దదౌ .. 41..

అమరో భవ హే పుత్ర వత్స సుస్థిరతాం వ్రజ .

శర్వప్రసాదాత్సర్వత్ర జయోఽస్తు తవ సంతతం .. 42..  var  సర్వప్రసాదాత్

సర్వాంతరాత్మా భగవాంస్తుష్టోఽస్తు సంతతం హరిః .  var  తుష్టస్యాత్సంతతం

భక్తిర్భవతు తే కృష్ణే శివదే చ శివే గురౌ .. 43..

ఇష్టదేవే గురౌ యస్య భక్తిర్భవతి శాశ్వతీ .

తం హంతుం న హి శక్తాశ్చ రుష్టాశ్చ సర్వదేవతాః .. 44..  var  శక్తా వా తుష్టా వా

శ్రీకృష్ణస్య చ భక్తస్త్వం శిష్యో హి శంకరస్య చ . శిష్యో వై

గురుపత్నీం స్తౌషి యస్మాత్కస్త్వాం హంతుమిహేశ్వరః .. 45..

అహో న కృష్ణభక్తానామశుభం విద్యతే క్వచిత్ .

అన్యదేవేషు యే భక్తా న భక్తా వా నిరంకశాః .. 46..

చంద్రమా బలవాంస్తుష్టో యేషాం భాగ్యవతాం భృగో .

తేషాం తారాగణా రుష్టాః కిం కుర్వంతి చ దుర్బలాః .. 47..

యస్య తుష్టః సభాయాం చేన్నరదేవో మహాన్సుఖీ .  var  యస్మై తుష్టః పాలయతి

తస్య కిం వా కరిష్యంతి రుష్టా భృత్యాశ్చ దుర్బలాః .. 48..

ఇత్యుక్త్వా పార్వతీ తుష్టా దత్త్వా రామం శుభాశిషం .  var  రామాయ చాశిషం

జగామాంతఃపురం తూర్ణం హరిశబ్దో బభూవ హ .. 49..

స్తోత్రం వై కాణ్వశాఖోక్తం పూజాకాలే చ యః పఠేత్ .

యాత్రాకాలే చ ప్రాతర్వా వాంఛితార్థం లభేద్ధ్రువం .. 50..

పుత్రార్థీ లభతే పుత్రం కన్యార్థీ కన్యకాం లభేత్ .

విద్యార్థీ లభతే విద్యాం ప్రజార్థీ చాప్నుయాత్ ప్రజాం .

భ్రష్టరాజ్యో లభేద్రాజ్యం నష్టవిత్తో ధనం లభేత్ .. 51..

యస్య రుష్టో గురుర్దేవో రాజా వా బాంధవోఽథవా .

తస్య తుష్టశ్చ వరదః స్తోత్రరాజప్రసాదతః .. 52..

దస్యుగ్రస్తోఽహిగ్రస్తశ్చ శత్రుగ్రస్తో భయానకః .  var  దస్యుగ్రస్తః ఫణిగ్రస్తశ్శత్రుగ్రస్తో

వ్యాధిగ్రస్తో భవేన్ముక్తః స్తోత్రస్మరణమాత్రతః .. 53..

రాజద్వారే శ్మశానే  చ కారాగారే చ బంధనే .

జలరాశౌ నిమగ్నశ్చ ముక్తస్తత్స్మృతిమాత్రతః .. 54..

స్వామిభేదే పుత్రభేదే మిత్రభేదే చ దారుణే .

స్తోత్రస్మరణమాత్రేణ వాంఛితార్థం లభేద్ధ్రువం .. 55..

కృత్వా హవిష్యం వర్షం చ స్తోత్రరాజం శృణోతి యా .

భక్త్యా దుర్గాం చ సంపూజ్య మహావంధ్యా ప్రసూయతే .. 56..

లభతే సా దివ్యపుత్రం జ్ఞానినం చిరజీవినం .

అసౌభాగ్యా చ సౌభాగ్యం షణ్మాసశ్రవణాల్లభేత్ .. 57..

నవమాసం కాకవంధ్యా మృతవత్సా చ భక్తితః .

స్తోత్రరాజం యా శృణోతి సా పుత్రం లభతే ధ్రువం .. 58..

కన్యామాతా పుత్రహీనా పంచమాసం శృణోతి యా .

ఘటే సంపూజ్య దుర్గాం చ సా పుత్రం లభతే ధ్రువం .. 59..

ఇతి శ్రీబ్రహ్మవైవర్తే నారదనారాయణసంవాదే పరశురామకృతం

దుర్గాస్తోత్రం సంపూర్ణం .

గాయత్రీకవచం 3

శ్రీగణేశాయ నమః ..

శ్రీపార్వత్యువాచ .

దేవదేవ మహాదేవ సంసారార్ణవతారకం .

గాయత్రీకవచం దేవ కృపయా కథయ ప్రభో .. 1..

శ్రీమహాదేవ ఉవాచ .

మూలాధారే స్థితా నిత్యం కుండలీ తత్త్వరూపిణీ .

సూక్ష్మాతిసూక్ష్మపరమా బిసతంతుస్వరూపిణీ .. 2..

విద్యుత్పుంజప్రతీకాశా కుండలీ శ్రుతిసర్పిణీ .

పరస్య బ్రహ్మగ్రహణీ పంచాశద్వర్ణరూపిణీ .. 3..

శివస్య నర్తకీ నిత్యా పరబ్రహ్మప్రపూజితా .

బ్రాహ్మణస్యైవ గాయత్రీ చిదానందస్వరూపిణీ .. 4..

బ్రహ్మణ్యవర్త్మవాతేయం ప్రాణాత్మా నిత్యనూతనాత్ .

నిత్యం తిష్ఠతి సానందా కుండలీ తవ విగ్రహే .. 5..

అతిగోప్యం మహత్పుణ్యం త్రికోటీతీర్థసంయుతం .

సర్వజ్ఞానమయీ దేవీ సర్వదానమయీ సదా .. 6..

సర్వసిద్ధిమయీ దేవీ పార్వతీ ప్రాణవల్లభా .

ఓం ఓం ఓం ఓం భూః ఓం ఓం భువః ఓం ఓం స్వః ఓం ఓం త ఓం ఓం త్స

ఓం ఓం వి ఓం ఓం తు ఓం ఓం వ ఓం ఓం రే ఓం ఓం ణ్యం ఓం ఓం భ

ఓం ఓం ర్గో ఓం ఓం దే ఓం ఓం వ ఓం ఓం స్య ఓం ఓం ధీ ఓం ఓం మ

ఓం ఓం హి ఓం ఓం ధి ఓం ఓం యో ఓం ఓం యో ఓం ఓం నః ఓం ఓం ప్ర

ఓం ఓం చో ఓం ఓం ద ఓం ఓం యాత్ ఓం Oమ్ . ఓం భూః ఓం

పాతు మే మూలం చతుర్దలసమన్వితం .

ఓం భువః ఓం పాతు మే లింగం సజలం షడ్దలాత్మకం .. 7..

ఓం స్వః ఓం పాతు మే కంఠం సకాశాం దలషోడశం .

ఓం  త ఓం  పాతు మే రూపం బ్రహ్మాణం కారణం పరం .. 8..

ఓం త్స ఓం పాతు మే బ్రహ్మాణం పాతు సదా మమ .

ఓం వి ఓం పాతు మే గంధం సదా శిశిరసంయుతం .. 9..

ఓం తు ఓం పాతు మే స్పర్శం శరీరస్య చ కారణం .

ఓం ర్వ ఓం పాతు మే శబ్దం శబ్దవిగ్రహకారణం .. 10..

ఓం రే ఓం పాతు మే నిత్యం సదా తత్త్వశరీరకం .

ఓం ణ్యం ఓం పాతు మే హ్యక్షం సర్వతత్త్వైకకారణం .. 11..

ఓం భ ఓం పాతు మే శ్రోత్రం శ్రవణస్య చ కారణం .

ఓం ర్గో ఓం పాతు మే ఘ్రాణం గంధోపాదానకారణం .. 12..

ఓం దే ఓం పాతు మే వాస్యం సభాయాం శబ్దరూపిణీ .

ఓం వ ఓం పాతు మే బాహుయుగలం బ్రహ్మక్రారణం .. 13..

ఓం స్య ఓం పాతు మే లింగం షడ్దలం షడ్దలైర్యురతం .

ఓం ధీ ఓం పాతు మే నిత్యం ప్రకృతిం శబ్దకారణం .. 14..

ఓం మ ఓం పాతు మే నిత్యం మనోబ్రహ్మస్వరూపిణం .

ఓం హి ఓం పాతు మే బుద్ధిం పరబ్రహ్మమయం సదా .. 15..

ఓం ధియ ఓం పాతు మే నిత్యమహంకారం యథా తథా .

ఓం యో ఓం పాతు మే నిత్యం జలం సర్వత్ర సర్వదా .

ఓం నః ఓం పాతు మే నిత్యం తేజఃపుంజో యథా తథా .. 16..

ఓం ప్ర ఓం పాతు మే నిత్యమనిలం కార్యకారణం .

ఓం చో ఓం పాతు మే నిత్యమాకాశం శివసన్నిభం .. 17..

ఓం ద ఓం పాతు మే జిహ్వాం జపయజ్ఞస్య కారణం .

ఓం యాత్ ఓం మే నిత్యం శివజ్ఞానమయం సదా .. 18..

తత్త్వాని పాతు మే నిత్యం గాయత్రీ పరదైవతం .

కృష్ణా మే సతతం పాతు బ్రహ్మాణీ భూర్భువఃస్వరోం .. 19..

ఓం అస్య శ్రీగాయత్రీకవచస్య పరబ్రహ్మ ఋషిః

ఋగ్యజుఃసామాథర్వాణశ్ఛందాంసి, బ్రహ్మా దేవతా,

ధర్మార్థకామమోక్షార్థం జపే వినియోగః ..

ఓం భూర్భువఃస్వః తత్సవితుర్వరేణ్యం భర్గో దేవస్య ధీమహి .

ధియో యో నః ప్రచోదయాత్ .

కామక్రోధాదికం సర్వం స్మరణాద్యాతి దూరతః .

ఇదం కవచమజ్ఞాత్వా బ్రహ్మవిద్యాం జపేద్యది .. 20..

శతకోటిజపేనాపి న సిద్ధిర్జాయతే ప్రియే .

గాయత్రీకవచాత్సర్వం స్మరణాత్సిధ్యతి ధ్రువం .. 21..

పఠిత్వా కవచం విప్రో గాయత్రీం సకృదుచ్చరేత్ .

సర్వపాపవినిర్ముక్తో జీవన్ముక్తో భవేద్విజః .. 22..

ఇదం కవచమజ్ఞాత్వా త్వన్యద్యః కవచం పఠేత్ .

సర్వం తస్య వృథా దేవి త్రైలోక్యమంగలాదికం .. 23..

గాయత్రీ కవచం యస్య జిహ్వాయాం విద్యతే సదా .

తదాఽమృతమయీ జిహ్వా పవిత్రా జపపూజనే .. 24..

ఇదం కవచమజ్ఞాత్వా బ్రహ్మవిద్యాం జపేద్యది .

వ్యర్థం భవతి చార్వంగి తజ్జపో వనరోదనం .. 25..

బ్రహ్మహత్యా సురాపానం స్తేయం గుర్వంగనాగమః .

మహాంతి పాతకాన్యస్య స్మరణాద్యాంతి దూరతః .. 26..

నశ్వరం మాంసమేదోఽస్థిమజ్జాశుక్రవినిర్మితం .. 27..

వాతపిత్తకఫైర్యుక్తం స్థూలదేహం తదుచ్యతే .

సూక్ష్మం జ్యోతిర్మయం దేహం పంచభూతాత్మకం విదుః .. 28..

మహాపద్మవనాంతస్థం సర్వావయవసంయుతం .

ఆధారదేహసంబంధాద్గాయత్రీ బ్రహ్మణః స్వయం .. 29..

ఏతదేవ పరం బ్రహ్మ కథితే ఉభయాత్మకే .

బ్రాహ్మణస్యైవ జీవాత్మా గాయత్రీసహితో వపుః .. 30..

ఆత్మనాం హృదయాంభోజే ప్రదీపకలికోపమం .

నిర్ధూమం చ యథా జ్యోతిస్తైలాగ్నివర్తియోగతః .. 31..

తజ్జ్యోతిః పరమం బ్రహ్మ శుభదం నాత్ర సంశయః .

గాయత్రీకవచం న్యాసం మాతృకాస్థానసంధిషు .. 32..

స కృత్వా బ్రాహ్మణశ్రేష్ఠ చాన్యన్యాసం సమాచరేత్ .

అన్యన్యాసే తథా సిద్ధిరన్యథాయాఽరణ్యరోదనం .. 33..

గాయత్రీన్యాసమాత్రేణ పరబ్రహ్మమయో ద్విజః .

ఇదం కవచమజ్ఞాత్వా బ్రహ్మచర్యం కరోతి యః .. 34..

బ్రహ్మచర్యం భవేద్వ్యర్థం గాయత్రీకవచం వినా .

కవచస్య ప్రసాదేన బ్రాహ్మణో జ్వలదగ్నివత్ .. 35..

కవచం పరమేశాని సృష్టిస్థితిలయాత్మకం .

కవచం బ్రాహ్మణ ఇదం ప్రాతరుత్థాయ యః పఠేత్ .. 36..

గాయత్రీం స సకృత్స్మృత్వా జపలక్షఫలం భవేత్ .

గాయత్రీం దశధా జప్త్వా దశలక్షఫలం భవేత్ .. 37..

ఏవం క్రమేణ గాయత్రీం శతధా ప్రజపేద్యది .

శతలక్షఫలం ప్రాప్య విహరేద్దేవవద్భువి .. 38

సూర్యేందోర్గ్రహణే చేదం పఠిత్వా కవచం ద్విజః .

సకృద్యది జపేద్విద్యాం గాయత్రీం పరమాక్షరాం .. 39..

తత్క్షణాత్తు భవేత్సిద్ధో బ్రహ్మసాయుజ్యమాప్నుయాత్ .

ఇదం కవక్షమజ్ఞాత్వా గాయత్రీం ప్రజపేత్తు యః .. 40..

జప ఏవ వృథా తస్య నిస్తేజో న చ సిద్ధిదః .

యః పఠేత్కవచం దేవి సతతం శివసన్నిధౌ .. 41..

విష్ణుదేవస్య కవచం ప్రజపేచ్ఛక్తిసన్నిధౌ .

తేజఃపుంచమయో విప్రస్తత్క్షణాజ్జాయతే ధ్రువం .. 42..

ఇతి శ్రీరుద్రయామలే పార్వతీశ్వరసంవాదే గాయత్రీకవచం సంపూర్ణం ..

గాయత్రీ సంహితా

ఆది శక్తిరితి విష్ణోస్తామహం ప్రణమామి హి .

సర్గః స్థితిర్వినాశశ్చ జాయంతే జగతోఽనయా .. 1..

నాభి-పద్మ-భువా విష్ణోర్బ్రహ్మణా నిర్మితం జగత్ .

స్థావరం జంగమం శక్త్యా గాయత్ర్యా ఏవ వై ధ్రువం .. 2..

చంద్రశేఖర కేశేభ్యో నిర్గతా హి సురాపగా .

భగీరథం తతారైవ పరివారసమం యథా .. 3..

జగద్ధాత్రీ సముద్భూయ యా హృన్మానసరోవరే .

గాయత్రీ సకులం పారం తథా నయతి సాధకం .. 4..

సాస్తి గంగైవ జ్ఞానాఖ్యసునీరేణ సమాకులా .

జ్ఞాన గంగా తు తాం భక్త్యా వారం-వారం నమామ్యహం .. 5..

ఋషయో వేద-శాస్త్రాణి సర్వే చైవ మహర్షయః .

శ్రద్ధయా హృది గాయత్రీం ధారయంతి స్తువంతి చ .. 6..

హ్రీం శ్రీం క్లీం చేతి రూపైస్తు త్రిభిర్వా లోకపాలినీ .

భాసతే సతతం లోకే గాయత్రీ త్రిగుణాత్మికా .. 7..

గాయత్ర్యైవ మతా మాతా వేదానాం శాస్త్రసంపదాం .

చత్వారోఽపి సముత్పన్నా వేదాస్తస్యా అసంశయం .. 8..

పరమాత్మనస్తు యా లోకే బ్రహ్మ శక్తిర్విరాజతే .

సూక్ష్మా చ సాత్త్వికీ చైవ గాయత్రీత్యభిధీయతే .. 9..

ప్రభావాదేవ గాయత్ర్యా భూతానామభిజాయతే .

అంతఃకరణేషు దేవానాం తత్త్వానాం హి సముద్భవః .. 10..

గాయత్ర్యుపాసనాకరణాదాత్మశక్తిర్వివర్ధతే .

ప్రాప్యతే క్రమశోఽజస్య సామీప్యం పరమాత్మనః .. 11..

శౌచం శాంతిర్వివేకశ్చైతల్లాభ త్రయమాత్మికం .

పశ్చాదవాప్యతే నూనం సుస్థిరం తదుపాసకం .. 12..

కార్యేషు సాహసః స్థైర్యం కర్మనిష్ఠా తథైవ చ .

ఏతే లాభాశ్చ వై తస్మాజ్జాయంతే మానసాస్త్రయః .. 13..

పుష్కలం ధన-సంసిద్ధిః సహయోగశ్చ సర్వతః .

స్వాస్థ్యం వా త్రయ ఏతే స్యుస్తస్మాల్లాభాశ్చ లౌకికాః .. 14..

కాఠిన్యం వివిధం ఘోరం హ్యాపదాం సంహతిస్తథా .

శీఘ్రం వినాశతాం యాంతి వివిధా విఘ్నరాశయః .. 15..

వినాశాదుక్త శత్రూణామంతః శక్తిర్వివర్ధతే .

సంకటానామనాయాసం పారం యాతి తయా నరః .. 16..

గాయత్ర్యుపాసకస్వాంతే సత్కామా ఉద్భవంతి హి .

తత్పూర్తయేఽభిజాయంతే సహజం సాధనాన్యపి .. 17..

త్రుటయః సర్వథా దోషా విఘ్నా యాంతి యదాంతతాం .

మానవో నిర్భయం యాతి పూర్ణోన్నతి పథం తదా .. 18..

బాహ్యంచాభ్యంతరం త్వస్య నిత్యం సన్మార్గగామినః .

ఉన్నతేరుభయం ద్వారం యాత్యున్ముక్తకపాటతాం .. 19..

అతః స్వస్థేన చిత్తేన శ్రద్ధయా నిష్ఠయా తథా .

కర్తవ్యావిరతం కాలే గాయత్ర్యాః సముపాసనా .. 20..

దయాలుః శక్తి సంపన్నా మాతా బుద్ధిమతీ యథా .

కల్యాణం కురుతే హ్యేవ ప్రేమ్ణా బాలస్య చాత్మనః .. 21..

తథైవ మాతా లోకానాం గాయత్రీ భక్తవత్సలా .

విదధాతి హితం నిత్యం భక్తానాం ధ్రువమాత్మనః .. 22..

కుర్వన్నపి త్రుటీర్లోకే బాలకో మాతరం ప్రతి .

యథా భవతి కశ్చిన్న తస్యా అప్రీతిభాజనః .. 23..

కుర్వన్నపి త్రుటీర్భక్తః క్వచిత్ గాయత్ర్యుపాసనే .

న తథా ఫలమాప్నోతి విపరీతం కదాచన .. 24..

అక్షరాణాం తు గాయత్ర్యా గుంఫనం హ్యస్తి తద్విధం .

భవంతి జాగృతా యేన సర్వా గుహ్యాస్తు గ్రంథయః .. 25..

జాగృతా గ్రంథయస్త్వేతాః సూక్ష్మాః సాధకమానసే .

దివ్యశక్తిసముద్భూతిం క్షిప్రం కుర్వంత్యసంశయం .. 26..

జనయంతి కృతే పుంసామేతా వై దివ్యశక్తయః .

వివిధాన్ వై పరిణామాన్ భవ్యాన్ మంగలపూరితాన్ .. 27..

మంత్రస్యోచ్చారణం కార్యం శుద్ధమేవాప్రమాదతః .

తదశక్తో జపేన్నిత్యం సప్రణవాస్తు వ్యాహృతీః .. 28..

ఓమితి ప్రణవః పూర్వం భూర్భువః స్వస్తదుత్తరం .

ఏషోక్తా లఘు గాయత్రీ విద్వద్భిర్వేదపండితైః .. 29..

శుద్ధం పరిధానమాధాయ శుద్ధే వై వాయుమండలే .

శుద్ధ దేహమనోభ్యాం వై కార్యా గాయత్ర్యుపాసనా .. 30..

దీక్షామాదాయ గాయత్ర్యా బ్రహ్మనిష్ఠాగ్రజన్మనా .

ఆరభ్యతాం తతః సమ్యగ్విధినోపాసనా సతా .. 31..

గాయత్ర్యుపాసనాముక్త్వా నిత్యావశ్యకకర్మసు .

ఉక్తస్తత్ర ద్విజాతీనాం నానధ్యాయో విచక్షణైః .. 32..

ఆరాధయంతి గాయత్రీం న నిత్యం యే ద్విజన్మనః .

జాయంతే హి స్వకర్మభ్యస్తే చ్యుతా నాత్ర సంశయః .. 33..

శూద్రాస్తు జన్మనా సర్వే పశ్చాద్యాంతి ద్విజన్మతాం .

గాయత్ర్యైవ జనాః సాకం హ్యుపవీతస్య ధారణాత్ .. 34..

ఉచ్చతా పతితానాం చ పాపినాం పాపనాశనం .

జాయేతే కృపయైవాస్యాః వేదమాతురనంతయా .. 35..

గాయత్ర్యా యా యుతా సంధ్యా బ్రహ్మసంధ్యా తు సా మతా .

కీర్తితం సర్వతః శ్రేష్ఠం తస్యానుష్ఠానమాగమైః .. 36..

ఆచమనం శిఖాబంధః ప్రాణాయామోఽఘమర్షణం .

న్యాసశ్చోపాసనాయాం తు పంచ కోషా మతా బుధైః .. 37..

ధ్యానతస్తు తతః పశ్చాత్ సావధానేన చేతసా .

జప్యా సతతం తులసీ మాలయా చ ముహుర్ముహుః .. 38..

ఏక వారం ప్రతిదినం న్యూనతో న్యూనసంఖ్యకం .

ధీమాన్మంత్ర శతం నూనం నిత్యమష్టోత్తరం జపేత్ .. 39..

బ్రాహ్మే ముహూర్తే ప్రాఙ్ముఖో మేరుదండం ప్రతన్య హి .

పద్మాసనం సమాసీనః సంధ్యావందనమాచరేత్ .. 40..

దైన్యరుక్ శోక చింతానాం విరోధాక్రమణాపదాం .

కార్యం గాయత్ర్యనుష్ఠానం భయానం వారణాయ చ .. 41..

జాయతే సా స్థితిరస్మాన్మనోఽభిలాషయాన్వితా .

యతః సర్వేఽభిజాయంతే యథా కాలం హి పూర్ణతాం .. 42..

అనుష్ఠానాత్తు వై తస్మాద్గుప్తాధ్యాత్మిక-శక్తయః .

చమత్కారమయా లోకే ప్రాప్యంతేఽనేకధా బుధైః .. 43..

సపాదలక్షమంత్రాణాం గాయత్ర్యా జపనం తు వై .

ధ్యానేన విధినా చైవ హ్యనుష్ఠానం ప్రచక్షతే .. 44 .

పంచమ్యాం పూర్ణిమాయాం వా చైకాదశ్యాం తథైవ హి .

అనుష్ఠానస్య కర్తవ్యం ఆరంభః ఫల-ప్రాప్తయే .. 45..

మాసద్వయేఽవిరామం తు చత్వారింషట్ దినేషు వా .

పూరయేత్తదనుష్ఠానం తుల్యసంఖ్యాసు వై జపన్ .. 46..

తస్యాః ప్రతిమాం సుసంస్థాప్య ప్రేమ్ణా శోభన-ఆసనే .

గాయత్ర్యాస్తత్ర కర్తవ్యా సత్ప్రతిష్ఠా విధానతః .. 47

తద్విధాయ తతో దీప-ధూప-నైవేద్య-చందనైః .

నమస్కృత్యాక్షతేనాపి తస్యాః పూజనమాచరేత్ .. 48..

పూజనానంతరం విజ్ఞః భక్త్యా తజ్జపమారభేత్ .

జపకాలే తు మనః కార్యం శ్రద్ధాన్వితమచంచలం .. 49..

కార్యతో యది చోత్తిష్ఠేన్మధ్య ఏవ తతః పునః .

కర-ప్రక్షాలనం కృత్వా శుద్ధైరంగైరుపావిశేత్ .. 50..

ఆద్యశక్తిర్వేదమాతా గాయత్రీ తు మదంతరే .

శక్తికల్లోలసందోహాన్ జ్ఞానజ్యోతిశ్చ సంతతం .. 51..

ఉత్తరోత్తరమాకీర్య ప్రేరయంతి విరాజతే .

ఇత్యేవావిరతం ధ్యాయన్ ధ్యానమగ్నస్తు తాం జపేత్ .. 52..

చతుర్వింశతిలక్షాణాం సతతం తదుపాసకః .

గాయత్రీణామనుష్ఠానాద్గాయత్ర్యాః సిద్ధిమాప్నుతే .. 53

సాధనాయై తు గాయత్ర్యా నిశ్ఛలేన హి చేతసా .

వరణీయః సదాచార్యః సాధకేన సుభాజనః .. 54..

లఘ్వనుష్ఠానతో వాపి మహానుష్ఠానతోఽథవా .

సిద్ధిం విందతి వై నూనం సాధకః సానుపాతికాం .. 55..

ఏక ఏవ తు సంసిద్ధః గాయత్రీ మంత్ర ఆదిశత్ .

సమస్త-లోకమంత్రాణాం కార్యసిద్ధేస్తు పూరకః .. 56..

అనుష్ఠానావసానే తు అగ్నిహోత్రో విధీయతాం .

యథాశక్తి తతో దానం బ్రహ్మభోజస్తతః ఖలు .. 57..

మహామంత్రస్య చాప్యస్య స్థానే స్థానే పదే పదే .

గూఢానంతోపదేశానాం రహస్యం తత్ర వర్తతే .. 58..

యో దధాతి నరశ్చైతానుపదేశాంస్తు మానసే .

జాయతే హ్యుభయం తస్య లోకమానందసంకులం .. 59..

సమగ్రామపి సామగ్రీమనుష్ఠానస్య పూజితాం .

స్థానే పవిత్ర ఏవైతాం కుత్రచిద్ధి విసర్జయేత్ .. 60..

సత్పాత్రో యది వాచార్యో న చేత్సంస్థాపయేత్తదా .

నారికేలం శుచిం వృత్వాచార్యభావేన చాసనే .. 61..

ప్రాయశ్చిత్తం మతం శ్రేష్ఠం త్రుటీనాం పాపకర్మణాం .

తపశ్చర్యైవ గాయత్ర్యాః నాతోఽన్యద్దృశ్యతే క్వచిత్ .. 62..

సేవ్యాః స్వాత్మసముద్ధ్యర్థం పదార్థాః సాత్త్వికాః సదా .

రాజసాశ్చ ప్రయోక్తవ్యాః మనోవాంఛితపూర్తయే .. 63..

ప్రాదుర్భావస్తు భావానాం తామసానాం విజాయతే .

తమోగుణానామర్థానాం సేవనాదితి నిశ్చయః .. 64..

మాలాసన-సమిధ్యజ్ఞ-సామగ్ర్యర్చన-సంగ్రహః .

గుణత్రయానుసారం హి సర్వే వై దదతే ఫలం .. 65..

ప్రాదుర్భవంతి వై సూక్ష్మాశ్చతుర్వింశతి శక్తయః .

అక్షరేభ్యస్తు గాయత్ర్యా మానవానాం హి మానసే .. 66..

ముహూర్తా యోగదోషా వా యేఽప్యమంగలకారిణః .

భస్మతాం యాంతి తే సర్వే గాయత్ర్యాస్తీవ్రతేజసా .. 67..

ఏతస్మాత్తు జపాన్నూనం ధ్యానమగ్నేన చేతసా .

జాయతే క్రమశశ్చైవ షట్ చక్రాణాం తు జాగృతిః .. 68..

షట్ చక్రాణి యదైతాని జాగృతాని భవంతి హి .

షట్ సిద్ధయోఽభిజాయంతే చక్రైరేతైర్నరస్య వై .. 69..

అగ్నిహోత్రం తు గాయత్రీ మంత్రేణ విధివత్ కృతం .

సర్వేష్వవసరేష్వేవ శుభమేవ మతం బుధైః .. 70..

యదావస్థాసు స్యాల్లోకే విపన్నాసు తదా తు సః .

మౌనం మానసికం చైవ గాయత్రీ-జపమాచరేత్ .. 71..

తదనుష్ఠానకాలే తు స్వశక్తిం నియమేజ్జనః .

నిమ్నకర్మసు తాః ధీమాన్ న వ్యయేద్ధి కదాచన .. 72

నైవానావశ్యకం కార్యమాత్మోద్ధారస్థితేన చ .

ఆత్మశక్తేస్తు ప్రాప్తాయాః యత్ర తత్ర ప్రదర్శనం .. 73..

ఆహారే వ్యవహారే చ మస్తిష్కేఽపి తథైవ హి .

సాత్త్వికేన సదా భావ్యం సాధకేన మనీషిణా ..  74..

కర్తవ్యధర్మతః కర్మ విపరీతం తు యద్భవేత్ .

తత్సాధకస్తు ప్రజ్ఞావానాచరేన్న కదాచన .. 75..

పృష్ఠతోఽస్యాః సాధనాయా రాజతేఽతితరం సదా .

మనస్విసాధకానాం హి బహూనాం సాధనాబలం .. 76..

అల్పీయస్యా జగత్యేవం సాధనాయాస్తు సాధకః .

భగవత్యాశ్చ గాయత్ర్యాః కృపాం ప్రాప్నోత్యసంశయం .. 77..

ప్రాణాయామే జపన్ లోకః గాయత్రీం ధ్రువమాప్నుతే .

నిగ్రహం మనసశ్చైవ ఇంద్రియాణాం హి సంపదాం .. 78..

మంత్రం విభజ్య భాగేషు చతుర్షు సుబుధస్తదా .

రేచకం కుంభకం బాహ్యం పూరకం కుంభకం చరేత్ .. 79..

యథా పూర్వస్థితంచైవ న ద్రవ్యం కార్య-సాధకం .

మహాసాధనతోఽప్యస్మాన్నాజ్ఞో లాభం తథాప్నుతే .. 80..

సాధకః కురుతే యస్తు మంత్రశక్తేరపవ్యయః .

తం వినాశయతి సైవ సమూలం నాత్ర సంశయః .. 81..

సతతం సాధనాభిర్యో యాతి సాధకతాం నరః .

స్వప్నావస్థాసు జాయంతే తస్య దివ్యానుభూతయః .. 82..

సఫలః సాధకో లోకే ప్రాప్నుతేఽనుభవాన్ నవాన్ .

విచిత్రాన్ వివిధాఀశ్చైవ సాధనాసిద్ధ్యనంతరం .. 83..

భిన్నాభిర్విధిభిర్బుద్ధ్యా భిన్నాసు కార్యపంక్తిషు .

గాయత్ర్యాః సిద్ధమంత్రస్య ప్రయోగః క్రియతే బుధైః .. 84..

చతుర్వింశతివర్ణైర్యా గాయత్రీ గుంఫితా శ్రుతౌ .

రహస్యముక్తం తత్రాపి దివ్యైః రహస్యవాదిభిః .. 85..

రహస్యముపవీతస్య గుహ్యాద్గుహ్యతరం హి యత్ .

అంతర్హితం తు తత్సర్వం గాయత్ర్యాం విశ్వమాతరి .. 86..

అయమేవ గురోర్మంత్రః యః సర్వోపరి రాజతే .

బిందౌ సింధురివాస్మింస్తు జ్ఞానవిజ్ఞానమాశ్రితం .. 87..

ఆభ్యంతరే తు గాయత్ర్యా అనేకే యోగసంచయాః .

అంతర్హితా విరాజంతే కశ్చిదత్ర న సంశయః .. 88..

ధారయన్ హృది గాయత్రీం సాధకో ధౌతకిల్బిషః .

శక్తీరనుభవత్య్గ్రాః స్వస్మిన్నేవ హ్యలౌకికాః .. 89..

ఏతాదృశ్యస్తు వార్తా భాసంతేఽల్పప్రయాసతః .

యాస్తు సాధారణో లోకో జ్ఞాతుమర్హతి నైవ హి .. 90..

ఏతాదృశ్యస్తు జాయంతే తన్మనస్యనుభూతయః .

యాదృశ్యో న హి దృశ్యంతే మానవేషు కదాచన .. 91..

ప్రసాదం బ్రహ్మజ్ఞానస్య యేఽన్యేభ్యో వితరంత్యపి .

ఆసాదయంతి తే నూనం మానవాః పుణ్యమక్షయం .. 92..

గాయత్రీ సంహితా హ్యేషా పరమానందదాయినీ .

సర్వేషామేవ కష్టానాం వారణాయాస్త్యలం భువి .. 93..

శ్రద్ధయా యే పఠంత్యేనాం చింతయంతి చ చేతసా .

ఆచరంత్యానుకూల్యేన భవబాధాం తరంతి తే .. 94..

దుర్గాస్తవం మహాభారతాంతర్గతం

వినియోగ -

ఓం అస్య శ్రీభగవతీ దుర్గా స్తోత్ర మంత్రస్య శ్రీకృష్ణార్జునస్వరూపీ

నరనారాయణో ఋషిః, అనుష్టుప్ ఛంద, శ్రీదుర్గా దేవతా,

హ్రీం బీజం, ఐం శక్తి, శ్రీం కీలకం,

మమాభీష్టసిద్ధయర్థే జపే వినియోగః ..

ఋష్యాదిన్యాస -

శ్రీకృష్ణార్జునస్వరూపీ నరనారాయణో ఋషిభ్యో నమః శిరసి,

అనుష్టుప్ ఛందసే నమః ముఖే, శ్రీదుర్గాదేవతాయై నమః హృది,

హ్రీం బీజాయ నమః గుహ్యే, ఐం శక్త్యై నమః పాదయో,

శ్రీం కీలకాయ నమః నాభౌ,

మమాభీష్టసిద్ధయర్థే జపే వినియోగాయ నమః సర్వాంగే ..

కరన్యాస -

ఓం హ్రాం అంగుష్ఠాభ్యాం నమః,

ఓం హ్రీం తర్జనీభ్యాం స్వాహా, ఓం హ్రూం మధ్యమాభ్యాం వషట్,

ఓం హ్రైం అనామికాభ్యాం హుం, ఓం హ్రౌం కనిష్ఠాభ్యాం వౌష్ట్,

ఓం హ్రః కరతల కరపృష్ఠాభ్యాం ఫట్ ..

అంగన్యాస -

ఓం హ్రాం హృదయాయ నమః, ఓం హ్రీం శిరసేం స్వాహా,

ఓం హ్రూం శిఖాయై వషట్, ఓం హ్రైం కవచాయం హుం,

ఓం హ్రౌం నైత్రత్రయాయ వౌష్ట్, ఓం హ్రః అస్త్రాయ ఫట్ ..

ధ్యానం -

సింహస్థా శశిశేఖరా మరకతప్రఖ్యా చతుర్భిర్భుజైః

శంఖచక్రధనుఃశరాంశ్చ దధతీ నేత్రైస్త్రిభిః శోభితా .

ఆముక్తాంగదహారకంకణరణత్కాంచీక్వణన్ నూపురా

దుర్గా దుర్గతిహారిణీ భవతు నో రత్నోల్లసత్కుండలా ..

మానస పూజన -

ఓం హ్రీం దుం దుర్గాయై నమః లం పృథివ్యాత్మకం గంధం సమర్పయామి .

ఓం హ్రీం దుం దుర్గాయై నమః హం ఆకాశాత్మకం పుష్పం సమర్పయామి .

ఓం హ్రీం దుం దుర్గాయై నమః యం వాయ్వాత్మకం ధూపం ఘ్రాపయామి .

ఓం హ్రీం దుం దుర్గాయై నమః రం వహృయాత్మకం దీపం దర్శయామి .

ఓం హ్రీం దుం దుర్గాయై నమః వం అమృతాత్మకం నైవేద్యం నివేదయామి .

ఓం హ్రీం దుం దుర్గాయై నమః సం సర్వాత్మకం తాంబూలం సమర్పయామి .

(శ్రీమహాభారతే భీష్మపర్వాంతర్గతే శ్రీమద్భగవద్గీతాపర్వణి

త్రయోవింశోఽధ్యాయః .

సంజయ ఉవాచ -

ధార్తరాష్ట్రబలం దృష్ట్వా యుద్ధాయ సముపస్థితం .

అర్జునస్య హితార్థాయ కృష్ణో వచనమబ్రవీత్ .. 1..

శ్రీభగవానువాచ -

శుచిర్భూత్వా మహాబాహో సంగ్రామాభిముఖే స్థితః .

పరాజయాయ శత్రూణాం దుర్గాస్తోత్రముదీరయ .. 2..

సంజయ ఉవాచ -

ఏవముక్తోఽర్జునః సంఖ్యే వాసుదేవేన ధీమతా .

అవతీర్యం రథాత్ పార్థః స్తోత్రమాహ కృతాంజలిః .. 3..)

అథ దుర్గాదేవీస్తవం .

శ్రీఅర్జున ఉవాచ -

నమస్తే సిద్ధసేనాని ఆర్యే మందరవాసిని .

కుమారి కాలి కాపాలి కపిలే కృష్ణపింగలే .. 1..

భద్రకాలి నమస్తుభ్యం మహాకాలి నమోఽస్తుతే .

చండిచండే నమస్తుభ్యం తారిణి వరవర్ణిని .. 2..

కాత్యాయని మహాభాగే కరాలి విజయే జయే .

శిఖిపిచ్ఛధ్వజధరే నానాభరణభూషితే .. 3..

అట్టశూలప్రహరణే ఖడ్గఖేటధారిణి .

గోపేంద్రస్యానుజే జ్యేష్టే నందగోపకులోద్భవే .. 4..

మహిషాసృక్ప్రియే నిత్యం కౌశికి పీతవాసిని .

అట్టహాసే కోకముఖే నమస్తేఽస్తు రణప్రియే .. 5..

ఉమే శాకంబరీ శ్వేతే కృష్ణే కైటభనాశిని .

హిరణ్యాక్షి విరూపాక్షి సుధూమ్రాక్షి నమోఽస్తు తే .. 6..

వేదశ్రుతి మహాపుణ్యే బ్రహ్మణ్యే జాతవేదసి .

జంబూకటకచైత్యేషు నిత్యం సన్నిహితాలయే .. 7..

త్వం బ్రహ్మవిద్యావిద్యానాం మహానిద్రా చ దేహినాం .

స్కందమాతర్భగవతి దుర్గే కాంతారవాసిని .. 8..

స్వాహాకారః స్వధా చైవ కలా కాష్ఠా సరస్వతీ .

సావిత్రీ వేదమాతా చ తథా వేదాంత ఉచ్యతే .. 9..

స్తుతాసి త్వం మహాదేవి విశుద్ధేనాంతరాత్మనా .

జయో భవతు మే నిత్యం త్వత్ప్రసాదాద్రణాజిరే .. 10..

కాంతారభయదుర్గేషు భక్తానాం చాలయేషు చ .

నిత్యం వససి పాతాలే యుద్ధే జయసి దానవాన్ .. 11..

త్వం జంభనీ మోహినీ చ మాయా హ్రీః శ్రీస్తథైవ చ .

సంధ్యా ప్రభావతీ చైవ సావిత్రీ జననీ తథా .. 12..

తుష్టిః పుష్టిర్ధృతిర్దీప్తిశ్చంద్రాదిత్యవివర్ధినీ .

భూతిర్భూతిమతాం సంఖ్యే వీక్ష్యసే సిద్ధచారణైః .. 13..

ఫలశ్రుతి -

యః ఇదం పఠతే స్తోత్రం కల్య ఉత్థాయ మానవః .

యక్షరక్షఃపిశాచేభ్యో న భయం విద్యతే సదా .. 1..

న చాపి రిపవస్తేభ్యః సర్పాద్యా యే చ దంష్ట్రిణః .

న భయం విద్యతే తస్య సదా రాజకులాదపి .. 2..

వివాదే జయమాప్నోతి బద్ధో ముచ్యేత బంధనాత్ .

దుర్గం తరతి చావశ్యం తథా చోరైర్విముచ్యతే .. 3..

సంగ్రామే విజయేన్నిత్యం లక్ష్మీం ప్రాప్నోతి కేవలాం .

ఆరోగ్యబలసంపన్నో జీవేద్ వర్షశతం తథా .. 4..

శ్రీదుర్గాస్తవనం

మహాకాలీ మహాలక్ష్మీ మహాసరస్వతీ శివే .

జగదంబే మహామాయే శక్తిరూపే నమోఽస్తుతే .. 1..

సుమాంగల్యే మహేశాని సచ్చిదానందరూపిణే .

సర్వదుఃఖ హరే దేవి మాతర్దుర్గే నమోఽస్తుతే .. 2..

సింహస్కంధసమారూఢే సశస్త్రైర్సమలంకృతే .

అభయం కురు మే మాత తస్యైనిత్యై నమో నమః .. 3..

సృష్టి స్థితిలయ కర్త్రీ పరిపూర్ణాచ సర్వదా .

గౌరాంగీదైత్యదమనీం మాతర్తస్యై నమో నమః .. 4..

భక్తానాం సుఖదాం నిత్యాం యోగక్షేమకరీం సదా .

భయాన్మే త్రాహిత్వన్నిత్యం దుర్గేదేవి నమోఽస్తుతే .. 5..

శరణాగతదీనానామార్తిత్రాణ పరాయణే .

సంసారభయనాశిన్యై దేవ్యైతస్యై నమో నమః .. 6..

ఉమాసతీ దాక్షాయణీ పార్వతీ త్వాం వరాననే .

సర్వత్రాస హరే దేవి మహేశాని నమోఽస్తుతే .. 7..

సచ్చిదానందరూపాయై ధాత్ర్యైశాంత్యై నమో నమః .

అనంతభూతి పూర్ణాయై దేవ్యైతస్యై నమో నమః .. 8..

అనంత కోటి బ్రహ్మాండ నాయికే పరమేశ్వరి .

సన్మతిదాన శిలాయై తస్యైదేవ్యై నమో నమః .. 9..

అజరామరకారిణ్యై భుక్తిముక్తించసంపదం .

అనంత ధనధాన్యాది దాత్ర్యైదేవ్యై నమో నమః .. 10..

ఇతి శ్రీ స్వామీ ఉమేశ్వరానందతీర్థవిరచితం దుర్గాస్తవనం

                అథవా శ్రీనవదుర్గాస్తోత్రం సంపూర్ణం .

గాయత్రీ వందనా

ఓంకారరూపా త్రిపదా త్రయీ చ త్రిదేవవంద్యా త్రిదివాధిదేవీ .

త్రిలోకకర్త్రీ త్రితయస్య భర్త్రీ త్రైకాలికీ సంకలనావిధాత్రీ .. 1..

త్రైగుణ్యభేదాత్ త్రివిధస్వరూపా త్రైవిధ్యయుక్తస్య ఫలస్య దాత్రీ .

తథాపవర్గస్య విధాయినీ త్వం దయార్ద్రదృక్కోణవిలోకనేన .. 2..

త్వం వాఙ్మయీ విశ్వవదాన్యమూర్తిర్విశ్వస్వరూపాపి హి విశ్వగర్భా .

తత్త్వాత్మికా తత్త్వపరాత్పరా చ దృక్తారికా తారకశంకరస్య .. 3..

భూతం చ భవ్యం సకలం యదేతత్ త్వత్తః పరం కుత్ర న కించిదస్తి .

ఆద్యామనాద్యామనవద్యవంద్యాం పధ్యంతి విజ్ఞాః ప్రవదంతి చ త్వాం .. 4..

విశ్వాత్మికే విశ్వవిలాసభూతే విశ్వాశ్రయే విశ్వవికాశధామే .

విభూత్యధిష్ఠాత్రి విభూతిదాత్రి పదే త్వదీయే ప్రణతిర్మదీయా .. 5..

త్వం నిత్యసర్గస్య విసర్గభూతా దైనందినస్యాపి చ ప్రాకృతస్య .

విశ్వస్య యోనిర్హి మతా తథాపి సముద్రహైమాద్రివిరంచిజాతా .. 6..

భోగస్య భోక్త్రీ కరణస్య కర్త్రీ ధాత్వావ్యయప్రత్యయలింగశూన్యా .

జ్ఞేయా న వేదైర్న పురాణభేదైర్ధ్యేయా ధియా ధారణయాదిశక్తిః .. 7..

కించిద్యదేతత్తవమూర్తిరేషా తథాప్యదృశ్యాఖిలసాధనైశ్చ .

సాంతా నిరంతా సదసత్స్వరూపా స్ఫుటాస్ఫుటా స్ఫోటవికాశరూపా .. 8..

యస్మిన్ యతో యస్య చ యేన యచ్చ కస్మిన్కుతః కస్య చ కేన కించ .

ఇత్యాదిశబ్దైర్న విశోధనీయా కుతః కథం సా పరిబోధనీయా .. 9..

నిత్యా సదా సర్వగతాఽప్యలక్ష్యా విష్ణోర్విధేః శంకరతోఽప్యభిన్నా .

శక్తిస్వరూపా జగతోఽస్య శక్తిర్జ్ఞాతుం న శక్యా కరణాదిభిస్త్వం .. 10..

త్యక్తస్త్వయాత్యంతనిరస్తబుద్ధిర్నరో భవేద్ వైభవభాగ్యహీనః .

హిమాలయాదప్యధికోత్రతోఽపి జనైస్సమస్తైరపి లంఘనీయః .. 11..

శివే హరౌ బ్రహ్మణి భానుచంద్రయోశ్చరాచరే గోచరకేఽప్యగోచరే .

సూక్ష్మాతిసూక్ష్మే మహతో మహత్తమే కలా త్వదీయా విమలా విరాజతే .. 12..

సుధామరందం తవ పాదపద్మం స్వే మానసే ధారణయా నిధాయ .

బుద్ధిర్మిలిందీభవతాన్మదీయా నాతః పరం దేవి వరం సమీహే .. 13..

దీనేషు హీనేషు గతాదరేషు స్వాభావికీ తే కరుణా ప్రసిద్ధా .

అతః శరణ్యే శరణం ప్రపన్నం గృహాణ మాతః ప్రణయాంజలిం మే .. 14..

పఠతః శృణ్వతో వాపి సకృత్ప్రణమతస్తథా .

భవ్యాయ జగతో భూయాత్ ప్రణయస్యామంజలిః .. 15..

.. ఇతి గాయత్రీవందనా సమాప్తా ..

రచనా - పం ధ్యామనాథజీ శుక్ల, ``ద్విజశ్యామ''

శ్రీదుర్గాస్తవః

సన్నద్ధసింహస్కంధస్థాం స్వర్ణవర్ణాం మనోరమాం .

పూర్ణేందువదనాం దుర్గాం వర్ణయామి గుణార్ణవాం .. 1..

కిరీటహారగ్రైవేయనూపురాంగదకంకణైః .

రత్నకాంచ్యా రత్నచిత్రకుచకంచుకతేజసా .. 2..

విరాజమానా రుచిరాంబరా కింకిణిమండితా .

రత్నమేఖలయా రత్నవాసోపరి విభూషితా .. 3..

వీరశృంఖలయా శోభిచారుపాదసరోరుహా .

రత్నచిత్రాంగులీముద్రా రత్నకుండలమండితా .. 4..

విచిత్రచూడామణినా రత్నోద్యత్తిలకేన చ .

అనర్ఘ్యనాసామణినా శోభితాఽఽస్యసరోరుహా .. 5..

భుజకీర్త్యా రత్నచిత్రకంఠసూత్రేణ చాంకితా .

పద్మాక్షిణీ సుబింబోష్ఠీ పద్మగర్భాదిభిః స్తుతా .. 6..

కబరీభారవిన్యస్తపుష్పస్తబకవిస్తరా .

కర్ణనీలోత్పలరుచా లసద్ భ్రూమండలత్విషా .. 7..

కుంతలానాం చ సంతత్యా శోభమానా శుభప్రదా .

తనుమధ్యా విశాలోరఃస్థలా పృథునితంబినీ .. 8..

చారుదీర్ఘభుజా కంబుగ్రీవా జంఘాయుగప్రభా .

అసిచర్మగదాశూలధనుర్బాణాంకుశాదినా .. 9..

వరాభయాభ్యాం చక్రేణ శంఖేన చ లసత్కరా .

దంష్ట్రాగ్రభీషణాస్యోత్థ హుంకారార్దితదానవా .. 10..

భయంకరీ సురారీణాం సురాణామభయంకరీ .

ముకుందకింకరీ విష్ణుభక్తానాం మౌక్తశంకరీ .. 11..

సురస్త్రీకింకరీభిశ్చ వృతా క్షేమంకరీ చ నః .

ఆదౌ ముఖోద్గీర్ణనానాఽఽమ్నాయా సర్గకరీ పునః .. 12..

నిసర్గముక్తా భక్తానాం త్రివర్గఫలదాయినీ .

నిశుంభశుంభసంహర్త్రీ మహిషాసురమర్దినీ .. 13..

తామసానాం తమఃప్రాప్త్యై మిథ్యాజ్ఞానప్రవర్తికా .

తమోభిమానినీ పాయాద్దుర్గా స్వర్గాపవర్గదా .. 14..

ఇమం దుర్గాస్తవం పుణ్యం వాదిరాజయతీరితం .

పఠన్విజయతే శత్రూన్మృత్యుం దుర్గాణి చోత్తరేత్ .. 15..

.. ఇతి శ్రీవాదిరాజయతికృతః శ్రీదుర్గాస్తవః సంపూర్ణః ..

గాయత్రీ లహరీ

అమందానందేనామరవరగృహే వాస నిరతాం-

నరం గాయంతం యా భువి భవభయాత్త్రాయత ఇహ .

సురేశైః సంపూజ్యాం మునిగణనుతాం తాం సుఖకరీం

నమామో గాయత్రీం నిఖిలమనుజాఘౌఘశమనీం .. 1..

అవామా సంయుక్తం సకలమనుజైర్జాప్యమభితో-

హ్యపాయాత్పాయాద్భూరథ భువి భువః స్వః పదమితి .

పదం తన్మే పాదావవతు సవితుశ్చైవ జఘనే-

వరేణ్యం శ్రోణిం మే సతతమవతాన్నాభిమపి చ .. 2..

పదం భర్గో దేవస్య మమ హృదయం ధీమహి తథా-

గలంపాయాన్నిత్యం ధియ ఇహ పదం చైవ రసనాం .

తథా నేత్రే యోఽవ్యాదలకమవతాన్నః పదమితి-

శిరోదేశం పాయాన్మమ తు పరితశ్చాంతిమపదం .. 3..

అయే దివ్యే దేవి త్రిదశనివహైర్వందితపదే

న శేకుస్త్వాం స్తోతుం భగవతి మహాంతోఽపి మునయః .

కథంకారం తర్హిస్తుతితతిరియం మే శుభతరా-

తథా పూర్ణా భూయాత్ త్రుటిపరియుతా భావరహితా .. 4..

భజంతం నిర్వ్యాజం తవ సుఖదమంత్రం విజయినం

జనం యావజ్జీవం జపతి జనని త్వం సుఖయసి .

న వా కామం కాచిత్ కలుషకణికాఽపి స్పృశతి తం

సంసారం సంసారం సరతి సహసా తస్య సతతం .. 5..

దధానాం హ్యాధానం సితకువలయాస్ఫాలనరుచాం

స్వయం విభ్రాజంతీం త్రిభువనజనాహ్లాదనకరీం .

అలం చాలం చాలం మమ చకితచిత్తం సుచపలం

చలచ్చంద్రాస్యే త్వద్వదనరుచమాచామయ చిరం .. 6..

లలామే భాలే తే బహుతర విశాలేఽతి విమలే

కలాచంచచ్చాంద్రీ రుచిరతిలకావేందుకలయా .

నితాంతం గోమాయా నివిడ తమసో నాశ వ్యసనా

తమో మే గాఢం హి హృదయసదనస్థం గ్లపయతు .. 7..

అయే మాతః కింతే చరణ-శరణం సంశ్రయవతాం-

జనానామంతస్థో వృజిన హుతభుక్ ప్రజ్వలతి యః .

తదస్యాశు సమ్యక్ ప్రశమనహితాయైవ విధృతం-

కరే పాత్రం పుణ్యం సలిలభరితం కాష్ఠరచితం .. 8..

అథాహోస్విన్మాతః సరిదధిపతేః సారమఖిలం

సుధారూపం కూపం లఘుతరమనూపం కలయతి .

స్వభక్తేభ్యో నిత్యం వితరసి జనోద్ధారిణి శుభే

విహీనే దీనే మయ్యపి కృపయ కించిత్ కరుణయా .. 9..

సదైవ త్వత్పాణౌ విధృతమరవిందం ద్యుతికరం

త్విదం దర్శం దర్శం రవిశశిసమం నేత్రయుగలం .

విచింత్య స్వాం వృత్తిం భ్రమవిషమజాలేఽస్తి పతిత-

మిదం మన్యే నోచేత్ కథమితి భవేదర్ధ-వికచం .. 10..

స్వయం మాతః కింవా త్వమసి జలజానామపి ఖని-

ర్యతస్తే సర్వాంగం కమలమయమేవాస్తి కిము నో .

తథా భీత్యా తస్మాచ్ఛరణముపయాతః కమలరాట్ -

ప్రయుంజానోఽశ్రాంతం భవతి తదిహైవాసనవిధౌ .. 11..

దివౌకోభిర్వంద్యే వికసిత సరోజాక్షి సుఖదే

కృపాదృష్టేర్వృష్టిః సునిపతతి యస్యోపరి తవ .

తదీయా వాంఛా కిం ద్రుతమను విధేయాస్తి సకలా

అతోమంతోస్తంతూన్ మమ సపది ఛిత్వాఽమ్బ సుఖయ .. 12..

కరేఽక్షాణాం మాలా ప్రవిలసతి యా తేఽతివిమలే

కిమర్థం సా కాన్ వా గణయసి జనాన్ భక్తి నిరతాన్ .

జపంతీ కం మంత్రం ప్రశమయసి దుఃఖం జనిజుషా

మయే కా వా వాంఛా తవ వరివృతి త్వత్ర వరదే .. 13..

న మన్యే ధన్యేఽహం త్వవితథమిదం లోకగదితం

మమాత్రోక్తిర్మత్వా కమలమివ ఫుల్లం తవ కరం .

విజృంభా సంయుక్త ద్యుతిమయమిదం కోకనదమి-

త్యరం జానానేయం మధుకరతతిః సంవిలసతి .. 14..

మహామోహాంభోధౌ మమ నిపతితా జీవనతరి-

ర్నిరాలంబా దోలా చలిత దురవస్థామధిగతా .

జలావర్త వ్యాలో గ్రసితుమభితో వాంఛతి చ తాం

కరాలంబం దత్వా భగవతి ద్రుతం తారయ శివే .. 15 .

దధానాసిత్వం యత్ స్వవపుషి పయోధారి-యుగల-

మితి శ్రుత్వా లోకైర్మమ మనసి చింతా సమభవత్ .

కథం స్యాత్ సా తస్మాదలక లతికా మస్తక భువి

శిరోద్యాం హృద్యేయం జలదపటలీ ఖేలతి కిల .. 16..

తథా తత్రైవోపస్థితిమపి నిశీథిన్యధిపతేః

ప్రపశ్యామి శ్యామే సహ సహచరైస్తారక గణైః .

అహోరాత్రః క్రీడా పరవశమితాస్తేఽపి చకితా-

శ్చిరం చిక్రీడంతే తదపి మహదాశ్చర్య-చరితం .. 17..

యదాహుస్తం ముక్తా పటల జటితం రత్న ముకుటం

న ధత్తే తేషాం సా వచనరచనా సాధుపదవీం .

నిశైషా కేశాస్తు నహి విగత వేశా ధ్రువమితి

ప్రసన్నాఽధ్యాసన్నా విధుపరిషదేషా విలసతి .. 18..

త్రిబీజే హే దేవి త్రి ప్రణవసహితే త్ర్యక్షరయుతే

త్రిమాత్రా రాజంతే భువనవిభవే హ్యోమితిపదే .

త్రికాలం సంసేవ్యే త్రిగుణవతి చ త్రిస్వరమయి

త్రిలోకేశైః పూజ్యే త్రిభువనభయాత్త్రాహి సతతతం .. 19..

న చంద్రో నైవేమే నభసి వితతా తారకగణాః

త్విషాం రాశీ రమ్యా తవ చరణయోరంబునిచయే .

పతిత్వా కల్లోలైః సహ పరిచయాద్విస్తృతిమితా

ప్రభా సైవాఽనంతా గగనముకురే దీవ్యతి సదా .. 20..

త్వమేవ బ్రహ్మాణీ త్వమసి కమలా త్వం నగసుతా

త్రిసంధ్యం సేవంతే చరణయుగలం యే తవ జనాః .

జగజ్జాలే తేషాం నిపతిత జనానామిహ శుభే

సముద్ధారార్థం కిం మతిమతి మతిస్తే న భవతి .. 21..

అనేకైః పాపౌఘైర్లులిత వపుషం శోక సహితం

లుఠంతం దీనం మాం విమల పదయో రేణుషు తవ .

గలద్బాష్పం శశ్వద్ జనని సహసాశ్వాసనవచో

బ్రువాణోత్తిష్ఠ త్వం అమృతకణికాం పాస్యసి కదా .. 22..

న వా మాదృక్ పాపీ నహి తవ సమా పాపహరణీ

న దుర్బుద్ధిర్మాదృక్ న చ తవ సమా ధీ వితరిణీ .

న మాదృగ్ గర్విష్ఠో నహి తవ సమా గర్వహరణీ

హృది స్మృత్వా హ్యేవం మామయి కురు యథేచ్ఛా తవ యథా .. 23..

దరీధర్తి స్వాంతేఽక్షర వర చతుర్వింశతిమితం

త్వదంతర్మంత్రం యత్త్వయి నిహిత చేతో హి మనుజః .

సమంతాద్ భాస్వంతం భవతి భువి సంజీవనవనం

భవాంభోధేః పారం వ్రజతి స నితాంతం సుఖయుతః .. 24..

భగవతి లహరీయం రుద్రదేవ ప్రణీతా

తవ చరణ సరోజే స్థాప్యతే భక్తిభావైః .

కుమతితిమిరపంకస్యాంకమగ్నం సశంకం

అయి ఖలు కురు దత్వా వీతశంకం స్వమంకం .. 25..

.. ఇతి శ్రీ రుద్రదేవ విరచిత గాయత్రీ లహరీ సమాప్తా ..

దుర్గాసహస్రనామస్తోత్రం

. శ్రీః ..

     .. శ్రీ దుర్గాయై నమః ..

     .. అథ శ్రీ దుర్గాసహస్రనామస్తోత్రం ..

     నారద ఉవాచ -

కుమార గుణగంభీర దేవసేనాపతే ప్రభో .

సర్వాభీష్టప్రదం పుంసాం సర్వపాపప్రణాశనం .. 1..

గుహ్యాద్గుహ్యతరం స్తోత్రం భక్తివర్ధకమంజసా .

మంగలం గ్రహపీడాదిశాంతిదం వక్తుమర్హసి .. 2..

     స్కంద ఉవాచ -

శృణు నారద దేవర్షే లోకానుగ్రహకామ్యయా .

యత్పృచ్ఛసి పరం పుణ్యం తత్తే వక్ష్యామి కౌతుకాత్ .. 3..

మాతా మే లోకజననీ హిమవన్నగసత్తమాత్ .

మేనాయాం బ్రహ్మవాదిన్యాం ప్రాదుర్భూతా హరప్రియా .. 4..

మహతా తపసాఽఽరాధ్య శంకరం లోకశంకరం .

స్వమేవ వల్లభం భేజే కలేవ హి కలానిధిం .. 5..

నగానామధిరాజస్తు హిమవాన్ విరహాతురః .

స్వసుతాయాః పరిక్షీణే వసిష్ఠేన ప్రబోధితః .. 6..

త్రిలోకజననీ సేయం ప్రసన్నా త్వయి పుణ్యతః .

ప్రాదుర్భూతా సుతాత్వేన తద్వియోగం శుభం త్యజ .. 7..

బహురూపా చ దుర్గేయం బహునామ్నీ సనాతనీ .

సనాతనస్య జాయా సా పుత్రీమోహం త్యజాధునా .. 8..

ఇతి ప్రబోధితః శైలః తాం తుష్టావ పరాం శివాం .

తదా ప్రసన్నా సా దుర్గా పితరం ప్రాహ నందినీ .. 9..

మత్ప్రసాదాత్పరం స్తోత్రం హృదయే ప్రతిభాసతాం .

తేన నామ్నాం సహస్రేణ పూజయన్ కామమాప్నుహి .. 10..

ఇత్యుక్త్వాంతర్హితాయాం తు  హృదయే స్ఫురితం తదా .

నామ్నాం సహస్రం దుర్గాయాః పృచ్ఛతే మే యదుక్తవాన్ .. 11..

మంగలానాం మంగలం తద్ దుర్గానామ సహస్రకం .

సర్వాభీష్టప్రదాం పుంసాం బ్రవీమ్యఖిలకామదం .. 12..

దుర్గాదేవీ సమాఖ్యాతా హిమవానృషిరుచ్యతే .

ఛందోనుష్టుప్ జపో దేవ్యాః ప్రీతయే క్రియతే సదా .. 13..

ఋషిచ్ఛందాంసి -

అస్య శ్రీదుర్గాస్తోత్రమహామంత్రస్య . హిమవాన్ ఋషిః .

అనుష్టుప్ ఛందః . దుర్గాభగవతీ దేవతా .

శ్రీదుర్గాప్రసాదసిద్ధ్యర్థే జపే వినియోగః .

శ్రీభగవత్యై దుర్గాయై నమః .

దేవీధ్యానం

ఓం హ్రీం కాలాభ్రాభాం కటాక్షైరరికులభయదాం మౌలిబద్ధేందురేఖాం

శంఖం చక్రం కృపాణం త్రిశిఖమపి కరైరుద్వహంతీం త్రినేత్రాం .

సింహస్కంధాధిరూఢాం త్రిభువనమఖిలం తేజసా పూరయంతీం

ధ్యాయేద్ దుర్గాం జయాఖ్యాం త్రిదశపరివృతాం సేవితాం సిద్ధికామైః ..

శ్రీ జయదుర్గాయై నమః .

ఓం శివాఽథోమా రమా శక్తిరనంతా నిష్కలాఽమలా .

శాంతా మాహేశ్వరీ నిత్యా శాశ్వతా పరమా క్షమా .. 1..

అచింత్యా కేవలానంతా శివాత్మా పరమాత్మికా .

అనాదిరవ్యయా శుద్ధా సర్వజ్ఞా సర్వగాఽచలా .. 2..

ఏకానేకవిభాగస్థా మాయాతీతా సునిర్మలా .

మహామాహేశ్వరీ సత్యా మహాదేవీ నిరంజనా .. 3..

కాష్ఠా సర్వాంతరస్థాఽపి చిచ్ఛక్తిశ్చాత్రిలాలితా .

సర్వా సర్వాత్మికా విశ్వా జ్యోతీరూపాఽక్షరాఽమృతా .. 4..

శాంతా ప్రతిష్ఠా సర్వేశా నివృత్తిరమృతప్రదా .

వ్యోమమూర్తిర్వ్యోమసంస్థా వ్యోమాధారాఽచ్యుతాఽతులా .. 5..

అనాదినిధనాఽమోఘా కారణాత్మకలాకులా .

ఋతుప్రథమజాఽనాభిరమృతాత్మసమాశ్రయా .. 6..

ప్రాణేశ్వరప్రియా నమ్యా మహామహిషఘాతినీ .

ప్రాణేశ్వరీ ప్రాణరూపా ప్రధానపురుషేశ్వరీ .. 7..

సర్వశక్తికలాఽకామా మహిషేష్టవినాశినీ .

సర్వకార్యనియంత్రీ చ సర్వభూతేశ్వరేశ్వరీ .. 8..

అంగదాదిధరా చైవ తథా ముకుటధారిణీ .

సనాతనీ మహానందాఽఽకాశయోనిస్తథేచ్యతే .. 9..

చిత్ప్రకాశస్వరూపా చ మహాయోగేశ్వరేశ్వరీ .

మహామాయా సుదుష్పారా మూలప్రకృతిరీశికా .. 10..

సంసారయోనిః సకలా సర్వశక్తిసముద్భవా .

సంసారపారా దుర్వారా దుర్నిరీక్షా దురాసదా .. 11..

ప్రాణశక్తిశ్చ సేవ్యా చ యోగినీ పరమాకలా .

మహావిభూతిర్దుర్దర్శా మూలప్రకృతిసంభవా .. 12..

అనాద్యనంతవిభవా పరార్థా పురుషారణిః .

సర్గస్థిత్యంతకృచ్చైవ సుదుర్వాచ్యా దురత్యయా .. 13..

శబ్దగమ్యా శబ్దమాయా శబ్దాఖ్యానందవిగ్రహా .

ప్రధానపురుషాతీతా ప్రధానపురుషాత్మికా .. 14..

పురాణీ చిన్మయా పుంసామిష్టదా పుష్టిరూపిణీ .

పూతాంతరస్థా కూటస్థా మహాపురుషసంజ్ఞితా .. 15..

జన్మమృత్యుజరాతీతా సర్వశక్తిస్వరూపిణీ .

వాంఛాప్రదాఽనవచ్ఛిన్నప్రధానానుప్రవేశినీ .. 16..

క్షేత్రజ్ఞాఽచింత్యశక్తిస్తు ప్రోచ్యతేఽవ్యక్తలక్షణా .

మలాపవర్జితాఽఽనాదిమాయా త్రితయతత్త్వికా .. 17..

ప్రీతిశ్చ ప్రకృతిశ్చైవ గుహావాసా తథోచ్యతే .

మహామాయా నగోత్పన్నా తామసీ చ ధ్రువా తథా .. 18..

వ్యక్తాఽవ్యక్తాత్మికా కృష్ణా రక్తా శుక్లా హ్యకారణా .

ప్రోచ్యతే కార్యజననీ నిత్యప్రసవధర్మిణీ .. 19..

సర్గప్రలయముక్తా చ సృష్టిస్థిత్యంతధర్మిణీ .

బ్రహ్మగర్భా చతుర్వింశస్వరూపా పద్మవాసినీ .. 20..

అచ్యుతాహ్లాదికా విద్యుద్బ్రహ్మయోనిర్మహాలయా .

మహాలక్ష్మీ సముద్భావభావితాత్మామహేశ్వరీ .. 21..

మహావిమానమధ్యస్థా మహానిద్రా సకౌతుకా .

సర్వార్థధారిణీ సూక్ష్మా హ్యవిద్ధా పరమార్థదా .. 22..

అనంతరూపాఽనంతార్థా తథా పురుషమోహినీ .

అనేకానేకహస్తా చ కాలత్రయవివర్జితా .. 23..

బ్రహ్మజన్మా హరప్రీతా మతిర్బ్రహ్మశివాత్మికా .

బ్రహ్మేశవిష్ణుసంపూజ్యా బ్రహ్మాఖ్యా బ్రహ్మసంజ్ఞితా .. 24..

వ్యక్తా ప్రథమజా బ్రాహ్మీ మహారాత్రీః ప్రకీర్తితా .

జ్ఞానస్వరూపా వైరాగ్యరూపా హ్యైశ్వర్యరూపిణీ .. 25..

ధర్మాత్మికా బ్రహ్మమూర్తిః ప్రతిశ్రుతపుమర్థికా .

అపాంయోనిః స్వయంభూతా మానసీ తత్త్వసంభవా .. 26..

ఈశ్వరస్య ప్రియా ప్రోక్తా శంకరార్ధశరీరిణీ .

భవానీ చైవ రుద్రాణీ మహాలక్ష్మీస్తథాఽమ్బికా .. 27..

మహేశ్వరసముత్పన్నా భుక్తిముక్తి ప్రదాయినీ .

సర్వేశ్వరీ సర్వవంద్యా నిత్యముక్తా సుమానసా .. 28..

మహేంద్రోపేంద్రనమితా శాంకరీశానువర్తినీ .

ఈశ్వరార్ధాసనగతా మాహేశ్వరపతివ్రతా .. 29..

సంసారశోషిణీ చైవ పార్వతీ హిమవత్సుతా .

పరమానందదాత్రీ చ గుణాగ్ర్యా యోగదా తథా .. 30..

జ్ఞానమూర్తిశ్చ సావిత్రీ లక్ష్మీః శ్రీః కమలా తథా .

అనంతగుణగంభీరా హ్యురోనీలమణిప్రభా .. 31..

సరోజనిలయా గంగా యోగిధ్యేయాఽసురార్దినీ .

సరస్వతీ సర్వవిద్యా జగజ్జ్యేష్ఠా సుమంగలా .. 32..

వాగ్దేవీ వరదా వర్యా కీర్తిః సర్వార్థసాధికా .

వాగీశ్వరీ బ్రహ్మవిద్యా మహావిద్యా సుశోభనా .. 33..

గ్రాహ్యవిద్యా వేదవిద్యా ధర్మవిద్యాఽఽత్మభావితా .

స్వాహా విశ్వంభరా సిద్ధిః సాధ్యా మేధా ధృతిః కృతిః .. 34..

సునీతిః సంకృతిశ్చైవ కీర్తితా నరవాహినీ .

పూజావిభావినీ సౌమ్యా భోగ్యభాగ్ భోగదాయినీ .. 35..

శోభావతీ శాంకరీ చ లోలా మాలావిభూషితా .

పరమేష్ఠిప్రియా చైవ త్రిలోకీసుందరీ మాతా .. 36..

నందా సంధ్యా కామధాత్రీ మహాదేవీ సుసాత్త్వికా .

మహామహిషదర్పఘ్నీ పద్మమాలాఽఘహారిణీ .. 37..

విచిత్రముకుటా రామా కామదాతా ప్రకీర్తితా .

పితాంబరధరా దివ్యవిభూషణ విభూషితా .. 38..

దివ్యాఖ్యా సోమవదనా జగత్సంసృష్టివర్జితా .

నిర్యంత్రా యంత్రవాహస్థా నందినీ రుద్రకాలికా .. 39..

ఆదిత్యవర్ణా కౌమారీ మయూరవరవాహినీ .

పద్మాసనగతా గౌరీ మహాకాలీ సురార్చితా .. 40..

అదితిర్నియతా రౌద్రీ పద్మగర్భా వివాహనా .

విరూపాక్షా కేశివాహా గుహాపురనివాసినీ .. 41..

మహాఫలాఽనవద్యాంగీ కామరూపా సరిద్వరా .

భాస్వద్రూపా ముక్తిదాత్రీ ప్రణతక్లేశభంజనా .. 42..

కౌశికీ గోమినీ రాత్రిస్త్రిదశారివినాశినీ .

బహురూపా సురూపా చ విరూపా రూపవర్జితా .. 43..

భక్తార్తిశమనా భవ్యా భవభావవినాశినీ .

సర్వజ్ఞానపరీతాంగీ సర్వాసురవిమర్దికా .. 44..

పికస్వనీ సామగీతా భవాంకనిలయా ప్రియా .

దీక్షా విద్యాధరీ దీప్తా మహేంద్రాహితపాతినీ .. 45..

సర్వదేవమయా దక్షా సముద్రాంతరవాసినీ .

అకలంకా నిరాధారా నిత్యసిద్ధా నిరామయా .. 46..

కామధేనుబృహద్గర్భా ధీమతీ మౌననాశినీ .

నిఃసంకల్పా నిరాతంకా వినయా వినయప్రదా .. 47..

జ్వాలామాలా సహస్రాఢ్యా దేవదేవీ మనోమయా .

సుభగా సువిశుద్ధా చ వసుదేవసముద్భవా .. 48..

మహేంద్రోపేంద్రభగినీ భక్తిగమ్యా పరావరా .

జ్ఞానజ్ఞేయా పరాతీతా వేదాంతవిషయా మతిః .. 49..

దక్షిణా దాహికా దహ్యా సర్వభూతహృదిస్థితా .

యోగమాయా విభాగజ్ఞా మహామోహా గరీయసీ .. 50..

సంధ్యా సర్వసముద్భూతా బ్రహ్మవృక్షాశ్రయాఽదితిః .

బీజాంకురసముద్భూతా మహాశక్తిర్మహామతిః .. 51..

ఖ్యాతిః ప్రజ్ఞావతీ సంజ్ఞా మహాభోగీంద్రశాయినీ .

హీంకృతిః శంకరీ శాంతిర్గంధర్వగణసేవితా .. 52..

వైశ్వానరీ మహాశూలా దేవసేనా భవప్రియా .

మహారాత్రీ పరానందా శచీ దుఃస్వప్ననాశినీ .. 53..

ఈడ్యా జయా జగద్ధాత్రీ దుర్విజ్ఞేయా సురూపిణీ .

గుహాంబికా గణోత్పన్నా మహాపీఠా మరుత్సుతా .. 54..

హవ్యవాహా భవానందా జగద్యోనిః ప్రకీర్తితా .

జగన్మాతా జగన్మృత్యుర్జరాతీతా చ బుద్ధిదా .. 55..

సిద్ధిదాత్రీ రత్నగర్భా రత్నగర్భాశ్రయా పరా .

దైత్యహంత్రీ స్వేష్టదాత్రీ మంగలైకసువిగ్రహా .. 56..

పురుషాంతర్గతా చైవ సమాధిస్థా తపస్వినీ .

దివిస్థితా త్రినేత్రా చ సర్వేంద్రియమనోధృతిః .. 57..

సర్వభూతహృదిస్థా చ తథా సంసారతారిణీ .

వేద్యా బ్రహ్మవివేద్యా చ మహాలీలా ప్రకీర్తితా .. 58..

బ్రాహ్మణిబృహతీ బ్రాహ్మీ బ్రహ్మభూతాఽఘహారిణీ .

హిరణ్మయీ మహాదాత్రీ సంసారపరివర్తికా .. 59..

సుమాలినీ సురూపా చ భాస్వినీ ధారిణీ తథా .

ఉన్మూలినీ సర్వసభా సర్వప్రత్యయసాక్షిణీ .. 60..

సుసౌమ్యా చంద్రవదనా తాండవాసక్తమానసా .

సత్త్వశుద్ధికరీ శుద్ధా మలత్రయవినాశినీ .. 61..

జగత్త్త్రయీ జగన్మూర్తిస్త్రిమూర్తిరమృతాశ్రయా .

విమానస్థా విశోకా చ శోకనాశిన్యనాహతా .. 62..

హేమకుండలినీ కాలీ పద్మవాసా సనాతనీ .

సదాకీర్తిః సర్వభూతశయా దేవీ సతాంప్రియా .. 63..

బ్రహ్మమూర్తికలా చైవ కృత్తికా కంజమాలినీ .

వ్యోమకేశా క్రియాశక్తిరిచ్ఛాశక్తిః పరాగతిః .. 64..

క్షోభికా ఖండికాభేద్యా భేదాభేదవివర్జితా .

అభిన్నా భిన్నసంస్థానా వశినీ వంశధారిణీ .. 65..

గుహ్యశక్తిర్గుహ్యతత్త్వా సర్వదా సర్వతోముఖీ .

భగినీ చ నిరాధారా నిరాహారా ప్రకీర్తితా .. 66..

నిరంకుశపదోద్భూతా చక్రహస్తా విశోధికా .

స్రగ్విణీ పద్మసంభేదకారిణీ పరికీర్తితా .. 67..

పరావరవిధానజ్ఞా మహాపురుషపూర్వజా .

పరావరజ్ఞా విద్యా చ విద్యుజ్జిహ్వా జితాశ్రయా .. 68..

విద్యామయీ సహస్రాక్షీ సహస్రవదనాత్మజా .

సహస్రరశ్మిఃసత్వస్థా మహేశ్వరపదాశ్రయా .. 69..

జ్వాలినీ సన్మయా వ్యాప్తా చిన్మయా పద్మభేదికా .

మహాశ్రయా మహామంత్రా మహాదేవమనోరమా .. 70..

వ్యోమలక్ష్మీః సింహరథా చేకితానాఽమితప్రభా .

విశ్వేశ్వరీ భగవతీ సకలా కాలహారిణీ .. 71..

సర్వవేద్యా సర్వభద్రా గుహ్యా దూఢా గుహారణీ .

ప్రలయా యోగధాత్రీ చ గంగా విశ్వేశ్వరీ తథా .. 72..

కామదా కనకా కాంతా కంజగర్భప్రభా తథా .

పుణ్యదా కాలకేశా చ భోక్త్త్రీ పుష్కరిణీ తథా .. 73..

సురేశ్వరీ భూతిదాత్రీ భూతిభూషా ప్రకీర్తితా .

పంచబ్రహ్మసముత్పన్నా పరమార్థాఽర్థవిగ్రహా .. 74..

వర్ణోదయా భానుమూర్తిర్వాగ్విజ్ఞేయా మనోజవా .

మనోహరా మహోరస్కా తామసీ వేదరూపిణీ .. 75..

వేదశక్తిర్వేదమాతా వేదవిద్యాప్రకాశినీ .

యోగేశ్వరేశ్వరీ మాయా మహాశక్తిర్మహామయీ .. 76..

విశ్వాంతఃస్థా వియన్మూర్తిర్భార్గవీ సురసుందరీ .

సురభిర్నందినీ విద్యా నందగోపతనూద్భవా .. 77..

భారతీ పరమానందా పరావరవిభేదికా .

సర్వప్రహరణోపేతా కామ్యా కామేశ్వరేశ్వరీ .. 78..

అనంతానందవిభవా హృల్లేఖా కనకప్రభా .

కూష్మాండా ధనరత్నాఢ్యా సుగంధా గంధదాయినీ .. 79..

త్రివిక్రమపదోద్భూతా చతురాస్యా శివోదయా .

సుదుర్లభా ధనాధ్యక్షా ధన్యా పింగలలోచనా .. 80..

శాంతా ప్రభాస్వరూపా చ పంకజాయతలోచనా .

ఇంద్రాక్షీ హృదయాంతఃస్థా శివా మాతా చ సత్క్రియా .. 81..

గిరిజా చ సుగూఢా చ నిత్యపుష్టా నిరంతరా .

దుర్గా కాత్యాయనీ చండీ చంద్రికా కాంతవిగ్రహా .. 82..

హిరణ్యవర్ణా జగతీ జగద్యంత్రప్రవర్తికా .

మందరాద్రినివాసా చ శారదా స్వర్ణమాలినీ .. 83..

రత్నమాలా రత్నగర్భా వ్యుష్టిర్విశ్వప్రమాథినీ .

పద్మానందా పద్మనిభా నిత్యపుష్టా కృతోద్భవా .. 84..

నారాయణీ దుష్టశిక్షా సూర్యమాతా వృషప్రియా .

మహేంద్రభగినీ సత్యా సత్యభాషా సుకోమలా .. 85..

వామా చ పంచతపసాం వరదాత్రీ ప్రకీర్తితా .

వాచ్యవర్ణేశ్వరీ విద్యా దుర్జయా దురతిక్రమా .. 86..

కాలరాత్రిర్మహావేగా వీరభద్రప్రియా హితా .

భద్రకాలీ జగన్మాతా భక్తానాం భద్రదాయినీ .. 87..

కరాలా పింగలాకారా కామభేత్త్రీ మహామనాః .

యశస్వినీ యశోదా చ షడధ్వపరివర్తికా .. 88..

శంఖినీ పద్మినీ సంఖ్యా సాంఖ్యయోగప్రవర్తికా .

చైత్రాదిర్వత్సరారూఢా జగత్సంపూరణీంద్రజా .. 89..

శుంభఘ్నీ ఖేచరారాధ్యా కంబుగ్రీవా బలీడితా .

ఖగారూఢా మహైశ్వర్యా సుపద్మనిలయా తథా .. 90..

విరక్తా గరుడస్థా చ జగతీహృద్గుహాశ్రయా .

శుంభాదిమథనా భక్తహృద్గహ్వరనివాసినీ .. 91..

జగత్త్త్రయారణీ సిద్ధసంకల్పా కామదా తథా .

సర్వవిజ్ఞానదాత్రీ చానల్పకల్మషహారిణీ .. 92..

సకలోపనిషద్గమ్యా దుష్టదుష్ప్రేక్ష్యసత్తమా .

సద్వృతా లోకసంవ్యాప్తా తుష్టిః పుష్టిః క్రియావతీ .. 93..

విశ్వామరేశ్వరీ చైవ భుక్తిముక్తిప్రదాయినీ .

శివాధృతా లోహితాక్షీ సర్పమాలావిభూషణా .. 94..

నిరానందా త్రిశూలాసిధనుర్బాణాదిధారిణీ .

అశేషధ్యేయమూర్తిశ్చ దేవతానాం చ దేవతా .. 95..

వరాంబికా గిరేః పుత్రీ నిశుంభవినిపాతినీ .

సువర్ణా స్వర్ణలసితాఽనంతవర్ణా సదాధృతా .. 96..

శాంకరీ శాంతహృదయా అహోరాత్రవిధాయికా .

విశ్వగోప్త్రీ గూఢరూపా గుణపూర్ణా చ గార్గ్యజా .. 97..

గౌరీ శాకంభరీ సత్యసంధా సంధ్యాత్రయీధృతా .

సర్వపాపవినిర్ముక్తా సర్వబంధవివర్జితా .. 98..

సాంఖ్యయోగసమాఖ్యాతా అప్రమేయా మునీడితా .

విశుద్ధసుకులోద్భూతా బిందునాదసమాదృతా .. 99..

శంభువామాంకగా చైవ శశితుల్యనిభాననా .

వనమాలావిరాజంతీ అనంతశయనాదృతా .. 100..

నరనారాయణోద్భూతా నారసింహీ ప్రకీర్తితా .

దైత్యప్రమాథినీ శంఖచక్రపద్మగదాధరా .. 101..

సంకర్షణసముత్పన్నా అంబికా సజ్జనాశ్రయా .

సువృతా సుందరీ చైవ ధర్మకామార్థదాయినీ .. 102..

మోక్షదా భక్తినిలయా పురాణపురుషాదృతా .

మహావిభూతిదాఽఽరాధ్యా సరోజనిలయాఽసమా .. 103..

అష్టాదశభుజాఽనాదిర్నీలోత్పలదలాక్షిణీ .

సర్వశక్తిసమారూఢా ధర్మాధర్మవివర్జితా .. 104..

వైరాగ్యజ్ఞాననిరతా నిరాలోకా నిరింద్రియా .

విచిత్రగహనాధారా శాశ్వతస్థానవాసినీ .. 105..

జ్ఞానేశ్వరీ పీతచేలా వేదవేదాంగపారగా .

మనస్వినీ మన్యుమాతా మహామన్యుసముద్భవా .. 106..

అమన్యురమృతాస్వాదా పురందరపరిష్టుతా .

అశోచ్యా భిన్నవిషయా హిరణ్యరజతప్రియా .. 107..

హిరణ్యజననీ భీమా హేమాభరణభూషితా .

విభ్రాజమానా దుర్జ్ఞేయా జ్యోతిష్టోమఫలప్రదా .. 108..

మహానిద్రాసముత్పత్తిరనిద్రా సత్యదేవతా .

దీర్ఘా కకుద్మినీ పింగజటాధారా మనోజ్ఞధీః .. 109..

మహాశ్రయా రమోత్పన్నా తమఃపారే ప్రతిష్ఠితా .

త్రితత్త్వమాతా త్రివిధా సుసూక్ష్మా పద్మసంశ్రయా .. 110..

శాంత్యతీతకలాఽతీతవికారా శ్వేతచేలికా .

చిత్రమాయా శివజ్ఞానస్వరూపా దైత్యమాథినీ .. 111..

కాశ్యపీ కాలసర్పాభవేణికా శాస్త్రయోనికా .

త్రయీమూర్తిః క్రియామూర్తిశ్చతుర్వర్గా చ దర్శినీ .. 112..

నారాయణీ నరోత్పన్నా కౌముదీ కాంతిధారిణీ .

కౌశికీ లలితా లీలా పరావరవిభావినీ .. 113..

వరేణ్యాఽద్భుతమాహాత్మ్యా వడవా వామలోచనా .

సుభద్రా చేతనారాధ్యా శాంతిదా శాంతివర్ధినీ .. 114..

జయాదిశక్తిజననీ శక్తిచక్రప్రవర్తికా .

త్రిశక్తిజననీ జన్యా షట్సూత్రపరివర్ణితా .. 115..

సుధౌతకర్మణాఽఽరాధ్యా యుగాంతదహనాత్మికా .

సంకర్షిణీ జగద్ధాత్రీ కామయోనిః కిరీటినీ .. 116..

ఐంద్రీ త్రైలోక్యనమితా వైష్ణవీ పరమేశ్వరీ .

ప్రద్యుమ్నజననీ బింబసమోష్ఠీ పద్మలోచనా .. 117..

మదోత్కటా హంసగతిః ప్రచండా చండవిక్రమా .

వృషాధీశా పరాత్మా చ వింధ్యా పర్వతవాసినీ .. 118..

హిమవన్మేరునిలయా కైలాసపురవాసినీ .

చాణూరహంత్రీ నీతిజ్ఞా కామరూపా త్రయీతనుః .. 119..

వ్రతస్నాతా ధర్మశీలా సింహాసననివాసినీ .

వీరభద్రాదృతా వీరా మహాకాలసముద్భవా .. 120..

విద్యాధరార్చితా సిద్ధసాధ్యారాధితపాదుకా .

శ్రద్ధాత్మికా పావనీ చ మోహినీ అచలాత్మికా .. 121..

మహాద్భుతా వారిజాక్షీ సింహవాహనగామినీ .

మనీషిణీ సుధావాణీ వీణావాదనతత్పరా .. 122..

శ్వేతవాహనిషేవ్యా చ లసన్మతిరరుంధతీ .

హిరణ్యాక్షీ తథా చైవ మహానందప్రదాయినీ .. 123..

వసుప్రభా సుమాల్యాప్తకంధరా పంకజాననా .

పరావరా వరారోహా సహస్రనయనార్చితా .. 124..

శ్రీరూపా శ్రీమతీ శ్రేష్ఠా శివనామ్నీ శివప్రియా .

శ్రీప్రదా శ్రితకల్యాణా శ్రీధరార్ధశరీరిణీ .. 125..

శ్రీకలాఽనంతదృష్టిశ్చ హ్యక్షుద్రాఽఽరాతిసూదనీ .

రక్తబీజనిహంత్రీ చ దైత్యసంగవిమర్దినీ .. 126..

సింహారూఢా సింహికాస్యా దైత్యశోణితపాయినీ .

సుకీర్తిసహితాచ్ఛిన్నసంశయా రసవేదినీ .. 127..

గుణాభిరామా నాగారివాహనా నిర్జరార్చితా .

నిత్యోదితా స్వయంజ్యోతిః స్వర్ణకాయా ప్రకీర్తితా .. 128..

వజ్రదండాంకితా చైవ తథాఽమృతసంజీవినీ .

వజ్రచ్ఛన్నా దేవదేవీ వరవజ్రస్వవిగ్రహా .. 129..

మాంగల్యా మంగలాత్మా చ మాలినీ మాల్యధారిణీ .

గంధర్వీ తరుణీ చాంద్రీ ఖడ్గాయుధధరా తథా .. 130..

సౌదామినీ ప్రజానందా తథా ప్రోక్తా భృగూద్భవా .

ఏకానంగా చ శాస్త్రార్థకుశలా ధర్మచారిణీ .. 131..

ధర్మసర్వస్వవాహా చ ధర్మాధర్మవినిశ్చయా .

ధర్మశక్తిర్ధర్మమయా ధార్మికానాం శివప్రదా .. 132..

విధర్మా విశ్వధర్మజ్ఞా ధర్మార్థాంతరవిగ్రహా .

ధర్మవర్ష్మా ధర్మపూర్వా ధర్మపారంగతాంతరా .. 133..

ధర్మోపదేష్ట్రీ ధర్మాత్మా ధర్మగమ్యా ధరాధరా .

కపాలినీ శాకలినీ కలాకలితవిగ్రహా .. 134..

సర్వశక్తివిముక్తా చ కర్ణికారధరాఽక్షరా .

కంసప్రాణహరా చైవ యుగధర్మధరా తథా .. 135..

యుగప్రవర్తికా ప్రోక్తా త్రిసంధ్యా ధ్యేయవిగ్రహా .

స్వర్గాపవర్గదాత్రీ చ తథా ప్రత్యక్షదేవతా .. 136..

ఆదిత్యా దివ్యగంధా చ దివాకరనిభప్రభా .

పద్మాసనగతా ప్రోక్తా ఖడ్గబాణశరాసనా .. 137..

శిష్టా విశిష్టా శిష్టేష్టా శిష్టశ్రేష్ఠప్రపూజితా .

శతరూపా శతావర్తా వితతా రాసమోదినీ .. 138..

సూర్యేందునేత్రా ప్రద్యుమ్నజననీ సుష్ఠుమాయినీ .

సూర్యాంతరస్థితా చైవ సత్ప్రతిష్ఠితవిగ్రహా .. 139..

నివృత్తా ప్రోచ్యతే జ్ఞానపారగా పర్వతాత్మజా .

కాత్యాయనీ చండికా చ చండీ హైమవతీ తథా .. 140..

దాక్షాయణీ సతీ చైవ భవానీ సర్వమంగలా .

ధూమ్రలోచనహంత్రీ చ చండముండవినాశినీ .. 141..

యోగనిద్రా యోగభద్రా సముద్రతనయా తథా .

దేవప్రియంకరీ శుద్ధా భక్తభక్తిప్రవర్ధినీ .. 142..

త్రినేత్రా చంద్రముకుటా ప్రమథార్చితపాదుకా .

అర్జునాభీష్టదాత్రీ చ పాండవప్రియకారిణీ .. 143..

కుమారలాలనాసక్తా హరబాహూపధానికా .

విఘ్నేశజననీ భక్తవిఘ్నస్తోమప్రహారిణీ .. 144..

సుస్మితేందుముఖీ నమ్యా జయాప్రియసఖీ తథా .

అనాదినిధనా ప్రేష్ఠా చిత్రమాల్యానులేపనా .. 145..

కోటిచంద్రప్రతీకాశా కూటజాలప్రమాథినీ .

కృత్యాప్రహారిణీ చైవ మారణోచ్చాటనీ తథా .. 146..

సురాసురప్రవంద్యాంఘ్రిర్మోహఘ్నీ జ్ఞానదాయినీ .

షడ్వైరినిగ్రహకరీ వైరివిద్రావిణీ తథా .. 147..

భూతసేవ్యా భూతదాత్రీ భూతపీడావిమర్దికా .

నారదస్తుతచారిత్రా వరదేశా వరప్రదా .. 148..

వామదేవస్తుతా చైవ కామదా సోమశేఖరా .

దిక్పాలసేవితా భవ్యా భామినీ భావదాయినీ .. 149..

స్త్రీసౌభాగ్యప్రదాత్రీ చ భోగదా రోగనాశినీ .

వ్యోమగా భూమిగా చైవ మునిపూజ్యపదాంబుజా .

వనదుర్గా చ దుర్బోధా మహాదుర్గా ప్రకీర్తితా .. 150..

              ఫలశ్రుతిః

ఇతీదం కీర్తిదం భద్ర దుర్గానామసహస్రకం .

త్రిసంధ్యం యః పఠేన్నిత్యం తస్య లక్ష్మీః స్థిరా భవేత్ .. 1..

గ్రహభూతపిశాచాదిపీడా నశ్యత్యసంశయం .

బాలగ్రహాదిపీడాయాః శాంతిర్భవతి కీర్తనాత్ .. 2..

మారికాదిమహారోగే పఠతాం సౌఖ్యదం నృణాం .

వ్యవహారే చ జయదం శత్రుబాధానివారకం .. 3..

దంపత్యోః కలహే ప్రాప్తే మిథః ప్రేమాభివర్ధకం .

ఆయురారోగ్యదం పుంసాం సర్వసంపత్ప్రదాయకం .. 4..

విద్యాభివర్ధకం నిత్యం పఠతామర్థసాధకం .

శుభదం శుభకార్యేషు పఠతాం శృణుతామపి .. 5..

యః పూజయతి దుర్గాం తాం దుర్గానామసహస్రకైః .

పుష్పైః కుంకుమసమ్మిశ్రైః స తు యత్కాంక్షతే హృది .. 6..

తత్సర్వం సమవాప్నోతి నాస్తి నాస్త్యత్ర సంశయః .

యన్ముఖే ధ్రియతే నిత్యం దుర్గానామసహస్రకం .. 7..

కిం తస్యేతరమంత్రౌఘైః కార్యం ధన్యతమస్య హి .

దుర్గానామసహస్రస్య పుస్తకం యద్గృహే భవేత్ .. 8..

న తత్ర గ్రహభూతాదిబాధా స్యాన్మంగలాస్పదే .

తద్గృహం పుణ్యదం క్షేత్రం దేవీసాన్నిధ్యకారకం .. 9..

ఏతస్య స్తోత్రముఖ్యస్య పాఠకః శ్రేష్ఠమంత్రవిత్ .

దేవతాయాః ప్రసాదేన సర్వపూజ్యః సుఖీ భవేత్ .. 10..

ఇత్యేతన్నగరాజేన కీర్తితం మునిసత్తమ .

గుహ్యాద్గుహ్యతరం స్తోత్రం త్వయి స్నేహాత్ ప్రకీర్తితం .. 11..

భక్తాయ శ్రద్ధధానాయ కేవలం కీర్త్యతామిదం .

హృది ధారయ నిత్యం త్వం దేవ్యనుగ్రహసాధకం .. 12..

.. ఇతి శ్రీస్కాందపురాణే స్కందనారదసంవాదే

 హివాయై నమః . ఉమాయై          దుర్గాసహస్రనామస్తోత్రం సంపూర్ణం ..

పార్వతీసహస్రనామస్తోత్రమితి నామ్నా కూర్మపురాణే ప్రథితమిదం . తత్ర

పూర్వపీఠికా ఫలశ్రుతిశ్చ హిమవద్దేవీ సంవాదాత్మికే . తత్ అను

సంయుజ్యతే యథాస్థానం . శివోమా పరమా శక్తిరనంతా నిష్కలాఽమలా .

శాంతా మాహేశ్వరీ నిత్యా శాశ్వతీ పరమాక్షయా ఇత్యక్షరమాత్రేణ

కచిత్కచిత్పాఠభేదః .

గాయత్రీ రామాయణ

(గాయత్రీమంత్ర అక్షరాణాం(వర్ణానాం) శ్రీమద్ వాల్మీకిరామాయణే ప్రదర్శితాః)

తపస్స్వాధ్యాయనిరతం తపస్వీ వాగ్విదాం వరం .

నారదం పరిపప్రచ్ఛ వాల్మీకిర్మునిపుంగవం .. బాలకాండ 1.01.001.. 1..

స హత్వా రాక్షసాన్సర్వాన్ యజ్ఞఘ్నాన్ రఘునందనః .

ఋషిభిః పూజితస్తత్ర యథేంద్రో విజయీ పురా .. బాలకాండ 1.030.024.. 2..

విశ్వామిత్రః సరామస్తు శ్రుత్వా జనకభాషితం .

వత్స రామ ధనుః పశ్య ఇతి రాఘవమబ్రవీత్ .. బాలకాండ 1.067.012.. 3..

తుష్టావాస్య తదా వంశం ప్రవిశ్య చ విశాంపతేః .

శయనీయం నరేంద్రస్య తదాసాద్య వ్యతిష్ఠత .. అయోధ్యాకాండ 2.015.020.. 4..

వనవాసం హి సంఖ్యాయ వాసాంస్యాభరణాని చ .

భర్తారమనుగచ్ఛంత్యై సీతాయై శ్వశురో దదౌ .. అయోధ్యాకాండ 2.040.014.. 5..

రాజా సత్యం చ ధర్మశ్చ రాజా కులవతాం కులం .

రాజా మాతా పితా చైవ రాజా హితకరో నృణాం .. అయోధ్యాకాండ 2.067.034.. 6..

నిరీక్ష్య స ముహూర్తం తు దదర్శ భరతో గురుం .

ఉటజే రామమాసీనం జటామండలధారిణం .. అయోధ్యాకాండ 2.099.025.. 7..

యది బుద్ధిః కృతా ద్రష్టుమగస్త్యం తం మహామునిం .

అద్యైవ గమనే బుద్ధిం రోచయస్వ మహామతే .. అరణ్యకాండ 3.011.043.. 8..

భరతస్యార్యపుత్రస్య శ్వశ్రూణాం మమ చ ప్రభో .

మృగరూపమిదం వ్యక్తం విస్మయం జనయిష్యతి .. అరణ్యకాండ 3.043.018.. 9..

గచ్ఛ శీఘ్రమితో రామ సుగ్రీవం తం మహాబలం .

వయస్యం తం కురు క్షిప్రమితో గత్వాఽద్య రాఘవ .. అరణ్యకాండ 3.072.017.. 10..

దేశకాలౌ భజస్వాద్య క్షమమాణః ప్రియాప్రియే .

సుఖదుఃఖసహః కాలే సుగ్రీవవశగో భవ .. కిష్కింధాకాండ 4.022.020.. 11..

వందితవ్యాస్తతః సిద్ధాస్తపసా వీతకల్మషాః .

ప్రష్టవ్యా చాపి సీతాయాః ప్రవృత్తిర్వినయాన్వితైః .. కిష్కింధాకాండ 4.043.033.. 12..

స నిర్జిత్య పురీం లంకాం శ్రేష్ఠాం తాం కామరూపిణీం .

విక్రమేణ మహాతేజా హనూమాన్ కపిసత్తమః .. సుందరకాండ 5.04.001.. 13..

ధన్యా దేవాః సగంధర్వాః సిద్ధాశ్చ పరమర్షయః .

మమ పశ్యంతి యే వీరం రామం రాజీవలోచనం .. సుందరకాండ 5.026.041.. 14..

మంగలాభిముఖీ తస్య సా తదాసీన్మహాకపేః .

ఉపతస్థే విశాలాక్షీ ప్రయతా హవ్యవాహనం .. సుందరకాండ 5.053.026.. 15..

హితం మహార్థం మృదు హేతుసంహితం వ్యతీతకాలాయతిసంప్రతిక్షమం .

నిశమ్య తద్వాక్యముపస్థితజ్వరః ప్రసంగవానుత్తరమేతదబ్రవీత్ .. 6.010.027.. 16..

ధర్మాత్మా రక్షసశ్రేష్ఠః సంప్రాప్తోఽయం విభీషణః .

లంకైశ్వర్యమిదం శ్రీమాన్శ్రువం ప్రాప్నోత్యకంటకం .. యుద్ధకాండ 6.041.068.. 17..

యో వజ్రపాతాశనిసన్నిపాతాన్న చుక్షుభే నాపి చచాల రాజా .

స రామబాణాభిహతో భృశార్తశ్చచాల చాపం చ ముమోచ వీరః .. యుద్ధకాండ 6.059.139.. 18..

యస్య విక్రమమాసాద్య రాక్షసా నిధనం గతాః .

తం మన్యే రాఘవం వీరం నారాయణమనామయం .. యుద్ధకాండ 6.072.011.. 19..

న తే దదృశిరే రామం దహంతమపివాహినీం .

మోహితాః పరమాస్త్రేణ గాంధర్వేణ మహాత్మనా .. యుద్ధకాండ 6.093.026.. 20..

ప్రణమ్య దేవతాభ్యశ్చ బ్రాహ్మణేభ్యశ్చ మైథిలీ .

బద్ధాంజలిపుటా చేదమువాచాగ్నిసమీపతః .. యుద్ధకాండ 6.116.024.. 21..

చలనాత్పర్వతస్యైవ గణా దేవాశ్చ కంపితాః .

చచాల పార్వతీ చాపి తదాశ్లిష్టా మహేశ్వరం .. ఉత్తరకాండ 7.016.026.. 22..

దారాః పుత్రాః పురం రాష్ట్రం భోగాచ్ఛాదనభోజనం .

సర్వమేవావిభక్తం నౌ భవిష్యతి హరీశ్వర .. ఉత్తరకాండ 7.034.041.. 23..

యామేవ రాత్రిం శత్రుఘ్నః పర్ణశాలాం సమావిశత్ .

తామేవ రాత్రిం సీతాపి ప్రసూతా దారకద్వయం .. ఉత్తరకాండ 7.066.001.. 24..

ఇదం రామాయణం కృత్స్నం గాయత్రీబీజసంయుతం .

త్రిసంధ్యం యః పఠేన్నిత్యం సర్వపాపైః ప్రముచ్యతే ..

ఇతి గాయత్రీరామాయణం సంపూర్ణం .

గాయత్రీ మంజరీ

ఏకదా తు మహాదేవం కైలాశగిరిసంస్థితం .

పప్రచ్ఛ దేవీ వంద్యా విబుధమండలైః .. 1..

కతమం యోగమాసీనో యోగేశ త్వముపాససే .

యేన హి పరమాం సిద్ధిం ప్రాప్నువాన్ జగదీశ్వర .. 2..

శ్రుత్వా తు పార్వతీ వాచం మధుసిక్తాం శ్రుతిప్రియాం .

సమువాచ మహాదేవో విశ్వకల్యాణకారకః .. 3..

మహద్రహస్యం తద్గుప్తం యత్తు పృష్టం త్వయా ప్రియే .

తథాపి కథయిష్యామి స్నేహాత్తత్త్వామహం సమం .. 4..

గాయత్రీ వేద మాతాస్తి సాద్యా శక్తిర్మతా భువి .

జగతాం జననీ చైవ తాముపాసేఽహమేవ హి .. 5..

యౌగికానాం సమస్తానాం సాధనానాం తు హే ప్రియే .

గాయత్ర్యేవ మతా లోకే మూలాధారో విదాంవరైః .. 6..

అతి రహస్యమయ్యేషా గాయత్రీ తు దశ భుజా .

లోకేఽతి రాజతే పంచ ధారయంతి ముఖాని తు .. 7..

అతి గూఢాని సంశ్రుత్య వచనాని శివస్య చ .

అతి సంవృద్ధ జిజ్ఞాసా శివమూచే తు పార్వతీ .. 8..

పంచాస్య దశబాహూనామేతేషాం ప్రాణవల్లభ .

కృత్వా కృపాం కృపాలో త్వం కిం రహస్యం తు మే వద .. 9..

శ్రుత్వా త్వేతన్మహాదేవః పార్వతీవచనం మృదు .

తస్యాః శంకామపాకుర్వన్ ప్రత్యువాచ నిజాం ప్రియాం .. 10..

గాయత్ర్యాస్తు మహాశక్తిర్విద్యతే యా హి భూతలే .

అనన్య భావతో హ్యస్మిన్నోతప్రోతోఽస్తి చాత్మని .. 11..

బిభర్తి పంచావరణాన్ జీవః కోశాస్తు తే మతాః .

ముఖాని పంచ గాయత్ర్యాస్తానేవ వేద పార్వతి .. 12..

విజ్ఞానమయాన్నమయ-ప్రాణమయ-మనోమయాః .

తథానందమయశ్చైవ పంచ కోశాః ప్రకీర్తితాః .. 13..

ఏష్వేవ కోశకోశేషు హ్యనంతా ఋద్ధి సిద్ధయః .

గుప్తా ఆసాద్య యా జీవో ధన్యత్వమధిగచ్ఛతి .. 14..

యస్తు యోగీశ్వరో హ్యేతాన్ పంచ కోశాన్ను వేధతే .

స భవసాగరం తీర్త్వా బంధనేభ్యో విముచ్యతే .. 15..

గుప్తం రహస్యమేతేషాం కోషాణాం యోఽవగచ్ఛతి .

పరమాం గతిమాప్నోతి స ఏవ నాత్ర సంశయః .. 16..

లోకానాం తు శరీరాణి హ్యన్నాదేవ భవంతి ను .

ఉపత్యకాసు స్వాస్థ్యం చ నిర్భరం వర్తతే సదా .. 17..

ఆసనేనోపవాసేన తత్త్వ శుద్ధ్యా తపస్యయా .

చైవాన్నమయకోశస్య సంశుద్ధిరభిజాయతే .. 18..

ఐశ్వర్యం పురుషార్థశ్చ తేజ ఓజో యశస్తథా .

ప్రాణశక్త్యా తు వర్ధంతే లోకానామిత్యసంశయం .. 19..

పంచభిస్తు మహాప్రాణైర్లఘుప్రాణైశ్చ పంచభిః .

ఏతైః ప్రాణమయః కోశో జాతో దశభిరుత్తమః .. 20..

బంధేన ముద్రయా చైవ ప్రాణాయామేన చైవ హి .

ఏష ప్రాణమయః కోశో యతమానం తు సిద్ధ్యతి .. 21..

చేతనాయా హి కేంద్రంతు మనుష్యాణాం మనోమతం .

జాయతే మహతీత్వంతః శక్తిస్తస్మిన్ వశంగతే .. 22..

ధ్యాన-త్రాటక-తన్మాత్రా జపానాం సాధనైర్నను .

భవత్యుజ్జ్వలః కోశః పార్వత్యేష మనోమయః .. 23..

యథావత్ పూర్ణతో జ్ఞానం సంసారస్య చ స్వస్య చ .

నూనమిత్యేవ విజ్ఞానం ప్రోక్తం విజ్ఞానవేత్తృభిః .. 24..

సాధనా సోఽహమిత్యేషా తథా వాత్మానుభూతయః .

స్వరాణాం సంయమశ్చైవ గ్రంథిభేదస్తథైవ చ .. 25..

ఏషాం సంసిద్ధిభిర్నూనం యతమానస్య హ్యాత్మని .

ను విజ్ఞానమయః కోశః ప్రియే యాతి ప్రబుద్ధతాం .. 26..

ఆనందావరణోన్నత్యాత్యంతశాంతి-ప్రదాయికా .

తురీయావస్థితిర్లోకే సాధకం త్వధిగచ్ఛతి .. 27..

నాద బిందు కలానాం తు పూర్ణ సాధనయా ఖలు .

నన్వానందమయః కోశః సాధకే హి ప్రబుద్ధ్యతే .. 28..

భూలోకస్యాస్య గాయత్రీ కామధేనుర్మతా బుధైః .

లోక ఆశ్రయణేనామూం సర్వమేవాధిగచ్ఛతి .. 29..

పంచాస్యా యాస్తు గాయత్ర్యాః విద్యాం యస్త్వవగచ్ఛతి .

పంచతత్త్వ ప్రపంచాత్తు స నూనం హి ప్రముచ్యతే .. 30..

దశభుజాస్తు గాయత్ర్యాః ప్రసిద్ధా భువనేషు యాః .

పంచ శూల మహాశూలాన్యేతాః సంకేతయంతి హి .. 31..

దశభుజాన్నామేతాసాం యో రహస్యం తు వేత్తి యం సః .

త్రాసం శూలమహాశూలానాం నా నైవావగచ్ఛతి .. 32..

దృష్టిస్తు దోషసంయుక్తా పరేషామవలంబనం .

భయం చ క్షుద్రతాఽసావధానతా స్వార్థయుక్తతా .. 33..

అవివేకస్తథావేశస్తృష్ణాలస్యం తథైవ చ

ఏతాని దశ శూలాని శూలదాని భవంతి హి .. 34..

నిజైర్దశభుజైర్నూనం  శూలాన్యేతాని తు దశ .

సంహరతే హి గాయత్రీ లోకకల్యాణకారిణీ .. 35..

కలౌ యుగే మనుష్యాణాం శరీరాణీతి పార్వతి .

పృథ్వీ తత్త్వ ప్రధానాని జానాస్యేవ భవంతి హి .. 36..

సూక్ష్మతత్త్వ ప్రధానాన్యయుగోద్భూత నృణామతః .

సిద్ధీనాం తపసామేతే న భవంత్యధికారిణః .. 37..

పంచాంగ యోగ సంసిద్ధ్యా గాయత్ర్యాస్తు తథాపి తే .

తద్యుగానాం సర్వశ్రేష్ఠాం సిద్ధిం సంప్రాప్నువంతి హి .. 38..

గాయత్ర్యా వామమార్గీయం జ్ఞేయమత్యుచ్చసాధకైః .

ఉగ్రం ప్రచండమత్యంతం వర్తతే తంత్ర సాధనం .. 39..

అత ఏవ తు తద్గుప్తం రక్షితం హి విచక్షణైః .

స్యాద్యతో దురుపయోగో న కుపాత్రైః కథంచన .. 40..

గురుణైవ ప్రియే విద్యా తత్త్వం హృది ప్రకాశ్యతే .

గురుం వినా తు సా విద్యా సర్వథా నిష్ఫలా భవేత్ .. 41..

గాయత్రీ తు పరావిద్యా తత్ఫలావాప్తయే గురుః .

సాధకేన విధాతవ్యో గాయత్రీ-తత్త్వ పండితః .. 42..

గాయత్రీం యో విజానాతి సర్వం జానాతి స నను .

జానాతీమాం న యస్తస్య సర్వా విద్యాస్తు నిష్ఫలాః .. 43..

గాయత్ర్యేవతపో యోగః సాధనం ధ్యానముచ్యతే .

సిద్ధీనాం సా మతా మాతా నాతః కించిత్ బృహత్తరం .. 44..

గాయత్రీ సాధనా లోకే న కస్యాపి కదాపి హి .

యాతి నిష్ఫలతామేతత్ ధ్రువం సత్యం హి భూతలే .. 45..

గుప్తముక్తం రహస్యం యత్ పార్వతి త్వాం పతివ్రతాం .

ప్రాప్స్యంతి పరమాం సిద్ధిం జ్ఞాస్యంత్యేతత్ తు యే జనాః .. 46..

.. ఇతి ..