Sacred Stotras & Deities

గాయత్రీ ఆరతీ

జయతి జయ గాయత్రీ మాతా, జయతి జయ గాయత్రీ మాతా .

ఆది శక్తి తుమ, అలఖ నిరంజన, జగ పాలన కర్త్రీ .

దుఃఖ శోక భయ, క్లేశ కలహ, దారిద్ర్య దైన్య హర్త్రీ ..

బ్రహ్మ రూపిణీ, ప్రణతపాలినీ, జగతధాతృ అంబే .

భవభయహారీ, జనహితకారీ, సుఖదా జగదంబే ..

భయ హారిణీ, భవ తారిణీ అనఘే, అజ ఆనంద రాశీ .

అవికారీ, అఘహరీ, అవిచలిత, అమలే, అవినాశీ ..

కామధేను సతచిత ఆనందా, జయ గంగా గీతా .

సవితా కీ శాశ్వతీ శక్తి తుమ, సావిత్రీ సీతా ..

ఋగ్, యజు, సామ, అథర్వ ప్రణయినీ, ప్రణవ మహామహిమే .

కుండలినీ సహస్రార, సుషుమ్నా శోభా గుణ గరిమే ..

స్వాహా, స్వధా, శచీ, బ్రహ్మాణీ, రాధా, రుద్రాణీ .

జయ సతరూపా వాణీ, విద్యా, కమలా కల్యాణీ ..

జననీ హమ హైం దీన హీన, దుఃఖ దారిద కే ఘేరే .

యదపి కుటిల కపటీ కపూత, తౌ బాలక హైం తేరే ..

స్నేహ సనీ కరుణామయి మాతా, చరణ శరణ దీజై .

బిలఖ రహే హమ శిశు సుత తేరే, దయా దృష్టి కీజై ..

కామ క్రోధ, మద లోభ దంభ,దుర్భావ ద్వేష హరియే . 

శుద్ధ బుద్ధి, నిష్పాప హృదయ, మన కో పవిత్ర కరియే ..

తుమ సమర్థ సబ భౌతి తారిణీ, తుష్టి పుష్టి త్రాతా .

సత మారగ పర హమేం చలాఓ జో హై సుఖదాతా ..

జయతి జయ గాయత్రీ మాతా . జయతి జయ గాయత్రీ మాతా ..

శ్రీదుర్గాసప్తశ్లోకీ

. అథ సప్తశ్లోకీ దుర్గా .

శివ ఉవాచ

దేవి త్వం భక్తసులభే సర్వకార్యవిధాయినీ .

కలౌ హి కార్యసిద్ధ్యర్థముపాయం బ్రూహి యత్నతః ..

దేవ్యువాచ

శృణు దేవ ప్రవక్ష్యామి కలౌ సర్వేష్టసాధనం .

మయా తవైవ స్నేహేనాప్యంబాస్తుతిః ప్రకాశ్యతే ..

ఓం అస్య శ్రీదుర్గాసప్తశ్లోకీస్తోత్రమహామంత్రస్య నారాయణ ఋషిః .

అనుష్టుభాదీని ఛందాంసి . శ్రీమహాకాలీమహాలక్ష్మీమహాసరస్వత్యో దేవతాః .

శ్రీదూర్గాప్రీత్యర్థం సప్తశ్లోకీ దుర్గాపాఠే వినియోగః ..

జ్ఞానినామపి చేతాంసి దేవీ భగవతీ హి సా .

బలాదాకృష్య మోహాయ మహామాయా ప్రయచ్ఛతి .. 1..

దుర్గే స్మృతా హరసి భీతిమశేషజంతోః

        స్వస్థైః స్మృతా మతిమతీవ శుభాం దదాసి .

దారిద్ర్యదుఃఖభయహారిణి కా త్వదన్యా

        సర్వోపకారకరణాయ సదాఽఽర్ద్రచిత్తా .. 2..

సర్వమంగలమాంగల్యే శివే సర్వార్థసాధికే .

శరణ్యే త్ర్యంబకే గౌరి నారాయణి నమోఽస్తు తే .. 3..

శరణాగతదీనార్తపరిత్రాణపరాయణే .

సర్వస్యార్తిహరే దేవి నారాయణి నమోఽస్తు తే .. 4..

సర్వస్వరూపే సర్వేశే సర్వశక్తిసమన్వితే .

భయేభ్యస్త్రాహి నో దేవి దుర్గే దేవి నమోఽస్తు తే .. 5..

రోగానశేషానపహంసి తుష్టా రుష్టా తు కామాన్ సకలానభీష్టాన్ .

త్వామాశ్రితానాం న విపన్నరాణాం త్వామాశ్రితా హ్యాశ్రయతాం ప్రయాంతి .. 6..

సర్వాబాధాప్రశమనం త్రైలోక్యస్యాఖిలేశ్వరి .

ఏవమేవ త్వయా కార్యమస్మద్వైరి వినాశనం .. 7..

        .. ఇతి దుర్గాసప్తశ్లోకీ సంపూర్ణా ..

గాయత్రీ అష్టకం వా స్తోత్రం

గాయత్ర్యష్టకం

సుకల్యాణీం వాణీం సురమునివరైః పూజితపదాం

     శివామాద్యాం వంద్యాం త్రిభువనమయీం వేదజననీం .

పరం శక్తిం స్రష్టుం వివిధవిధ రూపాం గుణమయీం

     భజేఽమ్బాం గాయత్రీం పరమసుభగానందజననీం .. 1..

విశుద్ధాం సత్త్వస్థామఖిల దురవస్థాదిహరణీం

     నిరాకారాం సారాం సువిమల తపో మూర్తిమతులాం .

జగజ్జ్యేష్ఠాం శ్రేష్ఠామసురసురపూజ్యాం శ్రుతినుతాం

     భజేఽమ్బాం గాయత్రీం పరమసుభగానందజననీం .. 2..

తపో నిష్ఠాభీష్టాంస్వజనమనసంతాపశమనీం

     దయామూర్తిం స్ఫూర్తిం యతితతి ప్రసాదైకసులభాం .

వరేణ్యాం పుణ్యాం తాం నిఖిల భవ బంధాపహరణీం

     భజేఽమ్బాం గాయత్రీం పరమసుభగానందజననీం .. 3..

సదారాధ్యాం సాధ్యాం సుమతి మతి విస్తారకరణీం

     విశోకామాలోకాం హృదయగత మోహాంధహరణీం .

పరాం దివ్యాం భవ్యామగమభవసింధ్వేక తరణీం

     భజేఽమ్బాం గాయత్రీం పరమసుభగానందజననీం .. 4..

అజాం ద్వైతాం త్రైతాం వివిధగుణరూపాం సువిమలాం

     తమో హంత్రీం-తంత్రీం శ్రుతి మధురనాదాం రసమయీం .

మహామాన్యాం ధన్యాం సతతకరుణాశీల విభవాం

     భజేఽమ్బాం గాయత్రీం పరమసుభగానందజననీం .. 5..

జగద్ధాత్రీం పాత్రీం సకల భవ సంహారకరణీం

     సువీరాం ధీరాం తాం సువిమల తపో రాశి సరణీం .

అనేకామేకాం వై త్రిజగసదధిష్ఠానపదవీం

     భజేఽమ్బాం గాయత్రీం పరమసుభగానందజననీం .. 6..

ప్రబుద్ధాం బుద్ధాం తాం స్వజనమతి జాడ్యాపహరణాం

     హిరణ్యాం గుణ్యాం తాం సుకవిజన గీతాం సునిపుణీం .

సువిద్యాం నిరవద్యామమల గుణగాథాం భగవతీం

     భజేఽమ్బాం గాయత్రీం పరమసుభగానందజననీం .. 7..

అనంతాం శాంతాం యాం భజతి బుధ వృందః శ్రుతిమయీం

     సుగేయాం ధ్యేయాం యాం స్మరతి హృది నిత్యం సురపతిః .

సదా భక్త్యా శక్త్యా ప్రణతమతిభిః ప్రీతివశగాం

     భజేఽమ్బాం గాయత్రీం పరమసుభగానందజననీం .. 8..

శుద్ధ చిత్తః పఠేద్యస్తు గాయత్ర్యా అష్టకం శుభం .

అహో భాగ్యో భవేల్లోకే తస్మిన్ మాతా ప్రసీదతి .. 9..

ఇతి గాయత్ర్యష్టకం అథవా స్తోత్రం సంపూర్ణం .

శ్రీదుర్గాష్టోత్తరశతనామావలిః

ఓం సత్యై నమః .

ఓం సాధ్వ్యై నమః .

ఓం భవప్రీతాయై నమః .

ఓం భవాన్యై నమః .

ఓం భవమోచన్యై నమః .

ఓం ఆర్యాయై నమః .

ఓం దుర్గాయై నమః .

ఓం జయాయై నమః .

ఓం ఆద్యాయై నమః .

ఓం త్రినేత్రాయై నమః .

ఓం శూలధారిణ్యై నమః .

ఓం పినాకధారిణ్యై నమః .

ఓం చిత్రాయై నమః .

ఓం చండఘంటాయై నమః .

ఓం మహాతపాయై నమః .

ఓం మనరూపాయై నమః .

ఓం బుద్ధ్యై నమః .

ఓం అహంకారాయై నమః .

ఓం చిత్తరూపాయై నమః .

ఓం చితాయై నమః . 20

ఓం చిత్యై నమః .

ఓం సర్వమంత్రమయ్యై నమః .

ఓం సత్తాయై నమః .

ఓం సత్యానందస్వరూపిణ్యై నమః .

ఓం అనంతాయై నమః .

ఓం భావిన్యై నమః .

ఓం భావ్యాయై నమః .

ఓం భవ్యాయై నమః .

ఓం అభవ్యాయై నమః .

ఓం సదాగత్యై నమః .

ఓం శాంభవ్యై నమః .

ఓం దేవమాత్రే నమః .

ఓం చింతాయై నమః .

ఓం రత్నప్రియాయైసదాయై? నమః .

ఓం సర్వవిద్యాయై నమః .

ఓం దక్షకన్యాయై నమః .

ఓం దక్షయజ్ఞవినాశిన్యై నమః .

ఓం అపర్ణాయై నమః .

ఓం అనేకవర్ణాయై నమః .

ఓం పాటలాయై నమః . 40

ఓం పాటలావత్యై నమః .

ఓం పట్టాంబరపరీధానాయై నమః .

ఓం కలమంజీరరంజిన్యై నమః .

ఓం అమేయవిక్రమాయై నమః .

ఓం క్రూరాయై నమః .

ఓం సుందర్యై నమః .

ఓం సురసుందర్యై నమః .

ఓం వనదుర్గాయై నమః .

ఓం మాతంగ్యై నమః .

ఓం మతంగమునిపూజితాయై నమః .

ఓం బ్రాహ్మ్యై నమః .

ఓం మాహేశ్వర్యై నమః .

ఓం ఐంద్ర్యై నమః .

ఓం కౌమార్యై నమః .

ఓం వైష్ణవ్యై నమః .

ఓం చాముండాయై నమః .

ఓం వారాహ్యై నమః .

ఓం లక్ష్మ్యై నమః .

ఓం పురుషాకృత్యై నమః .

ఓం విమలాయై నమః . 60

ఓం ఉత్కర్షిణ్యై నమః .

ఓం జ్ఞానాయై నమః .

ఓం క్రియాయై నమః .

ఓం నిత్యాయై నమః .

ఓం బుద్ధిదాయై నమః .

ఓం బహులాయై నమః .

ఓం బహులప్రేమాయై నమః .

ఓం సర్వవాహనవాహనాయై నమః .

ఓం నిశుంభశుంభహనన్యై నమః .

ఓం మహిషాసురమర్దిన్యై నమః .

ఓం మధుకైటభహంత్ర్యై నమః .

ఓం చండముండవినాశిన్యై నమః .

ఓం సర్వాసురవినాశాయై నమః .

ఓం సర్వదానవఘాతిన్యై నమః .

ఓం సర్వశాస్త్రమయ్యై నమః .

ఓం సత్యాయై నమః .

ఓం సర్వాస్త్రధారిణ్యై నమః .

ఓం అనేకశస్త్రహస్తాయై నమః .

ఓం అనేకాస్త్రధారిణ్యై నమః .

ఓం కుమార్యై నమః . 80

ఓం ఏకకన్యాయై నమః .

ఓం కైశోర్యై నమః .

ఓం యువత్యై నమః .

ఓం యత్యై నమః .

ఓం అప్రౌఢాయై నమః .

ఓం ప్రౌఢాయై నమః .

ఓం వృద్ధమాత్రే నమః .

ఓం బలప్రదాయై నమః .

ఓం మహోదర్యై నమః .

ఓం ముక్తకేశ్యై నమః .

ఓం ఘోరరూపాయై నమః .

ఓం మహాబలాయై నమః .

ఓం అగ్నిజ్వాలాయై నమః .

ఓం రౌద్రముఖ్యై నమః .

ఓం కాలరాత్ర్యై నమః .

ఓం తపస్విన్యై నమః .

ఓం నారాయణ్యై నమః .

ఓం భద్రకాల్యై నమః .

ఓం విష్ణుమాయాయై నమః .

ఓం జలోదర్యై నమః . 100

ఓం శివదూత్యై నమః .

ఓం కరాల్యై నమః .

ఓం అనంతాయై నమః .

ఓం పరమేశ్వర్యై నమః .

ఓం కాత్యాయన్యై నమః .

ఓం సావిత్ర్యై నమః .

ఓం ప్రత్యక్షాయై నమః .

ఓం బ్రహ్మవాదిన్యై నమః . 108

.. ఇతి శ్రీదుర్గాష్టోత్తరశతనామావలిః సమాప్తా ..

శ్రీదుర్గాష్టోత్తరశతనామస్తోత్రం

        .. ఓం ..

        .. శ్రీ దుర్గాయై నమః ..

       అథ శ్రీదుర్గాష్టోత్తరశతనామస్తోత్రం .

               ఈశ్వర ఉవాచ .

శతనామ ప్రవక్ష్యామి శృణుష్వ కమలాననే .

యస్య ప్రసాదమాత్రేణ దుర్గా ప్రీతా భవేత్ సతీ .. 1..

ఓం సతీ సాధ్వీ భవప్రీతా భవానీ భవమోచనీ .

ఆర్యా దుర్గా జయా చాద్యా త్రినేత్రా శూలధారిణీ .. 2..

పినాకధారిణీ చిత్రా చండఘంటా మహాతపాః .

మనో బుద్ధిరహంకారా చిత్తరూపా చితా చితిః .. 3..

సర్వమంత్రమయీ సత్తా సత్యానందస్వరూపిణీ .

అనంతా భావినీ భావ్యా భవ్యాభవ్యా సదాగతిః .. 4..

శాంభవీ దేవమాతా చ చింతా రత్నప్రియా సదా .

సర్వవిద్యా దక్షకన్యా దక్షయజ్ఞవినాశినీ .. 5..

అపర్ణానేకవర్ణా చ పాటలా పాటలావతీ .

పట్టాంబర పరీధానా కలమంజీరరంజినీ .. 6..

అమేయవిక్రమా క్రురా సుందరీ సురసుందరీ .

వనదుర్గా చ మాతంగీ మతంగమునిపూజితా .. 7..

బ్రాహ్మీ మాహేశ్వరీ చైంద్రీ కౌమారీ వైష్ణవీ తథా .

చాముండా చైవ వారాహీ లక్ష్మీశ్చ పురుషాకృతిః .. 8..

విమలోత్కర్షిణీ జ్ఞానా క్రియా నిత్యా చ బుద్ధిదా .

బహులా బహులప్రేమా సర్వవాహన వాహనా .. 9..

నిశుంభశుంభహననీ మహిషాసురమర్దినీ .

మధుకైటభహంత్రీ చ చండముండవినాశినీ .. 10..

సర్వాసురవినాశా చ సర్వదానవఘాతినీ .

సర్వశాస్త్రమయీ సత్యా సర్వాస్త్రధారిణీ తథా .. 11..

అనేకశస్త్రహస్తా చ అనేకాస్త్రస్య ధారిణీ .

కుమారీ చైకకన్యా చ కైశోరీ యువతీ యతిః .. 12..

అప్రౌఢా చైవ ప్రౌఢా చ వృద్ధమాతా బలప్రదా .

మహోదరీ ముక్తకేశీ ఘోరరూపా మహాబలా .. 13..

అగ్నిజ్వాలా రౌద్రముఖీ కాలరాత్రిస్తపస్వినీ .

నారాయణీ భద్రకాలీ విష్ణుమాయా జలోదరీ .. 14..

శివదూతీ కరాలీ చ అనంతా పరమేశ్వరీ .

కాత్యాయనీ చ సావిత్రీ ప్రత్యక్షా బ్రహ్మవాదినీ .. 15..

య ఇదం ప్రపఠేన్నిత్యం దుర్గానామశతాష్టకం .

నాసాధ్యం విద్యతే దేవి త్రిషు లోకేషు పార్వతి .. 16..

ధనం ధాన్యం సుతం జాయాం హయం హస్తినమేవ చ .

చతుర్వర్గం తథా చాంతే లభేన్ముక్తిం చ శాశ్వతీం .. 17..

కుమారీం పూజయిత్వా తు ధ్యాత్వా దేవీం సురేశ్వరీం .

పూజయేత్ పరయా భక్త్యా పఠేన్నామశతాష్టకం .. 18..

తస్య సిద్ధిర్భవేద్ దేవి సర్వైః సురవరైరపి .

రాజానో దాసతాం యాంతి రాజ్యశ్రియమవాప్నుయాత్ .. 19..

గోరోచనాలక్తకకుంకుమేవ

        సింధూరకర్పూరమధుత్రయేణ .

విలిఖ్య యంత్రం విధినా విధిజ్ఞో

        భవేత్ సదా ధారయతే పురారిః .. 20..

భౌమావాస్యానిశామగ్రే చంద్రే శతభిషాం గతే .

విలిఖ్య ప్రపఠేత్ స్తోత్రం స భవేత్ సంపదాం పదం .. 21..

.. ఇతి శ్రీవిశ్వసారతంత్రే దుర్గాష్టోత్తరశతనామస్తోత్రం సమాప్తం ..

దుర్గాష్టకం

దుర్గే పరేశి శుభదేశి పరాత్పరేశి

      వంద్యే మహేశదయితే కరుణార్ణవేశి .

స్తుత్యే స్వధే సకలతాపహరే సురేశి

      కృష్ణస్తుతే కురు కృపాం లలితేఽఖిలేశి .. 1..

దివ్యే నుతే శ్రుతిశతైర్విమలే భవేశి

      కందర్పదారాశతసుందరి మాధవేశి .

మేధే గిరీశతనయే నియతే శివేశి

      కృష్ణస్తుతే కురు కృపాం లలితేఽఖిలేశి .. 2..

రాసేశ్వరి ప్రణతతాపహరే కులేశి

      ధర్మప్రియే భయహరే వరదాగ్రగేశి .

వాగ్దేవతే విధినుతే కమలాసనేశి

      కృష్ణస్తుతేకురు కృపాం లలితేఽఖిలేశి .. 3..

పూజ్యే మహావృషభవాహిని మంగలేశి

      పద్మే దిగంబరి మహేశ్వరి కాననేశి .

రమ్యేధరే సకలదేవనుతే గయేశి

      కృష్ణస్తుతే కురు కృపాం లలితేఽఖిలేశి .. 4..

శ్రద్ధే సురాఽసురనుతే సకలే జలేశి

      గంగే గిరీశదయితే గణనాయకేశి .

దక్షే స్మశాననిలయే సురనాయకేశి

      కృష్ణస్తుతే కురు కృపాం లలితేఽఖిలేశి .. 5..

తారే కృపార్ద్రనయనే మధుకైటభేశి

      విద్యేశ్వరేశ్వరి యమే నిఖలాక్షరేశి .

ఊర్జే చతుఃస్తని సనాతని ముక్తకేశి

      కృష్ణస్తుతే కురు కృపాం లలితఽఖిలేశి .. 6..

మోక్షేఽస్థిరే త్రిపురసుందరిపాటలేశి

      మాహేశ్వరి త్రినయనే ప్రబలే మఖేశి .

తృష్ణే తరంగిణి బలే గతిదే ధ్రువేశి

      కృష్ణస్తుతే కురు కృపాం లలితేఽఖిలేశి .. 7..

విశ్వంభరే సకలదే విదితే జయేశి

      వింధ్యస్థితే శశిముఖి క్షణదే దయేశి .

మాతః సరోజనయనే రసికే స్మరేశి

      కృష్ణస్తుతే కురు కృపాం లలితేఽఖిలేశి .. 8..

దుర్గాష్టకం పఠతి యః ప్రయతః ప్రభాతే

      సర్వార్థదం హరిహరాదినుతాం వరేణ్యాం .

దుర్గాం సుపూజ్య మహితాం వివిధోపచారైః

      ప్రాప్నోతి వాంఛితఫలం న చిరాన్మనుష్యః .. 9..

.. ఇతి శ్రీ మత్పరమహంసపరివ్రాజకాచార్య

శ్రీమదుత్తరాంనాయజ్యోతిష్పీఠాధీశ్వరజగద్గురూ-శంకరాచార్య-స్వామి-

శ్రీశాంతానంద సరస్వతీ శిష్య-స్వామి శ్రీమదనంతానంద-సరస్వతి

విరచితం శ్రీ దుర్గాష్టకం సంపూర్ణం..

దుర్గార్చనాగీతిః

జగదంబ దేవి జయ జయ! జగదంబ దేవి! జయ జయ .. ధ్రువం..

సురసంఘ-పూజనీయా త్రైలోక్య-మాననీయా .

దుఃఖౌఘనాశకర్త్రీ, జననీ జనార్తిహర్త్రీ .

దుర్గేం దయాం ప్రదర్శయ . జగదంబ దేవి! జయ జయ .. 1..

ప్రథమాఽసి ``శైలపుత్రీ'' త్వం ``బ్రహ్మచారిణీ'' ద్వితీయా .

త్వం చారు ``చంద్రఘంటా'' సంరాజితా తృతీయా .

సన్మార్గమిహ ప్రదర్శయ . జగదంబ దేవి! జయ జయ .. 2..

``కూష్మాండజా'' ప్రణమ్యా, బ్రహ్మాదితోఽప్యగమ్యా .

శ్రీ ``స్కంద-మాతృ''రూపా, యా శక్తిశివస్వరూపా .

దుర్దైంవమాశు భంజయ, జగదంబ దేవి! జయ జయ .. 3..

``కాత్యాయనీ'' భవిత్రీ, దనుజావలీసవిత్రీ .

త్వం ``కాలరాత్రి''రేషా, దుద్ధర్ష-భీమ-వేషా .

నిజ-భక్త-భీరూతాం జయ . జగదంబ దేవి! జయ జయ .. 4..

``గౌరీం'' మహాప్రసిద్ధాం, ప్రణమంతి యాం సుసిద్ధాః.

సా ``సిద్ధిదాత్ర్యవిత్రీ'', కుశలేష్వలం భవిత్రీ .

ఆశాం చ మేఽత్ర పూరయ . జగదంబ దేవి! జయ జయ .. 5..

కాలీ కరాలినీ త్వం, జనలోకపాలినీ త్వం .

లక్ష్మీసమా గిరా త్వం భక్తేష్వనుగ్రహా త్వం .

లోకానశేషమీరయ . జగదంబ దేవి! జయ జయ .. 6..

దుర్గాసి దుర్గహంత్రీ క్లేశాద్యవిఘ్నహంత్రీ .

త్వం హే మహాసరస్వతి, సంగృహ్యతాం స్తవోఽయం .

సౌభాగ్యమత్ర కల్పయ . జగదంబ దేవి! జయ జయ .. 7..

జనని! ``ద్విజేంద్ర''-బాలః, శరణాగతోఽనవద్యః .

నీరాజనాం ప్రణామాన్, చాంగీకురుష్వ సద్యః .

విజయం విధీయతాం జయ . జగదంబ దేవి! జయ జయ .. 8..

               - శ్రీసరయూప్రసాదశాస్త్రీ ``ద్విజేంద్రః''

శ్రీదుర్గాంబాస్తోత్రం

జ్ఞానమాత్రావశేషాయా నిష్పప్రపంచా నిరంకుశా .

చిదానందఘనాత్యచ్ఛా దుర్గాంబాం తాం ఉపాస్మహే .. 1..

మంత్రాణాం మాతృకా దేవి జ్ఞానానాం జ్ఞానరూపిణీ .

జ్ఞానానాం చిన్మయాతీతా శూన్యానాం శూన్యసాక్షిణీ .. 2..

యస్యాః పరతరం నాస్తి సైషా దుర్గా ప్రకీర్తితా .

దుర్గాత్సంత్రాయతే యస్మాత్ దేవీ దుర్గేతి కథ్యతే .. 3..

ప్రపద్యే శరణం దేవి దురాచారవిధాతినీం .

నమామి భవభీతోఽహం సంసారార్ణవతారిణీం .. 4..

ఇతి శ్రీసమర్థరామదాసానుగ్రహిత శ్రీరామపదపంకజభృంగాయమాన

శ్రీమత్పరమహంసపరివ్రాజకాచార్యవరభగవతాశ్రీశ్రీధరస్వామినా

విరచితం శ్రీదుర్గాంబాస్తోత్రం సంపూర్ణం ..

శ్రీదుర్గామానస పూజా

శ్రీ గణేశాయ నమః .

ఉద్యచ్చందనకుంకుమారుణపయోధారాభిరాప్లావితాం

నానానర్ఘ్యమణిప్రవాలఘటితాం దత్తాం గృహాణాంబికే .

ఆమృష్టాం సురసుందరీభిరభితో హస్తాంబుజైర్భక్తితో

మాతః సుందరి భక్తకల్పలతికే శ్రీపాదుకామాదరాత్ .. 1..

దేవేంద్రాదిభిరర్చితం సురగణైరాదాయ సింహాసనం

చంచత్కాంచనసంచయాభిరచితం చారుప్రభాభాస్వరం .

ఏతచ్చంపకకేతకీపరిమలం తైలం మహానిర్మలం

గంధోద్వర్తనమాదరేణ తరుణీదత్తం గృహాణాంబికే .. 2..

పశ్చాద్దేవి గృహాణ శంభుగృహిణి శ్రీసుందరి ప్రాయశో

గంధద్రవ్యసమూహనిర్భరతరం ధాత్రీఫలం నిర్మలం .

తత్కేశాన్ పరిశోధ్య కంకతికయా మందాకినీస్రోతసి

స్నాత్వా ప్రోజ్జ్వలగంధకం భవతు హే శ్రీసుందరి త్వన్ముదే .. 3..

సురాధిపతికామినీకరసరోజనాలీధృతాం

సచందనసకుంకుమాగురుభరేణ విభ్రాజితాం .

మహాపరిమలోజ్జ్వలాం సరసశుద్ధకస్తూరికాం

గృహాణ వరదాయిని త్రిపురసుందరి శ్రీప్రదే .. 4..

గంధర్వామరకిన్నరప్రియతమాసంతానహస్తాంబుజ-

ప్రస్తారైర్ధ్రియమాణముత్తమతరం కాశ్మీరజాపింజరం .

మాతర్భాస్వరభానుమండలలసత్కాంతిప్రదానోజ్జ్వలం

చైతన్నిర్మలమాతనోతు వసనం శ్రీసుందరి త్వన్ముదం .. 5..

స్వర్ణాకల్పితకుండలే శ్రుతియుగే హస్తాంబుజే ముద్రికా

మధ్యే సారసనా నితంబఫలకే మంజీరమంఘ్రిద్వయే .

హారో వక్షసి కంకణౌ క్వణరణత్కారౌ కరద్వంద్వకే

విన్యస్తం ముకుటం శిరస్యనుదినం దత్తోన్మదం స్తూయతాం .. 6..

గ్రీవాయాం ధృతకాంతికాంతపటలం గ్రైవేయకం సుందరం

సిందూరం విలసల్లలాటఫలకే సౌందర్యముద్రాధరం .

రాజత్కజ్జలముజ్జ్వలోత్పలదలశ్రీమోచనే లోచనే

తద్దివ్యౌషధినిర్మితం రచయతు శ్రీశాంభవి శ్రీప్రదే .. 7..

అమందతరమందరోన్మథితదుగ్ధసింధూద్భవం

నిశాకరకరోపమం త్రిపురసుందరి శ్రీప్రదే .

గృహాణ ముఖమీక్షతుం ముకురబింబమావిద్రుమై-

ర్వినిర్మితమధచ్ఛిదే రతికరాంబుజస్థాయినం .. 8..

కస్తూరీద్రవచందనాగురుసుధాధారాభిరాప్లావితం

చంచచ్చంపకపాటలాదిసురభిర్ద్రవ్యైః సుగంధీకృతం .

దేవస్త్రీగణమస్తకస్థితమహారత్నాదికుంభవ్రజై-

రంభఃశాంభవి సంభ్రమేణ విమలం దత్తం గృహాణాంబికే .. 9..

కహ్లారోత్పలనాగకేసరసరోజాఖ్యావలీమాలతీ-

మల్లీకైరవకేతకాదికుసుమై రక్తాశ్వమారాదిభిః .

పుష్పైర్మాల్యభరేణ వై సురభిణా నానారసస్రోతసా

తామ్రాంభోజనివాసినీం భగవతీం శ్రీచండికాం పూజయే .. 10..

మాంసీగుగ్గులచందనాగురురజః కర్పూరశైలేయజై-

ర్మాధ్వీకైః సహకుంకుమైః సురచితైః సర్పిభిరామిశ్రితైః .

సౌరభ్యస్థితిమందిరే మణిమయే పాత్రే భవేత్ ప్రీతయే

ధూపోఽయం సురకామినీవిరచితః శ్రీచండికే త్వన్ముదే .. 11..

ఘృతద్రవపరిస్ఫురద్రుచిరరత్నయష్ట్యాన్వితో

మహాతిమిరనాశనః సురనితంబినీనిర్మితః .

సువర్ణచషకస్థితః సఘనసారవర్త్యాన్విత-

స్తవ త్రిపురసుందరి స్ఫురతి దేవి దీపో ముదే .. 12..

జాతీసౌరభనిర్భరం రుచికరం శాల్యోదనం నిర్మలం

యుక్తం హింగుమరీచజీరసురభిర్ద్రవ్యాన్వితైర్వ్యంజనైః .

పక్వాన్నేన సపాయసేన మధునా దధ్యాజ్యసమ్మిశ్రితం

నైవేద్యం సురకామినీవిరచితం శ్రీచండికే త్వన్ముదే .. 13..

లవంగకలికోజ్జ్వలం బహులనాగవల్లీదలం

సజాతిఫలకోమలం సఘనసారపూగీఫలం .

సుధామధురమాకులం రుచిరరత్నపాత్రస్థితం

గృహాణ ముఖపంకజే స్ఫురితమంబ తాంబూలకం .. 14..

శరత్ప్రభవచంద్రమః స్ఫురితచంద్రికాసుందరం

గలత్సురతరంగిణీలలితమౌక్తికాడంబరం .

గృహాణ నవకాంచనప్రభవదండఖండోజ్జ్వలం

మహాత్రిపురసుందరి ప్రకటమాతపత్రం మహత్ .. 15..

మాతస్త్వన్ముదమాతనోతు సుభగస్త్రీభిః సదాఽఽన్దోలితం

శుభ్రం చామరమిందుకుందసదృశం ప్రస్వేదదుఃఖాపహం .

సద్యోఽగస్త్యవసిష్ఠనారదశుకవ్యాసాదివాల్మీకిభిః

స్వే చిత్తే క్రియమాణ ఏవ కురుతాం శర్మాణి వేదధ్వనిః .. 16..

స్వర్గాంగణే వేణుమృదంగశంఖభేరీనినాదైరూపగీయమానా .

కోలాహలైరాకలితాతవాస్తు విద్యాధరీనృత్యకలాసుఖాయ .. 17..

దేవి భక్తిరసభావితవృత్తే ప్రీయతాం యది కుతోఽపి లభ్యతే .

తత్ర లౌల్యమపి సత్ఫలమేకంజన్మకోటిభిరపీహ న లభ్యం .. 18..

ఏతైః షోడశభిః పద్యైరూపచారోపకల్పితైః .

యః పరాం దేవతాం స్తౌతి స తేషాం ఫలమాప్నుయాత్ .. 19..

.. ఇతి దుర్గాతంత్రే దుర్గామానసపూజా సమాప్తా ..

శ్రీదుర్గాప్రాతఃస్మరణస్తోత్రం

ప్రాతః స్మరన్నిదమహం గిరిరాజకన్యా-

     మార్త్తార్త్తిమోచనచణస్మరణాం వినీతః .

ఆవేదయామి కరుణామృతపూరవర్షై-

     రాప్లావయాశు జనమార్త్తమిమం ప్రపన్నం .. 1..

ప్రాతర్నమన్నిదమహం వినివేదయామి

     శ్రీమేనకేక్షణచకోరసుధాంశులేఖాం .

శిష్టాన్యహాని మమ సంతు పవిత్రితాని

     త్వత్పాదచింతనసమాహితహృద్విలాసైః .. 2..

ప్రాతర్భజన్నహమవాప్తసమస్తకామాం

     కామాంతకారిమహిలాం మహితాం హితాయ .

మాతర్జహీహి మమ వాంఛితసంవిధానే-

     ఽవజ్ఞాం కృతాంజలిరిదం వినివేదయామి .. 3..

శ్లోకత్రయం విరచితం యమినా ప్రబోధా-

     నందేన నందయతు శశ్వదిదం ప్రసన్నం .

శ్రీమన్మహేశనయనోన్మదభృంగమాలా

     లాస్యాస్పదాంబుజముఖీకరుణైకపాత్రాన్ .. 4..

ఇతి శ్రీమత్పరమహంసపరివ్రాజకాచార్యస్వామిప్రకాశానందపురీవిరచితం

     దుర్గాప్రాతఃస్మరణస్తోత్రం సంపూర్ణం ..

దుర్గాప్రసాదాష్టకం

వందే నిర్బాధకరుణామరూణాం శరణావనీం .

కామపూర్ణజకారాద్యశ్రీపీఠాంతర్నివాసినీం .. 1..

        ప్రసిద్ధాం పరమేశానీం నానాతనుషు జాగ్రతీం .

        అద్వయానందసందోహమాలినీం శ్రేయసే శ్రయే .. 2..

జాగ్రత్స్వప్నసుషుప్త్యాదౌ ప్రతివ్యక్తి విలక్షణాం .

సేవే సైరిభసమ్మర్దరక్షణేషు కృతక్షణాం .. 3..

        తత్తత్కాలసముద్భూతరామకృష్ణాదిసేవితాం .

        ఏకధా దశధా క్వాపి బహుధా శక్తిమాశ్రయే .. 4..

స్తవీమి పరమేశానీం మహేశ్వరకుటుంబినీం .

సుదక్షిణామన్నపూర్ణాం లంబోదరపయస్వినీం .. 5..

        మేధా-సామ్రాజ్యదీక్షాదివీక్షారోహస్వరూపికాం .

        తామాలంబే శివాలంబాం ప్రసాదరూపికాం .. 6..

అవామా వామభాగేషు దక్షిణేష్వపి దక్షిణా .

అద్వయాపి ద్వయాకారా హృదయాంభోజగావతాత్ .. 7..

        మంత్ర భావనయా దీప్తామవర్ణాం వర్ణరూపిణీం .

        పరాం కందలికాం ధ్యాయన్ ప్రసాదమధిగచ్ఛతి .. 8..

ఇతి శ్రీదుర్గాప్రసాదద్వివేదీవిరచితం దుర్గాప్రసాదాష్టకం సంపూర్ణం .

శ్రీదుర్గా పంజరస్తోత్రం

వినియోగః-

ఓం అస్య శ్రీదుర్గా పంజరస్తోత్రస్య సూర్య ఋషిః, త్రిష్టుప్ఛందః,

ఛాయా దేవతా, శ్రీదుర్గా పంజరస్తోత్ర పాఠే వినియోగః .

ధ్యానం .

ఓం హేమ ప్రఖ్యామిందు ఖండాత్తమౌలిం శంఖాభీష్టా భీతి హస్తాం త్రినేత్రాం .

హేమాబ్జస్థాం పీన వస్త్రాం ప్రసన్నాం దేవీం దుర్గాం దివ్యరూపాం నమామి .

అపరాధ శతం కృత్వా జగదంబేతి చోచ్చరేత్ .

యాం గతిం సమవాప్నోతి నతాం బ్రహ్మాదయః సురాః .

సాపరాధోఽస్మి శరణం ప్రాప్తస్త్వాం జగదంబికే .. 1..

మార్కండేయ ఉవాచ -

దుర్గే దుర్గప్రదేశేషు దుర్వారరిపుమర్దినీ .

మర్దయిత్రీ రిపుశ్రీణాం రక్షాం కురు నమోఽస్తుతే .. 1..

పథి దేవాలయే దుర్గే అరణ్యే పర్వతే జలే .

సర్వత్రోఽపగతే దుర్గే దుర్గే రక్ష నమోఽస్తుతే .. 2..

దుఃస్వప్నే దర్శనే ఘోరే ఘోరే నిష్పన్న బంధనే .

మహోత్పాతే చ నరకే దుర్గేరక్ష నమోఽస్తుతే .. 3..

వ్యాఘ్రోరగ వరాహాని నిర్హాదిజన సంకటే .

బ్రహ్మా విష్ణు స్తుతే దుర్గే దుర్గే రక్ష నమోఽస్తుతే .. 4..

ఖేచరా మాతరః సర్వం భూచరాశ్చా తిరోహితాః .

యే త్వాం సమాశ్రితా స్తాంస్త్వం దుర్గే రక్ష నమోఽస్తుతే .. 5..

కంసాసుర పురే ఘోరే కృష్ణ రక్షణకారిణీ .

రక్ష రక్ష సదా దుర్గే దుర్గే రక్ష నమోఽస్తుతే .. 6..

అనిరుద్ధస్య రుద్ధస్య దుర్గే బాణపురే పురా .

వరదే త్వం మహాఘోరే దుర్గే రక్ష నమోఽస్తుతే .. 7..

దేవ ద్వారే నదీ తీరే రాజద్వారే చ సంకటే .

పర్వతా రోహణే దుర్గే దుర్గే రక్ష నమోఽస్తుతే .. 8..

దుర్గా పంజర మేతత్తు దుర్గా సార సమాహితం .

పఠనస్తారయేద్ దుర్గా నాత్ర కార్యా విచారణ .. 9..

రుద్రబాలా మహాదేవీ క్షమా చ పరమేశ్వరీ .

అనంతా విజయా నిత్యా మాతస్త్వమపరాజితా .. 10..

ఇతి శ్రీ మార్కండేయపురాణే దేవీమహాత్మ్యే రుద్రయామలే దేవ్యాః పంజరస్తోత్రం .