Sacred Stotras & Deities

దుర్గా పంచరత్నం

తే ధ్యానయోగానుగతాః అపశ్యన్

     త్వామేవ దేవీం స్వగుణైర్నిగూఢాం .  var  దేవాత్మశక్తిం

త్వమేవ శక్తిః పరమేశ్వరస్య

     మాం పాహి సర్వేశ్వరి మోక్షదాత్రి .. 1..

దేవాత్మశక్తిః శ్రుతివాక్యగీతా

     మహర్షిలోకస్య పురః ప్రసన్నా .

గుహా పరం వ్యోమ సతః ప్రతిష్ఠా

     మాం పాహి సర్వేశ్వరి మోక్షదాత్రి .. 2..

పరాస్య శక్తిః వివిధైవ శ్రూయసే

     శ్వేతాశ్వవాక్యోదితదేవి దుర్గే .

స్వాభావికీ జ్ఞానబలక్రియా తే

     మాం పాహి సర్వేశ్వరి మోక్షదాత్రి .. 3..

దేవాత్మశబ్దేన శివాత్మభూతా

     యత్కూర్మవాయవ్యవచోవివృత్యా .

త్వం పాశవిచ్ఛేదకరీ ప్రసిద్ధా

     మాం పాహి సర్వేశ్వరి మోక్షదాత్రి .. 4..

త్వం బ్రహ్మపుచ్ఛా వివిధా మయూరీ

     బ్రహ్మప్రతిష్ఠాస్యుపదిష్టగీతా .

జ్ఞానస్వరూపాత్మతయాఖిలానాం

     మాం పాహి సర్వేశ్వరి మోక్షదాత్రి .. 5..

ఇతి పరమపూజ్య శ్రీ చంద్రశేఖరేంద్ర సరస్వతీ

స్వామీగలకృతం దుర్గా పంచరత్నం సంపూర్ణం ..

శ్రీదుర్గాపంచకం

మాతర్నమస్తే  జగదంబికే శివే !

      దుర్గా సదా దుర్గతినాశినీశ్వరీ .

త్వమాదిశక్తిర్భువనేషు కీర్త్తితా

      బ్రాహ్మీ భవానీ చ విభాసి వైష్ణవీ .. 1..

సంహారణం త్వం  కురు సింహవాహనా

      హింసాపరాణాం  మహిషాది-రక్షసాం .

సంసార-సన్మార్గ-విధౌ కృపామయీ

      కాలీ సమేషాం దహ పాప-కల్మషం .. 2..

ఆయాహి దుర్గే ! వరదా మహాయుధా

      హే దుష్ట-విధ్వంసిని ! ధర్మధారిణీ .

గంగాధరార్ధాడ్గి ! నిధేహి మంగలం

      తవానుకంపా  హృదయం పునాతు నః .. 3..

అస్మాకమంతఃకరణ-ప్రదూషణం

      భస్మీకురు త్వం  తమసాం నిరాసినీ .

శర్వాణి ! సర్వాణి  పవిత్రయ స్వయం

      ప్రసార్య పర్యావరణం సునిర్మలం .. 4..

త్వం సర్వభూతే జననీ విరాజితా

      జైత్రీ సుగాత్రీ  గిరిరాజ-నందినీ .

స్వాంతే జనానాం  భవ శాంతి-సౌఖ్యదా

      పాదారవిందే తవ నః సువందనం .. 5..

    -- రచయితా : డాె హరేకృష్ణ-మేహేరః

శ్రీదుర్గానీరాజనపంచకం

కర్పూరేణ వరేణ పావకశిఖా శాఖాయతే తేజసా

     వాసస్తేన సుకంపతే ప్రతిపలం ఘ్రాణం ముహుర్మోదతే .

నేత్రాహ్లాదకరం సుపాత్రలసితం సర్వాంగశోభాకరం

     దుర్గే ! ప్రీతమనా భవ తవ కృతే కుర్వే సునీరాజనం .. 1..

ఆదౌ దేవి ! దదే చతుస్తవ పదే త్వం జ్యోతిషా భాససే

     దృష్ట్వైతన్ మమ మానసే బహువిధా స్వాశా జరీజృంభతే .

ప్రారబ్ధాని కృతాని యాని నితరాం పాపాని మే నాశయ

     దుర్గే ! ప్రీతమనా భవ తవ కృతే కుర్వే సునీరాజనం .. 2..

నాభౌ ద్విః ప్రదదే నగేశతనయే ! త్వద్భా బహు భ్రాజతే

     తేన ప్రీతమనా నమామి సుతరాం యాచేపి మే కామనాం .

శాంతిర్భూతితతిర్విభాతు సదనే నిఃశేషసౌఖ్యం సదా

     దుర్గే ! ప్రీతమనా భవ తవ కృతే కుర్వే సునీరాజనం .. 3..

ఆస్యే తేఽపి సకృద్ దదే ద్యుతిధరే ! చంద్రాననం దీప్యతే

     దృష్ట్వా మే హృదయే విరాజతి మహా-భక్తిర్దయాసాగరే ! .

నత్వా త్వచ్చరణౌ రణాంగనమనః ! శక్తిం సుఖం కామయే

     దుర్గే ! ప్రీతమనా భవ తవ కృతే కుర్వే సునీరాజనం .. 4..

మాతో మంగలసాధికే ! శుభతనౌ తే సప్తకృత్వో దదే

     తస్మాత్ తేన ముహుర్జగద్ధితకరం సంజాయతే సన్మహః .

తద్భాసా విపదః ప్రయాంతు దురితం దుఃఖాని సర్వాణి మే

     దుర్గే ! ప్రీతమనా భవ తవ కృతే కుర్వే సునీరాజనం .. 5..

ఇతి శ్రీవ్రజకిశోరః త్రిపాఠీవిరచితం శ్రీదుర్గానీరాజనపంచకం సంపూర్ణం .

శ్రీదుర్గానామషోడశీ

దుర్గా నారాయణీశానా విష్ణుమాయా శివా సతీ .

నిత్యా సత్యా భగవతీ శర్వాణీ సర్వమంగళా .

అంబికా వైష్ణవీ గౌరీ పార్వతీ చ సనాతనీ ..

ఏషా నామ్నాం షోడశికా శ్రీదుర్గాయాః ప్రియంకరీ .

కీర్తనాదాశు సుఖదా సర్వోపద్రవనాశినీ .

ఓం దుర్గాయై నమః . నారాయణ్యై నమః . ఈశానాయై నమః . విష్ణుమాయాయై

నమః . శివాయై నమః . సత్యై నమః . నిత్యాయై నమః . సత్యాయై నమః .

భగవత్యై నమః . శర్వాణ్యై నమః . సర్వమంగళాయై నమః . అంబికాయై

నమః . వైష్ణవ్యై నమః . గౌర్యై నమః . పార్వత్యై నమః . సనాతన్యై నమః .

ఇతి శ్రీదుర్గానామషోడశీ సమాప్తా .

శ్రీదుర్గా నక్షత్రమాలికాస్తుతిః అథవా యుధిష్ఠిరకృతం దుర్గాస్తవం

  .. అథ  శ్రీదుర్గా నక్షత్రమాలికా స్తుతిః ..

     .. ఓం శ్రీ గణేశాయ నమః ..

విరాటనగరం రమ్యం గచ్ఛమానో యుధిష్ఠిరః .

అస్తువన్ మనసా దేవీం దుర్గాం త్రిభువనేశ్వరీం .. 1..

యశోదాగర్భసంభూతాం నారాయణవరప్రియాం .

నందగోపకులేజాతాం మంగళ్యాం కులవర్ధనీం .. 2..

కంసవిద్రావణకరీమసురాణాం క్షయం కరీం .

శిలాతటవినిక్షిప్తామాకాశం ప్రతిగామినీం .. 3..

వాసుదేవస్య భగినీం దివ్యమాల్య విభూషితాం .

దివ్యాంబరధరాం దేవీం ఖద్గఖేటకధారిణీం .. 4..

భారావతరణే పుణ్యే యే స్మరంతి సదాశివాం .

తాన్వై తారయసే పాపాత్ పంకేగామివ దుర్బలాం .. 5..

స్తోతుం ప్రచక్రమే భూయః వివిధైః స్తోత్రసంభవైః .

ఆమంత్ర్య దర్శనాకాంక్షీ రాజా దేవీం సహానుజః .. 6..

నమోఽస్తు వరదే కృష్ణే కుమారి బ్రహ్మచారిణి .

బాలార్క సదృశాకారే పూర్ణచంద్రనిభాననే .. 7..

చతుర్భుజే చతుర్వక్త్రే పీనశ్రోణిపయోధరే .

మయూరపింఛవలయే కేయూరాంగదధారిణి .. 8..

భాసి దేవి యథా పద్మా నారాయణపరిగ్రహః .

స్వరూపం బ్రహ్మచర్యం చ విశదం తవ ఖేచరి .. 9..

కృష్ణచ్ఛవిసమా కృష్ణా సంకర్షణసమాననా .

బిభ్రతీ విపులౌ బాహు శక్రధ్వజసముఛ్రయౌ .. 10..

పాత్రీ చ పంకజీ కంఠీ స్త్రీ విశుద్ధా చ యా భువి .

పాశం ధనుర్మహాచక్రం వివిధాన్యాయుధాని చ .. 11..

కుండలాభ్యాం సుపూర్ణాభ్యాం కర్ణాభ్యాం చ విభూషితా .

చంద్రవిస్పార్ధినా దేవి ముకేన త్వం విరాజసే .. 12..

ముకుటేన విచిత్రేణ కేశబంధేన శోభినా .

భుజంగాఽభోగవాసేన శ్రోణిసూత్రేణ రాజతా .. 13..

విభ్రాజసే చ బద్ధేన భోగేనేవేహ మంథరః .

ధ్వజేన శిఖిపింఛానాముఛ్రితేన విరాజసే .. 14..

కౌమారం వ్రతమాస్థాయ త్రిదివం పావితం త్వయా .

తేన త్వం స్తూయసే దేవి త్రిదశైః పూజ్యసేఽపి చ .. 15..

త్రైలోక్య రక్షణార్థాయ మహిషాసుర ఘాతిని .

ప్రసన్నా మే సురశ్రేష్ఠే దయాం కురు శివా భవ .. 16..

జయా త్వం విజయా చైవ సంగ్రామే చ జయప్రదా .

మమాపి విజయం దేహి వరదా త్వం చ సాంప్రతం .. 17..

వింధ్యే చైవ నగశ్రేష్ఠే తవస్థానం హి శాశ్వతం .

కాలి కాలి మహాకాలి శీధుమాంస పశుప్రియే .. 18..

కృతానుయాత్రా భూతైస్త్వం వరదా కామచారిణి .

భారావతారే యే చ త్వాం సంస్మరిష్యంతి మానవాః .. 19..

ప్రణమంతి చ యే త్వాం హి ప్రయాణే తు నరా భువి .

న తేషాం దుర్లభం కించిత్ పుత్రతో ధనతోఽపి వా .. 20..

దుర్గాత్తారయసే దుర్గే తత్త్వం దుర్గా స్మృతా జనైః .

కాంతారేష్వ-వసన్నానాం మగ్నానాం చ మహార్ణవే .. 21..

(దస్యుభిర్వా నిరుద్ధానాం త్వం గతిః పరమా నృణాం .)

జలప్రతరణే చైవ కాంతారేషు అవటేషు చ .

యే స్మరంతి మహాదేవీం న చ సీదంతి తే నరాః .. 22..

త్వం కీర్తిః శ్రీః ధృతిః సిద్ధిః హ్రీః విద్యా సంతతిర్మతిః .

సంధ్యా రాత్రిః ప్రభా నిద్రా జ్యోత్స్నా కాంతిః క్షమా దయా .. 23..

నృణాం చ బంధనం మోహం పుత్రనాశం ధనక్షయం .

వ్యాధిం మృత్యుం భయం చైవ పూజితా నాశయిష్యసి .. 24..

సోఽహం రాజ్యాత్పరిభ్రష్టః శరణం త్వాం ప్రపన్నవాన్ .

ప్రణతశ్చ యథా మూర్ధ్నా తవ దేవి సురేశ్వరి .. 25..

త్రాహి మాం పద్మపత్రాక్షి సత్యే సత్యా భవస్వ నః .

శరణం భవ మే దుర్గే శరణ్యే భక్తవత్సలే .. 26..

ఏవం స్తుతా హి సా దేవీ దర్శయామాస పాండవం .

ఉపగమ్య తు రాజానమిదం వచనమబ్రవీత్ .. 27..

శృణు రాజన్ మహాబాహో మదీయం వచనం ప్రభో .

భవిష్యతి అచిరాదేవ సంగ్రామే విజయస్తవ .. 28..

మమ ప్రసాదాత్ నిర్జిత్య హత్వా కౌరవ వాహినీం .

రాజ్యం నిష్కంటకం కృత్వా భోక్ష్యసే మేదినీం పునః .. 29..

భ్రాతృభిః సహితో రాజన్ ప్రీతిం యాస్యసి పుష్కలాం .

మత్ప్రసాదాచ్చ తే సౌఖ్యమారోగ్యం చ భవిష్యతి .. 30..

యే చ సంకీర్తయిష్యంతి లోకే విగతకల్మషాః .

తేషాం తుష్టా ప్రదాస్యామి రాజ్యమాయుః వపుః సుతం .. 31..

ప్రవాసే నగరే వాపి సంగ్రామే శతృసంకటే .

అటవ్యాం దుర్గకాంతారే సాగరే గహనే గిరౌ .. 32..

యే స్మరిష్యంతి మాం రాజన్ యథాహం భవతా స్మృతా .

న తేషాం దుర్లభం కించిత్ అస్మిన్ లోకే భవిష్యతి .. 33..

ఇదం స్తోత్రవరం భక్త్యా శృణుయాత్ వా ఫఠేత వా .

తస్య సర్వాణి కార్యాణి సిద్ధిం యాస్యంతి పాండవాః .. 34..

మత్ప్రసాదాచ్చ వస్సర్వాన్ విరాటనగరే స్థితాన్ .

న ప్రజ్ఞాస్యంతి కురవః నరా వా తన్నివాసినః .. 35..

ఇత్యుక్త్వా వరదా దేవీ యుధిష్ఠిరమరిందమం .

రక్షాం కృత్వా చ పాండూనాం తత్రైవాంతరధీయత .. 36..

ఇతి శ్రీదుర్గా నక్షత్రమాలికాస్తుతిః సమాప్తా .

ఏవం

ఇతి శ్రీమన్మహాభారతే విరాటపర్వణి పాండవప్రవేశపర్వణి

అష్టమోఽధ్యాయాంతర్గతం యుధిష్ఠిరకృతం శ్రీదుర్గాస్తవం సంపూర్ణం .

                .. ఓం తత్సత్..

 శ్రీదుర్గాధ్యానం

సింహస్థా శశిశేఖరా మరకతప్రఖ్యైశ్చతుర్భిర్భుజైః

      శంఖం చక్రధనుః శరాంశ్చ దధతీ నేత్రైస్త్రిభిః శోభితా .

ఆముక్తాంగదహారకంకణరణత్కాంచీ రణన్నూపురా

      దుర్గా దుర్గతిహారిణీ భవతు నో రత్నేల్లసత్కుండలా .. 1..

మాతర్మే మధుకైటభఘ్ని మహిషప్రాణాపహారోద్యమే

      హేలానిర్జితధూమ్రలోచనవధే హే చండముండార్దిని .

నిశ్శేషీకృతరక్తబీజదనుజే నిత్యే నిశుంభాపహే

      శుంభధ్వంసిని సంహరాశు దురితం దుర్గే నమస్తేఽమ్బికే .. 2..

హేమప్రఖ్యామిందుఖండార్ధమౌలిం

      శంఖారిష్టాభీతిహస్తాం త్రిణేత్రాం .

హేమాబ్జస్థాం పీతవస్త్రాం ప్రసన్నాం

      దేవీం దుర్గాం దివ్యరూపాం నమామి .. 3..

ఉద్యద్విద్యుత్కరాలాకులహరిగలసంస్థారిశంఖాసిఖేటే-

      ష్విష్వాసాఖ్యత్రిశూలానరిగణభయదా తర్జనీం సందధానా .

చర్మాస్యుత్తీర్ణదోర్భిః ప్రహరణనిపుణాభిర్వృతా కన్యకాభిః

      దద్యాత్కార్శానభీష్టాన్ త్రిణయనలలితా చాపి కాత్యాయనీ వః .. 4..

అరిశంఖకృపాణఖేటబాణాన్ సుధనుః శూలకకర్తరీం తర్జనీం దధానా .

భజతాం మహిషోత్తమాంగసంస్థా నవదూర్వాసదృశీశ్రియేఽస్తు దుర్గా .. 5..

ఇతి శ్రీదుర్గాధ్యానం ..

ఘస్రాధీశఘటాగభస్తిఘటితా వ్యాఘ్రాసనా శీఘ్రగా

      సుఘ్రాణాతిఘృణాగ్రణీ ఘనకచా విఘ్నౌఘనిఘ్నాత్మికా .

ఘోరాఘాతవిఘాతినీ ఘనరవా ఘంటాస్వనైర్ఘర్ఘరా

      దీర్ఘాక్షా ఘుసృణాన్వితాంఘ్రిరుధిరా దుర్గాఘసంఘం ద్యతు .. 6.. శ్రీవ్రజకిశోరః

దుర్గాద్వాత్రింశన్నామావలిః

దుర్గా దుర్గార్తిశమనీ దుర్గాఽఽపద్వినివారిణీ .

దుర్గమచ్ఛేదినీ దుర్గసాధినీ దుర్గనాశినీ .. 1..

దుర్గతోద్ధారిణీ దుర్గనిహంత్రీ దుర్గమాపహా .

దుర్గమజ్ఞానదా దుర్గదైత్యలోకదవానలా .. 2..

దుర్గమాదుర్గమాలోకా దుర్గమాఽఽత్మస్వరూపిణీ .

దుర్గమార్గప్రదా దుర్గమవిద్యా దుర్గమాశ్రితా .. 3..

దుర్గమజ్ఞానసంస్థానా దుర్గమధ్యానభాసినీ .

దుర్గమోహా దుర్గమగా దుర్గమార్థస్వరూపిణీ .. 4..

దుర్గమాసురసంహంత్రీ దుర్గమాయుధధారిణీ .

దుర్గమాంగీ దుర్గమతా దుర్గమ్యా దుర్గమేశ్వరీ .. 5..

దుర్గభీమా దుర్గభామా దుర్గభా దుర్గదారిణీ .

నామావలిమిమాం యస్తు దుర్గాయా సుధీ మానవః .. 6..

పఠేత్ సర్వభయాన్ముక్తో భవిష్యతి న సంశయః .

శత్రుభిః పీడ్యమానో వా దుర్గబంధగతోఽపి వా .

ద్వాత్రింశన్నామపాఠేన ముచ్యతే నాత్ర సంశయః .. 7..

ఇతి దుర్గాద్వాత్రింశన్నామావలిః సమాప్తా .

దుర్గాదేవీ-దశకం

జయ మహేశ్వరీ విశ్వ-తారిణీ

      త్వమసి దుర్గతే-ర్ధ్వంసకారిణీ .

కలుష-హారిణీ దైత్యదారిణీ

      జయ పరాంబికే ! ధర్మధారిణీ .. 1..

త్వమసి భారతీ భక్తవత్సలా

      జయసి పార్వతీ సర్వ-పుష్కలా .

త్వమసి వైష్ణవీ జిష్ణు-వందితా

      వితర సన్మతిం త్వం మహోర్జితా .. 2..

భగవతీ శివా త్వం త్రిశూలినీ

      మహిషమర్దినీ సింహ-వాహినీ .

జయసి భైరవీ భూరి-విక్రమా

      సుకరుణామయీ త్వం మనోరమా .. 3..

వృజిన-భంజినీ మంజులాననా

      సుజన-రంజినీ కంజ-లోచనా .

జగతి పూజితా గర్వ-గంజినీ

      భవతు తే కృపా శాంతి-శింజినీ .. 4..

జయసి పాలికా పుణ్య-సత్కృతాం,

      త్వమసి కాలికా ఘోర-దుష్కృతాం .

జయసి చండికా చండ-ముండహా

      త్వమిహ శాంభవీ దంభ-దర్పహా .. 5..

ధరణి-శోధనే త్వం ధురంధరా

      తవ శుభాగమే శోభితా ధరా .

అఘ-విఘాతినీ రాఘవార్చితా

      భువి విభాసి వై దివ్యభూషితా .. 6..

అహమికాంకితే మామకాంతరే

      దురిత-శంకితే పంకిలోదరే .

భవతు తే దయా-వారి-సేచనం,

      జనని ! మార్జనం భక్తి-సర్జనం .. 7..

హర హరప్రియే ! దుఃఖమాపదం,

      వితర సౌభగం నౌమి తే పదం .

అభయదాయకం నామ తే వరం,

      దశభుజే ! భజే దేవి ! సాదరం .. 8..

త్వమసి పావనీ పర్వ తావకం,

      దశహరాస్తి వై స్వస్తి-భావకం .

గిరిశ-సంగినీ గౌరి ! మంగలా

      కురు పదార్పణం దీప్తముజ్జ్వలా .. 9..

శరణవత్సలే ! శారదోత్సవే

      స్మరణమేవ తే తాపహం భవే .

తవ శుభాస్పదే భాస్వరే పదే

      ప్రణతిరస్తు మే దేవి ! శం-ప్రదే .. 10..

(ఇతి శ్రీహరేకృష్ణమేహేర-ప్రణీతం దుర్గాదేవీ-దశకం సంపూర్ణం .)

(ఛందోమంజరీ-వర్ణితా ఇందిరా ఇతి ఛందసా విరచితం .

భాగవత-``గోపీగీతం'' అనేన ఛందసా ప్రణీతమస్తి .)

 -- రచయితా : డాె హరేకృష్ణ-మేహేరః

దుర్గాచరణస్మరణం

భాతు భవ్యా భవానీయం భావనాభావితా శుభా .

భవాంగసంగతో యస్యా భూతయో భాంతి భూతలే .. 1..

భాస్వంతీ భువనాభిరామభరితాభోగప్రభాభాసురా

భూత్యేకప్రభుతాముపేత్య భువనే యా భాసతే భర్గగా .

భూయోఽమీ భువనేశ్వరాః సురగణా యత్పాదపాథోద్భవైః

పూర్ణైః పూతపరా భవంతి గలితాఽజ్ఞానాంధకారైర్బుధాః .. 2..

వీణావాదనతత్పరాఽర్థలహరీముద్వేల్లయంతీ సతీ

సా మాతా జగతాం జయత్యతిశయజ్ఞానప్రదా భారతీ .

యస్యాః--పాదనఖప్రభామనుసరఀశ్చంద్రోఽమ్బరే చంచతే

రాగేణాపగతాదరో జలజనిః పుష్పాంజలిర్యాచతే .. 3..

ఆస్తాం సమస్తవరవస్తువితానవృందే

మాతుశ్చరాచరనమస్కృతపాదరేణుః .

సైకా సురాసురవివందిశిరోఽర్చితా స్యాద్

భర్గోత్తమాంగమిలితా భజతాం విభూత్యై .. 4..

భాస్వత్కరైః సముచితం వికచం కరోతి

శంభోర్విలోచనగతేన చ సంగితం తత్ .

పాదాంబుజం వికసితం న మృషోక్తిరేషా

వైధో విధిర్న విబుధైరపి వాధనీయః .. 5..

ఉత్తమాంగసుభగా సురాపగా మౌలిలబ్ధశరణా దివశ్చ్చుతా .

సాహసైకరసికా శివా హి సా పద్గతాఽశ్రాయనతిర్నచాశ్రితే .. 6..

సుధాంధఃపతిస్తే సుధాసుందరం కిం

నమత్యంఘ్రియుగ్మం యతో భాగ్యవాన్సః .

ధరాయాం ధియః సాధుతైషాం త్వదర్థే

ధరాయా ధవత్వం కియత్తద్యశోఽదః .. 7..

పార్వతీపతిరయం వృషధ్వజః కిం శ్రుతేరపి పతిర్న గీయతే .

తేన కిం సురపతిప్రపూజితః సేవ్యసేవకమతిర్న చింత్యతే .. 8..

జటా సా ధుతా దేవనద్యా జలేన

న పూతేతి తేనానతేనాపి మూర్ధ్నా .

ఉమాపాదపద్మప్రసూతైః పరాగైః

ప్రయుక్తః ప్రణామః శివస్యాఽస్తు భూత్యై .. 9..

నమామః ప్రయామః పదద్వంద్వచంద్రం

చమత్కారచంచచ్చరిత్రం చ శృణ్మః .

భజామోర్చయామః శ్రవః సౌమ్యవర్ణ-

ముమే గౌరి దుర్గే శివేఽమ్బే భవాని .. 10.. (శివేఽమ్బే - అంబ ఇ, ఈకారో లక్ష్మీస్తత్సంబుద్ధౌ)

ఇతి దుర్గాచరణస్మరణం సంపూర్ణం .

రచయితా - శ్రీగిరిజాదత్తపాఠకః కావ్యతీర్థ ఆయుర్వేదాచార్యః .

ప్రధానాధ్యాపకః శ్రీకాలికేశ్వరాయుర్వేదవిద్యాలయస్య . (సం. 1995, ఇ.స.1938)

శ్రీదుర్గాదేవికవచం

శ్రీగణేశాయ నమః .

ఈశ్వర ఉవాచ .

శృణు దేవి ప్రవక్ష్యామి కవచం సర్వసిద్ధిదం .

పఠిత్వా పాఠయిత్వా చ నరో ముచ్యేత సంకటాత్ .. 1.. పఠిత్వా ధారయిత్వా

అజ్ఞాత్వా కవచం దేవి దుర్గామంత్రం చ యో జపేత్ .

స నాప్నోతి ఫలం తస్య పరం చ నరకం వ్రజేత్ .. 2..

ఇదం గుహ్యతమం దేవి కవచం తవ కథ్యతే .

గోపనీయం ప్రయత్నేన సావధానవధారయ .. 3..

ఉమాదేవీ శిరః పాతు లలాటే శూలధారిణీ .

చక్షుషీ ఖేచరీ పాతు కర్ణౌ చత్వరవాసినీ .. 4.. చ ద్వారవాసినీ

సుగంధా నాసికే పాతు వదనం సర్వధారిణీ . సర్వసాధినీ

జిహ్వాం చ చండికాదేవీ గ్రీవాం సౌభద్రికా తథా .. 5..

అశోకవాసినీ చేతో ద్వౌ బాహూ వజ్రధారిణీ .

కంఠం పాతు మహావాణీ జగన్మాతా స్తనద్వయం .. 6..

హృదయం లలితాదేవీ ఉదరం సింహవాహినీ .

కటిం భగవతీ దేవీ ద్వావూరూ వింధ్యవాసినీ .. 7..

మహాబలా చ జంఘే ద్వే పాదౌ భూతలవాసినీ .

ఏవం స్థితాఽసి దేవి త్వం త్రైలోక్యే రక్షణాత్మికా . త్రైలోక్యరక్షణాత్మికే

రక్ష మాం సర్వగాత్రేషు దుర్గే దేవి నమోఽస్తుతే .. 8..

ఇత్యేతత్కవచం దేవి మహావిద్యా ఫలప్రద .

యః పఠేత్ప్రాతరుత్థాయ స హి తీర్థఫలం లభేత్ .. 9..

యో న్యసేత్ కవచం దేహే తస్య విఘ్నం న క్వచిత్ .

భూతప్రేతపిశాచేభ్యో భయం తస్య న విద్యతే .. 10..

.. ఇతి శ్రీకుబ్జికాతంత్రే దుర్గాకవచం సంపూర్ణం ..

గంగాష్టకం సత్యజ్ఞానానందతీర్థకృత

శ్రీగణేశాయ నమః ..

యదవధి తవ నీరం పాతకీ నైతి గంగే

       తదవధి మలజాలైర్నైవ ముక్తః కలౌ స్యాత్ .

తవ జలకణికాఽలం పాపినాం పాపశుద్ధయై

       పతితపరమదీనాంస్త్వం హి పాసి ప్రపన్నాన్ .. 1..

తవ శివజలలేశం వాయునీతం సమేత్య

       సపది నిరయజాలం శూన్యతామేతి గంగే .

శమలగిరిసమూహాః ప్రస్ఫుంటతి ప్రచండాస్త్వయి

       సఖి విశతాం నః పాపశంకా కుతః స్యాత్ .. 2..

తవ శివజలజాలం నిఃసృతం యర్హి

       గంగే సకలభువనజాలం పూతపూతం తదాఽభూత్ .

యమభటకలివార్తా దేవి లుప్తా యమోఽపి

       వ్యధికృతవరదేహాః పూర్ణకామాః సకామాః .. 3..

మధుమధువనపూగై రత్నపూగైర్నృపూగైర్-

       మధుమధువనపూగైర్దేవపూగైః సపూగైః .

పురహరపరమాంగే భాసి మాయేవ గంగే శమయసి

       విషతాపం దేవదేవస్య వంద్యం .. 4..

చలితశశికులాభైరుత్తరంగైస్తరంగైర్-

       అమితనదనదీనామంగసంగైరసంగైః .

విహరసి జగదండే ఖండంయతీ గిరీంద్రాన్ రమయసి

       నిజకాంతం  సాగరం కాంతకాతే .. 5..

తవ పరమహిమానం చిత్తవాచామమానం

       హరిహరవిధిశత్ర్కా నాపి గంగే విదంతి .

శ్రుతికులమభిధత్తే శంకితం తం గుణాంతం

       గుణగణసువిలాపైర్నేతి నేతీతి సత్యం .. 6..

తవ నుతినతినామాన్యప్యఘం పావయంతి దదతి

       పరమశాంతిం దివ్యభోగాన్ జనానాం .

ఇతి పతితశరణ్యే త్వాం ప్రపన్నోఽస్మి

       మాతర్లలితతరతరంగే చాంగ గవేప్రసీద .. 7..

శుభతరకృతయోగాద్విశ్వనాథ-

       ప్రసాదాద్భవహరవరవిద్యాం ప్రాప్య కాశ్యాం హి గంగే .

భగవతి తవ తీరే నీరసారం నిపీయ

       ముదితహృదయకంజే నందసూనుం భజేఽహం .. 8..

గంగాష్టకమిదం కృత్వా భుక్తిముక్తిప్రదం నృణాం .

సత్యజ్ఞానానందతీర్థయతినా స్వర్పితం శివే .. 9..

తేన ప్రణాతు భగవాన్ శివో గంగాధరో విభుః .

కరోతు శంకరః కాశ్యాం జనానాం సతతం శివం .. 10..

ఇతి సత్యజ్ఞానానందతీర్థయతినా విరచితం గంగాష్టకం సంపూర్ణం ..

గంగాష్టకం కాలిదాసకృతం

శ్రీగణేశాయ నమః ..

నమస్తేఽస్తు గంగే త్వదంగప్రసంగాద్భుజం గాస్తురంగాః కురంగాః ప్లవంగాః .

అనంగారిరంగాః ససంగాః శివాంగా భుజంగాధిపాంగీకృతాంగా భవంతి .. 1..

నమో జహ్నుకన్యే న మన్యే త్వదన్యైర్నిసర్గేందుచిహ్నాదిభిర్లోకభర్తుః .

అతోఽహం నతోఽహం సతో గౌరతోయే వసిష్ఠాదిభిర్గీయమానాభిధేయే .. 2..

త్వదామజ్జనాత్సజ్జనో దుర్జనో వా విమానైః సమానః సమానైర్హి మానైః .

సమాయాతి తస్మిన్పురారాతిలోకే పురద్వారసంరుద్ధదిక్పాలలోకే .. 3..

స్వరావాసదంభోలిదంభోఽపి రంభాపరీరంభసంభావనాధీరచేతాః .

సమాకాంక్షతే త్వత్తటే వృక్షవాటీకుటీరే వసన్నేతుమాయుర్దినాని .. 4..

త్రిలోకస్య భర్తుర్జటాజూటబంధాత్స్వసీమాంతభాగే మనాక్ప్రస్ఖలంతః .

భవాన్యా రుషా ప్రోఢసాపంతభావాత్కరేణాహతాస్తవత్తరంగా జయంతి .. 5..

జలోన్మజ్జదైరావతోద్దానకుంభస్ఫురత్ప్రస్ఖలత్సాంద్రసిందూరరాగే .

క్కచిత్పద్మినీరేణుభంగే ప్రసంగే మనః ఖేలతాం జహ్నుకన్యాతరంగే .. 6..

భవత్తీరవానీరవాతోత్థధూలీలవస్పర్శతస్తత్క్షణం క్షీణపాపః .

జనోఽయం జగత్పావనే త్వత్ప్రసాదాత్పదే పౌరుహూతేఽపి ధత్తేఽవహేలాం .. 7..

త్రిసంధ్యానమల్లేఖకోటీరనానావిధానేకరత్నాంశుబింబప్రభాభిః .

స్ఫురత్పాదపీఠే హఠేనాష్టమూర్తేర్జటాజూటవాసే  నతాః స్మః పదం తే .. 8..

ఇదం యః పఠేదష్టకం జహ్నుపుత్ర్యాస్రికాలం కృతం కాలిదాసేన రమ్యం .

సమాయాస్యతీంద్రాదిభిర్గీయమానం పదం కైశవం శైశవం నో లభేత్సః .. 9..

ఇతి శ్రీకాలిదాసకృతం గంగాష్టకస్తోత్రం సంపూర్ణం ..