Sacred Stotras & Deities

గంగాష్టకం 2 కాలిదాసకృతం

శ్రీగణేశాయ నమః ..

కత్యక్షీణి కరోటయః కతి కతి ద్వీపిద్విపానాం త్వచః

కాకోలాః కతి పన్నగాః కతి సుధాధామ్నశ్చ ఖండా కతి .

కిం చ త్వం చ కతి త్రిలోకజననిత్వద్వారిపూరోదరే

మజ్జజ్జంతుకదంబకం సముదయత్యేకైకమాదాయ యత్ .. 1..

దేవి త్వత్పులినాంగణే స్థితిజుషాం నిర్మానినాం జ్ఞానినాం

స్వల్పాహారనిబద్ధశుద్ధవపుషాం తార్ణం గృహం శ్రేయసే .

నాన్యత్ర క్షితిమండలేశ్వరశతైః సంరక్షితో భూపతేః

ప్రాసాదో లలనాగణైరధిగతో భోగీంద్రభోగోన్నతః .. 2..

తత్తత్తీర్థగతైః కదర్థనశతైః కిం తైరనర్థాశ్రితై-

ర్జ్యోతిష్టోమముఖైః కిమీశవిముఖైర్యజ్ఞైరవజ్ఞాద్దతై .

సూతే కేశవవాసవాదివిబుధాగారాభిరామాం శ్రియం గంగే

దేవి భవత్తటే యది కుటీవాసః ప్రయాసం వినా .. 3..

గంగాతీరముపేత్య శీతలశిలామాలంబ్య హేమాచలీం

యైరాకర్ణి కుతూహలాకులతయా కల్లోలకోలాహలః .

తే శృణ్వంతి సుపర్వపర్వతశిలాసింహాసనాధ్యాసనాః

సంగీతాగమశుద్ధసిద్ధరమణీమంజీరధీరధ్వనిం .. 4..

దూరం గచ్ఛ సకచ్ఛగం చ భవతో నాలోకయామో

ముఖం రే పారాక వరాక సాకమితరైర్నాకప్రదైర్గమ్యతాం .

సద్యః ప్రోద్యతమందమారుతరజఃప్రాప్తా  కపోలస్థలే

గంగాంభఃకణికా విముక్తగణికాసంగాయ సంభావ్యతే .. 5..

విష్ణోః సంగతికారిణీ హరజటాజూటాటవీచారిణీ

ప్రాయశ్చిత్తనివారిణీ జలకణైః పుణ్యౌధవిస్తారిణీ .

భూభృత్కందరదారిణీ నిజజలే మజ్జజ్జనోత్తారిణీ

శ్రేయః స్వర్గవిహారిణీ విజయతే గంగా మనోహారిణీ .. 6..

వాచాలం వికలం ఖలం శ్రితమలం కామాకులం వ్యాకులం

చాండాలం తరలం నిపీతగరలం దోషావిలం చాఖిలం .

కుంభీపాకగతం తమంతకకరాదాకృష్య కస్తారయేన్-

మాతర్జహ్నునరేంద్రనందిని తవ స్వల్పోదబిందుం వినా .. 7..

శ్లేషమశ్లేషణయానలేఽమృతబిలే శాకాకులే వ్యాకులే

కంఠే ఘర్ఘరఘోషనాదమలినే కాయే చ సమ్మీలతి .

యాం ధ్యాయన్న్పి భారభంగురతరాం ప్రాప్నోతి ముక్తిం నరః

స్నాతుశ్వేతసి జాహ్న్వీ నివసతాం సంసారసంతాపహృత్ .. 8..

ఇతి శ్రీమత్కాలిదాసవిరచితం గంగాష్టకస్తోత్రం సంపూర్ణం ..

గంగాలహరీ

సమృద్ధం సౌభాగ్యం సకలవసుధాయాః కిమపి తన్

మహైశ్వర్యం లీలాజనితజగతః ఖండపరశోః .

శ్రుతీనాం సర్వస్వం సుకృతమథ మూర్తం సుమనసాం

సుధాసోదర్యం తే సలిలమశివం నః శమయతు .. 1..

దరిద్రాణాం దైన్యం దురితమథ దుర్వాసనహృదాం

ద్రుతం దూరీకుర్వన్ సకృదపి గతో దృష్టిసరణిం .

అపి ద్రాగావిద్యాద్రుమదలనదీక్షాగురురిహ

ప్రవాహస్తే వారాం శ్రియమయమపారాం దిశతు నః .. 2..

ఉదంచన్మార్తండస్ఫుటకపటహేరంబజననీ-

కటాక్షవ్యాక్షేపక్షణజనితసంక్షోభనివహాః .

భవంతు త్వంగంతో హరశిరసి గంగాతనుభువ-

స్తరంగాః ప్రోత్తుంగా దురితభయభంగాయ భవతాం .. 3..

తవాలంబాదంబ స్ఫురదలఘుగర్వేణ సహసా

మయా సర్వేఽవజ్ఞాసరణిమథ నీతాః సురగణాః .

ఇదానీమౌదాస్యం భజసి యది భాగీరథి తదా

నిరాధారో హా రోదిమి కథయ కేషామిహ పురః .. 4..

స్మృతిం యాతా పుంసామకృతసుకృతానామపి చ యా

హరత్యంతస్తంద్రాం తిమిరమివ చంద్రాంశుసరణిః .

ఇయం సా తే మూర్తిః సకలసురసంసేవ్యసలిలా

మమాంతఃసంతాపం త్రివిధమపి పాపం చ హరతాం .. 5..

అపి ప్రాజ్యం రాజ్యం తృణమివ పరిత్యజ్య సహసా

విలోలద్వానీరం తవ జనని తీరం శ్రితవతాం .

సుధాతః స్వాదీయస్సలిలభరమాతృప్తి పిబతాం

జనానామానందః పరిహసతి నిర్వాణపదవీం .. 6..

ప్రభాతే స్నాతీనాం నృపతిరమణీనాం కుచతటీ-

గతో యావన్మాతర్మిలతి తవ తోయైర్మృగమదః .

మృగాస్తావద్వైమానికశతసహస్రైః పరివృతా

విశంతి స్వచ్ఛందం విమలవపుషో నందనవనం .. 7..

స్మృతం సద్యః స్వాంతం విరచయతి శాంతం సకృదపి

ప్రగీతం యత్పాపం ఝటితి భవతాపం చ హరతి .

ఇదం తద్గంగేతి శ్రవణరమణీయం ఖలు పదం

మమ ప్రాణప్రాంతే వదనకమలాంతర్విలసతు .. 8..

యదంతః ఖేలంతో బహులతరసంతోషభరితా

న కాకా నాకాధీశ్వరనగరసాకాంక్షమనసః .

నివాసాల్లోకానాం జనిమరణశోకాపహరణం

తదేతత్తే తీరం శ్రమశమనధీరం భవతు నః .. 9..

న యత్సాక్షాద్వేదైరపి గలితభేదైరవసితం

న యస్మిన్ జీవానాం ప్రసరతి మనోవాగవసరః .

నిరాకారం నిత్యం నిజమహిమనిర్వాసితతమో

విశుద్ధం యత్తత్త్వం సురతటిని తత్త్వం న విషయః .. 10..

మహాదానైర్ధ్యానైర్బహువిధవితానైరపి చ యన్

న లభ్యం ఘోరాభిః సువిమలతపోరాశిభిరపి .

అచింత్యం తద్విష్ణోః పదమఖిలసాధారణతయా

దదానా కేనాసి త్వమిహ తులనీయా కథయ నః .. 11..

నృణామీక్షామాత్రాదపి పరిహరంత్యా భవభయం

శివాయాస్తే మూర్తేః క ఇహ మహిమానం నిగదతు .

అమర్షమ్లానాయాః పరమమనురోధం గిరిభువో

విహాయ శ్రీకంఠః శిరసి నియతం ధారయతి యాం .. 12..

వినింద్యాన్యున్మత్తైరపి చ పరిహార్యాణి పతితై-

రవాచ్యాని వ్రాత్యైః సపులకమపాస్యాని పిశునైః .

హరంతీ లోకానామనవరతమేనాంసి కియతాం

కదాప్యశ్రాంతా త్వం జగతి పునరేకా విజయసే .. 13..

స్ఖలంతీ స్వర్లోకాదవనితలశోకాపహృతయే

జటాజూటగ్రంథౌ యదసి వినిబద్ధా పురభిదా .

అయే నిర్లోభానామపి మనసి లోభం జనయతాం

గుణానామేవాయం తవ జనని దోషః పరిణతః .. 14..

జడానంధాన్ పంగూన్ ప్రకృతిబధిరానుక్తివికలాన్

గ్రహగ్రస్తానస్తాఖిలదురితనిస్తారసరణీన్ .

నిలింపైర్నిర్ముక్తానపి చ నిరయాంతర్నిపతతో

నరానంబ త్రాతుం త్వమిహ పరమం భేషజమసి .. 15..

స్వభావస్వచ్ఛానాం సహజశిశిరాణామయమపా-

మపారస్తే మాతర్జయతి మహిమా కోఽపి జగతి .

ముదాయం గాయంతి ద్యుతలమనవద్యద్యుతిభృతః

సమాసాద్యాద్యాపి స్ఫుటపులకసాంద్రాః సగరజాః .. 16..

కృతక్షుద్రైనస్కానథ ఝటితి సంతప్తమనసః

సముద్ధర్తుం సంతి త్రిభువనతలే తీర్థనివహాః .

అపి ప్రాయశ్చిత్తప్రసరణపథాతీతచరితా-

న్నరానూరీకర్తుం త్వమివ జనని త్వం విజయసే .. 17..

నిధానం ధర్మాణాం కిమపి చ విధానం నవముదాం

ప్రధానం తీర్థానామమలపరిధానం త్రిజగతః .

సమాధానం బుద్ధేరథ ఖలు తిరోధానమధియాం

శ్రియామాధానం నః పరిహరతు తాపం తవ వపుః .. 18..

పురో ధావం ధావం ద్రవిణమదిరాఘూర్ణితదృశాం

మహీపానాం నానాతరుణతరఖేదస్య నియతం .

మమైవాయం మంతుః స్వహితశతహంతుర్జడధియో

వియోగస్తే మాతర్యదిహ కరుణాతః క్షణమపి .. 19..

మరుల్లీలాలోలల్లహరిలులితాంభోజపటలీ-

స్ఖలత్పాంసువ్రాతచ్ఛురణవిసరత్కౌంకుమరుచి .

సురస్త్రీవక్షోజక్షరదగరుజంబాలజటిలం

జలం తే జంబాలం మమ జననజాలం జరయతు .. 20..

సముత్పత్తిః పద్మారమణపదపద్మామలనఖా-

న్నివాసః కందర్పప్రతిభటజటాజూటభవనే .

అథాఽయం వ్యాసంగో హతపతితనిస్తారణవిధౌ

న కస్మాదుత్కర్షస్తవ జనని జాగర్తు జగతి .. 21..

నగేభ్యో యాంతీనాం కథయ తటినీనాం కతమయా

పురాణాం సంహర్తుః సురధుని కపర్దోఽధిరురుహే .

కయా వా శ్రీభర్తుః పదకమలమక్షాలి సలిలై-

స్తులాలేశో యస్యాం తవ జనని దీయేత కవిభిః .. 22..

విధత్తాం నిఃశంకం నిరవధి సమాధిం విధిరహో

సుఖం శేషే శేతాం హరిరవిరతం నృత్యతు హరః .

కృతం ప్రాయశ్చిత్తైరలమథ తపోదానయజనైః

సవిత్రీ కామానాం యది జగతి జాగర్తి జననీ .. 23..

అనాథః స్నేహార్ద్రాం విగలితగతిః పుణ్యగతిదాం

పతన్ విశ్వోద్ధర్త్రీం గదవిగలితః సిద్ధభిషజం .

సుధాసింధుం తృష్ణాకులితహృదయో మాతరమయం

శిశుః సంప్రాప్తస్త్వామహమిహ విదధ్యాః సముచితం .. 24..

విలీనో వై వైవస్వతనగరకోలాహలభరో

గతా దూతా దూరం క్వచిదపి పరేతాన్ మృగయితుం .

విమానానాం వ్రాతో విదలయతి వీథిర్దివిషదాం

కథా తే కల్యాణీ యదవధి మహీమండలమగాత్ .. 25..

స్ఫురత్కామక్రోధప్రబలతరసంజాతజటిల-

జ్వరజ్వాలాజాలజ్వలితవపుషాం నః ప్రతిదినం .

హరంతాం సంతాపం కమపి మరుదుల్లాసలహరి-

చ్ఛటాచంచత్పాథఃకణసరణయో దివ్యసరితః .. 26..

ఇదం హి బ్రహ్మాండం సకలభువనాభోగభవనం

తరంగైర్యస్యాంతర్లుఠతి పరితస్తిందుకమివ .

స ఏష శ్రీకంఠప్రవితతజటాజూటజటిలో

జలానాం సంఘాతస్తవ జనని తాపం హరతు నః .. 27..

త్రపంతే తీర్థాని త్వరితమిహ యస్యోద్ధృతివిధౌ

కరం కర్ణే కుర్వంత్యపి కిల కపాలిప్రభృతయః .

ఇమం త్వం మామంబ త్వమియమనుకంపార్ద్రహృదయే

పునానా సర్వేషామఘమథనదర్పం దలయసి .. 28..

శ్వపాకానాం వ్రాతైరమితవిచికిత్సావిచలితై-

ర్విముక్తానామేకం కిల సదనమేనఃపరిషదాం .

అహో మాముద్ధర్తుం జనని ఘటయంత్యాః పరికరం

తవ శ్లాఘాం కర్తుం కథమివ సమర్థో నరపశుః .. 29..

న కోఽప్యేతావంతం ఖలు సమయమారభ్య మిలితో

యదుద్ధారాదారాద్భవతి జగతో విస్మయభరః .

ఇతీమామీహాం తే మనసి చిరకాలం స్థితవతీ-

మయం సంప్రాప్తోఽహం సఫలయితుమంబ ప్రణయ నః .. 30..

శ్వవృత్తివ్యాసంగో నియతమథ మిథ్యాప్రలపనం

కుతర్కేశ్వభ్యాసః సతతపరపైశున్యమననం .

అపి శ్రావం శ్రావం మమ తు పునరేవం గుణగణా-

నృతే త్వత్కో నామ క్షణమపి నిరీక్షేత వదనం .. 31..

విశాలాభ్యామాభ్యాం కిమిహ నయనాభ్యాం ఖలు ఫలం

న యాభ్యామాలీఢా పరమరమణీయా తవ తనుః .

అయం హి న్యక్కారో జనని మనుజస్య శ్రవణయో-

ర్యయోర్నాంతర్యాతస్తవ లహరిలీలాకలకలః .. 32..

విమానైః స్వచ్ఛందం సురపురమయంతే సుకృతినః

పతంతి ద్రాక్ పాపా జనని నరకాంతః పరవశాః .

విభాగోఽయం తస్మిన్నశుభమయమూర్తౌ జనపదే

న యత్ర త్వం లీలాదలితమనుజాశేషకలుషా .. 33..

అపి ఘ్నంతో విప్రానవిరతముశంతో గురుసతీః

పిబంతో మైరేయం పునరపి హరంతశ్చ కనకం .

విహాయ త్వయ్యంతే తనుమతనుదానాధ్వరజుషా-

ముపర్యంబ క్రీడంత్యఖిలసురసంభావితపదాః .. 34..

అలభ్యం సౌరభ్యం హరతి సతతం యః సుమనసాం

క్షణాదేవ ప్రాణానపి విరహశస్త్రక్షతహృదాం .

త్వదీయానాం లీలాచలితలహరీణాం వ్యతికరాత్

పునీతే సోఽపి ద్రాగహహ పవమానస్త్రిభువనం .. 35..

కియంతః సంత్యేకే నియతమిహలోకార్థఘటకాః

పరే పూతాత్మానః కతి చ పరలోకప్రణయినః .

సుఖం శేతే మాతస్తవ ఖలు కృపాతః పునరయం

జగన్నాథః శశ్వత్త్వయి నిహితలోకద్వయభరః .. 36..

భవత్యా హి వ్రాత్యాధమపతితపాఖండపరిషత్

పరిత్రాణస్నేహః శ్లథయితుమశక్యః ఖలు యథా .

మమాప్యేవం ప్రేమా దురితనివహేష్వంబ జగతి

స్వభావోఽయం సర్వైరపి ఖలు యతో దుష్పరిహరః .. 37..

ప్రదోషాంతర్నృత్యత్పురమథనలీలోద్ధృతజటా-

తటాభోగప్రేంఖల్లహరిభుజసంతానవిధుతిః .

బిలక్రోడక్రీడజ్జలడమరుటంకారసుభగ-

స్తిరోధత్తాం తాపం త్రిదశతటినీతాండవవిధిః .. 38..

సదైవ త్వయ్యేవార్పితకుశలచింతాభరమిమం

యది త్వం మామంబ త్యజసి సమయేఽస్మిన్సువిషమే .

తదా విశ్వాసోఽయం త్రిభువనతలాదస్తమయతే

నిరాధారా చేయం భవతి ఖలు నిర్వ్యాజకరుణా .. 39..

కపర్దాదుల్లస్య ప్రణయమిలదర్ధాంగయువతేః

పురారేః ప్రేంఖంత్యో మృదులతరసీమంతసరణౌ .

భవాన్యా సాపత్న్యస్ఫురితనయనం కోమలరుచా

కరేణాక్షిప్తాస్తే జనని విజయంతాం లహరయః .. 40..

ప్రపద్యంతే లోకాః కతి న భవతీమత్రభవతీ-

ముపాధిస్తత్రాయం స్ఫురతి యదభీష్టం వితరసి .

శపే తుభ్యం మాతర్మమ తు పునరాత్మా సురధుని

స్వభావాదేవ త్వయ్యమితమనురాగం విధృతవాన్ .. 41..

లలాటే యా లోకైరిహ ఖలు సలీలం తిలకితా

తమో హంతుం ధత్తే తరుణతరమార్తండతులనాం .

విలుంపంతీ సద్యో విధిలిఖితదుర్వర్ణసరణిం

త్వదీయా సా మృత్స్నా మమ హరతు కృత్స్నామపి శుచం .. 42..

నరాన్ మూఢాంస్తత్తజ్జనపదసమాసక్తమనసో

హసంతః సోల్లాసం వికచకుసుమవ్రాతమిషతః .

పునానాః సౌరభ్యైః సతతమలినో నిత్యమలినాన్

సఖాయో నః సంతు త్రిదశతటినీతీరతరవః .. 43..

యజంత్యేకే దేవాన్ కఠినతరసేవాంస్తదపరే

వితానవ్యాసక్తా యమనియమరక్తాః కతిపయే .

అహం తు త్వన్నామస్మరణకృతకామస్త్రిపథగే

జగజ్జాలం జానే జనని తృణజాలేన సదృశం .. 44..

అవిశ్రాంతం జన్మావధి సుకృతజన్మార్జనకృతాం

సతాం శ్రేయః కర్తుం కతి న కృతినః సంతి విబుధాః .

నిరస్తాలంబానామకృతసుకృతానాం తు భవతీం

వినాఽముష్మింల్లోకే న పరమవలోకే హితకరం .. 45..

పయః పీత్వా మాతస్తవ సపది యాతః సహచరై-

ర్విమూఢైః సంరంతుం క్వచిదపి న విశ్రాంతిమగమం .

ఇదానీముత్సంగే మృదుపవనసంచారశిశిరే

చిరాదున్నిద్రం మాం సదయహృదయే శాయయ చిరం .. 46..

బధాన ద్రాగేవ ద్రఢిమరమణీయం పరికరం

కిరీటే బాలేందుం నియమయ పునః పన్నగగణైః .

న కుర్యాస్త్వం హేలామితరజనసాధారణతయా

జగన్నాథస్యాయం సురధుని సముద్ధారసమయః .. 47..

శరచ్చంద్రశ్వేతాం శశిశకలశ్వేతాలముకుటాం

కరైః కుంభాంభోజే వరభయనిరాసౌ చ దధతీం .

సుధాధారాకారాభరణవసనాం శుభ్రమకర-

స్థితాం త్వాం యే ధ్యాయంత్యుదయతి న తేషాం పరిభవః .. 48..

దరస్మితసముల్లసద్వదనకాంతిపూరామృతై-

ర్భవజ్వలనభర్జితాననిశమూర్జయంతీ నరాన్ .

చిదేకమయచంద్రికాచయచమత్కృతిం తన్వతీ

తనోతు మమ శంతనోః సపది శంతనోరంగనా .. 49..

మంత్రైర్మీలితమౌషధైర్ముకులితం త్రస్తం సురాణాం గణైః

స్రస్తం సాంద్రసుధారసైర్విదలితం గారుత్మతైర్గ్రావభిః .

వీచిక్షాలితకాలియాహితపదే స్వర్లోకకల్లోలిని

త్వం తాపం తిరయాధునా మమ భవజ్వాలావలీఢాత్మనః .. 50..

ద్యూతే నాగేంద్రకృత్తిప్రమథగణమణిశ్రేణినందీందుముఖ్యం

సర్వస్వం హారయిత్వా స్వమథ పురభిది ద్రాక్ పణీకర్తుకామే .

సాకూతం హైమవత్యా మృదులహసితయా వీక్షితాయాస్తవాంబ

వ్యాలోలోల్లాసివల్గల్లహరినటఘటీతాండవం నః పునాతు .. 51..

విభూషితానంగరిపూత్తమాంగా సద్యఃకృతానేకజనార్తిభంగా .

మనోహరోత్తుంగచలత్తరంగా గంగా మమాంగాన్యమలీకరోతు .. 52..

ఇమాం పీయూషలహరీం జగన్నాథేన నిర్మితాం .

యః పఠేత్తస్య సర్వత్ర జాయంతే సుఖసంపదః .. 53..

గంగారాత్రికా

జయ మాతర్గంగే జయ జయ మాతర్గంగే .

సచ్చిత్సుఖస్వరూపిణి జయ జయ భవభంగే .. ధుర్వపదం ..

భగవచ్చరణే యా సా శక్తిర్మోక్షప్రదా .

త్వద్రూపేణ నిఃసృతా శుభమంగలభద్రా .. 1..

సందర్శనేన నామ్నా మజ్జనతోఽపి తథా .

జ్ఞానం దదాసి మాతస్త్వేవం తవ గాథా .. 2..

శంకరశిరోవిభూషిణి జాహ్రవి భాగీరథి .

బ్రహ్మస్వరూపం ప్రాపయ యాచే దేహరథీ .. 3..

ఇతి శ్రీమత్ పరమహంసపరివ్రాజకాచార్య సద్గురు భగవాన్

శ్రీధరస్వామీమహారాజవిరచితా గంగారాత్రికా సంపూర్ణా .

వరదపురం సంవత్సరః - 1972

గంగామృతస్తోత్రం

శ్రీగణేశాయ నమః .

శ్రీరామచంద్రశర్మబాలాజీవిరచితం

గుంజన్మమిలిందపుంజవిలసత్కుంభద్వయాంభోరుహ

     ద్వంద్వస్యందిమరందబిందునివహం భాలే విశాలే ముదా .

శుక్త్యై వామలయాంతయేందుకలయా బిభ్రద్భవానీభవ

     స్తన్వన్ భవ్యమయం భయం వికలయత్రవ్యాదభవ్యాత్స నః .. 1..

లోలత్కల్లోలమాలాకులబకులకులోల్లాసికూలానుకూలో

     న్మీలన్మల్లీమతల్లీవిహితవిహృతయశ్చంచరీకా జయంతి .

స్వచ్ఛాయాచ్ఛాదితాంగానమరపురమహోమత్తమాతంగవారా .

     నారాదారోహయంతః కిముత శివజలైగౌరిగంగే ! స్తుతిస్తే .. 2..

ఆలోకాలోకలోకా విషయవిషధరాసారసంసారగర్త

     ప్రావర్తప్రోజ్ఝితాశాస్త్వదుణనుతివశాదంబ! సాలంబ్యమీయుః .

దృష్ట్వైతత్స్పష్టమంకే దధదపి గిరిజాం కేవలం కామగంజాం

     మాతర్గంగే ! వరాంగే ! వహతి పశుపతిస్త్వాం పరానందకందాం .. 3..

భర్గః స్వర్గాపవర్గశ్రయణచణగుణాంత్వాం దధానో విరక్తః

     కృత్తిక్ష్వేడాహితుండాన్యవహదవహితః కామదాహే చ దేహే .

గేహే మాహేశ్వరం హే సురధుని ! చరితం వీక్ష్య విష్ణుం  విలాసైః

     పైత్రే జైత్రే వసంతీ వశయతి కమలా మ్లానమానేతిజానే .. 4..

ప్రాతమర్తర్యదాంతర్భవతి కతిపయం కాలమాలోలచేతా

     భూతాధీశాదిలేఖావలిమిలితకలే త్వజ్జలే జంతురేషః .

కః శేషః కో విశేషః సురవరవిభవే కా సుధాంశోశ్చ శోభా

     రంభాసంభోగభాజాం ముహురితి వదతాం సేవ్యతామేతి కామం .. 5..

చిత్రం యచ్ఛంభుశైలాయితశిరసి సముద్ధర్తుమంధాన్ ధరాయాం

     ధారాం వారామపారాం ధరశిఖరనిభామాదధౌ బ్రహ్మలోకాత్ .

తత్కాలేఽకాలకోలాహలబహలమిలన్మోహమాలిన్యలీనైః

     శాలీనైదేవి ! దైవైరనుదితముదితం జ్ఞానమజ్ఞస్య సద్యః .. 6..

బ్రహ్మాండస్తంభదండః కిము యమనియమే కాలదండః ప్రచండః

     కిమ్వా భూమంథదండః కిము పతతి దివః స్వధునీవారిదండః .

కిమ్వాఽఽకాశః సుభాండః కిమిహ హిమగిరిః ప్రౌఢపిండః కిమిత్థం

     తరుత్ప్రేక్ష్యమాణా దివి భువి చ జనైర్జాహ్నవీ జన్యమవ్యాత్ .. 7..

కుప్యద్గౌరీకటాక్షారుణకిరణగణైర్భాతి యా శోణశోభా

     శంభూత్క్షిప్తేభకృత్తిప్రతిఫలితతలైర్యాఽతులా శ్యామలా చ .

కించోదంచచ్ఛరచ్చంద్రితకరనికరాకీర్ణముక్తాచ్ఛగుచ్ఛ

     చ్ఛాయాసచ్ఛాయచారుః స్వయమియమపరా రాతు వాణీస్త్రివేణీ .. 8..

మాతర్మాతంగసంగోచ్ఛలదమలజలస్నాతనారీస్తనాగ్ర

     స్రస్తశ్రీఖండసంగోద్ధృతధరవిహరదూరిపాటీరవృక్షే .

వక్ష్యే కిం బిందుభక్షే తవ ఫలమఖిలే క్షేమమత్రాకులేక్షోఽ

     హీశోఽధీశోఽపి నేశో భవతి హి గదితుం పారమంభోమహిమ్నః .. 9..

పాదాయోదప్రధారాకృతిరమితచితిర్యా పురాఽభూన్మురారేః

     ప్రాదుర్భూతా పురారేరపి శిరసి జటాజూటకూటేఽస్తి సైవ .

పాదాగ్రాదాశిఖాగ్రాదపి హరిహరయోరేకరూపైకరూప్యం

     జల్పంతీ జహుకన్యా జగతి విజయతే జీవజీవాతురేషా .. 10..

నిర్యాతాం త్వాం పదాగ్రాత్ సురధుని ! పరమాం చిత్కలాం వీక్ష్య జాతః

     శ్యామః శేతే రమేశః పరమధిజలధి ప్రాప్తుకామః పునర్యాం .

భగోం జాగర్తి లబ్ధా విధిరపి విదధే విశ్వమాశ్వాసయంతీ

     మాయాంతీమత్ర జానే జగతి జనిజుషామైహికాముష్మికాయ .. 11..

అపర్ణాఽఽకీర్ణోమపి ప్రబలఫణిఫూత్కారవికలోఽ

     నలోదీర్ణజ్వాలావలిమలినహాలాహలగలః .

స్థితః శైలప్రస్థే సురధుని ! తవైవైష మహిమా

     యతః సోఽయం స్థాణుః ఫలతి ఫలమానందమతులం .. 12..

సాధుసంగాదిదం గంగామృతం యేన ముఖే ధృతం .

తస్య గంగాపదే సంగాత్ మనోఽనంగారిభృద్ భవేత్ .. 13..

ఇతి శ్రీరజాప్యాన్వయోత్పత్రధురంధరోపనామకత్రీమదాత్మారామసూరిసూనునా

బాలాజీత్యపరప్రసిద్ధాభిధానేన రామచంద్రశర్మణా కాశాంథేన కృతం

గంగామృతస్తోత్రం సంపూర్ణం .

గంగామాహాత్మ్యం 1

కృతే సర్వత్ర తీర్థాని త్రేతాయాం పుష్కరం పరం .

ద్వాపరే తు కురుక్షేత్రం కలౌ గంగైవ కేవలం .. 17..

పూర్వజన్మాంతరాభ్యాసవాసనావశతో హరే .

గంగాతీరే నివాసః స్యాన్మదనుగ్రహతః పరాత్ .. 18..

ధ్యానం కృతే మోక్షహేతుస్త్రేతాయాం తచ్చ వై తపః .

ద్వాపరే తద్ద్వయం యజ్ఞాః కలౌ గంగైవ కేవలం .. 19..

యో దేహపతనాద్యావద్గంగాతీరం న ముంచతి .

స హి వేదాంతవిద్యోగీ బ్రహ్మచర్యవ్రతీ సదా .. 1.27.20..

కలౌ కలుషచిత్తానాం పరద్రవ్యరతాత్మనాం .

విధిహీనక్రియాణాం చ గతిర్గంగా వినా న హి .. 21..

ఇతి శ్రీస్కాదపురాణే కాశీఖండే పూర్వార్ద్ధే సప్తవింశాధ్యాయాంతర్గతం

         గంగామాహాత్మ్యస్తోత్రం సమాప్తం .

స్కందపురాణ . కాశీఖండ . పూర్వఖండ . అధ్యాయ 27/17-210..

గంగామంగలం

శ్రీగణేశాయ నమః .

హరిచరణచారిణీ శిశిరగిరిదారిణీ కలుషభరవారణతరంగా

     నియతకలనాదినీ విమలజలశాలినీ తారిణీ జయతి భువి గంగా .

నిత్యమిహ తాపసా ధర్మచితమానసాః స్నానవిధిలబ్ధనవదేహాః

     కృతబహులదుష్కృతా అపి కలుషవర్జితా దధతి ముదమాప్తసురగేహాః .. 1..

పూతతమసైకతే ధవలసికతావృతే యోగినో జపనియమమగ్నాః

     స్వనయననిమీలనా గతవిషయదర్శనా ధ్యేయసురసంస్మరణలగ్నాః .

బంధవినివృత్తయే హసితజలసంచయే ప్రతిదివసమత్ర సమవేతాః

     క్లేశశతమంజసా పుణ్యచితచేతసా వృణ్వతే సమ్మదముపేతాః .. 2..

వణిగుచితకర్మణా తరణిశతశోభనాసుమపకృతిమత్ర భువి ధత్త్

     మకరవరవాహనా జనపదహితైషణావ్యాకులా సుకృతమపి దత్తే .

ఐహికశుభాశమా పరమపదవాంఛయా యామిమాం శ్రయతి జనమాలా

     జయతి భయహారికా జహుమునిదారికా సా చిరం విజితకలికాలా .. 3..

త్రిభువనమిదం యయా ధన్యమనువృత్తయా లోకయుగకుశలశతసృష్టయా

     రోగగణనాశినీ పృష్టిపరివేశినీ దశహరా శాస్త్రవిధిదృష్టయా .

తీరతరుమజులా జలధిమభి చంచలా సేయమహిమంగలతరంగా

     గిరిశశిరసార్చితా సురమనుజపూజితా పావనీ జయతి భువి గంగా .. 4..

బ్రహ్మాండోదరభేదనాద్ భగవతః పాదాంగులీనాం నఖైః

     జాతో యో వివరస్తతోర్చనజలస్రోతోఽవహద్ వేగతః .

తస్మాచ్ఛంభుశిరస్తతో హిమగిరిం తస్మాదిదం భూతలం

     గంగాగత్య పునాతి సర్వభువనం శ్రీభక్తిభాగీరథీ .. 5..

ఇతి గంగామంగలం సంపూర్ణం .

గంగాప్రబంధః

శ్రీగణేశాయ నమః .

మధుమథనమూర్తివర ఇందుకరకాముఖం వహసి బహు వారి సుతరంగే .

హరిచరణనఖభిదురజగదండనిర్గతా బ్రహ్మజలపాత్రకృతసంగే .. 1..

నమో దేవి గంగే నమో దేవి గంగే హరనిఖిలమఘమలకనందే .. ధ్రువం ..

త్వమసి జనపావనీ చతురుదధిగామినీ సప్తర్షికులసుకృతసారే .

కనకగిరిలంగితే  సకలమునివందితే హరముకుటసితకుసుమమాలే .. 2..

సగరసుతసంగమే లసదమరసుందరీదూతికే దుష్కృతిదురాపే .

నిరయగతిబాధకే నిర్వాణసాధకే భక్తజనహృతసంతాపే . నమో0.. 3..

తీర్థవరకారిణీ పూర్వజోద్ధారిణీ హిమశైలపాషాణభేదే .

నాగరం ప్లావయసి పూరయసి సాగరం సంగతా వింధ్యగిరిపాదే .. నమో0.. 4..

శుభసలిలనిధౌతపులినవతి కుర్వతస్తవ నామనిర్మలాలాపం .

వందితా వీక్షితా చింతితావగాహితా మజ్జితా మమ హరసి పాపం .. నమో0.. 5..

ఇహ నిఖిలమునిగణైరిహ నిఖిలసురగణైరిహ నిఖిలవేదైరుదారే .

పీయసే జీయసే స్తూయసే జన్హుమునికన్యకే సంసారసారే .. నమో0.. 6..

గండూషమిహ మేఽఘశతమధిజయతు తవ కరనికరగంభీరతోయే .

పరలోకబంధురసి సుందరసింధురసి తటిని సురసదనసాధనోపాయే .. నమో0.. 7..

ఇతి రామలక్ష్మణకౌశికానుజ్ఞయా సురసరిత్ కృతనమస్కారం

భణంతమిహ సాదరం ధీరజయదేవకవిముత్తారయసి భవజలధిపారం .. నమో0.. 8..

ఇతి ధీరజయదేవకృతః గంగాప్రబంధః సంపూర్ణః .

గంగాపుష్పాంజలిః

శ్రీగణేశాయ నమః .

స్వయం శుక్లా శుక్లాభరణవసనా జహ్నుతనయే

     ద్యుతిం వాచాం దేవీ తవ న కలయాప్తుం ప్రభురభూత్ .

అతో రూపం లబ్ధుం  సుకవివదనాంభోజజనితై

     విర్ధత్తే వాగ్గుంఫైర్జనని ! పదపుష్పాంజలిమసౌ .. 1..

కదాచిత్కేనాపి క్వచిదపి సమానీత్తమమలం

     పిబంతః పానీయం తవ జనని ! మీనాసనగతే ! .

వహంతస్త్వాం గంగే! శిరసి కిల హాలాహలభుజో

     లభంతే తే లోకే శమనదమనాన్నాత్ర శమనం .. 2..

సదావృత్తాస్తుంగాన్ భువి వియతి ధారాగతిధరాన్

     తరంగాన్ గంగాయాః సుతరలతురంగాకృతిధరాన్ .

విచిత్రా వీక్ష్యైతే విషయగతయో వృత్తినివహా

     స్త్రపాధీనా పీనా అపి జహతి దీనాశ్చపలతాం .. 3..

కృపాసింధుః సింధుం కిముత భవతీమత్ర భవతీ

     ప్రపాం పీయూషస్య ప్రతిదినముమేశో వితనుతే .

అథో రూపం కృత్వా జగతి జనతాతారణపటుః

     స్వయం మాయోత్తీర్ణా సురనది ! సుధాధామశిరసః .. 4..

పురా ధృత్వా పాత్రే త్రిభువన-విధాతా విధిరభూ

     దితి జ్ఞాత్వా పాథః శిరసి పశునాథస్తవ దధౌ .

᳚దే జానే జ్ఞానాత్సురనది ! పురాణస్తు పురుషః

     శరత్పాథోనష్టా సుమతిరితి తథ్యం జనవచః .. 5..

అరిత్రం నో యస్యాం నహి గుణధరో నావికగణః

     పరం పారం నారం నయతి న పునర్యాతి నను యా .

అసారే సంసారే జలధివదపారే నిపతితాన్

     జనానుద్ధర్తుం సా తరిరియమపూర్వా విజయతే .. 6..

విశేషాచ్ఛేషస్తే గుణగణమశేషం నిగదితుం

     ప్రభుర్వక్తుం దోషాన్ సదసి బహురోషాన్ముహురహం .

బ్రువే మజ్జజ్జంతోర్జనని ! జయతి వ్యాలపటలీ

     విశాలీ కంఠే చ స్థితిరపి సదా భూతభువనే .. 7..

సమాయాతా కస్మాత్క్క చ జగతి యాతీయమధునా

     కథంకారం పారం తవ జనని ! జానంతి విబుధాః .

న తేషాం హానిః స్యాత్సురనది ! తవాపారవిదుషాం

     జనా మూఢాః కిం యే భువి శశవిషాణం న హి విదుః .. 8..

త్వదన్యే మన్యేఽహం దధతి విబుధాః సిద్ధినిచయం

     ప్రసన్నా భక్తేభ్యో నిజజపరతేభ్యోఽపి నిఖిలాః .

పిబంతం పానీయం తపనకరతప్తం తనుభృతం

     విధత్సే సిద్ధీశం సురనది ! గిరీశం చ కృపయా .. 9..

పూర్ణేందోర్దత్తభంగాఃసురపురలలనోద్వర్త్తనైశ్చాపి పింగాః

     శంభుం గంతుం తురంగా హరిపదగమనే వైనతేయో విహంగాః .

విత్తాశాదత్తచిత్తానుదరభృతిపరాంతీరగాన్భుక్తభోగాన్

     భుక్తేశానప్రసంగాజ్జగతి కలియుగాత్పాంతు గంగాతరంగాః .. 10..

ఇతి శ్రీమద్గురుణా విరచితః గంగాపుష్పాంజలిః సంపూర్ణః .

గంగాధ్యానం

శ్వేతచంపకవర్ణాభాం గంగాం పాపప్రణాశినీం .

కృష్ణవిగ్రహసంభూతాం కృష్ణతుల్యాం పరాం సతీం .. 1..

వహ్నిశుద్ధాంశుకాధానాం రత్నభూషణభూషితాం .

శరత్పూర్ణేందుశతకప్రభాజుష్టకలేవరాం .. 2..

ఈషద్ధాస్యప్రసన్నాస్యాం శశ్వత్సుస్థిరయౌవనాం .

నారాయణప్రియాం శాంతాం సత్సౌభాగ్యసమన్వితాం .. 3..

బిభ్రతీం కబరీభారం మాలతీమాల్యసంయుతాం .

సిందూరబిందులలితాం సార్ధం చందనబిందుభిః .. 4..

కస్తూరీపత్రకం గండే నానాచిత్రసమన్వితం .

పక్వబింబసమానైక చార్వోష్ఠపుటముత్తమం .. 5..

ముక్తాపంక్తిప్రభాజుష్టదంతపంక్తిమనోహరామ .

సుచారువక్త్రనయనాం సకటాక్షమనోరమాం .. 6..

స్థలపద్మాభాప్రజుష్టపాదపద్మయుగంధరాం .

రత్నాభరణసంయుక్తం కుకుమాక్తం సయావకం .. 7..

దేవేంద్రమౌలిమందారమకరందకణారుణం .

సురసిద్ధమునీంద్రాదిదత్తార్ధ్యైస్సయుతం సదా .. 8..

తపస్విమౌలినికరభ్రమరశ్రేణిసంయుతం .

ముక్తిప్రదం ముముక్షూణాం కామినాం స్వర్గభోగదం .. 9..

వరాం వరేణ్యాం వరదాం భక్తానుగ్రహకాతరాం .

శ్రీ విష్ణాఃపదదాత్రీ చ భజే విష్ణుపదీ సతీం .. 10..

ఇతి శ్రీ బ్రహ్మవైవర్తపురాణతో గంగాధ్యానం నామ ప్రథమోఽధ్యాయః .

హిందీ భావార్థ -

శ్వేత చంపా కే పుష్ప కే సమాన వర్ణవాలీ, సంపూర్ణ పాపోం కో నష్ట కరనే

వాలీ, భగవాన్ కృష్ణ (విష్ణు) కే శరీర సే సముత్పన్న, ఏవం ఉన్హీం కే

సమాన భక్తజనానందదాయినీ పరమ సతీ భగవతీ గంగా కా (ధ్యాన కరతా

హూఀ .) అగ్ని కే సమాన పరమ శుద్ధ రక్తవర్ణ కా వస్త్ర ధారణ కిఏ

హుఏ, రత్నజటిత ఆభూషణోం సే విభూషిత, శరత్పూర్ణిమా కే సో చంద్రమా

కీ కాంతియోం సే సుశోభిత శరీర వాలీ, మంద మంద ముస్కాన సే ప్రసన్న

ముఖవాలీ, సర్వదాస్థిర రహనేవాలీ యౌవనావస్థా సే సుశోభిత, పరమ

శాంతిమయీ, నారాయణ కీ ప్రియతమా, పరమ సౌభాగ్యశాలినీ (కా ధ్యాన కరతా

హూం .) మనోహర కేశోం కే భార కో ధారణ కరనే వాలీ, మాలతీ కే పుష్పోం

సే సుశోభిత, చందన బిందు కే సాథ-సాథ సుందర సిందూర కీ బిందీ సే

అలంకృత (గంగా కా ధ్యాన కరతా హూఀ.) కపోల స్థల మేం కస్తూరీ కే బనే

హుఏ పత్ర ఏవం వివిధ ప్రకార కే చిత్రోం సే సమలంకృత,పకే హుఏ మనోహర

బింబ కే ఫల కే సమాన నిమ్న హోంఠ వాలీ. (గంగా కా ధ్యాన కరతా హూఀ .)

మోతియోం కీ లడీ కే సమాన కాంతివాలే మనోహర దాంతోం కీ పంక్తియోం సే మన

కో హర లేనే వాలీ, సుందర ముఖ ఏవం కటాక్షమయ నేత్రోం వాలీ (గంగా కా

ధ్యాన కరతా హూఀ .) ఉనకే దోనోం చరణ-కమల స్థల-పద్మ (గులాబ)

కీ కాంతి కే సమాన మనోహారీ హైం; సుందర రత్నోం కే ఆభరణ సే అలంకృత

హైం; కుమకుమ ఏవం యావక కే రసోం సే సుశోభిత హైం .  దేవరాజ ఇంద్ర కే

శిర పర విరాజమాన మందార కే మకరంద కే కణోం సే ఉస మనోహర చరణ కీ

ఛవి అరుణ వర్ణ కీ హో రహీ హైం . సుర, సిద్ధ, మునిగణ ఏవం మహర్షియోం

సే దియే గఏ అర్ఘ్య-జల సే వే పాద సర్వదా సుశోభిత హోతే రహతే హైం .

తపస్వియోం కే శిర సమూహ రూప భ్రమరోం కీ పంక్తియాఀ ఉస చరణ కమల

కీ చారోం ఓర చక్కర లగాతీ రహతీ హైం . వహ మనోహర చరణ ముముక్షుఓం

కో ముక్తి ప్రదాన కరనే వాలా హై, ఏవం కామియోం కో స్వర్గ తథా భోగ ప్రదాన

కరనే వాలా హై . పరమ పూజనీయ, వరదాన ప్రదాన కరనే వాలీ, భక్తోం

కే ఊపర అనుగ్రహ కరనే కే లిఏ సర్వథా తత్పర రహనే వాలీ శ్రీ విష్ణు కే

చరణోం మేం శరణ దేనే వాలీ విష్ణు-పాద-సంభూత ఉస పరమ సతీ గంగా

కీ మైం భక్తి కరతా హూఀ .. 1-10..

శ్రీ బ్రహ్మవైవర్త పురాణ సే గంగాధ్యాన నామక ప్రథమ అధ్యాయ సమాప్త .

గంగాద్విపదీ

జయ జయ త్వం సదానందదే జహ్నుజే

శశిశేఖరశిరసి సితకుసుమమాలే .

భక్తజనహృదయాలవాలగత-

హరిచరణసురతరుప్రసవభూతే రసాలే .. 1..

శిఖరితనయానయనరోలంబచుంబితే

దూరీకృతదురితదౌర్గంధ్యజాలే .

జీవనం భక్తజనజీవనం తవ

యతస్త్రివిధతాపాపహం ముక్తిశాలే .. 2..

ఇతి శ్రీగోకులోత్సవాత్మజగోస్వామిశ్రీజీవనజీమహారాజకృతా

     గంగాద్విపదీ సంపూర్ణా .

గంగాతిలకః

లలాటే కేశవం విద్యాద్ నారాయణం యథోదరే .

హృదయే మాధవం విద్యాద్ గోవిందముత్తుపకే .. 1..

విష్ణుశ్చ దక్షిణే కుక్షౌ తద్భుజే మధుసూదనం .

త్రివిక్రమం కర్ణదేశే వామే కుక్షౌ చ వామనం .. 2..

శ్రీధరం చ కరే. వామే హృషికేశం తు కర్ణికా .

పద్మనాభస్తతః పృష్టే కకుద్ దామోదరం స్మరేత్ .. 3..

ఇతి గంగాతిలకః సపూర్ణః .

గంగాతరంగః

.. శ్రీగణేశాయ నమః ..

శ్రీగంగే భాగీరథి శ్రీశంకరమౌలిమాలతీమాలే .

కరుణావతి జయ భగవతి పాహి కృపాపాంగతః శివసదయే .. 1..

పంక్తావుపవిష్టానాం సర్వేషాం తర్పణం సమం న్యాయ్యం .

మమ తు శ్రోత్రం తృప్తం గంగే ! రీతిః కథం త్వదీయేయం .. 2..

సర్వేంద్రియసౌహిత్యం యథా భవిష్యతి తథా లఘు విధేయం .

అద్యావధి యజ్జాతం జాతం గంగే ! త్వయా దయా కార్యా .. 3..

దయనీయోఽయం గంగే సర్వైధర్మాదిభిః పరిత్యక్తః .

యామి శరణం కమధునా త్వయా వినా వ్రాత్యరాజోఽహం .. 4..

పూర్వం సముద్ధృతః కతి సంప్రత్యుద్ధర్తుమనలసాసి త్వం .

అగ్రే సముద్ధరిష్యసి తన్మధ్యే మాదృశో నైవ .. 5..

పూర్వం న చైవ మాదృఙ్ నోచేదానీం పురః కుతో భవితా .

ఇతి సంఖ్యాతుమనలసా భవ భవతి జాహ్నవి త్రిపథగే త్వం .. 6..

పాపిన ఉద్ధర్తు త్వం బద్ధపరికరా శ్రుతం మనీషిభ్యః .

ఇత్థం సతి మద్విషయే గంగే కేయం ప్రమీలా త్వం .. 7..

ప్రాక్కర్మ పచేలిమతామాప్తమిదానీంతనే జనుషి .

ఇతి విదితమహో గంగే ప్రోత్కా యత్సేవనాయ ధిషణేయం .. 8..

తవ భవతు నమస్కారో మద్విషయే దేవి ! భో నమస్తుభ్యం .

కరుణావతి జయ గంగే పాహి కృపాపాంగదృష్టిపాతైః .. 9..

కతిచిద్ బ్రువంతి విందుం నితంబమాత్రం చ జానుదఘ్నం చ .

కేచిద్ గుల్ఫద్వయసంభవసింధుం దేవతాంతరాశ్రయణాత్ .. 10..

తవ సంశ్రయాద్ధి గంగే భవసింధోరస్తితాం న మన్యేఽహం .

అథవా మన్యే భ్రమం ఖేనగరః శశవిషాణమంశుజలం .. 11..

శరదాం పంచసహస్రీ తవస్థితేర్మానమితి విదామాజ్ఞా .

గంగే యదవధి విదితా తదవధి మాం పీడ్యత్యధీరత్వం .. 12..

యస్మిన్కస్మిన్ హి భవే తిర్యశ్చిత్వం సముద్ధరిష్యసి మాం .

ఇతి సత్యమథాప్యస్మిఀశ్చరమభవే పాసి చేచ్చమత్కారః .. 13..

వీచీపతితం సర్వా నద్యః సంతారయంతి కిం చిత్రం .

త్వమవీచీపతితమపి హి గంగే సంతారయస్యహో చిత్రం .. 14..

వంశానుత్పాదయసి త్వం వర్ద్ధయసే తథైవ జీవయసి .

రక్షసి విస్తారయసి స్వస్మిన్పతితం హి తారయసి .. 15..

సద్వంశభవే వంశోద్ధారిణి గంగే నమస్కరోమి త్వాం .

వంశ్యమపి దీనం ద్విజం కిం త్వం నాద్యాపి తారయసి .. 16..

నో తారయసి హి మాం చేన్మా తారయ దేవి భోః స్వతంత్రా త్వం .

మజ్జయసి తర్హి మజ్జయ గంగే స్వస్మిన్సుగండశైలమివ .. 17..

మా మాస్తు మదుద్ధారో నైవ త్వామర్థయే కదాచిదపి .

క్షుద్రం యాదోజాతం విధాయ మాం స్థాపయాశు నిజజఠరే .. 18..

యద్యపి యాదః క్షుద్రం చరతి మహచ్చేత్తథాపి మదనుమతిః .

కిం తవ గతమత్ర పరం మజ్జయ నామాశు మా విధేహి చిరం .. 19..

భవసింధౌ మజ్జాయా విభ్యతి తాభ్యః సువిద్వాంసః .

నాహం విభేమి మాతర్భవసింధౌ త్వయి మమాస్తు మజ్జైవః .. 20..

లక్ష్మీనాథం త్యక్త్వా మత్వా శ్లాఘ్యం కపర్దిసంబంధం .

గంగే భూమౌ విచరస్యతః కపర్ద్యస్మి దృగ్విషయః .. 21..

గోమూర్త్యశ్వత్థాదీనితరత్ర త్వం కురుష్వ మా మాంభోః .

కృమిమశకవేతసాదీన్ ప్రవిధాయ స్థాపయాశు నిజజఠరే .. 22..

సగరానుద్ధర్తుమనా భూరంధ్రప్లావనం కృతవతీ త్వం .

సగరోఽస్మి బహులరంధ్రః ప్లావయసి న మాం సురాపగే కిమితి .. 23..

సురసంగాత్సురధునితా ప్రాప్తా యాతా తథాపి నోక్షరతా .

భూసురసంగాదధికైకాక్షరతాప్తిః కథం న సా వ్రియతే .. 24..

త్వన్మజ్జనమేవ పరం శ్లాఘ్యం మాన్యం శ్రుతేర్వచోఽస్మాకం .

నాన్యత్రామరముక్తావలినీరాజితపదం పదం శాక్రం .. 25..

అచ్యుతపదచ్యుతాపి హి దాతుం నైనం పదం స్వతంత్రా త్వం .

కాఽన్యేదృశీ ద్వితీయా స్వపదభ్రష్టా సతీ తదర్పయితుం .. 26..

దోషత్రయాపనుత్యై త్రివిధా మర్త్యాస్త్వయి ప్రమజ్జంతి .

ద్విచతుర్దశదోషాఢ్యాంస్తాంస్త్వం కురుషే కథం త్వేతత్ .. 27..

కశ్చిత్కంచిచ్ఛ్రయతేత్యాధిక్యం లబ్ధుమితి జనస్థిత్యాం .

భూతం చతుర్విధం త్వం త్రివిధం కురుషే కథం గంగే ! .. 28..

అంబ ! త్వద్దర్శనతో ముక్తిర్న స్నానజం ఫలం జానే .

ఇతి యద్వదతి విపశ్చిత్తదలీకః స్నానతస్త్రిమూర్తిత్వం .. 29..

త్రిగుణాంశం పంకమార్ష్టిం కర్తుం మర్త్యాస్త్వయి ప్రమజ్జంతి .

తానవిశేషేణ త్వం కరోషి నిజలీలయా త్రిగుణమూర్తీన్ .. 30..

గంగే నశ్యతి జననం త్వన్మజ్జనతో వదంతి తదలీకం .

జంతునివహో నిమజ్జఀస్త్వయి భవతి హి శంకరో విధిర్విష్ణుః .. 31..

స్వర్గాదధః పతంతీ స్వోర్ధ్వం గంగే నిమజ్జతో నయసి .

సోఢ్వాఽపి విపద్గణమథ సంతః పరకార్యసాధనే వ్యగ్రాః .. 32..

గంగాప్రార్థనాతరంగో గంగాచరణే సమర్పితః శిశునా .

సగుణో విగుణో వా స్తాం శ్రావ్యం కలభాషణం హి శిశోః .. 33..

ఇతి శ్రీమదార్యాచార్యమయూరపండితానుజసూనబాలకవిరచితో

గంగార్థనాతరంగః శివాయ భూయాత్ ..