Sacred Stotras & Deities

శ్రీ నృసింహసరస్వతీ స్తోత్రం 1

కోట్యర్కభం కోటిసుచంద్రశాంతం
విశ్వాశ్రయం దేవగణార్చితాంఘ్రిం |
భక్తప్రియం త్వాత్రిసుతం వరేణ్యం
వందే నృసింహేశ్వర పాహి మాం త్వం || 1 ||
మాయాతమోఽర్కం విగుణం గుణాఢ్యం
శ్రీవల్లభం స్వీకృతభిక్షువేషం |
సద్భక్తసేవ్యం వరదం వరిష్ఠం
వందే నృసింహేశ్వర పాహి మాం త్వం || 2 ||
కామాదిషణ్మత్తగజాంకుశం త్వా-
-మానందకందం పరతత్త్వరూపం |
సద్ధర్మగుప్త్యై విధృతావతారం
వందే నృసింహేశ్వర పాహి మాం త్వం || 3 ||
సూర్యేందుగుం సజ్జనకామధేనుం
మృషోద్యపంచాత్మకవిశ్వమస్మాత్ |
ఉదేతి యస్మిన్రమతేఽస్తమేతి
వందే నృసింహేశ్వర పాహి మాం త్వం || 4 ||
రక్తాబ్జపత్రాయతకాంతనేత్రం
సద్దండకుండీపరిహాపితాఘం |
శ్రితస్మితజ్యోత్స్నముఖేందుశోభం
వందే నృసింహేశ్వర పాహి మాం త్వం || 5 ||
నిత్యం త్రయీమృగ్యపదాబ్జధూళిం
నినాదసద్బిందుకళాస్వరూపం |
త్రితాపతప్తాశ్రితకల్పవృక్షం
వందే నృసింహేశ్వర పాహి మాం త్వం || 6 ||
దైన్యాదిభీకష్టదవాగ్నిమీడ్యం
యోగాష్టకజ్ఞానసమర్పణోత్కం |
కృష్ణానదీపంచసరిద్యుతిస్థం
వందే నృసింహేశ్వర పాహి మాం త్వం || 7 ||
అనాదిమధ్యాంతమనంతశక్తి-
-మతర్క్యభావం పరమాత్మసంజ్ఞం |
వ్యతీతవాగ్దృక్పథమద్వితీయం
వందే నృసింహేశ్వర పాహి మాం త్వం || 8 ||
స్తోత్రే క్వ తే మేఽస్త్యురుగాయ శక్తి-
-శ్చతుర్ముఖో వై విముఖోఽత్ర జాతః |
స్తువన్ ద్విజిహ్వోభవదీరయన్ త్వాం
వందే నృసింహేశ్వర పాహి మాం త్వం || 9 ||
ఇతి శ్రీవాసుదేవానందసరస్వతీవిరచితం శ్రీ నృసింహసరస్వతీ స్తోత్రం |

 శ్రీ నృసింహసరస్వతీ స్తోత్రం 2

విజయ తేఽజ యతే జయతే యతేరిహ తమో హతమోహతమో నమః |
హృదికదాయ పదాయ సదా యదా తదుదయో న దయో న వియోనయః || 1 ||
ఉదయతే నయతే యతేర్యదా మనసి కామనికామగతిస్తదా |
పదుదయో హృదయోకసి తే సితే భవతి యోఽవతి యోగివరావరాన్ || 2 ||
భవతి భావభవోఽవభవో యదా భవతి కామానికామహతిస్తదా |
భవతి మానవ మానవదుత్తమే భవతిరోధిరతో విరతోత్తమే || 3 ||
తవ సతాం వసతాం మనసాఽనసా ప్రపదయోః పదయోరజసాంజసా |
సుసహితః సహితస్తవ తావతా యదవతారవతా జనతావితా || 4 ||
కృతఫలం తు విహాయ విహాయసా సమమజం భజతామజ తామసాత్ |
మిలతి తారకమత్ర కమత్రసత్పదరజో భ్రమహారిమహారిసత్ || 5 ||
తదజరామరకోశవిలక్షణం సదజధీగుణవేత్తృకలక్షణం |
భువనహేత్వఘహత్రిపురాదికం తవ న జాతు పదం కుపురాధికం || 6 ||
వివిధ భేద పరం సమ దృశ్యతే త్రివిధవేదపరం కమదృశ్య తే |
పదమిదం సదు చిద్ఘనముద్ధియా సదనిదం ప్రజహాత్యఘనుద్ధియా || 7 ||
అజ నమో జనమోహనమోహనః ప్రియ నియోజయ తేనయతేన తే |
య ఇహ వేద నివేశ నివేదవేత్యజపదం జపదం తపదం పదం || 8 ||
ఇతి శ్రీవాసుదేవానందసరస్వతీవిరచితం శ్రీ నృసింహసరస్వతీ స్తోత్రం |

గజేంద్రమోక్షః (శ్రీమద్భాగవతం) 3

శ్రీశుక ఉవాచ –
తదా దేవర్షిగంధర్వా బ్రహ్మేశానపురోగమాః |
ముముచుః కుసుమాసారం శంసంతః కర్మ తద్ధరేః || 1 ||
నేదుర్దుందుభయో దివ్యా గంధర్వా ననృతుర్జగుః |
ఋషయశ్చారణాః సిద్ధాస్తుష్టువుః పురుషోత్తమం || 2 ||
యోఽసౌ గ్రాహః స వై సద్యః పరమాశ్చర్యరూపధృక్ |
ముక్తో దేవలశాపేన హూహూగంధర్వసత్తమః || 3 ||
ప్రణంయ శిరసాధీశముత్తమశ్లోకమవ్యయం |
అగాయత యశోధామ కీర్తన్యగుణసత్కథం || 4 ||
సోఽనుకంపిత ఈశేన పరిక్రంయ ప్రణంయ తం |
లోకస్య పశ్యతో లోకం స్వమాగాన్ముక్తకిల్బిషః || 5 ||
గజేంద్రో భగవత్స్పర్శాద్విముక్తోఽజ్ఞానబంధనాత్ |
ప్రాప్తో భగవతో రూపం పీతవాసాశ్చతుర్భుజః || 6 ||
స వై పూర్వమభూద్రాజా పాండ్యో ద్రవిడసత్తమః |
ఇంద్రద్యుంన ఇతి ఖ్యాతో విష్ణువ్రతపరాయణః || 7 ||
స ఏకదాఽఽరాధనకాల ఆత్మవాన్
గృహీతమౌనవ్రతమీశ్వరం హరిం |
జటాధరస్తాపస ఆప్లుతోఽచ్యుత-
-స్తమర్చయామాస కులాచలాశ్రమః || 8 ||
యదృచ్ఛయా తత్ర మహాయశా మునిః
సమాగమచ్ఛిష్యగణైః పరిశ్రితః |
తం వీక్ష్య తూష్ణీమకృతార్హణాదికం
రహస్యుపాసీనమృషిశ్చుకోప హ || 9 ||
తస్మా ఇమం శాపమదాదసాధు-
-రయం దురాత్మాఽకృతబుద్ధిరత్ర |
విప్రావమంతా విశతాం తమిస్రం
యథా గజః స్తబ్ధమతిః స ఏవ || 10 ||
శ్రీశుక ఉవాచ –
ఏవం శప్త్వా గతోఽగస్త్యో భగవాన్ నృప సానుగః |
ఇంద్రద్యుంనోఽపి రాజర్షిర్దిష్టం తదుపధారయన్ || 11 ||
ఆపన్నః కౌంజరీం యోనిమాత్మస్మృతివినాశినీం |
హర్యర్చనానుభావేన యద్గజత్వేఽప్యనుస్మృతిః || 12 ||
ఏవం విమోక్ష్య గజయూథపమబ్జనాభ-
-స్తేనాపి పారిషదతాం గమితేన యుక్తః |
గంధర్వసిద్ధవిబుధైరనుగీయమాన
కర్మాఽద్భుతం స్వభువనం గరుడాసనోఽగాత్ || 13 ||
ఏవం మహారాజ తవేరితో మయా
కృష్ణానుభావో గజరాజమోక్షణం |
స్వర్గ్యం యశస్యం కలికల్మషాపహం
దుఃస్వప్ననాశం కురువర్య శృణ్వతాం || 14 ||
అథానుకీర్తయన్త్యేతచ్ఛ్రేయస్కామా ద్విజాతయః |
శుచయః ప్రాతరుత్థాయ దుఃస్వప్నాద్యుపశాంతయే || 15 ||
ఇదమాహ హరిః ప్రీతో గజేంద్రం కురుసత్తమ |
శృణ్వతాం సర్వభూతానాం సర్వభూతమయో విభుః || 16 ||
శ్రీభగవానువాచ –
యే మాం త్వాం చ సరశ్చేదం గిరికందరకాననం |
వేత్ర కీచక వేణూనాం గుల్మాని సురపాదపాన్ || 17 ||
శృంగాణీమాని ధిష్ణ్యాని బ్రహ్మణో మే శివస్య చ |
క్షీరోదం మే ప్రియం ధామ శ్వేతద్వీపం చ భాస్వరం || 18 ||
శ్రీవత్సం కౌస్తుభం మాలాం గదాం కౌమోదకీం మమ |
సుదర్శనం పాంచజన్యం సుపర్ణం పతగేశ్వరం || 19 ||
శేషం చ మత్కలాం సూక్ష్మాం శ్రియం దేవీం మదాశ్రయాం |
బ్రహ్మాణం నారదమృషిం ధృవం ప్రహ్లాదమేవ చ || 20 ||
మత్స్యకూర్మవరాహాద్యైరవతారైః కృతాని మే |
కర్మాణ్యనంతపుణ్యాని సూర్యం సోమం హుతాశనం || 21 ||
ప్రణవం సత్యమవ్యక్తం గోవిప్రాన్ధర్మమవ్యయం |
దాక్షాయణీం ధర్మపత్నీం సోమకశ్యపయోరపి || 22 ||
గంగాం సరస్వతీం నందాం కాళిందీం సితవారణాం |
ధ్రువం బ్రహ్మఋషీన్సప్త పుణ్యశ్లోకాంశ్చ మానవాన్ || 23 ||
ఉత్థాయాపరరాత్రాం తే ప్రయతాః సుసమాహితాః |
స్మరంతి మమ రూపాణి ముచ్యంతే తేఽంహసోఽఖిలాత్ || 24 ||
యే మాం స్తువంత్యనేనాంగ ప్రతిబుద్ధ్య నిశాత్యయే |
తేషాం ప్రాణాత్యయే చాహం దదామి విపులాం మతిం || 25 ||
శ్రీశుక ఉవాచ –
ఇత్యాదిశ్య హృషీకేశః ప్రాధ్మాయ జలజోత్తమం |
హర్షయన్విబుధానీకమారురోహ ఖగాధిపం || 26 ||
రాజన్నుదితమే తత్తే హరేః కర్మాఘనాశనం |
గజేంద్రమోక్షణం దివ్యం రైవతం త్వంతరం శృణు || 27 ||
ఇతి శ్రీమద్భాగవతే మహాపురాణే అష్టమస్కంధే చతుర్థోఽధ్యాయః || 4 ||
 

శ్రీపాదాష్టకం

వేదాంతవేద్యం వరయోగిరుపం
జగత్ప్రకాశం సురలోకపూజ్యం |
ఇష్టార్థసిద్ధిం కరుణాకరేశం
శ్రీపాదరాజం శరణం ప్రపద్యే || 1 ||
యోగీశరుపం పరమాత్మవేషం
సదానురాగం సహకార్యరుపం |
వరప్రసాదం విబుధైకసేవ్యం
శ్రీపాదరాజం శరణం ప్రపద్యే || 2 ||
కాషాయవస్త్రం కరదండధారిణం
కమండలుం పద్మకరేణ శంఖం |
చక్రం గదాభూషిత భూషణాఢ్యం
శ్రీపాదరాజం శరణం ప్రపద్యే || 3 ||
భూలోకసారం భువనైకనాథం
నాథాదినాథం నరలోకనాథం |
కృష్ణావతారం కరుణాకటాక్షం
శ్రీపాదరాజం శరణం ప్రపద్యే || 4 ||
లోకాభిరామం గుణభూషణాఢ్యం
తేజో మునిశ్రేష్ఠ మునిం వరేణ్యం |
సమస్తదుఃఖాని భయాని శాంతం
శ్రీపాదరాజం శరణం ప్రపద్యే || 5 ||
కృష్ణాసుతీరే వసతి ప్రసిద్ధం
శ్రీపాద శ్రీవల్లభ యోగిమూర్తిం |
సర్వేజనైశ్చింతితకల్పవృక్షం
శ్రీపాదరాజం శరణం ప్రపద్యే || 6 ||
మంత్రాబ్ధిరాజం యతిరాజపూజ్యం
త్రైలోకనాథం జనసేవ్యనాథం |
ఆనందచిత్తం అఖిలాత్మతేజం
శ్రీపాదరాజం శరణం ప్రపద్యే || 7 ||
మంత్రానుగంయం మహానిర్వితేజం
మహత్ప్రకాశం మహాశాంతమూర్తిం |
త్రైలోక్యచిత్తం అఖిలాత్మతేజం
శ్రీపాదరాజం శరణం ప్రపద్యే || 8 ||
శ్రీపాదాష్టకమిదం పుణ్యం ప్రాతరుత్థాయ యః పఠేత్ |
కోటిజన్మకృతంపాపం స్మరణేన వినశ్యతి || 9 ||

అపామార్జన స్తోత్రం

శ్రీదాల్భ్య ఉవాచ |
భగవన్ప్రాణినః సర్వే విషరోగాద్యుపద్రవైః |
దుష్టగ్రహాభిఘాతైశ్చ సర్వకాలముపద్రుతాః || 1 ||
ఆభిచారికకృత్యాభిః స్పర్శరోగైశ్చ దారుణైః |
సదా సంపీడ్యమానాస్తు తిష్ఠంతి మునిసత్తమ || 2 ||
కేన కర్మవిపాకేన విషరోగాద్యుపద్రవాః |
న భవంతి నృణాం తన్మే యథావద్వక్తుమర్హసి || 3 ||
శ్రీ పులస్త్య ఉవాచ |
వ్రతోపవాసైర్యైర్విష్ణుః నాన్యజన్మని తోషితః,
తే నరా మునిశార్దూల విషరోగాదిభాగినః. || 4 || [*గ్రహ*] యైర్న తత్ప్రవణం చిత్తం సర్వదైవ నరైః కృతం |
విషగ్రహజ్వరాణాం తే మనుష్యా దాల్భ్య భాగినః || 5 ||
ఆరోగ్యం పరమామృద్ధిం మనసా యద్యదిచ్ఛతి |
తత్తదాప్నోత్యసందిగ్ధం పరత్రాచ్యుతతోషకృత్ || 6 ||
నాధీన్ ప్రాప్నోతి న వ్యాధీన్న విషగ్రహబంధనం |
కృత్యా స్పర్శభయం వాఽపి తోషితే మధుసూదనే || 7 ||
సర్వదుఃఖశమస్తస్య సౌంయాస్తస్య సదా గ్రహాః |
దేవానామప్రధృష్యోఽసౌ తుష్టో యస్య జనార్దనః || 8 ||
యః సమః సర్వభూతేషు యథాఽఽత్మని తథా పరే |
ఉపవాసాది దానేన తోషితే మధుసూదనే || 9 ||
తోషితాస్తత్ర జాయన్తే నరాః పూర్ణమనోరథాః |
అరోగాః సుఖినో భోగాన్భోక్తారో మునిసత్తమ || 10 ||
న తేషాం శత్రవో నైవ స్పర్శరోగాభిచారికాః |
గ్రహరోగాదికం వాఽపి పాపకార్యం న జాయతే || 11 ||
అవ్యాహతాని కృష్ణస్య చక్రాదీన్యాయుధాని చ |
రక్షన్తి సకలాపద్భ్యో యేన విష్ణురుపాసితః || 12 ||
శ్రీ దాల్భ్య ఉవాచ |
అనారాధితగోవిందా యే నరా దుఃఖభాగినః |
తేషాం దుఃఖాభితప్తానాం యత్కర్తవ్యం దయాళుభిః || 13 ||
పశ్యద్భిః సర్వభూతస్థం వాసుదేవం మహామునే |
సమదృష్టిభిరీశేశం తన్మహ్యం బ్రూహ్యశేషతః || 14 ||
శ్రీపులస్త్య ఉవాచ |
శ్రోతు కామోసి వై దాల్భ్య శృణుష్వ సుసమాహితః |
అపామార్జనకం వక్ష్యే న్యాసపూర్వమిదం పరం || 15 ||
[* ప్రయోగ విధి –
గృహీత్వా తు సమూలాగ్రాన్కుశాన్ శుద్ధానుపస్కృతాన్ |
మార్జయేత్సర్వగాత్రాణి కుశాగ్రైర్దాల్భ్య శాంతికృత్ || 16 ||
శరీరే యస్య తిష్ఠంతి కుశాగ్రజలబిందవః |
నశ్యంతి సర్వపాపాని గరుడేనేవ పన్నగాః || 17 ||
కుశమూలే స్థితో బ్రహ్మా కుశ మధ్యే జనార్దనః |
కుశాగ్రే శంకరం విద్యాత్త్రయోదేవా వ్యవస్థితాః || 18 ||
విష్ణుభక్తో విశేషేణ శుచిస్తద్గతమానసః |
రోగగ్రహవిషార్తానాం కుర్యాచ్ఛాంతిమిమాం శుభాం || 19 ||
శుభేహని శుచిర్భూత్వా సాధకస్యానుకూలతః |
నక్షత్రే చ విపజ్జన్మవధప్రత్యగ్వివర్జితే || 20 ||
వారేఽర్కభౌమయోర్మంత్రీ శుచౌదేశే ద్విజోత్తమః |
గోచర్మమాత్రం భూదేశం గోమయేనోపలిప్య చ || 21 ||
తత్ర భారద్వయవ్రీహీంస్తదర్ధం వా తదర్ధకం |
నిక్షిప్యస్తండిలం కృత్వా లిఖేత్పద్మం చతుర్దళం || 22 ||
సౌవర్ణం రాజతం తాంరం మృన్మయం వా నవం దృఢం |
అవ్రణం కలశం శుద్ధం స్థాపయేత్తండులోపరి || 23 ||
తత్రోదకం సమానీయ శుద్ధం నిర్మలమేవ చ |
ఏకం శతం కుశాన్ సాగ్రాన్ స్థాపయేత్కలశోపరి || 24 ||
కలశస్య ముఖే విష్ణుః కంఠే రుద్రః సమాశ్రితః |
మూలే తత్ర స్థితో బ్రహ్మా మధ్యే మాతృగణాః స్మృతాః || 25 ||
కుక్షౌ తు సాగరాస్సర్వే సప్తద్వీపా వసుంధరాః |
శేషాస్తు దేవతాస్సర్వాః కలశం తు సమాశ్రితాః || 26 ||
ఘటం పుమాం సంజానీయాత్తోయపూర్ణం తు విన్యసేత్ |
రత్నం చ విన్యసేద్ధీమాన్ సూత్రం తు గళ ఉచ్యతే || 27 ||
వస్త్రం తు త్వక్సమాఖ్యాతం నారికేళం శిరస్తథా |
కూర్చం వై కేశ ఇత్యాహురిత్యేకం కుంభలక్షణం || 28 ||
దంష్ట్రాయాం వసుధాం సశైలనగరారణ్యాపగాం హుంకృతౌ
వాగీశం శ్వసితేఽనిలం రవివిధూ బాహ్వోస్తు దక్షాన్యయోః |
కుక్షావష్టవసూన్ దిశశ్శ్రవణయోర్దస్రౌ దృశోః పాదయోః
పద్మోత్థం హృదయే హరిం పృథగభిధ్యాయేన్ముఖే శంకరం || 29 ||
నారసింహం సమభ్యర్చ్య వామనం చ ప్రయత్నతః |
పూజయేత్తత్ర కలశముపచారైః సమంత్రకైః || 30 ||
వారాహం నారసింహం చ వామనం విష్ణుమేవ చ |
ఆవాహ్య తేషు ప్రత్యేకం కుంభేష్వేతాన్ సమర్చయేత్ || 31 ||
అథవైకఘటం వాపి స్థాపయేత్సాధకోత్తమః |
పిధాయ కుంభద్వారాణి విధినా చూతపల్లవైః || 32 ||
నారికేళ ఫలైశ్చాపి మంత్రైరేతైర్యథావిధి |
మంత్రైరేతైర్యథాలింగం కుర్యాద్దిగ్బంధనం తతః || 33 ||
వారాహం నారసింహం చ వామనం విష్ణుమేవ చ |
ధ్యాత్వా సమాహితో భూత్వా దిక్షు నామాని విన్యసేత్ || 34 ||
|| అథ అపామార్జన న్యాసవిధిః (కవచం) ||
పూర్వే నారాయణః పాతు వారిజాక్షస్తు దక్షిణే |
ప్రద్యుంనః పశ్చిమే పాతు వాసుదేవస్తథోత్తరే || 35 ||
ఐశాన్యాం రక్షతాద్విష్ణుః ఆగ్నేయ్యాం చ జనార్దనః |
నైరృత్యాం పద్మనాభస్తు వాయవ్యాం మధుసూదనః || 36 ||
ఊర్ధ్వే గోవర్ధనోద్ధర్తా హ్యధరాయాం త్రివిక్రమః |
ఏతాభ్యో దశదిగ్భ్యశ్చ సర్వతః పాతు కేశవః || 37 ||
ఏవం కృత్వా తు దిగ్బంధం విష్ణుం సర్వత్ర సంస్మరన్ |
అవ్యగ్రచిత్తః కుర్వీత న్యాసకర్మ యథా విధి || 38 ||
అంగుష్ఠాగ్రే తు గోవిందం తర్జన్యాం తు మహీధరం |
మధ్యమాయాం హృషీకేశమనామిక్యాం త్రివిక్రమం || 39 ||
కనిష్ఠాయాం న్యసేద్విష్ణుం కరపృష్ఠే తు వామనం |
ఏవమేవాంగుళిన్యాసః పశ్చాదంగేషు విన్యసేత్ || 40 ||
శిఖాయాం కేశవం న్యస్య మూర్ధ్ని నారాయణం న్యసేత్ |
మాధవం చ లలాటే తు గోవిందం తు భ్రువోర్న్యసేత్ || 41 ||
చక్షుర్మధ్యే న్యసేద్విష్ణుం కర్ణయోర్మధుసూదనం |
త్రివిక్రమం కంఠమూలే వామనం తు కపోలయోః || 42 ||
నాసారంధ్రద్వయే చాపి శ్రీధరం కల్పయేద్భుధః |
ఉత్తరోష్ఠే హృషీకేశం పద్మనాభం తథాఽధరే || 43 ||
దామోదరం దంతపంక్తౌ వారాహం చుబుకే తథా |
జిహ్వాయాం వాసుదేవం చ తాల్వోశ్చైవ గదాధరం || 44 ||
వైకుంఠం కంఠమధ్యే తు అనంతం నాసికోపరి |
దక్షిణే తు భుజే విప్రో విన్యసేత్ పురుషోత్తమం || 45 ||
వామే భుజే మహాయోగం రాఘవం హృది విన్యసేత్ |
కుక్షౌ పృథ్వీధరం చైవ పార్శ్వయోః కేశవం న్యసేత్ || 46 ||
వక్షఃస్థలే మాధవం చ కక్షయోర్యోగశాయినం |
పీతాంబరం స్తనతటే హరిం నాభ్యాం తు విన్యసేత్ || 47 ||
దక్షిణే తు కరే దేవం తతః సంకర్షణం న్యసేత్ |
వామే రిపుహరం విద్యాత్కటిమధ్యే జనార్దనం || 48 ||
పృష్ఠే క్షితిధరం విద్యాదచ్యుతం స్కంధయోరపి |
వామకుక్షౌ వారిజాక్షం దక్షిణే జలశాయినం || 49 ||
స్వయంభువం మేఢ్రమధ్యే ఊర్వోశ్చైవ గదాధరం |
జానుమధ్యే చక్రధరం జంఘయోరమృతం న్యసేత్ || 50 ||
గుల్ఫయోర్నారసింహం చ పాదయోరమితత్విషం |
అంగుళీషు శ్రీధరం చ పద్మాక్షం సర్వసంధిషు || 51 ||
నఖేషు మాధవం చైవ న్యసేత్పాదతలేఽచ్యుతం |
రోమకూపే గుడాకేశం కృష్ణం రక్తాస్థిమజ్జసు || 52 ||
మనోబుద్ధ్యోరహంకారే చిత్తే న్యస్య జనార్దనం |
అచ్యుతానంత గోవిందాన్ వాతపిత్తకఫేషు చ || 53 ||
ఏవం న్యాసవిధిం కృత్వా యత్కార్యం ద్విజతచ్ఛృణు |
పాదమూలే తు దేవస్య శంఖం చైవ తు విన్యసేత్ || 54 ||
వనమాలాం హృది న్యస్య సర్వదేవాభిపూజితాం |
గదాం వక్షఃస్థలే న్యస్య చక్రం చైవ తు పృష్ఠతః || 55 ||
శ్రీవత్సమురసి న్యస్య పంచాంగం కవచం న్యసేత్ |
ఆపాదమస్తకం చైవ విన్యసేత్పురుషోత్తమం || 56 ||
ఏవం న్యాసవిధిం కృత్వా సాక్షాన్నారాయణో భవేత్ |
తనుర్విష్ణుమయీ తస్య యత్కించిన్న స భాషతే || 57 ||
అపామార్జనకో న్యాసః సర్వవ్యాధివినాశనః |
ఆత్మనశ్చ పరస్యాపి విధిరేష సనాతనః || 58 ||
వైష్ణవేన తు కర్తవ్యః సర్వసిద్ధిప్రదాయకః |
విష్ణుస్తదూర్ధ్వం రక్షేత్తు వైకుంఠో విదిశోదిశః || 59 ||
పాతు మాం సర్వతో రామో ధన్వీ చక్రీ చ కేశవః |
ఏతత్సమస్తం విన్యస్య పశ్చాన్మంత్రాన్ ప్రయోజయేత్ || 60 ||
పూజాకాలే తు దేవస్య జపకాలే తథైవ చ |
హోమకాలే చ కర్తవ్యం త్రిసంధ్యాసు చ నిత్యశః || 61 ||
ఆయురారోగ్యమైశ్వర్యం జ్ఞానం విత్తం ఫలం లభేత్ |
యద్యత్సుఖతరం లోకే తత్సర్వం ప్రాప్నుయాన్నరః || 62 ||
ఏవం భక్త్యా సమభ్యర్చ్య హరిం సర్వార్థదాయకం |
అభయం సర్వభూతేభ్యో విష్ణులోకం స గచ్ఛతి |
శ్రీవిష్ణులోకం స గచ్ఛత్యోం నమ ఇతి || 63 ||
అస్య శ్రీమదపామార్జన స్తోత్రమహామంత్రస్య పులస్త్యో భగవానృషిః అనుష్టుప్ఛందః ఓం శ్రీవరాహ-నృసింహ-వామన-విష్ణు-సుదర్శన-పాంచజన్యా దేవతాః ఓం హరాముకస్యదురితమితి బీజం ఓం అచ్యుతానంతగోవిందేతి శక్తిః ఓం జ్వలత్పావకలోచనేతి కీలకం ఓం వజ్రాయుధనఖస్పర్శేతి కవచం శ్రీ-వరాహ-నృసింహ-వామన-విష్ణు-సుదర్శన-పాంచజన్య ప్రసాదసిద్ధ్యర్థే సర్వారిష్టపరిహారార్థే జపే వినియోగః |
ఓం శ్రీవరాహాయ అంగుష్ఠాభ్యాం నమః |
ఓం శ్రీనృసింహాయ తర్జనీభ్యాం నమః |
ఓం శ్రీవామనాయ మధ్యమాభ్యాం నమః |
ఓం శ్రీవిష్ణవే అనామికాభ్యాం నమః |
ఓం శ్రీసుదర్శనాయ కనిష్ఠికాభ్యాం నమః |
ఓం శ్రీపాంచజన్యాయ కరతలకరపృష్ఠాభ్యాం నమః ||
ఓం వరాహాయ నృసింహాయ వామనాయ మహాత్మనే జ్ఞానాయ హృదయాయ నమః |
ఓం నమః కమలకింజల్కపీత నిర్మలవాసనే ఐశ్వర్యాయ శిరసే స్వాహా |
ఓం నమః పుష్కరనేత్రాయ కేశవాయాదిచక్రిణే శక్త్యై శిఖాయై వషట్ |
ఓం దామోదరాయ దేవాయ అనంతాయ మహాత్మనే బలాయ కవచాయ హుం |
ఓం కాశ్యపాయాతిహ్రస్వాయ ఋగ్వజుస్సామమూర్తయే తేజసే నేత్రాభ్యాం వౌషట్ |
ఓం నమః పరమార్థాయ పురుషాయ మహాత్మనే వీర్యాయ అస్త్రాయ ఫట్ |
ఓం భూర్భువస్సువరోమితి దిగ్బంధః ||
అథ ధ్యానం ప్రవక్ష్యామి సర్వపాపప్రణాశనం |
వరాహరూపిణం దేవం సంస్మరన్నర్చయేజ్జపేత్ || 64 ||
ఓం జలౌఘమగ్నా సచరాచరా ధరా
విషాణకోట్యాఖిల విశ్వమూర్తినా |
సముద్ధృతా యేన వరాహరూపిణా
స మే స్వయంభూర్భగవాన్ ప్రసీదతు || 65 ||
చంచచ్చంద్రార్ధదంష్ట్రం స్ఫురదురుదశనం విద్యుదుద్ద్యోతజిహ్వం
గర్జత్పర్జన్యనాదం స్ఫురితరవిరుచం చక్షురక్షుద్రరౌద్రం |
త్రస్తాశాహస్తియూధం జ్వలదనలసటా కేసరోద్భాసమానం
రక్షో రక్తాభిషిక్తం ప్రహరతుదురితం ధ్యాయతాం నారసింహం || 66 ||
అతివిపులసుగాత్రం రుక్మపాత్రస్థమన్నం
సులలితదధిఖండం పాణినా దక్షిణేన |
కలశమమృతపూర్ణం వామహస్తే దధానం
తరతిసకలదుఃఖం వామనం భావయేద్యః || 67 ||
విష్ణుం భాస్వత్కిరీటాం గదవలయగళాకల్పహారోజ్జ్వలాంగం
శ్రోణీభూషాసువక్షో మణిమకుటమహాకుండలైర్మండితాంగం |
హస్తోద్యచ్ఛంఖచక్రాంబుజ గదమమలం పీతకౌశేయవాసం
విద్యోతద్భాసముద్యద్దినకరసదృశం పద్మసంస్థం నమామి || 68 ||
శంఖం చక్రం సచాపం పరశుమసిమిషూన్మూలపాశాంకుశాగ్నీన్
బిభ్రాణం వజ్రఖేటం హలముసలగదాకుంతమత్యుగ్రదంష్ట్రం |
జ్వాలాకేశం త్రినేత్రం జ్వలదనలనిభం హారకేయూరభూషం
ధ్యాయేత్షట్కోణసంస్థం సకలరిపుజనప్రాణసంహారి చక్రం || 69 ||
కల్పాంతార్క ప్రకాశం త్రిభువనమఖిలం తేజసాపూరయంతం
రక్తాక్షం పింగకేశం రిపుకులభయదం భీమదంష్ట్రాట్టహాసం |
శంఖం చక్రం గదాబ్జం పృథుతరముసలం చాప పాశాంకుశాన్ స్వైః
బిభ్రాణం దోర్భిరష్టౌ మనసి మురరిపుం భావయేచ్చక్రసంజ్ఞం || 70 ||
ఓం నమో భగవతే శ్రీమహావరాహాయ దంష్ట్రోద్ధృత విశ్వంభరాయ హిరణ్యాక్షగర్వసర్వంకషాయ మమ విఘ్నాన్ ఛింధి ఛింధి ఛేదయ ఛేదయ స్వాహా || 1 ||
ఓం నమో భగవతే శ్రీమహానృసింహాయ దంష్ట్రాకరాళవదనాయ ఖరనఖరాగ్రవిదారిత హిరణ్యకశపువక్షస్స్థలాయ జ్వాలామాలావిభూషణాయ మమ విఘ్నాన్ సంహర సంహర హాహాహీహీహూహూ హుం ఫట్ స్వాహా || 2 ||
ఓం నమో భగవతే మహామాయాయ శ్రీవామనాయ పదత్రయాక్రాంతజగత్త్రయాయ ఋగ్యజుస్సామమూర్తయే మమ విఘ్నాన్ ధ్వంసయ ధ్వంసయ త్రాసయ త్రాసయ ఓం హ్రాం హ్రీం హ్రూం శ్రీం క్లీం ఠాఠాఠాఠాఠా ఆఆఆఆఆ ఈఈఈఈఈ ఊఊఊఊఊ హుం ఫట్ స్వాహా || 3 ||
ఓం నమో భగవతే శ్రీమహావిష్ణవే యక్షరక్షాంసి మమ విఘ్నాన్ మథ మథ స్వాహా || 4 ||
ఓం నమో భగవతే శ్రీసుదర్శనాయ మహాచక్రరాజాయ మాం రక్ష రక్ష మమ శత్రూన్నాశయ నాశయ దర దర దారయ దారయ ఛింది ఛింధి భింధి భింధి జ్వల జ్వల జ్వాలయ జ్వాలయ సహస్రకిరణాన్ ప్రజ్వల ప్రజ్వల శిఖా ఉత్ప్రేషయోత్ప్రేషయ దహనాత్మక చట చట చాటయ చాటయ గర్జయ గర్జయ త్రాసయ త్రాసయ చూర్ణయ చూర్ణయ పరప్రయుక్తానాం మంత్రాణామష్టోత్తరశతం స్ఫోటయ స్ఫోటయ పరశక్తీః పేషయ పేషయ పరమంత్రాన్ సంహర సంహర మాం రక్ష రక్ష సహస్రార హుం ఫట్ స్వాహా || 5 ||
ఏతాన్మంత్రాన్ జపేన్మంత్రీ ఉస్పృశ్య ఘటోదకం |
అష్టోత్తరశతం మౌనీ జపేత్సిద్ధిర్భవిష్యతి || 71 ||
బృహద్ధామ బృహద్గాత్రం బృహద్దంష్ట్రం త్రిలోచనం |
సమస్తవేదవేదాంగయుక్తాంగం భూషణైర్యుతం || 72 ||
ఉద్ధృత్యభూమిం పాతాలాద్ధస్తాభ్యాం పరిగృహ్యతాం |
ఆలింగ్యభూమిమురసామూర్ధ్ని జిఘ్రంతమచ్యుతం || 73 ||
రత్నవైడూర్యముక్తాదిభూషణైరుపశోభితం |
పీతాంబరధరం దేవం శుక్లమాల్యానులేపనం || 74 ||
త్రయస్త్రింశాదిదేవైశ్చస్తూయమానం తు సర్వదా |
ఋషిభిస్సనకాద్యైశ్చ సేవ్యమానమహర్నిశం || 75 ||
నృత్యన్తీభిశ్చాప్సరోభిర్గీయమానం చ కిన్నరైః |
ఇత్థం ధ్యాత్వా యథా న్యాయ్యం జపేన్మంత్రమతంద్రితః || 76 ||
సౌవర్ణమండపాంతస్స్థం పద్మం ధ్యాయేత్సకేసరం |
సకర్ణీకైర్దళైరిష్టైరష్టభిః పరిశోభితం || 77 ||
కళంకరహితం దేవం పూర్ణచంద్రసమప్రభం |
శ్రీవత్సాంకితవక్షస్కం తీక్ష్ణదంష్ట్రం త్రిలోచనం || 78 ||
జపాకుసుమసంకాశం రక్తహస్తతలాన్వితం |
పద్మాసనసమా(సీనం)రూఢం యోగపట్టపరిష్కృతం || 79 ||
పీతవస్త్రపరీతాంగం శుక్లవస్త్రోత్తరీయకం |
కటిసూత్రేణ హైమేన నూపురేణవిరాజితం || 80 ||
వనమాలాదిశోభాఢ్యం ముక్తాహారోపశోభితం |
పంకజాస్యం చతుర్బాహుం పద్మపత్రనిభేక్షణం || 81 ||
ప్రాతస్సూర్యసమప్రఖ్యకుండలాభ్యాం విరాజితం |
అనేకసూర్యసంకాశదీప్యన్మకుటమస్తకం || 82 ||
కేయూరకాంతిసంస్పర్ధిముద్రికారత్నశోభితం |
జానూపరిన్యస్తకరద్వంద్వముక్తానఖాంకురం || 83 ||
జంఘాభరణసంస్పర్ధి సుశోభం కంకణత్విషా |
చతుర్థీచంద్రసంకాశ సుదంష్ట్రముఖపంకజం || 84 ||
ముక్తాఫలాభసుమహాదంతావళివిరాజితం |
చాంపేయపుష్పసంకాశ సునాసముఖపంకజం || 85 ||
అతిరక్తోష్ఠవదనం రక్తాస్యమరిభీషణం |
వామాంకస్థాం శ్రియం భక్తాం శాంతాం దాంతాం గరీయసీం || 86 ||
అర్హణీయోరుసంయుక్తాం సునాసాం శుభలక్షణాం |
సుభ్రూం సుకేశీం సుశ్రోణీం సుభుజాం సుద్విజాననాం || 87 ||
సుప్రతీకాం చ సుగతిం చతుర్హస్తాం విచింతయేత్ |
దుకూలచేలచార్వంగీం హరిణీం సర్వకామదాం || 88 ||
తప్తకాంచనసంకాశాం సర్వాభరణభూషితాం |
సువర్ణకలశప్రఖ్య పీనోన్నతపయోధరాం || 89 ||
గృహీత పద్మయుగళ బాహుభ్యాం చ విరాజితాం |
గృహీత మాతులుంగాఖ్య జాంబూనదకరాం తథా || 90 ||
ఏవం దేవీం నృసింహస్య వామాంకోపరి చింతయేత్ |
|| పునర్ధ్యానం ||
ఓం జలౌఘమగ్నా సచరాచరా ధరా
విషాణకోట్యాఖిల విశ్వమూర్తినా |
సముద్ధృతా యేన వరాహరూపిణా
స మే స్వయంభూర్భగవాన్ ప్రసీదతు ||
చంచచ్చంద్రార్ధదంష్ట్రస్ఫురదురుదశనం విద్యుదుద్ద్యోతజిహ్వం
గర్జత్పర్జన్యనాదం స్ఫురితరవిరుచం చక్షురక్షుద్రరౌద్రం |
త్రస్తాశాహస్తియూధం జ్వలదనలసటా కేసరోద్భాసమానం
రక్షోరక్తాభిషిక్తం ప్రహరతుదురితం ధ్యాయతాం నారసింహం ||
అతివిపులసుగాత్రం రుక్మపాత్రస్థమన్నం
సులలితదధిఖండం పాణినా దక్షిణేన |
కలశమమృతపూర్ణం వామహస్తే దధానం
తరతిసకలదుఃఖం వామనం భావయేద్యః ||
విష్ణుం భాస్వత్కిరీటాం గదవలయగళాకల్పహారోజ్జ్వలాంగం
శ్రోణీభూషాసువక్షో మణిమకుటమహాకుండలైర్మండితాంగం |
హస్తోద్యచ్ఛంఖచక్రాంబుజ గదమమలం పీతకౌశేయవాసం
విద్యోతద్భాసముద్యద్దినకరసదృశం పద్మసంస్థం నమామి ||
శంఖం చక్రం సచాపం పరశుమసిమిషూన్మూలపాశాంకుశాగ్నీన్
బిభ్రాణం వజ్రఖేటం హలముసలగదాకుంతమత్యుగ్రదంష్ట్రం |
జ్వాలాకేశం త్రినేత్రం జ్వలదనలనిభం హారకేయూరభూషం
ధ్యాయేత్షట్కోణసంస్థం సకలరిపుజనప్రాణసంహారి చక్రం ||
ఓం నమో భగవతే శ్రీమహావరాహాయ క్రోడరూపిణే మమ విఘ్నాన్ దహ దహ స్వాహా |
ఓం నమో భగవతే శ్రీమహానృసింహాయ కరాళదంష్ట్రవదనాయ మమ విఘ్నాన్ పచ పచ స్వాహా |
ఓం నమో భగవతే శ్రీమాయా వామనాయ త్రైలోక్యవిక్రాన్తాయ మమ శత్రూన్ ఛేదయ చ్ఛేదయ స్వాహా |
ఓం నమో భగవతే శ్రీమహావిష్ణవే యక్షరక్షాంసి మమ విఘ్నాన్ మథ మథ స్వాహా |
ఓం నమో భగవతే శ్రీసుదర్శనాయాఽసురాంతకాయ మమ విఘ్నాన్ హన హన స్వాహా |
ఓం నమః పరమార్థాయ పురుషాయ మహాత్మనే |
అరూపాయ విరూపాయ వ్యాపినే పరమాత్మనే || 92 ||
నిష్కల్మషాయ శుద్ధాయ ధ్యానయోగపరాయ చ |
నమస్కృత్య ప్రవక్ష్యామి యత్తత్సిద్ధ్యతు మే వచః || 93 ||
నారాయణాయ శుద్ధాయ విశ్వేశాయేశ్వరాయ చ |
నమస్కృత్య ప్రవక్ష్యామి యత్తత్సిధ్యతు మే వచః || 94 ||
అచ్యుతాయ చ గోవింద పద్మనాభాయసంహృతే |
నమస్కృత్య ప్రవక్ష్యామి యత్తత్సిధ్యతు మే వచః || 95 ||
త్రివిక్రమాయ రామాయ వైకుంఠాయ హరాయ చ |
నమస్కృత్య ప్రవక్ష్యామి యత్తత్సిధ్యతు మే వచః || 96 ||
దామోదరాయ దేవాయ అనంతాయ మహాత్మనే |
నమస్కృత్య ప్రవక్ష్యామి యత్తత్సిధ్యతు మే వచః || 97 ||
జనార్దనాయ కృష్ణాయ ఉపేంద్ర శ్రీధరాయ చ |
నమస్కృత్య ప్రవక్ష్యామి యత్తత్సిధ్యతు మే వచః || 98 ||
హృషీకేశాయ కూర్మాయ మాధవాయాఽచ్యుతాయ చ |
నమస్కృత్య ప్రవక్ష్యామి యత్తత్సిధ్యతు మే వచః || 99 ||
యోగీశ్వరాయ గుహ్యాయ గూఢాయ పరమాత్మనే |
నమస్కృత్య ప్రవక్ష్యామి యత్తత్సిధ్యతు మే వచః || 100 ||
భక్తప్రియాయ దేవాయ విష్వక్సేనాయ శార్ఙ్గిణే |
నమస్కృత్య ప్రవక్ష్యామి యత్తత్సిధ్యతు మే వచః || 101 ||
ప్రద్యుంనాయాఽనిరుద్ధాయ పురుషాయ మహాత్మనే |
నమస్కృత్య ప్రవక్ష్యామి యత్తత్సిధ్యతు మే వచః || 102 ||
అథోక్షజాయ దక్షాయ మత్స్యాయ మధుహారిణే |
నమస్కృత్య ప్రవక్ష్యామి యత్తత్సిధ్యతు మే వచః || 103 ||
వరాహాయ నృసింహాయ వామనాయ మహాత్మనే |
నమస్కృత్య ప్రవక్ష్యామి యత్తత్సిధ్యతు మే వచః || 104 ||
వరాహేశ నృసింహేశ వామనేశ త్రివిక్రమ |
హయగ్రీవేశ సర్వేశ హృషీకేశ హరాఽశుభం || 105 ||
అపరాజితచక్రాద్యైశ్చతుర్భిః పరమాయుధైః |
అఖండితానుభావైశ్చ సర్వదుఃఖహరో భవ || 106 ||
హరాముకస్యదురితం దుష్కృతం దురుపద్రవం |
మృత్యుబంధార్తిభయదమరిష్టస్య చ యత్ఫలం || 107 ||
పరాభిధ్యానసహితం ప్రయుక్తాం చాఽభిచారికం |
గరస్పర్శమహారోగప్రయుక్తం జరయాఽజర || 108 ||
ఓం నమో వాసుదేవాయ నమః కృష్ణాయ శార్ఙ్గిణే |
నమః పుష్కరనేత్రాయ కేశవాయాదిచక్రిణే || 109 ||
నమః కమలకింజల్కదీప్తనిర్మలవాససే |
మహాహవరిపుస్కంధ ఘృష్టచక్రాయ చక్రిణే || 110 ||
దంష్ట్రాగ్రేణ క్షితిధృతే త్రయీమూర్తిమతే నమః |
మహాయజ్ఞవరాహాయ శేషభోగోపశాయినే || 111 ||
తప్తహాటకకేశాంతజ్వలత్పావకలోచన |
వజ్రాయుధనఖస్పర్శ దివ్యసింహ నమోఽస్తు తే || 112 ||
కాశ్యపాయాతిహ్రస్వాయ ఋగ్యజుస్సామమూర్తయే |
తుభ్యం వామనరూపాయ క్రమతేగాం నమో నమః || 113 ||
వరాహాశేషదుష్టాని సర్వపాపఫలాని వై |
మర్ద మర్ద మహాదంష్ట్ర మర్ద మర్ద చ తత్ఫలం || 114 ||
నారసింహ కరాళస్య దంతప్రాంతానలోజ్జ్వల |
భంజ భంజ నినాదేన దుష్టాన్యస్యార్తినాశన || 115 ||
ఋగ్యజుస్సామరూపాభి-ర్వాగ్భిర్వామనరూపధృత్ |
ప్రశమం సర్వదుఃఖాని నయత్వస్య జనార్దనః || 116 ||
కౌబేరం తే ముఖం రౌద్రం నందినో నందమావహ |
గరం మృత్యుభయం ఘోరం విషం నాశయ మే జ్వరం || 117 ||
త్రిపాద్భస్మప్రహరణస్త్రిశిరా రక్తలోచనః |
సమేప్రీతస్సుఖం దద్యాత్సర్వామయపతిర్జ్వరః || 118 ||
ఆద్యంతవంతః కవయః పురాణాః
సన్మార్గవంతో హ్యనుశాసితారః |
సర్వజ్వరాన్ ఘ్నన్తు మమాఽనిరుద్ధ
ప్రద్యుంన సంకర్షణ వాసుదేవాః || 119 ||
ఐకాహికం ద్వ్యాహికం చ తథా త్రిదివస జ్వరం |
చాతుర్థికం తథా త్యుగ్రం తథైవ సతత జ్వరం || 120 ||
దోషోత్థం సన్నిపాతోత్థం తథైవాగంతుక జ్వరం |
శమం నయాశు గోవింద చ్ఛింధిచ్ఛింధ్యస్య వేదనాం || 121 ||
నేత్రదుఃఖం శిరోదుఃఖం దుఃఖం చోదరసంభవం |
అతిశ్వాసమనిశ్వాసం పరితాపం చ వేపథుం || 122 ||
గుదఘ్రాణాంఘ్రిరోగాంశ్చ కుక్షిరోగం తథా క్షయం |
కామలాదీంస్తథారోగా-న్ప్రమేహాంశ్చాతిదారుణాన్ || 123 ||
భగందరాతిసారాంశ్చ ముఖరోగాంశ్చ ఫల్గునీన్ |
అశ్మరీ మూత్రకృచ్ఛ్రాంశ్చ రోగానన్యాంశ్చ దారుణాన్ || 124 ||
యే వాతప్రభవారోగా యే చ పిత్తసముద్భవాః |
కఫోద్భవాశ్చ యే రోగాః యే చాన్యేసాన్నిపాతికాః || 125 ||
ఆగంతుకాశ్చ యే రోగాః లూతావిస్ఫోటకాదయః |
సర్వే తే ప్రశమం యాంతు వాసుదేవాఽపమార్జనాత్ || 126 ||
విలయం యాంతు తే సర్వే విష్ణోరుచ్చారణేన తు |
క్షయం గచ్ఛంత్వశేషాస్తే చక్రేణోపహతాహరేః || 127 ||
అచ్యుతాఽనంతగోవింద నామోచ్చారణ భేషజాత్ |
నశ్యన్తి సకలరోగాః సత్యం సత్యం వదాంయహం || 128 ||
సత్యం సత్యం పునః సత్యముద్ధృత్య భుజముచ్యతే |
వేదాచ్ఛాస్త్రం పరం నాస్తి న దైవం కేశవాత్పరం || 129 ||
స్థావరం జంగమం వాపి కృత్రిమం వాపి యద్విషం |
దంతోద్భూతం నఖోద్భూతమాకాశప్రభవం విషం || 130 ||
లూతాదిప్రభవం చైవ విషమత్యంతదుస్సహం |
శమం నయతు తత్సర్వం కీర్తితో మే జనార్దనః || 131 ||
గ్రహాన్ ప్రేతగ్రహాన్భూతాం స్తథా వై డాకినీగ్రహాన్ |
వేతాళాంశ్చ పిశాచాంశ్చ గంధర్వాన్యక్షరాక్షసాన్ || 132 ||
శాకినీ పూతనాద్యాంశ్చ తథా వైనాయకగ్రహాన్ |
ముఖమండలికాన్క్రూరాన్ రేవతీన్వృద్ధరేవతీన్ || 133 ||
వృశ్చికాఖ్యాన్ గ్రహాంశ్చోగ్రాంస్తథా మాతృగణానపి |
బాలస్య విష్ణోశ్చరితం హంతు బాలగ్రహానిమాన్ || 134 ||
వృద్ధానాం యే గ్రహాః కేచిద్యే చ బాలగ్రహాః క్వచిత్ |
నారసింహస్య తే దృష్ట్యా దగ్ధా యే చాపి యౌవనే || 135 ||
సదా కరాళవదనో నారసింహో మహారవః |
గ్రహానశేషాన్నిశ్శేషాన్కరోతు జగతో హరిః || 136 ||
నారసింహ మహాసింహ జ్వాలామాలోజ్జ్వలానన |
గ్రహానశేషాన్సర్వేశ ఖాదఖాదాఽగ్నిలోచన || 137 ||
యే రోగా యే మహోత్పాతాః యద్విషం యే మహాగ్రహాః |
యాని చ క్రూరభూతాని గ్రహపీడాశ్చ దారుణాః || 138 ||
శస్త్రక్షతేషు యే రోగాః జ్వాలాకర్దమకాదయః |
యాని చాన్యాని దుష్టాని ప్రాణిపీడాకరాణి వై |
తాని సర్వాణి సర్వాత్మన్పరమాత్మఞ్జనార్దన || 139 ||
కించిద్రూపం సమాస్థాయ వాసుదేవాశునాశయ |
క్షిప్త్వా సుదర్శనం చక్రం జ్వాలామాలావిభూషణం || 140 ||
సర్వదుష్టోపశమనం కురు దేవవరాఽచ్యుత |
సుదర్శనమహాచక్ర గోవిందస్య వరాయుధ || 141 ||
తీక్ష్ణపావకసంకాశ కోటిసూర్యసమప్రభ |
త్రైలోక్యరక్షాకర్తా త్వం దుష్టదానవదారణ || 142 ||
తీక్ష్ణధారమహావేగ ఛింది ఛింది మహాజ్వరం |
ఛింధి వాతం చ లూతం చ ఛింధి ఘోరం మహద్విషం || 143 ||
క్రిమిదాహశ్చ శూలశ్చ విషజ్వాలా చ కర్దమాః |
సుదర్శనేన చక్రేణ శమం యాంతి న సంశయః || 144 ||
త్రైలోక్యస్యాఽభయం కర్తుమాజ్ఞాపయ జనార్దన |
సర్వదుష్టాని రక్షాంసి క్షపయాశ్వరిభీషణ || 145 ||
ప్రాచ్యాం ప్రతీచ్యాం దిశి చ దక్షిణోత్తరతస్తథా |
రక్షాం కరోతు భగవాన్ బహురూపీ జనార్దనః || 146 ||
వ్యాఘ్రసింహవరాహాదిష్వగ్ని చోరభయేషు చ |
రక్షాం కరోతు భగవాన్ బహురూపీ జనార్దనః || 147 ||
భువ్యంతరిక్షే చ తథా పార్శ్వతః పృష్ఠతోఽగ్రతః |
రక్షాం కరోతు భగవాన్ నారసింహః స్వగర్జితైః || 148 ||
యథా విష్ణుర్జగత్సర్వం సదేవాసురమానుషం |
తేన సత్యేన సకలం దుష్టమస్య ప్రశాంయతు || 149 ||
యథా యజ్ఞేశ్వరో విష్ణుర్వేదాంతేష్వభిధీయతే |
తేన సత్యేన సకలం దుష్టమస్య ప్రశాంయతు || 150 ||
పరమాత్మా యథా విష్ణుర్వేదాంతేష్వపి గీయతే |
తేన సత్యేన సకలం దుష్టమస్య ప్రశాంయతు || 151 ||
యథా విష్ణోః స్తుతే సద్యః సంక్షయం యాతి పాతకం | [విష్ణౌ] తేన సత్యేన సకలం యన్మయోక్తం తథాఽస్తు తత్ || 152 ||
జలే రక్షతు వారాహః స్థలే రక్షతు వామనః |
అటవ్యాం నారసింహశ్చ సర్వతః పాతు కేశవః || 153 ||
శాంతిరస్తు శివం చాఽస్తు ప్రణశ్యత్వశుభం చ యత్ |
వాసుదేవశరీరోత్థైః కుశైః సంమార్జితో మయా || 154 ||
అపామార్జతు గోవిందో నరో నారాయణస్తథా |
మమాఽస్తు సర్వదుఃఖానాం ప్రశమో వచనాద్ధరేః || 155 ||
శాంతాః సమస్తారోగాస్తే గ్రహాస్సర్వేవిషాణి చ |
భూతాని చ ప్రశాంతాని సంస్మృతే మధుసూదనే || 156 ||
ఏతత్సమస్తరోగేషు భూతగ్రహభయేషు చ |
అపామార్జనకం శస్త్రం విష్ణునామాభిమంత్రితం || 157 ||
ఏతే కుశా విష్ణుశరీరసంభవా
జనార్దనోహం స్వయమేవ చాగతః |
హతం మయా దుష్టమశేషమస్య
స్వస్థో భవత్వేష యథా వచో హరేః || 158 ||
శాంతిరస్తు శివం చాస్తు దుష్టమస్య ప్రశాంయతు |
యదస్య దురితం కించిత్తత్క్షిప్తం లవణాంభసి || 159 ||
స్వాస్థ్యమస్తు శివం చాస్తు హృషీకేశస్య కీర్తనాత్ |
యత ఏవాగతం పాపం తత్రైవ ప్రతిగచ్ఛతు || 160 ||
ఏతద్రోగాదిపీడాసు జనానాం హితమిచ్ఛతా |
విష్ణుభక్తేన కర్తవ్యమపామార్జనకం పరం || 161 ||
అనేన సర్వదుఃఖాని శమం యాంతి న సంశయః |
వ్యాధ్యపస్మార కుష్ఠాది పిశాచోరగ రాక్షసాః || 162 ||
తస్య పార్శ్వం న గచ్ఛంతి స్తోత్రమేతత్తు యః పఠేత్ |
యశ్చ ధారయతే విద్వాన్ శ్రద్ధాభక్తిసమన్వితః || 163 ||
గ్రహాస్తం నోపసర్పంతి న రోగేణ చ పీడితః |
ధన్యో యశస్యః శత్రుఘ్నః స్తవోయం మునిసత్తమ || 164 ||
పఠతాం శృణ్వతాం చైవ విష్ణోర్మాహాత్ంయముత్తమం |
ఏతత్ స్తోత్రం పరం పుణ్యం సర్వవ్యాధివినాశనం || 165 ||
పఠతాం శృణ్వతాం చైవ జపేదాయుష్యవర్ధనం |
వినాశాయ చ రోగాణామపమృత్యుజయాయ చ || 166 ||
ఇదం స్తోత్రం జపేచ్ఛాంతః కుశైః సంమార్జయేచ్ఛుచిః |
వారాహం నారసింహం చ వామనం విష్ణుమేవ చ || 167 ||
స్మరన్ జపేదిదం స్తోత్రం సర్వదుఃఖోపశాంతయే |
సర్వభూతహితార్థాయ కుర్యాత్తస్మాత్సదైవహి || 168 ||
కుర్యాత్తస్మాత్సదైవహ్యోం నమ ఇతి |
ఇతి శ్రీవిష్ణుధర్మోత్తరపురాణే శ్రీదాల్భ్యపులస్త్యసంవాదే శ్రీమదపామార్జనస్తోత్రం నామైకోనత్రింశోధ్యాయః |

అమృతసంజీవన ధన్వంతరి స్తోత్రం

అథాపరమహం వక్ష్యేఽమృతసంజీవనం స్తవం |
యస్యానుష్ఠానమాత్రేణ మృత్యుర్దూరాత్పలాయతే || 1 ||
అసాధ్యాః కష్టసాధ్యాశ్చ మహారోగా భయంకరాః |
శీఘ్రం నశ్యంతి పఠనాదస్యాయుశ్చ ప్రవర్ధతే || 2 ||
శాకినీడాకినీదోషాః కుదృష్టిగ్రహశత్రుజాః |
ప్రేతవేతాలయక్షోత్థా బాధా నశ్యంతి చాఖిలాః || 3 ||
దురితాని సమస్తాని నానాజన్మోద్భవాని చ |
సంసర్గజవికారాణి విలీయంతేఽస్య పాఠతః || 4 ||
సర్వోపద్రవనాశాయ సర్వబాధాప్రశాంతయే |
ఆయుః ప్రవృద్ధయే చైతత్ స్తోత్రం పరమమద్భుతం || 5 ||
బాలగ్రహాభిభూతానాం బాలానాం సుఖదాయకం |
సర్వారిష్టహరం చైతద్బలపుష్టికరం పరం || 6 ||
బాలానాం జీవనాయైతత్ స్తోత్రం దివ్యం సుధోపమం |
మృతవత్సత్వహరణం చిరంజీవిత్వకారకం || 7 ||
మహారోగాభిభూతానాం భయవ్యాకులితాత్మనాం |
సర్వాధివ్యాధిహరణం భయఘ్నమమృతోపమం || 8 ||
అల్పమృత్యుశ్చాపమృత్యుః పాఠాదస్యః ప్రణశ్యతి |
జలాఽగ్నివిషశస్త్రారి న హి శృంగి భయం తథా || 9 ||
గర్భరక్షాకరం స్త్రీణాం బాలానాం జీవనప్రదం |
మహారోగహరం నౄణామల్పమృత్యుహరం పరం || 10 ||
బాలా వృద్ధాశ్చ తరుణా నరా నార్యశ్చ దుఃఖితాః |
భవంతి సుఖినః పాఠాదస్య లోకే చిరాయుషః || 11 ||
అస్మాత్పరతరం నాస్తి జీవనోపాయ ఐహికః |
తస్మాత్ సర్వప్రయత్నేన పాఠమస్య సమాచరేత్ || 12 ||
అయుతావృత్తికం వాథ సహస్రావృత్తికం తథా |
తదర్ధం వా తదర్ధం వా పఠేదేతచ్చ భక్తితః || 13 ||
కలశే విష్ణుమారాధ్య దీపం ప్రజ్వాల్య యత్నతః |
సాయం ప్రాతశ్చ విధివత్ స్తోత్రమేతత్ పఠేత్ సుధీః || 14 ||
సర్పిషా హవిషా వాఽపి సంయావేనాథ భక్తితః |
దశాంశమానతో హోమం కుర్యాత్ సర్వార్థసిద్ధయే || 15 ||
అథ స్తోత్రం |
నమో నమో విశ్వవిభావనాయ
నమో నమో లోకసుఖప్రదాయ |
నమో నమో విశ్వసృజేశ్వరాయ
నమో నమో ముక్తివరప్రదాయ || 1 ||
నమో నమస్తేఽఖిలలోకపాయ
నమో నమస్తేఽఖిలకామదాయ |
నమో నమస్తేఽఖిలకారణాయ
నమో నమస్తేఽఖిలరక్షకాయ || 2 ||
నమో నమస్తే సకలార్తిహర్త్రే
నమో నమస్తే విరుజః ప్రకర్త్రే |
నమో నమస్తేఽఖిలవిశ్వధర్త్రే
నమో నమస్తేఽఖిలలోకభర్త్రే || 3 ||
సృష్టం దేవ చరాచరం జగదిదం బ్రహ్మస్వరూపేణ తే
సర్వం తత్పరిపాల్యతే జగదిదం విష్ణుస్వరూపేణ తే |
విశ్వం సంహ్రితయే తదేవ నిఖిలం రుద్రస్వరూపేణ తే
సంసిచ్యామృతశీకరైర్హర మహారిష్టం చిరం జీవయ || 4 ||
యో ధన్వంతరిసంజ్ఞయా నిగదితః క్షీరాబ్ధితో నిఃసృతో
హస్తాభ్యాం జనజీవనాయ కలశం పీయూషపూర్ణం దధత్ |
ఆయుర్వేదమరీరచజ్జనరుజాం నాశాయ స త్వం ముదా
సంసిచ్యామృతశీకరైర్హర మహారిష్టం చిరం జీవయ || 5 ||
స్త్రీరూపం వరభూషణాంబరధరం త్రైలోక్యసంమోహనం
కృత్వా పాయయతి స్మ యః సురగణాన్ పీయూషమత్యుత్తమం |
చక్రే దైత్యగణాన్ సుధావిరహితాన్ సంమోహ్య స త్వం ముదా
సంసిచ్యామృతశీకరైర్హర మహారిష్టం చిరం జీవయ || 6 ||
చాక్షుషోదధిసంప్లావ భూవేదప ఝషాకృతే |
సించ సించామృతకణైశ్చిరం జీవయ జీవయ || 7 ||
పృష్ఠమందరనిర్ఘూర్ణనిద్రాక్ష కమఠాకృతే |
సించ సించామృతకణైశ్చిరం జీవయ జీవయ || 8 ||
యాంచాచ్ఛలబలిత్రాసముక్తనిర్జర వామన |
సించ సించామృతకణైశ్చిరం జీవయ జీవయ || 9 ||
ధరోద్ధార హిరణ్యాక్షఘాత క్రోడాకృతే ప్రభో |
సించ సించామృతకణైశ్చిరం జీవయ జీవయ || 10 ||
భక్తత్రాసవినాశాత్తచండత్వ నృహరే విభో |
సించ సించామృతకణైశ్చిరం జీవయ జీవయ || 11 ||
క్షత్రియారణ్యసంఛేదకుఠారకరరైణుక |
సించ సించామృతకణైశ్చిరం జీవయ జీవయ || 12 ||
రక్షోరాజప్రతాపాబ్ధిశోషణాశుగ రాఘవ |
సించ సించామృతకణైశ్చిరం జీవయ జీవయ || 13 ||
భూభారాసురసందోహకాలాగ్నే రుక్మిణీపతే |
సించ సించామృతకణైశ్చిరం జీవయ జీవయ || 14 ||
వేదమార్గరతానర్హవిభ్రాంత్యై బుద్ధరూపధృక్ |
సించ సించామృతకణైశ్చిరం జీవయ జీవయ || 15 ||
కలివర్ణాశ్రమాస్పష్టధర్మర్ధ్యై కల్కిరూపభాక్ |
సించ సించామృతకణైశ్చిరం జీవయ జీవయ || 16 ||
అసాధ్యాః కష్టసాధ్యా యే మహారోగా భయంకరాః |
ఛింధి తానాశు చక్రేణ చిరం జీవయ జీవయ || 17 ||
అల్పమృత్యుం చాపమృత్యుం మహోత్పాతానుపద్రవాన్ |
భింధి భింధి గదాఘాతైశ్చిరం జీవయ జీవయ || 18 ||
అహం న జానే కిమపి త్వదన్యత్
సమాశ్రయే నాథ పదాంబుజం తే |
కురుష్వ తద్యన్మనసీప్సితం తే
సుకర్మణా కేన సమక్షమీయాం || 19 ||
త్వమేవ తాతో జననీ త్వమేవ
త్వమేవ నాథశ్చ త్వమేవ బంధుః |
విద్యాధనాగారకులం త్వమేవ
త్వమేవ సర్వం మమ దేవదేవ || 20 ||
న మేఽపరాధం ప్రవిలోకయ ప్రభో-
-ఽపరాధసింధోశ్చ దయానిధిస్త్వం |
తాతేన దుష్టోఽపి సుతః సురక్షతే
దయాలుతా తేఽవతు సర్వదాఽస్మాన్ || 21 ||
అహహ విస్మర నాథ న మాం సదా
కరుణయా నిజయా పరిపూరితః |
భువి భవాన్ యది మే న హి రక్షకః
కథమహో మమ జీవనమత్ర వై || 22 ||
దహ దహ కృపయా త్వం వ్యాధిజాలం విశాలం
హర హర కరవాలం చాల్పమృత్యోః కరాలం |
నిజజనపరిపాలం త్వాం భజే భావయాలం
కురు కురు బహుకాలం జీవితం మే సదాఽలం || 23 ||
న యత్ర ధర్మాచరణం న జానం
వ్రతం న యోగో న చ విష్ణుచర్చా |
న పితృగోవిప్రవరామరార్చా
స్వల్పాయుషస్తత్ర జనా భవంతి || 24 ||
అథ మంత్రం |
క్లీం శ్రీం క్లీం శ్రీం నమో భగవతే జనార్దనాయ సకల దురితాని నాశయ నాశయ |
క్ష్రౌం ఆరోగ్యం కురు కురు | హ్రీం దీర్ఘమాయుర్దేహి దేహి స్వాహా ||
ఫలశ్రుతిః |
అస్య ధారణతో జాపాదల్పమృత్యుః ప్రశాంయతి |
గర్భరక్షాకరం స్త్రీణాం బాలానాం జీవనం పరం || 1 ||
శతం పంచాశతం శక్త్యాఽథవా పంచాధివింశతిం |
పుస్తకానాం ద్విజేభ్యస్తు దద్యాద్దీర్ఘాయుషాప్తయే || 2 ||
భూర్జపత్రే విలిఖ్యేదం కంఠే వా బాహుమూలకే |
సంధారయేద్గర్భరక్షా బాలరక్షా చ జాయతే || 3 ||
సర్వే రోగా వినశ్యంతి సర్వా బాధాః ప్రశాంయతి |
కుదృష్టిజం భయం నశ్యేత్ తథా ప్రేతాదిజం భయం || 4 ||
మయా కథితమేతత్తేఽమృతసంజీవనం పరం |
అల్పమృత్యుహరం స్తోత్రం మృతవత్సత్వనాశనం || 5 ||
ఇతి సుదర్శనసంహితోక్తం అమృతసంజీవన ధన్వంతరి స్తోత్రం ||

ఆర్తత్రాణపరాయణాష్టకం

ప్రహ్లాద ప్రభుతాస్తి చేత్తవ హరే సర్వత్ర మే దర్శయన్
స్తంభే చైవ హిరణ్యకశ్యపుపురస్తత్రావిరాసీద్ధరిః |
వక్షస్తస్యవిదారయన్నిజనఖైర్వాత్సల్యమావేదయ-
న్నార్తత్రాణపరాయణస్స భగవాన్నారాయణో మే గతిః || 1 ||
శ్రీరామాఽర్త విభీషణోయమనఘో రక్షో భయాదాగతః
సుగ్రీవానయ పాలయైన మధునా పౌలస్త్యమేవాగతం |
ఇత్యుక్త్వాఽభయమస్య సర్వవిదితో యో రాఘవో దత్తవా-
నార్తత్రాణపరాయణస్స భగవాన్నారాయణో మే గతిః || 2 ||
నక్రగ్రస్తపదం సముద్ధృతకరం బ్రహ్మాదిదేవాసురాః
రక్షంతీత్యనుదీనవాక్యకరుణం దేవేషు శక్తేషు యః |
మా భైషీతి రరక్ష నక్రవదనాచ్చక్రాయుధశ్శ్రీధరో
ఆర్తత్రాణపరాయణస్స భగవాన్నారాయణో మే గతిః || 3 ||
హా కృష్ణాచ్యుత హా కృపాజలనిధే హా పాండవానాం సఖే
క్వాసి క్వాసి సుయోధనాదపహృతాం హా రక్ష మామాతురాం |
ఇత్యుక్తోఽక్షయవస్త్రరక్షితతనుః యోఽపాలయద్ద్రౌపదీ-
మార్తత్రాణపరాయణస్స భగవాన్నారాయణో మే గతిః || 4 ||
యత్పాదాబ్జనఖోదకం త్రిజగతాం పాపౌఘసంశోషణం
యన్నామామృతపూరకం చ తపతాం సంసారసన్తాడనం |
పాషాణోపి యదంఘ్రిపద్మరజసా శాపాదిశర్మోచిత-
స్త్వార్తత్రాణపరాయణస్స భగవాన్నారాయణో మే గతిః || 5 ||
యన్నామస్మరణాద్విషాదసహితో విప్రః పురాఽజామిళః
ప్రాగాన్ముక్తిమశోషితాసు నిచయః పాపౌఘదావానలాత్ |
ఏతద్భాగవతోత్తమాననృపతీ ప్రాప్తాంబరీషాఽర్జునా-
వార్తత్రాణపరాయణస్స భగవాన్నారాయణో మే గతిః || 6 ||
నాధీత శ్రుతయో న సత్యమతయో ఘోషస్థితా గోపికాః
జారిణ్యః కులజాతధర్మవిముఖా అధ్యాత్మభావం యయుః |
భక్త్యా యస్య తథా విధాశ్చ సుగమాస్తస్యాధియస్సమతా
ఆర్తత్రాణపరాయణస్స భగవాన్నారాయణో మే గతిః || 7 ||
కావేరీహృదయాభిరామపుళినే పుణ్యే జగన్మండలే
చంద్రాం భోజవతీ తటీ పరిసరే ధాత్రా సమారాధితే |
శ్రీరంగే భుజగేంద్రభోగశయనే శేతే సదా యః పుమా-
నార్తత్రాణపరాయణస్స భగవాన్నారాయణో మే గతిః || 8 ||
యో రక్షద్వసనాదిభిర్విరహితం విప్రం కుచేలాధిపం
దాసం దీన చకోర పాలనవిధౌ శ్రీశంఖచక్రోజ్జ్వలః |
తజ్జీర్ణాంబరముష్టిమేయపృథుకం యోఽఽదాయ భుక్త్వా క్షణా-
దార్తత్రాణపరాయణస్స భగవాన్నారాయణో మే గతిః || 9 ||
ఇతి శ్రీమద్దేశికాచార్య విరచితం ఆర్తత్రాణపరాయణాష్టకం ||

కమలాపత్యష్టకం

భుజగతల్పగతం ఘనసుందరం
గరుడవాహనమంబుజలోచనం |
నళినచక్రగదాకరమవ్యయం
భజత రే మనుజాః కమలాపతిం || 1 ||
అలికులాసితకోమలకుంతలం
విమలపీతదుకూలమనోహరం |
జలధిజాశ్రితవామకళేబరం
భజత రే మనుజాః కమలాపతిం || 2 ||
కిము జపైశ్చ తపోభిరుతాధ్వరై-
-రపి కిముత్తమతీర్థనిషేవణైః |
కిముత శాస్త్రకదంబవిలోకనై-
-ర్భజత రే మనుజాః కమలాపతిం || 3 ||
మనుజదేహమిమం భువి దుర్లభం
సమధిగంయ సురైరపి వాంఛితం |
విషయలంపటతామపహాయ వై
భజత రే మనుజాః కమలాపతిం || 4 ||
న వనితా న సుతో న సహోదరో
న హి పితా జననీ న చ బాంధవః |
వ్రజతి సాకమనేన జనేన వై
భజత రే మనుజాః కమలాపతిం || 5 ||
సకలమేవ చలం సచరాచరం
జగదిదం సుతరాం ధనయౌవనం |
సమవలోక్య వివేకదృశా ద్రుతం
భజత రే మనుజాః కమలాపతిం || 6 ||
వివిధరోగయుతం క్షణభంగురం
పరవశం నవమార్గమలాకులం |
పరినిరీక్ష్య శరీరమిదం స్వకం
భజత రే మనుజాః కమలాపతిం || 7 ||
మునివరైరనిశం హృది భావితం
శివవిరించిమహేంద్రనుతం సదా |
మరణజన్మజరాభయమోచనం
భజత రే మనుజాః కమలాపతిం || 8 ||
హరిపదాష్టకమేతదనుత్తమం
పరమహంసజనేన సమీరితం |
పఠతి యస్తు సమాహితచేతసా
వ్రజతి విష్ణుపదం స నరో ధ్రువం || 9 ||
ఇతి శ్రీమత్పరమహంస స్వామి బ్రహ్మానంద విరచితం కమలాపత్యష్టకం ||

శ్రీపాద శ్రీవల్లభ స్తోత్రం 2

శ్రీపాద వల్లభ గురోః వదనారవిందం
వైరాగ్యదీప్తి పరమోజ్జ్వలమద్వితీయం |
మందస్మితం సుమధురం కరుణార్ద్రనేత్రం
సంసారతాపహరణం సతతం స్మరామి || 1 ||
శ్రీపాద వల్లభ గురోః కరకల్పవృక్షం
భక్తేష్టదాననిరతం రిపుసంక్షయం వై |
సంస్మరణమాత్ర చితిజాగరణం సుభద్రం
సంసారభీతిశమనం సతతం భజామి || 2 ||
శ్రీపాద వల్లభ గురోః పరమేశ్వరస్య
యోగీశ్వరస్య శివశక్తిసమన్వితస్య |
శ్రీపర్వతస్యశిఖరం ఖలు సన్నివిష్టం
త్రైలోక్యపావనపదాబ్జమహం నమామి || 3 ||

కేవలాష్టకం

మధురం మధురేభ్యోఽపి మంగళేభ్యోఽపి మంగళం |
పావనం పావనేభ్యోఽపి హరేర్నామైవ కేవలం || 1 ||
ఆబ్రహ్మస్తంబపర్యంతం సర్వం మాయామయం జగత్ |
సత్యం సత్యం పునః సత్యం హరేర్నామైవ కేవలం || 2 ||
స గురుః స పితా చాపి సా మాతా బాంధవోఽపి సః |
శిక్షయేచ్చేత్సదా స్మర్తుం హరేర్నామైవ కేవలం || 3 ||
నిశ్శ్వాసే న హి విశ్వాసః కదా రుద్ధో భవిష్యతి |
కీర్తనీయమతో బాల్యాద్ధరేర్నామైవ కేవలం || 4 ||
హరిః సదా వసేత్తత్ర యత్ర భాగవతా జనాః |
గాయంతి భక్తిభావేన హరేర్నామైవ కేవలం || 5 ||
అహో దుఃఖం మహాదుఃఖం దుఃఖాత్ దుఃఖతరం యతః |
కాచార్థం విస్మృతం రత్నం హరేర్నామైవ కేవలం || 6 ||
దీయతాం దీయతాం కర్ణే నీయతాం నీయతాం వచః |
గీయతాం గీయతాం నిత్యం హరేర్నామైవ కేవలం || 7 ||
తృణీకృత్య జగత్సర్వం రాజతే సకలోపరి |
చిదానందమయం శుద్ధం హరేర్నామైవ కేవలం || 8 ||

గజేంద్ర మోక్షః (శ్రీమద్భాగవతం) 1

శ్రీశుక ఉవాచ –
ఆసీద్గిరివరో రాజన్ త్రికూట ఇతి విశ్రుతః |
క్షీరోదేనావృతః శ్రీమాన్ యోజనాయుతముచ్ఛ్రితః || 1 ||
తావతా విస్తృతః పర్యక్త్రిభిః శృంగైః పయోనిధిం |
దిశశ్చ రోచయన్నాస్తే రౌప్యాయసహిరణ్మయైః || 2 ||
అన్యైశ్చ కకుభః సర్వా రత్నధాతు విచిత్రితైః |
నానాద్రుమలతాగుల్మైః నిర్ఘోషైః నిర్ఝరాంభసాం || 3 ||
సదానిమజ్యమానాంఘ్రిః సమంతాత్పయ ఊర్మిభిః |
కరోతి శ్యామలాం భూమిం హరిన్మరకతాశ్మభిః || 4 ||
సిద్ధచారణగంధర్వైర్విద్యాధర మహోరగైః |
కిన్నరైరప్సరోభిశ్చ క్రీడద్భిర్జుష్టకందరః || 5 ||
యత్ర సంగీతసన్నాదైర్నదద్గుహమమర్షయా |
అభిగర్జంతి హరయః శ్లాఘినః పరశంకయా || 6 ||
నానారణ్యపశువ్రాత సంకులద్రోణ్యలంకృతః |
చిత్రద్రుమసురోద్యాన కలకంఠ విహంగమః || 7 ||
సరిత్సరోభిరచ్ఛోదైః పులినైర్మణివాలుకైః |
దేవస్త్రిమజ్జనామోద సౌరభాంబ్వనిలైర్యుతః || 8 ||
తస్య ద్రోణ్యాం భగవతో వరుణస్య మహాత్మనః |
ఉద్యానమృతుమన్నామ హ్యాక్రీడం సురయోషితాం || 9 ||
సర్వతోఽలంకృతం దివ్యైర్నిత్యపుష్పఫలద్రుమైః |
మందారైః పారిజాతైశ్చ పాటలాశోకచంపకైః || 10 ||
చూతైః ప్రియాళైః పనసైరాంరైరాంరాతకైరపి |
క్రముకైర్నారికేళైశ్చ ఖర్జూరైర్బీజపూరకైః || 11 ||
మధూకైస్తాలసాలైశ్చ తమాలై రసనార్జునైః |
అరిష్టోదుంబరప్లక్షైర్వటైః కింశుకచందనైః || 12 ||
పిచుమందైః కోవిదారైః సరళైః సురదారుభిః |
ద్రాక్షేక్షు రంభాజంబూభిర్బదర్యక్షాభయామలైః || 13 ||
బిల్వైః కపిత్థైర్జంబీరైర్వృతో భల్లాతకైరపి |
తస్మిన్సరః సువిపులం లసత్కాంచనపంకజం || 14 ||
కుముదోత్పలకల్హార శతపత్రశ్రియోర్జితం |
మత్తషట్పద నిర్ఘుష్టం శకుంతైః కలనిస్వనైః || 15 ||
హంసకారండవాకీర్ణం చక్రాహ్వైః సారసైరపి |
జలకుక్కుటకోయష్టి దాత్యూహకలకూజితం || 16 ||
మత్స్యకచ్ఛపసంచార చలత్పద్మరజఃపయః |
కదంబవేతసనల నీపవంజులకైర్వృతం || 17 ||
కుందైః కురవకాశోకైః శిరీషైః కూటజేంగుదైః |
కుబ్జకైః స్వర్ణయూథీభిర్నాగపున్నాగజాతిభిః || 18 ||
మల్లికాశతపత్రైశ్చ మాధవీజాలకాదిభిః |
శోభితం తీరజైశ్చాన్యైర్నిత్యర్తుభిరలం ద్రుమైః || 19 ||
తత్రైకదా తద్గిరికాననాశ్రయః
కరేణుభిర్వారణయూథపశ్చరన్ |
సకంటకం కీచకవేణువేత్రవ-
-ద్విశాలగుల్మం ప్రరుజన్వనస్పతీన్ || 20 ||
యద్గంధమాత్రాద్ధరయో గజేంద్రా
వ్యాఘ్రాదయో వ్యాలమృగాశ్చ ఖడ్గాః |
మహోరగాశ్చాపి భయాద్ద్రవంతి
సగౌరకృష్ణాః సరభాశ్చమర్యః || 21 ||
వృకా వరాహా మహిషర్క్షశల్యా
గోపుచ్ఛసాలావృకమర్కటాశ్చ |
అన్యత్ర క్షుద్రా హరిణాః శశాదయః
చరంత్యభీతా యదనుగ్రహేణ || 22 ||
స ఘర్మతప్తః కరిభిః కరేణుభి-
-ర్వృతో మదచ్యుత్కలభైరభిద్రుతః |
గిరిం గరింణా పరితః ప్రకంపయన్
నిషేవ్యమాణోఽలికులైర్మదాశనైః || 23 ||
సరోఽనిలం పంకజరేణురూషితం
జిఘ్రన్ విదూరాన్ మదవిహ్వలేక్షణః |
వృతః స్వయూథేన తృషార్దితేన త-
-త్సరోవరాభ్యాశమథాగమద్ద్రుతం || 24 ||
విగాహ్య తస్మిన్ అమృతాంబు నిర్మలం
హేమారవిందోత్పలరేణువాసితం |
పపౌ నికామం నిజపుష్కరోద్ధృతం
స్వాత్మానమద్భిః స్నపయన్గతక్లమః || 25 ||
స పుష్కరేణోద్ధృతశీకరాంబుభి-
-ర్నిపాయయన్ సంస్నపయన్ యథా గృహీ |
జిఘ్రన్ కరేణుః కలభాశ్చ దుర్మనా
హ్యాచష్ట కృచ్ఛ్రం కృపణోఽజమాయయా || 26 ||
తం తత్ర కశ్చిన్నృప దైవచోదితో
గ్రాహో బలీయాంశ్చరణౌ రుషాఽగ్రహీత్ |
యదృచ్ఛయైవం వ్యసనం గతో గజో
యథాబలం సోఽతిబలో విచక్రమే || 27 ||
తథాఽఽతురం యూథపతిం కరేణవో
వికృష్యమాణం తరసా బలీయసా |
విచుక్రుశుర్దీనధియోఽపరే గజాః
పార్ష్ణిగ్రహాస్తారయితుం న చాశకన్ || 28 ||
నియుధ్యతోరేవమిభేంద్రనక్రయో-
-ర్వికర్షతోరంతరతో బహిర్మిథః |
సమాః సహస్రం వ్యగమన్ మహీపతే
సప్రాణయోశ్చిత్రమమంసతామరాః || 29 ||
తతో గజేంద్రస్య మనోబలౌజసాం
కాలేన దీర్ఘేణ మహానభూద్వ్యయః |
వికృష్యమాణస్య జలేఽవసీదతో
విపర్యయోఽభూత్సకలం జలౌకసః || 30 ||
ఇత్థం గజేంద్రః స యదాఽఽప సంకటం
ప్రాణస్య దేహీ వివశో యదృచ్ఛయా |
అపారయన్నాత్మవిమోక్షణే చిరం
దధ్యావిమాం బుద్ధిమథాభ్యపద్యత || 31 ||
నమామి మే జ్ఞాతయ ఆతురం గజాః
కుతః కరిణ్యః ప్రభవంతి మోక్షితుం |
గ్రాహేణ పాశేన విధాతురావృతో
హ్యహం చ తం యామి పరం పరాయణం || 32 ||
యః కశ్చనేశో బలినోఽంతకోరగా-
-త్ప్రచండవేగాదభిధావతో భృశం |
భీతం ప్రపన్నం పరిపాతి యద్భయా-
-న్మృత్యుః ప్రధావత్యరణం తమీమహే || 33 ||
ఇతి శ్రీమద్భాగవతే మహాపురాణే అష్టమస్కంధే ద్వితీయోఽధ్యాయః || 2 ||

శ్రీ గరుడ కవచం

అస్య శ్రీ గరుడ కవచ స్తోత్రమంత్రస్య నారద ఋషిః వైనతేయో దేవతా అనుష్టుప్ఛందః మమ గరుడ ప్రసాద సిద్ధ్యర్థే జపే వినియోగః |
శిరో మే గరుడః పాతు లలాటం వినతాసుతః |
నేత్రే తు సర్పహా పాతు కర్ణౌ పాతు సురార్చితః || 1 ||
నాసికాం పాతు సర్పారిః వదనం విష్ణువాహనః |
సూర్యసూతానుజః కంఠం భుజౌ పాతు మహాబలః || 2 ||
హస్తౌ ఖగేశ్వరః పాతు కరాగ్రే తరుణాకృతిః |
నఖాన్ నఖాయుధః పాతు కక్షౌ ముక్తిఫలప్రదః || 3 ||
స్తనౌ మే విహగః పాతు హృదయం పాతు సర్పహా | [*సర్వదా*] నాభిం పాతు మహాతేజాః కటిం పాతు సుధాహరః || 4 ||
ఊరూ పాతు మహావీరః జానునీ చండవిక్రమః |
జంఘే దండాయుధః పాతు గుల్ఫౌ విష్ణురథః సదా || 5 ||
సువర్ణః పాతు మే పాదౌ తార్క్ష్యః పాదాంగులీ తథా |
రోమకూపాని మే వీరః త్వచం పాతు భయాపహః || 6 ||
ఇత్యేవం దివ్యకవచం పాపఘ్నం సర్వకామదం |
యః పఠేత్ప్రాతరుత్థాయ విషదోషం ప్రణశ్యతి || 7 ||
త్రిసంధ్యం యః పఠేన్నిత్యం బంధనాత్ ముచ్యతే నరః |
ద్వాదశాహం పఠేద్యస్తు ముచ్యతే శత్రుబంధనాత్ || 8 ||
ఏకవారం పఠేద్యస్తు ముచ్యతే సర్వకిల్బిషైః |
వజ్రపంజరనామేదం కవచం బంధమోచనం || 9 ||
ఇతి శ్రీ నారద గరుడ సంవాదే గరుడకవచం |