Sacred Stotras & Deities

ఏకశ్లోకీ భాగవతం

ఆదౌ దేవకిదేవి గర్భజననం గోపీ గృహేవర్ధనం
మాయాపూతన జీవితాపహరణం గోవర్ధనోద్ధారణం |
కంసచ్ఛేదన కౌరవాది హననం కుంతీసుతాపాలనం
హ్యేతద్భాగవతం పురాణకథితం శ్రీకృష్ణలీలామృతం ||

శ్రీ పాండురంగాష్టకం

మహాయోగపీఠే తటే భీమరథ్యా
వరం పుండరీకాయ దాతుం మునీంద్రైః |
సమాగత్య తిష్ఠంతమానందకందం
పరబ్రహ్మలింగం భజే పాండురంగం || 1 ||
తటిద్వాససం నీలమేఘావభాసం
రమామందిరం సుందరం చిత్ప్రకాశం |
వరం త్విష్టకాయాం సమన్యస్తపాదం
పరబ్రహ్మలింగం భజే పాండురంగం || 2 ||
ప్రమాణం భవాబ్ధేరిదం మామకానాం
నితంబః కరాభ్యాం ధృతో యేన తస్మాత్ |
విధాతుర్వసత్యై ధృతో నాభికోశః
పరబ్రహ్మలింగం భజే పాండురంగం || 3 ||
స్ఫురత్కౌస్తుభాలంకృతం కంఠదేశే
శ్రియా జుష్టకేయూరకం శ్రీనివాసం |
శివం శాంతమీడ్యం వరం లోకపాలం
పరబ్రహ్మలింగం భజే పాండురంగం || 4 ||
శరచ్చంద్రబింబాననం చారుహాసం
లసత్కుండలాక్రాంతగండస్థలాంతం |
జపారాగబింబాధరం కంజనేత్రం
పరబ్రహ్మలింగం భజే పాండురంగం || 5 ||
కిరీటోజ్జ్వలత్సర్వదిక్ప్రాంతభాగం
సురైరర్చితం దివ్యరత్నైరనర్ఘైః |
త్రిభంగాకృతిం బర్హమాల్యావతంసం
పరబ్రహ్మలింగం భజే పాండురంగం || 6 ||
విభుం వేణునాదం చరంతం దురంతం
స్వయం లీలయా గోపవేషం దధానం |
గవాం బృందకానందదం చారుహాసం
పరబ్రహ్మలింగం భజే పాండురంగం || 7 ||
అజం రుక్మిణీప్రాణసంజీవనం తం
పరం ధామ కైవల్యమేకం తురీయం |
ప్రసన్నం ప్రపన్నార్తిహం దేవదేవం
పరబ్రహ్మలింగం భజే పాండురంగం || 8 ||
స్తవం పాండురంగస్య వై పుణ్యదం యే
పఠంత్యేకచిత్తేన భక్త్యా చ నిత్యం |
భవాంభోనిధిం తే వితీర్త్వాంతకాలే [తేఽపి] హరేరాలయం శాశ్వతం ప్రాప్నువంతి || 9 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీ పాండురంగాష్టకం |

శ్రీ జగన్నాథ పంచకం

జగన్నాథ పంచకం అనేది శ్రీ జగన్నాథుని స్తుతిస్తూ భక్తులు పఠించే ఐదు శ్లోకాల పద్యం.

రక్తాంభోరుహదర్పభంజనమహాసౌందర్యనేత్రద్వయం
ముక్తాహారవిలంబిహేమముకుటం రత్నోజ్జ్వలత్కుండలం |
వర్షామేఘసమాననీలవపుషం గ్రైవేయహారాన్వితం
పార్శ్వే చక్రధరం ప్రసన్నవదనం నీలాద్రినాథం భజే || 1 ||

ఫుల్లేందీవరలోచనం నవఘనశ్యామాభిరామాకృతిం
విశ్వేశం కమలావిలాసవిలసత్పాదారవిందద్వయం |
దైత్యారిం సకలేందుమండితముఖం చక్రాబ్జహస్తద్వయం
వందే శ్రీపురుషోత్తమం ప్రతిదినం లక్ష్మీనివాసాలయం || 2 ||

ఉద్యన్నీరదనీలసుందరతనుం పూర్ణేందుబింబాననం
రాజీవోత్పలపత్రనేత్రయుగళం కారుణ్యవారాంనిధిం |
భక్తానాం సకలార్తినాశనకరం చింతాబ్ధిచింతామణిం
వందే శ్రీపురుషోత్తమం ప్రతిదినం నీలాద్రిచూడామణిం || 3 |

నీలాద్రౌ శంఖమధ్యే శతదళకమలే రత్నసింహాసనస్థం
సర్వాలంకారయుక్తం నవఘనరుచిరం సంయుతం చాగ్రజేన |
భద్రాయా వామభాగే రథచరణయుతం బ్రహ్మరుద్రేంద్రవంద్యం
వేదానాం సారమీశం సుజనపరివృతం బ్రహ్మతాతం స్మరామి || 4 ||

దోర్భ్యాం శోభితలాంగలం సముసలం కాదంబరీచంచలం
రత్నాఢ్యం వరకుండలం భుజబలైరాక్రాంతభూమండలం |
వజ్రాభామలచారుగండయుగళం నాగేంద్రచూడోజ్జ్వలం
సంగ్రామే చపలం శశాంకధవళం శ్రీకామపాలం భజే || 5 ||

శ్రీ దామోదర స్తోత్రం

సింధుదేశోద్భవో విప్రో నాంనా సత్యవ్రతః సుధీః |
విరక్త ఇంద్రియార్థేభ్యస్త్యక్త్వా పుత్రగృహాదికం || 1 ||
వృందావనే స్థితః కృష్ణమారరాధ దివానిశం |
నిఃస్వః సత్యవ్రతో విప్రో నిర్జనేఽవ్యగ్రమానసః || 2 ||
కార్తికే పూజయామాస ప్రీత్యా దామోదరం నృప |
తృతీయేఽహ్ని సకృద్భుంక్తే పత్రం మూలం ఫలం తథా || 3 ||
ఏవం భావసమాయుక్తో భక్త్యా తద్గతమానసః |
పూజయిత్వా హరిం స్తౌతి ప్రీత్యా దామోదరాభిధం || 4 ||
సత్యవ్రత ఉవాచ |
నమామీశ్వరం సచ్చిదానందరూపం
లసత్కుండలం గోకులే భ్రాజమానం |
యశోదాభియోలూఖలే ధావమానం
పరామృష్టమత్యంతతో దూతగోప్యా || 5 ||
రుదంతం ముహుర్నేత్రయుగ్మం మృజంతం
కరాంభోజయుగ్మేన సాతంకనేత్రం |
ముహుః శ్వాసకం పత్రిరేఖాంకకంఠం
స్థితం నౌమి దామోదరం భక్తవంద్యం || 6 ||
వరం దేవ దేహీశ మోక్షావధిం వా
న చాన్యం వృణేఽహం వరేశాదపీహ |
ఇదం తే వపుర్నాథ గోపాలబాలం
సదా మే మనస్యావిరాస్తాం కిమన్యైః || 7 ||
ఇదం తే ముఖాంభోజమత్యంతనీలై-
-ర్వృతం కుంతలైః స్నిగ్ధవక్త్రైశ్చ గోప్యా |
ముహుశ్చుంబితం బింబరక్తాధరం మే
మనస్యావిరాస్తామలం లక్షలాభైః || 8 ||
నమో దేవ దామోదరానంత విష్ణో
ప్రసీద ప్రభో దుఃఖజాలాబ్ధిమగ్నం |
కృపాదృష్టివృష్ట్యాఽతిదీనం చ రక్ష
గృహాణేశ మామజ్ఞమేవాక్షిదృశ్యం || 9 ||
కుబేరాత్మజౌ వృక్షమూర్తీ చ యద్వ-
-త్త్వయా మోచితౌ భక్తిభాజౌ కృతౌ చ |
తథా ప్రేమభక్తిం స్వకాం మే ప్రయచ్ఛ
న మోక్షే గ్రహో మేఽస్తి దామోదరేహ || 10 ||
నమస్తే సుధాంనే స్ఫురద్దీప్తధాంనే
తథోరఃస్థవిశ్వస్య ధాంనే నమస్తే |
నమో రాధికాయై త్వదీయప్రియాయై
నమోఽనంతలీలాయ దేవాయ తుభ్యం || 11 ||
నారద ఉవాచ |
సత్యవ్రతద్విజస్తోత్రం శ్రుత్వా దామోదరో హరిః |
విద్యుల్లీలాచమత్కారో హృదయే శనకైరభూత్ || 12 ||
ఇతి శ్రీమహాపురాణే సత్యవ్రతకృత శ్రీ దామోదర స్తోత్రం |

శ్రీ జగన్నాథాష్టకం

కదాచిత్కాళిందీతటవిపినసంగీతకవరో
ముదా గోపీనారీవదనకమలాస్వాదమధుపః |
రమాశంభుబ్రహ్మాఽమరపతిగణేశాఽర్చితపదో
జగన్నాథః స్వామీ నయనపథగామీ భవతు మే || 1 ||

భుజే సవ్యే వేణుం శిరసి శిఖిపింఛం కటితటే
దుకూలం నేత్రాంతే సహచరకటాక్షం (చ) విదధత్ |
సదా శ్రీమద్బృందావనవసతిలీలాపరిచయో
జగన్నాథః స్వామీ నయనపథగామీ భవతు మే || 2 ||

మహాంభోధేస్తీరే కనకరుచిరే నీలశిఖరే
వసన్ ప్రాసాదాంతః సహజబలభద్రేణ బలినా |
సుభద్రామధ్యస్థః సకలసురసేవావసరదో
జగన్నాథః స్వామీ నయనపథగామీ భవతు మే || 3 ||

కృపాపారావారః సజలజలదశ్రేణిరుచిరో
రమావాణీసోమస్ఫురదమలపద్మోద్భవముఖైః |
సురేంద్రైరారాధ్యః శ్రుతిగణశిఖాగీతచరితో
జగన్నాథః స్వామీ నయనపథగామీ భవతు మే || 4 ||

థారూఢో గచ్ఛన్ పథి మిళితభూదేవపటలైః
స్తుతిప్రాదుర్భావం ప్రతిపదముపాకర్ణ్య సదయః |
దయాసింధుర్బంధుః సకలజగతాం సింధుసుతయా
జగన్నాథః స్వామీ నయనపథగామీ భవతు మే || 5 ||

పరబ్రహ్మాపీడః కువలయదళోత్ఫుల్లనయనో
నివాసీ నీలాద్రౌ నిహితచరణోఽనంతశిరసి |
రసానందో రాధాసరసవపురాలింగనసుఖో
జగన్నాథః స్వామీ నయనపథగామీ భవతు మే || 6 ||

న వై ప్రార్థ్యం రాజ్యం న చ కనకతా భోగవిభవే
న యాచేఽహం రంయాం నిఖిలజనకాంయాం వరవధూం |
సదా కాలే కాలే ప్రమథపతినా గీతచరితో
జగన్నాథః స్వామీ నయనపథగామీ భవతు మే || 7 ||

హర త్వం సంసారం ద్రుతతరమసారం సురపతే
హర త్వం పాపానాం వితతిమపరాం యాదవపతే |
అహో దీనానాథం నిహితమచలం పాతుమనిశం
జగన్నాథః స్వామీ నయనపథగామీ భవతు మే || 8 ||

ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీ జగన్నాథాష్టకం సంపూర్ణం |

 శ్రీ లక్ష్మీనృసింహ సహస్రనామ స్తోత్రం

మార్కండేయ ఉవాచ |
ఏవం యుద్ధమభూద్ఘోరం రౌద్రం దైత్యబలైః సహ |
నృసింహస్యాంగసంభూతైర్నారసింహైరనేకశః || 1 ||
దైత్యకోటిర్హతాస్తత్ర కేచిద్భీతాః పలాయితాః |
తం దృష్ట్వాతీవ సంక్రుద్ధో హిరణ్యకశిపుః స్వయం || 2 ||
భూతపూర్వైరమృత్యుర్మే ఇతి బ్రహ్మవరోద్ధతః |
వవర్ష శరవర్షేణ నారసింహో భృశం బలీ || 3 ||
ద్వంద్వయుద్ధమభూదుగ్రం దివ్యవర్షసహస్రకం |
దైత్యేంద్రే సాహసం దృష్ట్వా దేవాశ్చేంద్రపురోగమాః || 4 ||
శ్రేయః కస్య భవేదత్ర ఇతి చింతాపరా భవన్ |
తదా క్రుద్ధో నృసింహస్తు దైత్యేంద్రప్రహితాన్యపి || 5 ||
విష్ణుచక్రం మహాచక్రం కాలచక్రం తు వైష్ణవం |
రౌద్రం పాశుపతం బ్రాహ్మం కౌబేరం కులిశాసనం || 6 ||
ఆగ్నేయం వారుణం సౌంయం మోహనం సౌరపార్వతం |
భార్గవాది బహూన్యస్త్రాణ్యభక్షయత కోపనః || 7 ||
సంధ్యాకాలే సభాద్వారే స్వాంకే నిక్షిప్య భైరవః |
తతః ఖడ్గధరం దైత్యం జగ్రాహ నరకేసరీ || 8 ||
హిరణ్యకశిపోర్వక్షో విదార్యాతీవ రోషితః |
ఉద్ధృత్య చాంత్రమాలాని నఖైర్వజ్రసమప్రభైః || 9 ||
మేనే కృతార్థమాత్మానం సర్వతః పర్యవైక్షత |
హర్షితా దేవతాః సర్వాః పుష్పవృష్టిమవాకిరన్ || 10 ||
దేవదుందుభయో నేదుర్విమలాశ్చ దిశోఽభవన్ |
నరసింహమతీవోగ్రం వికీర్ణవదనం భృశం || 11 ||
లేలిహానం చ గర్జంతం కాలానలసమప్రభం |
అతిరౌద్రం మహాకాయం మహాదంష్ట్రం మహారుతం || 12 ||
మహాసింహం మహారూపం దృష్ట్వా సంక్షుభితం జగత్ |
సర్వదేవగణైః సార్థం తత్రాగత్య పితామహః || 13 ||
ఆగంతుకైర్భూతపూర్వైర్వర్తమానైరనుత్తమైః |
గుణైర్నామసహస్రేణ తుష్టావ శ్రుతిసంమతైః || 14 ||
ఓం నమః శ్రీమద్దివ్యలక్ష్మీనృసింహ సహస్రనామస్తోత్రమహామంత్రస్య బ్రహ్మా ఋషిః, శ్రీలక్ష్మీనృసింహో దేవతా, అనుష్టుప్ఛందః, శ్రీనృసింహః పరమాత్మా బీజం, లక్ష్మీర్మాయా శక్తిః, జీవో బీజం, బుద్ధిః శక్తిః, ఉదానవాయుః బీజం, సరస్వతీ శక్తిః, వ్యంజనాని బీజాని, స్వరాః శక్తయః, ఓం క్ష్రౌం హ్రీం ఇతి బీజాని, ఓం శ్రీం
అం ఆం ఇతి శక్తయః, వికీర్ణనఖదంష్ట్రాయుధాయేతి కీలకం, అకారాదితి బోధకం, శ్రీలక్ష్మీనృసింహ ప్రసాదసిద్ధ్యర్థే శ్రీలక్ష్మీనృసింహ సహస్రనామస్తోత్ర మంత్రజపే వినియోగః |
న్యాసః –
ఓం శ్రీలక్ష్మీనృసింహాయ నమః – అంగుష్ఠాభ్యాం నమః |
ఓం వజ్రనఖాయ నమః – తర్జనీభ్యాం నమః |
ఓం మహారుద్రాయ నమః – మధ్యమాభ్యాం నమః |
ఓం సర్వతోముఖాయ నమః – అనామికాభ్యాం నమః |
ఓం వికటాస్యాయ నమః – కనిష్ఠికాభ్యాం నమః |
ఓం వీరాయ నమః – కరతలకరపృష్ఠాభ్యాం నమః |
ఏవం హృదయాదిన్యాసః |
దిగ్బంధః –
ఓం ఐంద్రీం దిశం సుదర్శనేన బధ్నామి నమశ్చక్రాయ స్వాహా |
ఓం ఆగ్నేయీం దిశం సుదర్శనేన బధ్నామి నమశ్చక్రాయ స్వాహా |
ఓం యాంయాం దిశం సుదర్శనేన బధ్నామి నమశ్చక్రాయ స్వాహా |
ఓం నైరృతిం దిశం సుదర్శనేన బధ్నామి నమశ్చక్రాయ స్వాహా |
ఓం వారుణీం దిశం సుదర్శనేన బధ్నామి నమశ్చక్రాయ స్వాహా |
ఓం వాయవీం దిశం సుదర్శనేన బధ్నామి నమశ్చక్రాయ స్వాహా |
ఓం కౌబేరీం దిశం సుదర్శనేన బధ్నామి నమశ్చక్రాయ స్వాహా |
ఓం ఈశానీం దిశం సుదర్శనేన బధ్నామి నమశ్చక్రాయ స్వాహా |
ఓం ఊర్ధ్వాం దిశం సుదర్శనేన బధ్నామి నమశ్చక్రాయ స్వాహా |
ఓం అధస్తాద్దిశం దిశం సుదర్శనేన బధ్నామి నమశ్చక్రాయ స్వాహా |
ఓం అంతరిక్షాం దిశం సుదర్శనేన బధ్నామి నమశ్చక్రాయ స్వాహా |
అథ ధ్యానం |
సత్యజ్ఞానసుఖస్వరూపమమలం క్షీరాబ్ధిమధ్యే స్థితం
యోగారూఢమతిప్రసన్నవదనం భూషాసహస్రోజ్వలం |
త్ర్యక్షం చక్రపినాకసాభయకరాన్ బిభ్రాణమర్కచ్ఛవిం
ఛత్రీభూతఫణీంద్రమిందుధవలం లక్ష్మీనృసింహం భజే || 1 ||
ఉపాస్మహే నృసింహాఖ్యం బ్రహ్మ వేదాంతగోచరం |
భూయోలాలితసంసారచ్ఛేదహేతుం జగద్గురుం || 2 ||
అథ స్తోత్రం |
బ్రహ్మోవాచ |
ఓం హ్రీం శ్రీం ఐం క్ష్రౌం ||
ఓం నమో నారసింహాయ వజ్రదంష్ట్రాయ వజ్రిణే |
వజ్రదేహాయ వజ్రాయ నమో వజ్రనఖాయ చ || 1 ||
వాసుదేవాయ వంద్యాయ వరదాయ వరాత్మనే |
వరదాభయహస్తాయ వరాయ వరరూపిణే || 2 ||
వరేణ్యాయ వరిష్ఠాయ శ్రీవరాయ నమో నమః |
ప్రహ్లాదవరదాయైవ ప్రత్యక్షవరదాయ చ || 3 ||
పరాత్పరపరేశాయ పవిత్రాయ పినాకినే |
పావనాయ ప్రసన్నాయ పాశినే పాపహారిణే || 4 ||
పురుష్టుతాయ పుణ్యాయ పురుహూతాయ తే నమః |
తత్పురుషాయ తథ్యాయ పురాణపురుషాయ చ || 5 ||
పురోధసే పూర్వజాయ పుష్కరాక్షాయ తే నమః |
పుష్పహాసాయ హాసాయ మహాహాసాయ శార్ఙ్గిణే || 6 ||
సింహాయ సింహరాజాయ జగద్వశ్యాయ తే నమః |
అట్టహాసాయ రోషాయ జలవాసాయ తే నమః || 7 ||
భూతావాసాయ భాసాయ శ్రీనివాసాయ ఖడ్గినే |
ఖడ్గజిహ్వాయ సింహాయ ఖడ్గవాసాయ తే నమః || 8 ||
నమో మూలాధివాసాయ ధర్మవాసాయ ధన్వినే |
ధనంజయాయ ధన్యాయ నమో మృత్యుంజయాయ చ || 9 ||
శుభంజయాయ సూత్రాయ నమః శత్రుంజయాయ చ |
నిరంజనాయ నీరాయ నిర్గుణాయ గుణాయ చ || 10 ||
నిష్ప్రపంచాయ నిర్వాణప్రదాయ నిబిడాయ చ |
నిరాలంబాయ నీలాయ నిష్కలాయ కలాయ చ || 11 ||
నిమేషాయ నిబంధాయ నిమేషగమనాయ చ |
నిర్ద్వంద్వాయ నిరాశాయ నిశ్చయాయ నిరాయ చ || 12 ||
నిర్మలాయ నిబంధాయ నిర్మోహాయ నిరాకృతే |
నమో నిత్యాయ సత్యాయ సత్కర్మనిరతాయ చ || 13 ||
సత్యధ్వజాయ ముంజాయ ముంజకేశాయ కేశినే |
హరీశాయ చ శేషాయ గుడాకేశాయ వై నమః || 14 ||
సుకేశాయోర్ధ్వకేశాయ కేశిసంహారకాయ చ |
జలేశాయ స్థలేశాయ పద్మేశాయోగ్రరూపిణే || 15 ||
కుశేశయాయ కూలాయ కేశవాయ నమో నమః |
సూక్తికర్ణాయ సూక్తాయ రక్తజిహ్వాయ రాగిణే || 16 ||
దీప్తరూపాయ దీప్తాయ ప్రదీప్తాయ ప్రలోభినే |
ప్రచ్ఛిన్నాయ ప్రబోధాయ ప్రభవే విభవే నమః || 17 ||
ప్రభంజనాయ పాంథాయ ప్రమాయాప్రమితాయ చ |
ప్రకాశాయ ప్రతాపాయ ప్రజ్వలాయోజ్జ్వలాయ చ || 18 ||
జ్వాలామాలాస్వరూపాయ జ్వలజ్జిహ్వాయ జ్వాలినే |
మహోజ్జ్వలాయ కాలాయ కాలమూర్తిధరాయ చ || 19 ||
కాలాంతకాయ కల్పాయ కలనాయ కృతే నమః |
కాలచక్రాయ శక్రాయ వషట్చక్రాయ చక్రిణే || 20 ||
అక్రూరాయ కృతాంతాయ విక్రమాయ క్రమాయ చ |
కృత్తినే కృత్తివాసాయ కృతఘ్నాయ కృతాత్మనే || 21 ||
సంక్రమాయ చ క్రుద్ధాయ క్రాంతలోకత్రయాయ చ |
అరూపాయ స్వరూపాయ హరయే పరమాత్మనే || 22 ||
అజయాయాదిదేవాయ అక్షయాయ క్షయాయ చ |
అఘోరాయ సుఘోరాయ ఘోరఘోరతరాయ చ || 23 ||
నమోఽస్త్వఘోరవీర్యాయ లసద్ఘోరాయ తే నమః |
ఘోరాధ్యక్షాయ దక్షాయ దక్షిణాఽఽర్యాయ శంభవే || 24 ||
అమోఘాయ గుణౌఘాయ అనఘాయాఽఘహారిణే |
మేఘనాదాయ నాదాయ తుభ్యం మేఘాత్మనే నమః || 25 ||
మేఘవాహనరూపాయ మేఘశ్యామాయ మాలినే |
వ్యాలయజ్ఞోపవీతాయ వ్యాఘ్రదేహాయ వై నమః || 26 ||
వ్యాఘ్రపాదాయ చ వ్యాఘ్రకర్మిణే వ్యాపకాయ చ |
వికటాస్యాయ వీరాయ విష్టరశ్రవసే నమః || 27 ||
వికీర్ణనఖదంష్ట్రాయ నఖదంష్ట్రాయుధాయ చ |
విష్వక్సేనాయ సేనాయ విహ్వలాయ బలాయ చ || 28 ||
విరూపాక్షాయ వీరాయ విశేషాక్షాయ సాక్షిణే |
వీతశోకాయ విస్తీర్ణవదనాయ నమో నమః || 29 ||
విధానాయ విధేయాయ విజయాయ జయాయ చ |
విబుధాయ విభావాయ నమో విశ్వంభరాయ చ || 30 ||
వీతరాగాయ విప్రాయ విటంకనయనాయ చ |
విపులాయ వినీతాయ విశ్వయోనే నమో నమః || 31 ||
విడంబనాయ విత్తాయ విశ్రుతాయ వియోనయే | [చిదంబరాయ] విహ్వలాయ వివాదాయ నమో వ్యాహృతయే నమః || 32 ||
విలాసాయ వికల్పాయ మహాకల్పాయ తే నమః |
బహుకల్పాయ కల్పాయ కల్పాతీతాయ శిల్పినే || 33 ||
కల్పనాయ స్వరూపాయ ఫణితల్పాయ వై నమః |
తటిత్ప్రభాయ తార్క్ష్యాయ తరుణాయ తరస్వినే || 34 ||
తపనాయ తరక్షాయ తాపత్రయహరాయ చ |
తారకాయ తమోఘ్నాయ తత్త్వాయ చ తపస్వినే || 35 ||
తక్షకాయ తనుత్రాయ తటినే తరలాయ చ |
శతరూపాయ శాంతాయ శతధారాయ తే నమః || 36 ||
శతపత్రాయతాక్షాయ స్థితయే శతమూర్తయే |
శతక్రతుస్వరూపాయ శాశ్వతాయ శతాత్మనే || 37 ||
నమః సహస్రశిరసే సహస్రవదనాయ చ |
సహస్రాక్షాయ దేవాయ దిశశ్రోత్రాయ తే నమః || 38 ||
నమః సహస్రజిహ్వాయ మహాజిహ్వాయ తే నమః |
సహస్రనామధేయాయ సహస్రాక్షిధరాయ చ || 39 ||
సహస్రబాహవే తుభ్యం సహస్రచరణాయ చ |
సహస్రార్కప్రకాశాయ సహస్రాయుధధారిణే || 40 ||
నమః స్థూలాయ సూక్ష్మాయ సుసూక్ష్మాయ నమో నమః |
సుక్షుణ్ణాయ సుభిక్షాయ సురాధ్యక్షాయ శౌరిణే || 41 ||
ధర్మాధ్యక్షాయ ధర్మాయ లోకాధ్యక్షాయ వై నమః |
ప్రజాధ్యక్షాయ శిక్షాయ విపక్షక్షయమూర్తయే || 42 ||
కాలాధ్యక్షాయ తీక్ష్ణాయ మూలాధ్యక్షాయ తే నమః |
అధోక్షజాయ మిత్రాయ సుమిత్రవరుణాయ చ || 43 ||
శత్రుఘ్నాయ అవిఘ్నాయ విఘ్నకోటిహరాయ చ |
రక్షోఘ్నాయ తమోఘ్నాయ భూతఘ్నాయ నమో నమః || 44 ||
భూతపాలాయ భూతాయ భూతావాసాయ భూతినే |
భూతవేతాళఘాతాయ భూతాధిపతయే నమః || 45 ||
భూతగ్రహవినాశాయ భూతసంయమతే నమః |
మహాభూతాయ భృగవే సర్వభూతాత్మనే నమః || 46 ||
సర్వారిష్టవినాశాయ సర్వసంపత్కరాయ చ |
సర్వాధారాయ శర్వాయ సర్వార్తిహరయే నమః || 47 ||
సర్వదుఃఖప్రశాంతాయ సర్వసౌభాగ్యదాయినే |
సర్వజ్ఞాయాప్యనంతాయ సర్వశక్తిధరాయ చ || 48 ||
సర్వైశ్వర్యప్రదాత్రే చ సర్వకార్యవిధాయినే |
సర్వజ్వరవినాశాయ సర్వరోగాపహారిణే || 49 ||
సర్వాభిచారహంత్రే చ సర్వైశ్వర్యవిధాయినే |
పింగాక్షాయైకశృంగాయ ద్విశృంగాయ మరీచయే || 50 ||
బహుశృంగాయ లింగాయ మహాశృంగాయ తే నమః |
మాంగళ్యాయ మనోజ్ఞాయ మంతవ్యాయ మహాత్మనే || 51 ||
మహాదేవాయ దేవాయ మాతులింగధరాయ చ |
మహామాయాప్రసూతాయ ప్రస్తుతాయ చ మాయినే || 52 ||
అనంతానంతరూపాయ మాయినే జలశాయినే |
మహోదరాయ మందాయ మదదాయ మదాయ చ || 53 ||
మధుకైటభహంత్రే చ మాధవాయ మురారయే |
మహావీర్యాయ ధైర్యాయ చిత్రవీర్యాయ తే నమః || 54 ||
చిత్రకూర్మాయ చిత్రాయ నమస్తే చిత్రభానవే |
మాయాతీతాయ మాయాయ మహావీరాయ తే నమః || 55 ||
మహాతేజాయ బీజాయ తేజోధాంనే చ బీజినే |
తేజోమయనృసింహాయ నమస్తే చిత్రభానవే || 56 ||
మహాదంష్ట్రాయ తుష్టాయ నమః పుష్టికరాయ చ |
శిపివిష్టాయ హృష్టాయ పుష్టాయ పరమేష్ఠినే || 57 ||
విశిష్టాయ చ శిష్టాయ గరిష్ఠాయేష్టదాయినే |
నమో జ్యేష్ఠాయ శ్రేష్ఠాయ తుష్టాయామితతేజసే || 58 ||
అష్టాంగన్యస్తరూపాయ సర్వదుష్టాంతకాయ చ |
వైకుంఠాయ వికుంఠాయ కేశికంఠాయ తే నమః || 59 ||
కంఠీరవాయ లుంఠాయ నిశ్శఠాయ హఠాయ చ |
సత్వోద్రిక్తాయ రుద్రాయ ఋగ్యజుస్సామగాయ చ || 60 ||
ఋతుధ్వజాయ వజ్రాయ మంత్రరాజాయ మంత్రిణే |
త్రినేత్రాయ త్రివర్గాయ త్రిధాంనే చ త్రిశూలినే || 61 ||
త్రికాలజ్ఞానరూపాయ త్రిదేహాయ త్రిధాత్మనే |
నమస్త్రిమూర్తివిద్యాయ త్రితత్త్వజ్ఞానినే నమః || 62 ||
అక్షోభ్యాయానిరుద్ధాయ అప్రమేయాయ భానవే |
అమృతాయ అనంతాయ అమితాయామితౌజసే || 63 ||
అపమృత్యువినాశాయ అపస్మారవిఘాతినే |
అన్నదాయాన్నరూపాయ అన్నాయాన్నభుజే నమః || 64 ||
నాద్యాయ నిరవద్యాయ విద్యాయాద్భుతకర్మణే |
సద్యోజాతాయ సంఘాయ వైద్యుతాయ నమో నమః || 65 ||
అధ్వాతీతాయ సత్త్వాయ వాగతీతాయ వాగ్మినే |
వాగీశ్వరాయ గోపాయ గోహితాయ గవాం పతే || 66 ||
గంధర్వాయ గభీరాయ గర్జితాయోర్జితాయ చ |
పర్జన్యాయ ప్రబుద్ధాయ ప్రధానపురుషాయ చ || 67 ||
పద్మాభాయ సునాభాయ పద్మనాభాయ మానినే |
పద్మనేత్రాయ పద్మాయ పద్మాయాః పతయే నమః || 68 ||
పద్మోదరాయ పూతాయ పద్మకల్పోద్భవాయ చ |
నమో హృత్పద్మవాసాయ భూపద్మోద్ధరణాయ చ || 69 ||
శబ్దబ్రహ్మస్వరూపాయ బ్రహ్మరూపధరాయ చ |
బ్రహ్మణే బ్రహ్మరూపాయ పద్మనేత్రాయ తే నమః || 70 ||
బ్రహ్మదాయ బ్రాహ్మణాయ బ్రహ్మబ్రహ్మాత్మనే నమః |
సుబ్రహ్మణ్యాయ దేవాయ బ్రహ్మణ్యాయ త్రివేదినే || 71 ||
పరబ్రహ్మస్వరూపాయ పంచబ్రహ్మాత్మనే నమః |
నమస్తే బ్రహ్మశిరసే తథాఽశ్వశిరసే నమః || 72 ||
అథర్వశిరసే నిత్యమశనిప్రమితాయ చ |
నమస్తే తీక్ష్ణదంష్ట్రాయ లోలాయ లలితాయ చ || 73 ||
లావణ్యాయ లవిత్రాయ నమస్తే భాసకాయ చ |
లక్షణజ్ఞాయ లక్షాయ లక్షణాయ నమో నమః || 74 ||
లసద్దీప్తాయ లిప్తాయ విష్ణవే ప్రభవిష్ణవే |
వృష్ణిమూలాయ కృష్ణాయ శ్రీమహావిష్ణవే నమః || 75 ||
పశ్యామి త్వాం మహాసింహం హారిణం వనమాలినం |
కిరీటినం కుండలినం సర్వాంగం సర్వతోముఖం || 76 ||
సర్వతః పాణిపాదోరః సర్వతోఽక్షిశిరోముఖం |
సర్వేశ్వరం సదాతుష్టం సమర్థం సమరప్రియం || 77 ||
బహుయోజనవిస్తీర్ణం బహుయోజనమాయతం |
బహుయోజనహస్తాంఘ్రిం బహుయోజననాసికం || 78 ||
మహారూపం మహావక్త్రం మహాదంష్ట్రం మహాభుజం |
మహానాదం మహారౌద్రం మహాకాయం మహాబలం || 79 ||
ఆనాభేర్బ్రహ్మణో రూపమాగలాద్వైష్ణవం తథా |
ఆశీర్షాద్రుద్రమీశానం తదగ్రే సర్వతః శివం || 80 ||
నమోఽస్తు నారాయణనారసింహ
నమోఽస్తు నారాయణవీరసింహ |
నమోఽస్తు నారాయణక్రూరసింహ
నమోఽస్తు నారాయణదివ్యసింహ || 81 ||
నమోఽస్తు నారాయణవ్యాఘ్రసింహ
నమోఽస్తు నారాయణపుచ్ఛసింహ |
నమోఽస్తు నారాయణపూర్ణసింహ
నమోఽస్తు నారాయణరౌద్రసింహ || 82 ||
నమో నమో భీషణభద్రసింహ
నమో నమో విహ్వలనేత్రసింహ |
నమో నమో బృంహితభూతసింహ
నమో నమో నిర్మలచిత్రసింహ || 83 ||
నమో నమో నిర్జితకాలసింహ
నమో నమః కల్పితకల్పసింహ |
నమో నమో కామదకామసింహ
నమో నమస్తే భువనైకసింహ || 84 ||
ద్యావాపృథివ్యోరిదమంతరం హి
వ్యాప్తం త్వయైకేన దిశశ్చ సర్వాః |
దృష్ట్వాద్భుతం రూపముగ్రం తవేదం
లోకత్రయం ప్రవ్యథితం మహాత్మన్ || 85 ||
అమీ హిత్వా సురసంఘా విశంతి
కేచిద్భీతాః ప్రాంజలయో గృణంతి |
స్వస్తీత్యుక్త్వా మునయః సిద్ధసంఘాః
స్తువంతి త్వాం స్తుతిభిః పుష్కలాభిః || 86 ||
రుద్రాదిత్యావసవో యే చ సాధ్యా
విశ్వేదేవా మరుతశ్చోష్మపాశ్చ |
గంధర్వయక్షాసురసిద్ధసంఘా
వీక్షంతి త్వాం విస్మితాశ్చైవ సర్వే || 87 ||
లేలిహ్యసే గ్రసమానః సమంతా-
-ల్లోకాన్ సమగ్రాన్వదనైర్జ్వలద్భిః |
తేజోభిరాపూర్య జగత్సమగ్రం
భాసస్తవోగ్రాః ప్రతపంతి విష్ణో || 88 ||
భవిష్ణుస్త్వం సహిష్ణుస్త్వం భ్రాజిష్ణుర్జిష్ణురేవ చ |
పృథివీమంతరిక్షం త్వం పర్వతారణ్యమేవ చ || 89 ||
కలాకాష్ఠావిలిప్తస్త్వం ముహూర్తప్రహరాదికం |
అహోరాత్రం త్రిసంధ్యా చ పక్షమాసర్తువత్సరాః || 90 ||
యుగాదిర్యుగభేదస్త్వం సంయుగో యుగసంధయః |
నిత్యం నైమిత్తికం దైనం మహాప్రలయమేవ చ || 91 ||
కరణం కారణం కర్తా భర్తా హర్తా త్వమీశ్వరః |
సత్కర్తా సత్కృతిర్గోప్తా సచ్చిదానందవిగ్రహః || 92 ||
ప్రాణస్త్వం ప్రాణినాం ప్రత్యగాత్మా త్వం సర్వదేహినాం |
సుజ్యోతిస్త్వం పరంజ్యోతిరాత్మజ్యోతిః సనాతనః || 93 ||
జ్యోతిర్లోకస్వరూపస్త్వం జ్ఞో జ్యోతిర్జ్యోతిషాం పతిః | [జ్యోతిర్జ్ఞో] స్వాహాకారః స్వధాకారో వషట్కారః కృపాకరః || 94 ||
హంతకారో నిరాకారో వేగాకారశ్చ శంకరః |
అకారాదిహకారాంత ఓంకారో లోకకారకః || 95 ||
ఏకాత్మా త్వమనేకాత్మా చతురాత్మా చతుర్భుజః |
చతుర్మూర్తిశ్చతుర్దంష్ట్రశ్చతుర్వేదమయోత్తమః || 96 ||
లోకప్రియో లోకగురుర్లోకేశో లోకనాయకః |
లోకసాక్షీ లోకపతిర్లోకాత్మా లోకలోచనః || 97 ||
లోకాధారో బృహల్లోకో లోకాలోకమయో విభుః |
లోకకర్తా విశ్వకర్తా కృతావర్తః కృతాగమః || 98 ||
అనాదిస్త్వమనంతస్త్వమభూతో భూతవిగ్రహః |
స్తుతిః స్తుత్యః స్తవప్రీతః స్తోతా నేతా నియామకః || 99 ||
త్వం గతిస్త్వం మతిర్మహ్యం పితా మాతా గురుః సఖా |
సుహృదశ్చాత్మరూపస్త్వం త్వాం వినా నాస్తి మే గతిః || 100 ||
నమస్తే మంత్రరూపాయ అస్త్రరూపాయ తే నమః |
బహురూపాయ రూపాయ పంచరూపధరాయ చ || 101 ||
భద్రరూపాయ రూఢాయ యోగరూపాయ యోగినే |
సమరూపాయ యోగాయ యోగపీఠస్థితాయ చ || 102 ||
యోగగంయాయ సౌంయాయ ధ్యానగంయాయ ధ్యాయినే |
ధ్యేయగంయాయ ధాంనే చ ధామాధిపతయే నమః || 103 ||
ధరాధరాయ ధర్మాయ ధారణాభిరతాయ చ |
నమో ధాత్రే చ సంధాత్రే విధాత్రే చ ధరాయ చ || 104 ||
దామోదరాయ దాంతాయ దానవాంతకరాయ చ |
నమః సంసారవైద్యాయ భేషజాయ నమో నమః || 105 ||
సీరధ్వజాయ శీతాయ వాతాయాప్రమితాయ చ |
సారస్వతాయ సంసారనాశనాయాక్షమాలినే || 106 ||
అసిచర్మధరాయైవ షట్కర్మనిరతాయ చ |
వికర్మాయ సుకర్మాయ పరకర్మవిధాయినే || 107 ||
సుశర్మణే మన్మథాయ నమో వర్మాయ వర్మిణే |
కరిచర్మవసానాయ కరాలవదనాయ చ || 108 ||
కవయే పద్మగర్భాయ భూతగర్భ ఘృణానిధే |
బ్రహ్మగర్భాయ గర్భాయ బృహద్గర్భాయ ధూర్జటే || 109 ||
నమస్తే విశ్వగర్భాయ శ్రీగర్భాయ జితారయే |
నమో హిరణ్యగర్భాయ హిరణ్యకవచాయ చ || 110 ||
హిరణ్యవర్ణదేహాయ హిరణ్యాక్షవినాశినే |
హిరణ్యకశిపోర్హంత్రే హిరణ్యనయనాయ చ || 111 ||
హిరణ్యరేతసే తుభ్యం హిరణ్యవదనాయ చ |
నమో హిరణ్యశృంగాయ నిఃశృంగాయ చ శృంగిణే || 112 ||
భైరవాయ సుకేశాయ భీషణాయాంత్రమాలినే |
చండాయ రుండమాలాయ నమో దండధరాయ చ || 113 ||
అఖండతత్త్వరూపాయ కమండలుధరాయ చ |
నమస్తే ఖండసింహాయ సత్యసింహాయ తే నమః || 114 ||
నమస్తే శ్వేతసింహాయ పీతసింహాయ తే నమః |
నీలసింహాయ నీలాయ రక్తసింహాయ తే నమః || 115 ||
నమో హారిద్రసింహాయ ధూంరసింహాయ తే నమః |
మూలసింహాయ మూలాయ బృహత్సింహాయ తే నమః || 116 ||
పాతాలస్థితసింహాయ నమః పర్వతవాసినే |
నమో జలస్థసింహాయ అంతరిక్షస్థితాయ చ || 117 ||
కాలాగ్నిరుద్రసింహాయ చండసింహాయ తే నమః |
అనంతసింహసింహాయ అనంతగతయే నమః || 118 ||
నమో విచిత్రసింహాయ బహుసింహస్వరూపిణే |
అభయంకరసింహాయ నరసింహాయ తే నమః || 119 ||
నమోఽస్తు సింహరాజాయ నారసింహాయ తే నమః |
సప్తాబ్ధిమేఖలాయైవ సత్యసత్యస్వరూపిణే || 120 ||
సప్తలోకాంతరస్థాయ సప్తస్వరమయాయ చ |
సప్తార్చీరూపదంష్ట్రాయ సప్తాశ్వరథరూపిణే || 121 ||
సప్తవాయుస్వరూపాయ సప్తచ్ఛందోమయాయ చ |
స్వచ్ఛాయ స్వచ్ఛరూపాయ స్వచ్ఛందాయ చ తే నమః || 122 ||
శ్రీవత్సాయ సువేషాయ శ్రుతయే శ్రుతిమూర్తయే |
శుచిశ్రవాయ శూరాయ సుప్రభాయ సుధన్వినే || 123 ||
శుభ్రాయ సురనాథాయ సుప్రభాయ శుభాయ చ |
సుదర్శనాయ సూక్ష్మాయ నిరుక్తాయ నమో నమః || 124 ||
సుప్రభాయ స్వభావాయ భవాయ విభవాయ చ |
సుశాఖాయ విశాఖాయ సుముఖాయ ముఖాయ చ || 125 ||
సునఖాయ సుదంష్ట్రాయ సురథాయ సుధాయ చ |
సాంఖ్యాయ సురముఖ్యాయ ప్రఖ్యాతాయ ప్రభాయ చ || 126 ||
నమః ఖట్వాంగహస్తాయ ఖేటముద్గరపాణయే |
ఖగేంద్రాయ మృగేంద్రాయ నాగేంద్రాయ దృఢాయ చ || 127 ||
నాగకేయూరహారాయ నాగేంద్రాయాఘమర్దినే |
నదీవాసాయ నగ్నాయ నానారూపధరాయ చ || 128 ||
నాగేశ్వరాయ నాగాయ నమితాయ నరాయ చ |
నాగాంతకరథాయైవ నరనారాయణాయ చ || 129 ||
నమో మత్స్యస్వరూపాయ కచ్ఛపాయ నమో నమః |
నమో యజ్ఞవరాహాయ నరసింహాయ తే నమః || 130 ||
విక్రమాక్రాంతలోకాయ వామనాయ మహౌజసే |
నమో భార్గవరామాయ రావణాంతకరాయ చ || 131 ||
నమస్తే బలరామాయ కంసప్రధ్వంసకారిణే |
బుద్ధాయ బుద్ధరూపాయ తీక్ష్ణరూపాయ కల్కినే || 132 ||
ఆత్రేయాయాగ్నినేత్రాయ కపిలాయ ద్విజాయ చ |
క్షేత్రాయ పశుపాలాయ పశువక్త్రాయ తే నమః || 133 ||
గృహస్థాయ వనస్థాయ యతయే బ్రహ్మచారిణే |
స్వర్గాపవర్గదాత్రే చ తద్భోక్త్రే చ ముముక్షవే || 134 ||
శాలగ్రామనివాసాయ క్షీరాబ్ధిశయనాయ చ |
శ్రీశైలాద్రినివాసాయ శిలావాసాయ తే నమః || 135 ||
యోగిహృత్పద్మవాసాయ మహాహాసాయ తే నమః |
గుహావాసాయ గుహ్యాయ గుప్తాయ గురవే నమః || 136 ||
నమో మూలాధివాసాయ నీలవస్త్రధరాయ చ |
పీతవస్త్రాయ శస్త్రాయ రక్తవస్త్రధరాయ చ || 137 ||
రక్తమాలావిభూషాయ రక్తగంధానులేపినే |
ధురంధరాయ ధూర్తాయ దుర్ధరాయ ధరాయ చ || 138 ||
దుర్మదాయ దురంతాయ దుర్ధరాయ నమో నమః |
దుర్నిరీక్ష్యాయ నిష్ఠాయ దుర్దర్శాయ ద్రుమాయ చ || 139 ||
దుర్భేదాయ దురాశాయ దుర్లభాయ నమో నమః |
దృప్తాయ దృప్తవక్త్రాయ అదృప్తనయనాయ చ || 140 ||
ఉన్మత్తాయ ప్రమత్తాయ నమో దైత్యారయే నమః |
రసజ్ఞాయ రసేశాయ ఆరక్తరసనాయ చ || 141 ||
పథ్యాయ పరితోషాయ రథ్యాయ రసికాయ చ |
ఊర్ధ్వకేశోర్ధ్వరూపాయ నమస్తే చోర్ధ్వరేతసే || 142 ||
ఊర్ధ్వసింహాయ సింహాయ నమస్తే చోర్ధ్వబాహవే |
పరప్రధ్వంసకాయైవ శంఖచక్రధరాయ చ || 143 ||
గదాపద్మధరాయైవ పంచబాణధరాయ చ |
కామేశ్వరాయ కామాయ కామపాలాయ కామినే || 144 ||
నమః కామవిహారాయ కామరూపధరాయ చ |
సోమసూర్యాగ్నినేత్రాయ సోమపాయ నమో నమః || 145 ||
నమః సోమాయ వామాయ వామదేవాయ తే నమః |
సామస్వనాయ సౌంయాయ భక్తిగంయాయ వై నమః || 146 ||
కూష్మాండగణనాథాయ సర్వశ్రేయస్కరాయ చ |
భీష్మాయ భీషదాయైవ భీమవిక్రమణాయ చ || 147 ||
మృగగ్రీవాయ జీవాయ జితాయాజితకారిణే |
జటినే జామదగ్న్యాయ నమస్తే జాతవేదసే || 148 ||
జపాకుసుమవర్ణాయ జప్యాయ జపితాయ చ |
జరాయుజాయాండజాయ స్వేదజాయోద్భిజాయ చ || 149 ||
జనార్దనాయ రామాయ జాహ్నవీజనకాయ చ |
జరాజన్మాదిదూరాయ ప్రద్యుంనాయ ప్రమోదినే || 150 ||
జిహ్వారౌద్రాయ రుద్రాయ వీరభద్రాయ తే నమః |
చిద్రూపాయ సముద్రాయ కద్రుద్రాయ ప్రచేతసే || 151 ||
ఇంద్రియాయేంద్రియజ్ఞాయ నమోఽస్త్వింద్రానుజాయ చ |
అతీంద్రియాయ సారాయ ఇందిరాపతయే నమః || 152 ||
ఈశానాయ చ ఈడ్యాయ ఈశితాయ ఇనాయ చ |
వ్యోమాత్మనే చ వ్యోంనే చ నమస్తే వ్యోమకేశినే || 153 ||
వ్యోమాధారాయ చ వ్యోమవక్త్రాయాసురఘాతినే |
నమస్తే వ్యోమదంష్ట్రాయ వ్యోమవాసాయ తే నమః || 154 ||
సుకుమారాయ రామాయ శుభాచారాయ వై నమః |
విశ్వాయ విశ్వరూపాయ నమో విశ్వాత్మకాయ చ || 155 ||
జ్ఞానాత్మకాయ జ్ఞానాయ విశ్వేశాయ పరాత్మనే |
ఏకాత్మనే నమస్తుభ్యం నమస్తే ద్వాదశాత్మనే || 156 ||
చతుర్వింశతిరూపాయ పంచవింశతిమూర్తయే |
షడ్వింశకాత్మనే నిత్యం సప్తవింశతికాత్మనే || 157 ||
ధర్మార్థకామమోక్షాయ విరక్తాయ నమో నమః |
భావశుద్ధాయ సిద్ధాయ సాధ్యాయ శరభాయ చ || 158 ||
ప్రబోధాయ సుబోధాయ నమో బుద్ధిప్రియాయ చ |
స్నిగ్ధాయ చ విదగ్ధాయ ముగ్ధాయ మునయే నమః || 159 ||
ప్రియంవదాయ శ్రవ్యాయ స్రుక్స్రువాయ శ్రితాయ చ |
గృహేశాయ మహేశాయ బ్రహ్మేశాయ నమో నమః || 160 ||
శ్రీధరాయ సుతీర్థాయ హయగ్రీవాయ తే నమః |
ఉగ్రాయ ఉగ్రవేగాయ ఉగ్రకర్మరతాయ చ || 161 ||
ఉగ్రనేత్రాయ వ్యగ్రాయ సమగ్రగుణశాలినే |
బాలగ్రహవినాశాయ పిశాచగ్రహఘాతినే || 162 ||
దుష్టగ్రహనిహంత్రే చ నిగ్రహానుగ్రహాయ చ |
వృషధ్వజాయ వృష్ణ్యాయ వృషాయ వృషభాయ చ || 163 ||
ఉగ్రశ్రవాయ శాంతాయ నమః శ్రుతిధరాయ చ |
నమస్తే దేవదేవేశ నమస్తే మధుసూదన || 164 ||
నమస్తే పుండరీకాక్ష నమస్తే దురితక్షయ |
నమస్తే కరుణాసింధో నమస్తే సమితింజయ || 165 ||
నమస్తే నరసింహాయ నమస్తే గరుడధ్వజ |
యజ్ఞనేత్ర నమస్తేఽస్తు కాలధ్వజ జయధ్వజ || 166 ||
అగ్నినేత్ర నమస్తేఽస్తు నమస్తే హ్యమరప్రియ |
మహానేత్ర నమస్తేఽస్తు నమస్తే భక్తవత్సల || 167 ||
ధర్మనేత్ర నమస్తేఽస్తు నమస్తే కరుణాకర |
పుణ్యనేత్ర నమస్తేఽస్తు నమస్తేఽభీష్టదాయక || 168 ||
నమో నమస్తే జయసింహరూప
నమో నమస్తే నరసింహరూప |
నమో నమస్తే రణసింహరూప
నమో నమస్తే నరసింహరూప || 169 ||
ఉద్ధృత్య గర్వితం దైత్యం నిహత్యాజౌ సురద్విషం |
దేవకార్యం మహత్కృత్వా గర్జసే స్వాత్మతేజసా || 170 ||
అతిరౌద్రమిదం రూపం దుస్సహం దురతిక్రమం |
దృష్ట్వా తు శంకితాః సర్వా దేవతాస్త్వాముపాగతాః || 171 ||
ఏతాన్పశ్య మహేశానం బ్రహ్మాణం మాం శచీపతిం |
దిక్పాలాన్ ద్వాదశాదిత్యాన్ రుద్రానురగరాక్షసాన్ || 172 ||
సర్వాన్ ఋషిగణాన్ సప్తమాతృర్గౌరీం సరస్వతీం |
లక్ష్మీం నదీశ్చ తీర్థాని రతిం భూతగణాన్యపి || 173 ||
ప్రసీద త్వం మహాసింహ ఉగ్రభావమిమం త్యజ |
ప్రకృతిస్థో భవ త్వం హి శాంతిభావం చ ధారయ || 174 ||
ఇత్యుక్త్వా దండవద్భూమౌ పపాత స పితామహః |
ప్రసీద త్వం ప్రసీద త్వం ప్రసీదేతి పునః పునః || 175 ||
మార్కండేయ ఉవాచ |
దృష్ట్వా తు దేవతాః సర్వాః శ్రుత్వా తాం బ్రహ్మణో గిరం |
స్తోత్రేణాపి చ సంహృష్టః సౌంయభావమధారయత్ || 176 ||
అబ్రవీన్నారసింహస్తు వీక్ష్య సర్వాన్ సురోత్తమాన్ |
సంత్రస్తాన్ భయసంవిగ్నాన్ శరణం సముపాగతాన్ || 177 ||
శ్రీనృసింహ ఉవాచ |
భో భో దేవవరాః సర్వే పితామహపురోగమాః |
శృణుధ్వం మమ వాక్యం చ భవంతు విగతజ్వరాః || 178 ||
యద్ధితం భవతాం నూనం తత్కరిష్యామి సాంప్రతం |
ఏవం నామసహస్రం మే త్రిసంధ్యం యః పఠేత్ శుచిః || 179 ||
శృణోతి వా శ్రావయతి పూజాంతే భక్తిసంయుతః |
సర్వాన్ కామానవాప్నోతి జీవేచ్చ శరదాం శతం || 180 ||
యో నామభిర్నృసింహాద్యైరర్చయేత్క్రమశో మమ |
సర్వతీర్థేషు యత్పుణ్యం సర్వతీర్థేషు యత్ఫలం || 181 ||
సర్వపూజాసు యత్ప్రోక్తం తత్సర్వం లభతే భృశం |
జాతిస్మరత్వం లభతే బ్రహ్మజ్ఞానం సనాతనం || 182 ||
సర్వపాపవినిర్ముక్తః తద్విష్ణోః పరమం పదం |
మన్నామకవచం బధ్వా విచరేద్విగతజ్వరః || 183 ||
భూతభేతాలకూష్మాండ పిశాచబ్రహ్మరాక్షసాః |
శాకినీడాకినీజ్యేష్ఠా నీలీ బాలగ్రహాదికాః || 184 ||
దుష్టగ్రహాశ్చ నశ్యంతి యక్షరాక్షసపన్నగాః |
యే చ సంధ్యాగ్రహాః సర్వే చాండాలగ్రహసంజ్ఞికాః || 185 ||
నిశాచరగ్రహాః సర్వే ప్రణశ్యంతి చ దూరతః |
కుక్షిరోగం చ హృద్రోగం శూలాపస్మారమేవ చ || 186 ||
ఐకాహికం ద్వ్యాహికం చ చాతుర్థికమథ జ్వరం |
ఆధయో వ్యాధయః సర్వే రోగా రోగాధిదేవతాః || 187 ||
శీఘ్రం నశ్యంతి తే సర్వే నృసింహస్మరణాత్ సురాః |
రాజానో దాసతాం యాంతి శత్రవో యాంతి మిత్రతాం || 188 ||
జలాని స్థలతాం యాంతి వహ్నయో యాంతి శీతతాం |
విషాణ్యప్యమృతా యాంతి నృసింహస్మరణాత్సురాః || 189 ||
రాజ్యకామో లభేద్రాజ్యం ధనకామో లభేద్ధనం |
విద్యాకామో లభేద్విద్యాం బద్ధో ముచ్యేత బంధనాత్ || 190 ||
వ్యాలవ్యాఘ్రభయం నాస్తి చోరసర్పాదికం తథా |
అనుకూలా భవేద్భార్యా లోకైశ్చ ప్రతిపూజ్యతే || 191 ||
సుపుత్రం ధనధాన్యం చ భవంతి విగతజ్వరాః |
ఏతత్సర్వం సమాప్నోతి నృసింహస్య ప్రసాదతః || 192 ||
జలసంతరణే చైవ పర్వతారణ్యమేవ చ |
వనేఽపి విచిరన్మర్త్యో దుర్గమే విషమే పథి || 193 ||
బిలప్రవేశనే చాపి నారసింహం న విస్మరేత్ |
బ్రహ్మఘ్నశ్చ పశుఘ్నశ్చ భ్రూణహా గురుతల్పగః || 194 ||
ముచ్యతే సర్వపాపేభ్యః కృతఘ్నః స్త్రీవిఘాతకః |
వేదానాం దూషకశ్చాపి మాతాపితృవినిందకః || 195 ||
అసత్యస్తు తేథా యజ్ఞనిందకో లోకనిందకః |
స్మృత్వా సకృన్నృసింహం తు ముచ్యతే సర్వకిల్బిషైః || 196 ||
బహునాత్ర కిముక్తేన స్మృత్వా మాం శుద్ధమానసః |
యత్ర యత్ర చరేన్మర్త్యో నృసింహస్తత్ర రక్షతి || 197 ||
గచ్ఛన్ తిష్ఠన్ స్వపన్ భుంజన్ జాగ్రన్నపి హసన్నపి |
నృసింహేతి నృసింహేతి నృసింహేతి సదా స్మరన్ || 198 ||
పుమాన్న లిప్యతే పాపైర్భుక్తిం ముక్తిం చ విందతి |
నారీ సుభగతామేతి సౌభాగ్యం చ స్వరూపతాం || 199 ||
భర్తుః ప్రియత్వం లభతే న వైధవ్యం చ విందతి |
న సపత్నీం చ జన్మాంతే సంయక్ జ్ఞానీ భవేద్విజః || 200 ||
భూమిప్రదక్షిణాన్మర్త్యో యత్ఫలం లభతే చిరాత్ |
తత్ఫలం లభతే నారసింహమూర్తిప్రదక్షిణాత్ || 201 ||
మార్కండేయ ఉవాచ |
ఇత్యుక్త్వా దేవదేవేశో లక్ష్మీమాలింగ్య లీలయా |
ప్రహ్లాదస్యాభిషేకం తు బ్రహ్మణే చోపదిష్టవాన్ || 202 ||
శ్రీశైలస్య ప్రసాదే తు లోకానాం చ హితాయ వై |
స్వరూపం స్థాపయామాస ప్రకృతిస్థోఽభవత్తదా || 203 ||
బ్రహ్మాపి దైత్యరాజానం ప్రహ్లాదమభ్యషేచయత్ |
దైవతైః సహ సుప్రీతో హ్యాత్మలోకం యయౌ స్వయం || 204 ||
హిరణ్యకశిపోర్భీత్యా ప్రపలాయ్య శచీపతిః |
స్వర్గరాజ్యపరిభ్రష్టో యుగానామేకవింశతిం || 205 ||
నృసింహేన హతే దైత్యే స్వర్గలోకమవాప సః |
దిక్పాలాశ్చ సుసంప్రాప్తః స్వస్వస్థానమనుత్తమం || 206 ||
ధర్మే మతిః సమస్తానాం ప్రజానామభవత్తదా |
ఏవం నామసహస్రం మే బ్రహ్మణా నిర్మితం పురా || 207 ||
పుత్రానధ్యాపయామాస సనకాదీన్మహామతిః |
ఊచుస్తే చ తతః సర్వలోకానాం హితకాంయయా || 208 ||
దేవతా ఋషయః సిద్ధా యక్షవిద్యాధరోరగాః |
గంధర్వాశ్చ మనుష్యాశ్చ ఇహాముత్రఫలైషిణః || 209 ||
యస్య స్తోత్రస్య పాఠాద్ధి విశుద్ధమనసోఽభవన్ |
సనత్కుమారః సంప్రాప్తో భారద్వాజో మహామతిః || 210 ||
తస్మాదాంగిరసః ప్రాప్తస్తస్మాత్ప్రాప్తో మహాక్రతుః |
జగ్రాహ భార్గవస్తస్మాదగ్నిమిత్రాయ సోఽబ్రవీత్ || 211|
జైగీషవ్యాయ స ప్రాహ సోఽబ్రవీచ్చ్యవనాయ చ |
తస్మా ఉవాచ శాండిల్యో గర్గాయ ప్రాహ వై మునిః || 212 ||
క్రతుంజయాయ స ప్రాహ జతుకర్ణ్యాయ సంయమీ |
విష్ణువృద్ధాయ సోఽప్యాహ సోఽపి బోధాయనాయ చ || 213 ||
క్రమాత్స విష్ణవే ప్రాహ స ప్రాహోద్ధామకుక్షయే |
సింహతేజాశ్చ తస్మాచ్చ శ్రీప్రియాయ దదౌ చ నః || 214 || [సః] ఉపదిష్టోఽస్మి తేనాహమిదం నామసహస్రకం |
తత్ప్రసాదాదమృత్యుర్మే యస్మాత్కస్మాద్భయం న హి || 215 ||
మయా చ కథితం నారసింహస్తోత్రమిదం తవ |
త్వం హి నిత్యం శుచిర్భూత్వా తమారాధయ శాశ్వతం || 216 ||
సర్వభూతాశ్రయం దేవం నృసింహం భక్తవత్సలం |
పూజయిత్వా స్తవం జప్త్వా హుత్వా నిశ్చలమానసః || 217 ||
ప్రాప్యసే మహతీం సిద్ధిం సర్వాన్ కామాన్వరోత్తమాన్ |
అయమేవ పరోధర్మస్త్విదమేవ పరం తపః || 218 ||
ఇదమేవ పరం జ్ఞానమిదమేవ మహద్వ్రతం |
అయమేవ సదాచారస్త్వయమేవ సదా మఖః || 219 ||
ఇదమేవ త్రయో వేదాః సచ్ఛాస్త్రాణ్యాగమాని చ |
నృసింహమంత్రాదన్యచ్చ వైదికం తు న విద్యతే || 220 ||
యదిహాస్తి తదన్యత్ర యన్నేహాస్తి న తత్క్వచిత్ |
కథితం తే నృసింహస్య చరితం పాపనాశనం || 221 ||
సర్వమంత్రమయం తాపత్రయోపశమనం పరం |
సర్వార్థసాధనం దివ్యం కిం భూయః శ్రోతుమిచ్ఛసి || 222 ||
ఇతి శ్రీనృసింహపురాణే నృసింహప్రాదుర్భావే శ్రీమద్దివ్య లక్ష్మీనృసింహ సహస్రనామ స్తోత్రం ||

 శ్రీ లక్ష్మీనృసింహ మంగళం

అపారకరుణాసింధో నివారణపరానిమాన్ |
విదారయ హిరణ్యాక్ష విదారణ నఖాయుధైః || 1 ||
సర్వవేదాంతవేద్యాయ కారణాయ మహాత్మనే |
సర్వలోకశరణ్యాయ శ్రీనృసింహాయ మంగళం || 2 ||
శేషినే సర్వవస్తూనాం వాంఛితార్థప్రదాయినే |
సంశ్రితానాం సదా భూయాత్ శ్రీనృసింహాయ మంగళం || 3 ||
పవిత్రాణాం పవిత్రాయ ప్రాపకాయ ఫలాత్మనే |
భద్రాణామపి భద్రాయ శ్రీనృసింహాయ మంగళం || 4 ||
ఆదివణ్ శఠకోపాఖ్యైర్మునివర్యైర్మహాత్మభిః |
సమర్చితాయ నిత్యాయ శ్రీనృసింహాయ మంగళం || 5 ||
జగజ్జన్మాదిలక్ష్యాయ స్వేచ్ఛాస్వీకృతమూర్తయే |
విధ్వస్తాఖిలహేయాయ శ్రీనృసింహాయ మంగళం || 6 ||
జ్ఞానానందస్వరూపాయ జ్ఞానశక్త్యాదిసింధవే |
బంధవే సర్వలోకానాం శ్రీనృసింహాయ మంగళం || 7 ||
కాయాధవ పరిత్రాణ భావిత స్తంభజన్మనే |
బ్రహ్మేంద్రాదిస్తుతాయ స్యాత్ శ్రీనృసింహాయ మంగళం || 8 ||
గుణలేశవిహీనస్య సర్వహేయాస్పదస్య మే |
మంక్షుక్షంత్రేఽప్యనంతాన్ స్యాత్ శ్రీనృసింహాయ మంగళం || 9 ||
శ్రీనివాసయతీంద్రోక్తం లక్ష్మీనృహరిమంగళం |
యే పఠంతి మహాత్మానస్తేషాం భూయాత్తు మంగళం || 10 ||

 శ్రీ నృసింహ స్తుతి (శనైశ్చర కృతం)

శ్రీ కృష్ణ ఉవాచ |
సులభో భక్తియుక్తానాం దుర్దర్శో దుష్టచేతసాం |
అనన్యగతికానాం చ ప్రభుర్భక్తైకవత్సలః || 1
శనైశ్చరస్తత్ర నృసింహదేవ
స్తుతిం చకారామల చిత్తవృతిః |
ప్రణంయ సాష్టాంగమశేషలోక
కిరీట నీరాజిత పాదపద్మం || 2 ||
శ్రీ శనిరువాచ |
యత్పాదపంకజరజః పరమాదరేణ
సంసేవితం సకలకల్మషరాశినాశం |
కల్యాణకారకమశేషనిజానుగానాం
స త్వం నృసింహ మయి దేహి కృపావలోకం || 3 ||
సర్వత్ర చంచలతయా స్థితయా హి లక్ష్ంయా
బ్రహ్మాదివంద్యపదయా స్థిరయాన్యసేవీ |
పాదారవిందయుగళం పరమాదరేణ
స త్వం నృసింహ మయి దేహి కృపావలోకం || 4 ||
యద్రూపమాగమశిరః ప్రతిపాద్యమాద్యం
ఆధ్యాత్మికాది పరితాపహరం విచింత్యం |
యోగీశ్వరైరపగతాఽఖిలదోషసంఘైః
స త్వం నృసింహ మయి దేహి కృపావలోకం || 5 ||
ప్రహ్లాదభక్తవచసా హరిరావిరాసీత్
స్తంభే హిరణ్యకశిపుం య ఉదారభావః |
ఊర్వో నిధాయ ఉదరం నఖరైర్దదార
స త్వం నృసింహ మయి దేహి కృపావలోకం || 6 ||
యో నైజభక్తమనలాంబుధి భూధరోగ్ర-
-శృంగప్రపాత విషదంతసరీసృపేభ్యః |
సర్వాత్మకః పరమకారుణికో రరక్ష
స త్వం నృసింహ మయి దేహి కృపావలోకం || 7 ||
యన్నిర్వికార పరరూప విచింతనేన
యోగీశ్వరా విషయవీత సమస్తరాగాః |
విశ్రాంతిమాపుర వినాశవతీం పరాఖ్యాం
స త్వం నృసింహ మయి దేహి కృపావలోకం || 8 ||
యద్రూపముగ్రమరిమర్దన భావశాలీ
సంచింతనేన సకలాభవభీతిహారీ | [అఘవినాశకారి] భూత జ్వర గ్రహ సముద్భవ భీతినాశం
స త్వం నృసింహ మయి దేహి కృపావలోకం || 9 ||
యస్యోత్తమం యశ ఉమాపతిమగ్రజన్మ
శక్రాది దైవత సభాసు సమస్తగీతం |
శ్రుత్వైక సర్వశమలప్రశమేకదక్షం [శక్త్యైవ] స త్వం నృసింహ మయి దేహి కృపావలోకం || 10 ||
శ్రీకృష్ణ ఉవాచ |
ఇత్థం శ్రుత్వా స్తుతిం దేవః శనినా కల్పితాం హరిః |
ఉవాచ బ్రహ్మ వృందస్థం శనిం తం భక్తవత్సలః || 11 ||
శ్రీనృసింహ ఉవాచ |
ప్రసన్నోఽహం శనే తుభ్యం వరం వరయ శోభనం |
యం వాంఛసి తమేవ త్వం సర్వలోక హితావహం || 12 ||
శ్రీ శనిరువాచ |
నృసింహ త్వం మయి కృపాం కురు దేవ దయానిధే |
మద్వాసరస్తవ ప్రీతికరః స్యాద్దేవతాపతే || 13 ||
మత్కృతం త్వత్పరం స్తోత్రం శృణ్వన్తి చ పఠన్తి చ |
సర్వాన్ కామన్ పూరయేథాః తేషాం త్వం లోకభావన || 14 ||
శ్రీ నృసింహ ఉవాచ |
తథైవాస్తు శనేఽహం వై రక్షో భువనసంస్థితః |
భక్త కామాన్ పూరయిష్యే త్వం మమైకం వచః శృణు || 15 ||
త్వత్కృతం మత్పరం స్తోత్రం యః పఠేచ్ఛృణుయాచ్చ యః |
ద్వాదశాష్టమ జన్మస్థాత్ త్వద్భయం మాస్తు తస్య వై || 16 ||
శనిర్నరహరిం దేవం తథేతి ప్రత్యువాచ హ |
తతః పరమసంతుష్టో జయేతి మునయోవదన్ || 17 ||
శ్రీ కృష్ణ ఉవాచ |
ఇదం శనైశ్చరస్యాథ నృసింహ దేవ
సంవాదమేతత్ స్తవనం చ మానవః |
శృణోతి యః శ్రావయతే చ భక్త్యా
సర్వాణ్యభీష్టాని చ విన్దతే ధ్రువం || 18 ||
ఇతి శ్రీ భవిష్యోత్తరపురాణే శ్రీ శనైశ్చర కృత శ్రీ నృసింహ స్తుతిః |

శ్రీ నృసింహాష్టకం

శ్రీమదకలంక పరిపూర్ణ శశికోటి-
-శ్రీధర మనోహర సటాపటల కాంత |
పాలయ కృపాలయ భవాంబుధినిమగ్నం
దైత్యవరకాల నరసింహ నరసింహ || 1 ||
పాదకమలావనత పాతకిజనానాం
పాతకదవానల పతత్రివరకేతో |
భావన పరాయణ భవార్తిహరయా మాం
పాహి కృపయైవ నరసింహ నరసింహ || 2 ||
తుంగనఖపంక్తిదలితాసురవరాసృక్
పంకనవకుంకుమవిపంకిలమహోరః |
పండితనిధాన కమలాలయ నమస్తే
పంకజనిషణ్ణ నరసింహ నరసింహ || 3 ||
మౌళిషు విభూషణమివామర వరాణాం
యోగిహృదయేషు చ శిరః సునిగమానాం |
రాజదరవిందరుచిరం పదయుగం తే
దేహి మమ మూర్ధ్ని నరసింహ నరసింహ || 4 ||
వారిజవిలోచన మదంతిమదశాయాం
క్లేశవివశీకృత సమస్తకరణాయాం |
ఏహి రమయా సహ శరణ్య విహగానాం-
-నాథమధిరుహ్య నరసింహ నరసింహ || 5 ||
హాటకకిరీటవరహారవనమాలా
ధారరశనామకరకుండలమణీంద్రైః |
భూషితమశేషనిలయం తవ వపుర్మే
చేతసి చకాస్తు నరసింహ నరసింహ || 6 ||
ఇందు రవి పావక విలోచన రమాయాః
మందిర మహాభుజలసద్వరరథాంగ |
సుందర చిరాయ రమతాం త్వయి మనో మే
నందిత సురేశ నరసింహ నరసింహ || 7 ||
మాధవ ముకుంద మధుసూదన మురారే
వామన నృసింహ శరణం భవ నతానాం |
కామద ఘృణిన్ నిఖిలకారణ నయేయం
కాలమమరేశ నరసింహ నరసింహ || 8 ||
అష్టకమిదం సకలపాతకభయఘ్నం
కామదమశేషదురితామయరిపుఘ్నం |
యః పఠతి సంతతమశేషనిలయం తే
గచ్ఛతి పదం స నరసింహ నరసింహ || 9 ||

శ్రీ నృసింహావతార చూర్ణికా

ఇత్థం దానవేంద్రః హిరణ్యకశిపుః పరిగృహ్యమాణవైరః, వైరానుబంధజాజ్వల్యమానరోషానలః, రోషానలజంఘన్యమానవిజ్ఞానవినయః, వినయగాంభీర్యజేగీయమానహృదయః, హృదయచాంచల్యమానతామసః, తామసగుణచంక్రమాణస్థైర్యో భూత్వా, విస్రంభేణ హుంకృత్య, బాలం ప్రహ్లాదం పరమభాగవతం ధిక్కృత్య భగవంతం శ్రియఃపతిం అస్మిన్ స్తంభే దర్శయేతి, కనత్కనకమయకంకణ క్రేంకారశబ్దపూర్వకం దిగ్దంతిదంతభేదనపాటవప్రశస్తేన హస్తేన సభామండపస్తంభే ప్రతాడితే, ప్రక్షుభిత పరివిదలితదశదిగంతాత్ తన్మహాస్తంభాత్ బంభజ్యమానాత్, ప్రోద్భూతైః జంజన్యమానైః, ప్రలయవేలాసంభూత సప్తస్కంధబంధురసమీరణసంఘటిత ఘోరరజోఘుష్యమాణ మహాబలాహకవర్గనిర్గత-నిబిడనిష్ఠుర దుస్సహనిర్ఘాతసంఘ నిఘోషనికాశచ్ఛటచ్ఛట స్ఫటస్ఫటద్ధ్వనిప్రముఖ భయంకరారవపుంజైః పరివ్యాప్తైః నిరవకాశం ఆకాశకుహరాంతరాలేషు పరిపూరితేషు, ప్రక్షుభితప్రకంపితస్వస్వస్థానతయా పరవశైః నితాంతదోధూయమానహృదయైః పితామహ మహేంద్ర వరుణ వాయుశిఖిముఖ చరాచరజంతుజాలైః సహ బ్రహ్మాండకటాహేషు పరిస్ఫోటితేషు, భగవాన్ శ్రియః పతిః శ్రీమన్నారాయణః, భక్తానామభయంకరః, దుష్టనిగ్రహ శిష్టపరిపాలనక్షమః, శరణాగతవత్సలః, ప్రఫుల్లపద్మయుగలసంకాశభాస్వర చక్రచాపహలకులిశజలచరరేఖాంకిత చారుచరణతలః, చరణచంక్రమణ ఘనవినమిత విశ్వవిశ్వంభరాభారధౌరేయ దిక్కుంభికుంభినసకుంభినీధరకూర్మకులశేఖరః, జలరాశిజాత శుండాల శుండాదండమండిత ప్రకాండప్రచండమహోరుస్తంభయుగలః, ఘణఘణాయమాన మణికింకిణీకణముఖరిత మేఖలావలయవలయిత పీతాంబరపరిశోభిత కటిప్రదేశః, నిర్జరనింనగావర్తవర్తులకమలాకర గంభీరనాభివివరః, కులాచలసానుభాగసదృశ కర్కశవిశాలవక్షస్థలః, దుర్జనదనుజధైర్యలతికాలవిత్రాయమాణ
రక్షోరాజవక్షోభాగ విశంకటక్షేత్రవిలేఖనచంగలాంగలాయమాన-శరణాగతనయన చకోరచంద్రరేఖాయమాణ వజ్రాయుధప్రతిమానభాసమాన నిశాతనఖరతరముఖనఖరః, శంఖచక్ర గదాఖడ్గ కుంతతోమరప్రముఖ నానాయుధః, మహితమహోత్తుంగ మహీధరశృంగసన్నిభః, వీరసాగరవేలాయమాన మాలికావిరాజమానః, నిరర్గలానేకశతభుజార్గలః, మంజుమంజీర మణిపుంజరంజిత మంజులహారకేయూరకంకణకిరీట-మకరకుండలాదిభూషణభూషితః, త్రివలియుతశిఖరిశిఖరాభపరిణద్ధ బంధురకంధరః, ప్రకంపనకంపిత పారిజాతపాదప పల్లవప్రతీకాశకోపావేశసంచలితాధరః, శరత్కాల మేఘజాలమధ్య ధగద్ధగాయమాన తటిల్లతాసమాన దేదీప్యమాన దంష్ట్రాంకురః, కల్పాంతకాల సకలభువనగ్రసనవిలసన విజృంభమాణ సప్తజిహ్వజిహ్వాతులిత తరలతరాయమాణ విభ్రాజమానజిహ్వః, మేరుమందర మహాగుహాంతరాల విస్తారవిపుల వక్త్రనాసికారంధ్రః నాసికారంధ్ర నిస్సరన్నిబిడనిశ్వాసనికరసంఘట్టనసంక్షోభిత సంతప్యమాన సప్తసాగరః, పూర్వపర్వతవిద్యోతమాన ఖద్యోతమండలసదృక్ష సమంచితలోచనః, లోచనాంచలసముత్కీర్యమాణ విలోలకీలాభీల విస్ఫులింగవితానరోరుధ్యమాన తారకాగ్రహమండలః, శక్రచాపసురుచిరాదభ్ర మహాభ్రూలతాబంధబంధుర భయంకరవదనః, ఘనతరగండశైలతుల్య కమనీయ గండభాగః, సంధ్యారాగరక్తధారాధర మాలికాప్రతిమ మహాభ్రంకషతంతన్యమానపటుతర సటాజాలః, సటాజాలసంచాలసంజాత వాతాహతిడోలాయమాన వైమానికవిమానః, నిష్కంపితశంఖవర్ణమహోర్ధ్వకర్ణః, మంథదండాయమాన మందరవసుంధరాధర పరిభ్రమణవేగసముత్పద్యమాన వియన్మండలమండిత సుధారాశికల్లోల శీకరాకారభాసురకేసరః, పర్వాఖర్వశిశిరకిరణమయూఖ గౌరతనూరుహః, నిజగర్జానినదనిర్దలిత కుముదసుప్రతీకవామనై రావణసార్వభౌమప్రముఖ దిగిభరాజకర్ణకోటరః,
ధవలధరాధర దీర్ఘదురవలోకనీయ దివ్యదేహః, దేహప్రభా పటలనిర్మథ్యమాన పరిపంథియాతుధాన నికురుంబగర్వాంధకారః, ప్రహ్లాదహిరణ్యకశిపు రంజనభంజన నిమిత్తాంతరంగ బహిరంగ జేగీయమాన కరుణావీరరస సంయుతః, మహాప్రభావః, శ్రీనారాయణనరసింహః, నారాయణవీరసింహః, నారాయణక్రూరసింహః, నారాయణదివ్యసింహః, నారాయణవ్యాఘ్రసింహః, నారాయణపుచ్ఛసింహః, నారాయణపూర్ణసింహః, నారాయణరౌద్రసింహః, భీషణభద్రసింహః, విహ్వలనేత్రసింహః, బృంహితభూతసింహః, నిర్మలచిత్రసింహః, నిర్జితకాలసింహః, కల్పితకల్పసింహః, కామదకామసింహః, భువనైకపూర్ణసింహః, కాలాగ్నిరుద్రసింహః, అనంతసింహరాజసింహః, జయసింహరూపసింహః, నరసింహరూపసింహః, రణసింహరూపసింహః, మహాసింహరూపసింహః, అభయంకరరూపసింహః, హిరణ్యకశిపుహారిసింహః, ప్రహ్లాదవరదసింహః, భక్తాభీష్టదాయిసింహః, లక్ష్మీనృసింహరూపసింహః, అత్యద్భుతరూపసింహః, శ్రీనృసింహదేవః, ఆత్మనః సకలభువనవ్యాప్తిం నిజభృత్యభాషితం చ సత్యం విధాతుం, ప్రపన్నరక్షణాయ పరిస్ఫోటిత తన్మహాస్తంభే పర్యదృశ్యత, పర్యదృశ్యత |

 శ్రీ అహోబల నృసింహ స్తోత్రం

లక్ష్మీకటాక్షసరసీరుహరాజహంసం
పక్షీంద్రశైలభవనం భవనాశమీశం |
గోక్షీరసార ఘనసారపటీరవర్ణం
వందే కృపానిధిమహోబలనారసింహం || 1 ||
ఆద్యంతశూన్యమజమవ్యయమప్రమేయం
ఆదిత్యచంద్రశిఖిలోచనమాదిదేవం |
అబ్జాముఖాబ్జమదలోలుపమత్తభృంగం
వందే కృపానిధిమహోబలనారసింహం || 2 ||
కోటీరకోటిఘటితోజ్జ్వలకాంతికాంతం
కేయూరహారమణికుండలమండితాంగం |
చూడాగ్రరంజితసుధాకరపూర్ణబింబం
వందే కృపానిధిమహోబలనారసింహం || 3 ||
వరాహవామననృసింహసుభాగ్యమీశం
క్రీడావిలోలహృదయం విబుధేంద్రవంద్యం |
హంసాత్మకం పరమహంసమనోవిహారం
వందే కృపానిధిమహోబలనారసింహం || 4 ||
మందాకినీజననహేతుపదారవిందం
బృందారకాలయవినోదనముజ్జ్వలాంగం |
మందారపుష్పతులసీరచితాంఘ్రిపద్మం
వందే కృపానిధిమహోబలనారసింహం || 5 ||
తారుణ్యకృష్ణతులసీదళధామరంయం
ధాత్రీరమాభిరమణం మహనీయరూపం |
మంత్రాధిరాజమథదానవమానభృంగం
వందే కృపానిధిమహోబలనారసింహం || 6 ||

శ్రీ ఘటికాచల యోగనృసింహ మంగళం

ఘటికాచలశృంగాగ్ర విమానోదరవాసినే |
నిఖిలామరసేవ్యాయ నరసింహాయ మంగళం || 1 ||
ఉదీచీరంగనివసత్ సుమనస్తోమసూక్తిభిః |
నిత్యాభివృద్ధయశసే నరసింహాయ మంగళం || 2 ||
సుధావల్లీపరిష్వంగసురభీకృతవక్షసే |
ఘటికాద్రినివాసాయ శ్రీనృసింహాయ మంగళం || 3 ||
సర్వారిష్టవినాశాయ సర్వేష్టఫలదాయినే |
ఘటికాద్రినివాసాయ శ్రీనృసింహాయ మంగళం || 4 ||
మహాగురుమనఃపద్మమధ్యనిత్యనివాసినే |
భక్తోచితాయ భవతాత్ మంగళం శాశ్వతీః సమాః || 5 ||
శ్రీమత్యై విష్ణుచిత్తార్యమనోనందన హేతవే |
నందనందనసుందర్యై గోదాయై నిత్యమంగళం || 6 ||
శ్రీమన్మహాభూతపురే శ్రీమత్కేశవయజ్వనః |
కాంతిమత్యాం ప్రసూతాయ యతిరాజాయ మంగళం || 7 ||
పాదుకే యతిరాజస్య కథయంతి యదాఖ్యయా |
తస్య దాశరథేః పాదౌ శిరసా ధారయాంయహం || 8 ||
శ్రీమతే రంయజామాతృమునీంద్రాయ మహాత్మనే |
శ్రీరంగవాసినే భూయాత్ నిత్యశ్రీః నిత్యమంగళం || 9 ||
సౌంయజామాతృయోగీంద్ర చరణాంబుజషట్పదం |
దేవరాజగురుం వందే దివ్యజ్ఞానప్రదం శుభం || 10 ||
వాధూలశ్రీనివాసార్యతనయం వినయాధికం |
ప్రజ్ఞానిధిం ప్రపద్యేఽహం శ్రీనివాసమహాగురుం || 11 ||
చండమారుతవేదాంతవిజయాదిస్వసూక్తిభిః |
వేదాంతరక్షకాయాస్తు మహాచార్యాయ మంగళం || 12 ||
ఇతి శ్రీ ఘటికాచల యోగనృసింహ మంగళ స్తోత్రం |