Sacred Stotras & Deities

శ్రీ మట్టపల్లి నృసింహ మంగళాష్టకం

శ్రీ మట్టపల్లి నృసింహ మంగళాష్టకం.

Telugu

శ్రీ మట్టపల్లి నృసింహ మంగళాష్టకం

మట్టపల్లినివాసాయ మధురానందరూపిణే |
మహాయజ్ఞస్వరూపాయ శ్రీనృసింహాయ మంగళం || 1 ||
కృష్ణవేణీతటస్థాయ సర్వాభీష్టప్రదాయినే |
ప్రహ్లాదప్రియరూపాయ శ్రీనృసింహాయ మంగళం || 2 ||
కర్తస్థితాయ ధీరాయ గంభీరాయ మహాత్మనే |
సర్వారిష్టవినాశాయ శ్రీనృసింహాయ మంగళం || 3 ||
ఋగ్యజుః సామరూపాయ మంత్రారూఢాయ ధీమతే |
శ్రితానాం కల్పవృక్షాయ శ్రీనృసింహాయ మంగళం || 4 ||
గుహాశయాయ గుహ్యాయ గుహ్యవిద్యాస్వరూపిణే |
గుహరాంతే విహారాయ శ్రీనృసింహాయ మంగళం || 5 ||
శ్రీపల్యద్రిమధ్యస్థాయ నిధయే మధురాయ చ |
సుఖప్రదాయ దేవాయ శ్రీనృసింహాయ మంగళం || 6 ||
తాపనీయరహస్యాయ తాపత్రయవినాశినే |
నతానాం పారిజాతాయ శ్రీనృసింహాయ మంగళం || 7 ||
రాజ్యలక్ష్ంయా సమేతాయ రాగద్వేషవినాశినే
మట్టపల్లినివాసాయ శ్రీనృసింహాయ మంగళం || 8 ||
ముక్కూర్ నృసింహదాసేన ప్రోక్తం మంగళమద్భుతం |
యః పఠేచ్ఛ్రద్ధయా భక్త్యా సర్వపాపైర్విముచ్యతే || 9 ||
ఇతి శ్రీముక్కూర్ లక్ష్మీనృసింహస్వామినా అనుగృహీతం శ్రీ మట్టపల్లి నృసింహ మంగళాష్టకం |

శ్రీ మట్టపల్లి నృసింహాష్టకం (పుత్రప్రాప్తికరం)

శ్రీ మట్టపల్లి నృసింహాష్టకం (పుత్రప్రాప్తికరం).

Telugu

Read Stotra

శ్రీ మట్టపల్లి నృసింహాష్టకం (పుత్రప్రాప్తికరం)

ప్రహ్లాదవరదం శ్రేష్ఠం రాజ్యలక్ష్ంయా సమన్వితం |
పుత్రార్థం ప్రార్థయే దేవం మట్టపల్యాధిపం హరిం || 1 ||
భరద్వాజ హృదయాంతే వాసినం వాసవానుజం |
పుత్రార్థం ప్రార్థయే దేవం మట్టపల్యాధిపం హరిం || 2 ||
సుశ్రోణ్యా పూజితం నిత్యం సర్వకామదుఘం హరిం |
పుత్రార్థం ప్రార్థయే దేవం మట్టపల్యాధిపం హరిం || 3 ||
మహాయజ్ఞస్వరూపం తం గుహాయాం నిత్యవాసినం |
పుత్రార్థం ప్రార్థయే దేవం మట్టపల్యాధిపం హరిం || 4 ||
కృష్ణాతీరవిహారం తం కృష్ణాం రక్షితవాన్ స్వయం |
పుత్రార్థం ప్రార్థయే దేవం మట్టపల్యాధిపం హరిం || 5 ||
యమమోహితక్షేత్రేఽస్మిన్ నిత్యవాసప్రియం పరం |
పుత్రార్థం ప్రార్థయే దేవం మట్టపల్యాధిపం హరిం || 6 ||
చక్రిణా పూజితం సంయక్ చక్రిణం సర్వతోముఖం |
పుత్రార్థం ప్రార్థయే దేవం మట్టపల్యాధిపం హరిం || 7 ||
యోగానందం నిత్యానందం నిగమాగమసేవితం |
పుత్రార్థం ప్రార్థయే దేవం మట్టపల్యాధిపం హరిం || 8 ||
శ్రీనృసింహం హృది ధ్యాత్వా ముక్కూర్ నృహరిణా కృతం |
యే పఠంత్యష్టకం నిత్యం ఇష్టప్రాప్తిర్భవిష్యతి || 9 ||
ఇతి శ్రీముక్కూర్ లక్ష్మీనృసింహస్వామినా అనుగృహీతం పుత్రప్రాప్తికరం నామ శ్రీ మట్టపల్లి నృసింహాష్టకం ||

శ్రీనివాస (నృసింహ) స్తోత్రం

శ్రీనివాస (నృసింహ) స్తోత్రం.

Telugu

Read Stotra

శ్రీనివాస (నృసింహ) స్తోత్రం

అథ విబుధవిలాసినీషు విష్వ-
-ఙ్మునిమభితః పరివార్య తస్థుషీషు |
మదవిహృతివికత్థనప్రలాపా-
-స్వవమతినిర్మితనైజచాపలాసు || 1 ||
త్రిభువనముదముద్యతాసు కర్తుం
మధుసహసాగతిసర్వనిర్వహాసు |
మధురసభరితాఖిలాత్మభావా-
-స్వగణితభీతిషు శాపతశ్శుకస్య || 2 ||
అతివిమలమతిర్మహానుభావో
మునిరపి శాంతమనా నిజాత్మగుప్త్యై |
అఖిలభువనరక్షకస్య విష్ణోః
స్తుతిమథ కర్తుమనా మనాగ్బభూవ || 3 ||
శ్రియఃశ్రియం షడ్గుణపూరపూర్ణం
శ్రీవత్సచిహ్నం పురుషం పురాణం |
శ్రీకంఠపూర్వామరబృందవంద్యం
శ్రియఃపతిం తం శరణం ప్రపద్యే || 4 ||
విభుం హృది స్వం భువనేశమీడ్యం
నీళాశ్రయం నిర్మలచిత్తచింత్యం |
పరాత్పరం పామరపారమేన-
-ముపేంద్రమూర్తిం శరణం ప్రపద్యే || 5 ||
స్మేరాతసీసూనసమానకాంతిం
సురక్తపద్మప్రభపాదహస్తం |
ఉన్నిద్రపంకేరుహచారునేత్రం
పవిత్రపాణిం శరణం ప్రపద్యే || 6 ||
సహస్రభానుప్రతిమోపలౌఘ-
-స్ఫురత్కిరీటప్రవరోత్తమాంగం |
ప్రవాలముక్తానవరత్నహార-
-తారం హరిం తం శరణం ప్రపద్యే || 7 ||
పురా రజోదుష్టధియో విధాతు-
-రపాహృతాన్ యో మధుకైటభాభ్యాం |
వేదానుపాదాయ దదౌ చ తస్మై
తం మత్స్యరూపం శరణం ప్రపద్యే || 8 ||
పయోధిమధ్యేఽపి చ మందరాద్రిం
ధర్తుం చ యః కూర్మవపుర్బభూవ |
సుధాం సురాణామవనార్థమిచ్ఛం-
-స్తమాదిదేవం శరణం ప్రపద్యే || 9 ||
వసుంధరామంతరదైత్యపీడాం
రసాతలాంతర్వివశాభివిష్టాం |
ఉద్ధారణార్థం చ వరాహ ఆసీ-
-చ్చతుర్భుజం తం శరణం ప్రపద్యే || 10 ||
నఖైర్వరైస్తీక్ష్ణముఖైర్హిరణ్య-
-మరాతిమామర్దితసర్వసత్త్వం |
విదారయామాస చ యో నృసింహో
హిరణ్యగర్భం శరణం ప్రపద్యే || 11 ||
మహన్మహత్వేంద్రియపంచభూత-
-తన్మాత్రమాత్రప్రకృతిః పురాణీ |
యతః ప్రసూతా పురుషాస్తదాత్మా
తమాత్మనాథం శరణం ప్రపద్యే || 12 ||
పురా య ఏతత్సకలం బభూవ
యేనాపి తద్యత్ర చ లీనమేతత్ |
ఆస్తాం యతోఽనుగ్రహనిగ్రహౌ చ
తం శ్రీనివాసం శరణం ప్రపద్యే || 13 ||
నిరామయం నిశ్చలనీరరాశి-
-నీకాశసద్రూపమయం మహస్తత్ |
నియంతృ నిర్మాతృ నిహంతృ నిత్యం
నిద్రాంతమేనం శరణం ప్రపద్యే || 14 ||
జగంతి యః స్థావరజంగమాని
సంహృత్య సర్వాణ్యుదరేశయాని |
ఏకార్ణవాంతర్వటపత్రతల్పే
స్వపిత్యనంతం శరణం ప్రపద్యే || 15 ||
నిరస్తదుఃఖౌఘమతీంద్రియం తం
నిష్కారణం నిష్కలమప్రమేయం |
అణోరణీయాంసమనంతమంత-
-రాత్మానుభావం శరణం ప్రపద్యే || 16 ||
సప్తాంబుజీరంజకరాజహాసం
సప్తార్ణవీసంసృతికర్ణధారం |
సప్తాశ్వబింబాశ్వహిరణ్మయం తం
సప్తార్చిరంగం శరణం ప్రపద్యే || 17 ||
నిరాగసం నిర్మలపూర్ణబింబం
నిశీథినీనాథనిభాననాభం |
నిర్ణీతనిద్రం నిగమాంతనిత్యం
నిఃశ్రేయసం తం శరణం ప్రపద్యే || 18 ||
నిరామయం నిర్మలమప్రమేయం
నిజాంతరారోపితవిశ్వబింబం |
నిస్సీమకల్యాణగుణాత్మభూతిం
నిధిం నిధీనాం శరణం ప్రపద్యే || 19 ||
త్వక్చర్మమాంసాస్థ్యసృగశ్రుమూత్ర-
-శ్లేష్మాంత్రవిట్చ్ఛుక్లసముచ్చయేషు |
దేహేష్వసారేషు న మే స్పృహైషా
ధ్రువం ధ్రువం త్వం భగవన్ ప్రసీద || 20 ||
గోవింద కేశవ జనార్దన వాసుదేవ
విశ్వేశ విశ్వ మధుసూదన విశ్వరూప |
శ్రీపద్మనాభ పురుషోత్తమ పుష్కరాక్ష
నారాయణాచ్యుత నృసింహ నమో నమస్తే || 21 ||
దేవాః సమస్తామరయోగిముఖ్యాః
గంధర్వవిద్యాధరకిన్నరాశ్చ |
యత్పాదమూలం సతతం నమంతి
తం నారసింహం శరణం ప్రపద్యే || 22 ||
వేదాన్ సమస్తాన్ ఖలు శాస్త్రగర్భాన్
ఆయుః స్థిరం కీర్తిమతీవ లక్ష్మీం |
యస్య ప్రసాదాత్ పురుషా లభంతే
తం నారసింహం శరణం ప్రపద్యే || 23 ||
బ్రహ్మా శివస్త్వం పురుషోత్తమశ్చ
నారాయణోఽసౌ మరుతాం‍పతిశ్చ |
చంద్రార్కవాయ్వగ్నిమరుద్గణాశ్చ
త్వమేవ నాన్యత్ సతతం నతోఽస్మి || 24 ||
స్రష్టా చ నిత్యం జగతామధీశః
త్రాతా చ హంతా విభురప్రమేయః |
ఏకస్త్వమేవ త్రివిధా విభిన్నః
త్వాం సింహమూర్తిం సతతం నతోఽస్మి || 25 ||

శ్రీ కార్తికేయ స్తోత్రం

శ్రీ కార్తికేయ స్తోత్రం.

Telugu

Read Stotra

శ్రీ కార్తికేయ స్తోత్రం

కార్తికేయ కరుణామృతరాశే
కార్తికే యతహృదా తవ పూజా |
పూర్తయే భవతి వాంఛితపంక్తేః
కీర్తయే చ రచితా మనుజేన || 1 ||
అత్యంతపాపకర్మా
మత్తుల్యో నాస్తి భూతలే గుహ భో |
పూరయసి యది మదిష్టం
చిత్రం లోకస్య జాయతే భూరి || 2 ||
కారాగృహస్థితం య-
-శ్చక్రే లోకేశమపి విధాతారం |
తమనుల్లంఘితశాసన-
-మనిశం ప్రణమామి షణ్ముఖం మోదాత్ || 3 ||
నాహం మంత్రజపం తే
సేవాం సపర్యాం వా |
నైసర్గిక్యా కృపయా
మదభీష్టం పూరయాశు తద్గుహ భో || 4 ||
నిఖిలానపి మమ మంతూ-
-న్సహసే నైవాత్ర సంశయః కశ్చిత్ |
యస్మాత్సహమానసుత-
-స్త్వమసి కృపావారిధే షడాస్య విభో || 5 ||
యది మద్వాచ్ఛితదానే
శక్తిర్నాస్తీతి షణ్ముఖ బ్రూషే |
తదనృతమేవ స్యాత్తే
వాక్యం శక్తిం దధాసి యత్పాణౌ || 6 ||
మయూరస్య పత్రే ప్రలంబం పదాబ్జం
దధానం కకుద్యేవ తస్యాపరం చ |
సురేంద్రస్య పుత్ర్యా చ వల్ల్యా చ పార్శ్వ-
-ద్వయం భాసయంతం షడాస్యం భజేఽహం || 7 ||
వివేకం విరక్తిం శమాదేశ్చ షట్కం
ముముక్షాం చ దత్త్వా షడాస్యాశు మహ్యం |
విచారే చ బుద్ధిం దృఢాం దేహి వల్లీ-
-సురేంద్రాత్మజాశ్లిష్టవర్ష్మన్నమస్తే || 8 ||
సురేశానపుత్రీపులిందేశకన్యా-
-సమాశ్లిష్టపార్శ్వం కృపావారిరాశిం |
మయూరాచలాగ్రే సదా వాసశీలం
సదానందదం నౌమి షడ్వక్త్రమీశం || 9 ||
స్వభక్తైర్మహాభక్తితః పక్వదేహా-
-న్సమానీయ దూరాత్పురా స్థాపితాన్యః |
క్షణాత్కుక్కుటాదీన్పునః ప్రాణయుక్తా-
-న్కరోతి స్మ తం భావయేఽహం షడాస్యం || 10 ||
రవజితపరపుష్టరవ
స్వరధిపపుత్రీమనోఽబ్జశిశుభానో |
పురతో భవ మమ శీఘ్రం
పురహరమోదాబ్ధిపూర్ణిమాచంద్ర || 11 ||
శతమఖముఖసురపూజిత
నతమతిదానప్రచండపదసేవ |
శ్రితజనదుఃఖవిభేద-
-వ్రతధృతకంకణ నమోఽస్తు గుహ తుభ్యం || 12 ||
వృష్టిం ప్రయచ్ఛ షణ్ముఖ
మయ్యపి పాపే కృపాం విధాయాశు |
సుకృతిషు కరుణాకరణే
కా వా శ్లాఘా భవేత్తవ భో || 13 ||
మహీజలాద్యష్టతనోః పురాణాం
హరస్య పుత్ర ప్రణతార్తిహారిన్ |
ప్రపన్నతాపస్య నివారణాయ
ప్రయచ్ఛ వృష్టిం గుహ షణ్ముఖాశు || 14 ||
పాదాబ్జనంరాఖిలదేవతాలే
సుదామసంభూషితకంబుకంఠ |
సౌదామనీకోటినిభాంగకాంతే
ప్రయచ్ఛ వృష్టిం గుహ షణ్ముఖాశు || 15 ||
శిఖిస్థితాభ్యాం రమణీమణిభ్యాం
పార్శ్వస్థితాభ్యాం పరిసేవ్యమానం |
స్వయం శిఖిస్థం కరుణాసముద్రం
సదా షడాస్యం హృది భావయేఽహం || 16 ||
భూయాద్భూత్యై మహత్యై భవతనుజననశ్చూర్ణితక్రౌంచశైలో
లీలాసృష్టాండకోటిః కమలభవముఖస్తూయమానాత్మకీర్తిః |
వల్లీదేవేంద్రపుత్రీహృదయసరసిజప్రాతరాదిత్యపుంజః
కారుణ్యాపారవారాంనిధిరగతనయామోదవారాశిచంద్రః || 17 ||
ఇతి శ్రీశృంగేరిజగద్గురు శ్రీసచ్చిదానంద శివాభినవనృసింహభారతీ స్వామిభిః విరచితం శ్రీ కార్తికేయ స్తోత్రం |

శ్రీ కార్తికేయాష్టకం

శ్రీ కార్తికేయాష్టకం.

Telugu

Read Stotra

శ్రీ కార్తికేయాష్టకం

అగస్త్య ఉవాచ |
నమోఽస్తు బృందారకబృందవంద్య-
-పాదారవిందాయ సుధాకరాయ |
షడాననాయామితవిక్రమాయ
గౌరీహృదానందసముద్భవాయ || 1 ||
నమోఽస్తు తుభ్యం ప్రణతార్తిహంత్రే
కర్త్రే సమస్తస్య మనోరథానాం |
దాత్రే రథానాం పరతారకస్య
హంత్రే ప్రచండాసురతారకస్య || 2 ||
అమూర్తమూర్తాయ సహస్రమూర్తయే
గుణాయ గణ్యాయ పరాత్పరాయ |
అపారపారాయ పరాపరాయ
నమోఽస్తు తుభ్యం శిఖివాహనాయ || 3 ||
నమోఽస్తు తే బ్రహ్మవిదాం వరాయ
దిగంబరాయాంబరసంస్థితాయ |
హిరణ్యవర్ణాయ హిరణ్యబాహవే
నమో హిరణ్యాయ హిరణ్యరేతసే || 4 ||
తపః స్వరూపాయ తపోధనాయ
తపః ఫలానాం ప్రతిపాదకాయ |
సదా కుమారాయ హిమారమారిణే
తృణీకృతైశ్వర్య విరాగిణే నమః || 5 ||
నమోఽస్తు తుభ్యం శరజన్మనే విభో
ప్రభాతసూర్యారుణదంతపంక్తయే |
బాలాయ చాబాలపరాక్రమాయ షా-
-ణ్మాతురాయాలమనాతురాయ || 6 ||
మీఢుష్టమాయోత్తరమీఢుషే నమో
నమో గణానాం పతయే గణాయ |
నమోఽస్తు తే జన్మజరాతిగాయ
నమో విశాఖాయ సుశక్తిపాణయే || 7 ||
సర్వస్య నాథస్య కుమారకాయ
క్రౌంచారయే తారకమారకాయ |
స్వాహేయ గాంగేయ చ కార్తికేయ
శైవేయ తుభ్యం సతతం నమోఽస్తు || 8 ||
ఇతి శ్రీస్కాందే మహాపురాణే కాశీఖండే పంచవింశతితమోఽధ్యాయే శ్రీ కార్తికేయాష్టకం |

శ్రీ కుమార కవచం

శ్రీ కుమార కవచం.

Telugu

Read Stotra

శ్రీ కుమార కవచం

ఓం నమో భగవతే భవబంధహరణాయ, సద్భక్తశరణాయ, శరవణభవాయ, శాంభవవిభవాయ, యోగనాయకాయ, భోగదాయకాయ, మహాదేవసేనావృతాయ, మహామణిగణాలంకృతాయ, దుష్టదైత్య సంహార కారణాయ, దుష్క్రౌంచవిదారణాయ, శక్తి శూల గదా ఖడ్గ ఖేటక పాశాంకుశ ముసల ప్రాస తోమర వరదాభయ కరాలంకృతాయ, శరణాగత రక్షణ దీక్షా ధురంధర చరణారవిందాయ, సర్వలోకైక హర్త్రే, సర్వనిగమగుహ్యాయ, కుక్కుటధ్వజాయ, కుక్షిస్థాఖిల బ్రహ్మాండ మండలాయ, ఆఖండల వందితాయ, హృదేంద్ర అంతరంగాబ్ధి సోమాయ, సంపూర్ణకామాయ, నిష్కామాయ, నిరుపమాయ, నిర్ద్వంద్వాయ, నిత్యాయ, సత్యాయ, శుద్ధాయ, బుద్ధాయ, ముక్తాయ, అవ్యక్తాయ, అబాధ్యాయ, అభేద్యాయ, అసాధ్యాయ, అవిచ్ఛేద్యాయ, ఆద్యంత శూన్యాయ, అజాయ, అప్రమేయాయ, అవాఙ్మానసగోచరాయ, పరమ శాంతాయ, పరిపూర్ణాయ, పరాత్పరాయ, ప్రణవస్వరూపాయ, ప్రణతార్తిభంజనాయ, స్వాశ్రిత జనరంజనాయ, జయ జయ రుద్రకుమార, మహాబల పరాక్రమ, త్రయస్త్రింశత్కోటి దేవతానందకంద, స్కంద, నిరుపమానంద, మమ ఋణరోగ శతృపీడా పరిహారం కురు కురు, దుఃఖాతురుం మమానందయ ఆనందయ, నరకభయాన్మాముద్ధర ఉద్ధర, సంసృతిక్లేశసి హి తం మాం సంజీవయ సంజీవయ, వరదోసి త్వం, సదయోసి త్వం, శక్తోసి త్వం, మహాభుక్తిం ముక్తిం దత్వా మే శరణాగతం, మాం శతాయుషమవ, భో దీనబంధో, దయాసింధో, కార్తికేయ, ప్రభో, ప్రసీద ప్రసీద, సుప్రసన్నో భవ వరదో భవ, సుబ్రహ్మణ్య స్వామిన్, ఓం నమస్తే నమస్తే నమస్తే నమః ||

శ్రీ కుమార స్తుతిః (దేవ కృతం)

శ్రీ కుమార స్తుతిః (దేవ కృతం).

Telugu

Read Stotra

శ్రీ కుమార స్తుతిః (దేవ కృతం)

దేవా ఊచుః |
నమః కళ్యాణరూపాయ నమస్తే విశ్వమంగళ |
విశ్వబంధో నమస్తేఽస్తు నమస్తే విశ్వభావన || 2 ||
నమోఽస్తు తే దానవవర్యహంత్రే
బాణాసురప్రాణహరాయ దేవ |
ప్రలంబనాశాయ పవిత్రరూపిణే
నమో నమః శంకరతాత తుభ్యం || 3 ||
త్వమేవ కర్తా జగతాం చ భర్తా
త్వమేవ హర్తా శుచిజ ప్రసీద |
ప్రపంచభూతస్తవ లోకబింబః
ప్రసీద శంభ్వాత్మజ దీనబంధో || 4 ||
దేవరక్షాకర స్వామిన్ రక్ష నః సర్వదా ప్రభో |
దేవప్రాణావనకర ప్రసీద కరుణాకర || 5 ||
హత్వా తే తారకం దైత్యం పరివారయుతం విభో |
మోచితాః సకలా దేవా విపద్భ్యః పరమేశ్వర || 6 ||
ఇతి శ్రీశివమహాపురాణే రుద్రసంహితాయాం కుమారఖండే ద్వాదశోఽధ్యాయే తారకవధానంతరం దేవైః కృత కుమార స్తుతిః |

శ్రీ కుమార స్తుతిః (విప్ర కృతం)

శ్రీ కుమార స్తుతిః (విప్ర కృతం).

Telugu

Read Stotra

శ్రీ కుమార స్తుతిః (విప్ర కృతం)

విప్ర ఉవాచ |
శృణు స్వామిన్వచో మేఽద్య కష్టం మే వినివారయ |
సర్వబ్రహ్మాండనాథస్త్వమతస్తే శరణం గతః || 1 ||
అజమేధాధ్వరం కర్తుమారంభం కృతవానహం |
సోఽజో గతో గృహాన్మే హి త్రోటయిత్వా స్వబంధనం || 2 ||
న జానే స గతః కుత్రాఽన్వేషణం తత్కృతం బహు |
న ప్రాప్తోఽతస్స బలవాన్ భంగో భవతి మే క్రతోః || 3 ||
త్వయి నాథే సతి విభో యజ్ఞభంగః కథం భవేత్ |
విచార్యైవాఽఖిలేశాన కామ పూర్ణం కురుష్వ మే || 4 ||
త్వాం విహాయ శరణ్యం కం యాయాం శివసుత ప్రభో |
సర్వబ్రహ్మాండనాథం హి సర్వామరసుసేవితం || 5 ||
దీనబంధుర్దయాసింధుః సుసేవ్యా భక్తవత్సలః |
హరిబ్రహ్మాదిదేవైశ్చ సుస్తుతః పరమేశ్వరః || 6 ||
పార్వతీనందనః స్కందః పరమేకః పరంతపః |
పరమాత్మాత్మదః స్వామీ సతాం చ శరణార్థినాం || 7 ||
దీనానాథ మహేశ శంకరసుత త్రైలోక్యనాథ ప్రభో
మాయాధీశ సమాగతోఽస్మి శరణం మాం పాహి విప్రప్రియ |
త్వం సర్వప్రభుప్రియః ఖిలవిదబ్రహ్మాదిదేవైస్తుత-
-స్త్వం మాయాకృతిరాత్మభక్తసుఖదో రక్షాపరో మాయికః || 8 ||
భక్తప్రాణగుణాకరస్త్రిగుణతో భిన్నోఽసి శంభుప్రియః
శంభుః శంభుసుతః ప్రసన్నసుఖదః సచ్చిత్స్వరూపో మహాన్ |
సర్వజ్ఞస్త్రిపురఘ్నశంకరసుతః సత్ప్రేమవశ్యః సదా
షడ్వక్త్రః ప్రియసాధురానతప్రియః సర్వేశ్వరః శంకరః |
సాధుద్రోహకరఘ్న శంకరగురో బ్రహ్మాండనాథో ప్రభుః
సర్వేషామమరాదిసేవితపదో మాం పాహి సేవాప్రియ || 9 ||
వైరిభయంకర శంకర జనశరణస్య
వందే తవ పదపద్మం సుఖకరణస్య |
విజ్ఞప్తిం మమ కర్ణే స్కంద నిధేహి
నిజభక్తిం జనచేతసి సదా విధేహి || 10 ||
కరోతి కిం తస్య బలీ విపక్షో
-దక్షోఽపి పక్షోభయాపార్శ్వగుప్తః |
కింతక్షకోప్యామిషభక్షకో వా
త్వం రక్షకో యస్య సదక్షమానః || 11 ||
విబుధగురురపి త్వాం స్తోతుమీశో న హి స్యా-
-త్కథయ కథమహం స్యాం మందబుద్ధిర్వరార్చ్యః |
శుచిరశుచిరనార్యో యాదృశస్తాదృశో వా
పదకమల పరాగం స్కంద తే ప్రార్థయామి || 12 ||
హే సర్వేశ్వర భక్తవత్సల కృపాసింధో త్వదీయోఽస్ంయహం
భృత్యః స్వస్య న సేవకస్య గణపస్యాగః శతం సత్ప్రభో |
భక్తిం క్వాపి కృతాం మనాగపి విభో జానాసి భృత్యార్తిహా
త్వత్తో నాస్త్యపరోఽవితా న భగవన్ మత్తో నరః పామరః || 13 ||
కల్యాణకర్తా కలికల్మషఘ్నః
కుబేరబంధుః కరుణార్ద్రచిత్తః |
త్రిషట్కనేత్రో రసవక్త్రశోభీ
యజ్ఞం ప్రపూర్ణం కురు మే గుహ త్వం || 14 ||
రక్షకస్త్వం త్రిలోకస్య శరణాగతవత్సలః |
యజ్ఞకర్తా యజ్ఞభర్తా హరసే విఘ్నకారిణాం || 15 ||
విఘ్నవారణ సాధూనాం సర్గకారణ సర్వతః |
పూర్ణం కురు మమేశాన సుతయజ్ఞ నమోఽస్తు తే || 16 ||
సర్వత్రాతా స్కంద హి త్వం సర్వజ్ఞాతా త్వమేవ హి |
సర్వేశ్వరస్త్వమీశానో నివేశసకలాఽవనః || 17 ||
సంగీతజ్ఞస్త్వమేవాసి వేదవిజ్ఞః పరః ప్రభుః |
సర్వస్థాతా విధాతా త్వం దేవదేవః సతాం గతిః || 18 ||
భవానీనందనః శంభుతనయో వయునః స్వరాట్ |
ధ్యాతా ధ్యేయః పితౄణాం హి పితా యోనిః సదాత్మనాం || 19 ||
ఇతి శ్రీశివమహాపురాణే రుద్రసంహితాయాం కుమారఖండే షష్ఠోఽధ్యాయే శ్రీకుమారస్తుతిః |

గుహ పంచరత్నం

గుహ పంచరత్నం.

Telugu

Read Stotra

జయ స్కంద స్తోత్రం

జయ స్కంద స్తోత్రం.

Telugu

Read Stotra

జయ స్కంద స్తోత్రం

జయ దేవేంద్రజాకాంత జయ మృత్యుంజయాత్మజ |
జయ శైలేంద్రజాసూనో జయ శంభుగణావృత || 1 ||
జయ తారకదర్పఘ్న జయ విఘ్నేశ్వరానుజ |
జయ దేవేంద్ర జామాతః జయ పంకజలోచన || 2 ||
జయ శంకరసంభూత జయ పద్మాసనార్చిత |
జయ దాక్షాయణీసూనో జయ కాశవనోద్భవ || 3 ||
జయ భాగీరథీసూనో జయ పావకసంభవ |
జయ పద్మజగర్వఘ్న జయ వైకుంఠపూజిత || 4 ||
జయ భక్తేష్టవరద జయ భక్తార్తిభంజన |
జయ భక్తపరాధీన జయ భక్తప్రపూజిత || 5 ||
జయ ధర్మవతాం శ్రేష్ఠ జయ దారిద్ర్యనాశన |
జయ బుద్ధిమతాం శ్రేష్ఠ జయ నారదసన్నుత || 6 ||
జయ భోగీశ్వరాధీశ జయ తుంబురుసేవిత |
జయ షట్తారకారాధ్య జయ వల్లీమనోహర || 7 ||
జయ యోగసమారాధ్య జయ సుందరవిగ్రహ |
జయ సౌందర్యకూపార జయ వాసవవందిత || 8 ||
జయ షడ్భావరహిత జయ వేదవిదాం వర |
జయ షణ్ముఖదేవేశ జయ భో విజయీ భవ || 9 ||

శ్రీ దండపాణి పంచరత్నం

శ్రీ దండపాణి పంచరత్నం.

Telugu

Read Stotra

శ్రీ దండపాణి పంచరత్నం

చండపాపహరపాదసేవనం
గండశోభివరకుండలద్వయం |
దండితాఖిలసురారిమండలం
దండపాణిమనిశం విభావయే || 1 ||
కాలకాలతనుజం కృపాలయం
బాలచంద్రవిలసజ్జటాధరం |
చేలధూతశిశువాసరేశ్వరం
దండపాణిమనిశం విభావయే || 2 ||
తారకేశసదృశాననోజ్జ్వలం
తారకారిమఖిలార్థదం జవాత్ |
తారకం నిరవధేర్భవాంబుధే-
-ర్దండపాణిమనిశం విభావయే || 3 ||
తాపహారినిజపాదసంస్తుతిం
కోపకామముఖవైరివారకం |
ప్రాపకం నిజపదస్య సత్వరం
దండపాణిమనిశం విభావయే || 4 ||
కామనీయకవినిర్జితాంగజం
రామలక్ష్మణకరాంబుజార్చితం |
కోమలాంగమతిసుందరాకృతిం
దండపాణిమనిశం విభావయే || 5 ||
ఇతి శృంగేరిజగద్గురు శ్రీసచ్చిదానందశివాభినవనృసింహభారతీ స్వామిభిః విరచితం శ్రీదండపాణి పంచరత్నం |

శ్రీ దండాయుధపాణ్యష్టకం

శ్రీ దండాయుధపాణ్యష్టకం.

Telugu

Read Stotra

శ్రీ దండాయుధపాణ్యష్టకం

యః పూర్వం శివశక్తినామకగిరిద్వంద్వే హిడింబాసురే-
-ణానీతే ఫళినీస్థలాంతరగతే కౌమారవేషోజ్జ్వలః |
ఆవిర్భూయ ఘటోద్భవాయ మునయే భూయో వరాన్ ప్రాదిశత్
శ్రీదండాయుధపాణిరాత్తకరుణః పాయాదపాయాత్స మాం || 1 ||
శ్రీమత్పుష్యరథోత్సవేఽన్నమధుదుగ్ధాద్యైః పదార్థోత్తమైః
నానాదేశసమాగతైరగణితైర్యః కావడీసంభృతైః |
భక్తౌఘైరభిషేచితో బహువరాంస్తేభ్యో దదాత్యాదరాత్
శ్రీదండాయుధపాణిరాత్తకరుణః పాయాదపాయత్స మాం || 2 ||
నానాదిగ్భ్య ఉపాగతా నిజమహావేశాన్వితాః సుందరీః
తాసామేత్య నిశాసు యః సుమశరానందానుభూతిచ్ఛలాత్ |
గోపీనాం యదునాథవన్నిజపరానందం తనోతి స్ఫుటం
శ్రీదండాయుధపాణిరాత్తకరుణః పాయాదపాయాత్స మాం || 3 ||
దుష్టానామిహ భూతభావిభవతాం దుర్మార్గసంచారిణాం
కష్టాహంకృతిజన్యకిల్బిషవశాచ్ఛిష్టప్రవిధ్వంసినాం |
శిక్షార్థం నిజపాణినోద్వహతి యో దండాభిధానాయుధం
శ్రీదండాయుధపాణిరాత్తకరుణః పాయాదపాయాత్స మాం || 4 ||
పూర్వం తారకసంజ్ఞకం దితిసుతం యః శూరపద్మాసురం
సింహాస్యం చ నిహత్య వాసవముఖాన్ దేవాన్ జుగోపాఖిలాన్ |
శ్రీవల్ల్యా సహితశ్చ నిస్తులయశాః శ్రీదేవసేన్యా యుతః
శ్రీదండాయుధపాణిరాత్తకరుణః పాయాదపాయాత్స మాం || 5 ||
యస్యాంగస్థితరోమకూపనికరే బ్రహ్మాండకోటిచ్ఛటాః
సౌధాగ్రస్థగవాక్షరంధ్రవిచరత్పీలూపమా ఏవ తాః |
లక్ష్యంతే యమిదృగ్భిరాత్మని తథాభూతస్వవిశ్వాకృతిః
శ్రీదండాయుధపాణిరాత్తకరుణః పాయాదపాయాత్స మాం || 6 ||
సద్యోజాతముఖైశ్చ పంచవదనైః శంభోః సహైకం ముఖం
పార్వత్యా మిలితం విభాతి సతతం యద్వక్త్రషట్కాత్మనా |
తత్తాదృక్ చ్ఛివశక్త్యభేదవిషయవ్యక్త్యుజ్జ్వలాంగం వహన్
శ్రీదండాయుధపాణిరాత్తకరుణః పాయాదపాయాత్స మాం || 7 ||
సత్యం జ్ఞానమనంతమద్వయమితి శ్రుత్యంతవాక్యోదితం
యద్బ్రహ్మాస్తి తదేవ యస్య చ విభోర్మూర్తేః స్వరూపం విదుః |
యోగీంద్రా విమలాశయా హృది నిజానందానుభూత్యున్నతాః
శ్రీదండాయుధపాణిరాత్తకరుణః పాయాదపాయాత్స మాం || 8 ||
ఇదం శ్రీఫళినీదండాయుధపాణ్యష్టకస్తవం |
పఠతామాశు సిద్ధ్యంతి నిఖిలాశ్చ మనోరథాః || 9 ||

Sign In

OTP Verification

శ్రీ మట్టపల్లి నృసింహ మంగళాష్టకం

శ్రీ మట్టపల్లి నృసింహాష్టకం (పుత్రప్రాప్తికరం)

శ్రీనివాస (నృసింహ) స్తోత్రం

శ్రీ కార్తికేయ స్తోత్రం

శ్రీ కార్తికేయాష్టకం

శ్రీ కుమార కవచం

శ్రీ కుమార స్తుతిః (దేవ కృతం)

శ్రీ కుమార స్తుతిః (విప్ర కృతం)

గుహ పంచరత్నం

జయ స్కంద స్తోత్రం

శ్రీ దండపాణి పంచరత్నం

శ్రీ దండాయుధపాణ్యష్టకం

MENU

LINKS

Astrologer Section

Vendor Section

GET ADVICE ON

Download Our Apps